Żomm Qrib it-​Teokrazija

“Il-​Mulej hu l-​Imħallef tagħna; il-​Mulej il-​leġislatur tagħna. Il-​Mulej is-​sultan tagħna.”—ISAIJA 33:22.

1. Il-​kwistjoni dwar iggvernar għala hija taʼ tħassib għall-​maġġuranza tan-​nies?

IS-​SUĠĠETT taʼ ggvernar jikkonċerna ferm lil kulħadd. Iggvernar tajjeb iġib il-​paċi u r-​riżq. Il-​Bibbja tgħid: “Is-​sultan bil-​ġustizzja jżomm l-​art sħiħa.” (Proverbji 29:4) Mill-​banda l-​oħra, iggvernar ħażin iwassal għal inġustizzji, korruzzjoni, u oppressjoni. “Meta jaħkmu l-​ħżiena, il-​poplu jitniehed.” (Proverbji 29:2) Matul l-​istorja, il-​bnedmin ipprovaw kull xorta taʼ gvernijiet, u b’sogħba ngħidu, li taʼ spiss tniehdu minħabba l-​oppressjoni mill-​ħakkiema tagħhom. (Koħèlet 8:9) Hemm xi forma taʼ gvern li se jirnexxilha ġġib kuntentizza dejjiema għas-​sudditi tagħha?

2. “Teokrazija” għala hija deskrizzjoni xierqa għall-​gvern taʼ Iżrael tal-​qedem?

² L-​istorjografu Josefus semma tip uniku taʼ gvern meta kiteb: “Xi popli fdaw il-​poter politiku suprem f’idejn il-​monarki, oħrajn f’idejn oligarkiji, jerġaʼ oħrajn fdawh f’idejn il-​massa. Madankollu, il-​leġislatur tagħna [Mosè], ma ġie impressjonat mill-​ebda waħda minn dawn il-​forom speċifiċi taʼ organizzazzjoni politika, imma lill-​kostituzzjoni tiegħu taha l-​forma taʼ dik li​—jekk wieħed jippermetti l-​espressjoni sforzata—​tistaʼ tissejjaħ ‘teokrazija,’ billi tpoġġi kull sovranità u awtorità f’idejn Alla.” (Against Apion, II, 164-5) Skond il-​Concise Oxford Dictionary, teokrazija tfisser “forma taʼ gvern minn Alla.” Il-​kelma ma tidhirx fil-​Bibbja, imma din tiddeskrivi tajjeb l-​iggvernar taʼ Iżrael tal-​qedem. Għalkemm l-​Iżraeliti għażlu li jkollhom sultan viżibbli, il-​veru ħakkiem tagħhom kien Jehovah. Isaija, il-​profeta Iżraelit qal: “Il-​Mulej hu l-​imħallef tagħna; il-​Mulej il-​leġislatur tagħna. Il-​Mulej is-​sultan tagħna.”—Isaija 33:22.

X’Inhi t-​Teokrazija Vera?

3, 4. (a) X’inhi t-​teokrazija vera? (b) It-​teokrazija liema barkiet dalwaqt se ġġib għall-​umanità?

³ Minn mindu Josefus ivvinta l-​kelma, ħafna soċjetajiet ġew deskritti bħala teokraziji. Xi wħud minnhom kienu jidhru intolleranti, fanatiċi, u oppressivi b’mod krudil. Kienu dawn teokraziji veri? Mhux fis-​sens li Josefus uża l-​kelma. Il-​problema hi li t-​tifsira taʼ “teokrazija” ġiet estiża. Il-​World Book Encyclopedia tiddefinixxiha bħala “forma taʼ gvern li fih l-​istat ikun taħt il-​ħakma taʼ qassis jew qassisin, u li fih membri tas-​saċerdozju jkollhom awtorità fi kwistjonijiet ċivili u reliġjużi.” It-​teokrazija vera, madankollu, m’hijiex gvern mill-​qassisin. Din fir-​realtà hija ħakma minn Alla, iggvernar mill-​Ħallieq taʼ l-​univers, Alla Jehovah.

⁴ Dalwaqt, l-​art kollha se tkun taħt it-​teokrazija, u x’barka se tkun din! “Alla nnifsu jkun magħhom [maʼ l-​umanità], Alla tagħhom. Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.” (Apokalissi 21:3, 4) L-​ebda ħakma saċerdotali minn bnedmin imperfetti ma tistaʼ ġġib hena bħal dan. Ħakma minn Alla biss tistaʼ. Għaldaqstant, il-​Kristjani veri ma jipprovawx jintroduċu t-​teokrazija b’azzjoni politika. Huma jistennew bil-​paċenzja sakemm Alla jistabbilixxi teokrazija mad-​dinja kollha fil-​waqt tiegħu u bil-​mod tiegħu.—Danjel 2:44.

5. Illum fejn qiegħda topera t-​teokrazija vera, u liema mistoqsijiet jitqajmu dwarha?

⁵ Sadattant, madankollu, teokrazija vera diġà qed topera. Fejn? Fost dawk li minn jeddhom jissottomettu ruħhom għall-​ħakma t’Alla u jikkooperaw flimkien biex jagħmlu r-​rieda tiegħu. Uħud leali bħal dawn ġew miġburin bħala “poplu” spiritwali madwar id-​dinja fil-​“pajjiż” spiritwali tagħha. Dawn huma dawk li għad fadal mill-​“Iżrael taʼ Alla” flimkien maʼ sħabhom il-​Kristjani li jgħoddu iktar minn ħames miljuni u nofs. (Isaija 66:8; Galatin 6:16) Dawn huma sottomessi lejn Ġesù Kristu, is-​Sultan tas-​sema li ġie mqiegħed fuq it-​tron minn Alla Jehovah, is-​“Sultan taʼ dejjem.” (1 Timotju 1:17; Apokalissi 11:15) Din l-​organizzazzjoni b’liema mod hija teokratika? Il-​membri tagħha kif iqisuha l-​awtorità tal-​gvernijiet sekulari? U l-​prinċipju taʼ teokrazija kif jinżamm minn dawk il-​bnedmin li jeżerċitaw awtorità ġewwa l-​komunità spiritwali tagħhom?

Organizzazzjoni Teokratika

6. Organizzazzjoni umana viżibbli kif tistaʼ tiġi mmexxija minn Alla?

⁶ Kif tistaʼ organizzazzjoni umana titmexxa minn Jehovah, li jgħammar fis-​smewwiet inviżibbli? (Salm 103:19) Minħabba li dawk imseħbin magħha jsegwu l-​parir imnebbaħ: “Ittama fil-​Mulej b’qalbek kollha, u tafdax fl-​għaqal tiegħek.” (Proverbji 2:6; 3:5) Huma jħallu lil Alla jmexxihom hekk kif jobdu “l-​liġi taʼ Kristu” u japplikaw il-​prinċipji ispirati tal-​Bibbja fil-​ħajja tagħhom taʼ kuljum. (Galatin 6:2; 1 Korintin 9:21; 2 Timotju 3:16; ara Mattew 5:22, 28, 39; 6:24, 33; 7:12, 21.) Biex jagħmlu dan, huma jridu jkunu studenti tal-​Bibbja. (Salm 1:1-3) Bħall-​Berijani tal-​qedem li kienu taʼ “qalb kbira,” huma ma jsegwux lill-​bnedmin imma jiċċekkjaw il-​ħin kollu fil-​Bibbja biex jaraw li l-​affarijiet li jitgħallmu huma minnhom. (Atti 17:10, 11; Salm 119:33-36) Huma jitolbu bħas-​salmista: “Fehma tajba u għerf għallimni, għax jien nemmen fil-​kmandamenti tiegħek.”—Salm 119:66.

7. Liema sekwenza teżisti fl-​indokrar fit-​teokrazija?

⁷ F’kull organizzazzjoni, irid ikun hemm xi wħud li jeżerċitaw l-​awtorità jew jipprovdu d-​direzzjoni. Ix-​Xhieda taʼ Jehovah m’humiex eċċezzjoni, u jsegwu l-​istruttura taʼ l-​awtorità spjegata mill-​appostlu Pawlu: “[I]r-ras [“kap,” NW] taʼ kull raġel huwa Kristu, u ras il-​mara huwa r-​raġel, u ras Kristu hu Alla.” (1 Korintin 11:3) Fi qbil maʼ dan, irġiel ikkwalifikati biss jaqdu bħala anzjani fil-​kongregazzjonijiet. U għalkemm Ġesù​—il-​“[“kap,” NW] taʼ kull raġel”—qiegħed fis-​sema, fuq l-​art għad hawn il-​“bqija” taʼ ħutu l-​midlukin, li għandhom it-​tama li jaħkmu miegħu fis-​smewwiet. (Apokalissi 12:17; 20:6) Dawn jifformaw “l-​irsir leali u diskret” kompost. Il-​Kristjani juru s-​sottomissjoni tagħhom lejn Ġesù, u għalhekk lejn Jehovah, il-​kap taʼ Ġesù, billi jaċċettaw l-​indokrar taʼ dak “l-​irsir.” (Mattew 24:45-47, NW; Mattew 25:40) B’dan il-​mod it-​teokrazija tkun bl-​ordni. “Alla m’hux Alla tad-​diżordni iżda tas-​sliem.”—1 Korintin 14:33.

8. L-​anzjani Kristjani kif jappoġġaw il-​prinċipju taʼ teokrazija?

⁸ L-​anzjani Kristjani jappoġġaw il-​prinċipju taʼ teokrazija għaliex jirrikonoxxu li huma responsabbli lejn Jehovah għall-​mod kif huma jeżerċitaw l-​awtorità limitata tagħhom. (Lhud 13:17) U meta jiġu biex jagħmlu xi deċiżjonijiet, huma jistrieħu fuq l-​għerf t’Alla, u mhux fuq l-​għerf tagħhom. F’dan, huma jsegwu l-​eżempju taʼ Ġesù. Hu kien l-​iktar bniedem għaref li qatt għex. (Mattew 12:42) Minkejja dan, hu qal lil-​Lhud: “L-​Iben ebda ħaġa ma jistaʼ jagħmel minn rajh jekk ma jarax lil Missieru jagħmilha.” (Ġwann 5:19) L-​anzjani għandhom ukoll l-​istess attitudni bħal dik tas-​Sultan David. Dan eżerċita awtorità importanti f’teokrazija. Madankollu, hu ried isegwi l-​mod taʼ Jehovah, mhux tiegħu stess. Hu talab: “Urini, Mulej, it-​triq tiegħek, mexxini minn mogħdija dritta.”—Salm 27:11.

9. Rigward it-​tamiet differenti u l-​privileġġi differenti taʼ servizz fit-​teokrazija, liema ħarsa bbilanċjata għandhom Kristjani ddedikati?

⁹ Xi wħud iddubitaw jekk huwiex ġust li l-​awtorità fil-​kongregazzjoni tkun biss f’idejn irġiel ikkwalifikati jew li xi wħud għandhom tama għas-​sema waqt li oħrajn għandhom tama għall-​art. (Salm 37:29; Filippin 3:20) Kristjani ddedikati, madankollu, japprezzaw li dawn l-​arranġamenti huma mniżżlin fil-​Kelma t’Alla. Huma teokratiċi. Jekk jiġu ddubitati, ġeneralment dan ikun minn dawk li ma jaċċettawx il-​prinċipji tal-​Bibbja. Barra minn hekk, il-​Kristjani jafu li l-​irġiel u n-​nisa huma ugwali f’għajnejn Jehovah, f’dak li għandu x’jaqsam mas-​salvazzjoni. (Galatin 3:28) Għall-​Kristjani veri, li jkunu adoraturi tas-​Sovran taʼ l-​univers huwa l-​aqwa privileġġ li jistaʼ jkollhom, u huma henjin li jwettqu l-​irwol li jfassal għalihom Jehovah. (Salm 31:24 [Salm 31:23, NW]; Salm 84:11 [Salm 84:10, NW]; 1 Korintin 12:12, 13, 18) Iktar minn hekk, il-​ħajja taʼ dejjem, sew jekk tkun fis-​sema u sew jekk fuq l-​art magħmula ġenna, hija tama verament taʼ l-​għaġeb.

10. (a) Ġonatan liema attitudni mill-​aħjar wera? (b) Il-​Kristjani llum kif juru attitudni simili għal dik taʼ Ġonatan?

¹⁰ B’hekk, ix-​Xhieda taʼ Jehovah jixbhu lil Ġonatan, l-​iben devot taʼ Sawl. Ġonatan x’aktarx li kien ikun sultan eċċellenti. Madankollu, minħabba n-​nuqqas taʼ fedeltà taʼ Sawl, Jehovah għażel lil David biex ikun it-​tieni sultan taʼ Iżrael. Iddarras Ġonatan minħabba dan? Lanqas xejn. Hu u David saru l-​aqwa ħbieb u saħansitra pproteġieh minn Sawl. (1 Samwel 18:1; 20:1-42) B’mod simili, dawk li għandhom tama għall-​art m’humiex għajjurin għal dawk li għandhom it-​tama għas-​sema. U l-​Kristjani veri m’humiex għajjurin għal dawk li jeżerċitaw awtorità teokratika fil-​kongregazzjoni. Pjuttost, huma ‘jgħożżuhom u jħobbuhom kemm jifilħu,’ u jirrikonoxxu x-​xogħol iebes li jagħmlu għan-​nom taʼ ħuthom spiritwali.—1 Tessalonikin 5:12, 13.

Il-​Mod Teokratiku kif Wieħed Iqis il-​Ħakma Sekulari

11. Il-​Kristjani li jissottomettu ruħhom għall-​ħakma teokratika kif iqisuhom lill-​awtoritajiet sekulari?

¹¹ La x-​Xhieda taʼ Jehovah qegħdin taħt teokrazija, ħakma minn Alla, huma kif iqisuhom lill-​ħakkiema nazzjonali? Ġesù qal li s-​segwaċi tiegħu ma kellhomx ikunu “tad-​dinja.” (Ġwann 17:16) Madankollu, il-​Kristjani jirrikonoxxu d-​dejn tagħhom lil “Ċesari,” il-​gvernijiet sekulari. Ġesù qal li huma għandhom ‘jagħtu lil Ċesari dak li hu taʼ Ċesari, u lil Alla dak li hu t’Alla.’ (Mattew 22:21) Skond il-​Bibbja, il-​gvernijiet umani “jinsabu mqegħdin fil-​pożizzjonijiet relattivi tagħhom permezz t’Alla.” Jehovah, is-​Sors taʼ kull awtorità, jippermetti li l-​gvernijiet jibqgħu jeżistu, u hu jistenna li huma jagħmlu l-​ġid lil dawk taħt il-​ġurisdizzjoni tagħhom. Meta jagħmlu dan, huma jkunu l-​‘ministri t’Alla.’ Il-​Kristjani huma suġġetti għall-​gvernijiet tal-​pajjiż fejn jgħixu “minħabba l-​kuxjenza [tagħhom].” (Rumani 13:1-7, NW) M’għandniex xi ngħidu, jekk l-​istat ikollu jitlob xi ħaġa li hija kuntrarja għal-​liġi t’Alla, il-​Kristjan ‘jobdi lil Alla iktar mill-​bnedmin.’—Atti 5:29.

12. Meta l-​Kristjani jiġu ppersegwitati mill-​awtoritajiet, l-​eżempju taʼ min isegwu?

¹² X’jiġri meta l-​Kristjani veri jiġu ppersegwitati mill-​awtoritajiet governattivi? F’dak il-​każ huma jsegwu l-​eżempju tal-​Kristjani bikrin, li ssaportew perijodi taʼ persekuzzjoni kbira. (Atti 8:1; 13:50) Dawn il-​provi taʼ fidi kienu mistennijin, ladarba Ġesù kien wissa li kellhom jiġu fuqhom. (Mattew 5:10-12; Mark 4:17) Madankollu, dawk il-​Kristjani bikrin ma rritaljawx kontra dawk li ppersegwitawhom; lanqas il-​fidi tagħhom ma ddgħajfet minħabba li kienu taħt pressjoni. Pjuttost, huma segwew dan l-​eżempju taʼ Ġesù: “Meta għajjruh ma weġibx bit-​tagħjir; meta bata ma heddidx imma ħalla f’idejn l-​Imħallef ġust.” (1 Pietru 2:21-23) Iva, il-​prinċipji Kristjani ħarġu rebbiħin fuq il-​provokazzjonijiet taʼ Satana.—Rumani 12:21.

13. Ix-​Xhieda taʼ Jehovah kif wieġbu għall-​persekuzzjoni u l-​kampanji taʼ gideb kontriehom?

¹³ L-​istess qed jiġri llum. Matul dan is-​seklu, ix-​Xhieda taʼ Jehovah sofrew ħafna taħt idejn xi ħakkiema oppressivi​—sewwa sew bħalma bassar Ġesù. (Mattew 24:9, 13) F’xi pajjiżi jiġu ċċirkolati ħafna gideb u qlajjiet minn uħud li jipprovaw jagħmlu pressjoni fuq l-​awtoritajiet biex jaġixxu kontra dawn il-​Kristjani sinċieri. Xorta waħda, minkejja ‘li jgħidu l-​ħażin fuqhom,’ ix-​Xhieda, bil-​kondotta mill-​aħjar tagħhom, jirrikkmandaw lilhom infushom bħala ministri t’Alla. (2 Korintin 6:4, 8) Meta jkun possibbli, huma jippreżentaw il-​każ tagħhom quddiem uffiċjali u quddiem il-​qrati tal-​pajjiż sabiex juru l-​innoċenza tagħhom minn kwalunkwe għemil ħażin. Huma jużaw kull mezz disponibbli għalihom biex jiddefendu pubblikament l-​aħbar tajba. (Filippin 1:7) Imma, wara li jkunu għamlu dak kollu li jistgħu sakemm tippermetti l-​liġi, iħallu l-​affarijiet f’idejn Jehovah. (Salm 5:9-13 [Salm 5:8-12, NW]; Proverbji 20:22) Jekk ikun hemm bżonn, huma, bħall-​Kristjani bikrin, ma jibżgħux li jsofru minħabba t-​tjieba.—1 Pietru 3:14-17; 4:12-14, 16.

Poġġi l-​Glorja t’Alla l-​Ewwel

14, 15. (a) X’jiġi fuq quddiemnett għal dawk li jappoġġaw il-​prinċipju taʼ teokrazija? (b) Salamun f’liema okkażjoni ta eżempju mill-​aħjar taʼ umiltà fil-​pożizzjoni tiegħu taʼ indokrar?

¹⁴ Meta Ġesù għallem lis-​segwaċi tiegħu jitolbu, l-​ewwel ħaġa li semma kienet it-​taqdis taʼ l-​isem taʼ Jehovah. (Mattew 6:9) Fi qbil maʼ dan, dawk li jgħixu taħt it-​teokrazija jfittxu l-​glorja t’Alla u mhux tagħhom infushom. (Salm 29:1, 2) Il-​Bibbja tirrapporta li fl-​ewwel seklu, dan kien ostaklu għal xi wħud li rrifjutaw li jsegwu lil Ġesù minħabba li “għalihom kienet aktar għażiża l-​glorja tal-​bnedmin,” kienu jieħdu gost jiġu gglorifikati mill-​bnedmin. (Ġwann 12:42, 43) Tabilħaqq, jeħtieġ l-​umiltà biex wieħed ipoġġi lil Jehovah qabel l-​importanza żejda li wieħed jistaʼ jagħti lilu nnifsu.

¹⁵ Salamun wera spirtu mill-​aħjar f’dan ir-​rigward. Qabbel il-​kliem li qal fid-​dedikazzjoni tat-​tempju glorjuż li hu kien bena mal-​kliem li qal Nabukodonosor rigward il-​kapulavuri tiegħu taʼ bini. Bi kburija esaġerata, Nabukodonosor ftaħar: “Hijiex din Babilonja l-​kbira li jien, bil-​qawwa taʼ setgħeti, bnejt bħala għamara taʼ sultan għal sebħ ġieħi?” (Danjel 4:27 [Danjel 4:30, NW]) B’kuntrast, Salamun bil-​modestja kollha ċekken dak li kien wettaq, u qal: “Imma, tgħid, tassew li Alla se jibqaʼ jgħix fuq l-​art mal-​bnedmin? Ara! Lanqas is-​smewwiet u s-​smewwiet tas-​smewwiet ma jesgħuk, aħseb u ara dan id-​daqsxejn taʼ tempju li bnejt jien!” (2 Kronaki 6:14, 15, 18; Salm 127:1) Salamun m’għolliex lilu nnifsu. Kien jaf li kien sempliċement rappreżentant taʼ Jehovah u kiteb: “Fejn tidħol il-​kburija, jidħol l-​għajb; imma l-​umli jkollhom l-​għerf.”—Proverbji 11:2.

16. L-​anzjani kif jagħtu prova li huma verament taʼ barka minħabba li ma jigglorifikawx lilhom infushom?

¹⁶ Anzjani Kristjani bl-​istess mod jeżaltaw lil Jehovah, mhux lilhom infushom. Huma jsegwu l-​parir taʼ Pietru: “Jekk xi ħadd għandu d-​don tal-​ministeru, iħaddmu bis-​setgħa li Alla tah, u hekk f’kollox ikun igglorifikat Alla b’Ġesù Kristu.” (1 Pietru 4:11) L-​appostlu Pawlu ddeskriva x-​“xogħol taʼ isqof [“indokratur,” NW],” mhux bħala xi pożizzjoni importanti taʼ prominenza, imma bħala “xogħol sabiħ.” (1 Timotju 3:1) L-​anzjani jiġu maħturin biex jaqdu, mhux biex jaħkmu. Huma għalliema u rgħajja tal-​merħla t’Alla. (Atti 20:28; Ġakbu 3:1) Anzjani umlin u li jissagrifikaw lilhom infushom huma verament barka għal kongregazzjoni. (1 Pietru 5:2, 3) “Għożżuhom nies bħal dawn,” u rringrazzjaw lil Jehovah li pprovda tant anzjani kkwalifikati biex jappoġġaw it-​teokrazija f’dawn il-​jiem taʼ “l-​aħħar.”—Filippin 2:29; 2 Timotju 3:1.

“Kunu, Mela, Tixbhu lil Alla”

17. Dawk li huma taħt it-​teokrazija b’liema modi jimitaw lil Alla?

¹⁷ L-​appostlu Pawlu ħeġġeġ: “Kunu, mela, tixbhu lil Alla, bħala wlied maħbuba.” (Efesin 5:1) Dawk li jissottomettu ruħhom għat-​teokrazija jipprovaw jixbhu lil Alla kemm huwa possibbli għalihom li jixbhuh taʼ bnedmin imperfetti li huma. Per eżempju, il-​Bibbja tgħid dan dwar Jehovah: “Hu l-​Blata tagħna; perfett għemilu; u lkoll ġusti t-​triqat tiegħu. Alla taʼ kelmtu u ma jqarraqx; kollu ħaqq u kollu sewwa.” (Dewteronomju 32:3, 4) Biex jimitaw lil Alla f’dan ir-​rigward, il-​Kristjani jfittxu l-​fedeltà, it-​tjieba, u sens ibbilanċjat taʼ ġustizzja. (Mikea 6:8; 1 Tessalonikin 3:6; 1 Ġwann 3:7) Huma jevitaw ħafna affarijiet li saru aċċettabbli għad-​dinja, bħalma huma l-​immoralità, ix-​xenqa, u r-​regħba. (Efesin 5:5) Minħabba li l-​qaddejja taʼ Jehovah jsegwu livelli divini, u mhux tal-​bniedem, l-​organizzazzjoni tiegħu hija teokratika, nadifa, u bnina.

18. Liema hi l-​iktar kwalità li tispikka t’Alla, u l-​Kristjani kif jirriflettu din il-​kwalità?

¹⁸ Il-​kwalità li tispikka t’Alla Jehovah hija l-​imħabba. “Alla hu mħabba,” jgħid l-​appostlu Ġwanni. (1 Ġwann 4:8) Ladarba t-​teokrazija tfisser ħakma minn Alla, din tirriżulta f’ħakma mill-​imħabba. Ġesù qal: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba bejnietkom.” (Ġwann 13:35) L-​organizzazzjoni teokratika wriet imħabba li tispikka matul dawn il-​jiem diffiċli taʼ l-​aħħar. Matul il-​ġenoċidju fl-​Afrika, ix-​Xhieda taʼ Jehovah wrew imħabba lejn kulħadd, kienu minn liema grupp etniku kienu. Matul il-​gwerra f’dik li qabel kienet il-​Jugoslavja, ix-​Xhieda taʼ Jehovah mill-​inħawi kollha għenu lil xulxin, waqt li gruppi reliġjużi oħrajn ħadu sehem f’dak li ġie msejjaħ it-​tindif etniku. Fuq livell persunali, ix-​Xhieda taʼ Jehovah jistinkaw biex jobdu l-​parir taʼ Pawlu: “Mrar, saħna, korla, tagħjir, għajat, dan kollu warrbuh minnkom, u wkoll kull ħażen ieħor. Kunu twajba maʼ xulxin, ħennu għal xulxin, aħfru lil xulxin, bħalma Alla ħafer lilkom fi Kristu.”—Efesin 4:31, 32.

19. Liema barkiet jiġu kemm issa u kemm fil-​futur għal dawk li jissottomettu ruħhom għat-​teokrazija?

¹⁹ Dawk li jissottomettu ruħhom għat-​teokrazija jgawdu barkiet kbar. Huma jinsabu fil-​paċi m’Alla u maʼ sħabhom il-​Kristjani. (Lhud 12:14; Ġakbu 3:17) Għandhom skop fil-​ħajja. (Koħèlet 12:13) Għandhom sigurtà spiritwali u tama ċerta għall-​futur. (Salm 59:10 [Salm 59:9, NW]) Tabilħaqq, huma ferħanin li daqu bil-​quddiem ftit minn dak li se jkun hawn meta l-​umanità kollha tkun taħt ħakma teokratika. Imbagħad, il-​Bibbja tgħid, “Ma jagħmlux aktar deni u anqas ħsara fuq il-​muntanja qaddisa kollha tiegħi, għax mimlija hi l-​art bl-​għarfien tal-​Mulej bħalma l-​baħar hu miksi bl-​ilmijiet.” (Isaija 11:9) Xi żmien glorjuż se jkun dan! Jalla lkoll kemm aħna nassiguraw post għalina f’dik il-​Ġenna taʼ l-​art futura billi issa nibqgħu qrib it-​teokrazija.

Tistaʼ Tispjega?

◻ X’inhi t-​teokrazija vera u fejn tistaʼ tinstab illum?

◻ Il-​bnedmin kif jissottomettu ruħhom għall-​ħakma teokratika f’ħajjithom?

◻ Dawk kollha li qegħdin taħt it-​teokrazija b’liema modi qegħdin ifittxu l-​glorja t’Alla qabel dik tagħhom stess?

◻ Liema huma xi kwalitajiet taʼ tjieba li qegħdin jimitaw dawk li jappoġġaw it-​teokrazija?

[Stampa f’paġna 17]

Salamun poġġa l-​glorja t’Alla qabel dik tiegħu stess