Xhieda Informali bl-​Ingliż fil-​Messiku

SAKEMM l-​appostlu Pawlu kien f’Ateni jistenna li jaslu sħabu li kienu jivvjaġġaw miegħu, hu ħa vantaġġ miż-​żmien li għamel hemm biex jagħti xiehda informali. Il-​Bibbja tgħid: “Kien jiddiskuti . . . maʼ dawk kollha li kuljum kienu jinzertaw għaddejjin mill-​pjazza tal-​belt.” (Atti 17:17) Ġesù ta xiehda informali lil waħda mara Samaritana ħdejn bir fil-​vjaġġ tiegħu mil-​Lhudija għall-​Galilija. (Ġwanni 4:3-26) Taħtaf int kull opportunità biex titkellem dwar l-​aħbar tajba tas-​Saltna t’Alla?

Fil-Messiku, hemm ħafna opportunitajiet li fihom wieħed jistaʼ jagħti xiehda informali bl-​Ingliż. It-​turisti jżuru postijiet turistiċi, l-​istudenti taʼ l-​università ġejjin u sejrin, u xi barranin li jkunu rtiraw mix-​xogħol u marru joqogħdu fil-​Messiku jqattgħu ħafna ħin fil-​ġonna u r-​restoranti. Ħafna mix-​Xhieda taʼ Jehovah li jafu bl-​Ingliż ħaduha drawwa li jaqbdu diskursata maʼ wħud bħal dawn. Fil-​fatt, dawn ix-​Xhieda jaħtfu kull opportunità biex jitkellmu maʼ xi ħadd li jkun jidher stranġier jew li jitkellem bl-​Ingliż. Ejja naraw kif jagħmlu dan.

Spiss, Xhieda minn barra l-​pajjiż li jkunu qed jaqdu fit-​territorju tal-​lingwa Ingliża sempliċement imorru fuq dawk li ovvjament huma barranin, u wara li jintroduċu ruħhom jistaqsuhom minn liema pajjiż huma. Imbagħad, ġeneralment il-​barranin jistaqsu lix-​Xhieda x’kien li ġabhom il-​Messiku, u b’hekk ix-​Xhieda jaħtfu l-​opportunità biex jaqsmu t-​twemmin Kristjan maʼ dawn il-​barranin. Per eżempju, Gloria, li qed taqdi f’Oaxaca, post fejn hemm ħtieġa kbira għall-​ippridkar tas-​Saltna bil-​lingwa Ingliża, issibha iktar faċli li tibda l-​konversazzjoni b’dan il-​mod. Darba minnhom, meta Gloria kienet sejra lura d-​dar wara li kienet qattgħet xi ħin tagħti xiehda informali fil-​pjazza taʼ dak il-​post, waqqfitha koppja mill-​Ingilterra. Il-​mara qaltilha skantata: “Ma nistax nemmen li qed nara mara sewda miexja fit-​toroq taʼ Oaxaca!” Minflok ma ħadet għaliha, Gloria bdiet tidħaq, u qabdu diskursata dwar għala kienet tinsab fil-​Messiku. Il-​mara stiednet lil Gloria d-​dar biex tieħu kikkra kafè magħha. Wara li għamlet appuntament magħha, Gloria offritilha r-​rivisti It-​Torri taʼ l-​Għassa u Stenbaħ!, imma l-​mara ma ridithomx għax qalet li ma kinitx temmen b’Alla. Gloria wieġbet li hi kienet tieħu gost ħafna titkellem maʼ nies bħalha u xtaqet tkun taf l-​opinjoni tagħha dwar wieħed mill-​artikli intitolat “Postijiet għall-​Qima—Għandna Bżonnhom?” Il-​mara aċċettat, u qaltilha: “Jekk għandek il-​ħila tikkonvinċini, ikun miraklu.” Huma ltaqgħu kemm-il darba għall-​kafè u kellhom diskursati interessanti. Din il-​koppja iktar tard marret lura l-​Ingilterra, imma d-​diskussjonijiet komplew permezz taʼ l-​Internet.

Gloria kellha wkoll diskussjonijiet maʼ Saron, studenta minn Washington, D.C., li kienet f’Oaxaca tagħmel xogħol volontarju qalb in-​nisa indiġeni bħala parti mill-​istudji tagħha biex iġġib id-​diploma mill-​università. Wara li faħħret lil Saron għax-​xogħol siewi li kienet qed tagħmel, Gloria spjegatilha għala hi kienet fil-​Messiku. Dan wassal għal diskursata mill-​isbaħ dwar il-​Bibbja u dwar dak li Alla se jagħmel mhux biss għall-​foqra imma wkoll għal kulħadd. Saron ikkummentat dwar l-​ironija tal-​ħajja, peress li meta kienet fl-​Istati Uniti qatt ma kienet tkellimhom lix-​Xhieda, imma waħda mill-​ewwel persuni li ltaqgħet magħhom fil-​Messiku kellha tkun waħda mix-​Xhieda taʼ Jehovah! Saron aċċettat studju tal-​Bibbja u bdiet tattendi l-​laqgħat Kristjani mill-​ewwel.

Ħafna barranin marru joqogħdu f’postijiet turistiċi ħdejn il-​baħar fil-​Messiku, biex ifittxu xi tip taʼ ġenna taʼ l-​art. Laurel tuża din il-​ħaġa biex tibda konversazzjoni billi tistaqsi lin-​nies f’Acapulco jekk din il-​belt tidhirx li hija ġenna taʼ l-​art iktar minn pajjiżhom u għala togħġobhom daqshekk. Imbagħad tispjega li dalwaqt l-​art kollha se tkun tassew ġenna. Dan wassal biex Laurel tibda studju tal-​Bibbja maʼ mara Kanadiża li ltaqgħet magħha għand il-​veterinarju. Jistaʼ metodu simili jkun effettiv fil-​post fejn toqgħod int?

‘Fit-​Toroq u fl-​Imsieraħ’

Spiss tinbeda konversazzjoni fit-​toroq u fl-​imsieraħ bil-​mistoqsija: “Taf bl-​Ingliż?” Ħafna Messikani jafu jitkellmu bl-​Ingliż minħabba x-​xogħol tagħhom jew għax ikunu għamlu xi żmien jgħixu fl-​Istati Uniti.

Wieħed Xhud u martu avviċinaw mara anzjana li kienet f’siġġu tar-​roti megħjuna mill-​infermiera tagħha. Huma staqsew lill-​mara anzjana jekk kinitx taf bl-​Ingliż. Hi weġbithom iva għax kienet għamlet ħafna snin tgħix fl-​Istati Uniti. Aċċettat It-​Torri taʼ l-​Għassa u Stenbaħ!, li qatt ma kienet qrathom qabel, qaltilhom li kien jisimha Consuelo, u tathom l-​indirizz. Meta żaruha erbat ijiem wara, huma sabu li din kienet tgħix f’dar taʼ l-​anzjani mmexxija minn sorijiet Kattoliċi. Għall-​ewwel kien diffiċli li jikkuntattjaw lil Consuelo għaliex is-​sorijiet kienu ssuspettaw xi ħaġa u qalulhom li Consuelo ma setgħetx tarahom. Dawn komplew jinsistu mas-​sorijiet biex jgħidu lil Consuelo li huma kienu marru jarawha u xtaqu jkellmuha. Consuelo, mhux talli ma riditx tarahom imma talli daħħlithom f’kamritha. Minn dakinhar ’l hawn, din il-​mara taʼ 86 sena bdiet studju regulari tal-​Bibbja, minkejja l-​kummenti negattivi tas-​sorijiet. Hi attendiet ukoll xi laqgħat Kristjani.

Proverbji 1:20 jgħid: “L-​għerf jgħajjat fit-​triqat, leħnu jgħolli fl-​imsieraħ.” Innota kif dan ġara fil-​pjazza taʼ San Miguel de Allende. Darba waħda kmieni fil-​għodu, Ralph mar ikellem raġel taʼ mezz’età li kien bil-​qiegħda fuq bank. Dan ir-​raġel tgħidx kemm skanta li Ralph offrielu It-​Torri taʼ l-​Għassa u Stenbaħ! u beda jirrakkontalu l-​istorja taʼ ħajtu.

Hu kien veteran tal-​gwerra fil-​Vjetnam, u kien qed isofri minn dipressjoni qawwija minħabba l-​istress emozzjonali li għadda minnu x’ħin kien jara tant nies imutu meta kien fil-​militar. Qabel kien fuq il-​front, jiġġieled fuq quddiemnett, imma mbagħad bagħtuh f’bażi militari. Hemmhekk, hu ġie inkarigat jaħsel l-​iġsma tas-​suldati mejtin li kienu se jintbagħtu lura lejn l-​Istati Uniti. Issa, 30 sena wara, hu spiss joħlom ħolm ikrah u jaħkmu biżaʼ kbir. Dik l-​għodwa, waqt li kien bil-​qiegħda fil-​pjazza, kien qed jitlob f’qalbu għall-​għajnuna.

Dan il-​veteran aċċetta l-​letteratura kif ukoll stedina biex imur is-​Sala tas-​Saltna. Wara l-​laqgħa, hu qal li f’dawk is-​sagħtejn fis-​Sala tas-​Saltna, għall-​ewwel darba fi 30 sena ħassu fil-​paċi. Dan ir-​raġel kien f’San Miguel de Allende għal ftit ġimgħat biss, imma hu kellu diversi studji tal-​Bibbja u attenda l-​laqgħat kollha sakemm mar lura pajjiżu. Saru arranġamenti biex l-​istudju tiegħu jitkompla.

Xiehda Informali fuq ix-​Xogħol u fl-​Iskola

Fuq il-​post tax-​xogħol turi li int Xhud taʼ Jehovah? Adrián, li xogħlu hu li jbigħ l-​appartamenti għall-​vaganzi f’Cape San Lucas, hekk jagħmel. B’riżultat taʼ dan, Judy, li taħdem miegħu, tgħid: “Kieku tliet snin ilu xi ħadd qalli li kont se nsir Xhud taʼ Jehovah, kont ngħidlu, ‘Lanqas jekk iddehebni!’ Imma ddeċidejt li rrid naqra l-​Bibbja. Bdejt naħseb ‘Kemm nistaʼ nsibha diffiċli, la jien inħobb naqra?’ Ħaġa taʼ l-​iskantament, lanqas biss kont għadni qrajt sitt paġni li ma rrealizzajtx li kelli bżonn l-​għajnuna. L-​uniku individwu li ġie f’moħħi kien Adrián, ġuvni li kien jaħdem miegħi. Kont inħobb nitkellem miegħu għax kien l-​uniku persuna deċenti li kien hemm fuq ix-​xogħol.” Adrián mill-​ewwel offra li jiġi maʼ Katie, l-​għarusa tiegħu, biex iwieġeb il-​mistoqsijiet kollha taʼ Judy. Katie bdiet studju tal-​Bibbja magħha, u Judy ma damitx ma saret Xhud mgħammda.

Xi ngħidu dwar ix-​xiehda informali fl-​iskola? Tnejn mix-​Xhieda kienu qed jieħdu lezzjonijiet taʼ l-​Ispanjol fl-​università, imma darba minnhom ma marrux għal-​lezzjoni minħabba li attendew assemblea Kristjana. Meta marru lura d-​darba taʼ wara, intalbu jirrakkontaw bl-​Ispanjol x’kienu għamlu dakinhar li ma ġewx. Huma ħatfu l-​opportunità biex jagħtu xiehda mill-​aħjar li setgħu bl-​Ispanjol. L-​għalliema, li kien jisimha Silvia, kienet tinteressaha ħafna l-​profezija tal-​Bibbja. Hi aċċettat studju tal-​Bibbja bl-​Ingliż u issa hija pubblikatriċi taʼ l-​aħbar tajba. Diversi membri tal-​familja tagħha qed jistudjaw ukoll. Silvia tgħid: “Sibt dak li ili nfittex ħajti kollha.” Iva, ix-​xiehda informali tistaʼ tipproduċi frott mill-​aqwa.

Jintużaw Opportunitajiet Oħra

L-​ospitalità tistaʼ twassal biex tingħata xiehda. Jim u Gail, li qed jaqdu f’San Carlos, Sonora, sabu kemm dan huwa minnu. Waħda mara li ħarġet dawra bil-​klieb f’xi s-​6.00 taʼ fil-​għodu waqfet tammira l-​bitħa tagħhom. Jim u Gail stidnuha tieħu kikkra kafè magħhom. Għall-​ewwel darba f’60 sena, hi semgħet b’Jehovah u bil-​prospett taʼ ħajja taʼ dejjem u nbeda studju tal-​Bibbja.

Adrienne bl-​istess mod tħobb turi qalb tajba maʼ l-​istranġieri. Darba kienet qed tiekol f’restorant f’Cancún meta daqsxejn taʼ tifel mar fuqha u staqsieha jekk kinitx Kanadiża. Meta qaltlu li kienet, hu spjegalha li hu u ommu kienu qed jipprovaw jgħinu lil oħtu tagħmel proġett għall-​iskola dwar il-​Kanadiżi. Ommu, li kienet taf bl-​Ingliż, marret tpoġġi ħdejn Adrienne. Wara li bil-​paċenzja kollha qagħdet twieġeb il-​mistoqsijiet tagħha dwar il-​Kanadiżi, Adrienne qaltilha: “Imma hemm raġuni verament importanti għala jien ġejt hawnhekk mill-​Kanada—biex ngħin lin-​nies jitgħallmu dwar il-​Bibbja. Int jinteressak?” Il-​mara wieġbet li kienet interessata. Hi kienet ilha għaxar snin li telqet mill-​knisja tagħha u kienet qed tipprova tistudja l-​Bibbja waħedha. Hi tat in-​numru tat-​telefon u l-​indirizz tagħha lil Adrienne, u din bditilha studju tal-​Bibbja li sejjer tajjeb.

‘Itfaʼ Ħobżok fuq Wiċċ il-​Baħar’

Meta nitkellmu dwar il-​verità tal-​Bibbja f’kull ċans li nsibu, spiss ir-​riżultat ikun li nagħtu xiehda lil nies li ftit li xejn kellhom l-​opportunità li jisimgħu l-​messaġġ tas-​Saltna. F’ħanut tal-​kafè mimli nies fil-​port taʼ Zihuatanejo, waħda mix-​Xhieda taʼ Jehovah stiednet lil żewġ stranġieri miżżewġin biex ipoġġu mal-​mejda magħha, peress li ma kienx hemm mejda vojta. Dawn it-​tnejn kienu ilhom sebaʼ snin jivvjaġġaw bil-​baħar minn post għall-​ieħor. Huma esprimew sentimenti negattivi dwar ix-​Xhieda taʼ Jehovah. Wara din il-​laqgħa fil-​ħanut tal-​kafè, ix-​Xhud żaret lil din il-​koppja fuq id-​dgħajsa tagħhom u stidnithom imorru għandha. Huma aċċettaw iktar minn 20 rivista u ħames kotba u wegħduha li kienu se jfittxu lix-​Xhieda fil-​post li kien imisshom iżuru.

Meta Jeff u Deb kienu f’restorant f’ċentru kummerċjali f’Cancún, huma nnotaw familja li kellhom tarbija tifla l-​ġmiel tagħha. Meta bdew jiggustaw lit-​tarbija u għaddew xi kummenti, il-​ġenituri tagħha offrewlhom biex jaqsmu l-​pizza magħhom. Saru jafu li din il-​familja kienet mill-​Indja. Qatt ma kienu semgħu bix-​Xhieda taʼ Jehovah, u lanqas qatt ma kienu raw il-​letteratura tagħna. Huma ħarġu miċ-​ċentru kummerċjali bil-​pubblikazzjonijiet tax-​Xhieda f’idejhom.

Xi ħaġa simili ġrat fi gżira lil hinn mill-​kosta taʼ Yucatán. Żewġ Ċiniżi miżżewġin friski talbu lil Jeff biex jiħdilhom ritratt, u dan ħadulhom bil-​qalb kollha. Imbagħad Jeff sar jaf li għalkemm kienu ilhom 12-il sena jgħixu fl-​Istati Uniti, qatt ma kienu raw jew semgħu bix-​Xhieda taʼ Jehovah! Kellhom konversazzjoni sabiħa, u Jeff inkuraġġiehom biex ifittxu lix-​Xhieda meta jmorru lura lejn pajjiżhom.

Forsi jkun hemm xi avveniment speċjali fl-​inħawi fejn toqgħod li jistaʼ jagħtik opportunità biex tagħti xiehda informali. Meta l-​president taʼ l-​Istati Uniti mar iżur lill-​president tal-​Messiku fir-​razzett kbir li kellu fi Guanajuato, ġew ħafna riporters minn madwar id-​dinja biex jirrapportaw dwar dan. Familja taʼ Xhieda taʼ Jehovah iddeċidiet li tieħu vantaġġ minn din l-​opportunità biex ilkoll kemm huma jagħtu xiehda bl-​Ingliż. Kellhom riżultat tajjeb. Per eżempju, wieħed mill-​ġurnalisti kien kiteb dwar ħafna gwerer, bħal dawk fil-​Kosovo u l-​Kuwait. Kollega tiegħu kien miet f’idu wara li xi ħadd mistoħbi kien sparalu. Meta dan il-​ġurnalist semaʼ bl-​irxoxt, hu rringrazzja lil Alla bid-​dmugħ f’għajnejh talli dawn ix-​Xhieda għenuh isir jaf li l-​ħajja għandha skop. Hu qalilhom li għalkemm ma kienx se jerġaʼ jarahom, hu kien se jżomm f’qalbu din l-​aħbar tajba mill-​Bibbja.

Kif nistgħu naraw, mhux dejjem inkunu nafu xi jkun ir-​riżultat meta nagħtu xiehda informali. Madankollu, l-​għaref Sultan Salamun qal: “Ibgħat ħobżok fuq wiċċ il-​baħar, għax wara żmien twil jerġagħlek lura.” Hu qal ukoll: “Iżraʼ fil-​għodu ż-​żerriegħa tiegħek, u tagħtix mistrieħ lil idek fil-​għaxija, għax ma tafx liema tinbet, hux din jew l-​oħra, jew jagħtux it-​tnejn frott tajjeb xorta waħda.” (Koħèlet 11:1, 6) Iva, “ibgħat ħobżok” b’mod żeluż fuq ħafna ilmijiet u ‘iżraʼ ż-​żerriegħa tiegħek’ b’mod ġeneruż, bħalma għamlu Pawlu u Ġesù u bħalma jagħmlu llum dawn ix-​Xhieda li qed jagħtu xiehda bl-​Ingliż fil-​Messiku.