It-​Televixin—Jistaʼ Jieħu Ħsieb Sew it-​Tfal?

XI DRABI, l-​idea li żżomm lil uliedek okkupati billi tħallihom jaraw it-​televixin waqt li tieħu ħsieb affarijiet oħra, tistaʼ tingħoġob. Imma kif jistaʼ dan jeffettwa lil uliedek?

The New York Times tirrapporta: “Anki trabi żgħar jistgħu jiġu influwenzati bil-​messaġġi emozzjonali trasmessi fuq it-​televixin.” Fi studju reċenti, trabi taʼ sena ġew murija filmati qosra fejn attriċi rreaġixxiet b’modi differenti lejn ġugarell. “Meta l-​attriċi kienet tibżaʼ mill-​ġugarell,” tgħid it-​Times, “it-​trabi bdew jevitaw li jilagħbu bih u ħafna drabi bdew jidhru inkwetati, imqarrsin, iħarsu bl-​ikrah jew jibku. Meta l-​attriċi kienet tifraħ bil-​ġugarell, it-​tfal kienu iktar inklinati li jilagħbu bil-​ġugarell.”

Jidher ċar li ż-​żgħar jistgħu jiġu effettwati mit-​televixin. Xi ngħidu dwar l-​effett fit-​tul li jħalli fuq it-​tfal? It-​Tabib Naoki Kataoka, professur tal-​pedjatrija fil-​Kulleġġ Mediku taʼ Kawasaki f’Kurashiki, il-​Ġappun, osserva għaxriet taʼ tfal li kienu estremament kwieti u bi ftit li xejn espressjonijiet fuq wiċċhom. Ilkoll kienu jaraw it-​televixin jew il-​vidjos għal ħinijiet twal ħafna. Tifel taʼ sentejn ma kienx kapaċi jkompli konversazzjoni u kellu vokabolarju limitat. Kuljum hu kien jara l-​vidjos minn fil-​għodu sa fil-​għaxija sa minn meta kellu sena. Kien biss wara li l-​omm segwiet il-​parir tat-​tabib biex ma tħallix lit-​tifel jara l-​vidjos u minflok ikollha iktar kuntatt fiżiku billi tilgħab miegħu li l-​vokabolarju tat-​tifel bil-​mod il-​mod beda jitjieb. Iva, il-​ġenituri għandhom iqattgħu l-​ħin maʼ wliedhom.

Alla Ġeħova, l-​Awtur taʼ l-​arranġament tal-​familja, enfasizza l-​importanza għall-​aqwa mod kif il-​ġenituri jqattgħu l-​ħin maʼ wliedhom. Żmien twil ilu hu qal lill-​poplu tiegħu: “Tennihom [il-kliem t’Alla] lil uliedek, u tkellem fuqhom meta tkun f’darek, u meta tkun miexi fit-​triq, u meta timtedd, meta tqum.” (Dewteronomju 6:7) Il-​ġenituri, mhux it-​televixin, jistgħu jistruwixxu lil uliedhom bil-​kliem u bl-​eżempju tagħhom, biex it-​tfal ‘jimxu fit-​triq it-​tajba.’​—Proverbji 22:6.