Kapitlu 14

L-​Awtorità taʼ Min Għandek Int Tirrikonoxxi?

1, 2. Huma l-​forom kollha t’awtorità taʼ detriment? Spjega.

“AWTORITÀ” hija kelma kerha għal ħafna nies. Wieħed jistaʼ jifhmu dan, għax l-​awtorità hija taʼ spiss abbużata—fuq ix-​xogħol, fil-​familja, u minn gvernijiet. Il-​Bibbja b’mod realistiku tgħid: “Bniedem jaħkem fuq ieħor u jagħmillu l-​ħsara.” (Koħelet 8:9) Iva, ħafna ddominaw lil oħrajn billi aġixxew b’manjiera tirannika u li taqbel lilhom.

² Imma mhux l-​awtorità kollha hija taʼ detriment. Per eżempju, jistaʼ jingħad li ġisimna jeżerċita awtorità fuqna. “Jordnalna” biex nieħdu n-​nifs, nieklu, nixorbu, u norqdu. Huwa dan oppressiv? Le. Li nċedu għal dawn it-​talbiet insistenti huwa għall-​ġid tagħna. Waqt li sottomissjoni lejn il-​ħtiġijiet taʼ ġisimna tistaʼ tkun involontarja, hemm forom oħrajn t’awtorità li jirrikjedu s-​sottomissjoni tagħna minn jeddna. Ikkunsidra xi eżempji.

L-​AWTORITÀ SUPREMA

3. Jehovah għala hu bi dritt imsejjaħ “Mulej Sovran”?

³ ’Il fuq minn 300 darba fil-​Bibbja, Jehovah jissejjaħ “Mulej Sovran.” [NW] Sovran hu wieħed li jippossiedi awtorità suprema. X’inhu dak li jagħti lil Jehovah id-​dritt għal dan l-​istatus? Apokalissi 4:11 iwieġeb: “Jistħoqqlok, Mulej Alla tagħna, li tirċievi l-​glorja u l-​ġieh u s-​setgħa, għax int ħlaqt il-​ħlejjaq kollha, u huma kienu u nħolqu bir-​rieda tiegħek.”

4. Jehovah kif jagħżel li jeżerċitaha l-​awtorità tiegħu?

⁴ Bħala l-​Ħallieq tagħna, Jehovah għandu d-​dritt li jeżerċita l-​awtorità tiegħu skond kif jagħżel hu. Dan jistaʼ jidher tal-​biżaʼ, speċjalment meta nikkunsidraw li Alla għandu “abbundanza t’enerġija dinamika.” Hu jissejjaħ “Alla li jistaʼ kollox”—terminu li fl-​Ebrajk jagħti l-​idea taʼ saħħa li tegħleb. (Isaija 40:26, NW; Ġenesi 17:1) Madankollu, Jehovah juri s-​saħħa tiegħu b’mod benevolenti, għax il-​kwalità dominanti tiegħu hija l-​imħabba.—1 Ġwann 4:16.

5. Għala m’huwiex diffiċli li wieħed jissottometti ruħu lejn l-​awtorità taʼ Jehovah?

⁵ Għalkemm Jehovah wissa li kellu jġib kastig fuq uħud li għamlu l-​ħażen u ma nidmux, Mosè kien jafu prinċipalment bħala “Alla [“veru,” NW]; Alla taʼ kelmtu, li jżomm il-​għaqda tiegħu, u t-​tjieba tiegħu, sa l-​elf nisel, maʼ dawk li jħobbuh, u jħarsu l-​kmandamenti tiegħu.” (Dewteronomju 7:9, KŻ) Immaġina ftit! L-​Awtorità Suprema taʼ l-​univers ma jisforzaniex biex naqduh. Minflok, aħna ninġibdu lejh minħabba l-​imħabba tiegħu. (Rumani 2:4; 5:8) Li nissottomettu rwieħna lejn l-​awtorità taʼ Jehovah huwa saħansitra taʼ pjaċir, għax il-​liġijiet tiegħu dejjem ikunu għall-​benefiċċju aħħari tagħna.—Salm 19:8, 9 [19:7, 8, NW].

6. Kif qamet il-​kwistjoni dwar l-​awtorità fil-​ġnien t’Għeden, u b’liema riżultat?

⁶ L-​ewwel ġenituri tagħna ċaħdu s-​sovranità t’Alla. Huma riedu li jiddeċiedu għalihom infushom dak li kien tajjeb u dak li kien ħażin. (Ġenesi 3:4-6) Bħala riżultat, ġew mitfugħin ’il barra mid-​dar Ġenna tagħhom. Jehovah minn dak in-​nhar ’il quddiem ħalla lill-​bnedmin joħolqu strutturi t’awtorità li kellhom jgħinuhom biex jgħixu f’soċjetà t’ordni, għalkemm imperfetta. Liema huma xi wħud minn dawn l-​awtoritajiet, u Alla sa liema punt jistenna li aħna nissottomettu ruħna lejhom?

“L-​AWTORITAJIET SUPERJURI”

7. Min huma “l-​awtoritajiet superjuri,” u l-​pożizzjoni tagħhom kif inhi relatata maʼ l-​awtorità t’Alla?

⁷ L-​appostlu Pawlu kiteb: “Kull bniedem għandu jobdi lil l-​awtorità taʼ fuqu [“l-​awtoritajiet superjuri,” NW]. Ma hemmx awtorità jekk m’hix ġejja minn Alla.” Min huma l-​“awtoritajiet superjuri”? Il-​kliem taʼ Pawlu fil-​versi taʼ wara juri li huma awtoritajiet governattivi umani. (Rumani 13:1-7; Titu 3:1) Jehovah m’oriġinax l-​awtoritajiet governattivi tal-​bniedem, imma jeżistu bil-​permess tiegħu. Mela Pawlu setaʼ jikteb: “L-​awtoritajiet li hemm, qegħdin hemm bl-​ordni taʼ Alla.” Dan x’jindika dwar awtorità taʼ l-​art bħal din? Li hija subordinata, jew inferjuri, għall-​awtorità t’Alla. (Ġwann 19:10, 11) Għalhekk, meta jkun hemm konflitt bejn il-​liġi tal-​bniedem u l-​liġi t’Alla, il-​Kristjani jridu jiġu ggwidati mill-​kuxjenza tagħhom imħarrġa fuq il-​Bibbja. Huma ‘jeħtieġ jobdu aktar lil Alla milli ’l-bnedmin.’—Atti 5:29.

8. Int kif tibbenefika mill-​awtoritajiet superjuri, u kif tistaʼ turi s-​sottomissjoni tiegħek lejhom?

⁸ Fil-​parti l-​kbira, madankollu, l-​awtoritajiet governattivi superjuri jaġixxu bħala “l-​ministri taʼ Alla għall-​ġid tiegħek.” (Rumani 13:4) B’liema modi? Sewwa, aħseb dwar is-​servizzi numerużi li l-​awtoritajiet superjuri jipprovdu, bħalma huma t-​tqassim tal-​posta, il-​protezzjoni tal-​pulizija u min-​nar, is-​sanità, u l-​edukazzjoni. ‘Għalhekk ukoll tħallsu t-​taxxi,’ kiteb Pawlu, “għax . . . huma uffiċjali taʼ Alla għal dan ix-​xogħol.” (Rumani 13:6) Inkwantu għat-​taxxi jew xi obbligu legali ieħor, għandna “nġibu ruħna sewwa.”—Lhud 13:18.

9, 10. (a) L-​awtoritajiet superjuri kif jiffittjaw fl-​arranġament t’Alla? (b) Għala jkun żbaljat li topponi lill-​awtoritajiet superjuri?

⁹ Kultant, l-​awtoritajiet superjuri jużaw ħażin il-​poter tagħhom. Iħollna dan mir-​responsabbiltà tagħna li nibqgħu f’sottomissjoni lejhom? Le, ma jħollniex. Jehovah jara l-​għemejjel ħżiena taʼ dawn l-​awtoritajiet. (Proverbji 15:3) Li hu jittollera l-​ħakma mill-​bniedem ma jfissirx li jagħlaq għajnejh għall-​korruzzjoni tagħha; lanqas ma jistenna li aħna nagħmlu hekk. Tabilħaqq, Alla dalwaqt se ‘jfarrak u jtemm is-​saltniet l-​oħra kollha,’ billi flokhom jagħmel il-​ħakma tal-​gvern tiegħu stess taʼ tjieba. (Danjel 2:44) Imma sa ma jseħħ dan, l-​awtoritajiet superjuri jaqdu skop siewi.

¹⁰ Pawlu spjega: “Dawk li jeħduha kontra l-​awtorità jkunu qegħdin jeħduha kontra l-​ordni [“l-​arranġament,” NW] mwaqqaf minn Alla.” (Rumani 13:2) L-​awtoritajiet superjuri huma “l-​arranġament” t’Alla f’li jippreservaw miżura t’ordni, li mingħajru kieku jirrenjaw il-​kaos u l-​anarkija. Li wieħed jopponihom ma jkunx skritturali u jkun bla sens. Biex nagħtu tixbieha: Immaġina li għamilt operazzjoni u jkollok il-​ponti biex jagħlqu l-​ferita. Għalkemm il-​ponti huma barranin għall-​ġisem, dawn jaqdu skop għal żmien limitat. Li jitneħħew qabel iż-​żmien jistaʼ jkun taʼ ħsara. Bl-​istess mod, l-​awtoritajiet governattivi umani ma kinux parti mill-​iskop oriġinali t’Alla. Sakemm is-​Saltna tiegħu tkun qiegħda taħkem l-​art kompletament, madankollu, il-​gvernijiet umani jżommu lis-​soċjetà magħquda, billi jwettqu inkarigu li huwa fi qbil mar-​rieda t’Alla għaż-​żmien preżenti. Aħna għandna b’hekk nibqgħu sottomessi lejn l-​awtoritajiet superjuri, waqt li nagħtu prijorità lil-​liġi u lill-​awtorità t’Alla.

AWTORITÀ FIL-​FAMILJA

11. Kif tispjegah int il-​prinċipju taʼ l-​istat taʼ kap?

¹¹ Il-​familja hija l-​bażi tas-​soċjetà umana. Ġewwa fiha raġel u mara miżżewġin jistgħu jsibu sħubija premjanti, u t-​tfal jistgħu jiġu ssalvagwardjati u mħarrġin sakemm isiru adulti. (Proverbji 5:15-21; Efesin 6:1-4) Arranġament nobbli bħal dan jeħtieġ li jkun organizzat b’mod li jġiegħel lill-​membri tal-​familja jgħixu fil-​paċi u fl-​armonija. Il-​mod li bih Jehovah iwettaq dan huwa permezz tal-​prinċipju taʼ l-​istat taʼ kap, miġbur f’dawn il-​kelmiet misjubin fl-​1 Korintin 11:3: “[I]r-ras taʼ kull raġel huwa Kristu, u ras il-​mara huwa r-​raġel, u ras Kristu hu Alla.”

12, 13. Min hu l-​kap tal-​familja, u wieħed x’jistaʼ jitgħallem mill-​mod kif Ġesù eżerċita l-​istat taʼ kap?

¹² Ir-​raġel hu l-​kap tal-​familja. Madankollu, hemm kap fuqu—Ġesù Kristu. Pawlu kiteb: “Irġiel, ħobbu n-​nisa tagħkom, kif Kristu ħabb il-​Knisja u ta ħajtu għaliha.” (Efesin 5:25) Raġel jirrifletti s-​sottomissjoni tiegħu lejn Kristu meta jittratta lil martu bil-​mod li Ġesù dejjem ittratta lill-​kongregazzjoni tiegħu. (1 Ġwann 2:6) Awtorità kbira ġiet mogħtija lil Ġesù, imma hu jeżerċitaha bl-​akbar ġentilezza, imħabba, u raġonevolezza. (Mattew 20:25-28) Bħala bniedem, Ġesù qatt m’abbuża mill-​pożizzjoni tiegħu t’awtorità. Hu kien “taʼ qalb ħelwa u umli” u sejjaħ lis-​segwaċi tiegħu “ħbieb” minflok “qaddejja.” “Jiena nserraħkom,” hu wegħedhom, u hekk għamel.—Mattew 11:28, 29; Ġwann 15:15.

¹³ L-​eżempju taʼ Ġesù jgħallem lill-​irġiel miżżewġin li l-​istat taʼ kap Kristjan m’huwiex pożizzjoni taʼ dominanza ħarxa. Minflok, dan huwa wieħed taʼ rispett u mħabba li tissagrifika lilha nfisha. Dan kellu jeskludi b’mod ċar l-​immaltrattar taʼ sieħba fiżikament jew verbalment. (Efesin 4:29, 31, 32; 5:28, 29; Kolossin 3:19) Jekk raġel Kristjan kellu jimmaltratta b’dan il-​mod lil martu, ix-​xogħlijiet tajbin l-​oħrajn tiegħu kellhom ikunu bla valur, u t-​talb tiegħu kellu jkun imfixkel.—1 Korintin 13:1-3; 1 Pietru 3:7.

14, 15. L-​għarfien dwar Alla kif jistaʼ jgħin lil mara biex tkun sottomessa lejn żewġha?

¹⁴ Meta raġel jimita l-​eżempju taʼ Kristu, huwa iktar faċli għal martu biex taġixxi fi qbil mal-​kliem t’​Efesin 5:22, 23: “Intom in-​nisa oqogħdu għal żwieġkom bħallikieku għall-​Mulej, għax ir-​raġel hu ras il-​mara, bħalma Kristu hu ras il-​Knisja.” Sewwa sew bħalma raġel irid ikun sottomess lejn Kristu, mara trid tkun sottomessa lejn żewġha. Il-​Bibbja tagħmilha ċara wkoll li nisa kapaċi jixirqilhom unur u tifħir għall-​għerf divin u l-​bżulija tagħhom.—Proverbji 31:10-31.

¹⁵ Is-​sottomissjoni taʼ mara Kristjana lejn żewġha hija relattiva. Dan ifisser li Alla iktar milli l-​bniedem irid jiġi obdut jekk li tissottometti ruħha f’ċerta kwistjoni se jirriżulta f’li tikser il-​liġi divina. Saħansitra f’dak il-​każ, il-​waqfa soda taʼ mara għandha tkun imħawra b’“qalb ħelwa u twajba.” Għandu jkun evidenti li l-​għarfien dwar Alla għamilha mara aħjar. (1 Pietru 3:1-4) L-​istess jgħodd għal raġel Kristjan li l-​mara tiegħu ma temminx bħalu. Li jaġixxi fi qbil maʼ prinċipji Bibliċi għandu jagħmlu raġel aħjar.

16. It-​tfal kif jistgħu jimitaw l-​eżempju li Ġesù stabbilixxa meta kien żagħżugħ?

¹⁶ Efesin 6:1 jispjega l-​irwol tat-​tfal, billi jistqarr: “Isimgħu mill-​ġenituri tagħkom fil-​Mulej, dan hu s-​sewwa.” It-​tfal Kristjani jsegwu l-​eżempju taʼ Ġesù, li baqaʼ sottomess lejn il-​ġenituri tiegħu waqt li kien qiegħed jikber. Bħala tifel ubbidjenti, hu “baqaʼ jikber fil-​għerf, fis-​snin u fil-​grazzja, quddiem Alla u quddiem il-​bnedmin.”—Luqa 2:51, 52.

17. Il-​mod li bih il-​ġenituri jeżerċitaw l-​awtorità jistaʼ jkollu liema effett fuq it-​tfal tagħhom?

¹⁷ Il-​mod li bih il-​ġenituri jimmaniġġaw ir-​responsabbiltajiet tagħhom jistaʼ jkollu influwenza fuq jekk it-​tfal tagħhom humiex se jirrispettaw l-​awtorità jew humiex se jirribellaw kontra tagħha. (Proverbji 22:6) Mela l-​ġenituri jagħmlu tajjeb jekk jistaqsu lilhom infushom, ‘Neżerċita jien l-​awtorità tiegħi b’imħabba jew bi ħruxija? Jien permissiv?’ Ġenitur devot hu mistenni li juri mħabba u konsiderazzjoni, u madankollu jkun sod f’li jżomm maʼ prinċipji divini. Bix-​xieraq, Pawlu kiteb: “Missirijiet, iġġarrbuhomx iżżejjed lil uliedkom [litteralment, ‘tipprovokawhomx għall-​korla’]; iżda rabbuhom fid-​dixxiplina u t-​twiddib tal-​Mulej.”—Efesin 6:4; Kolossin 3:21.

18. Id-​dixxiplina tal-​ġenituri kif għandha tiġi amministrata?

¹⁸ Il-​ġenituri għandhom jiflu l-​metodi tagħhom taʼ taħriġ, speċjalment jekk jixtiequ li t-​tfal tagħhom ikunu ubbidjenti u b’hekk iġibulhom il-​ferħ. (Proverbji 23:24, 25) Fil-​Bibbja, id-​dixxiplina hija primarjament forma taʼ struzzjoni. (Proverbji 4:1; 8:33) Hija marbuta maʼ l-​imħabba u l-​ħlewwa, mhux mar-​rabja u l-​brutalità. Għalhekk, ġenituri Kristjani jeħtieġ li jaġixxu bil-​għerf u jżommu lilhom infushom imrażżnin meta jkunu qegħdin jiddixxiplinaw lit-​tfal tagħhom.—Proverbji 1:7.

AWTORITÀ FIL-​KONGREGAZZJONI

19. Alla kif ipprovda għall-​bonordni fil-​kongregazzjoni Kristjana?

¹⁹ Ladarba Jehovah hu Alla t’ordni, huwa raġonevoli li kien se jipprovdi tmexxija awtorevoli u organizzata tajjeb għall-​poplu tiegħu. Fi qbil maʼ dan, hu ħatar lil Ġesù bħala l-​Kap tal-​kongregazzjoni Kristjana. (1 Korintin 14:33, 40; Efesin 1:20-23) Taħt it-​tmexxija inviżibbli taʼ Kristu, Alla awtorizza arranġament li bih anzjani maħturin f’kull kongregazzjoni jirgħu l-​merħla ħerqanin, minn jeddhom, u bl-​imħabba. (1 Pietru 5:2, 3) Il-​qaddejja ministerjali jgħinuhom b’diversi modi u jagħtu servizz prezzjuż ġewwa l-​kongregazzjoni.—Filippin 1:1.

20. Għala għandna nkunu sottomessi lejn anzjani Kristjani maħturin, u dan għala huwa taʼ benefiċċju?

²⁰ Rigward l-​anzjani Kristjani, Pawlu kiteb: “Oqogħdu għal dawk li jmexxukom, u obduhom, għax huma jgħassu fuqkom għall-​ġid tagħkom, bħala nies li għad iridu jagħtu kont tagħkom. Hekk huma jaqdu dan id-​dmir bil-​ferħ, u mhux bi swied il-​qalb; għax dan ma jkun jiswielkom taʼ ebda ġid.” (Lhud 13:17) Bil-​għerf kollu, Alla fada f’idejn indokraturi Kristjani r-​responsabbiltà li jieħdu ħsieb il-​ħtiġijiet spiritwali taʼ dawk fil-​kongregazzjoni. Dawn l-​anzjani ma jifformawx klassi tal-​kleru. Huma qaddejja u rsiera t’Alla, li jimministraw għall-​ħtiġijiet t’adoraturi sħabhom, sewwa sew bħalma għamel Sidna Ġesù Kristu. (Ġwann 10:14, 15) Li nafu li rġiel ikkwalifikati Skritturalment jieħdu interess fil-​progress u l-​maturità spiritwali tagħna jinkuraġġina biex nuru koperazzjoni u sottomissjoni.—1 Korintin 16:16.

21. Anzjani maħturin kif ifittxu li jgħinu spiritwalment lil Kristjani sħabhom?

²¹ Kultant, xi ngħaġ jistgħu jintilfu jew jidħlu f’xi periklu minn elementi dinjin taʼ ħsara. Taħt it-​tmexxija tar-​Ragħaj Ewlieni, l-​anzjani bħala sotto-ragħajja huma attenti għall-​ħtiġijiet taʼ dawk li tagħhom qegħdin jieħdu ħsieb u b’mod ħabrieki jagħtuhom attenzjoni persunali. (1 Pietru 5:4) Huma jżuru lil membri tal-​kongregazzjoni u joffru kliem taʼ inkuraġġiment. Billi jafu li x-​Xitan qiegħed ifittex biex iħarbat il-​paċi tal-​poplu t’Alla, l-​anzjani jeżerċitaw l-​għerf minn fuq f’li jittrattaw maʼ kwalunkwe problemi. (Ġakbu 3:17, 18) Huma jaħdmu iebes biex iżommu l-​unità u l-​għaqda fil-​fidi, xi ħaġa li għaliha talab Ġesù nnifsu.—Ġwann 17:20-22; 1 Korintin 1:10.

22. Liema għajnuna jipprovdu l-​anzjani f’xi każi t’għemil ħażin?

²² Xi ngħidu jekk Kristjan iġarrab xi ħsara, jew isir skuraġġit minħabba li kkommetta xi dnub? Pariri li jaħju mill-​Bibbja u talb bil-​qalb mill-​anzjani għan-​nom tiegħu jistgħu jgħinu biex jirrestawrawh għal saħħa spiritwali. (Ġakbu 5:13-15) Dawn l-​irġiel, maħturin mill-​ispirtu qaddis, għandhom ukoll l-​awtorità biex jamministraw id-​dixxiplina u jċanfru lil kwalunkwe wieħed li jsegwi korsa taʼ ħażen jew li hu taʼ periklu għall-​indafa spiritwali u morali tal-​kongregazzjoni. (Atti 20:28; Titu 1:9; 2:15) Sabiex il-​kongregazzjoni tinżamm nadifa, jistaʼ jkun neċessarju għal individwi li jirrapportaw att taʼ ħażen serju. (Levitiku 5:1) Jekk Kristjan li kkommetta dnub gravi jaċċetta d-​dixxiplina u t-​twiddib Skritturali u jagħti evidenza taʼ ndiema ġenwina, hu se jiġi mgħejjun. M’għandniex xi ngħidu, uħud li b’mod persistenti u bla ndiema jiksru l-​liġi t’Alla jiġu maqtugħin mis-​sħubija.—1 Korintin 5:9-13.

23. Indokraturi Kristjani x’jipprovdu għall-​ġid tal-​kongregazzjoni?

²³ Il-​Bibbja bassret li taħt Ġesù Kristu bħala Sultan, irġiel maturi spiritwalment kellhom jinħatru biex jipprovdu faraġ, protezzjoni u rifreskar għall-​poplu t’Alla. (Isaija 32:1, 2) Kellhom ikunu minn taʼ quddiem bħala evanġelizzaturi, ragħajja, u għalliema sabiex jippromwovu t-​tkabbir spiritwali. (Efesin 4:11, 12, 16) Għalkemm indokraturi Kristjani jistgħu xi drabi jċanfru, iwissu, u jwiddbu lil kredenti sħabhom, l-​applikar tat-​tagħlim li jsaħħaħ mill-​anzjani bbażat fuq il-​Kelma t’Alla jgħin biex iżomm lil kulħadd fit-​triq tal-​ħajja.—Proverbji 3:11, 12; 6:23; Titu 2:1.

AĊĊETTA L-​ĦARSA TAʼ JEHOVAH LEJN L-​AWTORITÀ

24. Fuq liema kwistjoni qegħdin niġu ttestjati kuljum?

²⁴ L-​ewwel raġel u mara ġew ittestjati dwar il-​kwistjoni taʼ sottomissjoni lejn l-​awtorità. M’huwiex sorprendenti li test simili jiffaċċjana kuljum. Satana x-​Xitan ippromwova spirtu taʼ rvell fost l-​umanità. (Efesin 2:2) Il-​korsa taʼ indipendenza tintgħamel tidher superjuri b’mod attraenti għal dik tas-​sottomissjoni.

25. X’inhuma l-​benefiċċji taʼ li nirrifjutaw l-​ispirtu ribelluż tad-​dinja u taʼ li nkunu sottomessi lejn l-​awtorità li Alla jeżerċita jew jippermetti?

²⁵ Irridu, madankollu, nirrifjutaw l-​ispirtu ribelluż tad-​dinja. F’li nagħmlu hekk, se nsibu li sottomissjoni devota ġġib premjijiet għonja. Per eżempju, se nevitaw l-​anzjetajiet u l-​frustrazzjonijiet komuni għal dawk li jistiednu l-​inkwiet maʼ l-​awtoritajiet sekulari. Se nnaqqsu n-​nuqqas taʼ qbil li huwa prevalenti f’ħafna familji. U se ngawdu l-​benefiċċji taʼ sħubija kordjali u taʼ mħabba maʼ sħabna l-​kredenti Kristjani. Fuq kollox, is-​sottomissjoni devota tagħna se tirriżulta f’relazzjoni tajba maʼ Jehovah, l-​Awtorità Suprema.

ITTESTJA L-​GĦARFIEN TIEGĦEK

Jehovah kif jeżerċita l-​awtorità tiegħu?

Min huma “l-​awtoritajiet superjuri,” u kif nibqgħu sottomessi lejhom?

Il-​prinċipju taʼ l-​istat taʼ kap liema responsabbiltà jpoġġi fuq kull membru tal-​familja?

Kif nistgħu nuru sottomissjoni fil-​kongregazzjoni Kristjana?

[Kaxxa f’paġna 134]

SOTTOMESSI, MHUX SOVVERSIVI

Permezz taʼ l-​attività tagħhom taʼ ppridkar pubbliku, ix-​Xhieda taʼ Jehovah jippontaw lejn is-​Saltna t’Alla bħala l-​unika tama għall-​paċi u s-​siġurtà veri għall-​umanità. Imma dawn ix-​xandâra żelużi tas-​Saltna t’Alla m’huma bl-​ebda mod sovversivi lejn il-​gvernijiet li taħthom huma jgħixu. Għall-​kuntrarju, ix-​Xhieda huma fost iċ-​ċittadini li l-​iktar juru rispett u jobdu l-​liġi. “Kieku d-​denominazzjonijiet reliġjużi kollha kienu bħax-​xhieda taʼ Jehovah,” qal uffiċjal f’pajjiż Afrikan wieħed, “ma kienx ikollna qtil, serq, delinkwenza, priġunieri, u bombi atomiċi. Il-​bibien ma kinux ikunu msakkrin jum wara l-​ieħor.”

Billi jirrikonoxxu dan, uffiċjali f’ħafna pajjiżi ħallew ix-​xogħol taʼ l-​ippridkar tax-​Xhieda jibqaʼ sejjer mingħajr xkiel. F’pajjiżi oħrajn, projbizzjonijiet jew restrizzjonijiet ġew imneħħijin meta l-​awtoritajiet irrealizzaw li x-​Xhieda taʼ Jehovah huma influwenza għat-​tajjeb. Dan huwa bħalma kiteb l-​appostlu Pawlu dwar li wieħed jobdi l-​awtoritajiet superjuri: “Agħmel it-​tajjeb, u jkollok it-​tifħir minn għandhom.”—Rumani 13:1, 3.