‘Salamun Ma Kienx Jilbes bħal Wieħed Minnhom’

FJURI salvaġġi bħal dawk li jidhru hawn tarahom spiss maġenb it-​toroq fin-​nofsinhar taʼ l-​Afrika. Dawn jissejħu cosmos u oriġinaw fit-​tropiċi taʼ l-​Amerika. Dawn il-​fjuri mill-​isbaħ għandhom mnejn ifakkruna f’lezzjoni li għallem Ġesù. Ħafna minn dawk li kienu qed jisimgħuh kienu foqra, u kienu ansjużi dwar il-​bżonnijiet fiżiċi tagħhom, dwar l-​ikel u l-​ilbies.

“Għall-​ilbies,” staqsa Ġesù, “għalfejn tinkwetaw ruħkom? Ħarsu lejn il-​ġilji taʼ l-​għelieqi, kif jikbru! U la jitħabtu u lanqas jinsġu. Madankollu, ngħidilkom, anqas Salamun, fil-​glorja kollha tiegħu, ma kien jilbes bħal wieħed minnhom.”—Mattew 6:28, 29.

Kien hemm ħafna suġġerimenti dwar liema tip taʼ fjura salvaġġa kellu f’moħħu Ġesù. Madankollu, Ġesù kompla billi qabbilha mal-​ħxejjex komuni meta qal: “Mela jekk Alla jlibbes hekk imqar ħaxixa selvaġġa li llum hawn u għada tinxteħet fil-​forn, kemm aktar lilkom, nies taʼ fidi ċkejkna!”—Mattew 6:30.

Għalkemm il-​cosmos m’oriġinawx minn Iżrael, dawn żgur jappoġġaw il-​lezzjoni li kien qed jgħallem Ġesù. Kemm jekk tarahom mill-​bogħod kif ukoll mill-​viċin, is-​sbuħija tagħhom timpressjonak u l-​fotografi u l-​pitturi jħobbu jużawhom ħafna f’xogħolhom. Verament, Ġesù ma kienx qed jesaġera meta qal, “anqas Salamun, fil-​glorja kollha tiegħu, ma kien jilbes bħal wieħed minnhom.”

X’inhi l-​lezzjoni għalina llum? Dawk li jaqdu lil Alla jistgħu jkunu żguri li hu se jgħinhom jiksbu l-​bżonnijiet anki fi żminijiet diffiċli. Ġesù spjega: “Fittxu mela s-​Saltna [t’Alla], u magħha mbagħad iżidilkom dawn [jiġifieri l-​ikel u l-​ilbies bżonnjuż] ukoll.” (Luqa 12:31) Iva, benefiċċji veri jiġu meta tfittex is-​Saltna t’Alla. Imma taf x’inhi s-​Saltna t’Alla u x’se tagħmel għall-​umanità? Ix-​Xhieda taʼ Jehovah se jieħdu pjaċir jgħinuk issib it-​tweġibiet mill-​Bibbja.