Kapitlu 13
Il-Gvern Taʼ Paċi T’Alla
1. Il-gvernijiet umani x’naqsu li jagħmlu?
INNOTAJT INT li l-gvernijiet umani, saħansitra dawk b’intenzjonijiet tajbin, naqsu li jissodisfaw il-ħtiġijiet veri tan-nies? Ħadd minnhom ma solva l-problemi tal-kriminalità u l-mibgħeda bejn ir-razez jew ipprovda ikel xieraq u djar għan-nies kollha tiegħu. Ma lliberawx liċ-ċittadini tagħhom kompletament mill-mard. Lanqas l-ebda gvern ma rnexxielu jwaqqaf ix-xjuħija u l-mewt jew iġib il-mejtin lura għall-ħajja. M’hemm lanqas wieħed li saħansitra ġab paċi u sigurtà dejjiema liċ-ċittadini tiegħu. Il-gvernijiet tal-bnedmin sempliċement m’humiex kapaċi jsolvu l-problemi kbar li qegħdin jiffaċċjaw lin-nies.
2. X’inhu l-messaġġ prinċipali tal-Bibbja?
2 Il-Ħallieq tagħna jaf kemm għandna bżonn gvern taʼ tjieba li se jagħmel possibbli li n-nies kollha jgawdu ħajja mimlija u hienja. Mela huwa għalhekk li l-Bibbja titkellem dwar gvern taħt id-direzzjoni t’Alla. Fil-fatt, dan il-gvern minn Alla li ġie mwiegħed huwa l-messaġġ prinċipali tal-Bibbja.
3. Isaija 9:6, 7, x’jgħid dwar il-gvern t’Alla?
3 Imma tistaʼ tistaqsi: ‘Il-Bibbja fejn titkellem dwar il-gvern t’Alla?’ Dan tagħmlu, per eżempju, f’Isaija 9:6, 7. Skond il-King James Version, dawn il-versi jgħidu: “Għax tweldilna tifel, ngħatalna iben: u l-gvern se jkun fuq spalltu: u ismu jissejjaħ Taʼ L-Għaġeb, Kunsillier, Dak Alla setgħan, Il-Missier taʼ dejjem, Il-Prinċep tal-Paċi. Dwar iż-żjieda tal-gvern tiegħu u l-paċi mhux se jkun hemm tmiem.”
4. Min hu t-tifel li jsir il-ħakkiem tal-gvern t’Alla?
4 Il-Bibbja hawnhekk qiegħda titkellem dwar it-twelid taʼ tifel, prinċep. Maż-żmien dan l-‘iben taʼ sultan’ kellu jsir ħakkiem kbir, “Il-Prinċep tal-Paċi.” Kellu jkun inkarigat minn gvern verament taʼ l-għaġeb. Dan il-gvern se jġib il-paċi għall-art kollha, u l-paċi se tibqaʼ għal dejjem. It-tifel, li t-twelid tiegħu ġie mbassar f’Isaija 9:6, 7, kien Ġesù. Meta ħabbar it-twelid tiegħu lit-tfajla verġni Marija, l-anġlu Gabrijel qal dwar Ġesù: “Se jaħkem bħala sultan . . . u ma se jkun hemm ebda tmiem għas-saltna tiegħu.”—Luqa 1:30-33.
JENFASIZZA L-IMPORTANZA TAS-SALTNA
5. (a) L-importanza tas-Saltna kif inhi murija fil-Bibbja? (b) X’inhi s-saltna t’Alla, u x’se tagħmel?
5 Waqt li kienu fuq l-art, ix-xogħol prinċipali taʼ Ġesù Kristu u taʼ dawk li kienu jappoġġjawh kien li jippridkaw u jgħallmu dwar is-saltna t’Alla li ġejja. (Luqa 4:43; 8:1) Jagħmlu madwar 140 referenza għal dik is-saltna fil-Bibbja. Ġesù saħansitra għallem lis-segwaċi tiegħu biex jitolbu ’l Alla: “Tiġi saltnatek. Ir-rieda tiegħek issir fl-art, bħalma hija fis-sema.” (Mattew 6:10, King James Version) Hija din is-saltna li l-Kristjani jitolbu għaliha tassew gvern? Għandu mnejn int ma kontx taħseb li hija, imma hija. L-Iben t’Alla, Ġesù Kristu, hu s-Sultan tas-Saltna. U l-art kollha se tkun it-territorju li fuqu hu jaħkem. Kemm se tkun ħaġa mill-aħjar meta n-nies ma jkunux maqsumin f’ħafna ġnus opposti, imma l-bnedmin kollha jkunu magħqudin fil-paċi taħt il-gvern tas-Saltna t’Alla!
6. Meta Ġesù kien fuq l-art, għala ntqal li s-Saltna kienet “qrib” u “f’nofskom”?
6 Ġwanni l-Għammied beda jippriedka dwar dan il-gvern, billi qal lin-nies: “Indmu, għax is-saltna tas-smewwiet qorbot.” (Mattew 3:1, 2) Ġwanni għala setaʼ jgħid hekk? Għaliex Ġesù, il-Wieħed li kellu jkun il-ħakkiem tal-gvern tas-sema t’Alla, kien wasal biex jitgħammed minnu u jiġi midluk bl-ispirtu qaddis t’Alla. Mela tistaʼ tifhem għala Ġesù iktar tard qal lill-Fariżej: “Ħares! is-saltna t’Alla qiegħda f’nofskom.” (Luqa 17:21) Dan kien għaliex Ġesù, li lilu Alla kien ħatar bħala sultan, kien hemmhekk magħhom. Matul it-tliet snin u nofs tiegħu taʼ ppridkar u tagħlim, Ġesù, bil-fedeltà tiegħu lejn Alla sal-mewt, ta prova li kellu d-dritt ikun sultan.
7. Liema ħaġa turi li s-Saltna kienet kwistjoni importanti meta Ġesù kien fuq l-art?
7 Biex nuru li s-saltna t’Alla kienet il-kwistjoni importanti matul il-ministeru taʼ Kristu, ejjew nikkunsidraw x’ġara fl-aħħar jum qabel mewtu. Il-Bibbja tgħidilna li n-nies akkużaw lil Ġesù, billi qalu: “Lil dan ir-raġel sibnieh jaqleb taʼ taħt fuq lill-ġens tagħna u jipprojbixxi l-ħlas taʼ taxxi lil Ċesri u jgħid li hu nnifsu hu Kristu sultan.” Meta semaʼ dawn l-affarijiet, il-gvernatur Ruman Ponzju Pilatu staqsa lil Ġesù: “Int is-sultan tal-Lhud?”—Luqa 23:1-3.
8. (a) Ġesù kif wieġeb meta ġie mistoqsi jekk kienx sultan? (b) X’ried ifisser Ġesù meta qal li s-saltna tiegħu “m’hijiex minn dan is-sors”?
8 Ġesù ma weġibx il-mistoqsija taʼ Pilatu direttament, imma qal: “Is-saltna tiegħi m’hija ebda parti minn din id-dinja. Kieku s-saltna tiegħi kienet parti minn din id-dinja, il-qaddejja tiegħi kienu jiġġieldu biex ma niġix ikkunsinnat lil-Lhud. Imma, kif inhi, is-saltna tiegħi m’hijiex minn dan is-sors.” Ġesù wieġeb b’dan il-mod għaliex is-saltna tiegħu ma kellhiex tkun waħda taʼ l-art. Hu kellu jaħkem mis-sema, mhux bħala bniedem minn xi tron fuq l-art. Peress li l-kwistjoni kienet dwar jekk Ġesù kellux id-dritt li jaħkem bħala sultan jew le, Pilatu reġaʼ staqsa lil Ġesù: “Sewwa, allura, int sultan?”
9. (a) Ġesù liema verità taʼ l-għaġeb għarraf? (b) X’inhuma l-mistoqsijiet kbar illum?
9 Jidher ċar li Ġesù kien qiegħed jgħaddi ġuri għal ħajtu għaliex kien qiegħed jippriedka u jgħallem dwar gvern ġdid. Mela Ġesù wieġeb lil Pilatu: “Int innifsek qiegħed tgħid li jien sultan. Għal dan jien twelidt, u għal dan jien ġejt fid-dinja, biex nagħti xiehda għall-verità.” (Ġwann 18:36, 37) Iva, Ġesù kien qattaʼ ħajtu fuq l-art jgħid lin-nies il-verità taʼ l-għaġeb dwar il-gvern tas-Saltna t’Alla. Kien il-messaġġ prinċipali tiegħu. U s-Saltna għadha l-iktar kwistjoni importanti llum. Madankollu, jibqaʼ dawn il-mistoqsijiet: Liema gvern huwa l-iktar importanti fil-ħajja taʼ bniedem? Huwa xi gvern tal-bnedmin, jew huwa s-saltna t’Alla bi Kristu bħala ħakkiem?
JIRRANĠA GĦALL-GVERN ĠDID TAʼ L-ART
10. (a) Alla meta ra l-ħtieġa għall-gvern ġdid? (b) Fil-Bibbja fejn qiegħda l-ewwel referenza għal dan il-gvern? (ċ) Is-serpent lil min jirrappreżenta?
10 Kien meta Satana ġiegħel lil Adam u Eva jingħaqdu miegħu fl-irvell tiegħu li Jehovah ra l-bżonn għal gvern ġdid fuq il-bnedmin. Mela Alla minnufih tkellem dwar l-iskop tiegħu li jwaqqaf gvern bħal dan. Hu rrefera għal dan il-gvern meta qataʼ s-sentenza fuq is-serpent, billi fil-fatt qal lil Satana x-Xitan: “Se nqiegħed għadwa bejnek u l-mara u bejn iż-żerriegħa tiegħek u ż-żerriegħa tagħha. Hu se jbenġlek fir-ras u int se tbenġlu fl-għarqub.”—Ġenesi 3:14, 15.
11. Bejn min kellu jkun hemm mibgħeda?
11 Imma tistaʼ tistaqsi: ‘Fejn tintqal xi ħaġa hawnhekk dwar gvern?’ Ejjew inħarsu bir-reqqa lejn din l-istqarrija u se naraw. L-iskrittura tgħid li kellu jkun hemm għadwa, jew mibgħeda, bejn Satana u “l-mara.” Iżjed minn hekk, kellu jkun hemm mibgħeda bejn “iż-żerriegħa,” jew tfal, taʼ Satana u “ż-żerriegħa,” jew tfal, tal-mara. L-ewwelnett, għandna bżonn insibu min hija “l-mara.”
12. X’jintqal dwar “[i]l-mara” f’Rivelazzjoni kapitlu 12?
12 M’hijiex xi mara fuq l-art. Satana ma kellux xi mibgħeda speċjali lejn xi mara umana partikulari. Minflok, din hija mara simbolika. Jiġifieri, tirrappreżenta xi ħaġa oħra. Dan jidher mill-aħħar ktieb tal-Bibbja, Rivelazzjoni, fejn jingħata iktar tagħrif dwarha. Hemmhekk “[i]l-mara” hija deskritta bħala li hija “mżejna bix-xemx, wieqfa fuq il-qamar, u bit-tnax-il kewkba fuq rasha.” Biex jgħinna nifhmu lil min tirrappreżenta din “[i]l-mara,” innota x’ikompli jgħid Rivelazzjoni dwar binha: “Il-mara ġabet tifel fid-dinja, l-iben li kellu jaħkem il-ġnus kollha b’xettru tal-ħadid, u t-tifel ġie meħud dritt ’il fuq lejn Alla u lejn it-tron tiegħu.”—Rivelazzjoni 12:1-5, The Jerusalem Bible.
13. It-“tifel” u “l-mara” lil min jew lil liema ħaġa jirrappreżentaw?
13 Li nsiru nafu min huwa jew x’inhu t-“tifel” jgħinna nsibu lil min jew x’tirrappreżenta “l-mara.” It-tifel m’huwiex persuna litterali, bħalma l-mara m’hijiex mara umana vera. L-iskrittura turi li dan “[i]t-tifel” għandu “jaħkem il-ġnus kollha.” Mela t-“tifel” jirrappreżenta l-gvern t’Alla b’Ġesù Kristu li qiegħed jaħkem bħala Sultan. “Il-mara,” għalhekk, tirrappreżenta l-organizzazzjoni t’Alla taʼ ħlejjaq spirti leali. Sewwa sew bħalma t-“tifel” ġie mill-“mara,” hekk ukoll is-Sultan, Ġesù Kristu, ġie mill-organizzazzjoni tas-sema, il-ġemgħa taʼ ħlejjaq spirti leali fis-sema li jaħdmu flimkien biex iwettqu l-iskop t’Alla. Galatin 4:26 lil din l-organizzazzjoni jsejħilha “Ġerusalemm taʼ fuq.” Mela, allura, meta Adam u Eva rribellaw l-ewwel darba kontra l-ħakma t’Alla, Jehovah għamel arranġamenti għal gvern tas-Saltna li kellu jservi bħala tama għal dawk li jħobbu t-tjieba.
JEHOVAH JIFTAKAR FIL-WEGĦDA TIEGĦU
14. (a) Jehovah kif wera li ftakar fil-wegħda tiegħu dwar “żerriegħa” li kellu jbenġel lil Satana? (b) Min hu ż-“żerriegħa” mwiegħed?
14 Jehovah ma nesiex il-wegħda tiegħu li jibgħat “żerriegħa” li kellu jkun il-ħakkiem tal-gvern t’Alla. Dan il-ħakkiem kellu jeqred lil Satana billi jgħaffiġlu rasu. (Rumani 16:20; Ebrej 2:14) Iktar tard, Jehovah qal li n-nisel imwiegħed kellu jiġi mir-raġel leali Abraham. Jehovah qal lil Abraham: “Permezz taż-żerriegħa tiegħek il-ġnus kollha taʼ l-art ċertament li se jbierku lilhom infushom.” (Ġenesi 22:18) Min hu dan iż-“żerriegħa” li ġie mwiegħed li kellu jiġi mil-linja t’Abraham? Il-Bibbja tagħti t-tweġiba iktar tard, billi tgħid: “Issa l-wegħdiet intqalu lil Abraham u liż-żerriegħa tiegħu. Jgħid, mhux: ‘U lil żrieragħ,’ bħal fil-każ taʼ ħafna minnhom, imma bħal fil-każ taʼ wieħed: ‘U liż-żerriegħa tiegħek,’ li hu Kristu.” (Galatin 3:16) Jehovah qal ukoll lil bin Abraham, Iżakk, u lin-neputi tiegħu Ġakobb li ż-“żerriegħa” tal-“mara” t’Alla kellu jiġi mil-linja tan-nisel tagħhom.—Ġenesi 26:1-5; 28:10-14.
15, 16. Liema ħaġa tagħti prova li ż-“żerriegħa” kellu jkun sultan li jaħkem?
15 Biex jagħmel ċar li dan iż-“żerriegħa” kellu jkun sultan li jaħkem, Ġakobb għamel din l-istqarrija lil ibnu Ġuda: “Ix-xettru [jew, awtorità taʼ ħakma] m’huwiex se jdur fil-ġenb minn Ġuda, lanqas il-ħatar tal-kmandant minn bejn riġlejh, sakemm jiġi Xilo; u lilu se tappartjeni l-ubbidjenza tal-popli.” (Ġenesi 49:10) Ġesù Kristu ġie mit-tribù taʼ Ġuda. Hu ta prova li kien dan “Xilo” li lilu “se tappartjeni l-ubbidjenza tal-popli.”—Ebrej 7:14.
16 Kważi 700 sena wara l-istqarrija lil Ġuda, Jehovah qal rigward David tat-tribù taʼ Ġuda: “Sibt lil David il-qaddej tiegħi . . . U jien ċertament li se nistabbilixxi liż-żerriegħa tiegħu għal dejjem u t-tron tiegħu bħall-jiem tas-sema.” (Salm 89:20, 29) Meta Alla jgħid li ż-“żerriegħa” taʼ David se jiġi stabbilit “għal dejjem” u li “t-tron tiegħu” se jeżisti daqs “il-jiem tas-sema,” x’irid ifisser? Alla Jehovah qiegħed jirreferi għall-fatt li l-gvern tas-Saltna f’idejn il-ħakkiem maħtur tiegħu, Ġesù Kristu, se jibqaʼ għal dejjem. Kif nafu?
17. Kif nafu li l-ħakkiem imwiegħed hu Ġesù Kristu?
17 Sewwa, ftakar f’dak li l-anġlu taʼ Jehovah, Gabrijel, qal lil Marija dwar it-tifel li kellu jitweldilha. Hu qal: “Trid issemmih Ġesù.” Imma Ġesù ma kellux jibqaʼ biss tifel, jew saħansitra raġel, fuq l-art. Gabrijel kompla jgħid: “Dan il-wieħed se jkun kbir u se jkun imsejjaħ Bin l-Iktar Għoli; u Alla Jehovah se jagħtih it-tron taʼ David missieru, u hu se jaħkem bħala sultan fuq dar Ġakobb għal dejjem, u ma se jkun hemm ebda tmiem għas-saltna tiegħu.” (Luqa 1:31-33) M’huwiex dan verament taʼ l-għaġeb li Jehovah għamel arranġamenti biex jistabbilixxi gvern taʼ tjieba għall-benefiċċju dejjiemi taʼ dawk li jħobbuh u jafdaw fih?
18. (a) Il-Bibbja kif tiddeskrivi t-tmiem tal-gvernijiet taʼ l-art? (b) Il-gvern t’Alla x’se jagħmel għan-nies?
18 Iż-żmien issa huwa qrib meta l-gvern tas-Saltna t’Alla se jieħu azzjoni biex jeqred il-gvernijiet kollha tad-dinja. Ġesù Kristu mbagħad se jidħol fl-azzjoni bħala Sultan rebbieħ. Waqt li tiddeskrivi din il-battalja, il-Bibbja tgħid: “Fil-jiem taʼ dawk is-slaten dak Alla tas-sema se jwaqqaf saltna li qatt ma se tinġab f’rovina. . . . Din se tgħaffeġ lil u ġġib tmiem għal dawn is-saltniet kollha, u hija nfisha se tibqaʼ għal żminijiet indefiniti.” (Danjel 2:44; Rivelazzjoni 19:11-16) Bil-gvernijiet l-oħrajn kollha mneħħijin min-nofs, il-gvern t’Alla se jissodisfa l-ħtiġijiet veri tan-nies. Il-Ħakkiem, Ġesù Kristu, se jieħu ħsieb li ebda sudditu leali tiegħu ma jimrad, jixjieħ jew imut. Il-kriminalità, il-problema tad-djar, il-ġuħ u l-problemi l-oħrajn kollha bħal dawn se jiġu solvuti. Maʼ l-art kollha se jkun hemm paċi u sigurtà veri. (2 Pietru 3:13; Rivelazzjoni 21:3-5) Madankollu, għandna bżonn nitgħallmu iktar dwar dawk li se jkunu ħakkiema f’dan il-gvern tas-Saltna t’Alla.
[Stampa f’paġna 112, 113]
Ġesù bagħat lis-segwaċi tiegħu biex jagħmlu x-xogħol importanti taʼ l-ippridkar dwar is-saltna t’Alla
[Stampa f’paġna 114]
Meta kien għaddej ġuri għal ħajtu, Ġesù kompla jippriedka s-saltna t’Alla
[Stampa f’paġna 119]
Kif tħares int lejn Ġesù—bħala sultan rebbieħ jew bħala tarbija li ma tistaʼ tagħmel xejn?