Minn Liema Mejda Qiegħed Tiekol?
“Ma tistgħux tkunu qegħdin tieħdu sehem mill-‘mejda taʼ Jehovah’ u mill-mejda tad-demonji.”—1 KORINTIN 10:21.
1. Liema mwejjed huma mifruxin quddiemna, u xi twissija jagħti l-appostlu Pawlu dwarhom?
DAWN il-kelmiet imnebbħin taʼ l-appostlu Pawlu juru li hemm żewġ imwejjed figurattivi mpoġġijin quddiem l-umanità. Kull mejda hija identifikata mix-xorta taʼ ikel simboliku mqiegħed fuqha, u lkoll kemm aħna qegħdin nieklu minn xi waħda jew oħra. Madankollu, jekk nixtiequ li nogħġbu lil Alla, ma nistgħux inkunu qegħdin nieklu mill-mejda tiegħu u fl-istess ħin qegħdin innaqqru mill-mejda tad-demonji. L-appostlu Pawlu wissa: “L-affarijiet li l-ġnus jissagrifikaw huma jissagrifikawhom lid-demonji, u mhux lil Alla; u ma rridkomx issiru sħab mad-demonji. Ma tistgħux tkunu qegħdin tixorbu mill-kies taʼ Jehovah u mill-kies tad-demonji; ma tistgħux tkunu qegħdin tieħdu sehem mill-‘mejda taʼ Jehovah’ u mill-mejda tad-demonji.”—1 Korintin 10:20, 21.
2. (a) Liema mejda taʼ Jehovah eżistiet fi żmien Iżrael tal-qedem, u min ħa sehem fis-sagrifiċċji komunjonali? (b) Xi jfisser li tieħu sehem mill-mejda taʼ Jehovah illum?
2 Il-kliem taʼ Pawlu jfakkarna fis-sagrifiċċji komunjonali li l-Iżraeliti tal-qedem offrew taħt il-Liġi taʼ Jehovah. L-artal t’Alla kien jissejjaħ mejda, u dak li jġib l-annimal biex ikun issagrifikat kien jintqal li kien ikollu komunjoni maʼ Jehovah u mal-qassisin. Kif? L-ewwel, Jehovah ħa sehem fis-sagrifiċċju għaliex id-demm kien imbexxex fuq l-artal tiegħu u x-xaħam kien ikkonsmat minn fjammi taʼ taħt l-artal. It-tieni, il-qassis ħa sehem f’li hu (u l-familja tiegħu) kielu s-sider u l-koxxa l-leminija mixwijin taʼ l-annimal issagrifikat. U t-tielet, dak li offra ħa sehem billi kiel il-kumplament. (Levitiku 7:11-36) Illum, li nieħdu sehem mill-mejda taʼ Jehovah ifisser li nagħtuh ix-xorta taʼ qima li hu jirrikjedi, kif muri fl-eżempju taʼ Ġesù u taʼ l-appostli tiegħu. Biex nagħmlu dan, irridu nieklu spiritwalment dak li Jehovah jipprovdi permezz tal-Kelma u taʼ l-organizzazzjoni tiegħu. L-Iżraeliti, li gawdew komunjoni speċjali maʼ Jehovah mill-mejda tiegħu, ġew ipprojbiti li joffru sagrifiċċji lid-demonji fuq il-mejda tagħhom. Iżraeliti spiritwali u sħabhom in-“ngħaġ l-oħrajn” qegħdin taħt l-istess projbizzjoni divina.—Ġwann 10:16.
3. Kif jistaʼ xi ħadd isir ħati taʼ li jieħu sehem mill-mejda tad-demonji fi żmienna?
3 Kif jistaʼ wieħed isir ħati taʼ li jieħu sehem mill-mejda tad-demonji fi żmienna? Billi jaqdi l-interessi taʼ kwalunkwe ħaġa li hi kontra Jehovah. Il-mejda tad-demonji tinkludi l-propaganda demonika kollha, li hija mfassla biex tqarraq bina u ddawwarna lil hinn minn Jehovah. Min hu dak li se jkun irid jitmaʼ lil qalbu u lil moħħu velenu bħal dan? Il-Kristjani veri jirrifjutaw li jieħdu sehem fis-sagrifiċċji li l-biċċa l-kbira tan-nies illum joffru lill-allat tal-gwerra u tar-rikkezzi.—Mattew 6:24.
Nevitaw “[I]l-Mejda Tad-Demonji”
4. Liema mistoqsija niffaċċjaw ilkoll kemm aħna, u għala m’għandniex konxjament inkunu irridu nieħdu sehem mill-mejda tad-demonji?
4 Il-mistoqsija li lkoll kemm aħna niffaċċjaw hi, Minn liema mejda qiegħed niekol jien? Ma nistgħux naħarbu l-fatt li aħna obbligati li nieklu minn mejda jew oħra. (Qabbel Mattew 12:30.) Ma rridux konxjament nieħdu sehem mill-mejda tad-demonji. Li nagħmlu hekk ikun jiswielna li nitilfu l-favur taʼ l-uniku Alla veru u ħaj, Jehovah. Mill-banda l-oħra, li nieħdu sehem minn ikel mill-mejda taʼ Jehovah biss iwassal għall-ħajja taʼ dejjem tagħna fil-hena! (Ġwann 17:3) Hemm qawl li jgħid li skond ma wieħed jiekol hekk hu. Kulmin, allura, irid iżomm saħħa fiżika u mentali tajba jrid joqgħod attent għad-dieta tiegħu. Bħalma l-ikel mhux sustanzjuż u kollu xaħam, għalkemm ikun imħawwar b’affarijiet kimiċi miżjudin, ma jikkontribwix għal li kontinwament ikollna saħħa fiżika, hekk ukoll il-propaganda taʼ din id-dinja mżejna b’ideat demoniċi hija ikel figurattiv, ħażin u bla sustanza li se jikkorrompi l-imħuħ tagħna.
5.Kif nistgħu nevitaw milli ndaħħlu ġo fina tagħlim tad-demonji llum?
5 L-appostlu Pawlu bassar li matul l-aħħar jiem, in-nies kellhom jiġu żvijati mit-“tagħlim tad-demonji.” (1 Timotew 4:1) Mhux talli tagħlim demoniku bħal dan jinsab fit-twemmin reliġjuż falz imma huwa wkoll magħruf sew maʼ kullimkien b’modi oħrajn. Per eżempju, jeħtieġ li nanalizzaw u niżnu liema kotba u rivisti naqraw aħna u wliedna, liema programmi televiżivi naraw, u liema reċti u films naraw. (Proverbji 14:15) Jekk sabiex ngħaddu ż-żmien naqraw xi ktieb taʼ stejjer fittizji, fih dan xi vjolenza bla sens, sess illeċitu, jew prattiċi taʼ l-okkult? Jekk naqraw materjal taʼ attwalità sabiex niġu istruwiti, jispjega dan fid-dettall xi filosofija jew mod taʼ ħajja li “mhux skond Kristu”? (Kolossin 2:8) Qegħdin jiġu ppreżentati xi spekulazzjonijiet vojti, jew qiegħed jiġi rrikkmandat xi involviment f’movimenti soċjali dinjin? Qiegħed dan iġib ’il quddiem id-determinazzjoni biex wieħed jistagħna ħafna? (1 Timotew 6:9) Hija din xi pubblikazzjoni li b’mod sottili tippreżenta tagħlim li jifred u li m’huwiex kif irid Kristu? Jekk it-tweġiba hija iva u nkomplu naqraw jew naraw materjal bħal dan, qegħdin nirriskjaw li nieklu mill-mejda tad-demonji. Illum, hemm mijiet taʼ eluf taʼ pubblikazzjonijiet li jippromwovu filosofiji dinjin li jidhru tant imdawlin u kurrenti. (Ekkleżjasti 12:12) Imma xejn minn din il-propaganda ma hu tassew ġdid; u lanqas ma jiswa għall-benefiċċju u t-titjib taʼ dak li jkun, daqskemm dak li Satana b’mod makakk qal lil Eva ma sewiex għat-titjib tagħha.—2 Korintin 11:3.
6. Meta Satana jistedinna biex induqu l-ikel mhux sustanzjuż u demoniku tiegħu, kif għandna, fil-fatt, inwieġbu?
6 Għalhekk, meta Satana jistedinna biex induqu l-ikel demoniku u bla sustanza tiegħu, kif għandna nwieġbu? Bħalma għamel Ġesù meta ġie ttantat minn Satana biex ibiddel il-ġebel f’ħobż. Ġesù wieġeb: “Huwa miktub, ‘Il-bniedem irid jgħix, mhux fuq il-ħobż biss, imma fuq kull ħaġa mitkellma li hi ħierġa permezz taʼ fomm Jehovah.’” U meta x-Xitan offra lil Ġesù “s-saltniet kollha tad-dinja u l-glorja tagħhom” jekk hu jaqaʼ fl-art u jagħmel att taʼ qima lil Satana, Ġesù wieġeb: “Mur ’l hemm, Satana! Għax huwa miktub, ‘Huwa lil Jehovah Alla tiegħek li trid tqim, u huwa lilu waħdu li trid tagħti servizz sagru.’”—Mattew 4:3, 4, 8-10.
7. Għala nkunu qegħdin nidħku bina nfusna jekk naħsbu li nistgħu nieklu b’suċċess kemm mill-mejda taʼ Jehovah kif ukoll mill-mejda tad-demonji?
7 Il-mejda taʼ Jehovah u l-mejda mifruxa mill-għedewwa demoniċi tiegħu qatt ma jistgħu jaqblu! Tabilħaqq, dan ġie pprovat qabel. Ftakar fl-Iżraeliti tal-qedem fi żmien il-profeta Elija. In-nies sostnew li jqimu lil Jehovah, imma emmnu li allat oħrajn, bħal Baal, wiegħdu l-prosperità. Elija avviċina lin-nies u qal: “Kemm se ddumu zzappu fuq żewġ opinjonijiet differenti? Jekk Jehovah hu l-veru Alla, morru segwu lilu; imma jekk Baal hu, morru segwu lilu.” Ħadd ma jistaʼ jiċħad li l-Iżraeliti kienu qegħdin izappu “daqqa fuq sieq u daqqa fuq l-oħra.” (1 Slaten 18:21; The Jerusalem Bible) Elija sfida lill-qassisin taʼ Baal biex jagħtu prova tad-divinità taʼ l-alla tagħhom. Dak Alla li setaʼ jniżżel nar mis-sema għal fuq is-sagrifiċċju kien jagħti prova li hu l-veru Alla. Minkejja ħafna sforz, il-qassisin taʼ Baal fallew. Imbagħad Elija sempliċement talab: “O Jehovah, weġibni, biex dan il-poplu jistaʼ jkun jaf li int, Jehovah, int dak Alla veru.” Immedjatament nar mingħand Jehovah niżel sparat mis-sema u kkonsma l-annimal imxarrab għasra tas-sagrifiċċju. Imqanqlin mill-wirja konvinċenti tad-divinità taʼ Jehovah, in-nies obdew lil Elija u taw il-mewt lill-450 profeta kollha taʼ Baal. (1 Slaten 18:24-40) Hekk ukoll illum, irridu nirrikonoxxu lil Jehovah bħala dak Alla veru u b’mod deċiż induru biex nieklu biss mill-mejda tiegħu jekk mhux diġà għamilna hekk.
‘L-Irsir Fidil’ Iservi L-Mejda Taʼ Jehovah
8. Ġesù bassar li kien se juża lil liema rsir biex jitmaʼ lid-dixxipli tiegħu spiritwalment matul il-preżenza tiegħu, u x’inhi l-identità taʼ l-irsir?
8 Il-Mulej Ġesù Kristu bassar li matul il-preżenza tiegħu “rsir fidil u diskret” kellu jipprovdi ikel spiritwali għad-dixxipli tiegħu: “Hieni hu dak l-irsir jekk sidu malli jasal isibu jagħmel hekk. Verament ngħidilkom, Hu se jaħtru fuq dak kollu li jippossjedi.” (Mattew 24:45-47) Dan l-irsir ta prova li hu, mhux xi individwu wieħed, imma l-klassi taʼ Kristjani ddedikati u midlukin. Din il-klassi poġġiet fuq il-mejda taʼ Jehovah l-ifjen ikel spiritwali kemm għall-fdal midlukin u kemm għall-“folla l-kbira.” Issa l-folla l-kbira, li jaqbżu l-erbaʼ miljuni fil-għadd, ħadu l-waqfa tagħhom mal-fdal midlukin favur is-sovranità universali taʼ Alla Jehovah u favur is-Saltna tiegħu li permezz tagħha se jqaddes lill-isem qaddis tiegħu.—Rivelazzjoni 7:9-17.
9. Liema strument qiegħda tuża l-klassi taʼ l-irsir biex tipprovdi ikel spiritwali għax-Xhieda taʼ Jehovah, u l-iffesteġġjar spiritwali tagħhom kif inhu deskritt b’mod profetiku?
9 Din il-klassi leali taʼ l-irsir ilha tuża l-Watch Tower Bible and Tract Society biex tipprovdi nutriment spiritwali għax-Xhieda taʼ Jehovah kollha. Waqt li l-Kristjaneżmu u l-bqija taʼ din is-sistema taʼ affarijiet huma mġewħin minħabba n-nuqqas taʼ ikel spiritwali li jagħti l-ħajja, in-nies taʼ Jehovah qegħdin jiffesteġġjaw. (Amos 8:11) Dan hu bi twettieq tal-profezija f’Isaija 25:6: “Jehovah taʼ l-armati ċertament li se jagħmel għall-popli kollha, f’din il-muntanja, bankett taʼ dixxijiet imħawrin tajjeb biż-żejt, bankett taʼ nbid irraffinat min-naqal, taʼ dixxijiet imħawrin tajjeb biż-żejt mimlijin mudullun, taʼ nbid irraffinat min-naqal, imsoffi.” Kif juru versi 7 u 8, din il-festa se tkompli għal dejjem. X’barka hi għal kulmin qiegħed fl-organizzazzjoni viżibbli taʼ Jehovah issa, u x’barka se tkompli tkun fil-futur!
Attenti Għall-Ikel Velenuż Taʼ Fuq Il-Mejda Tad-Demonji
10. (a) Liema xorta taʼ ikel huwa mqassam mill-klassi taʼ l-irsir mill-agħar, u x’inhu li qiegħed jimmotivahom? (b) Il-klassi taʼ l-irsir mill-agħar kif tittratta lil dawk li qabel kienu rsiera sħabhom?
10 L-ikel taʼ fuq il-mejda tad-demonji huwa velenuż. Ikkunsidra, per eżempju, l-ikel imqassam mill-klassi taʼ l-irsir mill-agħar u mill-apostati. M’huwiex nutrittiv jew li jsostni; m’huwiex li jibni. Dan ma jistax ikun, għax l-apostati waqfu milli jieħdu l-ikel mill-mejda taʼ Jehovah. Bħala riżultat, kien x’kien li kienu żviluppaw mill-personalità l-ġdida spiċċa. Dak li jimmotivahom, m’huwiex l-ispirtu qaddis, imma hu mrar li jherri. Huma ossessjonati biss b’mira waħda—li jaħqru lill-irsiera li qabel kienu sħabhom, kif bassar Ġesù.—Mattew 24:48, 49.
11. C. T. Russell x’kiteb inkwantu għall-għażla taʼ ikel spiritwali taʼ dak li jkun, u kif iddeskriva lil dawk li jabbandunaw il-mejda taʼ Jehovah?
11 Per eżempju, lura mhux ħażin fl-1909, dak li dak in-nhar kien il-president tal-Watch Tower Society, C. T. Russell, kiteb dwar dawk li daru lil hinn mill-mejda taʼ Jehovah u mbagħad bdew jittrattaw ħażin lil dawk li qabel kienu rsiera sħabhom. The Watch Tower taʼ l-1 t’Ottubru, 1909, qal: “Dawk kollha li jinqatgħu minn mas-Soċjetà u mix-xogħol tagħha, minflok ma huma nfushom qegħdin jipprosperaw jew jibnu lil oħrajn fil-fidi u fil-grazzji taʼ l-ispirtu, jidhru li qegħdin jagħmlu l-kontra—jagħmlu attentat biex jagħmlu ħsara lill-Kawża li darba huma kienu jaqdu, u, bi ftit jew wisq ħoss, bil-mod il-mod jisparixxu, billi jagħmlu ħsara biss lilhom infushom u lil oħrajn li huma ppossessati minn spirtu ġelliedi bħal dan. . . . Jekk xi wħud jaħsbu li jistgħu jiksbu ikel tajjeb daqstant jew aħjar minn imwejjed oħrajn, jew li jistgħu jipproduċu daqstant tajjeb jew aħjar għalihom infushom—ħallihom jagħmlu li jridu. . . . Imma waqt li aħna lesti li nħallu lill-oħrajn imorru fejn iridu u fejn jogħġobhom biex isibu ikel u dawl għas-sodisfazzjon tagħhom, ħaġa taʼ l-iskantament, dawk li jsiru l-opponenti tagħna jieħdu korsa differenti ferm. Minflok ma jgħidu bl-attitudni taʼ rġulija tad-dinja, ‘Jien sibt xi ħaġa li nippreferi; saħħa!’ dawn juru rabja, malizzja, mibgħeda, ġlied, ‘xogħlijiet tal-laħam u tax-xitan’ li bħalhom lanqas in-nies tad-dinja qatt ma rajniehom juru. Jidhru qishom tahom tal-ġenn, idrofobija Satanika. Xi wħud minnhom jinsulentawna u mbagħad isostnu li konna aħna li nsulentajniehom. Huma lesti li jiktbu affarijiet foloz taʼ disprezz u jaqgħu fil-baxx f’li jwettqu kattiverji.”
12. (a) L-apostati kif isawtu lill-irsiera sħabhom? (b) Għala huwa perikoluż li minħabba l-kurżità tiekol mill-kitbiet taʼ apostati?
12 Iva, l-apostati jippubblikaw letteratura li tirrikorri għal tgħawwiġ, nofs veritajiet, u gideb sfaċċat. Huma saħansitra jinkarigaw nies apposta waqt il-konvenzjonijiet tax-Xhieda, attenti biex jonsbu lil dawk li jkunu aljenati. Għalhekk, tkun ħaġa perikoluża li nħallu l-kurżità tagħna tqanqalna biex nieklu minn kitbiet bħal dawn jew nisimgħu l-paroli kollu abbuż tagħhom! Waqt li forsi ma naħsbux li huwa taʼ riskju għalina personalment, il-periklu jibqaʼ. Għala? L-ewwel ħaġa, xi ftit mil-letteratura apostata tippreżenta gideb permezz taʼ “diskors melliesi” u “kliem qarrieqi.” (Rumani 16:17, 18; 2 Pietru 2:3) X’tistaʼ tistenna mill-mejda tad-demonji? U għalkemm l-apostati jistgħu jippreżentaw ukoll ċerti fatti, dawn ġeneralment huma meħudin barra mill-kuntest bil-mira li jiġbdu lil oħrajn ’il bogħod mill-mejda taʼ Jehovah. Il-kitbiet kollha tagħhom sempliċement jikkritikaw u jkissru! Xejn ma jibni.
13, 14. X’inhu l-frott taʼ l-apostati u tal-propaganda tagħhom?
13 Ġesù qal: “Mill-frott tagħhom se tagħrfuhom.” (Mattew 7:16) X’inhu, issa, il-frott taʼ l-apostati u l-pubblikazzjonijiet tagħhom? Erbaʼ affarijiet jimmarkaw il-propaganda tagħhom. (1) Il-makakkerija. Efesin 4:14 jgħid li huma ‘makakki fl-ippjanar taʼ l-iżball.’ (2) L-intelliġenza mimlija kburija. (3) In-nuqqas taʼ mħabba. (4) Id-diżonestà f’diversi forom. Dawn huma l-istess ingredjenti taʼ l-ikel li qiegħed fuq il-mejda tad-demonji, li kollu kemm hu huwa ddisinnjat biex jherri l-fidi tan-nies taʼ Jehovah.
14 U hemm aspett ieħor. L-apostati lejn liema ħaġa reġgħu lura? F’ħafna każi, daħlu mill-ġdid fid-dlam tal-Kristjaneżmu u d-duttrini tiegħu, bħalma hu t-twemmin li l-Kristjani kollha jmorru fis-sema. Barra minn hekk, il-biċċa l-kbira m’għadhomx jieħdu waqfa Skritturali soda rigward id-demm, in-newtralità, u l-ħtieġa li jagħtu xiehda dwar is-Saltna t’Alla. Aħna, iżda, ħrabna mid-dlam taʼ Babilonja l-Kbira, u qatt ma rridu nerġgħu lura lejh. (Rivelazzjoni 18:2, 4) Bħala qaddejja leali taʼ Jehovah, għala għandna saħansitra nkunu rridu nittawlu fil-propaganda maħruġa mingħand dawn li ċaħdu l-mejda taʼ Jehovah u li issa b’mod verbali qegħdin isawtu lil dawk li qegħdin jgħinuna ndaħħlu ġewwa fina “kliem mimli saħħa”?—2 Timotew 1:13.
15. Liema prinċipju Bibliku jgħinna biex nieħdu l-korsa għaqlija meta nisimgħu dwar l-akkużi li jagħmlu l-apostati?
15 Xi wħud jistgħu jkunu kurjużi dwar l-akkużi li jagħmlu l-apostati. Imma għandna naħsbu serjament dwar il-prinċipju f’Dewteronomju 12:30, 31. Hawn Jehovah permezz taʼ Mosè wissa lill-Iżraeliti dwar x’kellhom jevitaw hekk kif daħlu flok l-abitanti pagani taʼ l-Art Imwiegħda. “Għasses għalik innifsek li ma tmurx tidħol fin-nassa warajhom, wara li ġew meqrudin għalkollox minn quddiemek, u li ma tmurx tistħarreġ dwar l-allat tagħhom, billi tgħid, ‘Kif kien li dawn il-ġnus kienu jaqdu lill-allat tagħhom? U jien, iva, jien, se nagħmel l-istess ħaġa.’ Ma tridx tagħmel dik il-ħaġa lil Jehovah Alla tiegħek.” Iva, Alla Jehovah jaf kif taħdem il-kurżità umana. Ftakar f’Eva, u wkoll f’mart Lot! (Luqa 17:32; 1 Timotew 2:14) Ejjew qatt ma nagħtu widen għal dak li qegħdin jgħidu jew jagħmlu l-apostati. Minflok, ejjew inkunu bil-bżulija qegħdin nibnu n-nies u lealment nieklu mill-mejda taʼ Jehovah!
Il-Mejda Taʼ Jehovah Biss Se Tibqaʼ
16. (a) F’qasir żmien x’se jiġri minn Satana, mid-demonji tiegħu, u mill-mejda figurattiva li minnha l-ġnus tad-dinja kienu u għadhom jieklu? (b) X’se jiġri lill-bnedmin kollha li jkomplu jieklu mill-mejda tad-demonji?
16 F’qasir żmien, it-tribulazzjoni l-kbira se tfaqqaʼ f’daqqa, billi tgħaddi malajr għall-quċċata fil-“gwerra tal-jum il-kbir t’Alla li Jistaʼ Kollox.” (Rivelazzjoni 16:14, 16) Se tilħaq l-ogħla grad hekk kif Jehovah jeqred lil din is-sistema taʼ affarijiet u l-mejda figurattiva li minnha kienu u għadhom jieklu l-ġnus tad-dinja. Jehovah se jegħleb ukoll lill-organizzazzjoni inviżibbli kollha kemm hi taʼ Satana x-Xitan bil-gzuz taʼ demonji tagħha. Dawk li komplew jieklu mill-mejda spiritwali taʼ Satana, il-mejda tad-demonji, se jiġu sfurzati biex jattendu ikla litterali, le, mhux bħala wħud li jieħdu sehem, imma bħala l-ikla prinċipali—għall-qerda tagħhom!—Ara Eżekjel 39:4; Rivelazzjoni 19:17, 18.
17. Liema barkiet jiġu għal dawk li jieklu esklussivament mill-mejda taʼ Jehovah?
17 Il-mejda taʼ Jehovah biss se tibqaʼ. Dawk li b’apprezzament qegħdin jieklu minnha se jiġu ppreservati u se jkunu pprivileġġjati li jieklu hemm għal dejjem. Qatt iktar ma se jiġu mheddin bi kwalunkwe xorta taʼ nuqqas taʼ ikel. (Salm 67:6; 72:16) F’saħħa perfetta huma se jaqdu lil Alla Jehovah fil-Ġenna! Fl-aħħar il-kliem li jqanqal taʼ Rivelazzjoni 21:4 se jiġi mwettaq b’mod taʼ l-għaġeb: “Se jimsaħ għalkollox kull demgħa minn għajnejhom, u l-mewt mhix se tkun iżjed, u la għali u la għajjat u lanqas uġigħ ma jkunu iżjed. L-affarijiet taʼ qabel għaddew.” Bl-oppożizzjoni bħala xi ħaġa taʼ l-imgħoddi, is-sovranità universali t’Alla Jehovah se tkun aċċettata kullimkien għal dejjem taʼ dejjem hekk kif favuri divini bla tmiem igelglu fuq l-umanità mifdija li tkun qiegħda tokkupa l-art magħmula Ġenna. Biex niksbu dan il-premju, ejjew ilkoll kemm aħna nkunu ddeterminati li nieħdu sehem esklussivament mill-mejda taʼ Jehovah, li qiegħda tfur bl-aqwa ikel spiritwali! (w94 7/1)
Kif Twieġeb Int?
◻ Kif nistgħu nevitaw li niġu żvijati minn tagħlim demoniku?
◻ Għala ma nistgħux b’suċċess nieklu kemm mill-mejda taʼ Jehovah kif ukoll mill-mejda tad-demonji?
◻ Liema xorta taʼ ikel jiġi mqassam mill-apostati?
◻ Għala huwa perikoluż li tkun kurjuż dwar l-akkużi taʼ l-apostati?
◻ X’inhu l-frott taʼ l-apostati?