Doni Speċjali li Jagħmluna Uniċi
‘Ix-xjenzat jistudja n-natura għax jieħu gost biha, u jieħu gost biha għax hija sabiħa.’—JULES-HENRI POINCARÉ, XJENZAT U MATEMATIKU FRANĊIŻ (1854-1912).
POINCARÉ ammira ħafna s-sbuħija tad-dinja naturali, partikolarment “is-sbuħija iktar profonda” taʼ l-armonija u l-ordni li tattira ħafna lill-moħħ xjentifiku. Madankollu, wieħed m’għandux għalfejn ikun xjenzat biex japprezza s-sbuħija u l-ordni taʼ madwarna. Xi 3,000 sena ilu, is-salmista David kien imqanqal bil-kbir mid-disinn li jidher fil-ħolqien—speċjalment id-disinn tal-ġisem tal-bniedem. Għalhekk, hu talab: “Nroddlok ħajr, għax b’mod taʼ l-għaġeb għamiltni: taʼ l-għaġeb huma l-għemejjel tiegħek. U ’l ruħi inti tafha tajjeb.”—Salm 139:14.
Il-bnedmin biss għandhom sentimenti taʼ stagħġib u rispett kbir bħal dan, u saħansitra l-iktar annimal intelliġenti m’huwiex kapaċi jesprimihom. Madankollu, l-interess tagħna fid-dinja naturali jmur iktar fil-fond. Nies intelliġenti taʼ kull età staqsew: Minfejn ġew dawn il-ħlejjaq ħajjin b’disinn tant taʼ l-għaġeb? Tabilħaqq, għalfejn jeżistu l-ħlejjaq ħajjin fuq kollox? U x’inhu l-irwol tagħna f’dan l-arranġament? Ix-xjenza u r-raġunar li jġagħlek teżamina ħsibijietek ma jistgħux iwieġbu dawn il-mistoqsijiet. Imma l-Bibbja, li hija ispirata minn Alla, tagħti tweġibiet li verament jissodisfawk.—2 Pietru 1:20, 21.
Dan il-ktieb antik u mqaddes jispjega li l-karatteristiċi uniċi tagħna l-bnedmin huma r-riżultat taʼ li aħna ġejna maħluqin “fuq xbihat Alla”—jiġifieri li aħna kapaċi nirriflettu (għalkemm mhux eżatt) il-karatteristiċi fil-personalità tal-Ħallieq tagħna. (Ġenesi 1:27) Għalhekk, minkejja li m’għandniex il-vista t’ajkla, nistgħu nuru għerf billi naraw bil-quddiem u neżerċitaw l-għaqal. Is-smigħ tagħna m’għandux x’jaqsam ħdejn dak taʼ farfett il-lejl, imma aħna nitgħaxxqu b’konversazzjonijiet, mużika, u ħsejjes sbieħ tan-natura. U filwaqt illi m’għandniex kumpass imsawwar ġo fina, billi nduru lejn il-Kelma t’Alla, il-Bibbja Mqaddsa, nistgħu niksbu l-aħjar gwida għall-ħajja.—Proverbji 3:5, 6.
Il-fatt li ġejna maħluqin fuq ix-xbieha t’Alla wkoll jispjega l-fatt għala aħna biss għandna bżonn spiritwali. ‘‘Il-bniedem mhux bil-ħobż biss jgħix,” qal Ġesù, “iżda b’kull kelma li toħroġ minn fomm Alla.” (Mattew 4:4) Toqgħod attent u tifhimhom stqarrijiet rifreskanti bħal dawn billi taqra l-Bibbja?
Meta niġu sostnuti mill-Kelma t’Alla, l-ispiritwalità tagħna tistaʼ tkabbrilna l-abbiltà li nifhmu iktar mil-limiti li jippermettulna s-sensi fiżiċi tagħna. Dan kif? Billi nibnu l-fidi tagħna. Fidi ġenwina bbażata fuq il-Bibbja tgħinna ‘naraw’ lil Alla li ma jidhirx—bħalma għamel Mosè—u wkoll biex nagħrfu l-iskop Tiegħu għall-futur.—Lhud 11:1, 27.
Futur Glorjuż għal Dawk li ‘Jaraw’ lil Alla
Il-Bibbja tgħallem li l-Ħallieq, Alla Jehovah, iħobb l-art b’kull ħlejqa li fiha, speċjalment nies li għandhom il-biżaʼ t’Alla. Għalhekk, hu jwiegħed li se jġib fi tmiem lill-ħżiena kollha, inkluż lil dawk li b’mod rgħib qegħdin “jeqirdu d-dinja.” (Apokalissi 11:18; Salm 37:10, 11; 2 Tessalonikin 1:8) Wara, hu se jagħti ħajja eterna lil dawk li jħobbuh u jobduh. Iktar minn hekk, huma se jgħinu biex jibdlu l-pjaneta kollha f’ġenna mfawra bil-ħajja. Xi prospett meraviljuż!—Luqa 23:43.
Immaġina kemm se tkun tistaʼ tagħmel u tiskopri affarijiet meta l-ħajja u s-saħħa tajba ma jkollhomx limitu! “Fin-natura,” kiteb wieħed xjenzat, “dejjem se nibqgħu nsibu xi ħaġa ġdida, rikka, u sabiħa.” Il-Bibbja hekk tpoġġiha: “[Alla] kollox għamel tajjeb f’waqtu; nissel ukoll sens taʼ l-imgħoddi u l-ġejjieni f’moħħ il-bniedem, iżda bla ma dawn jirnexxilhom jikxfu x’jagħmel Alla mill-bidu sat-tmiem.”—Koħèlet 3:11.
Kif tistaʼ tkun parti mill-Ġenna taʼ l-art deskritta fil-Bibbja? Billi titgħallem dwar l-iskop t’Alla issa u billi tieħu azzjoni fuq dak li titgħallem. “Din hi l-ħajja taʼ dejjem,” Ġesù qal, “li jagħrfu lilek, Alla waħdek veru, u lil Ġesù Kristu, li inti bgħatt.”—Ġwann 17:3.
[Stampa f’paġna 10]
Uża s-sensi tiegħek biex tibni apprezzament għall-Ħallieq
[Stampa f’paġna 11]
Il-qari tal-Bibbja huwa l-aħjar mod kif issir taf lill-Ħallieq tiegħek