Naqdu Lealment lil Kristu s-​Sultan

“Tawh ħakma, ġieħ, u saltna, biex lilu jaqdi kull ġens, u poplu, u lsien.”—DANJEL 7:14.

1, 2. Kif nafu li Kristu ma ħax il-​qawwa kollha tas-​Saltna fis-​sena 33 E.K.?

LIEMA ħakkiem jistaʼ jagħti ħajtu għas-​sudditi tiegħu u madankollu jerġaʼ jgħix biex jaħkem bħala sultan? Liema sultan jistaʼ jgħix fuq l-​art, jirbaħ il-​fiduċja u l-​lealtà tas-​sudditi tiegħu, u mbagħad jaħkem mis-​sema? L-​uniku individwu li setaʼ jagħmel dan—u iktar—kien Ġesù Kristu. (Luqa 1:​32, 33) F’Pentekoste tas-​sena 33 E.K., wara l-​mewt, l-​irxoxt, u t-​tlugħ taʼ Kristu fis-​sema, Alla “għamlu kap fuq kollox għall-​kongregazzjoni.” (Efesin 1:​20-22; Atti 2:​32-36) Għalhekk, Kristu beda jaħkem imma f’sens limitat. L-​ewwel sudditi tiegħu kienu l-​Kristjani li kienu midlukin bl-​ispirtu, li fformaw l-​Iżrael spiritwali, “l-​Iżrael t’Alla.”—Galatin 6:16; Kolossin 1:13.

² Madwar 30 sena wara Pentekoste tas-​sena 33 E.K., l-​appostlu Pawlu kkonferma li Kristu kien għadu ma ħax il-​qawwa kollha tas-​Saltna, imma kien “fuq il-​leminija t’Alla, jistenna, minn dak iż-​żmien ’il quddiem, sakemm l-​għedewwa tiegħu jitqiegħdu bħala banketta għal saqajh.” (Ebrej 10:​12, 13) Imbagħad, lejn l-​aħħar taʼ l-​ewwel seklu E.K., ix-​xwejjaħ appostlu Ġwanni f’viżjoni ra bil-​quddiem lil Ġeħova, is-​Sovran Universali, jaħtar lil Ġesù Kristu bħala s-​Sultan tas-​Saltna tas-​sema li kienet għadha kif ġiet stabbilita. (Rivelazzjoni 11:15; 12:​1-5) Minfejn ninsabu aħna fl-​istorja tal-​bniedem, nistgħu naraw l-​evidenza kbira li tikkonferma li Kristu beda jaħkem bħala s-​Sultan Messjaniku fis-​sema fl-​1914.a

3. (a) L-aħbar tajba tas-​Saltna liema aspett ġdid saret tinkludi mill-​1914 ’l hawn? (b) Liema mistoqsijiet nistgħu nistaqsu lilna nfusna?

³ Iva, mill-​1914 ’l hawn l-​aħbar tajba tas-​Saltna bdiet tinkludi aspett eċċitanti ġdid. Kristu qed jaħkem bħala s-​Sultan tas-​Saltna tas-​sema t’Alla, minkejja li jinsab ‘f’nofs l-​għedewwa tiegħu.’ (Salm 110:​1, 2; Mattew 24:14; Rivelazzjoni 12:​7-12) Iktar minn hekk, madwar id-​dinja, is-​sudditi leali tiegħu bil-​ħerqa qed iwieġbu għall-​awtorità tiegħu billi jipparteċipaw fi programm t’edukazzjoni Biblika li qed isir madwar id-​dinja fuq skala li qatt ma kien hawn bħalha fl-​istorja tal-​bniedem. (Danjel 7:​13, 14; Mattew 28:18) Il-​Kristjani midlukin bl-​ispirtu, “ulied is-​saltna,” jaqdu bħala “ambaxxaturi li jissostitwixxu lil Kristu.” Huma appoġġati lealment minn folla li dejjem qed tiffjorixxi taʼ “nagħaġ oħrajn” taʼ Kristu, li jaħdmu bħala messaġġiera tas-​Saltna t’Alla. (Mattew 13:38; 2 Korintin 5:20; Ġwanni 10:16) Minkejja dan, irridu nanalizzaw jekk aħna bħala individwi nirrikonoxxux verament l-​awtorità taʼ Kristu. Hija l-​lealtà tagħna soda lejh? Kif nistgħu nuru lealtà lejn Sultan li jaħkem mis-​sema? Però, l-​ewwel ejja niddiskutu r-​raġunijiet għala għandna nkunu leali lejn Kristu.

Sultan li Jqanqlek Turi l-​Lealtà

4. Ġesù x’wettaq bħala s-​Sultan-Nominat matul il-​ministeru tiegħu fuq l-​art?

⁴ Il-​lealtà tagħna lejn Kristu hija bbażata fuq il-​fatt li napprezzaw dak li għamel magħna kif ukoll il-​kwalitajiet li jispikkaw tiegħu. (1 Pietru 1:8) Meta kien fuq l-​art, Ġesù, bħala s-​Sultan-Nominat, wera fuq skala żgħira dak li se jagħmel fuq skala globali bħala Sultan renjanti fiż-​żmien imwaqqat t’Alla. Hu temaʼ lil dawk li kienu bil-​ġuħ. Fejjaq lill-​morda, lill-​għomja, lil dawk li kellhom xi diżabilità, lit-​torox, u lill-​muti. Hu wkoll ġab lura għall-​ħajja lil xi wħud li kienu mietu. (Mattew 15:​30, 31; Luqa 7:​11-16; Ġwanni 6:​5-13) Iktar minn hekk, il-​fatt li għandna għarfien dwar il-​ħajja taʼ Ġesù fuq l-​art jgħinna nkunu nafu l-​kwalitajiet li se juri bħala l-​Ħakkiem taʼ l-​art tal-​futur—l-​iktar li tispikka hija l-​imħabba mhix egoistika. (Marku 1:​40-45) F’konnessjoni maʼ dan, Napuljun Bonaparti huwa rrapportat li qal: “Alessandru, Ċesari, Karlumanju, u jien innifsi sejjisna imperi, imma fuq liema bażi wettaqna l-​għemejjel kbar tagħna? Fuq il-​forza. Ġesù Kristu waħdu sejjes is-​saltna tiegħu fuq l-​imħabba, u f’dan iż-​żmien miljuni taʼ bnedmin huma lesti li jmutu għalih.”

5. Il-​personalità taʼ Ġesù għala kienet tiġbidhom lin-​nies?

⁵ Minħabba li Ġesù kien ġwejjed u umli f’qalbu, dawk li kienu mtaqqlin bil-​pressjonijiet u t-​tagħbijiet kienu jsibu serħan permezz tat-​tagħlim inkuraġġanti u l-​personalità ħanina tiegħu. (Mattew 11:​28-30) It-​tfal kienu jħossuhom komdi miegħu. Irġiel umli u għaqlin minn jeddhom saru dixxipli tiegħu. (Mattew 4:​18-22; Marku 10:​13-16) Minħabba l-​konsiderazzjoni u r-​rispett li wera rebaħ il-​lealtà taʼ ħafna nisa li kellhom il-​biżaʼ t’Alla, li ħafna minnhom kienu jagħtu mill-​ħin, l-​isforz, u l-​affarijiet materjali tagħhom sabiex jieħdu ħsiebu hekk kif hu kien iwettaq il-​ministeru tiegħu.—Luqa 8:​1-3.

6. Liema emozzjonijiet teneri wera Ġesù meta miet Lazzru?

⁶ Kristu wera wħud mill-​iktar sentimenti teneri tiegħu meta miet l-​għażiż ħabib tiegħu Lazzru. Tant kien imqanqal min-​niket taʼ Marija u Marta li ma setax iżomm lura milli jitkarrab, u “qabiżlu d-​dmugħ.” Hu “tnikket”—tqanqal minn uġigħ taʼ qalb kbir u niket—avolja kien jaf li ftit tal-​ħin wara kien se jġib lil Lazzru lura għall-​ħajja. Imbagħad, imqanqal mill-​imħabba u l-​mogħdrija, Ġesù uża l-​qawwa li kien tah Alla u qajjem lil Lazzru mill-​mewt.—Ġwanni 11:​11-15, 33-35, 38-44.

7. Ġesù għala jistħoqqlu l-​lealtà tagħna? (Ara l-​kaxxa f’paġna 31.)

⁷ Meta naraw l-​imħabba kbira li Ġesù kellu għat-​tajjeb u l-​mibegħda għall-​ipokrisija u l-​ħażen inħossu riverenza profonda. Darbtejn hu ħa azzjoni kuraġġuża biex inaddaf it-​tempju minn merkanti rgħiba. (Mattew 21:​12, 13; Ġwanni 2:​14-17) Barra minn hekk, bħala bniedem fuq l-​art, hu ffaċċja kull tip taʼ diffikultà, billi esperjenza personalment il-​pressjonijiet u l-​problemi li niffaċċjaw aħna. (Ebrej 5:​7-9) Ġesù kien jaf ukoll x’jiġifieri li tkun vittma tal-​mibegħda u l-​inġustizzja. (Ġwanni 5:​15-18; 11:​53, 54; 18:38–19:16) Eventwalment, hu b’kuraġġ issottometta ruħu għal mewta kiefra biex iwettaq ir-​rieda taʼ Missieru u biex jagħti lis-​sudditi tiegħu ħajja taʼ dejjem. (Ġwanni 3:16) Ma jqanqlukx il-​kwalitajiet taʼ Kristu biex tkompli taqdih lealment? (Ebrej 13:8; Rivelazzjoni 5:​6-10) Imma x’neħtieġu biex inkunu sudditi taʼ Kristu s-​Sultan?

Il-​Kwalifiki biex Inkunu Sudditi

8. X’inhu meħtieġ mis-​sudditi taʼ Kristu?

⁸ Aħseb dwar dan il-​paragun: Biex issir ċittadin taʼ pajjiż ieħor ġeneralment għandek bżonn ċerti kwalifiki bażiċi. Dawk li jkunu jridu jieħdu ċ-​ċittadinanza għandhom mnejn ikunu jeħtieġu li jkollhom reputazzjoni tajba u li jilħqu ċertu livell taʼ saħħa. B’mod simili, is-​sudditi taʼ Kristu għandhom bżonn iżommu livelli morali għoljin u saħħa spiritwali tajba.—1 Korintin 6:​9-11; Galatin 5:​19-23.

9. Kif nistgħu nuru li aħna leali lejn Kristu?

⁹ Ġesù Kristu bi dritt jeħtieġ ukoll li s-​sudditi tiegħu jkunu leali lejh u lejn is-​Saltna tiegħu. Huma juru lealtà bħal din billi jgħixu fi qbil maʼ dak li għallimhom meta kien fuq l-​art bħala Sultan-Nominat. Per eżempju, huma jpoġġu l-​interessi tas-​Saltna u r-​rieda t’Alla qabel l-​affarijiet materjali. (Mattew 6:​31-34) Huma b’ħerqa jipprovaw jirriflettu personalità bħal taʼ Kristu, anki fl-​iktar ċirkustanzi diffiċli. (1 Pietru 2:​21-23) Ukoll, is-​sudditi taʼ Kristu jsegwu l-​eżempju tiegħu billi jieħdu l-​inizjattiva biex jagħmlu t-​tajjeb m’oħrajn.—Mattew 7:12; Ġwanni 13:​3-17.

10. Il-​lealtà lejn Kristu kif tistaʼ tintwera (a) fil-familja u (b) fil-​kongregazzjoni?

¹⁰ Is-​segwaċi taʼ Ġesù juru wkoll il-​lealtà tagħhom lejh billi jirriflettu l-​kwalitajiet tiegħu fil-​familja. Per eżempju, l-​irġiel miżżewġin juru l-​lealtà tagħhom lejn is-​Sultan tagħhom tas-​sema billi jimitaw il-​kwalitajiet taʼ Kristu fil-​mod kif jittrattaw mal-​mara u mat-​tfal tagħhom. (Efesin 5:​25, 28-30; 6:4; 1 Pietru 3:7) In-​nisa miżżewġin juru lealtà lejn Kristu billi jkunu safja fil-​kondotta tagħhom u billi juru “spirtu kwiet u ġwejjed.” (1 Pietru 3:​1-4; Efesin 5:​22-24) It-​tfal ikunu leali lejn Kristu meta jsegwu l-​eżempju tiegħu taʼ l-​ubbidjenza. Bħala żagħżugħ, Ġesù baqaʼ sottomess lejn il-​ġenituri tiegħu, avolja kienu imperfetti. (Luqa 2:​51, 52; Efesin 6:1) Is-​sudditi taʼ Kristu jistinkaw biex lealment jimitawh billi ‘jħossu għal xulxin, juru affezzjoni lejn l-​aħwa,’ u billi ‘jagħdru b’tenerezza.’ Huma jistinkaw biex ikunu bħal Kristu, ‘umli, u ma jpattux ħsara bi ħsara jew tgħajjir b’tgħajjir.’—1 Pietru 3:​8, 9; 1 Korintin 11:1.

Sudditi li Jobdu l-​Liġi

11. Is-​sudditi taʼ Kristu għal liema liġijiet jissottomettu ruħhom?

¹¹ Bħalma wħud li jridu jsiru ċittadini taʼ pajjiż jobdu l-​liġi tal-​pajjiż ġdid tagħhom, is-​sudditi taʼ Kristu jissottomettu ruħhom għall-​“liġi tal-​Kristu” billi jġibu ħajjithom fi qbil maʼ dak kollu li Ġesù għallem u kkmanda. (Galatin 6:2) B’mod partikulari, huma jgħixu lealment mal-​“liġi sovrana” taʼ l-​imħabba. (Ġakbu 2:8) Dawn il-​liġijiet x’jinvolvu?

12, 13. Aħna kif nissottomettu ruħna lealment għall-​“liġi tal-​Kristu”?

¹² Is-​sudditi taʼ Kristu m’humiex ħielsa mill-​imperfezzjonijiet u n-​nuqqasijiet. (Rumani 3:23) Għalhekk, huma għandhom bżonn jibqgħu jikkultivaw “affezzjoni lejn l-​aħwa mingħajr ipokrisija” sabiex ‘iħobbu lil xulxin mill-​qalb bil-​ħeġġa kollha.’ (1 Pietru 1:22) “Jekk xi ħadd għandu għalxiex jilmenta kontra ħaddieħor,” il-​Kristjani japplikaw lealment il-​liġi tal-​Kristu billi ‘jissaportu lil xulxin u jaħfru lil xulxin mill-​qalb.’ Jekk jobdu din il-​liġi huma se jiġu megħjunin jinjoraw l-​imperfezzjonijiet u jfittxu raġunijiet biex iħobbu lil xulxin. Ma tapprezzax int il-​fatt li qiegħed fost dawk li qed jissottomettu ruħhom lealment lejn is-​Sultan tagħna kollu mħabba u li qed jilbsu l-​imħabba, ir-​“rabta perfetta li tgħaqqad”?—Kolossin 3:​13, 14.

¹³ Barra minn hekk, Ġesù spjega li l-​imħabba li wera kienet akbar minn dik li n-​nies ġeneralment juru lejn xulxin. (Ġwanni 13:​34, 35) Jekk aħna nħobbu biss lil dawk li jħobbuna, ma nkunu qed nagħmlu xejn “speċjali.” F’dak il-​każ, l-​imħabba tagħna ma tkunx kompleta u tkun difettuża. Ġesù ħeġġiġna biex nimitaw l-​imħabba taʼ Missieru billi jkollna mħabba bi prinċipju anki għall-​għedewwa li jobogħduna u jippersegwitawna. (Mattew 5:​46-48) Din l-​imħabba tqanqal ukoll lis-​sudditi taʼ din is-​Saltna biex jibqgħu leali fix-​xogħol prinċipali tagħhom. X’inhu dan ix-​xogħol?

Il-​Lealtà Mġarrba

14. Ix-​xogħol taʼ l-​ippridkar għala huwa daqstant importanti?

¹⁴ Is-​sudditi tas-​Saltna t’Alla issa għandhom ix-​xogħol importanti taʼ li ‘jagħtu xiehda bir-​reqqa dwar is-​saltna t’Alla.’ (Atti 28:23) Huwa vitali li nagħmlu dan għax is-​Saltna Messjanika se tivvindika s-​sovranità universali taʼ Ġeħova. (1 Korintin 15:​24-28) Meta nippridkaw l-​aħbar tajba, dawk li jisimgħu għandhom l-​opportunità li jsiru sudditi tas-​Saltna t’Alla. Ukoll, il-​mod kif in-​nies jirreaġixxu għal dan il-​messaġġ jipprovdi livell li fuqu Kristu s-​Sultan jistaʼ jiġġudika lill-​umanità. (Mattew 24:14; 2 Tessalonikin 1:​6-10) Għalhekk, il-​mod prinċipali li bih nuru l-​lealtà tagħna lejn Kristu huwa billi nobdu l-​kmand tiegħu li ngħidu lil oħrajn dwar is-​Saltna.—Mattew 28:​18-20.

15. Il-​lealtà tal-​Kristjani għala tiġi mġarrba?

¹⁵ M’għandniex xi ngħidu, Satana jirreżisti x-​xogħol taʼ l-​ippridkar b’kull mod possibbli, u l-​ħakkiema umani ma jirrikonoxxux l-​awtorità li Alla ta lil Kristu. (Salm 2:​1-3, 6-8) Għalhekk, Ġesù wissa lid-​dixxipli tiegħu: “Ilsir mhux akbar minn sidu. Jekk ippersegwitaw lili, jippersegwitaw lilkom ukoll.” (Ġwanni 15:20) Għalhekk, is-​segwaċi taʼ Kristu jsibu ruħhom fi ġlieda spiritwali li ġġarrab il-​lealtà tagħhom.—2 Korintin 10:​3-5; Efesin 6:​10-12.

16. Is-​sudditi tas-​Saltna kif jagħtu lura “lil Alla dak li hu t’Alla”?

¹⁶ Minkejja dan, is-​sudditi tas-​Saltna t’Alla jibqgħu leali lejn is-​Sultan inviżibbli tagħhom mingħajr ma jiddiżrispettaw lill-​awtoritajiet umani. (Titu 3:​1, 2) Ġesù qal: “Agħtu lura lil Ċesari dak li hu taʼ Ċesari, imma lil Alla dak li hu t’Alla.” (Marku 12:​13-17) Għalhekk, is-​sudditi taʼ Kristu jobdu l-​liġijiet tal-​gvern li ma jmorrux kontra l-​liġijiet t’Alla. (Rumani 13:​1-7) Madankollu, meta l-​qorti superjuri Lhudija ħaditha kontra l-​liġi t’Alla billi ordnat lid-​dixxipli taʼ Ġesù biex jieqfu jippridkaw, huma b’mod sod imma b’rispett qalu li kellhom ‘jobdu lil Alla bħala ħakkiem iktar milli lill-​bnedmin.’—Atti 1:8; 5:​27-32.

17. Għala nistgħu niffaċċjaw il-​provi tal-​lealtà bil-​kuraġġ?

¹⁷ Naturalment, is-​sudditi taʼ Kristu għandhom bżonn ħafna kuraġġ biex jibqgħu leali lejn is-​Sultan tagħhom meta jiffaċċjaw persekuzzjoni. Minkejja dan, Ġesù qal: “Henjin intom meta n-​nies iżebilħukom u jippersegwitawkom u bil-​gideb jgħidu kull xorta taʼ ħażen kontrikom minħabba fija. Thennew u aqbżu bil-​ferħ, għax il-​premju tagħkom hu kbir fis-​smewwiet.” (Mattew 5:​11, 12) L-​ewwel segwaċi taʼ Kristu esperjenzaw kemm hu minnu dan il-​kliem. Anki meta ġew imsawtin talli komplew jippridkaw dwar is-​Saltna, huma ferħu “għax kienu tqiesu denji li jiġu diżonorati minħabba ismu. U kuljum fit-​tempju u minn dar għal dar baqgħu jgħallmu u jxandru bla heda l-​aħbar tajba dwar il-​Kristu, Ġesù.” (Atti 5:​41, 42) Verament ħaqqek prosit hekk kif turi l-​istess spirtu taʼ lealtà meta tissaporti tbatija, mard, mewt taʼ xi ħadd li tħobb, jew oppożizzjoni.—Rumani 5:​3-5; Ebrej 13:6.

18. X’jindika dak li Ġesù qal lil Ponzju Pilatu?

¹⁸ Meta kien għadu Sultan-Nominat, Ġesù spjega lill-​Gvernatur Ruman Ponzju Pilatu: “Is-​saltna tiegħi mhix parti minn din id-​dinja. Kieku s-​saltna tiegħi kienet parti minn din id-​dinja, il-​qaddejja tiegħi kienu jiġġieldu biex ma ningħatax f’idejn il-​Lhud. Imma, tabilħaqq, is-​saltna tiegħi mhix ġejja minn hawn.” (Ġwanni 18:36) Għalhekk, is-​sudditi tas-​Saltna tas-​sema la jużaw armi kontra xi ħadd u lanqas ma jżommu maʼ xi naħa jew oħra f’konflitti umani. Peress li jridu jkunu leali lejn il-​“Prinċep tas-​sliem,” huma jibqgħu kompletament newtrali fil-​kwistjonijiet tad-​dinja li jikkaġunaw firda.—Isaija 2:​2-4; 9:​5, 6 (9:​6, 7, NW).

Premjijiet Dejjiema għas-​Sudditi Leali

19. Is-​sudditi taʼ Kristu għala jistgħu jħarsu lejn il-​futur b’fiduċja?

¹⁹ Is-​sudditi leali taʼ Kristu, is-​“Sultan tas-​slaten,” jiffaċċjaw il-​futur b’fiduċja. Huma jistennew bil-​ħerqa t-​turija imminenti tal-​qawwa sopranaturali tiegħu bħala sultan. (Rivelazzjoni 19:11–20:3; Mattew 24:30) Il-​fdal taʼ “wlied is-​Saltna” leali li huma midlukin bl-​ispirtu jħarsu ’l quddiem lejn il-​wirt imprezzabbli bħala slaten maʼ Kristu fis-​sema. (Mattew 13:38; Luqa 12:32) In-​“nagħaġ oħrajn” leali taʼ Kristu jistennew bil-​ħerqa d-​dikjarazzjoni t’approvazzjoni tas-​Sultan tagħhom: “Ejjew intom, imberkin minn Missieri, irtu [il-qasam tas-​]saltna [li se jkun Ġenna taʼ l-​art] imħejjija għalikom mit-​tisjis tad-​dinja.” (Ġwanni 10:16; Mattew 25:34) Fi qbil maʼ dan, jalla s-​sudditi kollha tas-​Saltna jkunu determinati li jibqgħu jaqdu lealment lil Kristu s-​Sultan.

[Nota taʼ taħt]

Tistaʼ Tispjega?

• Kristu għala jistħoqqlu l-​lealtà tagħna?

• Is-​sudditi taʼ Kristu kif juru l-​lealtà tagħhom lejh?

• Għala għandna nkunu rridu nuru lealtà lejn Kristu s-​Sultan?

[Kaxxa f’paġna 31]

IKTAR KWALITAJIET LI JISPIKKAW TAʼ KRISTU

L-​imparzjalità—Ġwanni 4:​7-30.

Il-​mogħdrija—Mattew 9:​35-38; 12:​18-21; Marku 6:​30-34.

L-​imħabba mhix egoistika—Ġwanni 13:1; 15:​12-15.

Il-​lealtà—Mattew 4:​1-11; 28:20; Marku 11:​15-18.

L-​empatija—Marku 7:​32-35; Luqa 7:​11-15; Ebrej 4:​15, 16.

Ir-​raġunevolezza—Mattew 15:​21-28.

[Stampa f’paġna 29]

Billi nuru mħabba lejn xulxin, aħna nkunu qed nissottomettu ruħna lealment għall-​“liġi tal-​Kristu”

[Stampi f’paġna 31]

Iqanqluk il-​kwalitajiet taʼ Kristu biex taqdih lealment?