Kapitlu 14

Min Imur Fis-​Sema, u Għala?

1. Ħafna persuni kif iwieġbu għall-​mistoqsija, Min imur fis-​sema, u għala?

ĦAFNA PERSUNI jgħidu, ‘It-​tajbin kollha jmorru fis-​sema.’ Madankollu, meta jiġu mistoqsijin għala jmorru fis-​sema, jistgħu jgħidu: ‘Biex ikunu m’Alla,’ jew, ‘Bħala premju talli jkunu għexu tajjeb.’ Il-​Bibbja x’tgħallem dwar dan?

2, 3. (a) Għala nistgħu nkunu ċerti li xi bnedmin se jmorru fis-​sema? (b) Liema mistoqsija teħtieġ li tiġi mwieġba?

² Il-Bibbja tagħmilha ċara li Ġesù ġie mqajjem mill-​mewt u li mar fis-​sema. Ukoll, tgħid li bnedmin oħrajn se jittieħdu hemmhekk. Fil-​lejl taʼ qabel il-​mewt tiegħu, Ġesù qal lill-​appostli leali tiegħu: “F’dar Missieri hemm bosta għamajjar. Inkella, kont ngħidilkom, għaliex jien sejjer fi triqti biex inħejji post għalikom. Ukoll, jekk immur fi triqti u nħejji post għalikom, nerġaʼ niġi u se nilqagħkom id-​dar għandi, biex fejn qiegħed jien intom ukoll tistgħu tkunu.”​—Ġwann 14:​1-3.

³ Jidher ċar li Ġesù kien qiegħed jgħid lill-​appostli tiegħu li kienu se jittieħdu fis-​sema biex ikunu miegħu. L-​appostlu Pawlu taʼ spiss qal lill-​Kristjani bikrin dwar dik it-​tama taʼ l-​għaġeb. Per eżempju, kiteb: “Inkwantu għalina, iċ-​ċittadinanza tagħna teżisti fis-​smewwiet, minn liema post ukoll qegħdin nistennew bil-​ħerqa salvatur, il-​Mulej Ġesù Kristu.” (Filippin 3:​20, 21; Rumani 6:5; 2 Korintin 5:​1, 2) Fuq il-​bażi taʼ dawn il-​wegħdi, miljuni taʼ nies rabtu qalbhom mal-​​ħajja fis-​sema. Madankollu l-​persuni tajbin kollha se jmorru fis-​sema?

IL-​PERSUNI TAJBIN KOLLHA JMORRU FIS-​SEMA?

4, 5. Xi prova hemm li David u Ġob ma marrux fis-​sema?

⁴ Ftit wara li Ġesù ġie mqajjem mill-​mewt, l-​appostlu Pietru qal lil folla taʼ Lhud: “David il-​kap tal-​familja . . . kemm miet kif ukoll indifen u l-​qabar tiegħu qiegħed fostna sa dan il-​jum. Attwalment David ma telax fis-​smewwiet.” (Atti 2:​29, 34) Mela r-​raġel tajjeb David ma marx fis-​sema. Xi ngħidu għar-​raġel twajjeb Ġob?

⁵ Waqt li kien qiegħed isofri, Ġob talab ’l Alla: “O li f’Xeol [il-qabar] int kont taħbini, li kont iżżommni sigriet sakemm ir-​rabja tiegħek iddur lura, li kont taħtar limitu taʼ żmien għalija u tiftakar fija!” Ġob stenna li meta jmut kellu jsir inkonxju fil-​qabar. Kien jaf li ma kienx se jmur fis-​sema. Imma kellu tama, bħalma spjega: “Jekk bniedem f’saħħtu jmut jistaʼ jgħix mill-​ġdid? Il-​jiem kollha tas-​servizz obbligatorju tiegħi [żmien maħtur fil-​qabar] se nistenna, sakemm jiġi s-​serħan tiegħi. Int se ssejjaħ, u jien innifsi se nwieġbek.”​—Ġob 14:​13-15.

6, 7. (a) X’juri li l-​ebda bniedem li miet qabel Kristu ma mar fis-​sema? (b) X’se jiġri minn dawk kollha li kienu leali u li mietu qabel Kristu?

⁶ Ġwanni, li għammed lil Ġesù, kien ukoll raġel tajjeb. Madankollu Ġesù qal: “Persuna li hi waħda inqas fis-​saltna tas-​smewwiet hi akbar minnu.” (Mattew 11:11) Dan huwa hekk għaliex Ġwanni l-​Għammied mhux se jmur fis-​sema. Meta Ġesù kien fuq l-​art, ’il fuq minn 4,000 sena wara l-​irvell t’Adam u Eva, qal: “Ebda bniedem ma telaʼ fis-​sema ħlief dak li niżel mis-​sema, Bin il-​bniedem.”​—Ġwann 3:13.

⁷ Għalhekk, skond l-​istess kliem taʼ Ġesù, l-​ebda bniedem ma kien mar fis-​sema matul dawk l-​4,000 sena kollha taʼ storja umana sa żmienu. David, Ġob u Ġwanni l-​Għammied se jirċievu rxoxt għall-​​ħajja fuq l-​art. Fil-​fatt, l-​irġiel u n-​nisa leali kollha li mietu qabel ma miet Ġesù kellhom it-​tama li jgħixu mill-​ġdid fuq l-​art, mhux fis-​sema. Se jiġu rxoxtati biex isiru ftit mis-​sudditi fuq l-​art tas-​saltna t’Alla.​—Salm 72:7, 8; Atti 17:31.

GĦALA XI WĦUD LEALI JMORRU FIS-​SEMA

8. It-tweġibiet għal liema mistoqsijiet huma importanti, u għala?

⁸ Ġesù għala mar fis-​sema? Liema xogħol għandu x’jagħmel hemmhekk? It-​tweġibiet għal dawn il-​mistoqsijiet huma importanti. Dan għaliex dawk li jmorru fis-​sema se jieħdu sehem maʼ Ġesù fix-​xogħol tiegħu. Huma jmorru fis-​sema proprju għalhekk.

9, 10. Skond Danjel, min iżjed barra Kristu se jaħkem fil-​gvern t’Alla?

⁹ Aħna tgħallimna fil-​kapitli taʼ qabel li Ġesù se jaħkem fuq l-​art ġdida magħmula ġenna bħala sultan tal-​gvern tas-​sema t’Alla. Ħafna qabel ma Ġesù ġie fuq l-​art, il-​ktieb Bibliku taʼ Danjel ħabbar li “bin il-​bniedem” kellu “jingħata ħakma.” “Bin il-​bniedem” hu Ġesù Kristu. (Mark 14:​41, 62) U Danjel ikompli jgħid: “Il-​ħakma tiegħu hija ħakma li ddum għal żmien indefinit u li m’hijiex se tgħaddi, u saltnatu waħda li m’hijiex se tinġab f’rovina.”​—Danjel 7:​13, 14.

¹⁰ Madankollu, huwa importanti li tinnota hawnhekk fil-​ktieb taʼ Danjel li “bin il-​bniedem” mhux se jaħkem waħdu. Il-​Bibbja tgħid: “U s-​saltna u l-​ħakma . . . ngħataw lin-​nies li huma l-​qaddisin tal-​Wieħed Suprem. Is-​saltna tagħhom hija saltna li ddum għal żmien indefinit.” (Danjel 7:27) Dawn l-​espressjonijiet “in-​nies” u “s-​saltna tagħhom” juruna li oħrajn se jaħkmu maʼ Kristu fil-​gvern t’Alla.

11. X’juri li s-​segwaċi bikrin taʼ Kristu se jaħkmu miegħu?

¹¹ Fl-aħħar lejl li Ġesù għadda mal-​​11-il appostlu leali tiegħu hu wera li huma kellhom ikunu ħakkiema miegħu fis-​saltna t’Alla. Qalilhom: “Intom dawk li bqajtu miegħi fil-​provi tiegħi; u nagħmel patt magħkom, sewwa sew bħalma Missieri għamel patt miegħi, għal saltna.” (Luqa 22:​28, 29) Iktar tard, l-​appostlu Pawlu u Timotew ġew inklużi f’dan il-​patt, jew ftehim, għal saltna. Minħabba f’hekk Pawlu kiteb lil Timotew: “Jekk nibqgħu nissaportu, aħna se naħkmu wkoll flimkien bħala slaten.” (2 Timotew 2:12) Ukoll, l-​appostlu Ġwanni kiteb dwar dawk li se “jaħkmu bħala slaten għal fuq l-​art” flimkien maʼ Ġesù Kristu.​—Rivelazzjoni 5:​9, 10; 20:6.

12. Liema fatt dwar iż-​“żerriegħa” t’Abraham jirrivela li Kristu se jkollu ħakkiema sħab?

¹² Mela dawk li jmorru fis-​sema jmorru hemmhekk biex jaqdu bħala ħakkiema sħab maʼ Kristu fil-​gvern tas-​sema t’Alla. Fil-​waqt li Ġesù hu ż-​“żerriegħa” prinċipali tal-​wegħda, Alla jagħżel oħrajn minn fost il-​bnedmin biex jaħkmu maʼ Ġesù fis-​saltna. Huma b’hekk isiru parti miż-​“żerriegħa,” bħalma tgħid il-​Bibbja: “Jekk intom tappartjenu lil Kristu, intom tassew iż-​żerriegħa t’Abraham, werrieta b’referenza għal wegħda.”​—Galatin 3:​16, 29; Ġakbu 2:5.

KEMM IMORRU FIS-​SEMA?

13. (a) It-trabi għala ma jmorrux fis-​sema? (b) Ġesù kif iddeskriva n-​numru taʼ dawk li jirċievu s-​Saltna?

¹³ Ladarba huma se jaħkmu għal fuq l-​art, jidher ċar li dawk li jmorru fis-​sema se jkunu segwaċi taʼ Kristu pprovati u ttestjati. Dan ifisser li trabi jew tfal żgħar, li ma jkunux ġew ittestjati bis-​sħiħ matul snin taʼ servizz Kristjan, ma jitteħdux fis-​sema. (Mattew 16:24) Madankollu, tfal żgħar bħal dawn li jmutu għandhom it-​tama li jiġu mqajmin għall-​​ħajja fuq l-​art. (Ġwann 5:​28, 29) Mela n-​numru totali taʼ dawk li jmorru fis-​sema se jkun żgħir meta tqabblu mal-​ħafna li se jirċievu l-​ħajja fuq l-​art taħt il-​ħakma tas-​Saltna. Ġesù qal lid-​dixxipli tiegħu: “Tibżgħux, merħla ċkejkna, għaliex Missierkom approva li jagħtikom is-​saltna.”​—Luqa 12:32.

14. Kemm persuni jifformaw il-​“merħla ċkejkna” li jmorru fis-​sema?

¹⁴ Kemm se tkun żgħira fin-​numru dik il-​klassi taʼ ħakkiema tas-​Saltna? Se tinkludi biss l-​appostli u segwaċi bikrin oħrajn taʼ Ġesù? Le, il-​Bibbja turi li l-​“merħla ċkejkna” se tinkludi iżjed minn hekk. F’​Rivelazzjoni 14:​1, 3 l-​Bibbja tgħid: “U rajt, u, ħares! il-​Ħaruf [Ġesù Kristu] bil-​wieqfa fuq il-​Muntanja Sijon [tas-sema], u miegħu mija u erbgħa u erbgħin elf . . . li ġew mixtrijin [jew, meħudin] mill-​art.” Innota li 144,000 persuna biss jidhru mal-​Ħaruf, Ġesù Kristu, fuq il-​Muntanja Sijon tas-​sema. (Ebrej 12:22) Mela minflok ma t-​tajbin kollha jmorru fis-​sema, il-​Bibbja tirrivela li biss 144,000 persuna pprovati u leali se jittieħdu hemmhekk biex jaħkmu maʼ Kristu.

GĦALA MAGĦŻULIN MILL-​ART

15. Alla għala jagħżel il-​ħakkiema tas-​Saltna minn fost il-​bnedmin?

¹⁵ Imma Alla għala jagħżel lil dawn il-​ħakkiema minn fost il-​bnedmin? Għala ma jaħkmux l-​anġli maʼ Kristu? Sewwa, kien hawnhekk fuq l-​art li ġie sfidat id-​dritt taʼ Jehovah li jaħkem. Kien hawnhekk li l-​fedeltà tal-​bnedmin lejn Alla setgħet tiġi ttestjata permezz t’oppożizzjoni mix-​Xitan. Kien hawnhekk li Ġesù ta prova tal-​lealtà sħiħa tiegħu lejn Alla taħt prova u ta ħajtu bħala rahan għall-​bnedmin. Mela kien minn fuq l-​art li Jehovah irranġa biex jieħu “merħla ċkejkna” taʼ persuni biex ikunu assoċjati maʼ Ibnu fis-​saltna tas-​sema. Dawk huma l-​uħud li, permezz tal-​fedeltà tagħhom lejn Alla, urew li l-​akkuża tax-​Xitan li l-​bnedmin jaqdu ’l Alla biss għal raġunijiet egoistiċi kienet falza. Huwa xieraq, għalhekk, li Jehovah juża lil dawn il-​bnedmin għall-​glorja tiegħu.​—Efesin 1:​9-12.

16. Għala nistgħu nkunu grati li l-​ħakkiema tas-​Saltna għexu fuq l-​art?

¹⁶ Ukoll, aħseb ftit kemm tkun ħaġa meraviljuża li jkollok bħala ħakkiema lil persuni li jkunu żammew il-​fedeltà tagħhom lejn Alla fuq l-​art, b’ħafna minnhom li jkunu saħansitra ssagrifikaw ħajjiethom għan-​nom tas-​Saltna. (Rivelazzjoni 12:10, 11; 20:4) L-​anġli ma ffaċċjawx din ix-​xorta taʼ provi. Lanqas m’esperjenzaw il-​problemi komuni għall-​bnedmin. Mela ma jistgħux jifhmu għalkollox xi tfisser li tkun bniedem midneb u li jkollok il-​problemi li għandna aħna l-​bnedmin. Imma l-​144,000 jifhmu għaliex għaddew minn dawn l-​istess problemi. Xi wħud minnhom kellhom jegħlbu xi drawwiet li kienu midinbin ħafna, u jafu kemm tistaʼ tkun ħaġa iebsa din. (1 Korintin 6:​9-11) Għalhekk, se jittrattaw mas-​sudditi tagħhom fuq l-​art bil-​mogħdrija.​—Ebrej 2:17, 18.

IL-​KONGREGAZZJONI T’ALLA

17. Il-kelma “kongregazzjoni” għal liema ħaġa tirreferi?

¹⁷ Il-Bibbja tgħidilna li Kristu hu l-​kap tal-​kongregazzjoni t’Alla, u li l-​membri tagħha huma suġġetti lejn Ġesù. (Efesin 5:​23, 24) Mela l-​kelma “knisja,” jew “kongregazzjoni t’Alla,” ma tirreferix għal xi bini. Minflok, tirreferi għal grupp taʼ Kristjani. (1 Korintin 15:9) Illum aħna nistgħu nitkellmu dwar il-​kongregazzjoni taʼ Kristjani li nassoċjaw magħhom. Bl-​istess mod, naqraw fil-​Bibbja dwar “il-​kongregazzjoni tal-​Laodikin,” u, fl-​ittra taʼ l-​appostlu Pawlu lil Filemon, dwar “il-​kongregazzjoni [li kienet] f’daru.”​—Kolossin 4:16; Filemon 2.

18. (a) Min jifforma “l-​kongregazzjoni taʼ dak Alla ħaj”? (b) Il-​Bibbja b’liema termini tirreferi wkoll għal din il-​kongregazzjoni?

¹⁸ Madankollu, meta l-​Bibbja titkellem dwar “il-​kongregazzjoni taʼ dak Alla ħaj,” hija qiegħda tirreferi għal grupp partikulari taʼ segwaċi taʼ Kristu. (1 Timotew 3:​15) Huma msejħin ukoll “il-​kongregazzjoni taʼ l-​ewwel imweldin li ġew ingaġġati fis-​smewwiet.” (Ebrej 12:23) Mela din “il-​kongregazzjoni t’Alla” hija magħmula mill-​Kristjani kollha fuq l-​art li għandhom it-​tama taʼ ħajja fis-​sema. B’kollox, 144,000 persuna biss fl-​aħħarnett jifformaw il-​“kongregazzjoni t’Alla.” Illum ftit biss minn dawn, fdal, għadhom fuq l-​art. Kristjani li jittamaw li jgħixu għal dejjem fuq l-​art ifittxu l-​gwida spiritwali mill-​membri taʼ din il-​“kongregazzjoni taʼ dak Alla ħaj.” Il-​Bibbja tirreferi wkoll għal din il-​kongregazzjoni taʼ 144,000 membru b’termini bħal “l-​għarusa, il-​mara tal-​Ħaruf,” “il-​ġisem tal-​Kristu,” “it-​tempju t’Alla,” “l-​Iżrael t’Alla,” u “Ġerusalemm il-​Ġdida.”​—Rivelazzjoni 21:9; Efesin 4:12; 1 Korintin 3:17; Galatin 6:16; Rivelazzjoni 21:2.

IL-​ĦAĠA ĠDIDA FL-​ISKOP T’ALLA

19. Liema ħaġa ġdida introduċa Alla biex iwettaq l-​iskop oriġinali tiegħu għall-​art?

¹⁹ Alla Jehovah ma biddilx l-​iskop tiegħu għall-​art u għall-​bnedmin taʼ fuqha wara li Adam tefaʼ lir-​razza umana fil-​passaġġ tad-​dnub u l-​mewt. Kieku Alla għamel hekk dan kien ikun ifisser li hu ma kienx kapaċi jwettaq l-​iskop oriġinali tiegħu. L-​iskop tiegħu mill-​bidu kien li jkollu ġenna mifruxa maʼ l-​art kollha mimlija b’nies henjin u b’saħħithom u dak l-​iskop għadu jgħodd. L-​unika ħaġa ġdida li Alla introduċa kien l-​arranġament tiegħu għal gvern ġdid biex iwettaq l-​iskop tiegħu. Bħalma rajna, Ibnu, Ġesù Kristu, hu l-​ħakkiem prinċipali f’dan il-​gvern, u 144,000 persuna se jittieħdu minn fost il-​bnedmin biex jaħkmu miegħu fis-​sema.​—Rivelazzjoni 7:4.

20. (a) Min jifforma s-​“smewwiet ġodda” u l-​“art ġdida”? (b) Xi trid tagħmel int biex issir parti mill-​“art ġdida”?

²⁰ Dawn il-​ħakkiema fis-​sema se jifformaw is-​“smewwiet ġodda” tas-​sistema ġdida t’Alla. Madankollu jidher ċar li jekk se jkun hemm ħakkiema twajbin bħal dawn għal fuq l-​art, allura jrid ikun hemm dawk fuq min jaħkmu. Il-​Bibbja tirreferi għal dawn il-​persuni bħala l-​“art ġdida.” (2 Pietru 3:13; Rivelazzjoni 21:​1-4) Dawn se jinkludu lil Ġob, David u Ġwanni l-​Għammied​—iva, lil dawk kollha leali li għexu qabel ma Kristu ġie fuq l-​art. Imma se jkun hemm ħafna iżjed li se jifformaw l-​“art ġdida,” inklużi persuni li jibqgħu ħajjin wara t-​tmiem taʼ din is-​sistema mill-​agħar t’affarijiet. Se tkun int wieħed minn dawn li jibqgħu ħajjin? Trid tkun sudditu tal-​gvern t’Alla? Jekk inhu hekk, hemm xi ħtiġijiet li trid tilħaq.

[Stampi f’paġna 121]

Dawn l-​irġiel twajbin marru fis-​sema?

Is-​Sultan David

Ġob

Ġwanni l-Għammied

[Stampa f’paġna 122]

Fl-​aħħar lejl tiegħu maʼ l-​appostli, Ġesù qal li huma kellhom ikunu ħakkiema miegħu fis-​saltna taʼ Missieru