Għandek Int Fidi Bħal t’Elija?

IS-​SOĊJETÀ umana llum bil-​mod il-​mod iddgħajjef lill-​fidi. L-​intellettwali jzebilħu lill-​eżistenza t’Alla. Ipokriti reliġjużi jwaqqgħu għaċ-​ċajt lil Alla. U d-​dinja sekulari iktar minn qabel qed taġixxi qisu li Alla m’ħuwiex daqshekk importanti. Kemm jekk dawn l-​attitudnijiet jintimidaw lil xi ħadd kemm jekk jiskuraġġuh, u kemm jekk jinfettawh b’apatija, hu x’inhu l-​każ ir-​riżultat huwa l-​istess: Il-​fidi tiegħu hi mmermra. Mhux taʼ b’xejn li l-​appostlu Pawlu sejjaħ lin-​nuqqas taʼ fidi bħala “[i]d-dnub li faċilment iħarbatna”!—Ebrej 12:1.

Forsi dak hu għala Pawlu ra l-​ħtieġa li jiġbdilna l-​attenzjoni lejn il-​ħajjiet taʼ rġiel u nisa b’fidi qawwija. (Ebrej, kapitlu 11) Eżempji bħal dawn jistgħu jnebbħuna u jsaħħulna l-​fidi. Per eżempju, ejjew nikkunsidraw lill-​profeta Elija, billi niffokaw biss fuq il-​parti bikrija tal-​karriera profetika twila u mimlija tiegħu. Hu kien igħix matul ir-​renju tas-​Sultan Aħab u l-​mara pagana tiegħu, ir-​Regina Ġeżabel, fi żmien meta, bħal-​lum, il-​fidi fil-​veru Alla kienet kważi spiċċat.

Is-​Saltna Korrotta tal-​Għaxar Tribujiet

X’koppja gwappa! Aħab kien is-​sebaʼ sultan tas-​Saltna tal-​għaxar tribujiet taʼ Izrael. Kienu kemm kienu mill-​agħar is-​sitt predeċessuri tiegħu, Aħab kien agħar minnhom. Mhux biss kien ħalla l-​qima tal-​għoġol f’dik l-​art korrotta imma żżewweġ lill-​prinċipessa barranija Ġeżabel, biex b’hekk introduċa forma iktar qalila tal-​qima tal-​alla falz Baal milli qatt kien hemm f’dik l-​art.—1 Slaten 16:30-33.

Ġeżabel kienet imgħaddsa fil-​qima taʼ Baal miċ-​ċokon. Missierha, Etbaal, qassis taʼ Axtoret (il-mara taʼ Baal), kien qatel biex jakkwista t-​tron taʼ Sidon, is-​saltna fit-​Tramuntana taʼ Iżrael. Ġeżabel influwenzat lil żewġha li kien moralment dgħajjef biex jistabbilixxi l-​qima taʼ Baal f’Iżrael. Ma tantx dam li ma kienx hemm 450 profeta taʼ dak l-​alla falz u 400 profeta tal-​alla mara Axera fil-​pajjiż, kollha jieklu mill-​mejda rjali. Kemm kienet moqżieża l-​forma taʼ qima tagħhom f’għajnejn il-​veru Alla, Jehovah! Simboli falliċi, riti tal-​fertilita prostituti tat-​tempju (kemm irġiel u kemm nisa), saħansitra sagrifikar taʼ tfal—b’dan kienet imżejna din ir-​reliġjon li tqallgħak. Bil-​barka taʼ Aħab, infirxet bla tfixkil mas-​saltna kollha.

Bil-miljuni kienu dawk l-​Iżraeliti li nsew lil Jehovah, il-​Hallieq tal-​art u taċ-​ċiklu tal-​ilma tagħha. Għalihom kien Baal li bierek l-​art bix-​xita fit-​tmiem tal-​istaġun xott. Kull sena huma kienu jħarsu b’tama kbira lejn dan ir-​‘Rikkieb tas-​Sħab,’ il-​hekk imsejjaħ alla tal-​fertilita u tal-​istaġun tax-​xita, biex itemm in-​nixfa. Sena wara l-​oħra, ix-​xita ġiet. Sena wara l-​oħra, Baal ħa l-​kredtu.

Elija Jipproklama Nixfa

Kien probabbilment wara l-​istaġun sajfi twil u niexef—eżatt fi żmien meta n-​nies kienu qed jistennew lil Baal biex jiftaħ fuqhom ix-​xita li tagħti l-​ħajja—li Elija deher fix-​xena.a Jidher fil-​kitba tal-​Bibbja bla mistenni bħal leħħa taʼ berqa. Jingħad ftit dwar minfejn ġie u min kienu l-​ġenituri tiegħu. Imma kontra tar-​ragħad, Elija ma kienx il-​ħabbâr taʼ xi maltempata bix-​xita. Hu ħabbar lil Aħab: “Bhalma Jehovah dak Alla taʼ Iżrael li quddiemu jien qiegħed bil-​wieqfa qiegħed igħix, ma se sseħħ matul dawn is-​snin la nida u lanqas xita, ħlief bl-​ordni tal-​kelma tiegħi!”−1 Slaten 17:1.

Immaġina lil dan ir-​raġel, imgeżwer fl-​ilbies raħli tiegħu taʼ ġild kollu suf. Hu ġie mill-​għoljiet imħarbta taʼ Gilead, x’aktarx imrobbi maʼ ragħajja umlin tal-​merħliet. Hu qiegħed quddiem is-​sultan setgħan Aħab, forsi hemm fil-​palazz enormi tiegħu, b’dik id-​dar leġġendarja tal-​avorju, bit-​tiżjin rikk u eżotiku u bl-​idoli li jispikkaw taʼ ġo fih. Hemm, fil-​belt storbjuża u ffortifikata taʼ Samarija, fejn il-​qima taʼ Jehovah ġiet minsija għalkollox, hu jgħid lil Aħab li dan alla tiegħu, dan Baal, huwa impotenti, ma jiswa xejn. Għal din is-​sena u għas-​snin li ġejjin, Elija jiddikjara, ma kien se jkun hemm ebda xita jew nida!

Minfejn ġab fidi bħal din? Ma kienx iħossu intimidat, wieqaf hemm quddem dan is-​sultan arroganti u apostat? Jistaʼ jkun. Iktar minn elf sena wara, Ġakbu, ħu Ġesù mill-​omm, jiżżgurana li Elija kien “raġel b’sentimenti bħal tagħna.” (Ġakbu 5:17) Imma nnota l-​kliem taʼ Elija: “Bhalma Jehovah dak Alla taʼ Iżrael li quddiemu jien qiegħed bil-​wieqfa qiegħed igħix.” Elija żamm f’moħħu li bħala qaddej taʼ Jehovah, hu kien wieqaf quddiem tron bil-​wisq ogħla minn dak t’Aħab—it-​tron tal-​Mulej Sovran tal-​univers! Hu kien rappreżentant, aġent mibgħut, taʼ dak it-​tron. B’din il-​perspettiva, x’kellu x’jibżaʼ minn Aħab, daqsxejn taʼ monarka uman li tilef il-​barka taʼ Jehovah?

Ma kienx b’kumbinazzjoni li Jehovah kien tant reali għal Elija. Il-​profeta żgur li kien studja dwar kif Alla kien ittratta mal-​poplu Tiegħu. Jehovah kien wissa lil-​Lħud li hu kellu jikkastigahom b’nixfa u ġuħ jekk huma jduru lejn il-​qima tal-​allat foloz. (Dewteronomju 11:16, 17) Billi kien konvint li Jehovah dejjem iwettaq kelmtu, Elija “talab biex ma tinżilx xita.”−Ġakbu 5:17.

Fidi Murija billi Segwa d-​Direzzjoni

Għal mument, iżda, it-​taħbira taʼ Elija poġġietlu ħajtu fil-​periklu. Kien wasal il-​ħin għal aspett ieħor tal-​fidi tiegħu biex jidħol fl-​azzjoni. Sabiex jibqaʼ ħaj, hu ried jibqaʼ leali f’li jsegwi l-​istruzzjonijiet taʼ Jehovah: “Itlaq lil hemm minn hawn, u trid iddur fi triqtek lejn il-​Lvant u tostor lilek innifsek fil-​wied bil-​kurrent taʼ Kerit li qiegħda fil-​Lvant tal-​Gurdan. U jrid iseħħ li mill-​wied bil-​kurrent int għandek tixrob, u liċ-​ċawluni jien ċertament se nikkmandahom biex ifornuk bl-​ikel hemmhekk.”—1 Slaten 17:3, 4.

Elija obda immedjatament. Jekk ried li jibqaʼ ħaj matul in-​nixfa u l-​ġuħ li waqgħu fuq il-​pajjiż, hu ried jistrieħ fuq kwalunkwe provvediment li Jehovah għamel għalih. Dan bl-​ebda mod ma kien faċli. Kien ifisser li ried jistaħba, igħix waħdu kompletament għal xhur sħaħ. Kien ifisser li kellu jiekol laħam u ħobż li ġabulu ċ-​ċawluni—għasafar li kienu jieklu iġsma mejtin u li kienu meqjusin imniġġsin mil-​Liġi Mosajka—u billi jafda f’Jehovah li dan il-​laħam ma kienx taʼ iġsma mejtin imma laħam li kien ġie skarnat kif jixraq skond il-​liġi. Tant jidher li ma jistgħux iniżżluh dan il-​miraklu fit-​tul li xi kommentaturi tal-​Bibbja jissuġġerixxu li l-​kelma oriġinali hawn riedet tfisser “Għarab” u mhux “ċawluni.” Imma ċ-​ċawluni kienu l-​għażla ideali. Ħadd ma kien se jissuspetta li dawn l-​għasafar baxxi u mniggsin li kienu qed jittajru fix-​xagħri bil-​biċċiet tal-​ikel tagħhom kienu attwalment qed jitimgħu lil Elija, li lilu Aħab u Ġeżabel kienu qed ifittxu fis-​saltniet kollha taʼ madwarhom!—1 Slaten 18:3, 4, 10.

Hekk kif in-​nixfa baqgħet sejra, Elija setaʼ beda jinkwieta dwar kemm kien baqaʼ ilma fil-​wied tal-​ilma taʼ Kerit. Il-​biċċa l-​kbira tal-​widien tal-​ilma f’Iżrael jinxfu fi zmien in-​nixfa, u “fit-​tmiem taʼ xi jiem,” dan hekk għamel ukoll. Tistaʼ timmaġina x’ħass Elija hekk kif ra l-​ilma bil-​mod il-​mod jonqos għal qatra qatra u l-​għadajjar jitbaxxew jum wara l-​ieħor? Żgur li tħasseb dwar x’kien se jiġri meta l-​ilma jkun spiċċa. Xorta waħda, Elija fedelment baqaʼ fejn kien. Kien meta n-​nixxiegħa kienet nixfet li Jehovah tah struzzjonijiet ġodda. Mur Żarefat, intqal lill-​profeta. Hemm kellu jsib il-​għixien fid-​dar taʼ armla.—1 Slaten 17:7-9.

Żarefat! Dik il-​belt kienet tappartjeni lill-​belt taʼ Sidon, minfejn ġiet Ġeżabel u fejn missierha stess kien ħakem bħala sultan. Kien se jkun fis-​sigurtà? Elija forsi tħasseb. Imma “hu qam u telaq.”−1 Slaten 17:10.

Jehovah Jipprovdi l-​Għixien u l-​Ħajja

L-​ubbidjenza tiegħu malajr ġiet ippremjata. Hu ltaqaʼ mal-​armla kif kien imbassar u sab fiha sewwa sew dik ix-​xorta taʼ fidi li kienet tant nieqsa fost in-​nies taʼ pajjiżu. Din il-​povra armla kellha biżżejjed dqiq u żejt biss biex tagħmel l-​aħħar ikla għaliha u għal binha ż-​żgħir. Iżda, saħansitra fil-​bżonn estrem tagħha, hi kienet lesta li tagħti l-​ħobż lil Elija l-​ewwel, billi fdat fil-​wegħda li Jehovah kellu jzomm il-​vażett taż-​żejt tagħha u l-​vażett tad-​dqiq tagħha mimlijin sakemm kien ikun hemm bżonn. Mhux taʼ b’xejn li Ġesù Kristu ftakar fl-​eżempju leali taʼ din l-​armla meta kkundanna lill-​Iżraeliti taʼ bla fidi taʼ żmienu!—1 Slaten 17:13-16; Luqa 4:25, 26.

Minkejja dan il-​miraklu, iżda, kemm il-​fidi tal-​armla kif ukoll dik taʼ Elija kienet se tiffaċċja prova ħarxa. Binha miet f’daqqa. Mifnija bin-​niket, l-​armla setgħet biss tassumi li din id-​daqqa taʼ ħarta kiefra kellha x’taqsam b’mod jew ieħor maʼ Elija ir-​“raġel tal-​veru Alla.” Hi tħassbet dwar jekk kinetx qed tiġi kkastigata għal xi dnub li kienet għamlet qabel. Imma Elija ħa lil binha bla ħajja minn dirgħajha u tellgħu f’kamra fuq. Hu kien jaf li Jehovah setaʼ jipprovdi iktar minn għixien. Jehovah huwa s-​sors tal-​ħajja nfisha! Mela Elija talab bil-​ħerqa darba wara l-​oħra biex terġaʼ lura l-​ħajja fit-​tifel.

Elija ma kienx l-​ewwel wieħed li kellu fidi bħal din fl-​irxoxt, imma fil-​kitbiet tal-​Bibbja, hu kien sar l-​ewwel wieħed użat biex iwettaq wieħed. It-​tifel “ħa l-​ħajja”! Il-​ferħ t’ommu bil-​fors li kien xi ħaġa li żgur tieħu pjaċir taraha hekk kif Elija ġabilha lil binha bil-​kliem sempliċi: “Ara! Ibnek ħaj.” Bla dubju bid-​dmugħ, hi qalet: “Issa, tabilħaqq, jien tassew naf li inti raġel t’Alla u li l-​kelma taʼ Jehovah f’fommok hi vera.”−1 Slaten 17:17-24.

“Alla Tiegħi Hu Jehovah”

Kemm jolqtok, u kemm hu xieraq, li l-​isem taʼ Elija jfisser “Alla tiegħi hu Jehovah”! Fi żmien taʼ nixfa u ġuħ, Jehovah tah ikel u xorb; fi żmien taʼ taħwid morali Jehovah tah gwida soda; fi żmien taʼ mewt, Jehovah użah biex jagħti lura l-​ħajja. U jidher li kull darba li Elija kien mitlub biex juri fidi f’Alla tiegħu—billi jafda Fih biex jipprovdi, billi jsegwi d-​direzzjonijiet Tiegħu, billi jistrieħ Fuqu biex iqaddes lil Ismu—hu ġie ppremjat b’terġaʼ iktar ragunijiet biex ipoġġi fidi f’Jehovah. Dan il-​mudell baqaʼ jżommu hekk kif kompla jaċċetta inkarigi diffiċli u li saħansitra kienu tal-​biżaʼ mingħand Alla tiegħu, Jehovah; fil-​fatt, xi wħud mill-​iktar mirakli spettakulari tiegħu kienu għadhom iridu jiġu.—Ara 1 Slaten, kapitlu 18.

Huwa kważi l-​istess illum għall-​qaddejja taʼ Jehovah. Forsi ma niġux mitmugħa mirakolożament jew inkunu wżati biex inwettqu rxoxt; din m’hijiex l-​era taʼ mirakli bħal dawn. Madankollu, Jehovah innifsu ma nbidilx lanqas qatra minn zmien Elija ’l hawn.—1 Korintin 13:8; Ġakbu 1:17.

Aħna wkoll nistgħu nirċievu xi nkarigi skabrużi, xi territorji diffiċli u tal-​biżaʼ biex nilħquhom bil-​messaġġ tagħna mogħti minn Alla. Forsi nistgħu niffaċċjaw il-​persekuzzjoni. Forsi nkunu bil-​ġuħ. Imma lill-​individwi leali u lill-​organizzazzjoni tiegħu inġenerali, Jehovah ta prova ripetutament li hu għadu jiggwida u jipproteġi lill-​qaddejja tiegħu. Hu għadu jagħtihom il-​qawwa biex iwettqu kwalunkwe dmir li jiġu mogħtijin. U hu għadu jgħinhom biex jissaportu kwalunkwe provi li jistgħu jiġu fuqhom f’din id-​dinja kollha nkwiet.—Salm 55:22.

[Nota taʼ taħt]