Qis l-​Affarijiet mill-​Ħarsa t’Alla

FI NEW YORK, l-​Istati Uniti, l-​14 taʼ Settembru tas-​sena 2002 kien jum sħun u xemxi. Dak in-​nhar, folla internazzjonali taʼ 6,521 ruħ iltaqgħet fiċ-​Ċentru Edukattiv taʼ Patterson u f’żewġ kumplessi oħra tax-​Xhieda taʼ Jehovah f’dak ir-​reġjun. Dawn in-​nies inġabru biex jattendu għall-​gradwazzjoni tal-​113-il klassi taʼ l-​Iskola taʼ Gilgħad (Watchtower Bible School of Gilead). L-​istudenti ġew minn 14-il pajjiż u kienu qattgħu l-​ħames xhur taʼ qabel jippreparaw għas-​servizz missjunarju f’19-il pajjiż fejn ġew assenjati.

Carey Barber, li għandu iktar minn 97 sena u hu membru tal-​Ġemgħa li Tiggverna tax-​Xhieda taʼ Jehovah, qeda bħala ċ-​chairman tal-​programm. Hu ġibed l-​attenzjoni lejn il-​wirt taʼ kważi 60 sena li għandha l-​Iskola taʼ Gilgħad, skola li ħejjiet eluf taʼ aħwa biex jibdew jaqdu fis-​servizz missjunarju. Ħuna Barber osserva: “Ma nkunux qed nesaġeraw meta ngħidu li ħarġu riżultati impressjonanti mit-​taħriġ miżjud li komplew jieħdu dawn l-​uħud. Madwar id-​dinja hemm letteralment mijiet t’eluf taʼ wħud ġwejdin li ddedikaw ħajjithom lil Jehovah u adottaw il-​qima vera u s-​servizz sagru tiegħu. Dan sar propju minħabba l-​għajnuna li tawhom il-​missjunarji mħarrġa.”

Qabel m’attendew l-​iskola taʼ Gilgħad, ħafna mill-​istudenti wrew li huma interessati jkabbru l-​ministeru tagħhom. Koppja waħda kienet qattgħet iktar minn sena tmur għal-​lezzjonijiet tal-​lingwa Mandarina sabiex tilħaq popolazzjoni etnika kbira taʼ Ċiniżi fl-​inħawi fejn kienet toqgħod fil-​Kanada. Koppja oħra bdiet tistudja l-​Albaniż waħedha u eventwalment marret toqgħod l-​Albanija biex tieħu ħsieb l-​interess fil-​Bibbja li kien qed jiżdied hemm. Oħrajn fil-​klassi li ġew Gilgħad ivvjaġġaw mill-​Ungerija, mill-​Gwatemala, u mir-​Repubblika Dominikana, pajjiżi li marru joqogħdu fihom minħabba l-​bżonn kbir taʼ għalliema tal-​Kelma t’Alla.

Issa, qabel ma jitilqu għall-​inkarigi tagħhom fl-​Afrika, fl-​Ewropa tal-​Lvant, fl-​Amerika Ċentrali u fl-​Amerika t’Isfel, u fil-​Lvant Imbiegħed, l-​istudenti kollha li ggradwaw ġew imħeġġin iżommu lil Alla quddiem għajnejhom f’dak kollu li jagħmlu.

Qis l-​Affarijiet Kif Jarahom Alla

Wara li għamel il-​kummenti tal-​ftuħ, Ħuna Barber introduċa lil Maxwell Lloyd, membru tal-​Kumitat tal-​Fergħa fl-​Istati Uniti. Hu enfasizza t-​tema “Qis l-​Affarijiet Kollha mill-​Ħarsa t’Alla.” Ħuna Lloyd ġibed l-​attenzjoni lejn l-​eżempji taʼ David u taʼ Ġesù, l-​Iben t’Alla. (1 Samwel 24:​6, NW; 26:​11, NW; Luqa 22:42) Wara li fakkar lill-​istudenti li l-​ħames xhur li qattgħu jistudjaw il-​Bibbja ħarrġuhom biex iqisu l-​affarijiet mill-​ħarsa t’Alla, il-​kelliemi staqsa: “Meta tkunu qed tikkonduċu studji tal-​Bibbja man-​nies fl-​inkarigu l-​ġdid tagħkom, se tgħinuhom jirraġunaw fuq l-​affarijiet mill-​ħarsa t’Alla?” U dwar li jagħtu pariri lil ħaddieħor, hu ssuġġerixxa lill-​istudenti: “Tgħidux, ‘Skond l-​opinjoni tiegħi, jien naħseb . . . ’ Minflok, għinuhom jifhmu x’inhi l-​ħarsa t’Alla. Jekk timxu b’dan il-​mod, se tkunu barka tassew għal dawk li tissieħbu magħhom fl-​inkarigu tagħkom.”

Fil-programm kien imiss lil Gerrit Lösch, membru tal-​Ġemgħa li Tiggverna. Waqt li tkellem fuq it-​tema “Jien Miegħek,” hu fakkar lill-​udjenza fil-​ħafna okkażjonijiet meta Jehovah qal lill-​qaddejja leali tiegħu, “Jiena miegħek.” (Ġenesi 26:​23, 24; 28:15; Ġożwè 1:5; Ġeremija 1:​7, 8) Fi żmienna, aħna jistaʼ jkollna l-​istess fiduċja f’Jehovah jekk nibqgħu leali. Ħuna Lösch ħareġ il-​punt: “Tinkwieta int dwar jekk hux se ssib nies maʼ min tistudja l-​Bibbja? Ftakar, Jehovah qal, ‘Jien miegħek.’ Tinkwieta int dwar jekk hux se jkollok biżżejjed b’mod materjali? Jehovah qal: ‘Jien m’iniex se nħallik, anqas nitilqek.’”(Lhud 13:5) Ħuna Lösch għalaq it-​taħdita billi fakkar lill-​istudenti li Ġesù wiegħed li se jkun mas-​segwaċi leali tiegħu fix-​xogħol taʼ li jagħmlu dixxipli.—Mattew 28:20.

“Se Ssib is-​Sigurtà Tiegħek fil-​Provi tan-​Nar?” kienet it-​tema taʼ Lawrence Bowen, għalliem f’Gilgħad. Hu nnota li minħabba l-​kwistjonijiet li tqajmu fl-​Għeden, dawk kollha li xtaqu jagħtu devozzjoni esklużiva lil Jehovah kellhom jiffaċċjaw id-​diffikultajiet u xi drabi, provi li jaħarqu. Hu ħeġġeġ lill-​istudenti li ggradwaw biex jimxu fuq l-​eżempju taʼ Ġesù, li sab il-​vera sigurtà billi straħ għalkollox fuq Jehovah u aċċetta l-​provi qawwija li Jehovah ippermetta sabiex l-​ubbidjenza taʼ Ibnu tkun perfetta. (Lhud 5:​8, 9) Jehovah jistaʼ jitqabbel maʼ wieħed li jirfina d-​deheb billi jgħaddih mill-​ammont eżatt taʼ sħana biex ineħħilu l-​ħmieġ. M’għandniex xi ngħidu, il-​fidi li tiġi testjata bin-​nar tipprovdi sigurtà ħafna akbar mid-​deheb irfinut. Għala? “Għax il-​fidi rfinuta tiflaħ kwalunkwe pressjoni,” qal Ħuna Bowen, “u tarmana biex nissaportu dejjem ‘sa l-​aħħar.’”—Mattew 24:13.

Għalliem ieħor f’Gilgħad, Mark Noumair, staqsa: “Se Tingħoġob Int?” It-​tema tiegħu ċċentrat fuq il-​kliem taʼ l-​1 Samwel 2:26 (KŻ), li jiddeskrivi lil Samwel bħala li kien “jingħoġob sew mill-​Mulej, u sew min-​nies.” Wara li kkunsidra l-​eżempju taʼ Samwel, Ħuna Noumair, li qattaʼ iktar minn għaxar snin fis-​servizz missjunarju fl-​Afrika, stqarr: “Intom ukoll tistgħu tibdew tingħoġbu ħafna f’għajnejn Alla billi tibqgħu leali fix-​xogħol li Alla takom biex tagħmlu. Hu takom inkarigu prezzjuż bħala missjunarji.” Imbagħad Ħuna Noumair ħeġġeġ lil dawk li ggradwaw biex iqisu l-​inkarigi tagħhom bħala responsabbiltà sagra mingħand Alla u biex jadottaw il-​mod taʼ ħsieb t’Alla meta jwettqu l-​inkarigi tagħhom.

Matul l-​iskola taʼ Gilgħad, l-​istudenti kellhom ħafna opportunitajiet fi tmiem il-​ġimgħa biex jaqsmu man-​nies tal-​lokal “l-​għeġubijiet t’Alla” misjuba fil-​Bibbja. (Atti 2:11) Fil-​fatt, irnexxielhom jitkellmu dwar dawn l-​affarijiet b’għaxar lingwi differenti. Wallace Liverance, għalliem ieħor f’Gilgħad, intervista grupp taʼ studenti li rrakkontaw l-​esperjenzi tagħhom fit-​tema “‘L-​Għeġubijiet t’Alla’ Jqanqlu lin-​Nies biex Jaġixxu.” Hu nnota: “L-​ispirtu qanqal lil dawk li kienu fil-​kamra taʼ fuq f’Pentekoste biex jitkellmu dwar ‘l-​għeġubijiet taʼ Alla.’ Dak l-​istess spirtu qed jaħdem illum fuq il-​qaddejja leali t’Alla kollha.” Xi wħud ġew saħansitra mqanqlin biex jitgħallmu lingwi ġodda ħalli jkunu jistgħu jagħtu xiehda lil ħafna iktar nies.

Pariri Prattiċi fuq Kif Inqisu l-​Affarijiet mill-​Ħarsa t’Alla

Wara t-​taħditiet tal-​ftuħ, Gary Breaux u William Young, membri mill-​familja taʼ Betel, intervistaw membri minn diversi kumitati tal-​fergħa f’pajjiżi fejn bħalissa qed jaqdu l-​missjunarji, kif ukoll koppja li qattgħet 41 sena fis-​servizz missjunarju. Waħda mill-​osservazzjonijiet li saru kienet: “Dawk li ma jippretendux ħafna affarijiet idumu l-​iktar. Huma jiffokaw l-​attenzjoni fuq ir-​raġuni għala marru hemm. Jafu li ġew biex jippridkaw l-​aħbar tajba u biex jgħinu lin-​nies isiru jafu lil Jehovah.”

David Splane, membru ieħor tal-​Ġemgħa li Tiggverna, ikkonkluda l-​programm b’taħdita bit-​tema “M’Intomx Se Titbiegħdu!” X’ried jgħid biha, meta tqis li s-​46 gradwat kienu issa se jintbagħtu f’pajjiżi mxerrdin mal-​globu kollu? Hu spjega: “Tkunu fejn tkunu fuq l-​art, dejjem se tkunu fid-​dar t’Alla dment li tibqgħu leali.” Iva, il-​Kristjani leali kollha, jgħixu fejn jgħixu, qed jaqdu f’parti mit-​tempju, jew dar, spiritwali u kbir t’Alla, li beda jeżisti fl-​ewwel seklu mal-​magħmudija taʼ Ġesù. (Lhud 9:9) Kemm ħassewhom imfarrġin l-​aħwa fl-​udjenza bil-​fatt li Jehovah qiegħed qrib tal-​qaddejja leali kollha tiegħu li jinsabu fuq l-​art! Sewwa sew bħalma Jehovah kien interessat f’Ġesù meta kien fuq l-​art, l-​istess Hu interessat fina lkoll u fis-​servizz li nagħtu Lilu, inkunu fejn inkunu. Mela fejn tidħol il-​qima, aħna qatt m’aħna ’l bogħod minn xulxin u minn Jehovah u Ġesù.

Wara li kien hemm xi tislijiet minn madwar id-​dinja, tħabbru l-​inkarigi, u nqrat ittra mingħand l-​istudenti biex jesprimu l-​apprezzament tagħhom għat-​taħriġ li rċivew f’Gilgħad, iċ-​chairman għalaq il-​programm li tant irnexxa. Hu ħeġġeġ lill-​missjunarji l-​ġodda biex ikomplu x-​xogħol tajjeb li qed jagħmlu u jifirħu fis-​servizz taʼ Jehovah.—Filippin 3:1.

[Kaxxa f’paġna 23]

STATISTIĊI TAL-​KLASSI

Numru taʼ pajjiżi rappreżentati: 14

Numru taʼ pajjiżi li ġew assenjati fihom: 19

Numru taʼ studenti: 46

Età medja: 35.0

Medja taʼ snin fil-​verità: 17.2

Medja taʼ snin fil-​ministeru full-time: 13.7

[Stampa f’paġna 24]

Il-​113-il Klassi li Ggradwat mill-​Iskola taʼ Gilgħad

Fil-​lista t’hawn taħt, ir-​ringieli huma nnumerati minn quddiem għal wara, u l-​ismijiet f’kull ringiela huma mniżżlin mix-​xellug għal-​lemin.

(1) Aoki, J.; Liem, C.; Berktold, A.; Hosoi, S.; Ligthart, M. (2) Escobar, F.; Escobar, I.; Alton, J.; Bossi, A.; Bouqué, S.; Baglyas, J. (3) LeBlanc, R.; Karlsson, M.; Freimuth, S.; Stoica, D.; Stoica, A. (4) LeBlanc, L.; Paris, S.; Joseph, L.; Kaminski, L.; Bianchi, S.; Bianchi, R. (5) Skidmore, G.; Horton, L.; Horton, J.; Skidmore, B.; Paris, M. (6) Aoki, H.; Steininger, S.; Langlois, M.; Quirici, E.; Alton, G.; Liem, B. (7) Hosoi, K.; Ligthart, E.; Bouqué, J.; Kaminski, J.; Bossi, F.; Steininger, M.; Langlois, J. (8) Joseph, R.; Berktold, W.; Freimuth, C.; Karlsson, L.; Quirici, M.; Baglyas, J. (1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.