Ipprietka b’Żelu bħal Ġesù

1. In-nies taʼ Ġeħova kif inhuma differenti minn dawk li jgħidu li huma Kristjani?

XI ĦAĠA li bħala Xhieda taʼ Ġeħova tagħmilna differenti minn dawk li jgħidu li huma Kristjani hi ż-żelua li għandna għall-ippritkar. (Titu 2:14) Imma ġieli forsi ma jkollokx dik il-ħeġġa biex tipprietka. Jaf tħossok bħal ħu li jaħdem iebes bħala anzjan u li qal, “Ġieli ma jkollix aptit noħroġ service.”

2. X’jistaʼ jagħmilha diffiċli biex nieħdu pjaċir nippritkaw?

² Jistaʼ jkun li nieħdu pjaċir iktar naqdu lil Ġeħova b’modi oħra milli noħorġu service. Għala? Għax meta nibnu jew nieħdu ħsieb is-Swali tas-Saltna, ngħinu lil ħutna wara xi diżastru, jew ninkuraġġixxu lill-aħwa b’modi oħra mill-ewwel naraw ir-riżultat u nħossuna ferħanin. Meta naħdmu ma’ ħutna nħossuna komdi, inħossu li jħobbuna u anki li japprezzaw dak li nagħmlu. Mill-banda l-oħra, jaf ilna snin nippritkaw fl-istess territorju u forsi ftit aċċettaw il-messaġġ tal-Bibbja. Jew meta mmorru nippritkaw nafu li mhux kulħadd se jieħu pjaċir b’dak li ngħidulhom. Nafu wkoll li hekk kif noqorbu lejn it-tmiem, il-messaġġ li ħa nxandru se jġiegħel lin-nies jobogħduna. (Mat. 10:22) Allura, x’se jgħinna nibqgħu żelużi jew forsi nżidu ż-żelu tagħna?

3. X’nitgħallmu dwar Ġesù mill-eżempju li qal f’​Luqa 13:​6-9?

³ L-eżempju taʼ Ġesù jistaʼ jgħinna nkunu żelużi meta nippritkaw. Meta kien fuq l-art, Ġesù qatt ma waqaf jagħmel dak kollu li jistaʼ biex jipprietka lin-nies. Fil-fatt, iktar ma għadda ż-żmien iktar ipprietka. (Aqra Luqa 13:​6-9.) F’eżempju li ta, Ġesù qabbel ix-xogħol tiegħu ma’ dak taʼ raġel li jieħu ħsieb id-dwieli. Dan ir-raġel għamel tliet snin jaħdem iebes biex siġra tat-tin tagħti l-frott, imma din m’għamlitx frott. B’mod simili, Ġesù għamel tliet snin jipprietka lil-Lhud. Imma ħafna minnhom ma sarux dixxipli tiegħu. Però, bħalma dak li jieħu ħsieb id-dwieli ma qatax qalbu mis-siġra, Ġesù ma qatax qalbu min-nies. Minflok, hu ħadem iktar biex jipprova jilħaq qalb in-nies.

4. Liema erbaʼ affarijiet nistgħu nitgħallmu minn Ġesù?

⁴ F’dan l-artiklu se niddiskutu kif Ġesù wera ż-żelu meta pprietka, speċjalment fl-aħħar sitt xhur taʼ ħajtu fuq l-art. (Ara n-nota taʼ studju bl-Ingliż “After these things” ma’ Luqa 10:1.) Aħna nistgħu nkomplu nippritkaw mill-qalb jekk nitgħallmu minn dak li għallem Ġesù u nimitawh. Issa se niddiskutu erbaʼ affarijiet li nistgħu nitgħallmu minn Ġesù: (1) Hu baqaʼ ffokat fuq dak li xtaqu jagħmel Ġeħova, (2) hu qagħad attent għall-profeziji tal-Bibbja, (3) hu straħ fuq Ġeħova għas-sapport, u (4) hu baqaʼ jittama li xi nies se jisimgħuh.

ĠESÙ FFOKA FUQ DAK LI XTAQU JAGĦMEL ĠEĦOVA

5. Ġesù kif wera li l-iktar ħaġa importanti f’ħajtu kienet li jagħmel dak li jixtieq Ġeħova?

⁵ Ġesù pprietka b’żelu “l-aħbar tajba tas-Saltna” għax kien jaf li dan huwa x-xogħol li Alla xtaqu jagħmel. (Luqa 4:43) Għalih ix-xogħol tal-ippritkar kien l-iktar ħaġa importanti f’ħajtu. Fil-fatt, fl-aħħar xhur qabel miet, hu mar “minn belt għal belt u minn raħal għal raħal jgħallem lin-nies.” (Luqa 13:22) Ukoll, Ġesù għallem lil dixxipli oħra kif jippritkaw.—Luqa 10:1.

6. Għalkemm hemm xogħol ieħor li Ġeħova jixtieqna nagħmlu, liema hu l-iktar xogħol importanti? (Ara wkoll l-istampa.)

⁶ Anki llum, li nippritkaw l-aħbar tajba hu l-iktar xogħol importanti li Ġeħova u Ġesù jixtiquna nagħmlu. (Mat. 24:14; 28:​19, 20) Kull xogħol li nagħmlu fl-organizzazzjoni taʼ Ġeħova għandu x’jaqsam max-xogħol tal-ippritkar. Pereżempju, aħna nibnu s-Swali tas-Saltna u naqdu f’Betel biex nissapportjaw ix-xogħol tal-ippritkar. Ngħinu lill-aħwa meta jseħħ diżastru mhux biss biex jirċievu dak li għandhom bżonn, imma wkoll biex ikomplu bir-rutina spiritwali tagħhom, li tinkludi li jippritkaw. Meta nifhmu kemm li nippritkaw hu xogħol importanti u li hu l-iktar xogħol li Ġeħova jridna nagħmlu, se nkunu rridu nippritkaw maʼ kull ċans li jkollna. János, anzjan mill-Ungerija, jgħid, “Jien nipprova niftakar li l-ebda xogħol ieħor li nagħmlu għal Ġeħova ma jistaʼ jieħu post is-service. Dan hu l-iktar xogħol importanti.”

7. Ġeħova għala jridna nkomplu nippritkaw? (1 Timotju 2:​3, 4)

⁷ Aħna nistgħu nkomplu nippritkaw mill-qalb jekk nitgħallmu nħossu għan-nies bħalma jagħmel Ġeħova. Ġeħova jixtieq li kemm jistaʼ jkun nies jisimgħu l-aħbar tajba u jitgħallmu l-verità. (Aqra 1 Timotju 2:​3, 4.) Għalhekk hu qed jgħallimna kif nippritkaw l-aħbar tajba għax din tistaʼ ssalva l-ħajja tan-nies. Pereżempju, il-browxer L-Imħabba Tgħinek Tagħmel Dixxipli jagħtina pariri tajbin kif nibdew konversazzjoni man-nies, ħalli dawn jibdew jistudjaw il-Bibbja u jsiru dixxipli taʼ Ġesù. Anki jekk in-nies ma jibdewx jaqdu lil Ġeħova bħalissa, jistaʼ jkollhom iċ-ċans li jaqduh qabel jispiċċa ż-żmien taʼ tbatija kbira. Dak li ngħidulhom bħalissa jaf jiftakruh fil-futur. Imma dan jistaʼ jiġri biss jekk nippritkawlhom.

ĠESÙ QAGĦAD ATTENT GĦALL-PROFEZIJI TAL-BIBBJA

8. Il-profeziji tal-Bibbja kif għenu lil Ġesù juża l-ħin tiegħu bl-aħjar mod?

⁸ Ġesù fehem kif il-profeziji tal-Bibbja kellhom jitwettqu. Hu kien jaf li kien se jdum jipprietka għal tliet snin u nofs. (Dan. 9:​26, 27) Kien jaf ukoll dwar profeziji li qalu kif u meta kien se jmut. (Luqa 18:​31-34) B’hekk, hu uża l-ħin tiegħu bl-aħjar mod, billi pprietka b’żelu u għamel ix-xogħol li Ġeħova kien tah.

9. Li nifhmu l-profeziji tal-Bibbja kif jgħinna nkomplu nippritkaw mill-qalb?

⁹ Meta nimmeditaw fuq il-profeziji tal-Bibbja li qed jitwettqu bħalissa u li se jitwettqu fil-futur, se jgħinna nippritkaw mill-qalb. Aħna nafu li din is-sistema daqt tispiċċa. Naraw kif l-affarijiet li qed jiġru fid-dinja u l-attitudni tan-nies illum qed iwettqu profeziji tal-Bibbja dwar l-aħħar jiem. Nifhmu kif il-Qawwa Dinjija Anglo-Amerikana, jiġifieri l-Brittanja u l-Istati Uniti, u r-Russja u l-pajjiżi li jappoġġjawha qed iwettqu l-profezija dwar is-sultan tan-nofsinhar u s-sultan tat-tramuntana “fi żmien it-tmiem.” (Dan. 11:40) Nifhmu wkoll li l-Qawwa Dinjija Anglo-Amerikana tirrappreżenta s-saqajn tal-istatwa li jitkellem dwarha Danjel 2:​43-45. Aħna konvinti li, kif juru l-profeziji, dalwaqt—dalwaqt ħafna—is-Saltna t’Alla se teqred il-gvernijiet kollha tal-art. Dawn il-profeziji kollha juruna li qed ngħixu viċin it-tmiem. Allura, għandna nużaw il-ħin tagħna bl-aħjar mod billi nippritkaw l-aħbar tajba.

10. Il-profeziji tal-Bibbja b’liema modi jgħinuna nkomplu nippritkaw?

¹⁰ Il-profeziji tal-Bibbja fihom ukoll tama sabiħa li nkunu nixtiequ naqsmuha man-nies. Carrie, oħt li taqdi fir-Repubblika Dominicana, tgħid: “Meta naħseb dwar l-affarijiet sbieħ li Ġeħova qed iwegħedna għall-futur, inkun irrid ngħid lin-nies dwarhom. Jien naf li l-wegħdi tal-Bibbja jistgħu jgħinuhom fil-problemi tagħhom, bħalma għenu lili.” Ukoll il-profeziji tal-Bibbja jħeġġuna biex ma nżommux lura, għax nafu li x-xogħol qed isir bis-saħħa taʼ Ġeħova. Leila, li tgħix fl-Ungerija, tgħid: “Isaija 11:​6-9 juri li kulħadd jistaʼ jinbidel bl-għajnuna taʼ Ġeħova. Dan jgħinni nitkellem dwar l-aħbar tajba ma’ nies li naħseb li ma jkunux interessati.” U Christopher, ħu miż-Żambja, jgħid: “Bħalma juri Marku 13:​10, l-aħbar tajba trid tixxandar mal-art kollha. Allura, inħoss li huwa privileġġ li ngħin biex titwettaq din il-profezija.” Inti liema profeziji tal-Bibbja jgħinuk tkompli tipprietka?

ĠESÙ STRAĦ FUQ ĠEĦOVA GĦAS-SAPPORT

11. Ġesù għala kellu bżonn jistrieħ fuq Ġeħova biex ikompli jipprietka b’żelu? (Luqa 12:​49, 53)

¹¹ Biex ikompli jipprietka biż-żelu, Ġesù straħ fuq Ġeħova għas-sapport. Għalkemm tkellem b’rispett ma’ oħrajn, hu kien jaf li l-messaġġ tas-Saltna kien se jirrabja lil xi nies, u ħafna kienu se jkunu kontra dan il-messaġġ. (Aqra Luqa 12:​49, 53.) Il-mexxejja reliġjużi tant kienu kontra dak li pprietka li kemm-il darba pprovaw joqtluh. (Ġw. 8:59; 10:​31, 39) Minkejja dan, Ġesù baqaʼ jipprietka għax kien jaf li Ġeħova kien miegħu. Hu qal: “Jien ma nagħmilx dan waħdi, imma nagħmlu mal-Missier li bagħatni. . . . Hu ma telaqnix waħdi, għax jien dejjem nagħmel dak li jogħġob lilu.”—Ġw. 8:​16, 29.

12. Ġesù kif ipprepara lid-dixxipli tiegħu biex ikomplu jippritkaw anki meta oħrajn jiħduha kontrihom?

¹² Ġesù fakkar lid-dixxipli tiegħu li huma setgħu jistrieħu fuq Ġeħova għas-sapport. Dan għamlu billi kemm-il darba fakkarhom li Ġeħova kien se jgħinhom, anki meta jiġu ppersegwitati. (Mat. 10:​18-20; Luqa 12:​11, 12) Peress li Ġesù kien jaf li ħafna nies se jkunu kontra l-messaġġ, hu qalilhom biex joqogħdu attenti. (Mat. 10:16; Luqa 10:3) Qalilhom ukoll li jekk xi nies ma jkunux iridu jisimgħu, m’għandhomx għalfejn jisforzawhom. (Luqa 10:​10, 11) Tahom anki l-parir biex jekk jiġu ppersegwitati jaħarbu. (Mat. 10:23) Mela, għalkemm Ġesù kien żeluż u straħ fuq Ġeħova, meta setaʼ, hu evita sitwazzjonijiet perikolużi.—Ġw. 11:​53, 54.

13. Għala nistgħu nkunu ċerti li Ġeħova se jgħinna?

¹³ Aħna għandna bżonn l-għajnuna taʼ Ġeħova biex inkomplu nippritkaw meta niġu persegwitati. (Riv. 12:17) Imma kif nistgħu nkunu ċerti li Ġeħova se jgħinna? Nistgħu nkunu ċerti minħabba dak li talab Ġesù fi Ġwanni kapitlu 17. Ġesù talab lil Ġeħova biex jieħu ħsieb lill-appostli u Ġeħova wieġbu. Il-ktieb tal-​Atti jurina kif għen lill-appostli jippritkaw b’żelu minkejja l-persekuzzjoni. Ġesù talab ukoll lil Ġeħova biex jieħu ħsieb lil dawk li tgħallmu mill-appostli. Din it-talba tinkludi lilek. Ġeħova għadu jwieġeb it-talba taʼ Ġesù u kif għen lill-appostli, hu se jgħin lilek ukoll.—Ġw. 17:​11, 15, 20.

14. Għala nistgħu nkunu ċerti li nistgħu nibqgħu nippritkaw b’żelu anki meta jsir iktar diffiċli? (Ara wkoll l-istampa.)

¹⁴ Anki jekk isir iktar diffiċli biex nippritkaw l-aħbar tajba qabel jiġi t-tmiem, Ġesù wegħedna li Ġeħova se jagħtina s-sapport li jkollna bżonn biex nibqgħu żelużi. (Luqa 21:​12-15) Bħal Ġesù u l-appostli, aħna nħallu lin-nies jiddeċiedu jekk jisimgħux u ma nargumentawx magħhom. Anki f’pajjiżi fejn ix-xogħol tagħna ma jistax isir bil-libertà, l-aħwa qed jippritkaw l-aħbar tajba għax qed jistrieħu fuq Ġeħova għall-għajnuna. Bħalma Ġeħova ta l-qawwa lill-Kristjani tal-bidu, illum hu se jagħtina l-qawwa biex ‘nippritkaw l-aħbar tajba sew’ sakemm jgħid li x-xogħol hu lest. (2 Tim. 4:17) Għalhekk, tistaʼ tkun ċert li jekk tistrieħ fuq Ġeħova, int se tkun tistaʼ tibqaʼ tipprietka b’żelu.

ĠESÙ BAQAʼ JITTAMA LI XI NIES JISIMGĦU

15. X’juri li Ġesù kellu attitudni pożittiva lejn ix-xogħol tal-ippritkar?

¹⁵ Ġesù baqaʼ jittama li xi nies jisimgħu l-aħbar tajba. Din l-attitudni pożittiva għenitu jibqaʼ ferħan u jaħdem iebes fix-xogħol tal-ippritkar. Pereżempju, lejn l-aħħar tas-sena 30, Ġesù ra li ħafna nies kienu lesti li jisimgħu u qabbilhom ma’ għelieqi lesti għall-ħsad. (Ġw. 4:35) Xi sena wara, hu qal lid-dixxipli tiegħu: “Ix-xogħol tal-ħsad hu kbir.” (Mat. 9:​37, 38) U iktar tard reġaʼ qalilhom: “Ix-xogħol tal-ħsad hu kbir . . . Itolbu bil-ħniena lis-Sid tal-ħsad biex jibgħat iktar ħaddiema ħalli jiġbru l-ħsad tiegħu.” (Luqa 10:2) Ġesù qatt ma waqaf jittama li n-nies se jisimgħu l-aħbar tajba, u feraħ meta dan ġara.—Luqa 10:21.

16. L-eżempji taʼ Ġesù kif għenu lid-dixxipli jibqgħu pożittivi lejn ix-xogħol tal-ippritkar? (Luqa 13:​18-21) (Ara wkoll l-istampa.)

¹⁶ Ġesù għen lid-dixxipli tiegħu jibqgħu pożittivi lejn ix-xogħol tal-ippritkar billi fakkarhom kemm jistaʼ jkollhom riżultati tajbin bil-messaġġ tas-Saltna. Biex jagħmel dan hu qalilhom żewġ eżempji. (Aqra Luqa 13:​18-21.) Fl-ewwel wieħed, Ġesù qabbel il-messaġġ tas-Saltna ma’ żerriegħa tal-mustarda li kibret u saret siġra. Dan kien ifisser li ħafna nies kienu se jaċċettaw l-aħbar tajba, u li xejn ma kien se jwaqqaf l-aħbar tajba milli tinfirex. F’eżempju ieħor, hu qabbel il-messaġġ tas-Saltna mal-ħmira. Dan għax l-aħbar tajba kienet se tiġi ppritkata madwar id-dinja u kienet se ġġiegħel lin-nies jagħmlu bidliet, avolja dawn il-bidliet jistaʼ jkun li ma jidhrux mill-ewwel. B’dawn l-eżempji, Ġesù kien qed ifakkar lid-dixxipli tiegħu kemm il-messaġġ li jippritkaw kien se jgħin lin-nies.

17. Għala għandna nibqgħu nittamaw li hemm nies li se jisimgħu?

¹⁷ Li naħsbu kif ix-xogħol tal-ippritkar qed jgħin lin-nies madwar id-dinja kollha jagħtina kuraġġ biex inkomplu nippritkaw. Kull sena, miljuni taʼ wħud interessati jattendu t-Tifkira u jistudjaw il-Bibbja magħna. Mijiet t’eluf jitgħammdu u jingħaqdu magħna fix-xogħol tal-ippritkar. Veru ma nafux kemm fadal nies li se jisimgħu, imma li nafu hu li Ġeħova qed jiġbor folla kbira li se ssalva fiż-żmien taʼ tbatija kbira. (Riv. 7:​9, 14) Bħala s-Sid tal-ħsad, Ġeħova għadu qed jara li hemm iktar nies li se jaċċettaw l-aħbar tajba, allura aħna għandna nibqgħu nippritkaw.

18. Aħna x’nixtiequ li jinnotaw in-nies?

¹⁸ Id-dixxipli veri taʼ Ġesù dejjem jintgħarfu miż-żelu tagħhom għax-xogħol tal-ippritkar. Pereżempju, meta n-nies semgħu lill-appostli jitkellmu b’kuraġġ u mill-qalb, “huma rrealizzaw li dawn kienu jkunu maʼ Ġesù.” (Atti 4:13) Aħna wkoll, jekk nippritkaw b’żelu, in-nies se jindunaw li qed nimitaw lil Ġesù.