Gawdi Affarijiet Tajbin Minħabba x-​Xogħol Iebes Tiegħek

1. X’jistaʼ jnaqqsilna ż-​żelu għall-​ministeru?

¹ Il-​bniedem ġie maħluq bl-​għan li “jgawdi affarijiet tajbin minħabba x-​xogħol iebes tiegħu.” (Ekk. 2:24) Madankollu, meta ma narawx riżultati tajbin fil-​ministeru tagħna, l-​iskuraġġiment jistaʼ jisirqilna l-​ferħ u jnaqqsilna ż-​żelu. X’jistaʼ jgħinna nżommu attitudni pożittiva?

2. Għala għandu jkollna stennijiet realistiċi dwar kif in-​nies jirreaġixxu għall-​ministeru tagħna?

² Kun Realistiku fl-​Istennijiet Tiegħek: Ftakar li għalkemm kienu ftit dawk li rreaġixxew b’mod favorevoli għat-​tagħlim taʼ Ġesù, il-​ministeru tiegħu bla dubju kien taʼ suċċess. (Ġw. 17:4) Fit-​tixbiha tiegħu tar-​raġel li ħareġ jiżraʼ, Ġesù bassar li ħafna mill-​qlub fl-​aħħar mill-​aħħar mhumiex se jilqgħu l-​messaġġ tas-​Saltna li hu bħal żerriegħa. (Mt. 13:3-​8, 18-​22) Minkejja dan, l-​isforzi ħabrieka tagħna xorta jwettqu ħafna ġid.

3. Kif nistgħu ‘nagħtu l-​frott’ anki jekk naraw li ftit uħud jirreaġixxu b’mod favorevoli għall-​ippritkar tagħna?

³ Kif Nagħtu Ħafna Frott: Skont it-​tixbiha taʼ Ġesù, min jaċċetta l-​messaġġ “jagħti l-​frott.” (Mt. 13:23) Wara li z-​zokk tal-​qamħ jisponta u jikber, il-​frott li jagħti ma jkunx zkuk żgħar tal-​qamħ, imma żerriegħa ġdida. Mela l-​frott li jipproduċu l-​Kristjani taʼ suċċess mhuwiex bilfors dixxipli ġodda, iżda ż-​żrigħ kontinwu taʼ iktar żerriegħa permezz tal-​ippritkar tagħna dwar is-​Saltna. Dan jirriżulta f’ħafna ‘tajjeb’ li minnu nistgħu niksbu sodisfazzjon, sew jekk in-​nies jirreaġixxu b’mod favorevoli u sew jekk le. Aħna qed nagħtu l-​kontribut tagħna għat-​taqdis tal-​isem taʼ Ġeħova. (Is. 43:10-​12; Mt. 6:9) Qed ingawdu l-​privileġġ li nkunu ħaddiema sħab m’Alla. (1 Kor. 3:9) U dan “il-​frott tax-​xofftejn” jogħġob ferm lil Ġeħova.—Ebr. 13:15, 16.

4. Liema riżultati, li ma nkunux nafu bihom, jistaʼ jkollu l-​ministeru tagħna?

⁴ Iktar minn hekk, għandu mnejn li x-​xogħol iebes tagħna qed ikollu riżultati li aħna ma narawhomx. Jistaʼ jkun li xi wħud li semgħu lil Ġesù jipprietka ma sarux dixxipli tiegħu sakemm temm il-​ministeru tiegħu fuq l-​art. B’mod simili, iż-​żerriegħa tas-​Saltna li niżirgħu tistaʼ ma tqabbadx l-​għeruq u tikber minnufih fil-​qalb taʼ individwu, u għandu mnejn jiġi fil-​verità mingħajr ma nkunu nafu. Tabilħaqq, il-​ministeru tagħna jwettaq ħafna u ħafna ġid. Għaldaqstant, jalla ‘nibqgħu nagħtu ħafna frott’ u nagħtu prova li aħna dixxipli taʼ Ġesù.—Ġw. 15:8.