Kemm Hemm Xhieda taʼ Ġeħova Madwar id-​Dinja?

Kif tgħoddu kemm hemm Xhieda taʼ Ġeħova?

Bħala Xhieda taʼ Ġeħova ngħoddu biss lil dawk li b’mod attiv jippritkaw l-​aħbar tajba tas-​Saltna t’Alla kull xahar. (Mattew 24:14) Dan jinkludi lil dawk li tgħammdu bħala Xhieda kif ukoll lil dawk li, għalkemm għadhom ma tgħammdux, jikkwalifikaw biex jieħdu sehem fix-​xogħol tal-​ippritkar.

Hemm bżonn li individwu jagħti l-​flus biex ikun Xhud?

Le. Id-​donazzjonijiet m’għandhomx x’jaqsmu jekk individwu jkunx Xhud jew jekk jingħatax xi inkarigu jew privileġġ partikulari fl-​organizzazzjoni tagħna. (Atti 8:18-​20) Infatti, ħadd ma jgħid kemm jagħti donazzjonijiet. Kull Xhud jagħti kemm jixtieq mill-​ħin, l-​enerġija, u l-​affarijiet tiegħu għax-​xogħol tagħna madwar id-​dinja u skont iċ-​ċirkustanzi tiegħu.—2 Korintin 9:7.

Kif tafu kemm hemm uħud li qed jippritkaw b’mod attiv?

Kull xahar, ix-​Xhieda jagħtu rapport tal-​attività tagħhom fl-​ippritkar lill-​kongregazzjoni lokali tagħhom. Dan ir-​rapport isir b’mod volontarju.

Ir-​rapporti tal-​kongregazzjoni jinġabru flimkien u t-​totali jintbagħtu lill-​uffiċċju tal-​fergħa lokali. Il-​fergħa tibgħat it-​totali taʼ kull pajjiż jew post lill-​kwartieri ġenerali tagħna.

Fit-​tmiem taʼ kull sena taʼ servizz,a jiġi determinat l-​ogħla numru taʼ Xhieda għal kull pajjiż matul dik is-​sena. Dawn il-​figuri jingħaddu flimkien biex inkunu nafu n-​numru taʼ Xhieda madwar id-​dinja. Rapporti dettaljati taʼ kull pajjiż huma ppubblikati fis-sezzjoni “Madwar id-dinja” fil-website tagħna. Dawn ir-​rapporti jinkuraġġuna, bħalma rapporti simili inkuraġġew lill-​Kristjani tal-​bidu.—Atti 2:41; 4:4; 15:3.

Tgħoddu lil dawk li jassoċjaw mal-​organizzazzjoni tagħkom imma ma jippritkawx?

Għalkemm ma ninkludux lil dawn l-​uħud fl-​għadd taʼ Xhieda, aħna nilqgħuhom fil-​kongregazzjonijiet tagħna. Il-​biċċa l-​kbira minnhom jattendu t-​Tifkira tal-​mewt taʼ Kristu kull sena. Allura n-​numru taʼ dawn l-​uħud jistaʼ bejn wieħed u ieħor jiġi determinat mid-​differenza bejn l-​kemm attendew it-Tifkira​ u n-​numru taʼ Xhieda. Fl-​2024, l-​attendenza għat-​Tifkira kienet 21,119,442.

Ħafna li ma jattendux il-​laqgħat tagħna jibbenefikaw mill-​programm tagħna taʼ studju tal-​Bibbja fid-​dar bla ħlas. Matul l-​2024, kull xahar kellna medja taʼ 7,480,146 studju tal-​Bibbja, u ftit minn dawn kienu maʼ iktar minn persuna waħda.

Iċ-ċensimenti tal-​gvernijiet għala jgħidu li hemm iktar Xhieda milli juru l-​figuri tagħkom?

Uffiċċji taċ-​ċensiment tal-​gvern spiss iġibu l-​figuri tagħhom billi jistaqsu lin-​nies maʼ liema grupp reliġjuż jidentifikaw lilhom infushom. Pereżempju, l-​Uffiċċju taċ-​Ċensiment tal-​Istati Uniti jgħid li fl-​istħarriġ tagħhom “ipprovaw jiddeterminaw jekk dawk li mlew l-​istħarriġ qisux lilhom infushom bħala li huma membri taʼ xi komunità reliġjuża,” u żiedu jgħidu li l-​figuri finali huma bbażati fuq opinjonijiet persunali u mhux fuq fatti. Bħala kuntrast, aħna bħala Xhieda taʼ Ġeħova ngħoddu biss lil dawk li jippritkaw lil oħrajn u li jirrapportaw din l-​attività, u mhux dawk li sempliċement jgħidu li huma Xhieda.