Għandi Nieqaf Insuq?

Bħalissa għaddej minn din is-sitwazzjoni? Jekk iva, x’se jgħinek tiddeċiedi għandekx tibqaʼ ssuq jew le?

F’ċertu pajjiżi, sewwieqa taʼ ċerta età li jridu jġeddu l-liċenzja tas-sewqan, iridu jmorru jagħmlu vista għand it-tabib u hu joħroġ permess li jistgħu jkomplu jsuqu. Kristjani li jgħixu f’dawn il-pajjiżi għandhom jobdu l-liġi. (Rum. 13:1) Imma tgħix fejn tgħix, hemm suġġerimenti li se jgħinuk tkun taf għadekx kapaċi ssuq b’mod li ma jkunx perikoluż.

KIF TIDDEĊIEDI GĦANDEKX TIBQAʼ SSUQ

Organizzazzjoni li tgħin lin-nies kbar fl-età tissuġġerixxi li tistaqsi lilek innifsek dawn il-mistoqsijiet:

• Qed insibha diffiċli biex naqra t-tabelli jew biex nara billejl?

• Għadni nistaʼ ndawwar rasi biex niċċekja l-mirja u biex niċċekkja postijiet li ma jidhrux mill-mirja (blind spots)?

• Qed insibha diffiċli biex nirreaġixxi malajr, pereżempju, biex immexxi saqajja minn fuq il-pedala tal-gass għal fuq il-pedala tal-brake?

• Insuq tant bil-mod li ntellef il-karozzi l-oħrajn?

• Dan l-aħħar ġieli kont se naħbat, jew il-karozza tiegħi fiha daqqiet jew grif għax nolqotha?

• Ġieli waqqafni uffiċjal tat-traffiku minħabba kif kont qed insuq?

• Ġieli bdejt nongħos waqt li kont qed insuq?

• Nieħu xi mediċina li tistaʼ taffettwa kif insuq?

• Tal-familja jew ħbieb ġieli qaluli li jinkwetaw dwar kif qed insuq?

Jekk weġibt iva għal waħda jew tnejn minn dawn il-mistoqsijiet, jaf hu ż-żmien li tibda taħseb biex tagħmel xi bidliet. Pereżempju, forsi tiddeċiedi li ssuq inqas, speċjalment billejl. B’mod regolari ċċekkja kif qed issuq. Tistaʼ ssaqsi lil xi ħadd tal-familja jew ħabib biex jgħidlek x’jaħseb dwar il-mod kif issuq. Tistaʼ wkoll terġaʼ tieħu xi lezzjonijiet biex issuq aħjar. Però, jekk weġibt iva għal iktar minn żewġ mistoqsijiet, jaf ikun aħjar li ma tibqax issuq.a

PRINĊIPJI TAL-BIBBJA LI JGĦINUK TIEĦU DEĊIŻJONI TAJBA

Jistaʼ jkun li ma nindunawx li m’għadniex insuqu tajjeb kif konna qabel. U l-idea li ma nibqgħux insuqu jaf tkun diffiċli għalina li naħsbu jew nitkellmu dwarha. Mela, liema prinċipji tal-Bibbja jistgħu jgħinuna naħsbu sew u nieħdu deċiżjoni tajba? Ejja naraw tnejn.

Kun umli. (Prov. 11:2) Hekk kif tibda tikber fl-età, il-vista, is-smigħ, il-muskoli, u kemm tirreaġixxi malajr jonqsu. Pereżempju, ħafna nies jieqfu jilagħbu ċertu sports hekk kif jikbru għax jirrealizzaw li iktar ma jikbru iktar ikun faċli li jweġġgħu. Xi ħaġa simili tapplika għas-sewqan. Persuna umli se tieqaf issuq meta dan jibda jsir perikoluż għaliha. (Prov. 22:3) U meta oħrajn jgħidulha li qed jinkwetaw għaliha, persuna umli se tkun lesta li tismaʼ.—Ara l-prinċipju fit-​2 Samwel 21:​15-17.

Evita li tweġġaʼ jew toqtol lil xi ħadd. (Dewt. 22:8) Karozza jekk ma tintużax sew tistaʼ tkun perikoluża. Xi ħadd li jkompli jsuq anki jekk m’għadux kapaċi jsuq sew jistaʼ jpoġġi lil ħajtu u l-ħajja t’oħrajn f’riskju. Jistaʼ anki jkun ħati taʼ qtil.

Jekk qed tiddeċiedi għandekx tieqaf issuq, taħsibx li oħrajn se jieqfu jirrispettawk. Ġeħova jħobbok minħabba l-kwalitajiet tiegħek bħall-umiltà, li tkun taf il-limiti tiegħek, u li taħseb f’oħrajn. Hu jwiegħdek li se jinkuraġġik u jtik is-saħħa biex tissaporti. (Isa. 46:4) Hu qatt mhu se jitilqek. Mela waqt li qed tiddeċiedi għandekx tieqaf issuq jew le, itlob lil Ġeħova biex itik l-għerf u jgħinek bil-prinċipji tal-Bibbja ħalli tkun tistaʼ tieħu deċiżjoni tajba.