Qiegħed Int Tirreżisti l-Ispirtu tad-Dinja?

“Aħna rċevejna, mhux l-​ispirtu tad-​dinja, imma l-​ispirtu li hu mingħand Alla.”—1 KORINTIN 2:12.

1, 2. Liema traġedja li tinvolvi gass velenuż seħħet f’Bhopal, ġewwa l-​Indja, imma liema “gass” iktar qattiel qiegħed jinbelaʼ bħala nifs madwar id-​dinja?

F’LEJL frisk taʼ Diċembru fl-​1984, xi ħaġa li tkexkex ġrat f’Bhopal, ġewwa l-​Indja. F’dik il-​belt, hemm impjant kimiku, u f’dak il-​lejl taʼ Diċembru, valv iffunzjona ħażin f’wieħed mit-​tankijiet li fihom jiġi maħżun il-​gass. F’daqqa waħda, tunnellati taʼ methyl isocyanate bdew ħerġin fl-​arja. Imbuttat mir-​riħ, dan il-​gass qattiel daħal fi djar u fuq familji li kienu reqdin. Dawk li mietu ammontaw għal eluf, u ħafna iktar ġew immankati. Din kienet l-​agħar disgrazzja industrijali sa dak iż-​żmien.

² In-​nies tnikktu meta semgħu dwar Bhopal. Imma kien kemm kien qattiel, il-​gass li ħareġ hemmhekk qatel ferm inqas nies milli jiġu maqtulin spiritwalment minn “gass” li nies madwar id-​dinja kollha jibilgħu bħala nifs kull ġurnata. Il-​Bibbja ssejjaħlu “l-​ispirtu tad-​dinja.” Dan huwa dik l-​atmosfera qattiela li l-​appostlu Pawlu għamel kuntrast tagħha maʼ l-​ispirtu minn Alla meta qal: “Issa aħna rċevejna, mhux l-​ispirtu tad-​dinja, imma l-​ispirtu li hu mingħand Alla, biex nistgħu nkunu nafu l-​affarijiet li ġew b’qalb tajba mogħtijin lilna minn Alla.”—1 Korintin 2:12.

3. “L-​ispirtu tad-​dinja” x’inhu?

³ “L-​ispirtu tad-​dinja” x’inhu eżattament? Skond The New Thayer’s Greek English Lexicon of the New Testament, tifsira ġenerali tal-​kelma “spirtu” (Grieg, pneuʹma) hija “d-​dispożizzjoni jew l-​influwenza li timla u tiggverna r-​ruħ taʼ kulħadd.” Persuna tistaʼ jkollha spirtu, jew dispożizzjoni, tajjeb jew ħażin. (Salm 51:10; 2 Timotew 4:22) Grupp taʼ nies ukoll jistaʼ jkollu spirtu, jew dispożizzjoni dominanti. L-​appostlu Pawlu kiteb lill-​ħabib tiegħu Filemon: “Il-​qalb tajba mhix mistħoqqa tal-​Mulej Ġesù Kristu tkun maʼ l-​ispirtu li turu intom.” (Filemon 25) Bl-​istess mod​—imma fuq skala ferm akbar—​id-dinja inġenerali għandha dispożizzjoni predominanti, u dan hu “l-​ispirtu tad-​dinja” li Pawlu rrefera għalih. Skond il-​Word Studies in the New Testament taʼ Vincent, “il-​frażi tfisser il-​prinċipju tal-​ħażen li jqanqal lid-​dinja li ma tirriformax ruħha.” Hija t-​tendenza midinba li tippenetra l-​ħsieb taʼ din id-​dinja u tinfluwenza b’mod qawwi l-​manjiera taʼ kif jaġixxu n-​nies.

4. Min hu s-​sors taʼ l-​ispirtu tad-​dinja, u dan l-​ispirtu x’effett għandu fuq il-​bnedmin?

⁴ Dan l-​ispirtu huwa velenuż. Għala? Għaliex jissokta mingħand “[i]l-ħakkiem taʼ din id-​dinja,” Satana. Tabilħaqq, huwa msejjaħ “il-​ħakkiem taʼ l-​awtorità taʼ l-​arja, l-​ispirtu li issa jopera f’ulied id-​diżubbidjenza.” (Ġwann 12:31; Efesin 2:2) Huwa iebes biex tiskansa minn din “l-​arja,” jew “spirtu li issa jopera f’ulied id-​diżubbidjenza.” Tinsab kullimkien fis-​soċjetà umana. Jekk nibilgħuha bħala nifs, nibdew nadottaw l-​attitudnijiet tagħha, il-​miri tagħha. L-​ispirtu tad-​dinja jinkuraġġik biex ‘tgħix fi qbil mal-​laħam,’ jiġifieri, fi qbil maʼ l-​imperfezzjoni midinba tagħna. Dan iġib il-​mewt, “għax jekk tgħixu fi qbil mal-​laħam żgur li se tmutu.”—Rumani 8:13.

Nevitaw L-​Ispirtu Taʼ Din Id-​Dinja

5. Wieħed Xhud kif aġixxa bil-​għaqal matul id-​diżastru f’Bhopal?

⁵ Matul id-​diżastru f’Bhopal, wieħed Xhud taʼ Jehovah ġie mqajjem mis-​sireni u mir-​riħa punġenti tal-​gass velenuż. Mingħajr ma qagħad jaħsibha qajjem lill-​familja tiegħu u ħariġhom bil-​ħeffa ’l barra fit-​triq. Billi waqaf għal mument biex jara ’l fejn kien qed jonfoħ ir-​riħ, hu ssielet biex jiftaħ triq minn ġol-​folol imħawdin u mexxa lill-​familja tiegħu lejn il-​quċċata taʼ għolja barra l-​belt. Hemmhekk huma setgħu jimlew il-​pulmuni tagħhom b’arja friska u nadifa li nefħet minn għadira fil-​qrib.

6. Fejn nistgħu mmorru aħna biex niskansaw mill-​ispirtu tad-​dinja?

⁶ Hemm xi post elevat fejn aħna nistgħu mmorru għal refuġju mill-​“arja” velenuża taʼ din id-​dinja? Il-​Bibbja tgħid li hemm. Billi ħares ’il quddiem lejn żmienna, il-​profeta Isaija kiteb: “[I]rid iseħħ fil-​parti finali tal-​jiem li l-​muntanja tad-​dar taʼ Jehovah se tiġi stabbilita fis-​sod ’il fuq mill-​quċċata tal-​muntanji, u ċertament li se tintrafaʼ ’l fuq mill-​għoljiet; u lejha l-​ġnus kollha jridu jiġru bħal xmara. U ħafna popli ċertament li se jmorru u jgħidu: ‘Ejjew u ħalli nitilgħu lejn il-​muntanja taʼ Jehovah, lejn id-​dar taʼ dak Alla taʼ Ġakobb; u hu se jistruwina dwar il-​mogħdijiet tiegħu, u aħna se nimxu fil-​passaġġi tiegħu.’ Għax minn Sijon il-​liġi se toħroġ, u l-​kelma taʼ Jehovah minn Ġerusalemm.” (Isaija 2:2, 3) Il-​post elevat taʼ qima pura, il-​“muntanja tad-​dar taʼ Jehovah” merfugħa ’l fuq, huwa l-​uniku lok fuq din il-​pjaneta ħieles mill-​ispirtu velenuż li jifgak taʼ din id-​dinja. Huwa hemmhekk li l-​ispirtu taʼ Jehovah jiġri bħal xmara bla xkiel fost Kristjani leali.

7. Bosta nies kif ġew skansati mill-​ispirtu tad-​dinja?

⁷ Ħafna li qabel belgħu bħala nifs l-​ispirtu taʼ din id-​dinja gawdew serħan simili għal dak imġarrab minn dak ix-​Xhud f’Bhopal. Wara li jitkellem dwar “ulied id-​diżubbidjenza” li jibilgħu bħala nifs l-​arja, jew spirtu, taʼ din id-​dinja, l-​appostlu Pawlu jgħid: “Fosthom aħna lkoll darba ġibna rwieħna fi qbil max-​xewqat taʼ laħamna, nagħmlu l-​affarijiet li jridu l-​laħam u l-​ħsibijiet, u konna min-​natura wlied il-​korla saħansitra bħall-​bqija. Imma Alla, li hu għani fil-​ħniena, għall-​imħabba kbira tiegħu li biha ħabbna, għamilna ħajjin flimkien mal-​Kristu.” (Efesin 2:3-5) Dawk li ma jibilgħu xejn bħala nifs ħlief l-​arja vvelenata taʼ din is-​sistema taʼ affarijiet huma mejtin f’sens spiritwali. Madankollu, grazzi għal Jehovah, miljuni llum qegħdin jaħarbu lejn il-​post għoli spiritwali u qegħdin jiskansaw minn dik il-​kundizzjoni fatali.

Manifestazzjonijiet Taʼ “L-​Ispirtu Tad-​Dinja”

8, 9. (a) Liema ħaġa turi li aħna rridu nkunu fuq għassa kostanti kontra l-​ispirtu tad-​dinja? (b) L-​ispirtu taʼ Satana kif jistaʼ jikkorrompina?

⁸ L-​arja taʼ Satana li ġġib il-​mewt għadha tagħqad madwarna. Irridu noqogħdu għassa u qatt ma nintelqu ’l isfel mal-​kurrent, lura fid-​dinja, forsi biex niġu fgati spiritwalment. Dan jirrikjedi attenzjoni kostanti. (Luqa 21:36; 1 Korintin 16:13) Ikkunsidra, per eżempju, dan il-​fatt. Il-​Kristjani kollha huma familjari mal-​livelli taʼ moralità taʼ Jehovah u qatt ma se jaqblu li prattiċi m’humiex nodfa bħall-​adulterju, il-​fornikazzjoni, u l-​omosesswalità huma aċċettabbli. Madankollu, kull sena madwar 40,000 individwu jiġu maqtugħin mis-​sħubija mill-​organizzazzjoni taʼ Jehovah. Għala? F’bosta każi minħabba dawn il-​prattiċi egoisti li m’humiex nodfa. Dak kif jistaʼ jiġri?

⁹ Għaliex aħna lkoll imperfetti. Il-​laħam hu dgħajjef, u rridu niġġieldu l-​ħin kollu kontra inklinazzjonijiet ħżiena li jfeġġu f’qalbna. (Ekkleżjasti 7:20; Ġeremija 17:9) Madankollu, dawk l-​inklinazzjonijiet ħżiena jiġu inkuraġġiti mill-​ispirtu tad-​dinja. Ħafna f’din id-​dinja ma jaraw xejn ħażin fl-​immoralità, u l-​idea li kollox jgħaddi hija parti mill-​inklinazzjoni mentali tas-​sistema taʼ affarijiet taʼ Satana. Jekk nesponu lilna nfusna għal ħsieb bħal dan, iva, hemm ċans kbir li se nibdew naħsbu bħad-​dinja. Fi żmien qasir, ħsibijiet bħal dawn li m’humiex nodfa jistgħu jipproduċu xewqat ħżiena li se jirriżultaw fi dnub serju. (Ġakbu 1:14, 15) Se nkunu tlaqna minn fuq il-​muntanja tal-​qima pura taʼ Jehovah ’l isfel lejn il-​postijiet fil-​baxx imniġġsin tad-​dinja taʼ Satana. Ħadd li jibqaʼ hemm għax irid ma se jiret il-​ħajja taʼ dejjem.—Efesin 5:3-5, 7.

10. Liema hi manifestazzjoni waħda taʼ l-​arja taʼ Satana, u l-​Kristjani għala għandhom jevitawha din?

¹⁰ L-​ispirtu tad-​dinja huwa evidenti madwarna kullimkien. Per eżempju, hemm l-​attitudni sarkastika u xejn serja li biha ħafna javviċinaw il-​ħajja. Diżillużi minn politikanti korrotti jew inkompetenti u minn mexxejja reliġjużi immorali u rgħiba, huma jitkellmu bl-​addoċċ dwar saħansitra affarijiet serji. Il-​Kristjani jirreżistu din it-​tendenza. Waqt li jistaʼ jkollna sens umoristiku bnin, aħna nevitaw li ndaħħlu ġewwa l-​kongregazzjoni spirtu sarkastiku taʼ nuqqas taʼ rispett. Id-​diskors taʼ Kristjan jirrifletti biżaʼ minn Jehovah u safa tal-​qalb. (Ġakbu 3:10, 11; qabbel Proverbji 6:14.) Kemm jekk aħna żgħar u kemm jekk aħna kbar, id-​diskors tagħna għandu jkun ‘dejjem bil-​grazzja, imħawwar bil-​melħ, biex inkunu nafu kif għandna nagħtu tweġiba lil kull wieħed.’—Kolossin 4:6.

11. (a) Liema huwa t-​tieni aspett taʼ l-​ispirtu tad-​dinja? (b) Il-​Kristjani għala huma differenti minn dawk li jirriflettu dan l-​aspett?

¹¹ Inklinazzjoni komuni oħra li tirrifletti l-​ispirtu taʼ din id-​dinja hija l-​mibgħeda. Id-​dinja hi maqsuma b’mibgħeda u ostilità bbażati fuq differenzi razzjali, etniċi, nazzjonali, u saħansitra persunali. Kemm huma aħjar l-​affarijiet fejn l-​ispirtu t’Alla huwa attiv! L-​appostlu Pawlu kiteb: “Troddu ħażen għal ħażen lil ħadd. Ipprovdu affarijiet mill-​aħjar quddiem il-​bnedmin kollha. Jekk inhu possibbli, sakemm jiddependi minnkom, żommu l-​paċi mal-​bnedmin kollha. Tivvendikawx erwieħkom, maħbubin, imma agħmlu post għall-​korla; għax hu miktub: ‘Il-​vendetta hi tiegħi; jien se nħallas lura, jgħid Jehovah.’ Imma, ‘jekk l-​għadu tiegħek hu bil-​ġuħ, itimgħu; jekk inhu bil-​għatx, agħtih xi ħaġa x’jixrob; għax billi tagħmel dan int se tiġmaʼ faħam jaqbad fuq rasu.’ Tħallix lilek innifsek tiġi kkonkwistat mill-​ħażen, imma ibqaʼ ikkonkwista lill-​ħażen bit-​tajjeb.”—Rumani 12:17-21.

12. Il-​Kristjani għala jevitaw il-​materjaliżmu?

¹² L-​ispirtu taʼ din id-​dinja jistimula wkoll il-​materjaliżmu. Inkuraġġiti mid-​dinja kummerċjali, ħafna huma ossessjonati biex jixtru l-​aħħar oġġett, l-​aħħar moda, l-​aħħar mudell taʼ karozza. Huma mjassrin mix-​“xewqa taʼ l-​għajnejn.” (1 Ġwann 2:16) Il-​biċċa l-​kbira jkejlu s-​suċċess tagħhom fil-​ħajja minn kemm hi kbira d-​dar tagħhom jew il-​kont tagħhom fil-​bank. Il-​Kristjani, li qegħdin jibilgħu bħala nifs arja spiritwali fuq il-​muntanja elevata tal-​qima pura taʼ Jehovah, jirreżistu din l-​inklinazzjoni. Huma jafu li ġiri determinat wara affarijiet materjali jistaʼ jkun taʼ rovina. (1 Timotew 6:9, 10) Ġesù fakkar lid-​dixxipli tiegħu: “Saħansitra meta wieħed għandu abbundanza l-​ħajja tiegħu ma tirriżultax mill-​affarijiet li jippossjedi.”—Luqa 12:15.

13. Liema huma xi manifestazzjonijiet oħrajn taʼ l-​ispirtu taʼ din id-​dinja?

¹³ Hemm manifestazzjonijiet oħrajn taʼ l-​“arja” marida taʼ din id-​dinja. Waħda minnhom hi l-​ispirtu taʼ l-​irvell. (2 Timotew 3:1-3) Innotajt int li bosta nies m’għadhomx jikkoperaw maʼ l-​awtorità? Osservajt int fix-​xogħol sekulari tiegħek il-​prattika mifruxa maʼ kullimkien taʼ li wieħed ma jaħdimx jekk ma jkunx hemm xi ħadd li qiegħed jarah? Kemm taf nies li kisru liġijiet​—forsi qarrqu fit-​taxxi tagħhom jew serqu minn fuq il-​post tax-​xogħol? Jekk għadek tmur l-​iskola, qatt ġejt skuraġġit milli tagħmel l-​aqwa tiegħek għaliex sħabek tal-​klassi jħarsu bi stmerrija lejn dawk li jirnexxu fl-​eżamijiet? Dawn kollha huma manifestazzjonijiet taʼ l-​ispirtu tad-​dinja li l-​Kristjani jridu jirreżistu.

Kif Għandek Tirreżisti L-​Ispirtu Taʼ Din Id-​Dinja

14. Il-​Kristjani b’liema modi huma differenti minn dawk li m’humiex Kristjani?

¹⁴ Kif, iżda, nistgħu nirreżistu l-​ispirtu tad-​dinja meta attwalment ngħixu fid-​dinja? Irridu niftakru li aħna fejn aħna fiżikament, spiritwalment m’aħna ebda parti mid-​dinja. (Ġwann 17:15, 16) Il-​miri tagħna m’humiex il-​miri taʼ din id-​dinja. Il-​mod kif inħarsu lejn l-​affarijiet huwa differenti. Aħna nies spiritwali, billi nitkellmu u naħsbu “mhux b’kelmiet mgħallmin mill-​għerf uman, imma b’dawk mgħallmin mill-​ispirtu, hekk kif nikkombinaw kwistjonijiet spiritwali maʼ kelmiet spiritwali.”—1 Korintin 2:13.

15. Kif nistgħu aħna nirreżistu l-​ispirtu tad-​dinja?

¹⁵ X’jistaʼ jagħmel wieħed jekk isib ruħu f’inħawi mniġġsa b’gass velenuż? Jistaʼ jew jilbes maskra tal-​gass imqabbda maʼ provista taʼ arja nadifa, jew jistaʼ fiżikament jitlaq lil hemm minn dawk l-​inħawi. Il-​mod kif għandek tevita l-​arja taʼ Satana jikkombina dawn il-​metodi. Kemm jistaʼ jkun possibbli, aħna nipprovaw nitilqu fiżikament minn kull ħaġa li permezz tagħha l-​ispirtu tad-​dinja jeffettwa l-​ħsieb tagħna. B’hekk, nevitaw sħubija ħażina, u ma nesponux lilna nfusna għal kwalunkwe xorta taʼ divertiment li jġib ’il quddiem il-​vjolenza, l-​immoralità, l-​ispiritiżmu, l-​irvell, jew kwalunkwe xogħol ieħor tal-​laħam. (Galatin 5:19-21) Madankollu, ladarba ngħixu fid-​dinja, ma nistgħux nevitaw għalkollox li nesponu ruħna għal dawn l-​affarijiet. Mela aħna qegħdin naġixxu bil-​għaqal jekk nikkonnettjaw maʼ provista taʼ arja friska spiritwali. Aħna nimlew il-​pulmuni spiritwali tagħna, bħal li kieku, billi nattendu b’mod regulari l-​laqgħat, bl-​istudju persunali, bl-​attività u s-​sħubija Kristjana, u bit-​talb. B’dan il-​mod, jekk xi arja taʼ Satana tidħol fil-​pulmuni spiritwali tagħna, l-​ispirtu t’Alla jsaħħaħna biex niċħduha.—Salm 17:1-3; Proverbji 9:9; 13:20; 19:20; 22:17.

16. Kif nagħtu evidenza aħna li għandna l-​ispirtu t’Alla?

¹⁶ L-​ispirtu t’Alla jittrasforma lil Kristjan f’persuna li tispikka bħala differenti minn dawk li huma parti minn din id-​dinja. (Rumani 12:1, 2) Pawlu qal: “Il-​frott taʼ l-​ispirtu hu mħabba, ferħ, paċi, sabar fit-​tul, qalb tajba, tjubija, fidi, ħlewwa, kontroll fuqek innifsek. Kontra dawn l-​affarijiet ma hemm ebda liġi.” (Galatin 5:22, 23) L-​ispirtu t’Alla wkoll jagħti lil Kristjan fehma iktar profonda taʼ l-​affarijiet. Qal Pawlu: “Ħadd ma sar jaf l-​affarijiet t’Alla, ħlief l-​ispirtu t’Alla.” (1 Korintin 2:11) F’sens ġenerali, “l-​affarijiet t’Alla” jinkludu veritajiet bħalma huma s-​sagrifiċċju tar-​rahan, is-​Saltna t’Alla taħt Ġesù Kristu, it-​tama taʼ ħajja taʼ dejjem, u t-​tneħħija imminenti taʼ din id-​dinja mill-​agħar. Bil-​għajnuna taʼ l-​ispirtu t’Alla, il-​Kristjani jafu u jaċċettaw dawn l-​affarijiet bħala verità, u dan jagħmel il-​ħarsa tagħhom lejn il-​ħajja differenti minn dik taʼ nies tad-​dinja. Huma kuntenti li jsibu l-​ferħ tagħhom f’li jaqdu lil Jehovah issa, bil-​prospett taʼ li jaqduh għal eternità li ġejja.

17. Min ta eżempju superlattiv f’li rreżista l-​ispirtu tad-​dinja, u kif?

¹⁷ Ġesù kien mudell taʼ rwol superlattiv għal dawk li jirreżistu l-​ispirtu taʼ din id-​dinja. Malajr wara l-​magħmudija taʼ Ġesù, Satana pprova jdawru lil hinn milli jaqdi lil Jehovah billi ppreżenta tliet tentazzjonijiet. (Mattew 4:1-11) Il-​waħda finali kienet tinvolvi l-​possibiltà li Ġesù setaʼ jikseb ħakma tad-​dinja kollha għall-​prezz taʼ sempliċement att taʼ qima wieħed lil Satana. Ġesù setaʼ rraġuna: ‘Sewwa, se nagħmel l-​att taʼ qima, u mbagħad wara li nikseb il-​ħakma tad-​dinja, nindem u nirritorna lejn li nqim lil Jehovah. Bħala ħakkiem tad-​dinja, se nkun f’pożizzjoni ferm aħjar biex nibbenefika lill-​umanità milli jien issa bħala mastrudaxxa minn Nazzaret.’ Ġesù ma rraġunax b’dak il-​mod. Kien lest li jistenna sakemm Jehovah jagħtih il-​ħakma tad-​dinja. (Salm 2:8) F’dik l-​okkażjoni, u fl-​okkażjonijiet l-​oħrajn kollha fil-​ħajja tiegħu, hu rreżista l-​influwenza velenuża taʼ l-​arja taʼ Satana. B’hekk, hu kkonkwista lil din id-​dinja mniġġsa spiritwalment.—Ġwann 16:33.

18. Il-​fatt li nirreżistu l-​ispirtu tad-​dinja kif iġib tifħir lil Alla?

¹⁸ L-​appostlu Pietru qal li aħna għandna nsegwu mill-​qrib il-​passi taʼ Ġesù. (1 Pietru 2:21) Liema mudell aħjar setaʼ jkollna? F’dawn l-​aħħar jiem, influwenzati mill-​ispirtu tad-​dinja, il-​bnedmin qegħdin jegħrqu iktar u iktar fil-​fond fil-​korruzzjoni morali. X’ħaġa taʼ l-​għaġeb li f’nofs dinja bħal din, il-​post elevat tal-​qima taʼ Jehovah jinstab stabbilit fis-​sod, pur u nadif! (Mikea 4:1, 2) Ċertament, il-​qawwa taʼ l-​ispirtu t’Alla hija osservata għaliex miljuni qegħdin jiġru bħal xmara ’l fuq lejn il-​post taʼ qima t’Alla, billi jirreżistu l-​ispirtu imferrex maʼ kullimkien taʼ din id-​dinja u billi jġibu unur u tifħir lil Jehovah! (1 Pietru 2:11, 12) Jalla lkoll kemm aħna nkunu determinati li nibqgħu f’dak il-post elevat sakemm is-​Sultan midluk taʼ Jehovah iwarrab min-​nofs lil din id-​dinja mill-​agħar u jitfaʼ fl-​abbiss lil Satana x-​Xitan u lid-​demonji tiegħu. (Rivelazzjoni 19:19–20:3) Imbagħad, l-​ispirtu taʼ din id-​dinja mhux se jeżisti iktar. Xi żmien imbierek se jkun dak! (w94 4/1)

Tistaʼ Tispjega?

◻ L-​ispirtu tad-​dinja x’inhu?

◻ L-​ispirtu taʼ din id-​dinja x’effett għandu fuq xi individwi?

◻ X’inhuma xi manifestazzjonijiet taʼ l-​ispirtu tad-​dinja, u kif nistgħu nevitawh?

◻ Aħna kif nuru li għandna l-​ispirtu t’Alla?

◻ Liema barkiet jiġu għand dawk li jirreżistu l-​ispirtu tad-​dinja?