Kemm Huwa Sod it-​Twemmin Tiegħek fl-​Irxoxt?

“Jien hu l-​qawmien u l-​ħajja. Kull min jemmen fija, ukoll jekk imut, jgħix.”—ĠWANN 11:25.

1, 2. Adoratur taʼ Jehovah jeħtieġ il-​fiduċja fit-​tama taʼ l-​irxoxt?

KEMM hija soda t-​tama tiegħek fl-​irxoxt? Tqawwik lilek meta tkun beżgħan li se tmut u tfarrġek meta jmutlek xi ħadd li tant tkun tħobb? (Mattew 10:28; 1 Tessalonikin 4:13) Int bħal ħafna qaddejja t’Alla tal-​qedem, li ssaportew swat, żebliħ, torturi, u ktajjen fil-​ħabs, billi ġew imsaħħin mit-​twemmin fl-​irxoxt?—Lhud 11:35-38.

² Iva, adoratur sinċier taʼ Jehovah m’għandu jkollu ebda dubju li se jkun hemm irxoxt, u l-​fiduċja tiegħu għandha teffettwa l-​mod kif jgħix ħajtu. Kemm tibqaʼ mmeraviljat x’ħin tirrifletti fuq il-​fatt li fiż-​żmien xieraq t’Alla, il-​baħar, il-​mewt, u Ħades se jroddu l-​mejtin li hemm fihom, u dawn li jiġu rxoxtati se jkollhom il-​prospett li jgħixu għal dejjem fuq art magħmula ġenna.—Apokalissi 20:13; 21:4, 5.

Dubji dwar Ħajja Futura

3, 4. Liema twemmin għad għandhom ħafna dwar il-​ħajja wara l-​mewt?

³ Il-​Kristjaneżmu ilu jgħallem li hemm ħajja oħra wara l-​mewt. Artiklu fir-​rivista U.S. Catholic qal: “Mal-​milja tas-​snin, il-​Kristjani għamlu ħilithom biex jaċċettaw u jkampaw mad-​diżappunti u s-​sofferenzi taʼ din il-​ħajja billi ħarsu ’l quddiem lejn ħajja oħra, waħda taʼ paċi u kuntentizza, taʼ sodisfazzjon u hena.” Avolja f’ċerti pajjiżi tal-​Kristjaneżmu n-​nies saru ssekularizzati u kemxejn ċiniċi dwar ir-​reliġjon, ħafna għadhom iħossu li bilfors irid ikun hemm xi ħaġa wara l-​mewt. Imma hemm ħafna affarijiet li m’humiex ċerti dwarhom.

⁴ Artiklu fir-​rivista Time għamel din l-​osservazzjoni: “In-​nies għadhom jemmnu f’[ħajja wara l-​mewt]: imma l-​konċett tagħhom taʼ x’inhi din eżattament qed isir iktar u iktar imċajpar, u qed jisimgħu ferm inqas dwarha mill-​qassisin tagħhom.” Il-​ministri reliġjużi għala m’għadhomx isemmuha daqs qabel, il-​ħajja taʼ wara l-​mewt? L-​istudjuż reliġjuż Jeffrey Burton Russell jgħid: “Naħseb li [l-membri tal-​kleru] jridu jevitaw is-​suġġett minħabba li jħossu li jkollhom jegħlbu l-​ostaklu taʼ xettiċiżmu popolari.”

5. Ħafna llum kif iqisuha d-​duttrina tan-​nar taʼ l-​infern?

⁵ F’ħafna reliġjonijiet, il-​ħajja wara l-​mewt tinkludi s-​sema u n-​nar taʼ l-​infern. U jekk il-​membri tal-​kleru ma tantx jieħdu gost jitkellmu dwar is-​sema, aħseb u ara kemm iktar ma jiħdux gost jitkellmu dwar l-​infern. Artiklu f’gazzetta qal: “Dan iż-​żmien anki l-​knejjes li jemmnu fil-​kastig etern fin-​nar taʼ l-​infern . . . jipprovaw li dan il-​konċett ma tantx jenfasizzawh. Tabilħaqq, il-​biċċa l-​kbira tat-​teologi moderni m’għadhomx jemmnu fl-​infern bħala post litterali taʼ turment, bil-​mod li kien jiġi mgħallem fil-​Medju Evu. Huma pjuttost jiffavorixxu verżjoni iktar “ħanina” taʼ x’inhu l-​infern. Skond ħafna modernisti, il-​midinbin fl-​infern m’humiex qed jiġu ttorturati litteralment, imma qed ibatu minħabba “s-​separazzjoni spiritwali [tagħhom] minn Alla.”

6. Xi wħud kif isibu li l-​fidi tagħhom m’hijiex qawwija biżżejjed meta jiġu wiċċ imb’wiċċ maʼ xi traġedja?

⁶ Il-​fatt li jżejnu xi duttrina tal-​knisja b’dan il-​mod, biex ma joffendux is-​sensibilità moderna, għandu mnejn jgħin lil xi wħud jevitaw in-​nuqqas taʼ popolarità, imma lil miljuni taʼ nies sinċieri li jmorru l-​knisja dan iħallihom bid-​dubju dwar x’jemmnu u x’ma jemmnux. Għaldaqstant, meta dawn jiġu wiċċ imb’wiċċ mal-​mewt, spiss isibu li huma neqsin mill-​fidi. L-​attitudni tagħhom hija bħal dik taʼ waħda mara li tilfet diversi membri tal-​familja f’aċċident traġiku. Meta ġiet mistoqsija jekk il-​fidi li kienet tħaddan kinitx ġabitilha faraġ, hi wieġbet bit-​tlaqliq, “Hekk naħseb.” Imma anki kieku wieġbet bil-​fiduċja kollha li l-​fidi li kienet tħaddan kienet għenitha, x’vantaġġ kienet se tikseb fil-​futur jekk it-​twemmin tagħha ma kienx imsejjes fuq is-​sod? Din hija ħaġa importanti li taʼ min wieħed iqisha, għaliex, attwalment, dak li jgħallmu l-​biċċa l-​kbira tar-​reliġjonijiet dwar ħajja futura huwa ferm differenti minn dak li tgħallem il-​Bibbja.

Kif il-​Kristjaneżmu Jħares lejn il-​Ħajja wara l-​Mewt

7. (a) Il-​biċċa l-​kbira tar-​reliġjonijiet liema twemmin komuni għandhom? (b) Wieħed teologu kif iddeskrivieha d-​duttrina tar-​ruħ immortali?

⁷ Minkejja d-​differenzi tagħhom, kważi d-​denominazzjonijiet kollha tal-​Kristjaneżmu jaqblu li l-​bnedmin għandhom ruħ immortali li tibqaʼ ħajja wara l-​mewt tal-​ġisem. Ħafna jemmnu li meta xi ħadd imut, ruħu tistaʼ tmur fis-​sema. Xi wħud jibżgħu li ruħhom tistaʼ tmur jew fin-​nar taʼ l-​infern jew fil-​purgatorju. Imma l-​idea taʼ ruħ immortali hija ċentrali għal dak li huma jemmnu dwar il-​ħajja futura. It-​teologu Oscar Cullmann ikkummenta dwar dan f’esej ippubblikat fil-​ktieb Immortality and Resurrection. Hu kiteb: “Li kieku kellna nistaqsu lil Kristjan kwalunkwe llum . . . x’jaħseb li hu t-​tagħlim tat-​Testment il-​Ġdid dwar id-​destin tal-​bniedem wara l-​mewt, b’eċċezzjoni taʼ xi ftit, għandu jkollna din it-​tweġiba: ‘L-​immortalità tar-​ruħ.’” Madankollu, Cullmann żied: “Din l-​idea, li hija aċċettata kullimkien, hija waħda mill-​akbar interpretazzjonijiet żbaljati tal-​Kristjanità.” Cullmann irrimarka li meta kien qal dan għall-​ewwel darba qajjem pandemonju sħiħ. Madankollu, hu kien korrett.

8. Jehovah liema tama poġġa quddiem l-​ewwel raġel u mara?

⁸ Alla Jehovah ma ħalaqx lill-​bnedmin biex wara li jmutu jmorru fis-​sema. Ma kienx l-​iskop oriġinali tiegħu li jkollhom għalfejn imutu. Adam u Eva ġew maħluqin perfetti u mogħtijin l-​opportunità li jimlew l-​art b’nisel ġust. (Ġenesi 1:28; Dewteronomju 32:4) Lill-​ewwel ġenituri tagħna ntqalilhom li huma kienu se jmutu biss jekk ma jobdux lil Alla. (Ġenesi 2:17) Li kieku baqgħu jobdu lil Missierhom tas-​sema, kienu se jibqgħu jgħixu fuq l-​art għal dejjem.

9. (a) X’inhi l-​verità dwar ir-​ruħ umana? (b) Ir-​ruħ x’jiġrilha meta tmut?

⁹ B’sogħba, iżda, Adam u Eva naqsu li jobdu lil Alla. (Ġenesi 3:6, 7) Dawn il-​konsegwenzi traġiċi huma deskritti mill-​appostlu Pawlu: “Kien permezz taʼ bniedem wieħed li fid-​dinja daħal id-​dnub, u permezz tad-​dnub il-​mewt, u hekk il-​mewt laħqet il-​bnedmin kollha għax kollha dinbu.” (Rumani 5:12) Minflok ma għexu fuq l-​art għal dejjem, Adam u Eva mietu. X’ġara dakinhar? Kellhom huma ruħ immortali li setgħet issa tiġi ttrasferita lejn l-​infern tan-​nar minħabba d-​dnub tagħhom? Għall-​kuntrarju, il-​Bibbja tgħid li iktar kmieni, meta ġie maħluq, Adam “sar ħlejqa [“ruħ,” KŻ] ħajja.” (Ġenesi 2:7) Il-​bniedem ma ġiex mogħti ruħ; hu sar ruħ, persuna ħajja. (1 Korintin 15:45) Iva, Adam mhux talli kien “ruħ ħajja” imma, kif muri fil-​lingwa Ebrajka, il-​lingwa li biha nkiteb il-​ktieb taʼ Ġenesi, anki l-​annimali iktar baxxi mill-​bniedem kienu “ħlejjaq [“erwieħ,” NW] ħajja”! (Ġenesi 1:24) Meta Adam u Eva mietu, huma saru erwieħ mejtin. Eventwalment, ġralhom preċiżament bħalma Jehovah kien qal lil Adam: “Bl-​għaraq taʼ ġbinek tiekol ħobżok, sakemm terġaʼ lura lejn l-​art, għax minnha int meħud. Għax trab int, u fit-​trab terġaʼ tmur.”—Ġenesi 3:19.

10, 11. In-​New Catholic Encyclopedia x’tammetti dwar it-​tagħlim tal-​Bibbja dwar ir-​ruħ, u dan kif jidher meta jiġi mqabbel maʼ dak li tgħid il-​Bibbja?

¹⁰ Fis-​sustanza, in-​New Catholic Encyclopedia taqbel maʼ dan. Fl-​artiklu tagħha “Soul (in the Bible) [Ir-ruħ (fil-Bibbja)],” din tgħid: “M’hemm ebda dikotomija [frid f’żewġ partijiet] tal-​ġisem u r-​ruħ fit-​TQ [“Testment il-​Qadim,” jew l-​Iskrittura Ebrajka].” Din iżżid li fil-​Bibbja l-​kelma “ruħ” “qatt ma tfisser ruħ bħala li hija distinta mill-​ġisem jew mill-​persuna individwali.” Tabilħaqq, ir-​ruħ taʼ spiss tfisser “l-​esseri individwali nnifsu kemm jekk inhu annimal u kemm jekk bniedem.” Sinċerità bħal din hija rrifreskanti, però xi ħadd b’mod loġiku jistaʼ jistaqsi għala lin-​nies in ġenerali li jmorru l-​knisja ħallewhom fl-​għama dwar dawn il-​fatti.

¹¹ Min jaf kemm kienu jiffrankaw inkwiet u biżaʼ dawn in-​nies li kieku kienu jafu l-​verità sempliċi tal-​Bibbja: “Ir-​ruħ li tidneb, tmut,” mhux tbati fin-​nar taʼ l-​infern! (Eżekjel 18:4, KŻ) Waqt li dan hu differenti ħafna minn dak li jiġi mgħallem fil-​Kristjaneżmu, huwa assolutament konsistenti maʼ dak li qal l-​għaref Salamun waqt li kien taħt ispirazzjoni: “Il-​ħajjin, għallinqas, jafu li għad imutu, iżda l-​mejtin ma jafu xejn; lanqas ħlas ma baqaʼ għalihom għax imqar it-​tifkira tagħhom intesiet. Kull ma ssib x’tagħmel, agħmlu b’ħiltek kollha għax ma jkunx hemm ħidma jew ħsieb, xjenza jew għerf, f’Art l-​Imwiet [Xeol, il-​qabar komuni tal-​bnedmin] fejn inti sejjer.”—Koħèlet 9:5, 10.

12. Il-​Kristjaneżmu minn fejn ġabu t-​tagħlim tiegħu dwar l-​immortalità tar-​ruħ?

¹² Il-​Kristjaneżmu għala jgħallem xi ħaġa li hi daqshekk differenti minn dak li tgħid il-​Bibbja? In-​New Catholic Encyclopedia, fl-​artiklu tagħha “Soul, Human, Immortality Of (L-Immortalità tar-​Ruħ Umana),” tgħid li l-​Missirijiet bikrin tal-​knisja sabu l-​appoġġ għat-​twemmin f’ruħ immortali, mhux fil-​Bibbja, imma fil-​“poeti u l-​filosfi u t-​tradizzjoni ġenerali tal-​ħsieb Grieg . . . Iktar tard, l-​iskolastiċi ppreferew jagħmlu użu minn Platone jew xi prinċipji minn Aristotele.” Din tistqarr li “l-​influwenza tal-​ħsieb Platoniku u Neoplatoniku”​—inkluż it-​twemmin fir-​ruħ immortali—​eventwalment ġiet miżjuda “fl-​istess qalba tat-​teoloġija Kristjana.”

13, 14. Għala m’huwiex raġonevoli li wieħed jittama li jiġi mdawwal mill-​filosfi pagani Griegi?

¹³ Għamlu sew dawn l-​hekk imsejħin Kristjani li qabdu u daru lejn il-​filosfi pagani Griegi biex jitgħallmu dwar xi ħaġa daqshekk bażika bħalma hi t-​tama taʼ ħajja wara l-​mewt? Dażgur li le. Meta Pawlu kiteb lill-​Kristjani li kienu jgħixu f’Korintu, il-​Greċja, hu qal: “L-​għerf taʼ din id-​dinja hu bluha quddiem Alla. Għax hemm miktub: ‘Hu li jaqbad l-​għorrief fil-​ħażen tagħhom’; u terġaʼ: ‘Il-​Mulej jaf li fiergħa huma l-​ħsibijiet taʼ l-​għorrief’.” (1 Korintin 3:19, 20) Il-​Griegi tal-​qedem kienu jqimu lill-​idoli. Allura, kif setgħu jkunu sors taʼ verità? Pawlu staqsa lill-​Korintin: “X’rabta hemm bejn it-​tempju taʼ Alla maʼ l-​idoli? Aħna t-​tempju taʼ Alla l-​ħaj. Kif jgħid Alla: ‘Ngħammar f’nofshom u nimxi magħhom. Nkun Alla tagħhom; u huma jkunu l-​poplu tiegħi.’”—2 Korintin 6:16.

¹⁴ Ir-​rivelazzjoni taʼ veritajiet sagri ngħatat l-​ewwel permezz tal-​ġens taʼ Iżrael. (Rumani 3:1, 2) Wara s-​sena 33 E.K., ngħatat permezz tal-​kongregazzjoni Kristjana midluka taʼ l-​ewwel seklu. Pawlu, waqt li tkellem dwar il-​Kristjani taʼ l-​ewwel seklu, qal: li dak li hemm imħejji għal dawk li jħobbuh “Alla rrivelahulna permezz taʼ l-​Ispirtu.” (1 Korintin 2:10; ara wkoll Apokalissi 1:​1, 2.) Id-​duttrina tal-​Kristjaneżmu dwar l-​immortalità tar-​ruħ hija mnissla mill-​filosofija Griega. Ma ġietx irrivelata permezz tar-​rivelazzjonijiet t’Alla lil Iżrael jew permezz tal-​kongregazzjoni taʼ Kristjani midlukin taʼ l-​ewwel seklu.

It-​Tama Vera għall-​Mejtin

15. Skond Ġesù, x’inhi t-​tama vera għall-​mejtin?

¹⁵ La m’hemm ebda ruħ immortali, x’inhi t-​tama vera għall-​mejtin? Hija, m’għandniex xi ngħidu, l-​irxoxt, duttrina ċentrali tal-​Bibbja u wegħda verament taʼ l-​għaġeb mingħand Alla. Din it-​tama taʼ l-​irxoxt offra Ġesù lill-​ħabiba tiegħu Marta meta qalilha: “Jien hu l-​qawmien u l-​ħajja. Kull min jemmen fija, ukoll jekk imut, jgħix.” (Ġwann 11:25) Li wieħed jemmen b’Ġesù jfisser li jemmen fl-​irxoxt, mhux f’xi ruħ immortali.

16. Għala huwa raġonevoli li wieħed jemmen fl-​irxoxt?

¹⁶ Ġesù kien diġà tkellem dwar l-​irxoxt meta qal lil xi Lhud: “Tistagħġbux b’dan: tiġi siegħa meta dawk kollha li jkunu fl-​oqbra jisimgħu leħnu u joħorġu.” (Ġwann 5:28, 29) Dak li Ġesù qed jiddeskrivi hawnhekk hu ferm differenti minn xi ruħ immortali li tibqaʼ ħajja wara l-​mewt tal-​ġisem u li tibqaʼ sejra dritt fis-​sema. Dan hu ‘ħruġ’ li se jsir fil-​futur taʼ nies li jkunu ilhom fil-​qabar, xi wħud minnhom għal sekli sħaħ jew saħansitra għal eluf taʼ snin. Ifisser li l-​erwieħ mejtin se jerġgħu jieħdu l-​ħajja. Impossibbli? Mhux għal Alla “li jagħti l-​ħajja lill-​mejtin, u li jsejjaħ fl-​eżistenza lil dak li ma jeżistix.” (Rumani 4:17) Nies xettiċi għandhom mnejn iwaqqgħuha għaċ-​ċajt l-​idea li n-​nies jerġgħu lura mill-​imwiet, imma dan jaqbel perfettament mal-​fatt li “Alla hu mħabba” u hu dak li “jagħti l-​ħlas xieraq lil dawk li jfittxuh.”—1 Ġwann 4:16; Lhud 11:6.

17. Alla x’se jwettaq permezz taʼ l-​irxoxt?

¹⁷ Wara kollox, kif jistaʼ Alla jagħti ħlas xieraq lil dawk li jkunu taw prova li kienu ‘fidili sal-​mewt’ jekk ma jerġax iġibhom lura għall-​ħajja? (Apokalissi 2:10) L-​irxoxt jagħmilha possibbli wkoll għal Alla biex iwettaq dak li kiteb dwaru l-​appostlu Ġwanni: “Kien għalhekk li deher l-​Iben taʼ Alla, biex iħott kull ma għamel ix-​Xitan.” (1 Ġwann 3:8) Lura fil-​ġnien taʼ Għeden, Satana sar il-​qattiel tar-​razza umana kollha kemm hi meta wassal lill-​ewwel ġenituri tagħna għad-​dnub u l-​mewt. (Ġenesi 3:1-6; Ġwann 8:44) Ġesù beda jħott ix-​xogħlijiet taʼ Satana meta ta l-​ħajja perfetta tiegħu bħala r-​rahan li jikkorrispondi, li fetaħ it-​triq biex l-​umanità tiġi meħlusa mill-​jasar li wirtet għad-​dnub li huwa r-​riżultat tad-​diżubbidjenza taʼ Adam minn jeddu. (Rumani 5:18) L-​irxoxt taʼ dawk li jmutu minħabba dan id-​dnub taʼ Adam se jkun ħaġa oħra li tinħatt mill-​għemejjel tax-​xitan.

Il-​Ġisem u r-​Ruħ

18. Xi filosfi Griegi kif irreaġixxew għall-​istqarrija taʼ Pawlu dwar li Ġesù kien ġie rxoxtat, u għala?

¹⁸ Meta l-​appostlu Pawlu kien f’Ateni, ippriedka l-​aħbar tajba lil folla li kienet tinkludi lil xi filosfi Griegi. Huma semgħu d-​diskussjoni tiegħu dwar dak Alla veru wieħed u s-​sejħa tiegħu għall-​indiema. Imma mbagħad x’ġara? Pawlu kkonkluda d-​diskors tiegħu, billi qal: “[Alla] għażel jum li fih għandu jagħmel ħaqq ġust mid-​dinja permezz taʼ bniedem li ħatru hu; u taʼ dan kollu ta prova quddiem kulħadd billi lilu qajjmu mill-​imwiet.” Dak il-​kliem qajjem polemika sħiħa. “Malli semgħu kliemu fuq il-​qawmien mill-​imwiet, xi wħud minnhom bdew jidħku.” (Atti 17:22-32) It-​teologu Oscar Cullmann jagħmel din l-​osservazzjoni: “Jistaʼ jkun li għall-​Griegi li kienu jemmnu fl-​immortalità tar-​ruħ kien iktar iebes li jaċċettaw l-​ippridkar Kristjan dwar l-​irxoxt milli kien għal oħrajn. . . . It-​tagħlim tal-​filosfi kbar Sokrate u Platone bl-​ebda mod ma jistaʼ jinġieb f’konsonanza [fi qbil] maʼ dak tat-​Testment il-​Ġdid.”

19. It-​teologi tal-​Kristjaneżmu kif ipprovaw iġibu t-​tagħlim taʼ l-​irxoxt f’armonija mad-​duttrina tar-​ruħ immortali?

¹⁹ Xorta waħda, wara l-​apostasija l-​kbira li segwiet il-​mewt taʼ l-​appostli, it-​teologi stinkaw biex iħalltu t-​tagħlim Kristjan taʼ l-​irxoxt mat-​twemmin taʼ Platone fir-​ruħ immortali. Maż-​żmien, xi wħud qablu dwar soluzzjoni oriġinali: Mal-​mewt, ir-​ruħ tissepara (“tiġi lliberata,” bħalma jpoġġuha xi wħud) mill-​ġisem. Imbagħad, skond l-​Outlines of the Doctrine of the Resurrection, minn R. J. Cooke, f’Jum il-​Ġudizzju “kull ġisem se jerġaʼ jingħaqad mar-​ruħ tiegħu stess, u kull ruħ maʼ ġisimha stess.” Din il-​ġrajja futura meta jingħaqdu flimkien il-​ġisem u r-​ruħ immortali tiegħu jingħad li hi l-​irxoxt.

20, 21. Min huma dawk li b’mod konsistenti għallmu l-​verità dwar l-​irxoxt, u dan kif kien taʼ ġid għalihom?

²⁰ Din it-​teorija għadha d-​duttrina uffiċjali tal-​knejjes prinċipali. Waqt li konċett bħal dan għandu mnejn jidher loġiku għal xi teologu, il-​biċċa l-​kbira taʼ dawk li jattendu l-​knisja m’humiex familjari miegħu. Huma sempliċement jemmnu li meta jmutu se jmorru dritt is-​sema. Għal din ir-​raġuni, fil-​ħarġa taʼ Commonweal tal-​5 taʼ Mejju, 1995, il-​kittieb John Garvey għamel din l-​akkuża: “It-​twemmin taʼ ħafna mill-​Kristjani [fuq il-​kwistjoni taʼ ħajja wara l-​mewt] jidher li hu eqreb lejn in-​Neoplatoniżmu milli lejn kwalunkwe ħaġa li hi verament Kristjana, u dan m’għandu ebda bażi Biblika.” Tabilħaqq, billi partu l-​Bibbja maʼ Platone, il-​kleru tal-​Kristjaneżmu ġagħlu lill-​merħliet tagħhom jitilfu l-​fidi fit-​tama tal-​Bibbja dwar l-​irxoxt.

²¹ Mill-​banda l-​oħra, ix-​Xhieda taʼ Jehovah jirrifjutaw il-​filosofija pagana u jżommu mat-​tagħlim tal-​Bibbja dwar l-​irxoxt. Huma jsibu li dan it-​tagħlim jibnihom, jissodisfahom u jfarraġhom. Fl-​artikli li ġejjin, se naraw preċiżament kemm għandu sisien sodi u kemm hu loġiku t-​tagħlim tal-​Bibbja dwar l-​irxoxt, kemm għal dawk li għandhom tama li jgħixu fuq l-​art u kemm għal dawk li għandhom il-​prospett taʼ rxoxt għal ħajja fis-​sema. Bħala preparazzjoni biex tikkunsidra dawn l-​artikli, nirrikkmandawlek li taqra b’attenzjoni kapitlu 15 taʼ l-​ewwel ittra lill-​Korintin.

Tiftakar Int?

◻ Għala għandna nikkultivaw fiduċja soda fl-​irxoxt?

◻ Jehovah liema prospett poġġa quddiem Adam u Eva?

◻ Għala m’huwiex loġiku li nfittxu l-​verità fil-​filosofija Griega?

◻ L-​irxoxt għala huwa tama raġonevoli?

[Stampa f’paġna 10]

Meta dinbu, l-​ewwel ġenituri tagħna tilfu t-​tama taʼ ħajja taʼ dejjem fuq l-​art

[Stampa f’paġna 12]

L-​istudjużi tal-​Knisja bdew jiġu influwenzati mit-​twemmin taʼ Platone dwar l-​immortalità tar-​ruħ

[Sors]

Musei Capitolini, Roma