Kapitlu 22

Nidentifikaw Il-​Vera Reliġjon

1. Min kien qiegħed jipprattika l-​vera reliġjon fl-​ewwel seklu?

MA JISTAʼ jkun hemm ebda dubju dwar min kien qiegħed jipprattika l-​vera reliġjon fl-​ewwel seklu. Kienu s-​segwaċi taʼ Ġesù Kristu. Dawn kollha kienu jappartjenu lil organizzazzjoni Kristjana waħda. Xi ngħidu għal-​lum? Kif jistgħu jiġu identifikati dawk li qegħdin jipprattikaw il-​vera reliġjon?

2. Kif jistgħu jiġu identifikati dawk li jipprattikaw il-​vera reliġjon?

² Biex jispjegalna kif nistgħu nagħmlu dan, Ġesù qal: “Mill-​frott tagħhom se tagħrfuhom. . . . Kull siġra tajba tipproduċi frott mill-​aħjar, imma kull siġra mħassra tipproduċi frott bla siwi; . . . Tassew, allura, mill-​frott tagħhom se tagħrfuhom lil dawk il-​bnedmin.” (Mattew 7:​16-20) Liema frott mill-​aħjar kont tistenna int li jipproduċu l-​adoraturi veri t’Alla? X’għandhom ikunu qegħdin jgħidu u jagħmlu llum?

IQADDSU L-​ISEM T’ALLA

3, 4. (a) Liema kienet l-​ewwel ħaġa msemmija fit-​Talba Mudell taʼ Ġesù? (b) Ġesù kif qaddes l-​isem t’Alla?

³ Il-veri adoraturi t’Alla kellhom jaġixxu fi qbil mat-​Talba Mudell li Ġesù ta lis-​segwaċi tiegħu. L-​ewwel ħaġa li Ġesù semma hemmhekk kienet din: “Missierna fis-​smewwiet, ħalli jitqaddes ismek.” Verżjoni oħra tal-​Bibbja tpoġġi dan il-​kliem b’dan il-​mod: “Jalla ismek ikun miżmum qaddis.” (Mattew 6:9, Jerusalem Bible) X’ifisser li tqaddes, jew li żżomm qaddis, l-​isem t’Alla? Ġesù kif għamlu dan?

⁴ Ġesù wera kif għamel dan meta qal f’talba lil Missieru: “Urejt ismek lill-​bnedmin li tajtni mid-​dinja.” (Ġwann 17:6) Iva, Ġesù għarraf l-​isem t’Alla, Jehovah, lil oħrajn. Ma naqasx li juża dak l-​isem. Ġesù kien jaf li l-​iskop taʼ Missieru kien li Ismu jiġi gglorifikat maʼ l-​art kollha. Mela hu ta l-​eżempju f’li jxandar dak l-​isem u f’li jżommu qaddis.​—Ġwann 12:28; Isaija 12:​4, 5.

5. (a) Il-kongregazzjoni Kristjana kif inhi marbuta maʼ l-​isem t’Alla? (b) X’irridu nagħmlu jekk irridu naqilgħu s-​salvazzjoni?

⁵ Il-Bibbja turi li l-​istess eżistenza tal-​vera kongregazzjoni Kristjana hija marbuta maʼ l-​isem t’Alla. L-​appostlu Pietru spjega li Alla “dawwar l-​attenzjoni tiegħu lejn il-​ġnus biex jieħu minnhom poplu għal ismu.” (Atti 15:14) Mela l-​veri nies t’Alla jridu jittrattaw ismu bħala qaddis u jagħmluh magħruf maʼ l-​art kollha. Fil-​fatt, li tkun taf dak l-​isem huwa neċessarju għas-​salvazzjoni, bħalma tgħid il-​Bibbja: “Għax ‘kulmin isejjaħ isem Jehovah se jkun salvat.’”​—Rumani 10:​13, 14.

6. (a) Qegħdin il-​knejjes inġenerali jżommu l-​isem t’Alla qaddis? (b) Hemm min qiegħed jagħti xiehda għall-​isem t’Alla?

⁶ Issa, allura, min illum jittratta l-​isem t’Alla bħala qaddis u jagħmlu magħruf maʼ l-​art kollha? Il-​knejjes inġenerali jevitaw l-​użu taʼ l-​isem Jehovah. Xi wħud saħansitra neħħewh mit-​traduzzjonijiet tagħhom tal-​Bibbja. Madankollu, kieku kellek titkellem mal-​ġirien tiegħek u taʼ spiss tirreferi għal Jehovah, billi tuża ismu, maʼ liema organizzazzjoni taħseb li jassoċjawk? Hemm poplu wieħed biss li tassew qiegħed jimxi wara l-​eżempju taʼ Ġesù f’dan ir-​rigward. L-​iskop prinċipali tagħhom fil-​ħajja huwa li jaqdu ’l Alla u li jagħtu xiehda għal ismu, sewwa sew bħalma għamel Ġesù. Mela huma ħadu l-​isem Skritturali “Xhieda taʼ Jehovah.”​—Isaija 43:​10-12.

IXANDRU S-​SALTNA T’ALLA

7. Ġesù kif wera l-​importanza tas-​saltna t’Alla?

⁷ Fit-Talba Mudell li Ġesù ta, wera wkoll l-​importanza tas-​saltna t’Alla. Għallem lin-​nies jitolbu: “Ħalli tiġi saltnatek.” (Mattew 6:10) Għal darba wara l-​oħra Ġesù enfasizza s-​Saltna bħala l-​unika soluzzjoni għall-​inkwiet tal-​bnedmin. Hu u l-​appostli għamlu dan billi ppridkaw lin-​nies dwar dik is-​saltna “minn raħal għal raħal” u minn “dar għal dar.” (Luqa 8:1; Atti 5:42; 20:20) Is-​saltna t’Alla kienet it-​tema taʼ l-​ippridkar u t-​tagħlim tagħhom.

8. Ġesù kif wera x’kellu jkun il-​messaġġ prinċipali tal-​veri segwaċi tiegħu f’dawn l-​“aħħar jiem”?

⁸ Xi ngħidu dwar żmienna? X’inhu t-​tagħlim ċentrali tal-​vera organizzazzjoni Kristjana t’Alla? Waqt li pprofetizza dwar dawn “l-​aħħar jiem,” Ġesù qal: “Din l-​aħbar tajba tas-​saltna se tkun ippridkata fl-​art abitata kollha għal xiehda lill-​ġnus kollha; u mbagħad se jiġi t-​tmiem.” (Mattew 24:14) Mela s-​Saltna trid tkun il-​messaġġ prinċipali tan-​nies t’Alla llum.

9. Liema nies illum qegħdin jippridkaw il-​messaġġ tas-​Saltna?

⁹ Staqsi lilek innifsek: Jekk xi ħadd jiġi jħabbatlek u jkellmek dwar is-​saltna t’Alla bħala l-​vera tama għall-​bnedmin, maʼ liema organizzazzjoni tassoċjah? Qatt tkellmu miegħek nies taʼ xi reliġjon oħra ħlief ix-​Xhieda taʼ Jehovah dwar is-​saltna t’Alla? Iva, ftit wisq minnhom saħansitra jafu x’inhi! Huma siekta dwar il-​gvern t’Alla. Madankollu dak il-​gvern huwa aħbar li theżheż lid-​dinja. Il-​profeta Danjel bassar li din is-​saltna ‘kellha tgħaffeġ u ġġib tmiem għall-​gvernijiet l-​oħrajn kollha u din waħedha kellha taħkem l-​art.’​—Danjel 2:44.

RISPETT LEJN IL-​KELMA T’ALLA

10. Ġesù kif wera rispett lejn il-​Kelma t’Alla?

¹⁰ Mod ieħor kif dawk li qegħdin jipprattikaw il-​vera reliġjon jistgħu jiġu identifikati huwa mill-​attitudni tagħhom lejn il-​Bibbja. Ġesù dejjem wera rispett lejn il-​Kelma t’Alla. Darba wara l-​oħra rrefera għaliha bħala l-​awtorità finali fuq kwistjonijiet. (Mattew 4:​4, 7, 10; 19:​4-6) Ġesù wkoll wera rispett lejn il-​Bibbja billi għex fi qbil mat-​tagħlim tagħha. Qatt ma baxxa l-​Bibbja bi kliemu. Minflok, ikkundanna lil dawk li naqsu li jgħallmu fi qbil mal-​Bibbja u li pprovaw idgħajfu l-​forza tat-​tagħlim tagħha billi jipproponu l-​ideat tagħhom.​—Mark 7:​9-13.

11. Il-knejjes liema attitudni juru taʼ spiss lejn il-​Kelma t’Alla?

¹¹ Il-knejjes tal-​Kristjaneżmu kif jistgħu jitqabblu maʼ l-​eżempju taʼ Kristu f’dan ir-​rigward? Għandhom huma rispett profond lejn il-​Bibbja? Ħafna membri tal-​kleru llum ma jemmnux ir-​rakkonti Bibliċi tal-​waqgħa fid-​dnub t’Adam, tad-​dilluvju taʼ żmien Noè, taʼ Ġona u l-​ħuta kbira, u oħrajn. Jgħidu wkoll li l-​bniedem ġie bl-​evoluzzjoni mhux b’ħolqien dirett minn Alla. Qegħdin huma b’hekk jinkuraġġixxu rispett lejn il-​Kelma t’Alla? Ukoll, xi mexxejja tal-​knejjes jargumentaw li relazzjonijiet sesswali barra miż-​żwieġ m’humiex ħżiena, jew li saħansitra l-​omosesswalità jew il-​poligamija tistaʼ tkun xierqa. Tistaʼ tgħid li qegħdin jinkuraġġixxu lin-​nies biex jużaw il-​Bibbja bħala l-​gwida tagħhom? Huma ċertament m’humiex qegħdin jimxu wara l-​eżempju taʼ l-​Iben t’Alla u taʼ l-​appostli tiegħu.​—Mattew 15:​18, 19; Rumani 1:​24-27.

12. (a) Il-qima taʼ ħafna li saħansitra għandhom il-​Bibbja għala m’hijiex togħġob ’l Alla? (b) Jekk in-​nies li volontarjament jagħmlu l-​ħażin jitħallew jibqgħu f’qagħda tajba f’xi knisja, x’irridu nikkonkludu?

¹² Hemm membri tal-​knejjes li għandhom Bibbja u saħansitra jistudjawha, imma l-​mod kif jgħixu ħajjiethom juri li m’humiex isegwuha. Dwar persuni bħal dawn, il-​Bibbja tgħid: “Huma pubblikament jiddikjaraw li jafu ’l Alla, imma jiċħduh bix-​xogħlijiet tagħhom.” (Titus 1:16; 2 Timotew 3:5) Jekk membri tal-​knejjes li jilagħbuhom, jiskru jew jagħmlu xi ħażin ieħor jitħallew jibqgħu f’qagħda tajba fil-​knisja tagħhom, dan x’juri? Dan huwa evidenza li l-​organizzazzjoni reliġjuża tagħhom m’hijiex approvata minn Alla.​—1 Korintin 5:11-13.

13. Liema deċiżjoni serja jrid wieħed jieħu jekk ikun sab li t-​tagħlim tal-​knisja tiegħu m’huwiex fi qbil mal-​Bibbja?

¹³ Jekk qgħadt taħseb dwar il-​kapitli taʼ qabel taʼ dan il-​ktieb, billi kkunsidrajt it-​testi Bibliċi li fihom, sirt taf it-​tagħlim bażiku tal-​Kelma t’Alla. Imma xi ngħidu jekk it-​tagħlim taʼ l-​organizzazzjoni reliġjuża li int assoċjat magħha m’huwiex fi qbil maʼ dak tal-​Kelma t’Alla? Allura għandek problema serja. Hija l-​problema li tiddeċiedi jekk taċċettax il-​verità tal-​Bibbja jew jekk tiċħadhiex għax tippreferi tagħlim li l-​Bibbja ma tappoġġjax. M’għandniex xi ngħidu, dak li tagħmel għandu jkun id-​deċiżjoni tiegħek stess. Madankollu, għandek tiżen l-​affarijiet bir-​reqqa. Dan huwa għaliex id-​deċiżjoni li tieħu se teffettwa l-​qagħda tiegħek m’Alla u l-​prospetti tiegħek li tgħix għal dejjem fil-​ġenna fuq l-​art.

IŻOMMU SEPARATI MID-​DINJA

14. (a) Liema hija marka oħra li tidentifika l-​vera reliġjon? (b) Għala huwa daqshekk importanti li l-​veri adoraturi jwettqu din il-​ħtieġa?

¹⁴ Jerġaʼ marka oħra li tidentifika lil dawk li jipprattikaw il-​vera reliġjon hija li, bħalma qal Ġesù, “m’huma ebda parti mid-​dinja.” (Ġwann 17:14) Dan ifisser li l-​veri adoraturi jżommu separati mid-​dinja korrotta u mill-​interessi tagħha. Ġesù Kristu rrifjuta li jsir ħakkiem politiku. (Ġwann 6:15) Tistaʼ tapprezza għala li żżomm separat mid-​dinja huwa daqshekk importanti meta tiftakar li l-​Bibbja tgħid li Satana x-​Xitan huwa l-​ħakkiem tad-​dinja. (Ġwann 12:31; 2 Korintin 4:4) Is-​serjetà taʼ din il-​kwistjoni tidher ukoll mill-​istqarrija tal-​Bibbja: “Kulmin, għalhekk, irid ikun ħabib tad-​dinja qiegħed jagħmel lilu nnifsu għadu t’Alla.”​—Ġakbu 4:4.

15. (a) Il-knejjes li tagħhom int midħla huma tassew “ebda parti mid-​dinja”? (b) Taf b’xi reliġjon li twettaq din il-​ħtieġa?

¹⁵ Juru l-​fatti li l-​knejjes fil-​komunità tiegħek jieħdu din il-​kwistjoni bis-​serjetà? Huma l-​kleru kif ukoll il-​membri tal-​kongregazzjonijiet tassew “ebda parti mid-​dinja”? Jew huma involuti profondament fin-​nazzjonaliżmu, fil-​politika u fil-​ġlieda taʼ bejn il-​klassijiet tad-​dinja? Dawn il-​mistoqsijiet m’humiex tqal biex tweġibhom, ladarba l-​attivitajiet tal-​knejjes huma magħrufin ħafna. Mill-​banda l-​oħra, huwa wkoll faċli li tiċċekkja l-​attivitajiet tax-​Xhieda taʼ Jehovah. Billi tagħmel dan, se ssib li huma tassew jimxu wara l-​eżempju taʼ Kristu u tas-​segwaċi bikrin tiegħu billi jżommu separati mid-​dinja, mill-​interessi politiċi tagħha u mill-​modi egoistiċi, immorali u vjolenti tagħha.​—1 Ġwann 2:​15-17.

IMĦABBA BEJNIETHOM

16. X’inhu mod importanti li bih il-​veri dixxipli taʼ Kristu jistgħu jiġu identifikati?

¹⁶ Mod importanti ħafna li bih il-​veri dixxipli taʼ Kristu jistgħu jiġu identifikati huwa permezz taʼ l-​imħabba li għandhom bejniethom. Ġesù qal: “B’dan kulħadd se jkun jaf li intom dixxipli tiegħi, jekk għandkom l-​imħabba fostkom.” (Ġwann 13:35) Għandhom l-​organizzazzjonijiet reliġjużi li tagħhom int midħla din l-​imħabba? X’jagħmlu, per eżempju, meta l-​pajjiżi li fihom jgħixu jiggwerraw kontra xulxin?

17. L-organizzazzjonijiet reliġjużi u l-​membri tagħhom kemm qegħdin iwettqu l-​ħtieġa li juru mħabba bejniethom?

¹⁷ Int taf x’jiġri normalment. Għall-​kmand taʼ nies tad-​dinja l-​membri tad-​diversi organizzazzjonijiet reliġjużi jmorru fil-​kamp tal-​battalja u jbiċċru lil sħabhom fit-​twemmin taʼ pajjiż ieħor. B’hekk Kattoliku joqtol lil Kattoliku ieħor, Protestant joqtol lil Protestant ieħor u Musulman joqtol lil Musulman ieħor. Taħseb int li korsa bħal din hija skond il-​Kelma t’Alla u tassew turi l-​ispirtu t’Alla?​—1 Ġwann 3:​10-12.

18. Ix-Xhieda taʼ Jehovah kif iwettqu din il-​kwistjoni li juru mħabba bejniethom?

¹⁸ Ix-Xhieda taʼ Jehovah kif jaġixxu f’din il-​kwistjoni taʼ li juru mħabba lejn xulxin? Ma jsegwux il-​korsa tar-​reliġjonijiet tad-​dinja. Ma jbiċċrux lil sħabhom fit-​twemmin fuq il-​kampijiet tal-​battalja. Ma sarux ħatjin li jgħixu gidba billi jgħidu, “Inħobb ’l Alla,” fil-​waqt li jobogħdu lil ħuhom taʼ nazzjonalità, tribù jew razza oħra. (1 Ġwann 4:​20, 21) Imma juru mħabba wkoll b’modi oħrajn. Kif? Bil-​mod li bih jittrattaw mal-​ġirien tagħhom u bl-​isforzi taʼ mħabba tagħhom biex jgħinu lil oħrajn jitgħallmu dwar Alla.​—Galatin 6:10.

RELIĠJON VERA WAĦDA

19. Għala huwa kemm loġiku kif ukoll Skritturali li tgħid li hemm biss reliġjon vera waħda?

¹⁹ Hija biss ħaġa loġika li jkun hemm reliġjon vera waħda. Dan huwa fi qbil mal-​fatt li dak Alla veru hu Alla, “mhux taʼ diżordni, imma taʼ paċi.” (1 Korintin 14:33) Il-​Bibbja tgħid li fil-​fatt hemm biss “fidi waħda.” (Efesin 4:5) Min, allura, huma dawk li jifformaw il-​ġemgħa t’adoraturi veri llum?

20. (a) Meta tqis l-​evidenza, dan il-​ktieb lejn min jipponta bħala l-​veri adoraturi llum? (b) Int hekk temmen? (ċ) X’inhu l-​aħjar mod li bih issir taf sewwa lix-​Xhieda taʼ Jehovah?

²⁰ Ma naħsbuhiex darbtejn biex ngħidu li huma x-​Xhieda taʼ Jehovah. Biex int tikkonvinċi ruħek dwar dan nistednuk li ssir tafhom aħjar. L-​aħjar mod biex tagħmel dan huwa li tattendi għal-​laqgħat tagħhom fis-​Sala tas-​Saltna tax-​Xhieda taʼ Jehovah. Ladarba l-​Bibbja turi illi li tipprattika l-​vera reliġjon iġib kuntentizza kbira issa u jiftaħ it-​triq biex tgawdi ħajja taʼ dejjem fil-​ġenna fuq l-​art, żgur li se jiswielek li tinvestiga. (Dewteronomju 30:​19, 20) Għandek l-​istedina kordjali tagħna biex tagħmel hekk. Għala ma tinvestigax issa?

[Stampa f’paġna 185]

Kieku kellek tkellem lil xi ħadd dwar Jehovah u s-​saltna tiegħu, in-​nies maʼ liema reliġjon jassoċjawk?

[Stampi f’paġna 186]

Tkun persuna qiegħda tirrispetta l-​Kelma t’Alla jekk tonqos li timxi fuqha?

[Stampa f’paġna 188, 189]

Ġesù rrifjuta li jsir ħakkiem politiku

[Stampa f’paġna 190]

Int kordjalment mistieden biex tattendi għal-​laqgħat tax-​Xhieda taʼ Jehovah