Kapitlu Tlieta

Żewġ Ċwievet Għal Żwieġ Dejjiemi

1, 2. (a) Iż-​żwieġ għal kemm żmien kien iddisinjat li jdum? (b) Dan kif inhu possibbli?

META Alla għaqqad lill-​ewwel raġel u mara fiż-​żwieġ, ma kien hemm ebda indikazzjoni li l-​unjoni kellha tkun temporanja biss. Adam u Eva kellhom jibqgħu flimkien għal għomorhom. (Ġenesi 2:24) Il-​livell t’Alla għal żwieġ onorabbli huwa li jingħaqdu flimkien raġel wieħed u mara waħda. Immoralità sesswali sfaċċata biss min-​naħa taʼ wieħed jew iż-​żewġ imseħbin tipprovdi bażi Skritturali għal divorzju bil-​possibiltà taʼ żwieġ mill-​ġdid.​—Mattew 5:32.

² Huwa possibbli li żewġ individwi jgħixu flimkien henjin għal żmien twil indefinittivament? Iva, u l-​Bibbja tidentifika żewġ fatturi, jew ċwievet, vitali li jgħinu biex dan isir possibbli. Jekk kemm ir-​raġel u kemm il-​mara jagħmlu użu minnhom, se jkollhom aċċess għall-​hena u ħafna barkiet. X’inhuma dawn iċ-​ċwievet?

L-​EWWEL ĊAVETTA

3. Liema tliet tipi taʼ mħabba għandhom jiġu kkultivati mill-​imseħbin fiż-​żwieġ?

³ L-​ewwel ċavetta hija l-​imħabba. Taʼ interess, hemm tipi differenti taʼ mħabba identifikati fil-​Bibbja. Wieħed huwa affezzjoni kordjali u persunali lejn xi ħadd, it-​tip taʼ mħabba li teżisti bejn ħbieb tal-​qalb. (Ġwann 11:3) Ieħor huwa l-​imħabba li titkattar bejn membri tal-​familja. (Rumani 12:10) It-​tielet huwa l-​imħabba romantika li xi ħadd jistaʼ jkollu lejn membru tas-​sess oppost. (Proverbji 5:​15-20) M’għandniex xi ngħidu, dawn kollha għandhom jiġu kkultivati minn raġel u mara miżżewġin. Imma hemm ir-​rabaʼ tip taʼ mħabba, iktar importanti mill-​oħrajn.

4. Liema huwa r-​rabaʼ tip taʼ mħabba?

⁴ Fil-​lingwa oriġinali taʼ l-​Iskrittura Griega Kristjana, il-​kelma għal dan ir-​rabaʼ tip taʼ mħabba hija a·gaʹpe. Dik il-​kelma hija wżata fl-​1 Ġwann 4:​8, fejn jintqalilna: “Alla hu mħabba.” Tabilħaqq, “aħna nħobbu, għax [Alla] ħabbna l-​ewwel.” (1 Ġwann 4:19) Kristjan jikkultiva mħabba bħal din l-​ewwel għal Alla Jehovah u mbagħad għal bnedmin sħabu. (Mark 12:​29-31) Il-​kelma a·gaʹpe hija wżata wkoll f’Efesin 5:​2, li jistqarr: “Imxu fl-​imħabba, bħalma Kristu wkoll ħabb lilna u ta lilu nnifsu għalina.” Ġesù qal li dan it-​tip taʼ mħabba kellu jidentifika lis-​segwaċi veri tiegħu: “Minn dan jagħraf kulħadd li intom dixxipli tiegħi, jiġifieri, jekk ikollkom l-​imħabba [a·gaʹpe] bejnietkom.” (Ġwann 13:35) Innota, ukoll, l-​użu taʼ a·gaʹpe fl-​1 Korintin 13:13: “Issa hawn fidi, tama u mħabba, it-​tlieta jibqgħu. Il-​kbira fosthom l-​imħabba [a·gaʹpe].”

5, 6. (a) L-​imħabba għala hija akbar mill-​fidi u t-​tama? (b) Liema huma xi raġunijiet għala l-​imħabba se tgħin f’li żwieġ tagħmlu dejjiemi?

⁵ X’inhu li jagħmel lil din l-​imħabba a·gaʹpe akbar mill-​fidi u t-​tama? Hija ggvernata minn prinċipji​—prinċipji taʼ tjieba—​misjubin fil-​Kelma t’Alla. (Salm 119:105) Huwa tħassib altruista biex tagħmel lil oħrajn dak li huwa sewwa u tajjeb min-​naħa t’Alla, kemm jekk ir-​riċevitur jidher li jistħoqqlu dan u kemm jekk le. Permezz taʼ mħabba bħal din l-​imseħbin fiż-​żwieġ jistgħu jsegwu l-​parir tal-​Bibbja: “Stabru b’xulxin, u, jekk xi ħadd minnkom ikollu xi jgħid maʼ ħaddieħor, aħfru lil xulxin; bħalma l-​Mulej ħafer lilkom, hekk agħmlu intom ukoll.” (Kolossin 3:13) Koppji miżżewġin li jħobbu għandhom u jikkultivaw “imħabba [a·gaʹpe] sħiħa lejn [xulxin], għax l-​imħabba tgħatti kotra taʼ dnubiet.” (1 Pietru 4:8) Innota li l-​imħabba tgħatti l-​iżbalji. Ma teliminahomx, ladarba l-​ebda bniedem imperfett ma jistaʼ jkun ħieles mill-​iżball.​—Salm 130:​3, 4; Ġakbu 3:2.

⁶ Meta din l-​imħabba għal Alla u għal xulxin tiġi kkultivata minn koppja miżżewġa, iż-​żwieġ tagħhom se jkun dejjiemi u hieni, għax “l-​imħabba ma tintemm qatt.” (1 Korintin 13:8) L-​imħabba hija “rabta perfetta t’unjoni.” (Kolossin 3:​14, NW) Jekk int miżżewweġ, kif tistgħu int u l-​parti l-​oħra tikkultivaw dan it-​tip taʼ mħabba? Aqraw il-​Kelma t’Alla flimkien, u tkellmu dwarha. Studjaw l-​eżempju taʼ mħabba taʼ Ġesù u ipprovaw imitawh, aħsbu u aġixxu bħalu. Iżjed minn hekk, morru għal-​laqgħat Kristjani, fejn tiġi mgħallma l-​Kelma t’Alla. U itolbu għall-​għajnuna t’Alla biex tiżviluppaw dan it-​tip elevat taʼ mħabba, li hija frotta taʼ l-​ispirtu qaddis t’Alla.​—Proverbji 3:​5, 6; Ġwann 17:3; Galatin 5:22; Lhud 10:​24, 25.

IT-​TIENI ĊAVETTA

7. X’inhu r-​rispett, u min għandu juri rispett fiż-​żwieġ?

⁷ Jekk tnejn min-​nies miżżewġin tassew iħobbu lil xulxin, allura se jkollhom ukoll rispett lejn xulxin, u r-​rispett huwa t-​tieni ċavetta għal żwieġ hieni. Ir-​rispett huwa definit bħala “li tagħti konsiderazzjoni lil oħrajn, billi tonorahom.” Il-​Kelma t’Alla tagħti parir lill-​Kristjani kollha, inklużi rġiel u nisa miżżewġin: “Fittxu li tistmaw lil xulxin.” (Rumani 12:10) L-​appostlu Pietru kiteb: “Intom ukoll, irġiel, għammru bil-​għaqal man-​nisa tagħkom; agħtuhom il-​ġieh li ħaqqhom, . . . għax huma aktar dgħajfa minnkom.” (1 Pietru 3:7) Il-​mara jingħatalha l-​parir biex “[i]ġġib rispett lil żewġha.” (Efesin 5:33) Jekk trid tonora lil xi ħadd, int se turi qalb tajba lejn dik il-​persuna, tirrispetta l-​opinjonijiet espressi u d-​dinjità tagħha, u tkun lest li twettaq kwalunkwe rikjesta raġonevoli li ssirlek.

8-10. Liema huma xi modi kif ir-​rispett se jgħin biex jagħmel l-​unjoni taż-​żwieġ stabbli u hienja?

⁸ Dawk li jixtiequ jgawdu żwieġ hieni juru rispett lejn l-​imseħbin tagħhom billi ‘ma jfittxux li jaqblilhom, imma li jaqbel lill-​imseħbin tagħhom.’ (Filippin 2:4) Ma jikkunsidrawx dak li huwa tajjeb għalihom infushom biss​—li kienet tkun ħaġa egoista. Minflok, jikkunsidraw dak li huwa l-​aħjar ukoll għall-​parti l-​oħra. Tabilħaqq, huma jagħtu l-​prijorità lil dan.

⁹ Ir-​rispett se jgħin lill-​imseħbin fiż-​żwieġ biex jirrikonoxxu d-​differenzi f’dik li hija opinjoni. M’huwiex raġonevoli li tistenna li tnejn min-​nies ikollhom ideat identiċi dwar kollox. Dak li jistaʼ jkun taʼ importanza għar-​raġel jistaʼ ma jkunx daqshekk importanti għall-​mara, u dak li jogħġob lill-​mara jistaʼ ma jkunx dak li jogħġob lir-​raġel. Imma kull wieħed għandu jirrispetta l-​ideat u l-​għażliet tal-​parti l-​oħra, sakemm dawn ikunu ġewwa l-​limiti tal-​liġijiet u l-​prinċipji taʼ Jehovah. (1 Pietru 2:16; qabbel Filemon 14.) Barra minn hekk, kull wieħed għandu jirrispetta d-​dinjità tal-​parti l-​oħra billi ma jagħmilx lil din il-​parti l-​mira taʼ kummenti jew ċajt li jbaxxu, kemm jekk fil-​pubbliku u kemm jekk fil-​privat.

¹⁰ Iva, l-​imħabba lejn Alla u lejn xulxin u r-​rispett reċiproku huma żewġ ċwievet vitali għal żwieġ li jirnexxi. Kif jistgħu jiġu applikati f’xi ftit mill-​aspetti iktar importanti tal-​ħajja miżżewġa?

STAT TAʼ KAP BĦAL TAʼ KRISTU

11. Skritturalment, min hu l-​kap fi żwieġ?

¹¹ Il-​Bibbja tgħidilna li r-​raġel kien maħluq b’attributi li kellhom jagħmluh kap tal-​familja li jirnexxi. Bħala tali, ir-​raġel kellu jkun responsabbli quddiem Jehovah għall-​benesseri spiritwali u fiżiku taʼ martu u wliedu. Kellu jieħu deċiżjonijiet ibbilanċjati li jirriflettu r-​rieda taʼ Jehovah u jkun eżempju tajjeb taʼ kondotta devota. “Intom in-​nisa oqogħdu għal żwieġkom bħallikieku għall-​Mulej, għax ir-​raġel hu ras il-​mara, bħalma Kristu hu ras il-​Knisja [“kap tal-​kongregazzjoni,” NW].” (Efesin 5:​22, 23) Madankollu, il-​Bibbja tgħid li r-​raġel miżżewweġ ukoll għandu kap, Wieħed b’awtorità fuqu. L-​appostlu Pawlu kiteb: “Irridkom tkunu tafu li r-​ras taʼ kull raġel huwa Kristu, u ras il-​mara huwa r-​raġel, u ras Kristu hu Alla.” (1 Korintin 11:3) Ir-​raġel miżżewweġ għaqli jitgħallem kif jeżerċita l-​istat taʼ kap billi jimita lill-​kap tiegħu stess, Kristu Ġesù.

12. Ġesù liema eżempju mill-​aħjar stabbilixxa kemm f’li juri sottomissjoni u kemm f’li jeżerċita l-​istat taʼ kap?

¹² Ġesù wkoll għandu kap, lil Jehovah, u hu suġġett b’mod xieraq Lejh. Ġesù qal: “Jien ma nfittixx ir-​rieda tiegħi, imma r-​rieda taʼ min bagħatni.” (Ġwann 5:30) X’eżempju eċċellenti! Ġesù hu “l-​kbir fost il-​ħlejjaq kollha.” (Kolossin 1:15) Hu sar il-​Messija. Kellu jkun il-​Kap tal-​kongregazzjoni taʼ Kristjani midlukin u s-​Sultan magħżul tas-​Saltna t’Alla, ’il fuq mill-​anġli kollha. (Filippin 2:​9-11; Lhud 1:4) Minkejja pożizzjoni għolja bħal din u prospetti elevati bħal dawn, il-​bniedem Ġesù ma kienx aħrax, inflessibbli, jew esiġenti żżejjed. Ma kienx xi tirann, il-​ħin kollu jfakkar lid-​dixxipli tiegħu li kellhom jobduh. Ġesù kien iħobb u jagħder, speċjalment lil dawk maħqurin. Hu qal: “Ejjew għandi, intom ilkoll li tinsabu mħabbtin u mtaqqlin, u jiena nserraħkom. Ħudu fuqkom il-​madmad tiegħi u tgħallmu minni, għaliex jien taʼ qalb ħelwa u umli, u intom issibu l-​mistrieħ għal ruħkom. Għax il-​madmad tiegħi ħelu u t-​toqol tiegħi ħafif.” (Mattew 11:​28-30) Kienet għaxqa li tkun fil-​kumpanija tiegħu.

13, 14. Raġel miżżewweġ li jħobb kif se jeżerċita l-​istat taʼ kap tiegħu, b’imitazzjoni taʼ Ġesù?

¹³ Ir-​raġel miżżewweġ li jixtieq ħajja tal-​familja hienja jagħmel sewwa li jikkunsidra l-​kwalitajiet mill-​aħjar taʼ Ġesù. Raġel tajjeb ma jkunx aħrax u dittatur, billi b’mod żbaljat juża l-​istat tiegħu taʼ kap bħala għasluġ biex isawwat lil martu. Minflok, hu jħobbha u jonoraha. Jekk Ġesù kien “umli,” ir-​raġel għandu saħansitra iktar raġuni biex ikun hekk għaliex, kuntrarju għal Ġesù, hu jagħmel l-​iżbalji. Meta jagħmilhom, ikun irid li martu tifhmu. Għalhekk, ir-​raġel umli jammetti l-​iżbalji tiegħu, avolja l-​kelmiet, “Jiddispjaċini; kellek raġun,” jistgħu jkunu diffiċli biex tgħidhom. Mara se ssibha ferm eħfef li tirrispetta l-​istat taʼ kap taʼ raġel modest u umli milli dak taʼ wieħed kburi u stinat. Mill-​banda l-​oħra, il-​mara li turi rispett titlob apoloġija wkoll meta tkun fl-​iżball.

¹⁴ Alla ħalaq lill-​mara b’attributi mill-​aħjar li tistaʼ tużahom f’li tikkontribwixxi għal żwieġ hieni. Raġel għaqli se jirrikonoxxi dan u m’huwiex se joħnoqha. Ħafna nisa għandhom it-​tendenza li jkollhom mogħdrija u sensittività akbar, kwalitajiet li huma meħtiġin f’li tieħu ħsieb familja u f’li ttejjeb ir-​relazzjonijiet umani. Ġeneralment, il-​mara tinqalaʼ ġmielha f’li d-​dar tagħmilha post pjaċevoli biex wieħed jgħix fiha. Il-​“mara taʼ ħila” deskritta fi Proverbji kapitlu 31 kellha ħafna kwalitajiet taʼ l-​għaġeb u talenti eċċellenti, u l-​familja tagħha bbenefikat bis-​sħiħ minnhom. Għala? Għaliex qalb żewġha “fuqha tistrieħ.”​—Proverbji 31:​10, 11.

15. Raġel kif jistaʼ juri mħabba u rispett bħal taʼ Kristu lejn martu?

¹⁵ F’xi kulturi, l-​awtorità taʼ raġel miżżewweġ hija enfasizzata żżejjed, u b’hekk li saħansitra tistaqsih mistoqsija huwa kkunsidrat bħala nuqqas taʼ rispett. Hu għandu mnejn jittratta lil martu kważi bħal irsira. Eżerċitar żbaljat bħal dan taʼ l-​istat taʼ kap jirriżulta f’relazzjoni fqira mhux biss maʼ martu imma wkoll m’Alla. (Qabbel 1 Ġwann 4:20, 21.) Mill-​banda l-​oħra, xi rġiel jonqsu li jieħdu t-​tmexxija, billi jħallu lin-​nisa tagħhom jiddominaw fid-​dar. Ir-​raġel li hu sottomess b’mod xieraq lejn Kristu ma jisfruttax lil martu jew iċaħħadha mid-​dinjità. Minflok, jimita l-​imħabba li tissagrifika lilha nfisha taʼ Ġesù u jagħmel bħalma ta parir Pawlu: “Intom, l-​irġiel, ħobbu n-​nisa tagħkom, kif Kristu ħabb il-​Knisja [“kongregazzjoni,” NW] u ta ħajtu għaliha.” (Efesin 5:25) Kristu Ġesù tant ħabb lis-​segwaċi tiegħu li miet għalihom. Raġel tajjeb se jipprova jimita dik l-​attitudni mhix egoista, billi jfittex it-​tajjeb taʼ martu, minflok ma jkun esiġenti magħha. Meta raġel hu sottomess lejn Kristu u juri mħabba u rispett bħal taʼ Kristu, martu se tkun imqanqla biex tissottometti ruħha lejh.​—Efesin 5:​28, 29, 33.

SOTTOMISSJONI BĦALA MARA MIŻŻEWĠA

16. Mara liema kwalitajiet għandha turi fir-​relazzjoni tagħha maʼ żewġha?

¹⁶ Ftit wara li kien maħluq Adam, il-​“Mulej Alla qal: ‘Mhux sewwa li l-​bniedem jibqaʼ waħdu. Ħa nagħmillu għajnuna tgħodd għalih [“bħala komplement tiegħu,” NW].’” (Ġenesi 2:18) Alla ħalaq lil Eva bħala “komplement,” mhux bħala kompetitriċi. Iż-​żwieġ ma kellux ikun qisu bastiment b’żewġ kaptani li jikkompetu maʼ xulxin. Ir-​raġel kellu jeżerċita stat taʼ kap bl-​imħabba, u l-​mara kellha turi mħabba, rispett, u sottomissjoni minn jeddha.

17, 18. Liema huma xi modi kif mara tistaʼ tkun ajjutanta vera għal żewġha?

¹⁷ Madankollu, mara tajba hi iktar minn sottomessa biss. Tipprova tkun ajjutanta vera, billi tappoġġja lil żewġha fid-​deċiżjonijiet li jieħu. M’għandniex xi ngħidu, dan huwa iktar faċli għaliha meta taqbel mad-​deċiżjonijiet tiegħu. Imma saħansitra meta ma taqbilx, l-​appoġġ attiv tagħha jistaʼ jgħin lid-​deċiżjoni tiegħu biex ikollha riżultat iktar taʼ suċċess.

¹⁸ Mara tistaʼ tgħin lil żewġha biex ikun kap tajjeb b’modi oħrajn. Tistaʼ tesprimi apprezzament għall-​isforzi tiegħu f’li jieħu t-​tmexxija, minflok ma tikkritikah jew iġġagħlu jħoss li qatt ma jistaʼ jissodisfaha. F’li tittratta maʼ żewġha b’mod pożittiv, għandha tiftakar li “spirtu ġwejjed taʼ sliem . . . hu prezzjuż ħafna quddiem Alla,” mhux biss f’għajnejn żewġha. (1 Pietru 3:​3, 4, KŻ; Kolossin 3:12) X’jiġri jekk ir-​raġel m’huwiex kredent? Kemm jekk hu u kemm jekk mhux, l-​Iskrittura tinkuraġġixxi lin-​nisa biex “iħobbu lil żwieġhom u lil uliedhom; ikunu meqjusa, safja, nisa tad-​dar, twajba, ubbidjenti għal żwieġhom, ħalli l-​kelma taʼ Alla ma titkasbarx.” (Titu 2:​4, 5) Jekk iqumu kwistjonijiet taʼ kuxjenza, raġel mhux kredent x’aktarx li iktar se jirrispetta l-​pożizzjoni taʼ martu jekk tiġi ppreżentata bil-​“ħlewwa u bir-​rispett.” Xi rġiel li m’humiex kredenti ‘ntrebħu, mhux bil-​kliem, imma bl-​imġiba tan-​nisa tagħhom, xħin rawhom iġibu ruħhom kif jixraq magħhom u bir-​rispett.’​—1 Pietru 3:​1, 2, 15; 1 Korintin 7:​13-16.

19. X’jiġri jekk raġel jitlob lil martu biex tikser il-​liġi t’Alla?

¹⁹ X’jiġri jekk raġel jitlob lil martu biex tagħmel xi ħaġa pprojbita minn Alla? Jekk jiġri hekk, hi trid tiftakar li Alla hu l-​Ħakkiem suprem tagħha. Hi tieħu bħala eżempju dak li għamlu l-​appostli meta kienu mitlubin mill-​awtoritajiet biex jiksru l-​liġi t’Alla. Atti 5:29 jirrakkonta: “Pietru, flimkien maʼ l-​appostli, wieġeb u qal: ‘Jeħtieġ nobdu aktar lil Alla milli ’il-bnedmin.’”

KOMUNIKAZZJONI TAJBA

20. Liema huwa aspett vitali li fih l-​imħabba u r-​rispett huma essenzjali?

²⁰ L-​imħabba u r-​rispett huma essenzjali f’aspett ieħor taż-​żwieġ​—il-​komunikazzjoni. Ir-​raġel li jħobb se jitkellem maʼ martu dwar l-​attivitajiet tagħha, il-​problemi tagħha, l-​ideat tagħha dwar diversi kwistjonijiet. Hi għandha bżonnu dan. Raġel li jieħu l-​ħin biex jitkellem maʼ martu u tassew jagħti widen għal dak li tgħid juri l-​imħabba u r-​rispett tiegħu lejha. (Ġakbu 1:19) Xi nisa jilmentaw li żwieġhom iqattgħu ftit ferm ħin f’diskursati magħhom. Dan huwa taʼ swied il-​qalb. Veru, f’dawn iż-​żminijiet fejn kulħadd għandu ħafna x’jagħmel, l-​irġiel għandhom mnejn jaħdmu sigħat twal ’il barra mid-​dar, u ċirkostanzi ekonomiċi jistgħu jirriżultaw f’li xi nisa jkollhom jaħdmu wkoll. Imma koppja miżżewġa jeħtieġ li jirriservaw il-​ħin għal xulxin. Inkella, għandhom mnejn isiru indipendenti minn xulxin. Il-​fatt li jħossuhom imġegħlin ifittxu sħubija simpatetika ’l barra mill-​arranġament taż-​żwieġ jistaʼ jwassal għal problemi serji.

21. Id-​diskors xieraq kif se jgħin biex lil żwieġ iżommu hieni?

²¹ Il-​mod kif in-​nisa u l-​irġiel jikkomunikaw huwa importanti. “Il-​kliem ħelu . . . hu ħlewwa tar-​ruħ u saħħa tal-​ġisem.” (Proverbji 16:24) Kemm jekk sieħeb hu kredent u kemm jekk le, japplika l-​parir tal-​Bibbja: “Ħa tkun dejjem il-​kelma tagħkom kollha ħlewwa, imħawra bil-​melħ tal-​għerf,” jiġifieri, b’togħma tajba. (Kolossin 4:6) Meta xi ħadd ikun għadda minn jum diffiċli, ftit kelmiet b’qalb tajba u bis-​simpatija mingħand il-​parti l-​oħra jistgħu jagħmlu ħafna ġid. “Bħal tuffieħ tad-​deheb fuq platt tal-​fidda, hi l-​kelma li tingħad f’waqtha.” (Proverbji 25:11) It-​ton tal-​leħen u l-​għażla tal-​kliem huma importanti ferm. Per eżempju, b’manjiera irritanti u arroganti, wieħed jistaʼ jgħid lill-​parti l-​oħra: “Agħlaq dak il-​bieb!” Imma kemm iktar ‘imħawrin bil-​melħ tal-​għerf’ huma l-​kelmiet, imlissnin b’leħen kalm u simpatetiku, “Jimporta tagħlaq il-​bieb, jekk jogħġbok?”

22. Il-​koppji liema attitudnijiet jeħtieġu sabiex iżommu komunikazzjoni tajba?

²² Il-​komunikazzjoni tajba tiffjorixxi meta jkun hemm kliem mitkellem b’ġentilezza, ħars u ġesti grazzjużi, qalb tajba, komprensjoni, u tenerezza. Billi jaħdmu iebes biex iżommu komunikazzjoni tajba, kemm ir-​raġel u kemm il-​mara se jħossuhom liberi li jagħmlu l-​ħtiġijiet tagħhom magħrufin, u jistgħu jkunu sorsi taʼ faraġ u għajnuna għal xulxin fi żminijiet taʼ diżappunt jew stress. “Lissnu kliem li jikkonsla lill-​erwieħ dipressi,” tħeġġeġ il-​Kelma t’Alla. (1 Tessalonkin 5:​14, NW) Se jkun hemm drabi meta r-​raġel ikun qalbu maqtugħa u drabi meta l-​mara tkun hekk. Huma jistgħu ‘jlissnu kliem li jikkonsla,’ billi jibnu lil xulxin.​—Rumani 15:2.

23, 24. L-​imħabba u r-​rispett kif se jgħinu meta jkun hemm nuqqas taʼ qbil? Agħti eżempju.

²³ Imseħbin fiż-​żwieġ li juru mħabba u rispett m’humiex se jaraw kull nuqqas taʼ qbil bħala sfida. Se jaħdmu iebes biex ma jkunux “iebsa” maʼ xulxin. (Kolossin 3:19) It-​tnejn li huma għandhom jiftakru li “kelma tajba ttaffi l-​korla.” (Proverbji 15:1) Oqgħod attent biex ma ċċekkinx jew tikkundanna lill-​parti l-​oħra li tesprimi sentimenti mill-​qalb. Minflok, qis espressjonijiet bħal dawn bħala opportunità biex tikseb dehen dwar l-​opinjoni tal-​parti l-​oħra. Flimkien, ipprovaw solvu d-​differenzi u aslu għal konklużjoni armonjuża.

²⁴ Ġib quddiem għajnejk l-​okkażjoni meta Sarah irrikkmandat lil żewġha, Abraham, soluzzjoni għal ċerta problema u din ma qablitx mas-​sentimenti tiegħu. Madankollu, Alla qal lil Abraham: “Ismaʼ minn kliemha.” (Ġenesi 21:​9-12) Abraham hekk għamel, u kien imbierek. Bl-​istess mod, jekk mara tissuġġerixxi xi ħaġa differenti minn dak li żewġha għandu f’moħħu, hu għandu taʼ l-​inqas jagħtiha widen. Fl-​istess waqt, mara m’għandhiex tiddomina l-​konversazzjoni imma għandha tagħti widen għal dak li għandu x’jgħid żewġha. (Proverbji 25:24) Li r-​raġel jew il-​mara jinsistu biex tgħaddi tagħhom il-​ħin kollu huwa nieqes mill-​imħabba u mir-​rispett.

25. Komunikazzjoni tajba kif se twassal għall-​hena fl-​aspetti intimi taʼ ħajja miżżewġa?

²⁵ Komunikazzjoni tajba hija importanti wkoll fir-​relazzjoni sesswali taʼ koppja. L-​egoiżmu u n-​nuqqas taʼ li wieħed jikkontrolla lilu nnifsu jistgħu jagħmlu ħsara serja lil din ir-​relazzjoni mill-​iktar intima fiż-​żwieġ. Komunikazzjoni miftuħa, flimkien mal-​paċenzja, hija essenzjali. Meta kull wieħed ifittex bla egoiżmu l-​benesseri tal-​parti l-​oħra, is-​sess rari jkun problema serja. F’din il-​kwistjoni bħal f’oħrajn, “ħadd ma għandu jqis qiesu, iżda qies ħaddieħor.”​—1 Korintin 7:​3-5; 10:24.

26. Avolja kull żwieġ se jkollu l-​mumenti tajbin u ħżiena tiegħu, li jagħtu widen għall-​Kelma t’Alla kif se jgħin lil koppji miżżewġin isibu l-​hena?

²⁶ X’parir mill-​aħjar toffri l-​Kelma t’Alla! Veru, kull żwieġ se jkollu l-​mumenti tajbin u ħżiena tiegħu. Imma meta l-​miżżewġin jissottomettu ruħhom għall-​ħsieb t’Alla, bħalma huwa rrivelat fil-​Bibbja, u jibbażaw ir-​relazzjoni tagħhom fuq imħabba u rispett bi prinċipju, jistgħu jkunu fiduċjużi li ż-​żwieġ tagħhom se jkun dejjiemi u hieni. Huma b’hekk se jonoraw mhux biss lil xulxin imma wkoll lill-​Oriġinatur taż-​żwieġ, Alla Jehovah.

DAWN IL-​PRINĊIPJI TAL-​BIBBJA KIF JISTGĦU JGĦINU . . . LIL KOPPJA BIEX IGAWDU ŻWIEĠ DEJJIEMI U HIENI?

Il-​veri Kristjani jħobbu lil xulxin.—Ġwann 13:35.

Il-​Kristjani huma lesti li jaħfru lil xulxin.—Kolossin 3:13.

Hemm ordni xieraq taʼ l-​istat taʼ kap.​—1 Korintin 11:3.

Huwa importanti li tgħid il-​ħaġa xierqa bil-​mod xieraq.​—Proverbji 25:11.

[Stampa f’paġna 28]

Imħabba u rispett reċiproċi jwasslu għal suċċess fiż-​żwieġ