Mistoqsijiet mill-Qarrejja

•Tuża l-​Bibbja l-​Isem Luċifru għal Satana?

L-​isem Luċifru jidher darba fl-​Iskrittura u mhux fil-​verżjonijiet kollha tal-​Bibbja. Per eżempju, il-​Bibbja taʼ Karm Żammit tittraduċi Isaija 14:12 b’dan il-​mod: “Kif waqajt mis-​sema, o Luċifru, bin is-​sebħ!”

Il-kelma Lhudija tradotta “Luċifru” tfisser “wieħed li jiddi.” Is-​Settanta tuża l-​kelma Griega li tfisser “dak li jġib iż-​żerniq.” Għalhekk, xi verżjonijiet jittraduċu l-​kelma Lhudija oriġinali bħala “kewkba taʼ fil-​għodu” jew “Kewkba tal-​jum.” Imma l-​Vulgata taʼ Ġirolmu bil-​Latin tuża “Luċifru” (dak li jġorr id-​dawl), u dan jispjega l-​fatt għala dan it-​terminu jidher f’diversi verżjonijiet tal-​Bibbja.

Min hu dan Luċifru? L-​espressjoni “wieħed li jiddi,” jew “Luċifru,” tinsab f’dak li Isaija kkmanda profetikament lil Iżraelin biex ilissnu bħala “għanja [kontra] is-​sultan taʼ Babilonja.” B’hekk, hija parti minn diskors dirett primarjament lejn is-​slaten taʼ Babilonja. Il-​fatt li d-​deskrizzjoni “wieħed li jiddi” tirreferi għal bniedem u mhux għal ħliqa spirtu jkompli jidher mill-​istqarrija: “Arak, mġarraf f’art l-​imwiet [“Xeol,” NW].” Xeol, jew art l-​imwiet, huwa l-​qabar komuni taʼ l-​umanità—mhux xi post okkupat minn Satana x-​Xitan. Iktar minn hekk, dawk li jaraw lil Luċifru miġjub f’din il-​kundizzjoni jistaqsu: “Hu dan il-​bniedem li qalleb id-​dinja taʼ taħt fuq?” Jidher ċar li l-​kelma “Luċifru” tirreferi għal bniedem, mhux għal ħliqa spirtu.—Korsiv tagħna; Isaija 14:​4, 15, 16.

Għala tingħata deskrizzjoni li tispikka daqshekk lis-​slaten taʼ Babilonja? Irridu nirrealizzaw li s-​sultan taʼ Babilonja kellu jissejjaħ dak li jiddi biss wara l-​waqgħa tiegħu u dan isir b’disprezz. (Isaija 14:3) Kburija egoistika wasslet lis-​slaten taʼ Babilonja biex jitgħollew fuq dawk taʼ madwarhom. Tant kienet kbira l-​arroganza taʼ dawn is-​slaten li jiġu ffigurati bħala li qed jgħidu bi ftaħir: “Nitlaʼ sas-​smewwiet, ’il fuq mill-​kwiekeb taʼ Alla. It-​tron tiegħi ngħolli u ngħammar fuq il-​muntanji taʼ laqgħat l-​allat, fi truf it-​tramuntana. . . . Insir nixbah lil Alla l-​Għoli.”—Isaija 14:​13, 14.

Il-​“kwiekeb taʼ Alla” huma s-​slaten mil-​linja rjali taʼ David. (Numri 24:17) Minn żmien David, dawn il-​“kwiekeb” ħakmu mill-​Muntanja Sijon. Wara li Salamun bena t-​tempju f’Ġerusalemm, l-​isem Sijon sar japplika għall-​belt kollha. Taħt il-​patt tal-​Liġi, l-​irġiel Iżraelin kollha kellhom l-​obbligu li jmorru Sijon tliet darbiet fis-​sena. B’hekk, din saret ‘il-​muntanja tal-​laqgħat.’ Peress li hu determinat li jġib taħt il-​kontroll tiegħu lis-​slaten taʼ Ġuda u mbagħad ineħħihom minn fuq din il-​muntanja, Nabukodonosor qed jiddikjara l-​intenzjoni tiegħu li jogħla fuq dawn il-​“kwiekeb.” Minflok ma jagħti l-​kredtu lil Jehovah għar-​rebħa li għamel fuqhom, b’mod arroganti hu jpoġġi lilu nnifsu fil-​post taʼ Jehovah. Għalhekk, huwa wara l-​waqgħa tiegħu li s-​sultan taʼ Babilonja jissejjaħ b’disprezz bħala “wieħed li jiddi.”

Il-kburija tal-​ħakkiema Babiloniżi tabilħaqq li rriflettiet l-​attitudni taʼ “l-​alla taʼ din id-​dinja”—Satana x-​Xitan. (2 Korintin 4:4) Hu wkoll jixxennaq għall-​poter u jixtieq ipoġġi lilu nnifsu fuq Alla Jehovah. Imma Luċifru m’huwiex isem li l-​Iskrittura tagħti lil Satana.

• Għala 1 Kronaki 2:​13-15 jirreferi għal David bħala s-​sebaʼ iben taʼ Ġesse, filwaqt li 1 Samwel 16:​10, 11 jindika li kien it-​tmien wieħed?

Wara li s-​Sultan Sawl taʼ Iżrael tal-​qedem tbiegħed mill-​qima vera, Alla Jehovah bagħat lill-​profeta Samwel biex jidlek lil wieħed minn ulied Ġesse bħala sultan. Il-​kitba ispirata taʼ din il-​ġrajja storika, miktuba minn Samwel innifsu fil-​11-il seklu Q.E.K., tippreżenta lil David bħala t-​tmien iben taʼ Ġesse. (1 Samwel 16:​10-13) Madankollu, ir-​rakkont li kiteb Esdra l-​qassis madwar 600 sena wara jgħid: “Ġesse wiled lil Elijab, il-​kbir tiegħu; lil Abinadab, it-​tieni; lil Simgħa, it-​tielet; lil Natanjel, ir-​rabaʼ; lil Raddaj, il-​ħames; lil Osem, is-​sitta; lil David, is-​sebaʼ.” (1 Kronaki 2:​13-15) Xi ġralu wieħed minn ħut David, u Esdra għala ma jsemmihx?

L-Iskrittura tgħid li Ġesse “kellu tmint itfal” subien. (1 Samwel 17:12) Milli jidher wieħed minn uliedu miet qabel ma żżewweġ u kellu t-​tfal. Peress li ma kellux nisel, la kellu dritt għall-​wirt mit-​tribù tiegħu u lanqas ma kien jagħmel differenza fil-​lista tad-​dixxendenti minn Ġesse.

Issa ejja naħsbu ftit dwar żmien Esdra. Ikkunsidra f’liema ċirkustanzi hu kiteb il-​Kronaki. L-​eżilju f’Babilonja ntemm madwar 77 sena qabel, u l-​Lhud issetiljaw mill-​ġdid f’arthom. Is-​sultan tal-​Persja kien awtorizza lil Esdra biex jaħtar imħallfin u għalliema tal-​Liġi t’Alla u biex isebbaħ id-​dar taʼ Jehovah. Kien hemm bżonn taʼ listi preċiżi taʼ ismijiet tad-​dixxendenti biex bihom jikkonfermaw il-​wirt tat-​tribujiet u biex jiżguraw li nies awtorizzati biss jaqdu fis-​saċerdozju. Għalhekk, Esdra ħejja rakkont sħiħ taʼ l-​istorja tal-​ġens, inkluż dokumenti preċiżi taʼ min joqgħod fuqhom tad-​dixxendenza taʼ Ġuda u taʼ David. L-​isem taʼ bin Ġesse li miet bla tfal ma kienx hemm bżonnu. Għaldaqstant, Esdra ħallieh barra.