KIF JINTUŻAW ID-DONAZZJONIJIET TIEGĦEK?
Bini li Tlesta Qabel il-Pandemija
1 TAʼ NOVEMBRU 2020
Minħabba li mijiet taʼ eluf qed jitgħammdu kull sena, għandna bżonn iżjed u iżjed bini biex jintuża mill-organizzazzjoni. Għalhekk, għas-sena taʼ servizz 2020, id-Dipartiment Lokali tal-Ippjanar u l-Kostruzzjoni pjana li jibni jew jirranġa iżjed minn 2,700 Sala tas-Saltna.a
Sfortunatament, minħabba l-pandemija tal-COVID-19 dawn il-pjanijiet twaqqfu. Il-Kumitat tal-Ippubblikar tal-Ġemgħa li Tiggverna ried li jipproteġi lill-aħwa u fl-istess ħin jobdi l-liġijiet li għamlu l-gvernijiet. Allura, waqqaf għal xi żmien il-proġetti li kienu qed isiru madwar id-dinja. Imma mill-bidu tas-sena taʼ servizz 2020 sakemm bdiet il-pandemija, kienu diġà tlestew 1,700 proġett. Iktar minn hekk, tlestew iżjed minn 100 proġett kbir f’fergħat differenti. Ara kif żewġ proġetti li tlestew għenu lill-aħwa.
Il-fergħa tal-Kamerun. Il-fergħa li kienet f’Douala, kienet żgħira ħafna u kellha bżonn ħafna xogħol. Il-Kumitat tal-Ippubblikar beda jikkunsidra biex jirranġa l-fergħa, imma kienet se tiswa ħafna iżjed flus biex jirranġa l-propjetà milli kemm tiswa l-propjetà. Huma raw ukoll jekk kienx possibbli li jibnu proprjetà ġdida jew jixtru u jirranġaw proprjetà oħra, imma l-ebda minnhom ma kienet possibbli.
L-aħwa saru jafu li fin-naħa taʼ fuq taʼ Douala, il-gvern kien qed jippjana biex jibni triq maġenb Sala tal-Assemblea. It-triq tkun tistaʼ tipprovdi aċċess aħjar u servizzi li l-fergħa jkollha bżonn. Dan kien eżatt li l-fergħa kellha bżonn. Għalhekk, il-Ġemgħa li Tiggverna ddeċidiet li tibni fergħa ġdida maġenb is-Sala tal-Assemblea.
Aħwa jibnu l-fergħa l-ġdida tal-Kamerun
L-aħwa u l-kuntratturi ħadmu fuq il-proġett flimkien, u għalhekk frankaw il-ħin u l-flus. Fil-fatt, il-proġett ġie jiswa ħafna inqas milli stennew. Huma frankaw iżjed minn €1,500,000! Il-familja taʼ Betel setgħet tidħol fil-fergħa l-ġdida ftit qabel ma nfirxet ħafna l-pandemija.
Il-fergħa tal-Kamerun tlestiet qabel il-pandemija tal-COVID-19
Il-Beteliti fil-Kamerun qed jieħdu pjaċir jgħixu u jaħdmu f’post aħjar. Huma jaraw il-fergħa l-ġdida bħala rigal mingħand Ġeħova. Koppja qalet, “Aħna rridu li naħdmu iktar u nuru kemm napprezzaw dan ir-rigal.”
Aħwa qed jaħdmu fl-uffiċċju l-ġdid qabel il-pandemija
L-Uffiċċju tat-Traduzzjoni taʼ Tojolabal (RTO), il-Messiku. Għal żmien twil, it-tim tat-traduzzjoni taʼ Tojolabal kien jaħdem fil-fergħa tal-Amerika Ċentrali, li tinsab viċin taʼ Mexico City. Imma l-maġġoranza tan-nies li jitkellmu l-lingwa Tojolabal jinstabu f’Altamirano u Las Margaritas. Dawn qegħdin kważi 1,000 kilometru ’l bogħod! B’hekk, dawk li kienu jaħdmu fit-traduzzjoni sabuha diffiċli biex jibqgħu up-to-date maʼ kif in-nies jitkellmu t-Tojolabal. U l-fergħa sabitha diffiċli biex issib aħwa kwalifikati fil-viċin biex jgħinu bit-traduzzjoni u bir-rekordings tat-Tojolabal.
Aħwa jgħinu fil-bini tal-RTO
Għalhekk, il-Kumitat tal-Kitba tal-Ġemgħa li Tiggverna ried li jmexxi t-tim tat-traduzzjoni f’post fejn in-nies jitkellmu t-Tojolabal. Biex jagħmlu dan, il-fergħa ddeċidiet li jixtru u jirranġaw propjetà. Dan kien ħafna irħas milli jibnu jew jikru uffiċini.
Ħu li jaħdem fit-traduzzjoni jispjega kif dan kien t’għajnuna għalih. Hu qal: “Fl-għaxar snin li ħdimt fit-traduzzjoni, ma ltqajtx maʼ familja waħda li titkellem il-lingwa tiegħi. Issa l-uffiċċju tagħna qiegħed fejn in-nies jitkellmu t-Tojolabal. Kull jum nitkellem bit-Tojolabal m’oħrajn. Tgħallimt ħafna kliem ġdid u x-xogħol tiegħi qed isir ħafna aħjar.”
L-uffiċċju tat-traduzzjoni tat-Tojolabal kif kien qabel u wara
Proġetti għas-Sena taʼ Servizz 2021
Fis-sena taʼ servizz 2021, jekk ikun possibbli, hu ppjanat li jsir xogħol fuq 75 RTO u postijiet fejn isiru l-iskejjel teokratiċi. Ukoll, se nkomplu x-xogħol fuq tmien fergħat kbar. Dawn jinkludu l-proġett fil-kwartieri ġenerali f’Ramapo, New York, kif ukoll il-fergħat il-ġodda fl-Arġentina u l-Italja. Apparti minn hekk, għandna bżonn iżjed minn 1,000 Sala tas-Saltna ġdida, irridu nbiddlu iżjed minn 6,000 Sala tas-Saltna oħra għax m’għadhomx addattati, u għandna bżonn nirranġaw 4,000 oħra.
Minn fejn jiġu l-flus għal dan ix-xogħol kollu? Ħuna Lázaro González, membru tal-Kumitat tal-Fergħa tal-Amerika Ċentrali, wieġeb din il-mistoqsija meta kien qed jitkellem dwar il-proġett tal-RTO tat-Tojolabal. Hu qal “Mingħajr l-għajnuna tal-aħwa madwar id-dinja, il-fergħa tagħna ma tistax tibni uffiċċji tat-traduzzjoni għal lingwi f’postijiet rurali. Bid-donazzjonijiet tal-aħwa għamilha possibbli biex l-aħwa fit-traduzzjoni jkunu jistgħu jaħdmu fejn in-nies jitkellmu bil-lingwa tagħhom. Aħna nirringrazzjaw ħafna lill-aħwa madwar id-dinja għall-ġenerożità tagħhom.” Iva, dawn il-proġetti jistgħu jsiru grazzi għad-donazzjonijiet li tagħmlu għax-xogħol taʼ madwar id-dinja, li ħafna minnhom isiru minn donate.jw.org.
a Id-Dipartiment Lokali tal-Ippjanar u l-Kostruzzjoni jippjana u jibni s-Swali tas-Saltna fit-territorju tal-fergħa. Id-Dipartiment tal-Ippjanar u l-Kostruzzjoni Madwar id-Dinja fil-kwartieri ġenerali, jara liema proġetti għandhom isiru l-ewwel u jippjana kif se jsiru.