Kapitlu 1

L-​Unità fil-​Qima—X’Għandha Tfisser Għalik?

1, 2. (a) Fuq liema bażi qiegħda l-​vera unità taʼ qima sseħħ fi żmienna? (b) Il-​Bibbja kif tiddeskrivi dak li qiegħed iseħħ?

MADWAR il-​globu hemm moviment eċċitanti lejn l-​unità fil-​qima. Qiegħed jiġbed flimkien lil nies taʼ kull ġens u tribù u lingwa. L-​unità tagħhom m’hijiex riżultat taʼ xi kompromess taʼ twemmin. M’hijiex qiegħda tintlaħaq billi huma jżommu lura milli jikkritikaw stili taʼ ħajja li huma f’konflitt mal-​Kelma t’Alla. Allura dan għalxiex inhu dovut? Għall-​fatt li nies minn kull qasam tal-​ħajja qegħdin isiru jafu lil Jehovah bħala l-​uniku Alla veru u li minn jeddhom qegħdin iġibu ħajjiethom f’armonija mal-​mogħdijiet taʼ tjieba tiegħu.​—Qabbel Rivelazzjoni 15:​3, 4.

² Dan huwa bi twettiq taʼ profezija li ġiet iddokumentata madwar 2,700 sena ilu mill-​profeta Mikea. B’referenza għall-​“parti finali tal-​jiem,” hu kiteb: “Ħafna ġnus ċertament li se jmorru u jgħidu: ‘Ejjew, u ħalli mmorru ’l fuq lejn il-​muntanja taʼ Jehovah u lejn id-​dar taʼ dak Alla taʼ Ġakobb; u hu se jistruwina dwar il-​mogħdijiet tiegħu, u aħna se nimxu fil-​passaġġi tiegħu.’” (Mik. 4:​1, 2)a Qiegħed int tara dak iseħħ?

3, 4. (a) Kif inhu veru li “ġnus” qegħdin iduru lejn Jehovah? (b) Liema mistoqsijiet għandna nistaqsu lilna nfusna?

³ M’hemm ebda “ġnus” sħaħ li qegħdin jippreżentaw lilhom infushom fid-​dar spiritwali taʼ Jehovah għall-​qima. Imma individwi minn ġnus bħal dawn qegħdin jagħmlu hekk. Hekk kif jitgħallmu dwar l-​iskop taʼ mħabba u l-​personalità li tiġbdek t’Alla Jehovah, qlubhom jitqanqlu profondament. Umilment huma jfittxu li jsiru jafu x’jeħtieġ Alla minnhom. It-​talba tagħhom hija bħal dik taʼ David, raġel taʼ fidi li qal: “Għallimni nagħmel ir-​rieda tiegħek, għax int Alla tiegħi.”​—Salm 143:10.

⁴ Tara int lilek innifsek fost dik il-​folla vasta taʼ adoraturi taʼ Jehovah? Tagħti t-​tweġiba tiegħek għall-​istruzzjoni li rċevejt evidenza li int verament tapprezza li Jehovah hu s-​sors tagħha? Sa liema punt qiegħed int ‘timxi fil-​passaġġi tiegħu’?

KIF TINTLAĦAQ

5. (a) Sa liema punt se tkun eventwalment milħuqa l-​unità taʼ qima? (b) Għala huwa urġenti li ssir adoratur taʼ Jehovah issa, u kif nistgħu ngħinu lil oħrajn biex jagħmlu dan?

⁵ L-​iskop taʼ Jehovah huwa li l-​ħolqien intelliġenti kollu jkun magħqud fil-​qima​—billi ebda wieħed ma jiġi żvijat mill-​qerq, billi ebda wieħed ma jkollu jteftef fid-​dlam minħabba l-​falliment f’li jsib it-​tifsir veru tal-​ħajja. Kemm nixxennqu għall-​jum meta dawk kollha li jgħixu se jbierku lill-​uniku Alla veru! (Salm 103:​19-22) Imma qabel ma dak jistaʼ jkun, jeħtieġ li Jehovah inaddaf il-​ħolqien tiegħu minn dawk li jiddisprezzaw l-​istat tiegħu taʼ Sultan u li jinsistu f’li jħassru l-​ħajja għal oħrajn. B’mod ħanin hu javża bil-​quddiem dwar dak li se jagħmel. In-​nies kullimkien għandhom l-​opportunità biex ibiddlu l-​korsa tagħhom. B’hekk fi żmienna stess dan l-​appell urġenti qiegħed isir mad-​dinja kollha: “Ibżgħu minn Alla u agħtuh glorja, għaliex is-​siegħa tal-​ġudizzju minnu waslet, u għalhekk qimu lill-​Wieħed li għamel is-​sema u l-​art u l-​baħar u n-​nixxigħat taʼ ilmijiet.” (Riv. 14:​6, 7) Aċċettajt int dik l-​istedina? Jekk inhu hekk, issa huwa l-​privileġġ tiegħek li taħdem maʼ l-​organizzazzjoni taʼ Jehovah sabiex tgħin lil oħrajn jagħmlu hekk.

6. Wara li nitgħallmu t-​tagħlim bażiku tal-​Bibbja, liema progress addizzjonali għandna nistinkaw bis-​serjetà biex nagħmlu?

⁶ M’huwiex l-​iskop t’Alla li jdaħħal fl-​organizzazzjoni tiegħu nies li sempliċement jgħidu li jemmnu f’Jehovah u li jixtiequ jgħixu fil-​Ġenna imma li fl-​istess ħin ikomplu jiġru wara l-​interessi egoistiċi tagħhom stess. Hu jrid li n-​nies jaslu għal “għarfien eżatt tar-​rieda tiegħu,” u dan għandu jkun rifless f’ħajjiethom. (Kol. 1:​9, 10) Wara li persuni li japprezzaw jitgħallmu t-​tagħlim fundamentali tal-​Bibbja, iridu jistinkaw ’il quddiem lejn maturità Kristjana. Ix-​xewqa tagħhom hija li jsiru jafu lil Jehovah intimament, li jwessgħu u jipprofondaw il-​fehma tagħhom tal-​Kelma tiegħu, u li japplikawha iktar bis-​sħiħ f’ħajjiethom. Huma jfittxu li jkunu bħal missierhom tas-​sema, billi jirriflettu l-​kwalitajiet tiegħu u jħarsu lejn l-​affarijiet bħalma jħares hu. Dan iqanqalhom biex ifittxu modi kif jieħdu sehem bis-​sħiħ kemm jistaʼ jkun fix-​xogħol li hu qiegħed iġiegħel li jsir fl-​art fi żmienna. Huwa dak li qiegħed tagħmel int?​—Ef. 5:1; Eb. 5:12–6:3; 1 Tim. 4:15.

7. Il-​vera unità f’liema modi hija possibbli issa, u kif tiġi milħuqa?

⁷ Il-​Bibbja turi li dawk li jaqdu lil Jehovah għandhom ikunu poplu magħqud. (Ef. 4:​1-3) Din l-​unità għandha teżisti issa, avolja qegħdin ngħixu f’dinja mifruda u għadna nitħabtu maʼ l-​imperfezzjonijiet tagħna stess. Ġesù talab bis-​serjetà biex id-​dixxipli tiegħu jkunu kollha ħaġa waħda, billi jgawdu unità vera. Dan x’kellu jfisser? Li l-​ewwelnett ikollhom relazzjoni tajba maʼ Jehovah u Ibnu. Ukoll li kellhom ikunu magħqudin flimkien. (Ġwn. 17:​20, 21) Dan qiegħed jintlaħaq issa hekk kif japplikaw l-​istruzzjoni miksuba fid-​“dar” taʼ Jehovah.

LIEMA FATTURI JIKKONTRIBWIXXU GĦALL-​UNITÀ?

8. (a) X’niżviluppaw meta aħna personalment nużaw il-​Bibbja biex nirraġunaw dwar tweġibiet għal mistoqsijiet li jeffettwawna? (b) Billi twieġeb il-​mistoqsijiet imniżżlin hawn fuq, analizza l-​fatturi li jikkontribwixxu għall-​unità Kristjana.

⁸ Ftit mill-​fatturi prinċipali li jikkontribwixxu għal din l-​unità huma nnumerati hawn taħt. Hekk kif twieġeb il-​mistoqsijiet li jiġu wara dawn, aħseb dwar kif kull wieħed jeffettwa r-​relazzjoni tiegħek stess maʼ Jehovah u maʼ Kristjani sħabek. L-​irraġunar tiegħek fuq dawn il-​punti fid-​dawl taʼ l-​iskritturi ċċitati se jikkontribwixxi għal li tiżviluppa l-​abbiltà li taħseb u d-​dixxerniment orjentati lejn Alla, li huma kwalitajiet li lkoll kemm aħna neħtieġu. (Prov. 5:​1, 2; Fil. 1:9-11) Mela ikkunsidra dawn il-​fatturi wieħed wara l-​ieħor:

(1) Aħna lkoll inqimu lil Jehovah u nirrikonoxxu d-​dritt tiegħu li jistabbilixxi l-​livell taʼ x’inhu tajjeb u x’inhu ħażin.

Jekk ninjoraw apposta l-​parir taʼ Jehovah fuq ħaġa li tidher ċkejkna għalina, hu kif se jħares lejn dan? (Luqa 16:10; qabbel Malakija 1:​6-8.)

Huma oħrajn effettwati jekk aħna ma nobdux il-​kmandi taʼ Jehovah dejjem? (Qabbel Rumani 5:12; Ġożwè 7:​20-26; 1 Slaten 14:16.)

(2) Inkunu fejn inkunu fid-​dinja, għandna l-​Kelma t’Alla biex tiggwidana.

Meta nieħdu deċiżjonijiet, liema periklu hemm f’li sempliċement nagħmlu dak li “nħossu” li huwa sewwa? (Ġer. 17:9; Prov. 14:12)

Jekk ma nafux liema parir tagħti l-​Bibbja fuq kwistjoni partikulari, x’għandna nagħmlu? (Prov. 2:​3-5)

(3) Aħna lkoll nibbenefikaw mill-​istess programm taʼ għoti taʼ ikel spiritwali.

Liema kundizzjonijiet jeżistu fost dawk li ma japprezzawx l-​arranġamenti taʼ Jehovah għall-​għoti taʼ ikel spiritwali? (Qabbel Isaija 1:3; 9:16; 65:14.)

(4) Ġesù Kristu, u ebda bniedem, hu l-​Mexxej tagħna u l-​wieħed li permezz tiegħu aħna lkoll nersqu lejn Jehovah fil-​qima.

Hemm xi ħadd minna li għandu raġuni valida biex jemmen li bħala persuni aħna superjuri għal oħrajn? (Rum. 3:​23, 24; 12:3; Matt. 23:​8-10)

(5) Noqogħdu fejn noqogħdu, aħna nħarsu lejn is-​Saltna t’Alla bħala l-​unika tama għall-​ispeċi umana.

Dan kif jissalvagwardjana kontra influwenzi li jifirdu? (Matt. 6:​9, 10; Mik. 4:3)

(6) L-​ispirtu qaddis jipproduċi fl-​adoraturi taʼ Jehovah kwalitajiet li huma vitali għall-​unità Kristjana.

Kif niftħu l-​mogħdija għall-​ispirtu t’Alla biex jipproduċi l-​frott tiegħu fina? (Salm 1:2; Prov. 22:4; Riv. 3:6; Atti 5:32)

Li jkollna l-​frott taʼ l-​ispirtu kif jinfluwenza r-​relazzjoni tagħna maʼ Jehovah? Maʼ ħutna? (Gal. 5:​22, 23)

(7) Ilkoll kemm aħna għandna r-​responsabbiltà li nippridkaw l-​aħbar tajba tas-​Saltna t’Alla.

Li jkollna ħafna x’nagħmlu f’li nieħdu sehem f’din l-​attività taʼ ppridkar maʼ Kristjani sħabna kif jinfluwenza l-​mod taʼ kif inħossuna dwarhom? (Qabbel Kolossin 4:​7, 11.)

9. X’inhu l-​effett meta tassew napplikaw dawn il-​veritajiet f’ħajjietna?

⁹ Li tirrikonoxxi dawn il-​fatti hija ħaġa. Li tgħix f’armonija magħhom jirrikjedi ħafna iktar. Imma meta nagħmlu hekk, nitressqu qrib lejn Jehovah. Is-​sħubija tagħna maʼ kredenti sħabna wkoll issir sors taʼ rifreskar. Bħalma jgħid Salm 133:1: “Ħares! Kemm huwa tajjeb u kemm huwa pjaċevoli li aħwa jgħammru flimkien f’unità!” M’esperjenzajtx int personalment kemm jistaʼ jkun rifreskanti li titwarrab mid-​dinja, bl-​egoiżmu kollu tagħha, u li tkun preżenti għal-​laqgħat m’oħrajn li verament iħobbu lil Jehovah?

EVITA INFLUWENZI LI JIFIRDU

10. Għala għandna bżonn noqogħdu attenti biex nevitaw spirtu taʼ indipendenza?

¹⁰ Sabiex ma nħassrux dik l-​unità prezzjuża, irridu nevitaw influwenzi li jifirdu. Waħda mill-​iktar notevoli fost dawn hija l-​ispirtu taʼ indipendenza. Jehovah jgħinna biex nevitawh billi jiżvela lill-​oriġinatur tiegħu, Satana x-​Xitan. Huwa l-​wieħed li qarraq b’Eva f’li taħseb li jkun taʼ vantaġġ għaliha li tinjora dak li kien qal Alla u li tieħu d-​deċiżjonijiet tagħha stess. Adam issieħeb magħha f’dik il-​korsa ribelluża. Ir-​riżultat kien gwaj għalihom u għalina. (Ġen. 2:​16, 17; 3:​1-6, 17-19) Aħna qegħdin ngħixu f’dinja li hija mgħarrqa f’dak l-​ispirtu indipendendenti, u għalhekk m’għandux jissorprendina jekk ikollna bżonn inrażżnu dak l-​ispirtu fina nfusna. B’imħabba Jehovah jgħinna nagħmlu hekk permezz taʼ pariri mill-​organizzazzjoni tiegħu.

11. Liema ħaġa se turi jekk aħniex sinċerament qegħdin nippreparaw għal ħajja fl-​Ordni Ġdid taʼ tjieba t’Alla?

¹¹ Permezz taʼ dik l-​organizzazzjoni aħna tgħallimna dwar il-​wegħda grandjuża taʼ Jehovah li l-​ambjent preżenti se jċedi postu lis-​smewwiet ġodda u lill-​art ġdida li fihom “it-​tjieba għandha tgħammar.” (2 Piet. 3:13) Inħossuna eċċitati bil-​prospett li dalwaqt din id-​dinja mill-​agħar se tkun telqet u l-​art se tiġi ttrasformata f’Ġenna. Imma juri l-​mod taʼ ħajja tagħna stess li aħna sinċerament qegħdin nippreparaw għal ħajja f’dinja fejn it-​tjieba se tkun il-​prattika prevalenti? Il-​Bibbja tgħidilna ċar u tond: “Tkunux tħobbu lid-​dinja jew l-​affarijiet fid-​dinja. Jekk xi ħadd iħobb lid-​dinja, l-​imħabba tal-​Missier m’hijiex fih.” (1 Ġwn. 2:15) Huwa veru li hemm ħafna affarijiet tad-​dinja li ħadd minna ma jħobb. Imma nobogħdu aħna prinċipalment lil dawk l-​aspetti tad-​dinja li jolqtu lit-​tgawdija immedjata tagħna stess tal-​ħajja? Jew naħarbu wkoll l-​ispirtu tagħha​—l-​attitudni indipendenti tagħha, l-​importanza żejda għal li kulħadd jiġbed lejh? Qegħdin aħna ġenwinament nagħmluha drawwa li nagħtu widen lil Jehovah u li nobduh minn qalbna, minkejja kwalunkwe inklinazzjonijiet kuntrarji tal-​laħam? Il-​korsa sħiħa tal-​ħajja tagħna​—inkunu fejn inkunu, nagħmlu x’nagħmlu—​għandha tagħti evidenza li l-​ħsibijiet u l-​motivi tagħna huma orjentati lejn Alla.​—Prov. 3:​5, 6.

12. (a) Għala huwa importanti li naħtfu l-​opportunità issa biex nitgħallmu l-​mogħdijiet taʼ Jehovah u biex insegwuhom f’ħajjietna? (b) L-​iskritturi ċċitati fil-​paragrafu xi jfissru għalina personalment?

¹² Meta ż-​żmien maħtur taʼ Jehovah jasal biex jeqred lil din is-​sistema t’affarijiet mill-​agħar u lil dawk kollha li jħobbu l-​mogħdijiet tagħha, hu mhux se jittardja. Mhux se jipposponi dak iż-​żmien jew ibiddel il-​livelli tiegħu sabiex jakkomoda lil dawk li għadhom qegħdin jipprovaw iżommu qabda mad-​dinja, dawk li huma b’nofs qalb biss f’li jitgħallmu dwar ir-​rieda t’Alla u jagħmluha. Issa huwa ż-​żmien għall-​azzjoni! (Luqa 13:​23, 24; 17:32; 21:​34-36) Kemm huwa taʼ tqanqil il-​qalb, għalhekk, li tara l-​“folla kbira” taʼ persuni li qegħdin jaħtfu din l-​opportunità prezzjuża, u bil-​ħeġġa jfittxu l-​istruzzjoni li Jehovah jipprovdi permezz taʼ l-​organizzazzjoni taʼ mħabba tiegħu u mbagħad jimxu magħqudin fil-​passaġġi tiegħu!

[Nota taʼ taħt]

Diskussjoni Bħala Reviżjoni

● X’inhu l-​iskop taʼ Jehovah rigward il-​qima?

● Wara li nkunu tgħallimna d-​duttrini bażiċi tal-​Bibbja, liema progress addizzjonali għandna nfittxu bis-​serjetà li nagħmlu?

● X’nistgħu nagħmlu individwalment, sabiex il-​fatturi li jikkontribwixxu għall-​unità li ddiskutejna jinfluwenzaw lil ħajjietna kif suppost?

[Stampa taʼ paġna sħiħa f’paġna 4]