Ħalli l-​“Kelma” taʼ Ġeħova Tipproteġik

FIS-​SENA 490 Q.E.K. fil-​battalja storika taʼ Maratona, minn għaxart elef sa għoxrin elf ruħ minn Ateni ffaċċjaw armata Persjana ferm akbar minnhom. Fattur importanti fit-​tattiċi li kienu jużaw il-​Griegi kien il-​falanġi​—battaljun taʼ suldati jimmarċjaw marsusin spalla maʼ spalla. It-​tarki ħdejn xulxin kienu jifformaw ħajt sħiħ li minnu kienu joħorġu l-​lanez taʼ kulħadd. Il-​falanġi taw lin-​nies t’Ateni vittorja famuża fuq il-​forzi Persjani li kienu bil-​wisq iktar b’saħħithom.

Il-Kristjani veri qegħdin jiġġieldu battalja spiritwali. Huma jitqabdu maʼ għedewwa b’saħħithom​—il-​ħakkiema inviżibbli tas-​sistema preżenti mill-​agħar, li huma deskritti fil-​Bibbja bħala “l-​ħakkiema dinjin taʼ dan id-​dlam, . . . il-​forzi taʼ l-​ispirti mill-​agħar fil-​postijiet tas-​sema.” (Efesin 6:12; 1 Ġwanni 5:19) In-​nies t’Alla jibqgħu joħorġu vittorjużi​—imma mhux bis-​saħħa tagħhom. Il-​kredtu kollu jmur lil Ġeħova, li jipproteġihom u jgħallimhom, bħalma jistqarr Salm 18:31 (18:​30, NW): “Safja hi l-​kelma tal-​Mulej. Tarka huwa Alla għal kull min jistkenn fih.”

Iva, permezz tal-​“kelma” rfinuta tiegħu, li tinsab fl-​Iskrittura Mqaddsa, Ġeħova jipproteġi lill-​qaddejja leali tiegħu minn ħsara spiritwali. (Salm 19:​8-12, [19:​7-11, NW]; 119:93) Dwar l-​għerf muri fil-​Kelma t’Alla, Salamun kiteb: “Twarrbux minnek, u hu jżommok, ħobbu, u hu jieqaf miegħek.” (Proverbji 4:6; Koħèlet 7:12) L-​għerf divin kif jipproteġina mill-​ħsara? Ikkunsidra l-​eżempju taʼ Iżrael tal-​qedem.

Poplu Protett b’Għerf Divin

Il-​Liġi taʼ Ġeħova pproteġiet u ggwidat lill-​Iżraelin f’kull aspett tal-​ħajja. Per eżempju, ir-​regolamenti dwar id-​dieta, l-​indafa, u l-​kwarantina ħelsuhom minn ħafna mard li ħarbat popli oħrajn. Kien biss wara li ġew skoperti l-​batterji fis-​seklu 19 li x-​xjenza bdiet tilħaq il-​livell tal-​Liġi t’Alla. Il-​liġijiet dwar il-​pussess taʼ l-​art, ix-​xiri mill-​ġdid, il-​ħelsien mid-​dejn, u s-​self tal-​flus b’imgħax esaġerat ġabu benefiċċji soċjali lil Iżrael billi għenuh sabiex ikollu soċjetà stabbli u ekonomija tajba. (Dewteronomju 7:​12, 15; 15:​4, 5) Il-​Liġi taʼ Ġeħova għenet saħansitra biex tiġi preservata l-​ħamrija taʼ Iżrael! (Eżodu 23:​10, 11) Il-​kmandamenti dwar il-​qima falza pproteġew lin-​nies spiritwalment, billi kienu bħala tarka kontra l-​oppressjoni tad-​demonji, is-​sagrifiċċji tat-​tfal, u ħafna deni ieħor, biex ma nsemmux il-​prattika baxxa taʼ nies li jmilu quddiem idoli bla ħajja.​—Eżodu 20:​3-5; Salm 115:​4-8.

Mela żgur li l-​“kelma” taʼ Ġeħova ma kinitx “fiergħa” għal Iżrael; minflok, din kienet tfisser ħajja u żmien itwal għal dawk li jisimgħu minnha. (Dewteronomju 32:47) L-​istess nistgħu ngħidu llum għal dawk li josservaw il-​kliem mimli għerf taʼ Ġeħova, anki jekk il-​Kristjani m’għadhomx iktar taħt il-​patt tal-​Liġi. (Galatin 3:​24, 25; Ebrej 8:8) Fil-​fatt, minflok il-​kodiċi tal-​liġi, il-​Kristjani għandhom għadd kbir taʼ prinċipji Bibliċi biex jiggwidawhom u jipproteġuhom.

Poplu Protett minn Prinċipji

Il-​Liġijiet jistgħu japplikaw għal affarijiet speċifiċi biss u jistgħu jkunu temporanji. Madankollu, il-​prinċipji Bibliċi, billi huma veritajiet fundamentali, normalment ikunu japplikaw għal iktar minn ħaġa waħda u jkunu permanenti. Ikkunsidra, per eżempju, il-​prinċipju mistqarr f’Ġakbu 3:​17, fejn f’parti minnu jgħid: “L-​għerf li ġej minn fuq hu l-​ewwelnett safi, imbagħad iġib il-​paċi.” Din il-​verità fundamentali kif tistaʼ sservi bħala protezzjoni għan-​nies t’Alla llum?

Meta xi ħadd ikun safi jfisser li jkun nadif moralment. Għaldaqstant, dawk li jgħożżu s-​safa jistinkaw biex jevitaw mhux biss l-​immoralità imma wkoll l-​affarijiet li jistgħu jwasslu għaliha, fosthom il-​fantasiji dwar affarijiet sesswali u l-​pornografija. (Mattew 5:​28) Bl-​istess mod, koppji fl-​għerusija li ħadu bis-​serjetà l-​kliem taʼ Ġakbu 3:17 jevitaw intimità li twassal għal nuqqas taʼ kontroll fuqhom infushom. Bħala nies taʼ prinċipju, huma ma jitbegħdux mis-​safa billi forsi jaħsbu li sakemm ma jiksrux il-​liġi kelma b’kelma, Ġeħova xorta se japprova l-​imġiba tagħhom. Huma jafu li Ġeħova jara l-​qalb u jimxi skond dak li jkun hemm fiha. (1 Samwel 16:7; 2 Kronaki 16:9) Uħud bħal dawn jipproteġu lil ġisimhom minn ħafna mard trasmess sesswalment li huwa komuni ħafna llum kif ukoll jipproteġu l-​benesseri mentali u emozzjonali tagħhom.

Ġakbu 3:17 jgħid ukoll li l-​għerf divin “iġib il-​paċi.” Bħalma nafu, Satana jipprova jifridna minn Ġeħova billi jiżragħlna f’qalbna spirtu taʼ vjolenza, kemm jekk b’letteratura dubjuża, films, mużika, u logħob tal-​kompjuter​—li xi ftit minnu jinkuraġġixxi lil dak li jkun qed jilgħab biex iwettaq brutalità u qtil li lanqas biss timmaġinahom! (Salm 11:5) Nistgħu nindunaw b’mod ċar kemm Satana qed jirnexxi meta naraw il-​mewġa li dejjem tikber taʼ kriminalità vjolenti. Rigward kriminalità bħal din, il-​gazzetta Awstraljana The Sydney Morning Herald xi snin ilu kwotat lil Robert Ressler, l-​individwu li fforma t-​terminu “serial killer,” li jirreferi għal xi ħadd li jagħmel serje taʼ delitti. Ressler qal li l-​qattiela li intervista fis-​snin 70 kienu stimulati minn materjal pornografiku li ‘ma kien xejn ħdejn il-​materjal pornografiku taʼ llum.’ Għalhekk, Ressler esprima “ħarsa miżerabbli għall-​futur​—seklu ġdid fejn dawk li joqtlu ħafna nies se jiżdiedu.”

Fil-fatt, ftit xhur biss wara dan ir-​rapport fl-​aħbarijiet, raġel spara fuq it-​tfal f’kindergarten ġo Dunblane, fl-​Iskozja, u qatel 16 minnhom kif ukoll lill-​għalliema tagħhom, u wara qatel lilu nnifsu. Ix-​xahar taʼ wara raġel mhux f’sensih ieħor immassakra 32 ruħ ġewwa l-​belt kwieta taʼ Port Arthur, fit-​Tasmanja, l-​Awstralja. Fi snin reċenti, l-​għadd taʼ massakri fl-​iskejjel waħħxu lill-​Istati Uniti u dan ġagħal lill-​Amerikani jistaqsu, Għala? F’Ġunju tas-​sena 2001, il-​Ġappun issemma maʼ kullimkien minħabba raġel miġnun li daħal fi skola u b’sikkina qatel tmint itfal taʼ madwar sebaʼ u tmien snin u darab lil 15-il ruħ oħra. Sabiex inkunu ċari, ir-​raġunijiet għal ħruxijiet bħal dawn huma kumplessi, imma l-​vjolenza fuq il-​mezzi tax-​xandir dejjem qed tikkontribwixxi iktar għal dan il-​fattur. “Jekk reklam taʼ 60 sekonda kapaċi jgħolli l-​bejgħ m’għola s-​sema,” kiteb l-​Awstraljan Phillip Adams, kittieb fil-​ġurnali, “tiġix tgħidli li film taʼ sagħtejn, li jiswa miljuni kbar taʼ liri ma jbiddilx l-​attitudnijiet tan-​nies.” Taʼ min jinnota li fid-​dar tar-​raġel li beda jispara f’Port Arthur, il-​pulizija kkonfiskaw 2,000 vidjo vjolenti u pornografiku.

Dawk li jżommu sod maʼ prinċipji Bibliċi jipproteġu lil moħħhom u lil qalbhom minn kull forma taʼ divertiment li jistaʼ jrabbi kilba għall-​vjolenza. Għalhekk, “l-​ispirtu tad-​dinja” ma jsibx post fil-​ħsibijiet u x-​xewqat tagħhom. Minflok, huma ‘mgħallmin mill-​ispirtu [t’Alla],’ u jagħmlu ħilithom biex jikkultivaw imħabba għall-​frott tiegħu, li jinkludi l-​paċi. (1 Korintin 2:​12, 13; Galatin 5:​22, 23) Dan jagħmluh permezz taʼ studju regulari tal-​Bibbja, talb, u meditazzjoni li tibni. Huma jevitaw ukoll li jissieħbu maʼ nies li għandhom xejra vjolenti, imma minflok jagħżlu li jissieħbu maʼ dawk illi bħalhom jixxennqu għad-​dinja ġdida mimlija paċi taʼ Ġeħova. (Salm 1:​1-3; Proverbji 16:29) Tabilħaqq, kemm fih protezzjoni l-​għerf divin!

Ħalli l-​“Kelma” taʼ Ġeħova Tipproteġilek Qalbek

Meta ġie ttantat fix-​xagħri, Ġesù ta prova taʼ kemm Satana kien qarrieq billi kkwotalu b’mod preċiż mill-​Kelma t’Alla. (Luqa 4:​1-13) Madankollu, hu ma qagħadx jagħmel dan max-​Xitan biex juri min minnhom kien l-​iktar għaref. Minħabba li uża l-​Iskrittura bħala d-​difiża tiegħu, Ġesù tkellem minn qalbu u huwa minħabba f’hekk li l-​istrateġija tax-​Xitan, li tant ħadmet tajjeb fl-​Għeden, ma rnexxietx maʼ Ġesù. Bl-​istess mod, it-​tnassis taʼ Satana m’huwiex se jirnexxi magħna jekk aħna nimlew qalbna bil-​kelma taʼ Ġeħova. Xejn ma jistaʼ jkun iktar importanti minn dan, “għax minnha [mill-qalb] ġejja l-​ħajja.”​—Proverbji 4:23.

Barra minn hekk, aħna rridu nkomplu nipproteġu lil qalbna, u ma nieqfu qatt. Satana ma waqafx iġarrab lil Ġesù għalkemm fix-​xagħri ma rnexxilux iwaqqgħu. (Luqa 4:​13) Hu se jkompli jippersisti magħna wkoll, billi jipprova diversi strateġiji biex ikissrilna l-​integrità tagħna. (Rivelazzjoni 12:17) Għalhekk, ejjew nimitaw lil Ġesù billi nikkultivaw imħabba profonda għall-​Kelma t’Alla, u fl-​istess ħin nitolbu bla waqfien għall-​ispirtu qaddis u l-​għerf. (1 Tessalonikin 5:17; Ebrej 5:7) Min-​naħa tiegħu, Ġeħova jwiegħed li dawk kollha li jistkennu fih ma se jġarrbu ebda ħsara spiritwali.​—Salm 91:​1-10; Proverbji 1:33.

Il-​Kelma t’Alla Tipproteġi lill-​Kongregazzjoni

Satana ma jistax iżomm lill-​“folla kbira” mbassra milli tgħaddi ħajja mit-​tribulazzjoni l-​kbira. (Rivelazzjoni 7:​9, 14) Madankollu, bla mistrieħ hu xorta jipprova jikkorrompi lill-​Kristjani sabiex għall-​inqas xi ftit individwi jitilfu l-​favur taʼ Ġeħova. Din l-​istrateġija ħadmet f’Iżrael tal-​qedem u wasslet għall-​mewt taʼ 24,000 ruħ hekk kif kienu fuq l-​għatba taʼ l-​Art Imwiegħda. (Numri 25:​1-9) M’għandniex xi ngħidu, Kristjani li jiżbaljaw u li juru ndiema sinċiera jirċievu għajnuna bi mħabba sabiex jerġgħu jiksbu lura l-​ispiritwalità. Imma dawk li jidinbu u ma jindmux, bħal Żimri tal-​qedem, jipperikolaw il-​benesseri morali u spiritwali taʼ oħrajn. (Numri 25:14) Bħal suldati ġol-​falanġi li jarmu t-​tarki tagħhom, huma jesponu għall-​ħsara mhux biss lilhom infushom, imma lil sħabhom ukoll.

Għalhekk, il-​Bibbja tikkmanda: “Tibqgħux tagħmluha maʼ min jissejjaħ ħu iżda jkun żieni jew rgħib jew idolatra jew żeblieħi jew sakranazz jew imbroljun; lanqas biss għandkom tieklu maʼ bniedem bħal dan. . . . Neħħu lill-​bniedem mill-​agħar minn fostkom.” (1 Korintin 5:​11, 13) Ma taqbilx int li dan il-​‘kliem’ jgħin sabiex tiġi protetta s-​safa morali u spiritwali tal-​kongregazzjoni Kristjana?

B’kuntrast kbir, ħafna knejjes tal-​Kristjaneżmu kif ukoll l-​apostati jqisu bħala antikwati lil dawk il-​partijiet tal-​Bibbja li jikkontradixxu l-​ħarsiet moderni u liberali dwar il-​moralità. Minħabba dan, huma jiskużaw kull forma taʼ dnub gravi, anki fost il-​kleru. (2 Timotju 4:​3, 4) Innota, madankollu, li Proverbji 30:​5, li jirreferi wkoll għall-​“kelma” taʼ Ġeħova bħala tarka, jiġi segwit bi kmand fil-​vers 6: “Iżżid xejn maʼ kliemu [kliem Alla], għax hu jċanfrek u jgiddbek.” Iva, dawk li jqarrqu bil-​mod kif jużaw il-​Bibbja huma tassew giddieba spiritwali​—l-​iktar giddibin li jistħoqqilhom ċanfir! (Mattew 15:​6-9) Għalhekk, ejjew tassew inkunu grati li nagħmlu parti minn organizzazzjoni li tirrispetta profondament il-​Kelma t’Alla.

Protetti minn “Riħa Tfuħ”

Minħabba li l-​poplu t’Alla jżomm sod mal-​Bibbja u jaqsam m’oħrajn il-​messaġġ taʼ faraġ li fiha, iferrex “riħa tfuħ” b’ħajja li tagħti pjaċir lil Ġeħova. Imma għal dawk in-​nies li huma ħżiena, dawn qed iferrxulhom “fwieħa [li] twassalhom għall-​mewt,” skond it-​traduzzjoni taʼ l-​Għaqda Biblika Maltija. Iva, is-​sistema dinjija taʼ Satana tant ħawdet is-​sens tax-​xamm tan-​nies ħżiena li dawn ma jħossuhomx komdi jew saħansitra jħossuhom daqslikieku għedewwa fil-​preżenza taʼ dawk li qed ixerrdu r-​“riħa tfuħ taʼ Kristu.” Min-​naħa l-​oħra, dawk li qed ixerrdu l-​aħbar tajba tas-​Saltna biż-​żelu jsiru “riħa tfuħ taʼ Kristu fost dawk li qed jiġu salvati.” (2 Korintin 2:​14-16) Nies taʼ qalb onesta bħal dawn spiss iħossuhom diżgustati bl-​ipokrisija u l-​gideb reliġjuż li huma karatteristiki tar-​reliġjon falza. Għalhekk, meta niftħu l-​Kelma t’Alla u naqsmu magħhom il-​messaġġ tas-​Saltna, huma jħossuhom miġbudin lejn Kristu u jkunu jridu jitgħallmu iktar.​—Ġwanni 6:​44.

Mela tħossokx skuraġġit meta xi wħud jwieġbu b’mod negattiv għall-​messaġġ tas-​Saltna. Minflok, ħares lejn ir-​“riħa tfuħ taʼ Kristu” bħala forma taʼ protezzjoni spiritwali li tbiegħed lil ħafna individwi li jistgħu jkunu perikolużi mill-​qasam spiritwali fejn jgħix il-​poplu t’Alla, filwaqt li tiġbed lil dawk taʼ qalb tajba.​—Isaija 35:​8, 9.

Minħabba li s-​suldati Griegi f’Maratona mmarċjaw marsusin flimkien u żammew it-​tarki tagħhom b’saħħithom kollha, huma rebħu minkejja li ffaċċjaw opponenti kbar. Bl-​istess mod, ix-​Xhieda leali taʼ Ġeħova jaċċertaw ruħhom minn vittorja kompleta fil-​ġlieda spiritwali tagħhom, għaliex il-​vittorja hija l-​“wirt” tagħhom. (Isaija 54:​17, Saydon) Għalhekk, ħalli kull wieħed minna jibqaʼ jsib kenn f’Ġeħova billi jżomm “qabda soda mal-​kelma tal-​ħajja.”—Filippin 2:16.

[Stampi f’paġna 31]

‘L-​għerf li ġej minn fuq hu safi, imbagħad iġib il-​paċi’