“Fl-​aħħar jiem ikun hawn żminijiet kritiċi li diffiċli biex issib tarfhom.”—2 TIMOTJU 3:1.

ĠIELI smajt jew saħansitra rajt xi ħaġa minn dawn il-​ġrajjiet taʼ niket?

● Marda fatali tieħu l-​ħajja taʼ ħafna.

● Mijiet imutu minħabba l-​ġuħ.

● Terremot joqtol lil eluf taʼ nies u jħalli lil ħafna oħrajn bla djar.

Fil-​paġni li ġejjin se tirrivedi xi fatti li jġegħluk taħseb dwar ġrajjiet bħal dawn. Se tara wkoll li l-​Bibbja bassret li se jkun hemm kundizzjonijiet bħal dawn matul il-​perijodu taʼ żmien imsejjaħ l-​“aħħar jiem.”

Madankollu, l-​iskop taʼ dawn l-​artikli mhuwiex biex jikkonvinċik li qed ngħixu f’dinja mimlija inkwiet. X’aktarx li dan l-​inkwiet int qed tarah b’għajnejk stess. Minflok, huma mħejjijin biex jagħtuk tama. Se juru li t-​twettiq taʼ dawn is-​sitt profeziji jfisser li l-​“aħħar jiem” dalwaqt se jispiċċaw. Din is-​serje se tikkunsidra wkoll xi oġġezzjonijiet komuni għal din l-​evidenza u se tipprovdi raġuni tajba biex int temmen li hemm xi ħaġa aħjar fil-​futur qarib.

“Ikun hemm terremoti kbar.”—LUQA 21:11.

● Winnie, li għandha 16-​il xahar, tiġi salvata mit-​tifrik fil-​Ħaiti. Kru tat-​televixin li kienu qed jirrapportaw fuq id-​diżastru kienu semgħu l-​krib baxx tagħha. Hi salvat mit-​terremot, imma l-​ġenituri tagħha ma salvawx.

X’JURU L-​FATTI? Meta terremot taʼ skala 7.0 laqat lill-​Ħaiti f’Jannar tal-​2010, mietu iktar minn 300,000 ruħ. Barra minn dawn, iktar minn miljun ruħ spiċċaw bla dar f’ħakka t’għajn. Għalkemm kien aħrax, it-​terremot fil-​Ħaiti ma kienx l-​uniku wieħed li seħħ. Bejn April tal-​2009 u April tal-​2010, seħħew minn tal-​inqas 18-​il terremot kbir madwar id-​dinja.

X’INHI OĠĠEZZJONI KOMUNI? M’aħniex nesperjenzaw iktar terremoti; minħabba t-​teknoloġija moderna, sempliċement sirna iktar konxji tagħhom milli kienu n-​nies fil-​passat.

HIJA VALIDA DIN L-​OĠĠEZZJONI? Ikkunsidra dan il-​fatt: Il-​Bibbja ma tenfasizzax l-​għadd taʼ terremoti matul l-​aħħar jiem. Madankollu, tgħid li “terremoti kbar” se jseħħu “f’post wara l-​ieħor,” u dan jagħmilhom wieħed mill-​aspetti notevoli taʼ dan il-​perijodu sinifikanti fl-​istorja.—Marku 13:8; Luqa 21:11.

INT X’TAĦSEB? Qegħdin naraw terremoti kbar, sewwasew bħalma bassret il-​Bibbja?

It-​terremoti waħedhom forsi ma jidhrux li huma biżżejjed evidenza biex tikkonkludi li qed ngħixu fl-​aħħar jiem. Però, mhumiex l-​unika profezija li qed titwettaq. Ikkunsidra oħra.

[Kumment f’paġna 4]

“Aħna [l-​ġeofiżiċi] nsejħulhom terremoti kbar. Il-​bqija tan-​nies isejħulhom tal-​biżaʼ.”​—KEN HUDNUT, STĦARRIĠ ĠEOLOĠIKU TAL-​ISTATI UNITI.

[Sors tal-Istampa f’paġna 4]

© William Daniels/Panos Pictures

“Ikun hemm nuqqas taʼ ikel.”—MARKU 13:8.

● Raġel ifittex ir-​refuġju fir-​raħal taʼ Quaratadji, in-​Niġer. Il-​kuġini tar-​raġel u ħutu subien u bniet ukoll ġew minn postijiet oħrajn tal-​pajjiż biex jipprovaw jaħarbu mill-​ġuħ. Madankollu, ir-​raġel qiegħed waħdu mimdud fuq tapit mal-​art. Għala qiegħed waħdu? “Ma jistax jitmaʼ [lil familtu], u għalhekk ma jistax jibqaʼ jħares f’għajnejhom,” jispjega Sidi, il-​kap tar-​raħal.

X’JURU L-​FATTI? Madwar id-​dinja, kważi 1 minn kull 7 individwi ma jkollux biżżejjed ikel kuljum. Ir-​rata hi agħar fl-​Afrika, fin-​naħa t’isfel tas-​Saħara, fejn 1 minn kull 3 individwi m’għandux biżżejjed ikel għal perijodu twil taʼ żmien. Biex nifhmu din il-​figura, immaġina familja li tikkonsisti minn missier, omm, u tarbija. Jekk hemm biżżejjed ikel għal tnejn minnhom biss, min se joqgħod bil-​ġuħ? Il-​missier? l-​omm? it-​tarbija? Din hi l-​għażla li familji bħal dawn iridu jagħmlu fuq bażi taʼ kuljum.

X’INHI OĠĠEZZJONI KOMUNI? L-​art tipproduċi iktar minn biżżejjed ikel għal kulħadd. Kulma hemm bżonn hu li r-​riżorsi tal-​art jiġu mqassmin aħjar.

HIJA VALIDA DIN L-​OĠĠEZZJONI? Veru, il-​bdiewa jistgħu jipproduċu u jittrasportaw iktar ikel minn qatt qabel fl-​istorja. Idealment, il-​gvernijiet umani għandhom ikunu kapaċi jqassmu l-​ikel li tipproduċi l-​art biex isolvu l-​problema tal-​ġuħ. Madankollu, anki wara li ilhom għaxriet taʼ snin jipprovaw, ma rnexxilhomx jagħmluh dan.

INT X’TAĦSEB? Qed jitwettaq Marku 13:8? Minkejja l-​avanzi fit-​teknoloġija, qiegħed in-​nuqqas taʼ ikel jifni lill-​umanità fuq skala globali?

It-​terremoti u l-​ġuħ spiss jiġu qabel problemi li jqumu minħabba aspett ieħor tas-​sinjal tal-​aħħar jiem.

[Kumment f’paġna 5]

“Iktar minn terz mit-​tfal li jmutu bil-​pulmunite, id-​dijarea, u mard ieħor setgħu jsalvaw kieku ma kinux malnutriti.”​—ANN M. VENEMAN, L-​EKS DIRETTRIĊI ESEKUTTIVA TAL-​FOND TAT-​TFAL TAL-​ĠM.

[Sors tal-Istampa f’paġna 5]

© Paul Lowe/Panos Pictures

“In-​nies se . . . jbatu b’mard terribbli.”—LUQA 21:11, Contemporary English Version.

● Bonzali, uffiċjal tas-​saħħa pubblika f’pajjiż Afrikan mifni bi gwerra ċivili, jagħmel il-​ftit li jistaʼ biex jikkura ħaddiema tal-​minjieri fil-​belt tiegħu li qed imutu bil-​virus Marburg.a It-​talb tiegħu għall-​għajnuna mingħand uffiċjali f’belt akbar waqaʼ fuq widnejn torox. Erbaʼ xhur wara, l-​għajnuna fl-​aħħar tasal, imma Bonzali laħaq miet. Hu ħa l-​marda Marburg mill-​ħaddiema tal-​minjieri li pprova jsalva.

X’JURU L-​FATTI? L-​infezzjonijiet respiratorji (bħall-​pulmunite), il-​mard tad-​dijarea, il-​HIV/AIDS, it-​tuberkulosi, u l-​malarja huma fost l-​iktar mard qerried li jifni lill-​umanità. F’sena reċenti, dawn il-​ħames kategoriji tal-​mard qatlu kważi 11-​il miljun ruħ. Fi kliem ieħor, il-​mard qatel bejn wieħed u ieħor persuna waħda kull tliet sekondi, matul is-​sena kollha.

X’INHI OĠĠEZZJONI KOMUNI? Il-​popolazzjoni tad-​dinja tkompli tikber, u allura, naturalment, hemm iktar każijiet taʼ mard. Hemm iktar nies li jistgħu jiġu infettati.

HIJA VALIDA DIN L-​OĠĠEZZJONI? Il-​popolazzjoni tad-​dinja żdiedet drastikament. Imma anki l-​abbiltà tal-​bniedem biex jagħraf, jikkontrolla, u jikkura l-​mard żdiedet. Għalhekk, loġikament, m’għandhomx il-​mard u l-​effetti tiegħu fuq il-​familja umana jonqsu? Però, qed jiġri eżatt l-​oppost.

INT X’TAĦSEB? Qegħdin in-​nies ibatu b’mard terribbli bħalma bassret il-​Bibbja?

It-​terremoti, il-​ġuħ, u l-​mard jagħmlu straġi minn miljuni taʼ nies. Miljuni oħrajn ibatu taħt idejn sħabhom il-​bnedmin—ħafna jiġu trattati ħażin minn dawk li suppost jipproteġuhom. Innota x’tgħid il-​profezija tal-​Bibbja dwar dak li kellu jiġri.

[Nota taʼ taħt]

[Kumment f’paġna 6]

“Hu orribbli li tittiekel minn barra minn xi ljun jew xi ħaġa oħra, imma daqstant ieħor hu orribbli li tittiekel minn ġewwa minn xi marda terribbli u li tara dan kollu jseħħ madwarek.”​—L-​EPIDEMJOLOGU MICHAEL OSTERHOLM.

[Sors tal-Istampa f’paġna 6]

© William Daniels/Panos Pictures

“In-​nies se . . . jkunu neqsin minn affezzjoni normali għall-​familji tagħhom.”—2 TIMOTJU 3:1-​3, God’s Word Bible.

● Chris jaħdem għal grupp li jgħin lil nies li jesperjenzaw vjolenza domestika fit-​Tramuntana taʼ Wales. “Niftakar li daħlet waħda mara li tant kienet ġiet imsawta li lanqas biss stajt nagħrafha mill-​aħħar darba li kont rajtha,” jgħid Chris. “Nisa oħrajn tant huma mkissrin emozzjonalment li lanqas biss jgħollu għajnejhom minn mal-​art.”

X’JURU L-​FATTI? F’pajjiż Afrikan, bejn wieħed u ieħor 1 minn kull 3 nisa ġiet abbużata sesswalment meta kienet għadha tifla. Stħarriġ li sar f’dan l-​istess pajjiż sab li iktar minn terz mill-​irġiel ħassew li kien aċċettabbli li jsawtu lin-​nisa tagħhom. Madankollu, in-​nisa mhumiex l-​uniċi vittmi tal-​vjolenza domestika. Pereżempju, fil-​Kanada, kważi 3 minn kull 10 irġiel ġew imsawtin jew abbużati b’mod ieħor min-​nisa tagħhom.

X’INHI OĠĠEZZJONI KOMUNI? Minn dejjem kien hemm il-​vjolenza domestika. Sempliċement qed tingħata iktar attenzjoni llum milli kienet fil-​passat.

HIJA VALIDA DIN L-​OĠĠEZZJONI? Fi snin reċenti, sirna iktar konxji tal-​vjolenza domestika. Imma dan il-​fatt, naqqas in-​numru taʼ inċidenti taʼ vjolenza domestika? Le, dan ma kienx il-​każ. In-​nuqqas t’affezzjoni naturali hu iktar komuni minn qatt qabel.

INT X’TAĦSEB? Qiegħed jitwettaq it-​2 Timotju 3:1-​3? Veru li ħafna nies għandhom nuqqas t’affezzjoni għall-​familji tagħhom li suppost jiġi b’mod naturali?

Il-​ħames profezija li qed tara titwettaq tinvolvi lil darna, l-​art. Ikkunsidra dak li tgħid il-​Bibbja fuq dan is-​suġġett.

[Kumment f’paġna 7]

“Il-​vjolenza domestika hi magħrufa bħala waħda mill-​iktar delitti fis-​soċjetà li kontinwament ma tiġix rapportata biżżejjed. Bħala medja, mara tiġi msawta mis-​sieħeb tagħha 35 darba qabel ma tikkuntattja lill-​pulizija.”​—RAPPREŻENTANTA TAS-​SERVIZZ TAL-​GĦAJNUNA BIT-​TELEFON GĦALL-​ABBUŻ DOMESTIKU FʼWALES.

‘[Alla se] jeqred lil dawk li qed jeqirdu l-​art.’—RIVELAZZJONI 11:18.

● Is-​Sinjur Pirri xogħlu hu li jiġbor il-​meraq tal-​palm fi Kpor, in-​Niġerja. Is-​sengħa tiegħu ġiet imħarbta mit-​tixrid taʼ żejt kbir ħafna fid-​Delta tan-​Niġer. “Joqtol lill-​ħut tagħna, jagħmel il-​ħsara lill-​ġilda tagħna, iħassar lix-​xmajjar tagħna,” jgħid hu. “M’għadx fadalli mod kif naqlaʼ l-​għajxien.”

X’JURU L-​FATTI? Skont xi esperti, 6.5 miljuni tunnellata skart jidħol fl-​oċeani tad-​dinja kull sena. Madwar 50 fil-​mija minn dan l-​iskart hu plastik li se jitmexxa mill-​kurrent għal mijiet taʼ snin qabel ma jitfarrak. Minbarra li jniġġsu l-​art, il-​bnedmin qed ibattluha mir-​riżorsi naturali tagħha b’rata allarmanti. Xi studji juru li l-​art għandha bżonn sena u ħames xhur biex tirrestawra dak li l-​bnedmin jużaw f’sena. “Jekk ma jkunx hemm bidla fil-​popolazzjoni u l-​konsum, se jkollna bżonn l-​ekwivalenti taʼ żewġ Dinjiet sal-​2035,” tgħid il-​gazzetta Awstraljana Sydney Morning Herald.

X’INHI OĠĠEZZJONI KOMUNI? Il-​bnedmin huma intelliġenti u kapaċi jsibu soluzzjonijiet tajbin għall-​problemi. Nistgħu rreġġgħu lura dawn il-​problemi u nsalvaw id-​dinja.

HIJA VALIDA DIN L-​OĠĠEZZJONI? Ħafna individwi u gruppi li jaħdmu iebes qed jagħmlu lin-​nies iktar konxji taʼ kwistjonijiet ambjentali. Madankollu, l-​art għadha titniġġes fuq skala kbira.

INT X’TAĦSEB? Hemm bżonn li Alla jintervieni u jsalva l-​pjaneta tagħna milli tinqered—sewwasew bħalma wiegħed li se jagħmel?

Minbarra l-​ħames profeziji li għadna kif ikkunsidrajna, il-​Bibbja bassret ukoll żviluppi pożittivi għall-​aħħar jiem. Ikkunsidra eżempju wieħed fis-​sitt profezija.

[Kumment f’paġna 8]

“Inħoss li fejn qabel kelli ġenna tal-​art issa għandi miżbla taʼ skart tossiku.”​—ERIN TAMBER, RESIDENTA TAL-​KOSTA TAL-​GOLF, L-​ISTATI UNITI, RIGWARD L-​EFFETTI TAT-​TIXRID TAŻ-​ŻEJT FIL-​GOLF TAL-​MESSIKU FL-​2010.

[Kaxxa f’paġna 8]

Huwa Alla Responsabbli?

Ladarba l-​Bibbja bassret il-​kundizzjonijiet ħżiena li naraw illum, ifisser dan li Alla hu responsabbli għalihom? Jikkaġuna hu t-​tbatija tagħna? Tistaʼ ssib tweġibiet sodisfaċenti għal dawn il-​mistoqsijiet f’kapitlu 11 tal-​ktieb Il-​Bibbja X’Tgħallem Verament? pubblikat mix-​Xhieda taʼ Ġeħova.

[Sors tal-Istampa f’paġna 8]

U.S. Coast Guard photo

“Din l-​aħbar tajba tas-​saltna tiġi pridkata fl-​art abitata kollha.”—MATTEW 24:14.

● Vaiatea tgħix fuq gżira remota tal-​Paċifiku fl-​Arċipelagu taʼ Tuamotu. Għalkemm Tuamotu jikkonsisti minn kważi 80 gżira tal-​qroll fuq medda taʼ iktar minn 802,900 kilometru kwadru, għandu popolazzjoni taʼ xi 16,000 abitant biss. Madankollu, Vaiatea u l-​ġirien tagħha ġew kuntattjati mix-​Xhieda taʼ Ġeħova. Għala? Għax ix-​Xhieda jixtiequ jaqsmu l-​aħbar tajba dwar is-​Saltna t’Alla man-​nies kollha—jgħixu fejn jgħixu.

X’JURU L-​FATTI? Il-​messaġġ tas-​Saltna qed jilħaq kull rokna tad-​dinja. Fl-​2010 biss, ix-​Xhieda taʼ Ġeħova qattgħu iktar minn 1.6 biljun siegħa jxandru din l-​aħbar tajba f’236 pajjiż. Din hi medja taʼ 30 minuta fix-​xogħol tal-​ippritkar kuljum minn kull Xhud. Matul l-​aħħar għaxar snin ipproduċew u qassmu iktar minn 20 biljun pubblikazzjoni bbażati fuq il-​Bibbja.

X’INHI OĠĠEZZJONI KOMUNI? Il-​messaġġ tal-​Bibbja ilu jiġi pritkat eluf taʼ snin.

HIJA VALIDA DIN L-​OĠĠEZZJONI? Veru, ħafna ppritkaw xi ħaġa dwar il-​messaġġ tal-​Bibbja. Madankollu, il-​biċċa l-​kbira għamlu dan għal perijodu qasir biss u fuq skala limitata. B’kuntrast, ix-​Xhieda taʼ Ġeħova qed iwettqu kampanja taʼ ppritkar globali b’mod organizzat li tilħaq mijiet taʼ miljuni taʼ nies. Ix-​Xhieda pperseveraw fix-​xogħol tal-​ippritkar tagħhom minkejja oppożizzjoni ħarxa minn ftit mill-​iktar organizzazzjonijiet setgħanin u kefrin fl-​istorja tal-​bniedem.a (Marku 13:13) Iżjed minn hekk, ix-​Xhieda taʼ Ġeħova mhumiex imħallsin biex jippritkaw. Minflok, minn jeddhom jagħtu mill-​ħin tagħhom, u joffru l-​letteratura tagħhom mingħajr ħlas. Xogħolhom hu appoġġat kompletament minn kontribuzzjonijiet volontarji.

INT X’TAĦSEB? “L-​aħbar tajba tas-​saltna,” qed tiġi pritkata madwar id-​dinja? It-​twettiq taʼ din il-​profezija, jistaʼ jfisser li hemm xi ħaġa aħjar fil-​futur qarib?

[Nota taʼ taħt]

[Kumment f’paġna 9]

“Sakemm Ġeħova jippermetti, aħna se nkomplu nxandru l-​aħbar tajba tas-​Saltna biż-​żelu, billi nużaw kull mezz possibbli biex nilħqu lin-​nies.”​—2010 YEARBOOK OF JEHOVAH’S WITNESSES.

“Ftit ieħor biss, u l-​ħażin ma jkunx iktar . . . Imma l-​ġwejdin se jirtu l-​art, u bi sliem kotran jitgħaxxqu ferm.” —SALM 37:10, 11.

TIXTIEQ taraha sseħħ il-​profezija kwotata hawn fuq? Bla dubju hekk tixtieq. Hemm raġunijiet sodi biex temmen li dalwaqt se sseħħ.

L-​artikli taʼ qabel iddiskutew ftit biss mill-​profeziji tal-​Bibbja li b’mod ċar jindikaw li qed ngħixu “fl-​aħħar jiem.” (2 Timotju 3:1-​5) Alla nebbaħ lill-​kittieba tal-​Bibbja biex ibassru dawk il-​ġrajjiet sabiex aħna jkollna tama. (Rumani 15:4) It-​twettiq taʼ profeziji bħal dawn ifisser li l-​inkwiet li niffaċċjaw issa dalwaqt se jintemm.

X’se jkun hemm wara l-​aħħar jiem? Is-​Saltna t’Alla se taħkem fuq l-​umanità kollha. (Mattew 6:9) Ikkunsidra d-​deskrizzjoni tal-​Bibbja tal-​kundizzjonijiet fuq l-​art f’dak iż-​żmien:

● Il-​ġuħ se jintemm. “Se jkun hemm ħafna qmuħ fuq l-​art; fuq il-​qċaċet tal-​muntanji jkun hemm iżżejjed.”—Salm 72:16.

● Il-​mard se jintemm. “Ħadd minn min jgħammar hemmhekk ma jgħid: ‘Jien marid.’”—Isaija 33:24.

● L-​art se tiġi mġedda. “Ix-​xagħri u r-​reġjun bla ilma se jifirħu, u l-​pjanura tad-​deżert se tifraħ u twarrad bħaż-​żagħfran.”—Isaija 35:1.

Dawn huma biss ftit mill-​profeziji inkuraġġanti tal-​Bibbja li se jseħħu dalwaqt. Għax ma titlobx lix-​Xhieda taʼ Ġeħova juruk għala huma daqstant fiduċjużi li hemm żminijiet aħjar fil-​futur qarib?