Lesti Wliedek?
1. Għala hemm bżonn li t-tfal tal-iskola jkunu preparati?
1 Iż-żmien qed joqrob biex terġaʼ tibda sena skolastika ġdida. Uliedkom bla dubju se jesperjenzaw sfidi u pressjonijiet ġodda. Se jkollhom ukoll opportunitajiet ġodda biex ‘jixhdu għall-verità.’ (Ġw. 18:37) Huma lesti?
2. Sabiex ikunu preparati, x’għandhom ikunu jafu wliedkom?
2 Uliedkom jifhmu b’mod ċar x’tinvolvi l-parteċipazzjoni f’ċerimonji nazzjonalistiċi u f’festi pagani u għala hu ħażin li jieħdu sehem fihom? Preparati huma għall-pressjoni li se jiffaċċjaw biex jiksbu edukazzjoni iktar għolja, biex joħorġu maʼ tas-sess oppost, u biex jużaw l-alkoħol jew id-droga? Se jgħidu huma sempliċement li attività oġġezzjonabbli tmur kontra r-reliġjon tagħhom, jew jafu kif jispjegaw it-twemmin tagħhom?—1 Pt. 3:15.
3. Il-ġenituri kif jistgħu jużaw il-lejla tal-Qima tal-Familja tagħhom biex jippreparaw lil uliedhom?
3 Użaw il-Lejla tal-Qima tal-Familja: M’għandniex xi ngħidu, x’aktarx li se jkollkom diskussjonijiet matul is-sena skolastika hekk kif uliedkom jesperjenzaw problemi ġodda. Jekk tagħmlu sforz speċjali biex tikkunsidraw kwistjonijiet li għandhom x’jaqsmu mal-iskola qabel ma terġaʼ tibda l-iskola, uliedkom se jħossuhom kunfidenti. Għala ma tużawx waħda jew iktar mil-lejliet tal-Qima tal-Familja għal dan? Forsi tistgħu tistaqsu lil uliedkom x’jinkwetahom l-iktar hekk kif jaħsbu dwar meta jmorru lura l-iskola. Kwistjonijiet li kkunsidrajtu fis-snin taʼ qabel jistgħu jiġu riveduti issa li t-tfal huma akbar u għandhom iktar fehma. (Salm 119:95) Tistgħu tinkludu sessjonijiet taʼ prattika li fihom tagħmluha t’għalliem, taʼ xi ħadd li jagħti l-pariri, jew taʼ student ieħor. Għallmu lil uliedkom kif iwieġbu mill-Bibbja u biex jużaw għodod bħall-ktieb Reasoning u l-kotba Iż-Żgħażagħ Jistaqsu. Waħda omm użat sessjonijiet taʼ prattika biex tipprepara lil uliedha ħalli javviċinaw lill-għalliema ġodda tagħhom fil-bidu taʼ kull sena skolastika u sabiex jgħidulhom li huma Xhieda taʼ Ġeħova.—Ara It-Torri tal-Għassa tal-15 taʼ Diċembru, 2010, paġni 3-5.
4. Ġenituri għaqlin x’se jagħmlu?
4 L-isfidi li ż-żgħażagħ Kristjani jridu jiffaċċjaw matul dawn l-aħħar jiem qed isiru dejjem iktar u iktar “diffiċli biex issib tarfhom.” (2 Tim. 3:1) Ġenituri għaqlin se jipprovaw jaħsbu minn qabel dwar il-problemi li wliedhom se jesperjenzaw u jippreparawhom biex jegħlbuhom. (Prov. 22:3) Qabel ma tibda s-sena skolastika l-ġdida, agħmlu kulma tistgħu biex tgħinu lil uliedkom ikunu lesti.