Għala għandna niltaqgħu flimkien għall-​qima?

1-3. (a) Il-​Kristjani kif urew li huma ħerqanin li jiltaqgħu flimkien? (Ara l-​ewwel stampa.) (b) X’se niddiskutu f’dan l-​artiklu?

META Corinna kellha 17-​il sena, ommha kienet ġiet arrestata u ntbagħtet ’il bogħod f’kamp tax-​xogħol. Iktar tard, Corinna ttieħdet fis-​Siberja, eluf taʼ mili ’l bogħod mid-​dar tagħha. Hemmhekk ħadmet ġo razzett u kienet ittrattata bħala skjava. Kultant, ġiet imġiegħla taħdem barra f’kesħa tremenda mingħajr ma kellha l-​ħwejjeġ addattati biex iżommuha sħuna. Minkejja dan, Corinna u oħt oħra ddeċidew li jagħmlu dak kollu li jistgħu biex jitilqu r-​razzett u jattendu laqgħa tal-​kongregazzjoni.

² Corinna qalet: “Aħna tlaqna mix-​xogħol billejl u mxejna sal-​istazzjon tal-​ferrovija li kien 25 kilometru ’l bogħod. Il-​ferrovija telqet fis-​sagħtejn taʼ filgħodu, u nżilna sitt sigħat wara. Imbagħad imxejna 10 kilometri sa fejn issir il-​laqgħa.” Corinna kienet ferħana ħafna li għamlet dan il-​vjaġġ. Hi qalet: “Waqt il-​laqgħa, studjajna t-​Torri tal-​Għassa u kantajna għanjiet tas-​Saltna. Għalina kienet esperjenza inkuraġġanti ħafna u li ssaħħaħ ħafna l-​fidi.” Iż-​żewġ aħwa daħlu lura r-​razzett tlett ijiem wara, imma dak li jieħu ħsieb ir-​razzett lanqas biss kien induna li ma kinux hemm.

³ In-​nies taʼ Ġeħova dejjem ħarsu ’l quddiem biex ikunu flimkien. Eżatt wara li l-​kongregazzjoni Kristjana ġiet ifformata, is-​segwaċi taʼ Ġesù “kienu jqattgħu ħafna ħin fit-​tempju.” (Atti 2:46) Naturalment, int ukoll aktarx tħares ’il quddiem biex tattendi l-​laqgħat. Imma bħall-​kumplament taʼ ħutek irġiel u nisa, int għandek mnejn issibha diffiċli biex tattendi l-​laqgħat b’mod regulari. Forsi għandek bżonn taħdem ħafna sigħat jew għandek ħafna x’tagħmel jew dejjem tħossok għajjien. Allura, x’se jgħinna nagħmlu minn kollox biex nattendu l-​laqgħat tagħna?^[1] (Ara n-​nota fl-​aħħar.) Kif nistgħu ninkuraġġixxu l-​istudenti tal-​Bibbja tagħna u oħrajn biex jattendu l-​laqgħat b’mod regulari? Dan l-​artiklu se jispjega li meta nattendu l-​laqgħat (1) ikun taʼ benefiċċju għalina, (2) ngħinu lil oħrajn, u (3) nogħġbu lil Ġeħova.^[2]—Ara n-​nota fl-​aħħar.

IL-​LAQGĦAT HUMA TAʼ BENEFIĊĊJU

4. Il-​fatt li niltaqgħu flimkien kif jgħinna nitgħallmu dwar Ġeħova?

⁴ Il-​laqgħat jgħallmuna. Kull laqgħa tgħinna nitgħallmu iktar dwar Ġeħova. Pereżempju, il-​maġġorparti tal-​kongregazzjonijiet dan l-​aħħar studjaw il-​ktieb Ersaq Qrib Lejn Jehovah waqt l-​Istudju tal-​Bibbja tal-​Kongregazzjoni. Kif ħassejtek meta ddiskutejna l-​kwalitajiet taʼ Ġeħova u meta smajt kif ħutek iħossuhom dwaru? Bla dubju dan ġiegħlek tħobb lil Ġeħova saħansitra iktar. Apparti minn hekk, waqt il-​laqgħat nitgħallmu iktar dwar il-​Bibbja billi noqogħdu attenti għat-​taħditiet u turijiet, u billi nisimgħu sew meta tkun qed tinqara l-​Bibbja. (Neħemija 8:8) U aħseb dwar il-​ħafna affarijiet li niskopru kull ġimgħa meta nippreparaw għall-​qari tal-​Bibbja u mbagħad nisimgħu dak li oħrajn tgħallmu minnu.

5. Il-​laqgħat kif għenuk tuża dak li tgħallimt mill-​Bibbja u ttejjeb il-​mod kif tipprietka?

⁵ Il-​laqgħat jgħallmuna nużaw f’ħajjitna dak li nitgħallmu mill-​Bibbja. (1 Tessalonikin 4:9, 10) Pereżempju, ġieli attendejt Studju tat-​Torri tal-​Għassa li ħajrek tagħmel iktar fis-​servizz taʼ Ġeħova, li għenek ittejjeb it-​talb tiegħek, jew li għenek taħfer lil ħu jew oħt? Il-​laqgħa li jkollna fost il-​ġimgħa tistaʼ tgħallimna kif nippritkaw l-​aħbar tajba u kif ngħinu lil oħrajn jifhmu l-​verità mill-​Bibbja.—Mattew 28:19, 20.

6. Il-​laqgħat tagħna kif jinkuraġġuna u jgħinuna nibqgħu b’saħħitna?

⁶ Il-​laqgħat jinkuraġġuna. Id-​dinja taʼ Satana tipprova ddgħajfilna l-​fidi tagħna u tistaʼ ġġegħelna nħossuna stressati u skuraġġiti. Imma l-​laqgħat tagħna jinkuraġġuna u jagħtuna s-​saħħa biex inkomplu naqdu lil Ġeħova. (Aqra Atti 15:30-​32.) Spiss, niddiskutu kif profeziji fil-​Bibbja jkunu twettqu. Dan jistaʼ jġegħelna nħossuna saħansitra iktar ċerti li l-​wegħdi taʼ Ġeħova għall-​futur se jseħħu. Ħutna rġiel u nisa jinkuraġġuna mhux biss meta jagħtu taħditiet imma wkoll meta jikkummentaw u meta jfaħħru lil Ġeħova billi jkantaw mill-​qalb. (1 Korintin 14:26) U meta nkellmuhom qabel u wara l-​laqgħat, inħossu ċertu serħan għax għandna ħafna ħbieb li verament jimpurtahom minna.—1 Korintin 16:17, 18.

7. Għala hu importanti ħafna li nattendu l-​laqgħat tagħna?

⁷ Waqt il-​laqgħat, nirċievu l-​għajnuna tal-​ispirtu qaddis t’Alla. Ġesù juża dan l-​ispirtu qaddis biex imexxi l-​kongregazzjonijiet. Fil-​fatt, qalilna li għandna ‘nisimgħu dak li jgħid l-​ispirtu lill-​kongregazzjonijiet.’ (Rivelazzjoni 2:7) L-​ispirtu qaddis jistaʼ jgħinna biex nirreżistu t-​tentazzjoni u biex nippritkaw bil-​qlubija. Dan jistaʼ jgħinna wkoll biex nieħdu deċiżjonijiet tajbin. Huwa għalhekk li għandna nagħmlu dak kollu li nistgħu biex nattendu l-​laqgħat u nirċievu l-​għajnuna tal-​ispirtu qaddis t’Alla.

NGĦINU LIL OĦRAJN FIL-​LAQGĦAT

8. Meta ħutna jarawna waqt il-​laqgħat u jisimgħuna nikkummentaw u nkantaw, dan kif jgħinhom? (Ara wkoll il-​kaxxa “Dejjem iħossu aħjar minn kif daħal.”)

⁸ Waqt il-​laqgħat, għandna opportunitajiet li nuru li nħobbu lil ħutna rġiel u nisa. Ħafna fil-​kongregazzjoni tagħna qed jissaportu diffikultajiet kbar. L-​appostlu Pawlu kiteb: “Ħa nagħtu kas xulxin.” (Ebrej 10:24, 25) Aħna nistgħu nuru li nagħtu kas ħutna billi niltaqgħu flimkien biex ninkuraġġixxu lil xulxin. Meta mmorru l-​laqgħat, aħna nuru lil ħutna li rridu nkunu magħhom u li rridu nitkellmu magħhom. Aħna rridu nuru wkoll li aħna interessati fil-​mod kif qed iħossuhom. Aħna ninkuraġġuhom meta jisimgħuna nikkummentaw u nkantaw mill-​qalb.—Kolossin 3:16.

9, 10. (a) Spjega kif il-​kliem taʼ Ġesù li jinsab fi Ġwanni 10:16 jgħinna nifhmu għala hu importanti li niltaqgħu maʼ ħutna. (b) Kif nistgħu ngħinu lil xi ħadd li l-​familja tiegħu ma baqgħetx taċċettah?

⁹ Meta nattendu l-​laqgħat, inkunu qed ngħinu biex il-​membri tal-​kongregazzjoni jibqgħu qrib xulxin. (Aqra Ġwanni 10:16.) Ġesù qabbel lilu nnifsu maʼ ragħaj u lis-​segwaċi tiegħu maʼ merħla nagħaġ. Aħseb dwar dan: Jekk żewġ nagħġiet qegħdin fuq għolja, żewġ nagħġiet oħra huma f’wied, u nagħġa oħra hi xi mkien ieħor, nistgħu ngħidu li dawn il-​ħames nagħġiet huma merħla? Le, għax merħla nagħaġ jibqgħu flimkien u jsegwu lir-​ragħaj. B’mod simili, m’għandniex noqogħdu ’l bogħod minn ħutna billi ma nattendux il-​laqgħat. Hemm bżonn li niltaqgħu flimkien biex insiru parti minn “merħla waħda” li ssegwi “ragħaj wieħed.”

¹⁰ Il-​laqgħat tagħna jgħinuna nkunu magħqudin bħala familja kollha mħabba. (Salm 133:1) Xi wħud fil-​kongregazzjoni ma baqgħux jiġu aċċettati mill-​ġenituri tagħhom jew ħuthom. Imma Ġesù wiegħed li jtihom familja li se tħobbhom u tieħu ħsiebhom. (Marku 10:29, 30) Jekk tattendi l-​laqgħat b’mod regulari, tistaʼ ssir bħal missier, omm, ħu, jew oħt taʼ xi ħadd fil-​kongregazzjoni. Meta naħsbu dwar dan, inkunu rridu nagħmlu l-​aħjar tagħna biex nattendu l-​laqgħat kollha.

AĦNA SE NOGĦĠBU LIL ĠEĦOVA

11. Il-​fatt li nattendu l-​laqgħat, kif jgħinna nagħtu lil Ġeħova dak li jistħoqqlu?

¹¹ Waqt il-​laqgħat, aħna nagħtu lil Ġeħova dak li jistħoqqlu. Ladarba hu l-​Ħallieq tagħna, għandna nirringrazzjawh, nonorawh, u nfaħħruh. (Aqra Rivelazzjoni 7:12.) Aħna nistgħu nagħmlu dan waqt il-​laqgħat meta nitolbu lil Ġeħova, inkantaw lilu, u nitkellmu dwaru. X’opportunità mill-​isbaħ għandna li nqimu lil Ġeħova kull ġimgħa!

12. Ġeħova kif iħossu meta nobdu l-​kmand biex nattendu l-​laqgħat?

¹² Ġeħova hu l-​wieħed li ħalaqna, u għandna nobduh. Hu kkmandana biex nibqgħu niltaqgħu flimkien, speċjalment hekk kif nersqu eqreb it-​tmiem. Allura meta nobdu dan il-​kmand, Ġeħova jieħu pjaċir. (1 Ġwanni 3:22) Hu jinnota li aħna verament nixtiequ nattendu l-​laqgħat u japprezza kull sforz li nagħmlu biex inkunu hemm.—Ebrej 6:10.

13, 14. Kif nersqu qrib taʼ Ġeħova u Ġesù waqt il-​laqgħat?

¹³ Meta mmorru l-​laqgħat, inkunu qed nuru lil Ġeħova li rridu nersqu eqreb tiegħu u taʼ Ibnu. Waqt il-​laqgħat, nistudjaw il-​Bibbja u nitgħallmu minn Ġeħova dak li għandna nagħmlu u kif għandna ngħixu. (Isaija 30:20, 21) Xi wħud li ma jaqdux lil Ġeħova u li jattendu l-​laqgħat, ukoll jirrealizzaw li Alla qed jiggwidana. (1 Korintin 14:23-​25) Ġeħova qed jidderieġi l-​laqgħat tagħna bl-​ispirtu qaddis tiegħu, u dak li nitgħallmu hemm ikun ġej minnu. Allura meta nattendu l-​laqgħat, inkunu qed nisimgħu dak li Ġeħova qed jgħid, inħossu kemm iħobbna, u nersqu eqreb tiegħu.

¹⁴ Ġesù, il-​Kap tal-​kongregazzjoni, qal: “Fejn hemm tnejn jew tlieta miġburin flimkien f’ismi, jien inkun hemmhekk f’nofshom.” (Mattew 18:20) Il-​Bibbja tgħid ukoll li Ġesù “jimxi f’nofs” il-​kongregazzjonijiet. (Rivelazzjoni 1:20–2:1) B’mod ċar, Ġeħova u Ġesù huma magħna u qed isaħħuna waqt il-​laqgħat tagħna. Kif taħseb li Ġeħova jħossu meta jara li qed tagħmel kulma tistaʼ biex tersaq qrib tiegħu u taʼ Ibnu?

15. Il-​fatt li nattendu l-​laqgħat kif juri lil Alla li rridu nobdu lilu?

¹⁵ Meta nattendu l-​laqgħat, inkunu qed nuru lil Ġeħova li rridu nobduh. Ġeħova ma jisforzaniex nagħmlu dak li jrid hu. (Isaija 43:23) Allura, meta nagħżlu li nobdu l-​kmand tiegħu li nattendu l-​laqgħat, inkunu qed nuruh li nħobbuh u li nemmnu li għandu d-​dritt li jgħidilna dak li għandna nagħmlu. (Rumani 6:17) Pereżempju, x’se nagħmlu jekk l-​imgħallem tagħna jippretendi li naħdmu ħafna sal-​punt li ma nkunux nistgħu nattendu l-​laqgħat tagħna b’mod regulari? Jew għandu mnejn li l-​gvern jgħid li jekk xi ħadd jiltaqaʼ biex iqim lil Ġeħova, se jkollu jħallas multa, imur il-​ħabs, jew jiġi kkastigat b’xi ħaġa iktar gravi. Jew kultant għandu mnejn li sempliċement nippreferu nagħmlu xi ħaġ’oħra minflok immorru l-​laqgħat. F’kull wieħed minn dawn il-​każijiet, aħna rridu niddeċiedu x’se nagħmlu. (Atti 5:29) Imma kull darba li nagħżlu li nobdu lil Ġeħova, nagħmluh ferħan.—Proverbji 27:11.

IBQAʼ LTAQAʼ MAʼ ĦUTEK

16, 17. (a) Kif nafu li l-​laqgħat kienu importanti ħafna għall-​Kristjani tal-​ewwel seklu? (b) Ħuna George Gangas kif ħassu dwar il-​laqgħat Kristjani?

¹⁶ Wara li l-​Kristjani ltaqgħu flimkien f’Pentekoste tas-​sena 33, bdew jiltaqgħu b’mod regulari biex iqimu lil Ġeħova. Huma ‘taw kas xulxin u m’abbandunawx il-​laqgħat tagħhom flimkien.’ (Ebrej 10:24, 25) U ma waqfux jiltaqgħu flimkien anki meta kienu ppersegwitati mill-​gvern Ruman u l-​mexxejja reliġjużi Lhud. Għalkemm ma kienx faċli, huma għamlu kulma setgħu biex ikomplu jiltaqgħu flimkien.

¹⁷ Anki llum, il-​qaddejja taʼ Ġeħova jħossuhom grati ħafna għal-​laqgħat u jieħdu pjaċir ikunu hemm. George Gangas, li kien membru tal-​Ġemgħa li Tiggverna għal iktar minn 22 sena, qal: “Għalija, li niltaqaʼ mal-​aħwa huwa wieħed mill-​akbar pjaċiri tal-​ħajja u sors taʼ inkuraġġiment. Inħobb inkun fis-​Sala tas-​Saltna fost tal-​ewwel, u nitlaq fost tal-​aħħar, jekk inhu possibbli. Inħoss ferħ ġewwieni meta nitkellem man-​nies t’Alla. Meta nkun fosthom inħossni komdu mal-​familja tiegħi, f’ġenna spiritwali.” Hu żied jgħid: “Il-​ħsieb profond u x-​xewqa ġewwinija tiegħi huma li nattendi l-​laqgħat.”

18. Kif tħossok dwar il-​laqgħat tagħna, u x’int determinat li tagħmel?

¹⁸ Int ukoll tħossok b’dan il-​mod dwar li tqim lil Ġeħova? Jekk iva, ibqaʼ agħmel kulma tistaʼ biex tkun maʼ ħutek irġiel u nisa waqt il-​laqgħat, anki meta jkun diffiċli. Uri lil Ġeħova li verament tħossok bħas-​Sultan David, li qal: “Ġeħova, jien ħabbejtha d-​dar fejn tgħammar int.”—Salm 26:8.