Mosè kien fi triqtu lejn l-​Eġittu maʼ Siffora, il-​mara tiegħu, flimkien maʼ Gersun u Eligħeżer, uliedu, meta ġara dan li ġej: “Ġara li fit-​triq fejn waqaf biex jgħaddi l-​lejl iltaqaʼ miegħu Jehovah u baqaʼ jfittex mod kif joqtlu. Fl-​aħħar Siffora ħadet ġebla taż-​żnied u qatgħet il-​prepuzju taʼ binha u messitlu saqajh biha u qalet: ‘Għax għarus id-​demm int għalija.’ Għalhekk ħallieh. Dakinhar hi qalet, ‘Għarus id-​demm,’ minħabba ċ-​ċirkonċiżjoni.” (Eżodu 4:20, 24-26, NW) Għalkemm dan ir-​rakkont ma tantx huwa ċar u ma nistgħux inkunu ċerti dwar xi jfisser eżattament, l-​Iskrittura titfaʼ ftit dawl fuq dawn il-​versi.

Saqajn min intmessu meta Siffora għamlet iċ-​ċirkonċiżjoni lil binha biex tipprova tirranġa l-​kwistjoni? Kien l-​anġlu taʼ Jehovah li kellu l-​qawwa biex itemm ħajjet binha minħabba li ma kienx ċirkonċiż. B’mod loġiku, mela, Siffora ġagħlet li l-​prepuzju jmiss saqajn l-​anġlu, billi ppreżentathulu bħala evidenza li hi mxiet skond ma kien jirrikjedi l-​patt.

L-​espressjoni taʼ Siffora “għarus id-​demm int għalija” hija waħda stramba. Din l-​espressjoni x’turina dwar Siffora? Billi wettqet il-​ħtiġijiet tal-​patt taċ-​ċirkonċiżjoni, Siffora rrikonoxxiet li kienet f’relazzjoni taʼ patt maʼ Jehovah. Il-​patt tal-​Liġi li ntgħamel iktar tard maʼ l-​Iżraelin wera li f’relazzjoni taʼ patt, Jehovah jistaʼ jitqies bħala r-​raġel u l-​parti l-​oħra bħala l-​mara. (Ġeremija 31:32, NW) Għalhekk, meta hi indirizzat lil Jehovah (permezz taʼ l-​anġlu li rrappreżentah) bħala “għarus id-​demm,” Siffora tidher li kienet qed tirrikonoxxi l-​fatt li kellha tissottometti ruħha għall-​ħtiġijiet taʼ dak il-​patt. Kienet bħallikieku aċċettat l-​irwol tal-​mara f’dan il-​patt taċ-​ċirkonċiżjoni, b’Alla Jehovah bħala r-​raġel. Fi kwalunkwe każ, minħabba l-​azzjoni deċiżiva tagħha bħala turija t’ubbidjenza lejn dak li Alla kien jirrikjedi, il-​ħajja taʼ binha ma baqgħetx fil-​periklu.