Ħafna Nies Għala Jobogħdu lil Oħrajn?
Għala hawn daqshekk mibegħda fid-dinja, qisu xi ċiklu ikrah li ma jispiċċa qatt? Biex nifhmu għala, irridu nkunu nafu x’inhi l-mibegħda, għala n-nies jibdew jobogħdu, u għala hawn daqshekk mibegħda maʼ kullimkien.
X’Inhi l-Mibegħda?
Il-mibegħda hi meta persuna tħoss rabja kbira jew nuqqas taʼ mħabba lejn xi ħaddieħor jew xi grupp taʼ nies. Il-mibegħda mhijiex xi ħaġa li ddum ftit żmien biss u mbagħad tgħaddi.
IN-NIES GĦALA JIBDEW JOBOGĦDU?
Hemm ħafna raġunijiet għala n-nies jibdew jobogħdu. Jistaʼ jkun li huma jobogħdu lil ħaddieħor mhux għax dawn ikunu għamlu xi ħaġa ħażina, imma jobogħduhom minħabba t-tip taʼ nies li huma. Jistaʼ jkun li jaħsbu li huma nies ħżiena, perikolużi, u ma jinbidlu qatt. Huma jqisuhom bħala nies inferjuri jew li jaqilgħu l-inkwiet u l-problemi. Xi nies jibdew jobogħdu lil oħrajn għax huma stess ikunu għaddew minn vjolenza, inġustizzja, jew xi ħaġa oħra.
KIF TINFIREX
Xi drabi, xi ħadd jobgħod lil xi nies meta fir-realtà lanqas qatt ma jkun iltaqaʼ magħhom. Pereżempju, xi nies jiġu influwenzati minn x’jaħsbu tal-familja jew il-ħbieb tagħhom. Dawn jistgħu faċilment jibdew jaħsbuha bħalhom u jibdew juru mibegħda huma wkoll.
Mela meta nifhmu kemm huwa faċli biex tinfirex il-mibegħda, nistgħu nifhmu għala ħafna nies jobogħdu lil oħrajn. Madankollu, biex inwaqqfu l-mibegħda li hawn fid-dinja, irridu l-ewwel naraw minn fejn bdiet il-mibegħda. Il-Bibbja titkellem dwar dan.
IL-BIBBJA TURI MINN FEJN BDIET IL-MIBEGĦDA
MA KINUX IN-NIES LI BDEW JURU L-MIBEGĦDA. Kollox beda meta anġlu fis-sema, li sar jismu Satana x-Xitan, irribella kontra Alla. Ix-Xitan “kien qattiel meta beda” jiħodha kontra Alla. Hu qed ikompli jġiegħel lin-nies jobogħdu u jirrabjaw għax hu “giddieb u missier il-gidba.” (Ġwanni 8:44; 1 Ġwanni 3:11, 12) Il-Bibbja tiddeskrivih bħala bla qalb, irrabjat, u aggressiv.—Ġob 2:7; Rivelazzjoni 12:9, 12, 17.
NIES IMPERFETTI GĦANDHOM IT-TENDENZA LI JOBOGĦDU. L-ewwel raġel Adam għamel bħal Satana. Minħabba fih, il-bnedmin kollha wirtu d-dnub u saru imperfetti. (Rumani 5:12) Kajjin, it-tifel il-kbir t’Adam, qatel lil ħuh Abel għax kien jobogħdu. (1 Ġwanni 3:12) Veru, ħafna nies juru mħabba u mogħdrija. Imma minħabba d-dnub li writna, ħafna għandhom tendenza li jkunu egoisti, għajjurin, u mkabbrin, u dan iġegħelhom jobogħdu.—2 Timotju 3:1-5.
IL-MIBEGĦDA TIŻDIED FEJN IKUN HEMM L-INTOLLERANZA. Id-dinja li ngħixu fiha hi favur il-mibegħda għax tħeġġeġ lin-nies biex jaħsbu u jaġixxu bla qalb. L-intolleranza, il-preġudizzju, it-tgħajjir, il-bullying, u l-vandaliżmu jeżistu għax “id-dinja kollha qiegħda taħt il-qawwa tal-Ħażin,” Satana x-Xitan.—1 Ġwanni 5:19.
Madankollu, il-Bibbja ma tgħidilniex biss kif bdiet il-mibegħda. Tgħidilna wkoll x’inhi s-soluzzjoni.