Jehovah​—Alla li Jgħallem

“Huma lkoll se jkunu mgħallmin minn Jehovah.”—ĠWANN 6:45.

1. Ġesù x’qiegħed jagħmel issa f’Kapernahum?

ĠESÙ KRISTU kien riċentement wettaq mirakli u issa jidher jgħallem f’sinagoga f’Kapernahum, ħdejn il-​Baħar tal-​Galilija. (Ġwann 6:1-21, 59) Ħafna jesprimu nuqqas taʼ twemmin meta jgħid: “Jien inżilt mis-​sema.” Huma jgergru: “M’huwiex dan Ġesù bin Ġużeppi, li missieru u ommu nafuhom aħna? Kif inhu li issa jgħid, ‘Jien inżilt mis-​semaʼ?” (Ġwann 6:38, 42) Billi jċanfarhom, Ġesù jipproklama: “Ebda bniedem ma jistaʼ jiġi għandi jekk il-​Missier, li bagħatni, ma jiġbdux; u jien se nirxoxtah fl-​aħħar jum.”—Ġwann 6:44.

2. Liema bażi hemm biex nemmnu l-​wegħda taʼ Ġesù dwar l-​irxoxt?

² X’wegħda meraviljuża​—li tiġi rxoxtat fl-​aħħar jum, meta taħkem is-​Saltna t’Alla! Nistgħu nemmnu din il-​wegħda għaliex hija appoġġjata mill-​Missier, Alla Jehovah. (Ġob 14:13-15; Isaija 26:19) Tabilħaqq, Jehovah, li jgħallem li l-​mejtin se jqumu, hu “l-​aqwa għalliem minnhom kollha.” (Ġob 36:22, Today’s English Version) Billi jiffoka fuq it-​tagħlim tal-​Missier, Ġesù mbagħad jgħid: “Huwa miktub fil-​Profeti, ‘U huma lkoll se jkunu mgħallmin minn Jehovah.’”—Ġwann 6:45.

3. Liema mistoqsijiet se nikkunsidraw?

³ Ċertament, ikun privileġġ li tkun fost dawk li dwarhom il-​profeta Isaija kiteb: “Uliedek subjien kollha se jkunu persuni mgħallmin minn Jehovah.” (Isaija 54:13) Nistgħu aħna nkunu? Min huma dawk li kienu bħala wlied subjien għalih u rċevew it-​tagħlim tiegħu? X’inhu tagħlim vitali taʼ Jehovah li għandna nkunu nafu u naġixxu fuqu biex nirċievu l-​barka tiegħu? Jehovah kif għallem fil-​passat, u għadu hu jgħallem bl-​istess mod illum? Dawn huma mistoqsijiet li se nikkunsidraw.

Missier, Għalliem, Raġel Miżżewweġ

4. Min kienu l-​ewwel ulied subjien taʼ Jehovah li rċevew it-​tagħlim tiegħu?

⁴ Jehovah sar għall-​ewwel darba kemm Missier kif ukoll Għalliem meta ħalaq lill-​Iben uniġenitu tiegħu, Ġesù qabel ma sar bniedem. Dan il-​wieħed hu msejjaħ “il-​Kelma” għaliex hu l-​Kelliemi Ewlieni taʼ Jehovah. (Ġwann 1:1, 14; 3:16) Il-​Kelma qeda ‘ħdejn [il-Missier] bħala mgħallem,’ u tgħallem sewwa mit-​tagħlim taʼ Missieru. (Proverbji 8:22, 30) Fil-​fatt, sar l-​Aġent, jew il-​mezz, li permezz tiegħu l-​Missier ħalaq l-​affarijiet l-​oħrajn kollha, inklużi “wlied Alla” spirti. Kemm żgur li thennew li jkunu mgħallmin minn Alla! (Ġob 1:6; 2:1; 38:7; Kolossin 1:15-17) Iktar tard, l-​ewwel uman, Adam, ġie maħluq. Hu wkoll kien “bin Alla,” u l-​Bibbja tirrivela li Jehovah tah struzzjoni.—Luqa 3:38; Ġenesi 2:7, 16, 17.

5. Liema privileġġ prezzjuż intilef minn Adam, u madankollu Jehovah lil min għallem, u għala?

⁵ B’sogħba, Adam, bid-​diżubbidjenza volontarja tiegħu, tilef il-​privileġġ li jibqaʼ jkun bin Alla. Id-​dixxendenti tiegħu, għalhekk, ma setgħux ikollhom bi dritt ir-​relazzjoni li jkunu wlied Alla sempliċement fuq il-​bażi taʼ twelid. Madankollu, Jehovah għallem lil umani imperfetti li fittxewh għall-​gwida. Noè, per eżempju, ta prova li kien “raġel twajjeb” li “mexa maʼ dak Alla veru,” u għalhekk Jehovah struwixxa lil Noè. (Ġenesi 6:9, 6:13–7:5) Bl-​ubbidjenza tiegħu, Abraham ta prova tiegħu nnifsu li kien “il-​ħabib taʼ Jehovah,” u għalhekk hu wkoll kien mgħallem minn Jehovah.—Ġakbu 2:23; Ġenesi 12:1-4; 15:1-8; 22:1, 2.

6. Jehovah lil min kien sar iqis bħala ‘ibnu,’ u liema xorta t’għalliem kien għalihom?

⁶ Ħafna iżjed wara, fi żmien Mosè, Jehovah daħal f’relazzjoni taʼ patt mal-​ġens taʼ Iżrael. Bħala riżultat, dak il-​ġens sar il-​poplu magħżul tiegħu u kien meqjus bħala ‘ibnu.’ Alla qal: “Iżrael hu ibni.” (Eżodu 4:22, 23; 19:3-6; Dewteronomju 14:1, 2) Fuq il-​bażi taʼ dik ir-​relazzjoni taʼ patt, l-​Iżraeliti setgħu jgħidu, kif iddokumentat mill-​profeta Isaija: “Int, O Jehovah, int Missierna.” (Isaija 63:16) Jehovah assuma r-​responsabbiltà tiegħu taʼ missier u b’imħabba għallem lit-​tfal tiegħu, Iżrael. (Salm 71:17; Isaija 48:17, 18) Fil-​fatt, meta ma baqgħux leali, appellalhom bil-​ħniena: “Irritornaw, O intom ulied xellerati.”—Ġeremija 3:14.

7. Iżrael x’relazzjoni kellu maʼ Jehovah?

⁷ Bħala konsegwenza tar-​relazzjoni taʼ patt maʼ Iżrael, Jehovah b’mod figurattiv sar ukoll ir-​Raġel Miżżewweġ tal-​ġens, u dan sar il-​mara figurattiva tiegħu. Dwarha l-​profeta Isaija kiteb: “Il-​Grandjuż li Għamlek hu sidek bħala żewġek, billi Jehovah taʼ l-​armati huwa ismu.” (Isaija 54:5; Ġeremija 31:32) Għalkemm Jehovah b’mod onorabbli wettaq l-​irwol tiegħu bħala Raġel Miżżewweġ, il-​ġens taʼ Iżrael sar mara miżżewġa mhix leali. “Bħalma mara miżżewġa telqet bi tradiment lis-​sieħeb tagħha,” Jehovah qal, “hekk int, O dar taʼ Iżrael, ittrattajt bi tradiment miegħi.” (Ġeremija 3:20) Jehovah baqaʼ jappella lill-​ulied subjien taʼ martu li ma baqgħetx leali; hu baqaʼ jkun “l-​Għalliem Grandjuż” tagħhom.—Isaija 30:20; 2 Kronaki 36:15.

8. Għalkemm Iżrael bħala ġens ġie miċħud minn Jehovah, liema mara miżżewġa figurattiva antitipika għad għandu?

⁸ Meta d-​dar taʼ Iżrael ċaħdet u qatlet lil Ibnu, Ġesù Kristu, Alla finalment ċaħad lilha. Mela dak il-​ġens Lhudi ma kienx iktar mara miżżewġa figurattiva għalih, lanqas ma kien hu l-​Missier u l-​Għalliem taʼ l-​ulied subjien żvijati tagħha. (Mattew 23:37, 38) Madankollu, Iżrael kienet biss mara miżżewġa tipika, jew simbolika. L-​appostlu Pawlu kkwota lil Isaija 54:1, li jitkellem dwar “mara ħawlija” li hi differenti u distinta mill-​“mara b’raġel bħala sidha,” il-​ġens taʼ Iżrael naturali. Pawlu jirrivela li Kristjani midlukin huma tfal tal-​“mara ħawlija,” li hu jsejħilha “Ġerusalemm taʼ fuq.” Din il-​mara figurattiva antitipika tikkonsisti fl-​organizzazzjoni tas-​sema t’Alla taʼ ħlejjaq spirti.—Galatin 4:26, 27.

9. (a) Ġesù għal min kien qiegħed jirreferi meta tkellem dwar ‘uliedek subjien jiġu mgħallmin minn Jehovah’? (b) In-​nies fuq liema bażi jsiru wlied spiritwali t’Alla?

⁹ B’hekk, fis-​sinagoga taʼ Kapernahum, meta Ġesù kkwota l-​profezija taʼ Isaija: “Uliedek subjien kollha se jkunu persuni mgħallmin minn Jehovah,” kien qiegħed jitkellem dwar dawk li kellhom ikunu ‘wlied’ “Ġerusalemm taʼ fuq,” l-​organizzazzjoni bħal mara miżżewġa tas-​sema t’Alla. Billi jaċċettaw it-​tagħlim tar-​rappreżentant t’Alla mis-​sema, Ġesù Kristu, dawk is-​semmiegħa Lhud setgħu jsiru tfal tal-​mara tas-​sema t’Alla li qabel kienet ħawlija u jifformaw “ġens qaddis,” l-​“Iżrael t’Alla” spiritwali. (1 Pietru 2:9, 10; Galatin 6:16) Billi ddeskriva l-​opportunità grandjuża li Ġesù għamel disponibbli biex isiru wlied subjien spiritwali t’Alla, l-​appostlu Ġwanni kiteb: “Hu ġie f’daru stess, imma niesu stess ma daħħluhx ġewwa. Madankollu, dawk kollha li laqgħuh, lilhom ta l-​awtorità li jsiru t-​tfal t’Alla, għaliex kienu qegħdin jeżerċitaw fidi f’ismu.”—Ġwann 1:11, 12.

Tagħlim Vitali Taʼ Jehovah

10. Immedjatament wara l-​irvell f’Għeden, Jehovah x’għallem rigward iż-​“żerriegħa,” u dan iż-​Żerriegħa min ta prova li kien?

¹⁰ Jehovah, bħala Missier taʼ mħabba, jinforma lit-​tfal tiegħu dwar l-​iskopijiet tiegħu. B’hekk, meta anġlu ribelluż ħajjar lill-​ewwel koppja umana biex ma jobdux, Jehovah immedjatament informahom dwar x’kellu jagħmel biex iwettaq l-​iskop tiegħu li jagħmel l-​art ġenna. Qal li kellu jqiegħed mibgħeda bejn “is-​serpent oriġinali,” li huwa Satana x-​Xitan, “u l-​mara.” Imbagħad spjega li ż-​“żerriegħa” tal-​mara kellu jbenġel lil Satana b’mod fatali, “fir-​ras.” (Ġenesi 3:1-6, 15; Rivelazzjoni 12:9; 20:9, 10) Bħalma nnotajna, il-​mara​—iktar tard identifikata bħala “Ġerusalemm taʼ fuq”—​hija l-​organizzazzjoni tas-​sema t’Alla taʼ ħlejjaq spirti. Imma min hu ż-​“żerriegħa” tagħha? Hu l-​Iben t’Alla, Ġesù Kristu, il-​wieħed mibgħut mis-​sema u l-​wieħed li eventwalment se jeqred lil Satana.—Galatin 4:4; Ebrej 2:14; 1 Ġwann 3:8.

11, 12. Jehovah kif espanda fuq it-​tagħlim vitali tiegħu rigward iż-​“żerriegħa”?

¹¹ Jehovah espanda fuq dan it-​tagħlim vitali rigward iż-​“żerriegħa” meta wiegħed lil Abraham: “Jien żgur li se nimmultiplika liż-​żerriegħa tiegħek bħall-​kwiekeb tas-​smewwiet . . . U permezz taż-​żerriegħa tiegħek il-​ġnus kollha taʼ l-​art ċertament li se jbierku lilhom infushom.” (Ġenesi 22:17, 18) Jehovah uża lill-​appostlu Pawlu biex jispjega li Ġesù Kristu hu l-​imwiegħed Żerriegħa t’Abraham imma li oħrajn ukoll kellhom isiru parti miż-​“żerriegħa.” “Jekk intom tappartjenu lil Kristu,” kiteb Pawlu, “intom tassew iż-​żerriegħa t’Abraham, werrieta b’referenza għal wegħda.”—Galatin 3:16, 29.

¹² Jehovah irrivela wkoll li Kristu, iż-​Żerriegħa, kellu jiġi mil-​linja rjali taʼ Ġuda u li lilu “se tappartjeni l-​ubbidjenza tal-​popli.” (Ġenesi 49:10) Rigward is-​Sultan David tat-​tribù taʼ Ġuda, Jehovah wiegħed: “Jien ċertament li se nistabbilixxi liż-​żerriegħa tiegħu għal dejjem u t-​tron tiegħu bħall-​jiem tas-​sema. Iż-​żerriegħa tiegħu nfisha se tagħti prova li hija saħansitra għal żmien indefinit, u t-​tron tiegħu bħax-​xemx quddiemi.” (Salm 89:3, 4, 29, 36) Meta l-​anġlu Gabrijel ħabbar it-​twelid taʼ Ġesù, spjega li t-​tifel kien il-​Ħakkiem maħtur t’Alla, iż-​Żerriegħa taʼ David. “Dan il-​wieħed se jkun kbir u se jkun imsejjaħ Bin l-​Iktar Għoli,” qal Gabrijel, “u Alla Jehovah se jagħtih it-​tron taʼ David missieru, . . . u ma se jkun hemm ebda tmiem għas-​saltna tiegħu.”—Luqa 1:32, 33; Isaija 9:6, 7; Danjel 7:13, 14.

13. Biex nirċievu l-​barka taʼ Jehovah, kif irridu nwieġbu għat-​tagħlim tiegħu?

¹³ Sabiex nirċievu l-​barka taʼ Jehovah, irridu nkunu nafu dan it-​tagħlim vitali dwar is-​Saltna t’Alla u naġixxu fuqu. Irridu nemmnu li Ġesù niżel mis-​sema, li hu s-​Sultan maħtur t’Alla​—iż-​Żerriegħa rjali li se jindokra r-​restawrazzjoni tal-​Ġenna fuq l-​art—​u li se jirxoxta lill-​mejtin. (Luqa 23:42, 43; Ġwann 18:33-37) F’Kapernahum meta Ġesù tkellem dwar li jirxoxta l-​mejtin, kellu jkun evidenti għal-​Lhud li hu tkellem il-​verità. Iva, ftit ġimgħat biss qabel, wisq probabbli hemmhekk stess f’Kapernahum, kien irxoxta lit-​tifla taʼ 12-il sena taʼ wieħed uffiċjal li jippresiedi tas-​sinagoga! (Luqa 8:49-56) Ċertament aħna wkoll għandna kull raġuni biex nemmnu u naġixxu f’armonija mat-​tagħlim taʼ Jehovah li jispira t-​tama rigward is-​Saltna tiegħu!

14, 15. (a) Kemm hija importanti s-​Saltna taʼ Jehovah għal Ġesù? (b) X’jeħtieġ li nifhmu u nkunu kapaċi nispjegaw dwar is-​Saltna taʼ Jehovah?

¹⁴ Ġesù ddedika l-​ħajja tiegħu fuq l-​art biex jgħallem dwar is-​Saltna t’Alla. Għamilha t-​tema tal-​ministeru tiegħu, u saħansitra struwixxa lis-​segwaċi tiegħu biex jitolbu għaliha. (Mattew 6:9, 10; Luqa 4:43) Lhud naturali kienu intitolati biex ikunu “wlied is-​saltna,” imma minħabba nuqqas taʼ fidi, il-​biċċa l-​kbira minnhom tilfu dak il-​privileġġ. (Mattew 8:12; 21:43) Ġesù rrivela li “merħla ċkejkna” biss jirċievu l-​privileġġ li jsiru “wlied is-​saltna.” Dawn l-​‘ulied subjien’ isiru “werrieta bi sħab maʼ Kristu” fis-​Saltna tiegħu tas-​sema.—Luqa 12:32; Mattew 13:38; Rumani 8:14-17; Ġakbu 2:5.

¹⁵ Kristu kemm se jieħu werrieta tas-​saltna fis-​sema biex jaħkmu miegħu għal fuq l-​art? 144,000 biss, skond il-​Bibbja. (Ġwann 14:2, 3; 2 Timotew 2:12; Rivelazzjoni 5:10; 14:1-3; 20:4) Imma Ġesù qal li kellu “ngħaġ oħrajn,” li se jkunu ċittadini fuq l-​art taʼ dik il-​ħakma tas-​Saltna. Dawn se jgawdu saħħa perfetta u paċi għal dejjem fuq art magħmula ġenna. (Ġwann 10:16; Salm 37:29; Rivelazzjoni 21:3, 4) Jeħtieġ li nifhmu u nkunu kapaċi nispjegaw it-​tagħlim taʼ Jehovah dwar is-​Saltna.

16. Liema tagħlim vitali taʼ Jehovah jeħtieġ li nitgħallmu u nipprattikaw?

¹⁶ L-​appostlu Pawlu identifika tagħlim vitali ieħor taʼ Jehovah. Qal: “Intom infuskom mgħallmin minn Alla biex tħobbu lil xulxin.” (1 Tessalonkin 4:9) Biex nogħġbu lil Jehovah, jeħtieġ li nuru mħabba bħal din. “Alla hu mħabba,” tgħid il-​Bibbja, u rridu nimitaw l-​eżempju tiegħu f’li nuru mħabba. (1 Ġwann 4:8; Efesin 5:1, 2) B’dispjaċir, il-​biċċa l-​kbira tan-​nies naqsu b’mod miżerabbli li jitgħallmu biex iħobbu lill-​bnedmin sħabhom bħalma jgħallimna Alla biex nagħmlu. Xi ngħidu dwarna? Weġibna aħna għal dan it-​tagħlim taʼ Jehovah?

17. L-​attitudni taʼ min għandna nimitaw?

¹⁷ Huwa vitali li naċċettaw it-​tagħlim kollu taʼ Jehovah. Jalla l-​attitudni tagħna tkun dik tas-​salmisti tal-​Bibbja li kitbu: “Ġegħilni nkun naf mogħdijietek stess, O Jehovah; għallimni l-​passaġġi tiegħek stess. Agħmilni nimxi fil-​verità tiegħek u għallimni.” “Għallimni r-​regolamenti tiegħek. Għallimni t-​tjubija, is-​sensibilità u l-​għarfien infushom . . . Għallimni d-​deċiżjonijiet ġudizzjarji tiegħek stess.” (Salm 25:4, 5; 119:12, 66, 108) Jekk is-​sentimenti tiegħek huma l-​istess bħal dawk tas-​salmisti, int tistaʼ tkun fost folla vasta li huma mgħallmin minn Jehovah.

Folla Kbira Taʼ Wħud Mgħallmin

18. Il-​profeta Isaija x’bassar li kellu jiġri fi żmienna?

¹⁸ Il-​profeta Isaija bassar x’kellu jiġri fi żmienna: “[I]rid iseħħ fil-​parti finali tal-​jiem li l-​muntanja tad-​dar taʼ Jehovah se tiġi stabbilita fis-​sod ’il fuq mill-​quċċata tal-​muntanji . . . U ħafna popli ċertament li se jmorru u jgħidu: ‘Ejjew u ħalli nitilgħu lejn il-​muntanja taʼ Jehovah, lejn id-​dar taʼ dak Alla taʼ Ġakobb; u hu se jistruwina dwar il-​mogħdijiet tiegħu.’” (Isaija 2:2, 3; Mikea 4:2) Min huma dawn il-​persuni mgħallmin minn Jehovah?

19. Min illum huma inklużi fost dawk mgħallmin minn Jehovah?

¹⁹ Dawn jinkludu lil oħrajn minbarra dawk li se jaħkmu fis-​sema maʼ Kristu. Bħalma ġie nnotat qabel, Ġesù qal li kellu “ngħaġ oħrajn”​—sudditi fuq l-​art tas-​Saltna—​minbarra l-​“merħla ċkejkna” taʼ werrieta tas-​Saltna. (Ġwann 10:16; Luqa 12:32) Il-​“folla kbira,” li jibqgħu ħajjin wara “t-​tribulazzjoni l-​kbira,” huma tal-​klassi tan-​ngħaġ oħrajn, u jgawdu waqfa approvata quddiem Jehovah fuq il-​bażi tal-​fidi tagħhom fid-​demm imxerred taʼ Ġesù. (Rivelazzjoni 7:9, 14) Avolja n-​ngħaġ oħrajn m’humiex inklużi direttament fost l-​‘ulied subjien’ imsemmijin f’Isaija 54:13, huma mberkin b’li jiġu mgħallmin minn Jehovah. Għaldaqstant, jindirizzaw b’mod xieraq lil Alla bħala “Missier” għaliex se jkun, fil-​fatt, in-​Nannu tagħhom permezz tal-​“Missier Etern,” Ġesù Kristu.—Mattew 6:9; Isaija 9:6.

Kif Jgħallem Jehovah

20. Jehovah b’liema modi jgħallem?

²⁰ Jehovah jgħallem b’ħafna modi. Per eżempju, jagħmel hekk permezz tax-​xogħlijiet tiegħu taʼ ħolqien, li jixhdu kemm dwar l-​eżistenza tiegħu kif ukoll dwar l-​għerf kbir tiegħu. (Ġob 12:7-9; Salm 19:1, 2; Rumani 1:20) Jerġaʼ, hu jgħallem permezz taʼ komunikazzjoni diretta, bħalma għamel meta struwixxa lil Ġesù qabel sar bniedem. B’mod simili, fi tliet okkażjonijiet iddokumentati, kellem dirett mis-​sema lil nies fuq l-​art.—Mattew 3:17; 17:5; Ġwann 12:28.

21. Jehovah liema anġlu uża b’mod partikulari bħala r-​rappreżentant tiegħu, imma kif nafu li oħrajn ukoll intużaw?

²¹ Jehovah juża wkoll rappreżentanti anġeliċi biex jgħallem, inkluż lill-​Ewwel Imwieled tiegħu, “il-​Kelma.” (Ġwann 1:1-3) Għalkemm Jehovah setaʼ tkellem direttament maʼ l-​iben uman perfett tiegħu, Adam, fil-​ġnien t’Għeden, x’aktarx li uża lil Ġesù qabel sar bniedem biex jitkellem għaliH. (Ġenesi 2:16, 17) Dan il-​wieħed probabbli kien “l-​anġlu taʼ dak Alla veru li kien miexi quddiem il-​kamp taʼ Iżrael” u li dwaru Jehovah ikkmanda: “Obdi lil leħnu.” (Eżodu 14:19; 23:20, 21) Bla dubju Ġesù qabel sar bniedem kien ukoll il-​“prinċep taʼ l-​armata taʼ Jehovah” li deher lil Ġożwè biex isaħħu. (Ġożwè 5:14, 15) Jehovah juża wkoll anġli oħrajn biex jgħaddi t-​tagħlim tiegħu, bħal dawk li uża biex jagħti l-​Liġi tiegħu lil Mosè.—Eżodu 20:1; Galatin 3:19; Ebrej 2:2, 3.

22. (a) Jehovah lil min uża fuq l-​art biex jgħallem? (b) Liema huwa l-​mezz primarju li bih Jehovah jistruwixxi lill-​bnedmin illum?

²² Jerġaʼ, Alla Jehovah juża rappreżentanti umani biex jgħallem. Il-​ġenituri f’Iżrael kellhom jgħallmu lit-​tfal tagħhom; profeti, qassisin, prinċpijiet, u Leviti għallmu l-​Liġi taʼ Jehovah lill-​ġens. (Dewteronomju 11:18-21; 1 Samwel 12:20-25; 2 Kronaki 17:7-9) Ġesù kien il-​Kelliem prinċipali t’Alla fuq l-​art. (Ebrej 1:1, 2) Ġesù taʼ spiss qal li dak li għallem kien preċiżament dak li kien tgħallem mingħand il-​Missier, u għalhekk is-​semmiegħa tiegħu kienu, fil-​fatt, qegħdin jiġu mgħallmin minn Jehovah. (Ġwann 7:16; 8:28; 12:49; 14:9, 10) Jehovah ġiegħel li kliemu jiġi ddokumentat, u fi żmienna jgħallem lill-​bnedmin primarjament permezz taʼ din l-​Iskrittura spirata.—Rumani 15:4; 2 Timotew 3:16.

23. Liema mistoqsijiet se jiġu kkunsidrati fl-​artiklu li jmiss?

²³ Aħna qegħdin ngħixu fi żminijiet importanti, ladarba l-​Iskrittura twiegħed li ‘fil-​parti finali tal-​jiem [li fihom qegħdin ngħixu] ħafna popli se jiġu struwiti dwar il-​mogħdijiet taʼ Jehovah.’ (Isaija 2:2, 3) Din l-​istruzzjoni kif tiġi pprovduta? X’irridu nagħmlu biex nibbenefikaw mill-​programm taʼ tagħlim grandjuż taʼ Jehovah, kif ukoll biex nieħdu sehem fih? Se nikkunsidraw mistoqsijiet bħal dawn fl-​artiklu li jmiss. (w95 8/1)

Kif Twieġeb Int?

◻ Jehovah kif sar Missier, Għalliem, u Raġel Miżżewweġ?

◻ Jehovah x’jgħallem rigward iż-​“żerriegħa”?

◻ Liema tagħlim vitali minn Alla rridu nosservaw?

◻ Jehovah kif jgħallem?

[Stampa f’paġna 23]

L-​irxoxtar taʼ bint Ġajru pprovda bażi biex nemmnu l-​wegħda taʼ Ġesù dwar l-​irxoxt