Kirurġija Mingħajr—Demm “Żvilupp Mediku Sinifikanti”

TAĦT it-​titlu “Kirurġija ‘Mingħajr Demm,’” ir-​rivista Maclean’s irrapportat li t-​tobba fil-​Kanada qegħdin “jiżviluppaw tekniki ġodda li għal dawn l-​aħħar ħames snin biddlu l-​hekk imsejħa kirurġija mingħajr demm fi żvilupp mediku sinifikanti.” Brian Muirhead, anestesjologu fiċ-​Ċentru tax-​Xjenzi dwar is-​Saħħa ġewwa Winnipeg, hu wieħed minnhom. X’kien li ġagħlu jagħmel riċerka dwar kura alternattiva mingħajr demm?

Fl-1986, Dr. Muirhead daħal għall-​isfida li jopera raġel taʼ 70 sena li kien qed isofri minn ulċera li kienet tnixxi d-​demm. Dan ir-​raġel, li hu wieħed mix-​Xhieda taʼ Jehovah, talab li jingħata kura li ma kienet teħtieġ ebda użu taʼ trasfużjoni tad-​demm minħabba t-​twemmin tiegħu bbażat fuq il-​Bibbja. (Atti 15:​28, 29) Dr. Muirhead “uża metodu li rari kien jintuża, u beda jamministra trasfużjoni taʼ taħlita taʼ ilma bil-​melħ (saline solution) lill-​pazjent biex ma jħallix il-​pressjoni tad-​demm tiegħu titbaxxielu,” tirrapporta r-​rivista Maclean’s. “Il-​proċedura li uża kienet suċċess u din saħħet iktar it-​twemmin taʼ Muirhead li ‘konna qed nagħtu wisq trasfużjonijiet tad-​demm. Ħsibt li kien wasal iż-​żmien li nfittxu alternattivi.’”

Ir-riċerka għall-​kirurġija mingħajr demm ġiet “imqanqla kemm mit-​tħassib dwar il-​provvista futura taʼ donazzjonijiet taʼ demm, u kemm mill-​biżaʼ li kellhom ħafna mill-​pazjenti li jlaqqtu xi virus mit-​trasfużjonijiet.” Grazzi għar-​riċerka minn tobba li jħobbu jiskopru affarijiet ġodda, m’humiex biss ix-​Xhieda taʼ Jehovah li bbenefikaw imma nies oħra wkoll. “Il-​kirurġija mingħajr demm ma teliminax biss il-​ħtieġa taʼ trasfużjonijiet f’ħafna mill-​każi, imma tnaqqas ukoll ir-​riskju, żgħir kemm hu żgħir, taʼ xi infezzjoni minn demm kontaminat,” tgħid ir-​rivista Maclean’s. Imma anki demm “nadif” jistaʼ jikkaġuna riskju taʼ xi infezzjoni peress li jkun qed itellef temporanjament is-​sistema taʼ l-​immunità tal-​pazjent.

X’hemm wara t-​twemmin sod tax-​Xhieda taʼ Jehovah dwar l-​użu t’alternattivi mingħajr demm? Għandu mnejn jinteressak li taqra l-​browxer Id-​Demm Kif Jistaʼ Jsalvalek Ħajtek? Ix-​Xhieda taʼ Jehovah jieħdu gost ħafna li jgħadduh miegħek.