Int lil Min Tobdi ​—Lil Alla Jew lill-​Bnedmin?

“Jeħtieġ li aħna nobdu lil Alla bħala ħakkiem iktar milli lill-​bnedmin.”​—ATTI 5:​29.

1. (a) X’inhi l-​iskrittura użata bħala t-​tema għal dan l-​istudju? (b) L-​appostli għala kienu ġew arrestati?

L-​IMĦALLFIN tal-​qorti suprema Lhudija żgur li kienu inkorlati. Il-​priġunieri ma kinux fil-​ħabs. Dawn kienu l-​appostli taʼ Ġesù Kristu, raġel li l-​qorti għolja kienet ikkundannat għall-​mewt xi ftit ġimgħat qabel. Issa l-​qorti kienet lesta biex tittratta mas-​segwaċi li kienu l-​iktar qrib tiegħu. Imma meta l-​gwardjani marru għalihom, huma sabu li ċ-​ċelel tagħhom kienu vojta, minkejja li l-​bibien kienu ġew imsakkrin mill-​gwardjani stess. Il-​gwardjani malajr skoprew li l-​appostli kienu fit-​tempju taʼ Ġerusalemm, jgħallmu lin-​nies bi qlubija dwar Ġesù Kristu​—dik l-​istess attività għal xiex ġew arrestati! Il-​gwardjani marru dritt it-​tempju, reġgħu arrestaw lill-​appostli, u ħaduhom il-​qorti.​—Atti 5:​17-​27.

2. L-​anġlu xi kkmandahom jagħmlu lill-​appostli?

² Anġlu kien ħeles lill-​appostli mill-​ħabs. Kien dan ġara biex ma jgħaddux iktar minn persekuzzjoni? Le. Dan ġara sabiex l-​abitanti taʼ Ġerusalemm ikunu jistgħu jisimgħu l-​aħbar tajba dwar Ġesù Kristu. L-​anġlu kien qal lill-​appostli biex ‘jibqgħu jgħidu lin-​nies il-​kliem kollu dwar din il-​ħajja.’ (Atti 5:​19, 20) Għalhekk, meta sabuhom il-​gwardjani tat-​tempju, huma sabu lill-​appostli jwettqu dak il-​kmand b’ubbidjenza.

3, 4. (a) Meta ġew kmandati biex ma jibqgħux jippridkaw, Pietru u Ġwanni kif wieġbu? (b) Lappostli l-​oħra kif wieġbu?

³ Tnejn minn dawk ix-​xandara determinati, l-​appostli Pietru u Ġwanni, kienu diġà ttellgħu l-​qorti qabel, bħalma fakkarhom bl-​aħrax l-​imħallef ewlieni, Ġużeppi Kajfa. Hu qal: “Aħna ordnajnielkom bis-​sħiħ biex ma tibqgħux tgħallmu f’dan l-​isem [taʼ Ġesù], imma ara, imlejtu lil Ġerusalemm bit-​tagħlim tagħkom.” (Atti 5:28) Kajfa ma kellux ikun sorpriż meta reġaʼ ra lil Pietru u ’l Ġwanni fil-​qorti. Meta kienu ordnawlhom l-​ewwel darba biex ma jibqgħux jippridkaw, iż-​żewġ appostli wieġbu: “Jekk hux sewwa f’għajnejn Alla li nisimgħu minnkom iktar milli minn Alla, iġġudikaw intom. Imma aħna ma nistgħux nieqfu nitkellmu dwar dak li rajna u smajna.” Bħal Ġeremija, il-​profeta tal-​qedem, Pietru u Ġwanni ma setgħux iżommu lura milli jwettqu l-​inkarigu tagħhom biex jippridkaw.​—Atti 4:​18-20; Ġeremija 20:9.

⁴ Issa, mhux biss Pietru u Ġwanni imma wkoll l-​appostli l-​oħra kollha​—fosthom Mattija li kien għadu kif intgħażel—kellhom l-​opportunità li jiddikjaraw pubblikament il-​pożizzjoni tagħhom dwar l-​ordni li tat il-​qorti. (Atti 1:​21-​26) Meta ġew kmandati biex ma jibqgħux jippridkaw, huma wkoll wieġbu b’kuraġġ: “Jeħtieġ li aħna nobdu lil Alla bħala ħakkiem iktar milli lill-​bnedmin.”—Atti 5:​29.

Ubbidjenza Lejn Alla jew Lejn il-​Bnedmin?

5, 6. L-​appostli għala m’obdewx l-​ordni tal-​qorti?

⁵ L-​appostli kienu rġiel li jobdu l-​liġi, u normalment ma kinux jiksru ordni mill-​qorti. Madankollu, ebda bniedem, minkejja kemm ikollu qawwa, m’għandu awtorità jordna lil ħaddieħor biex ma jobdix wieħed mill-​kmandi t’Alla. Ġeħova huwa “l-​Għoli fuq l-​art kollha.” (Salm 83:19 [83:​18, NW]) Mhux biss huwa “l-​imħallef taʼ l-​art kollha” imma huwa wkoll il-​Leġislatur Suprem, kif ukoll is-​Sultan taʼ l-​eternità. Kwalunkwe ordni mill-​qorti li tipprova tieħu post xi wieħed mill-​kmandi t’Alla ma tiswiex mill-​ħarsa t’Alla.​—Ġenesi 18:25; Isaija 33:22.

⁶ Dan il-​fatt ġie aċċettat minn xi wħud mill-​aqwa esperti legali. Per eżempju, William Blackstone, imħallef Ingliż magħruf tas-​seklu 18, kiteb li ebda liġi tal-​bniedem m’għandha titħalla tikkontradixxi “l-​liġi tar-​rivelazzjoni” kif misjuba fil-​Bibbja. Għalhekk, is-​ Sinedriju ma kellux dritt jordna lill-​appostli biex ma jibqgħux jippridkaw. L-​appostli sempliċement ma setgħux jobdu dik l-​ordni.

7. Ix-​xogħol taʼ l-​ippridkar għala inkorla lill-​qassisin ewlenin?

⁷ Id-​determinazzjoni taʼ l-​appostli biex jibqgħu jippridkaw inkorlat lill-​qassisin ewlenin. Ċerti membri tas-​saċerdozju, fosthom Kajfa nnifsu, kienu Sadduċej, li ma kinux jemmnu fl-​irxoxt. (Atti 4:​1, 2; 5:17) Madankollu, lappostli komplew jinsistu li Ġesù kien ġie rxoxtat mill-​mewt. Iktar minn hekk, xi wħud mill-​qassisin ewlenin kienu għamlu sforz kbir biex jiksbu l-​favur taʼ l-​awtoritajiet Rumani. Fil-​ġuri taʼ Ġesù, meta l-​qassisin ewlenin ngħataw l-​opportunità biex jaċċettaw lil Ġesù bħala s-​sultan tagħhom, il-​qassisin ewlenin saħansitra waslu biex jgħidu: “M’għandna l-​ebda sultan ħlief lil Ċesari.” (Ġwanni 19:15)a L-​appostli mhux biss kienu qed jisħqu u jgħidu li Ġesù kien ġie rxoxtat imma wkoll kienu qed jgħallmu li minbarra l-​isem taʼ Ġesù, “m’hemmx isem ieħor taħt is-​sema li ngħata lill-​bnedmin u li bih nistgħu niġu salvati.” (Atti 2:36; 4:12) Il-​qassisin beżgħu li jekk in-​nies ikunu jridu lil Ġesù rxoxtat bħala l-​Mexxej tagħhom, ir-​Rumani setgħu jiġu u l-​mexxejja Lhud setgħu jitilfu ‘posthom u ġenshom.’​—Ġwanni 11:48.

8. Liema parir għaqli ta Gamaljel lis-​Sinedriju?

⁸ Il-​futur kien jidher imdallam għall-​appostli taʼ Ġesù Kristu. L-​imħallfin tas-​Sinedriju kienu determinati li joqtluhom. (Atti 5:​33) Madankollu, l-​affarijiet inbidlu bla mistenni. Gamaljel, espert fil-​Liġi, qam bil-​wieqfa u wissa lill-​kollegi tiegħu biex ma jgħaġġlux fid-​deċiżjoni tagħhom. Hu b’għaqal osserva: “Jekk dan il-​pjan jew dan ix-​xogħol ġej mill-​bnedmin, għad jingħeleb; imma jekk ġej minn Alla, ma tistgħux tegħlbuhom.” Imbagħad, b’mod sinifikanti, Gamaljel kompla jgħid: “Inkella għandkom mnejn tkunu fil-​fatt qed tiġġieldu kontra Alla.”​—Atti 5:​34, 38, 39.

9. Xi prova hemm li l-​ħidma taʼ l-​appostli kienet ġejja minn Alla?

⁹ B’sorpriża, il-​qorti aċċettat il-​parir taʼ Gamaljel. Il-​membri tas-​Sinedriju “sejħu lill-​appostli, sawtuhom, u ordnawlhom biex ma jibqgħux jitkellmu f’isem Ġesù, u telquhom.” Madankollu, minflok ma beżgħu, l-​appostli kienu determinati li jobdu l-​kmand anġeliku biex jippridkaw. Għalhekk, wara li nħelsu, “kuljum fit-​tempju u minn dar għal dar [l-appostli] baqgħu jgħallmu u jxandru bla heda l-​aħbar tajba dwar il-​Kristu, Ġesù.” (Atti 5:​40, 42) Ġeħova bierek l-​isforzi tagħhom. Sa liema punt? “Il-​kelma t’Alla kompliet tikber, u l-​għadd tad-​dixxipli baqaʼ jiżdied ħafna f’Ġerusalemm.” Fil-​fatt, “folla kbira taʼ qassisin bdew jobdu l-​fidi.” (Atti 6:7) Min jaf kemm ħassewhom ixxokkjati l-​qassisin ewlenin! Din l-​evidenza kompliet tikber dejjem iktar: Il-​ħidma taʼ l-​appostli tassew kienet ġejja minn Alla!

Min Jiħodha Kontra Alla Ma Jistax Jirnexxi

10. Mill-​ħarsa tal-​bniedem, Kajfa għala setaʼ ħass li l-​pożizzjoni tiegħu kienet fiż-​żgur, imma l-​fiduċja tiegħu kif kienet żbaljata?

¹⁰ Fl-​ewwel seklu, il-​qassisin il-​kbar Lhud kienu jiġu maħturin mill-​awtoritajiet Rumani. Ir-​raġel għani Ġużeppi Kajfa kien tpoġġa fil-​pożizzjoni tiegħu minn Valerju Gratu, u hu żamm din il-​pożizzjoni għal iktar żmien minn ħafna wħud li kellhom din il-​pożizzjoni qablu. X’aktarx li Kajfa kien iħoss li hu rnexxielu jagħmel dan minħabba s-​sengħa tiegħu bħala diplomat u l-​ħbiberija persunali tiegħu maʼ Pilatu, u mhux minħabba l-​id t’Alla. Kien x’kien il-​każ, il-​fiduċja tiegħu fin-​nies uriet li kienet żbaljata. Tliet snin biss wara li l-​appostli dehru quddiem is-​Sinedriju, Kajfa tilef il-​favur taʼ l-​awtoritajiet Rumani u tneħħa mill-​pożizzjoni taʼ qassis il-​kbir.

11. Ponzju Pilatu u s-​sistema Lhudija kif spiċċaw, u int x’tikkonkludi minn dan?

¹¹ L-​ordni biex Kajfa jitneħħa mill-​kariga tiegħu ġiet mingħand Luċju Vitellju, gvernatur tas-​Sirja, li kien taʼ grad iktar għoli minn Pilatu. Minkejja li Pilatu kien ħabib tal-​qalb taʼ Kajfa, hu ma setaʼ jagħmel xejn biex iwaqqaf dan milli jiġri. Fil-​fatt, sena biss wara l-​waqgħa taʼ Kajfa, Pilatu stess tneħħa mill-​kariga tiegħu u ntalab imur Ruma biex iwieġeb għal xi akkużi serji li saru kontrih. Għal dawk il-​mexxejja Lhud li poġġew il-​fiduċja tagħhom f’Ċesari, ir-​Rumani spiċċaw biex ħadulhom ‘posthom u ġenshom.’ Dan ġara fis-​sena 70 E.K. meta l-​armati Rumani qerdu kompletament il-​belt taʼ Ġerusalemm, inkluż it-​tempju u s-​sala tas-​Sinedriju. Kemm ta prova li kien minnu l-​kliem tas-​salmista f’dan il-​każ: “La tittamawx fil-​kbarat, għax il-​bniedem ma jsalvakomx”!—Ġwanni 11:48; Salm 146:3.

12. L-​eżempju taʼ Ġesù kif juri li l-​ubbidjenza lejn Alla hija t-​triq għaqlija?

¹² B’kuntrast, Alla ħatar lil Ġesù Kristu rxoxtat bħala Qassis il-​Kbir taʼ tempju spiritwali mill-​aqwa. Ebda bniedem ma jistaʼ jwaqqaʼ dik il-​ħatra. Fil-​fatt, Ġesù “għandu saċerdozju mingħajr suċċessuri.” (Ebrej 2:9; 7:​17, 24; 9:11) Alla wkoll ħatar lil Ġesù bħala Imħallef tal-​ħajjin u l-​mejtin. (1 Pietru 4:5) B’din il-​kariga, Ġesù se jiddetermina jekk Ġużeppi Kajfa u Ponzju Pilatu għandhomx xi ċans għall-​ħajja futura.​—Mattew 23:33; Atti 24:15.

Xandara tas-​Saltna Kuraġġużi Llum

13. Fi żmienna, liema ħidma wriet li kienet mill-​bnedmin, u liema ħidma wriet li kienet minn Alla? Kif taf?

¹³ Fi żmienna, bħal fl-​ewwel seklu, il-​‘ġellieda kontra Alla’ ma jonqsux. Per eżempju, meta x-​Xhieda taʼ Ġeħova fil-​Ġermanja rrifjutaw li jsellmu lil Adolf Hitler bħala l-​Mexxej tagħhom, Hitler ħalef li jeqridhom. (Mattew 23:10) L-​organizzazzjoni tiegħu żgur li kellha l-​kapaċità biex tilħaq dan l-​għan. In-​Nazi rnexxielhom jarrestaw eluf taʼ Xhieda u jibagħtuhom fil-​kampijiet tal-​konċentrament. Huma saħansitra rnexxielhom joqtlu lil xi wħud mix-​Xhieda. Imma n-​Nazi ma rnexxilhomx ikissru d-​determinazzjoni tax-​Xhieda biex jaqdu biss lil Alla, u ma rnexxilhomx jeqirdu lill-​qaddejja t’Alla bħala grupp. Il-​ħidma taʼ dawk il-​Kristjani kienet ġejja minn Alla, mhux mill-​bnedmin, u ħadd ma jistaʼ jegħleb il-​ħidma t’Alla. Sittin sena wara, xi wħud minn dawk il-​leali li baqgħu ħajjin minkejja li ttieħdu fil-​kampijiet tal-​konċentrament għadhom jaqdu lil Ġeħova ‘b’qalbhom kollha u b’ruħhom kollha u b’moħħhom kollu,’ filwaqt li Hitler u l-​partit Nazista tiegħu huma biss tifkira kerha.—Mattew 22:37.

14. (a) Xi opponenti x’għamlu biex itebbgħu isem il-​qaddejja t’Alla, u b’liema riżultati? (b) Dak li qed jagħmlu se jibqaʼ jfixkel għal dejjem lill-​poplu t’Alla? (Ebrej 13:​5, 6)

¹⁴ Miż-​żmien tan-​Nazi, kien hemm oħrajn li pprovaw jiġġieldu għalxejn kontra Ġeħova u n-​nies tiegħu. F’għadd taʼ pajjiżi fl-​Ewropa, xi nies qarrieqa mill-​qasam politiku u reliġjuż irsistew biex lix-​Xhieda taʼ Ġeħova jittimbrawhom bħala ‘setta perikoluża,’ l-​istess akkuża li saret kontra l-​Kristjani taʼ l-​ewwel seklu. (Atti 28:22) Il-​fatt hu li l-​Qorti Ewropea tad-​Drittijiet tal-​Bniedem irrikonoxxiet lix-​Xhieda taʼ Ġeħova bħala reliġjon, u mhux bħala setta. Dawn l-​opponenti żgur li jafuh dan. Xorta waħda, huma jibqgħu jtebbgħu isem ix-​Xhieda. Sewwasew minħabba dan it-​timbru li tawhom, xi wħud minn dawn il-​Kristjani tkeċċew mill-​impjieg tagħhom. Tfal tax-​Xhieda ngħataw fastidju fl-​iskejjel. Xi sidien tal-​kera kkanċellaw kuntratti għal postijiet li x-​Xhieda taʼ Ġeħova kienu ilhom jużawhom għal-​laqgħat tagħhom. F’xi każi, aġenziji tal-​gvern saħansitra ma tawx ċittadinanza lil ċerti individwi għall-​unika raġuni li huma Xhieda taʼ Ġeħova! Xorta waħda, ix-​Xhieda ma jaqtgħux qalbhom.

15, 16. Ix-​Xhieda taʼ Ġeħova fi Franza kif irreaġixxew għall-​oppożizzjoni kontra l-​ħidma Kristjana tagħhom, u għala jibqgħu jippridkaw?

¹⁵ Fi Franza, per eżempju, in-​nies ġeneralment huma raġunevoli u mingħajr preġudizzju. Madankollu, xi ftit opponenti għaddew liġijiet immirati biex jagħtu daqqa taʼ ħarta lill-​ippridkar. Ix-​Xhieda taʼ Ġeħova kif irreaġixxew? Huma żiedu l-​attività tagħhom fil-​ministeru iktar minn qatt qabel u b’riżultati mill-​aqwa. (Ġakbu 4:7) Tant hu hekk li f’perijodu taʼ sitt xhur, l-​għadd taʼ studji tal-​Bibbja fid-​djar żdied b’persentaġġ taʼ l-​għaġeb taʼ 33 fil-​mija! Ix-​Xitan min jaf kemm jinkorla meta jara wħud taʼ qalb onesta fi Franza jwieġbu għall-​aħbar tajba. (Rivelazzjoni 12:17) Il-​Kristjani sħabna fi Franza huma fiduċjużi li l-​kliem tal-​profeta Isaija se jitwettaq fil-​każ tagħhom: “Ebda arma magħmula kontrik ma tiswa, u kull ilsien li jħaqqaq kontrik toħorġu b’ħati.”—Isaija 54:17.

¹⁶ Ix-​Xhieda taʼ Ġeħova ma jiħdux pjaċir jiġu persegwitati. Madankollu, sabiex jobdu l-​kmand li ngħata lill-​Kristjani kollha, huma ma jistgħux u m’humiex se jieqfu jitkellmu dwar l-​affarijiet li semgħu. Huma jħabirku biex ikunu ċittadini tajbin. Però, fejn ikun hemm konflitt bejn il-​liġi t’Alla u l-​liġi tal-​bniedem, huma għandhom jobdu lil Alla bħala ħakkiem.

Tibżgħux Minnhom

17. (a) Għala m’għandniex għalfejn nibżgħu mill-​għedewwa tagħna? (b) X’għandha tkun l-​attitudni tagħna lejn dawk li jippersegwitawna?

¹⁷ L-​għedewwa tagħna jinsabu f’sitwazzjoni perikoluża ħafna. Huma qegħdin jiġġieldu kontra Alla. B’hekk, fi qbil mal-​kmand taʼ Ġesù, minflok ma nibżgħu minnhom, aħna nitolbu għal dawk li jippersegwitawna. (Mattew 5:​44) Aħna nitolbu li jekk xi wħud qegħdin jopponuna minħabba l-​injoranza, bħal Sawlu taʼ Tarsu, Ġeħova b’qalb tajba se jiftħilhom għajnejhom għall-​verità. (2 Korintin 4:4) Sawlu sar l-​appostlu Kristjan Pawlu u bata ħafna f’idejn l-​awtoritajiet taʼ żmienu. Xorta waħda, hu baqaʼ jfakkar lil sħabu fit-​twemmin “biex ikunu sottomessi u ubbidjenti lejn il-​gvernijiet u l-​awtoritajiet bħala ħakkiema, lesti għal kull għemil tajjeb, ma jitkellmu fuq ħadd b’mod inġurjuż, ma jkunux ġellidin, imma jkunu raġunevoli, u kollhom ħlewwa maʼ kulħadd.” (Titu 3:​1, 2) Ix-​Xhieda taʼ Ġeħova fi Franza u kullimkien iħabirku biex jieħdu l-​parir tiegħu bis-​serjetà.

18. (a) Ġeħova b’liema mod jistaʼ jeħles lin-​nies tiegħu (b) X’se jkun ir-​riżultat aħħari?

¹⁸ Alla qal lill-​profeta Ġeremija: “Jien miegħek biex neħilsek.” (Ġeremija 1:8) Ġeħova kif jistaʼ jeħlisna mill-​persekuzzjoni llum? Hu jistaʼ jqajjem xi mħallef li mhux preġudikat bħalma kien Gamaljel. Jew jistaʼ jieħu ħsieb li ħabta u sabta jibdel xi uffiċjal korrott u li jopponi maʼ xi ħadd li huwa iktar raġunevoli. Xi drabi, però, Ġeħova jistaʼ jippermetti li l-​persekuzzjoni kontra l-​poplu tiegħu tkompli. (2 Timotju 3:​12) Jekk Alla jippermettilna niġu persegwitati, hu dejjem se jagħtina s-​saħħa biex nissaportu l-​persekuzzjoni. (1 Korintin 10:13) U minkejja dak li jippermetti Alla, aħna m’għandna ebda dubju dwar ir-​riżultat aħħari: Dawk li jiġġieldu kontra n-​nies t’Alla qed jiġġieldu kontra Alla, u min jiġġieled kontra Alla m’huwiex se jirnexxi.

19. X’inhi l-​iskrittura għas-​sena 2006, u għala hija xierqa?

¹⁹ Ġesù qal lid-​dixxipli tiegħu biex jistennew it-​tribulazzjoni. (Ġwanni 16:33) Meta nqisu dan, il-​kliem imniżżel f’Atti 5:​29 qatt ma kien iktar f’waqtu mil-​lum: “Jeħtieġ li aħna nobdu lil Alla bħala ħakkiem iktar milli lill-​bnedmin.” Għal din ir-​raġuni, dan il-​kliem li jqanqal intgħażel bħala l-​iskrittura tas-​sena għax-​Xhieda taʼ Ġeħova għas-​sena 2006. Jalla tkun il-​mira tagħna matul is-​sena d-​dieħla u matul l-​eternità kollha li nobdu lil Alla bħala Ħakkiem akkost taʼ kollox!

[Nota taʼ taħt]

Taf Twieġeb?

• Liema eżempju inkuraġġanti ħallewlna l-​appostli bil-​mod kif iffaċċjaw l-​oppożizzjoni?

• Għala għandna dejjem nobdu lil Alla bħala ħakkiem iktar milli lill-​bnedmin?

• L-​opponenti tagħna fil-​fatt kontra min qegħdin jiġġieldu?

• X’riżultat nistgħu nistennew għal dawk li jissaportu l-​persekuzzjoni?

[Kumment f’paġna 23]

L-​iskrittura għas-​sena 2006 se tkun: “Jeħtieġ li aħna nobdu lil Alla bħala ħakkiem iktar milli lill-​bnedmin.” ​—Atti 5:​29

[Stampa f’paġna 19]

“Jeħtieġ li aħna nobdu lil Alla bħala ħakkiem iktar milli lill-​bnedmin”

[Stampa f’paġna 21]

Kajfa poġġa l-​fiduċja tiegħu fil-​bnedmin minflok f’Alla