“Ħalli Kulmin Jismaʼ Jgħid: ‘Ejja!’”

“L-​ispirtu u l-​għarusa jibqgħu jgħidu: ‘Ejja!’ U ħalli kulmin jismaʼ jgħid: ‘Ejja!’ U ħalli kulmin hu bil-​għatx jiġi; ħalli kulmin jixtieq jieħu l-​ilma tal-​ħajja b’xejn.”—RIVELAZZJONI 22:17.

1. Lejn liema “ilma” mistednin biex ‘niġu!’?

INTI mistieden biex ‘tiġi!’ Tiġi għal liema ħaġa? Sewwa, ejja biex taqtaʼ l-​għatx tiegħek bl-​ilma. Dan mhux ilma ordinarju imma hu l-​istess ilma li Ġesù Kristu tkellem dwaru meta qal lill-​mara Samaritana ħdejn il-​bir: “Kulmin jixrob mill-​ilma li se nagħtih jien qatt ma se jaqbdu għatx assolutament, imma l-​ilma li se nagħtih se jsir fih għajn taʼ ilma jbaqbaq biex jagħti l-​ħajja taʼ dejjem.” (Ġwann 4:14) Ġesù minfejn ġabu dan l-​“ilma”?

2. X’inhu s-​sors tal-​“ilma,” u biss wara liema ġrajja setaʼ jgelgel?

² L-​appostlu Ġwanni kien ipprivileġġjat li jara f’viżjoni s-​sors li minnu ħareġ dan l-​“ilma,” kif innota f’Rivelazzjoni 22:1: “Urieni xmara taʼ ilma tal-​ħajja, ċar daqs il-​kristall, igelgel ’il barra mit-​tron t’Alla u tal-​Ħaruf.” Iva, is-​sors taʼ dan l-​ilma ċar daqs il-​kristall b’elementi li jagħtu l-​ħajja m’hu ħadd għajr Dak li Jagħti l-​Ħajja, Jehovah innifsu, li jagħmlu disponibbli permezz tal-​Ħaruf, Ġesù Kristu. (Qabbel Rivelazzjoni 21:6.) Ladarba jissemma t-​“tron t’Alla u tal-​Ħaruf,” irid ikun wara t-​twaqqif tas-​Saltna Messjanika fl-​1914, jiġifieri, wara li beda jum il-​Mulej, li l-​ilma tal-​ħajja jibda jgelgel.—Rivelazzjoni 1:10.

3, 4. L-​“ilma” x’jirrappreżenta, u għal min irid ikun disponibbli?

³ Dan l-​ilma tal-​ħajja x’jissimbolizza? Hu jagħti stampa tal-​provvediment t’Alla biex jirrestawra ħajja umana perfetta, ħajja taʼ dejjem fil-​perfezzjoni fuq art mibdula f’ġenna. L-​ilma tal-​ħajja jirrappreżenta l-​provvedimenti kollha għal ħajja permezz taʼ Ġesù Kristu. Huwa dan kollu disponibbli issa? Le, mhux kollu kemm hu, għax Alla jrid l-​ewwel ineħħi s-​sistema taʼ affarijiet preżenti mill-​agħar bil-​mexxej inviżibbli tagħha, Satana x-​Xitan. Imma aħna nistghu nieħdu dak li hu disponibbli minn dan l-​“ilma” issa billi nisimgħu u nobdu l-​aħbar tajba tas-​Saltna u nġibu l-​ħajjiet tagħna fi qbil maʼ dan. —Ġwann 3:16; Rumani 12:2.

⁴ B’hekk, wara li wera lil Ġwanni x-​’xmara tal-​ħajja,’ Ġesù tkellem maʼ Ġwanni dwar il-​għan Tiegħu f’li jibgħat l-​anġlu Tiegħu bil-​viżjoni. Imbagħad Ġwanni semaʼ l-​proklama: “L-​ispirtu u l-​għarusa jibqgħu jgħidu: ‘Ejja!’ U ħalli kulmin jismaʼ jgħid: ‘Ejja!’ U ħalli kulmin hu bil-​għatx jiġi; ħalli kulmin jixtieq jieħu l-​ilma tal-​ħajja b’xejn.” (Rivelazzjoni 22:17) Għaldaqstant, qaddejja t’Alla jestendu l-​istedina lil uħud bil-​għatx biex jibdew jixorbu mill-​provvedimenti t’Alla biex jiksbu ħajja eterna fuq l-​art permezz tal-​Ħaruf t’Alla.—Ġwann 1:29.

Tqum Ħtieġa għal Ilmijiet tal-​Ħajja

5. L-​umanità kif ġiet fil-​bżonn taʼdan il-​provvediment divin?

⁵ B’ħasra, l-​ewwel ġenituri tal-​familja umana ma żammewx mal-​korsa taʼ ħajja li setgħet tagħti lin-​nisel tagħhom l-​opportunità li jgawdu ħajja umana perfetta għal dejjem f’dar ġenna. Ħajja taʼ dejjem għall-​bnedmin kienet tinħtieġ li Adam jagħmel il-​għażla intelliġenti li jaqdi lill-​Ħallieq tiegħu bl-​ubbidjenza. Taħt l-​influwenza taʼ ħlejqa spirtu ribelluż, Eva bdiet iċ-​ċaqlieqa li wasslet għall-​mewt tal-​umanità, u Adam, ir-​raġel perfett tagħha, għażel li jingħaqad magħha f’dik il-​korsa li ġġib il-​mewt. B’hekk, bħala dak li jagħti l-​ħajja naturali lil ġenerazzjonijiet suċċessivi taʼ bnedmin Adam kien verament dak il-​wieħed li introduċa l-​avvanz tal-​mewt għal ġol-​familja umana kollha. Huwa b’hekk li l-​Bibbja tistqarr: “Permezz taʼ bniedem wieħed id-​dnub daħal fid-​dinja u l-​mewt permezz tad-​dnub, u b’hekk il-​mewt infirxet fuq il-​bnedmin kollha għaliex kollha kienu dinbu.” (Rumani 5:12) Kien wara li Adam u Eva waqgħu fid-​dnub li huma bdew iżidu membri ġodda mal-​familja umana.—Salm 51:5.

6. Jehovah għala rranġa biex l-​“ilma” jkun disponibbli?

⁶ Kien Alla se jinżamm għal dejjem milli jwettaq il-​għan tiegħu taʼ ġenna tal-​art mimlija bi bnedmin perfetti? It-​tweġiba Biblika hi, naturalment, le! Madankollu, bil-​għan li jwettaq l-​iskop tiegħu, Jehovah għamel provvediment taʼ mħabba li kien se jaġixxi kontra l-​falliment diżastruż taʼ Adam u madankollu jkun f’armonija sħiħa mal-​ġustizzja u t-​tjieba, li tagħhom Hu l-​espressjoni sħiħa u konklussiva. Hu jagħmel dan permezz tax-​“xmara taʼ ilma tal-​ħajja.” Permezz tagħha, hu se jirrestawra ħajja umana perfetta lil bnedmin ubbidjenti, li għalihom ġiet miċħuda r-​resqa lejn is-​Sors tal-​ħajja. Din ix-​xmara tgelgel fis-​sens l-​iktar sħiħ tagħha matul ir-​Renju taʼ Elf Sena taʼ Ġesù Kristu. B’hekk, matul il-​Ħakma Millennjali taʼ Kristu, bnedmin, inklużi dawk irxoxtati mill-​mewt, iridu jixorbu mix-​“xmara taʼ ilma tal-​ħajja.”−Qabbel Eżekjel 47:l-10; Atti 24:15.

7. Fuq liema bażi jsir il-​provvediment għall-​“ilma”?

⁷ Jehovah jieħu gost bil-​ħajja tiegħu stess u hu jieħu gost ukoll jagħti l-​privileġġ taʼ ħajja intelliġenti lil xi wħud mill-​ħolqien tiegħu. Il-​bażi tal-​provvedimenti taʼ Jehovah li jagħtu l-​ħajja hi s-​sagrifiċċju taʼ fidwa taʼ Ġesù. (Mark 10:45. 1 Ġwann 4:9, 10) Involuta wkoll hija l-​Kelma t’Alla, li l-​Bibbja xi drabi ssejjaħ “ilma.” (Efesin 5:26) Alla Jehovah huwa liberu li jgħid, “Ejja!” lil ħlejjaq umani, li sofrew it-​telfa tal-​provvedimenti oriġinali li Alla għamel għall-​koppja umana perfetta, Adam u Eva.

Il-​Klassi tal-​Għarusa Testendi l-​Istedina, “Ejja!”

8. Lil min u meta ġie pprovdut l-​ewwel dan l-​“ilma”?

⁸ L-​ewwel nies li jestendu l-​istedina “Ejja!” huma dawk li jiffurmaw il-​għarusa figurattiva tal-​Ħaruf, l-​Iben spiritwali Imwieled l-​ewwel taʼ Jehovah. (Rivelazzjoni 14:1, 3, 4; 21:9) Il-​għarusa spiritwali taʼ Kristu mhix tgħid “Ejja!” lilha nfisha, jiġifieri, lil dawk li Alla Jehovah għad irid jiġbor bħala parti mill-​klassi tal-​għarusa sabiex jagħmilha tgħodd 144,000. Dawk il-​kelmiet taʼ stedina huma estiżi lil bnedmin li jittamaw li jiksbu ħajja umana perfetta fuq l-​art wara Armageddon. (Rivelazzjoni 16:14, 16) Matul din il-​konklużjoni tas-​sistema taʼ affarijiet mill-​1914 ’il hawn, aħna smajna l-​istedina tiġi estiża mill-​“għarusa,” f’kollaborazzjoni mal-​ispirtu qaddis t’Alla.

9. Kif nafu li m’huwiex biss għal grupp żgħir?

⁹ B’mod kommoventi, l-​aħħar ktieb tal-​Bibbja juri li ‘folla kbira, li l-​ebda bniedem maʼ setaʼ jgħoddha,’ kellha twieġeb għall-​proklamazzjoni tal-​aħbar tajba tas-​Saltna t’Alla u b’mod sod kienu se jpoġġu lilhom infushom fuq in-​naħa taʼ dak il-​gvern irjali. (Rivelazzjoni 7:9, 10, 16, 17) Int wieħed minn dik il-​folla kbira? Mela, “ħalli kulmin jismaʼ jgħid: ‘Ejja!’”

L-​Ispirtu u l-​Għarusa Jgħidu, “Ejja!”

10. Fejn irid joriġina l-​ilma simboliku, u għala?

¹⁰ Imma Alla u l-​Għarus figurattiv għala m’humiex imsemmijin f’Rivelazzjoni 22:17? L-​ewwel, innota li l-​vers ma jgħidx taħt id-​direzzjoni taʼ min jaġixxi l-​ispirtu. Madankollu, ir-​referenza għal spirtu tidderieġi l-​attenzjoni tagħna lejn Alla Jehovah innifsu. Il-​Missier mhux mitfugħ ’il barra mill-​istampa, ladarba hu l-​istess Sors taʼ spirtu qaddis. It-​tieni, l-​Iben jikkopera għalkollox maʼ Missieru, bħalma hu nnifsu jgħid: “L-​Iben ma jistaʼ jagħmel lanqas ħaġa waħda bl-​inizzjattiva tiegħu stess, imma dak biss li hu jilmaħ lil Missieru jagħmel.” (Ġwann 5:19) Barra minn dan, fil-​waqt li din l-​istedina hija stqarrija mnebbħa li fl-​aħħar mill-​aħħar toriġina mingħand Alla Jehovah, bnedmin jistgħu jirċievu direzzjoni divina, jew “espressjonijiet imnebbħa,” permezz taʼ Ġesù Kristu, “il-​Kelma.” (Rivelazzjoni 22:6; ukoll 22:17 Reference Bible, nota taʼ taħt. Ġwann 1:1) B’mod xieraq, mela, aħna nassoċjaw lil Kristu, l-​Għarus, maʼ din l-​istedina. Iva, nistgħu nkunu żguri li kemm Alla Jehovah, Missier il-​Għarus, u kemm Ġesù Kristu, l-​Għarus, jingħaqdu mal-​“għarusa” permezz tal-​ispirtu qaddis f’li jgħidu, “Ejja!”

11, 12. (a) Liema indikazzjoni bikrija kien hemm li l-​istedina biex tixrob kellha tinfirex? (b) Il-​kwistjoni kif saret dejjem iżjed ċara matul is-​snin?

¹¹ Għal għaxriet taʼ snin din l-​istedina “Ejja!” ilha tmur għand nies bil-​għatx għal “ilma tal-​ħajja.” Saħansitra lura fl-​1918, il-​klassi tal-​għarusa bdiet tippriedka messaġġ li b’mod partikulari kien jinvolvi lil dawk li setgħu jgħixu fuq l-​art. Kienet it-​taħdita pubblika intitolata “Millions Now Living May Never Die” (Miljuni Issa Ħajjin Jistgħu Ma Jmutu Qatt). Din offriet tama li ħafna nies kienu se jibqgħu ħajjin f’Armageddon u wara dan jiksbu ħajja eterna f’Ġenna tal-​art taħt is-​Saltna Messjanika t’Alla. Imma dak il-​messaġġ ma weriex b’mod definit it-​triq għal dan il-​privileġġ taʼ salvazzjoni, għajr bi tjieba inġenerali.

¹² Biex jilħqu iżjed nies bl-​istedina, “Ejja!” fl-​1922 il-​messaġġ mar għand dawk kollha li kienu interessati f’li jaqdu ’l Alla: “Irriklamaw lis-​Sultan u lis-​Saltna.” Fl-​1923 il-​klassi tal-​għarusa fehmet li “n-​ngħaġ” u “l-​mogħoż” tal-​parabbola taʼ Ġesù f’Mattew 25:3l-46 jidhru qabel Armageddon. Imbagħad, fl-​1929, The Watch Tower tal-​15 taʼ Marzu ġab l-​artiklu “Gracious Invitation” (Stedina Grazzjuża). It-​test ewlieni tiegħu kien Rivelazzjoni 22:17, u enfasizza r-​responsabbiltà tal-​klassi tal-​għarusa li testendi l-​istedina, “Ejja!”−Paġni 87-9.a

Ngħaġ Oħra Jingħaqdu f’li jgħidu, “Ejja!”

13, 14. Fis-​snin tletin, liema kjarifika oħra ġiet ipprovduta li oħrajn kellhom jixorbu mill-​ilma simboliku?

¹³ Barra minn dan, saħansitra lura fl-​1932 The Watchtower indika ċar ir-​responsabbiltà tan-​“ngħaġ oħra,” fis-​sehem tagħhom, li jgħidu, “Ejja!” (Ġwann l0:16) Fil-​ħarġa tiegħu tal-​1 t’Awissu, paġna 232, paragrafu 29 stqarr: “Xhieda taʼ Jehovah issa għandhom iż-​żelu bħal dak taʼ Ġeħu u għandhom jinkuraġġixxu lill-​klassi taʼ Ġeħonadab [ngħaġ oħra] biex jiġu magħhom u biex jieħdu xi sehem f’li jxandru lil oħrajn li s-​saltna t’Alla hija qrib.” Imbagħad, wara li kkwota Rivelazzjoni 22:17, il-​paragrafu qal: “Ħalli l-​midlukin jinkuraġġixxu lil dawk kollha li jridu biex jieħdu sehem f’li jgħidu l-​aħbar tajba tas-​saltna. M’hemmx għalfejn ikunu midlukin tal-​Mulej sabiex jiddikjaraw il-​messaġġ tal-​Mulej. Huwa taʼ faraġ kbir għax-​xhieda taʼ Jehovah li issa jkunu jafu li huma mħollijin iġorru l-​ilmijiet tal-​ħajja lil klassi taʼ nies li tistaʼ tinħeles f’Armageddon u tingħata ħajja taʼ dejjem fuq l-​art minħabba t-​tjubija kbira taʼ Jehovah.”b

¹⁴ Mill-​1934 ’il quddiem, il-​fdal midluk indika li dawn in-​ngħaġ oħra jridu issa jagħmlu dedikazzjoni tagħhom infushom lil Alla u jissimbolizzaw din id-​dedikazzjoni bil-​magħmudija tal-​ilma u mbagħad jingħaqdu mal-​klassi tal-​għarusa f’li jgħidu, “Ejja!” lil jerġaʼ wħud oħra li huma bil-​għatx. B’hekk, kien hemm issa stedina definita li qed tiġi estiża mill-​klassi tal-​għarusa biex jinġabru dawn in-​ngħaġ oħra bil-​għatx flimkien fil-​“merħla waħda” taħt ir-​“ragħaj wieħed,” Ġesù Kristu. (Ġwann l0:16) Fl-​1935 il-​fdal midluk kienu mqanqlin ferm li jsiru jafu li fil-​konvenzjoni ġenerali tagħhom dik is-​sena l-​klassi taʼ nies bħal ngħaġ li lilhom kienu qed igħidu, “Ejja!” kienet fil-​fatt il-​“folla kbira” taʼ Rivelazzjoni 7:9-17. Dan ta spinta tremenda lix-​xogħol taʼ stedina.

15. “L-​ispirtu” kif kien involut fl-​istedina, “Ejja”?

¹⁵ F’li tgħid: “Ejja!” l-​klassi tal-​għarusa kienet fi qbil mal-​ispirtu t’Alla. Permezz tal-​ispirtu tiegħu f’li jiftaħ it-​tifsir tal-​profeziji tal-​Kelma miktuba tiegħu, hu ġiegħel lill-​fdal tal-​klassi tal-​għarusa biex jestendu l-​istedina. Dawn il-​profeziji li fuqhom kienet ibbażata l-​istedina tagħhom kienu ġew imnebbħa bl-​ispirtu t’Alla. Mela kien, fil-​fatt, l-​ispirtu t’Alla ħiereġ permezz taʼ Kristu u l-​għarusa tiegħu li kien qed igħid lill-​folla kbira taʼ nies bħal ngħaġ, “Ejja!”—Rivelazzjoni 19:10.

16. L-​ispirtu u l-​għarusa kif inhuma involuti fl-​istedina llum?

¹⁶ Sal-​ġurnata tal-​lum l-​ispirtu u l-​għarusa, irrappreżentati mill-​fdal, “jibqgħu jgħidu: ‘Ejja!”ˈ Il-​fdal igħidu lil dawn in-​ngħaġ oħra biex jistiednu jerġaʼ oħrajn biex ‘jiġu!’ M’għandhomx iżommu l-​“ilma tal-​ħajja,” kif inhu disponibbli llum, għalihom infushom. Huma jridu jobdu l-​kmand mingħand “l-​ispirtu u l-​għarusa,” jiġifieri: “Ħalli kulmin jismaʼ jgħid: ‘Ejja!’” Dawk kollha li qed jaqtgħu l-​għatx tagħhom iridu jxerrdu l-​istedina. Huma jridu jestenduha lil kulħadd mingħajr ma jqisu r-​razza, nazzjonalità, lingwa, jew reliġjon tal-​preżent—lil kulħadd kullimkien! Dak li hemm disponibbli mill-​“ilma tal-​ħajja” fiż-​żmien preżenti hu dak li x-​Xhieda taʼ Jehovah jistiednu u jgħinu lill-​popli kollha biex jieħdu minnu, b’xejn!

17. Liema xorta taʼ “ilma” huwa disponibbli llum?

¹⁷ Mal-​art kollha, il-​Ħaruf, Ġesù Kristu, qiegħed tabilħaqq jiggwida lil folla kbira “lejn għejjun taʼ ilmijiet tal-​ħajja.” (Rivelazzjoni 7:17) L-​ebda ilma mniġġes dan, imma ilma ċar, frisk, bnin dirett mis-​Sors tiegħu. Dawn l-​ilmijiet simboliċi jfissru iktar minn ilmijiet fis-​sens taʼ fehma taʼ verità Biblika; huma jfissru l-​provvedimenti kollha t’Alla permezz taʼ Ġesù Kristu li jibdew saħansitra issa jpoġġu lill-​folla kbira fil-​mogħdija biex jiksbu ħajja taʼ dejjem perfetta fil-​hena.

Ingħaqad Issa fil-​Proklamazzjoni

18. Kemm hija mifruxa l-​istedina fi żmienna?

¹⁸ Diġà, din il-​folla kbira tgħodd bosta miljuni. Huma b’mod żeluż ikomplu jxandru l-​aħbar tajba tas-​Saltna fl-​art abitata kollha. Huma regolarment jagħtu rapport tal-​attivitajiet tagħhom tal-​għalqa f’li jippridkaw l-​aħbar tajba tas-​Saltna, li issa waslet għand 212 artijiet. Dment li jibqaʼ jippermetti ż-​żmien matul din il-​konklużjoni tas-​sistema taʼ affarijiet, l-​istedina se tkompli fi qbil mal-​paċenzja u s-​sabar fit-​tul taʼ Alla Jehovah, il-​Għassies il-​Kbir taż-​Żmien. Hu se jkun jaf meta ż-​żmien jagħlaq u meta hu l-​mument kritiku biex hu jagħmel lilu nnifsu magħruf lil kulħadd bħala Jehovah, bħalma wiegħed li jagħmel skond stqarrijiet ripetuti fil-​profezija tal-​Bibbja.—Eżekjel 36:23; 38:2l-23; 39:7.

19. Għala nistgħu ngħidu li dan l-​“ilma” qed jiġi offrut b’xejn?

¹⁹ Dment li għad baqaʼ ż-​żmien, għalhekk, membri tal-​folla kbira bil-​ferħ jipparteċipaw mal-​fdal tal-​kumpanija tal-​għarusa f’li jgħidu: ‘Ejjew u ħudu mill-​ilmijiet tal-​ħajja b’xejn!’ Ix-​xandara taʼ din l-​aħbar tajba li ssalva l-​ħajja qegħdin jagħmlu din il-​proklamazzjoni b’xejn, bla ma jitħallsu tas-​servizzi li jagħtu hekk kif jiċċirkolaw il-​messaġġ tas-​Saltna mad-​dinja kollha.

20. X’se jirriżulta minħabba li dan l-​“ilma” huwa disponibbli?

²⁰ L-​ilmijiet tal-​ħajja issa huma disponibbli mal-​globu kollu, sabiex b’hekk nies li jridu jieħdu minnhom jistgħu jagħmlu dan sa ma jkunu sodisfatti għalkollox b’riżultati li jsalvaw il-​ħajja. L-​umanità mifdija se tgawdi ħajja bla tmiem hawn stess fuq din l-​art, li trid tiġi trasformata f’ġenna, billi b’hekk jiġi vvindikat il-​għan prezzjuż taʼ Jehovah. Il-​Ħallieq tagħna għamel l-​art mhux għal xejn imma biex tkun ġnien taʼ Għeden, jew Ġenna taʼ pjaċir mad-​dinja kollha, abitata bi ħlejjaq umani perfetti fix-​xbiha u x-​xebh t’Alla.

21. Il-​għan t’Alla għall-​art kif se jitwettaq?

²¹ Ċertament, se jkun taʼ ferħ u privileġġ grandjuż b’mod li ma jitfissirx li tkun f’dinja ġdida bħal din! Imbagħad il-​kariga li Alla ta lill-​ewwel koppja umana f’Ġenesi 1:27, 28 se titwettaq b’mod abbundanti. B’ħajr lil Jehovah għal mod taʼ kapaċità li bih ittratta mal-​gwaj li waqaʼ fuq il-​familja umana, l-​art se tiġi mrażżna sal-​punt li ssir ġenna u se timtela b’razza umana perfetta. Iva, Alla se jara kulma għamel, u ħares, se jkun tajjeb ħafna. Int se tkun hemm? Jekk iva, mela trid minn issa b’apprezzament tibda tieħu mill-​ilma tal-​ħajja b’xejn. “Ejja!” u ixrob sa ma timtela u aqtaʼ l-​għatx tiegħek bl-​ilma tal-​ħajja li beda jgelgel issa u se jgelgel bis-​sħiħ matul il-​Millennju li ġej. U ħalli kulmin jismaʼ din l-​istedina ħelwa jgħid: “Ejja!”

[Noti taʼ taħt]

X’Inhi t-​Tweġiba Tiegħek?

◻ X’“ilma qed jirreferi għalih Rivelazzjoni 22:17?

◻ X’inhu s-​sors tal-​“ilma”?

◻ L-​“ilma għala hu meħtieġ, u meta biss setaʼ jibda jgelgel?

◻ Fit-​test tagħna, ir-​referenza għal “spiritu” x’tindika, u “l-​għarusa” kif inhi involuta?

◻ Min jistaʼ jieħu mill-​“ilma” u b’liema riżultat?