Fittxu lil Hinn mill-​Affarijiet li Taraw!

VISTA fiżika tajba hija barka. Fil-​fatt, il-​biċċa l-​kbira tan-​nies jgħidu li ftit huma l-​affarijiet li jippossiedu li huma iktar prezzjużi. Għall-​Kristjani, madankollu, hemm xorta taʼ vista li dwarha tkellem l-​appostlu Pawlu u li hija taʼ valur bil-​wisq akbar minn saħansitra vista fiżika tajba. “Ma nħarsux lejn il-​ħwejjeġ li jidhru, iżda lejn dawk li ma jidhrux,” kiteb Pawlu. (2 Korintin 4:18) Trid tkun tabilħaqq xorta speċjali ferm taʼ vista biex iġġiegħel lil dak li jkun jara affarijiet li ma jidhrux! Nistgħu nsejħulha vista eċċellenti taʼ xorta spiritwali.

Għala L-​Bżonn?

Il-​Kristjani taʼ l-​ewwel seklu kienu tassew fi bżonn li jkollhom din ix-​xorta taʼ vista spiritwali. Kienu qegħdin iwettqu l-​ministeru Kristjan tagħhom taħt ħafna tbatija. Pawlu poġġieha b’dan il-​mod: “Aħna minn kullimkien ninsabu magħfusin, iżda m’aħniex mgħattnin; imħassbin, iżda ma għandniex qalbna maqtugħa; ippersegwitati, iżda m’aħniex abbandunati; mixħutin maʼ l-​art, iżda m’aħniex meqrudin.”—2 Korintin 4:8, 9.

Minkejja ċirkostanzi bħal dawn, id-​dixxipli leali baqgħu sodi. B’fidi qawwija f’Alla, setgħu jgħidu bħalma qal Pawlu: “Ma naqtgħux qalbna, għax imqar jekk il-​bniedem taʼ barra jitħassar, il-​bniedem taʼ ġewwa jiġġedded minn jum għal jum.” X’inhu, iżda, dak li ġab dan it-​tiġdid taʼ kuljum? Pawlu kompla jgħid: “Id-​daqsxejn taʼ tbatija tagħna taʼ issa t[ħ]ejjilna kobor taʼ glorja bla qjies għal dejjem; lilna li ma nħarsux lejn il-​ħwejjeġ li jidhru, iżda lejn dawk li ma jidhrux. Dawk li jidhru huma għal żmien qasir, dawk li ma jidhrux huma għal dejjem.”—2 Korintin 4:16-18.

Pawlu kien qiegħed jinkuraġġixxi lil ħutu spiritwali biex ma jħallux il-​problemi, id-​diffikultajiet u l-​persekuzzjonijiet​—tribulazzjonijiet taʼ kwalunkwe xorta—​iċajpru l-​ħarsa tagħhom lejn il-​premju glorjuż li kien ġie mqiegħed quddiemhom. Huma għandhom ifittxu lil hinn miċ-​ċirkostanzi preżenti tagħhom, billi jżommu għajnejhom fissi fuq ir-​riżultat hieni tal-​korsa Kristjana. Dak kien li għenhom iġeddu fuq bażi minn jum għal jum ir-​riżoluzzjoni tagħhom li jibqgħu jagħfsu ’l quddiem fil-​battalja. Il-Kristjani llum huma daqstant fil-​bżonn li jkollhom vista spiritwali tajba bħal din.

Qis It-​Tribulazzjonijiet Tal-​Preżent Bħala Momentarji!

Jogħġobna jew ma jogħġobniex, aħna kuljum naraw affarijiet li kieku nippreferu li ma narawx. Titwila fil-​mera u ma nistgħux ma narawx il-​marki u t-​tbajjaʼ tal-​ġisem fiżiku, indikazzjonijiet taʼ imperfezzjoni fiżika. Meta nittawlu fil-​mera tal-​Kelma t’Alla, naraw difetti u tbajjaʼ spiritwali, kemm fina nfusna u kemm f’oħrajn. (Ġakbu 1:22-25) U meta nħarsu lejn il-​gazzetta taʼ kuljum jew it-​televixin, rakkonti taʼ inġustizzji, krudeltajiet, u traġedji mill-​ewwel imissulna qalbna.

Satana kieku jixtieq li jġegħelna niddispraw minħabba l-​affarijiet li naraw jew li niġu żvijati u nibdew immajnaw fil-​fidi. Kif nistgħu nevitaw li dan jiġri? Irridu nsegwu l-​eżempju mogħti minn Ġesù Kristu, bħalma kien irrikkmandat mill-​appostlu Pietru meta qal: “Għal dan intom kontu msejħa għax Kristu wkoll bata għalikom u ħallielkom eżempju biex timxu fuq il-​passi tiegħu.” (1 Pietru 2:21) F’kull aspett t’għixien Kristjan, Ġesù kien l-​eżempju perfett.

F’li jipponta lejn Ġesù bħala l-​mudell tagħna, Pietru semma partikolarment li Ġesù sofra. Tabilħaqq, Ġesù sofra ħafna meta kien fuq l-​art. Bħala “mgħallem” maħtur minn Jehovah u li kien preżenti fil-​ħolqien taʼ l-​umanità, kien jaf eżattament x’intenzjoni kellu Alla għall-​bnedmin. (Proverbji 8:30, 31) Imma issa ra b’għajnejh stess kif id-​dnub u l-​imperfezzjoni ġagħluhom isiru. Kuljum hu ra u kellu jiffaċċja l-​imperfezzjonijiet u d-​dgħjufijiet tan-​nies. Dak bil-​fors li kien taʼ prova għalih.—Mattew 9:36; Mark 6:34.

Minbarra t-​tribulazzjonijiet t’oħrajn, Ġesù ġarrab dawk tiegħu stess. (Lhud 5:7, 8) Imma b’vista spiritwali perfetta, hu fittex lil hinn minnhom biex jara l-​premju taʼ li jkun elevat lejn ħajja immortali għall-​korsa tiegħu taʼ integrità. Imbagħad bħala Sultan Messjaniku, kien se jkollu l-​privileġġ li joħroġ lill-​ispeċi umana mifluġa mill-​kundizzjoni degradanti tagħha lura għall-​perfezzjoni li kienet oriġinalment fl-​iskop taʼ Jehovah. Li żamm għajnejh iffokati fuq dawn il-​prospetti futuri inviżibbli għenu biex iżomm il-​ferħ fis-​servizz divin minkejja t-​tribulazzjonijiet li ra minn jum għal jum. Pawlu kiteb iktar tard: “Għall-​ferħ imqiegħed quddiemu sofra s-​salib [“zokk tat-​tortura,” NW], bla ma qies xejn il-​għajb, u qagħad fil-​lemin tat-​tron t’Alla.”—Lhud 12:2, Karm Żammit.

Ġesù qatt ma ħalla t-​tbatijiet u ċ-​ċirkostanzi taʼ prova jġegħluh jiddispra, jiżvija, jew imajna fil-​fidi. Bħala dixxipli tiegħu, aħna rridu nsegwu l-​eżempju prim tiegħu mill-​qrib.—Mattew 16:24.

Iffoka Fuq Affarijiet Inviżibbli Li Jibqgħu Għal Dejjem!

Meta tkellem dwar dak li għen lil Ġesù jissaporti, Pawlu wkoll indika l-​korsa għalina meta kiteb: “Ejjew . . . b’qalbna qawwija nibqgħu niġru t-​triq tal-​prova li għandna quddiemna; inżommu għajnejna merfugħa lejn Ġesù, li minnu tibda u fih tintemm il-​fidi tagħna.” (Lhud 12:1, 2) Iva, biex niġru l-​korsa Kristjana b’suċċess u bil-​ferħ, irridu nfittxu lil hinn mill-​affarijiet li huma immedjatament quddiemna. Imma kif “inżommu għajnejna merfugħa” lejn Ġesù, u dan x’se jagħmel għalina?

Per eżempju, fl-​1914, Ġesù ġie mogħti t-​tron bħala Sultan tas-​Saltna t’Alla, u hu jaħkem mis-​sema. Dan kollu, m’għandniex xi ngħidu, huwa inviżibbli għall-​għajnejn fiżiċi tagħna. Madankollu, jekk “inżommu għajnejna merfugħa” lejn Ġesù, il-​vista spiritwali tagħna se tgħinna naraw li issa jinsab lest biex jieħu azzjoni ħalli jġib fi tmiem is-​sistema t’affarijiet mill-​agħar preżenti u t-​tkeċċija taʼ Satana u l-​qtajja demoniċi tiegħu lejn irbit taʼ inattività. Billi nħarsu saħansitra iktar fil-​bogħod, il-​vista spiritwali tagħna se tirrivela d-​dinja l-​ġdida taʼ l-​għaġeb li fiha “ma jkunx hemm iżjed mewt, anqas biki jew agħjat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 19:11-16; 20:1-3; 21:4.

Mela, allura, minflok ma nkunu mtaqqlin mit-​tribulazzjonijiet temporanji li nistgħu jkollna niffaċċjaw kull ġurnata, għala ma niffokawx il-​ħarsa fissa tagħna fuq l-​affarijiet li huma eterni? B’għajnejn tal-​fidi, għala ma nfittxux lil hinn mill-​mard u r-​regħba fuq din l-​art imniġġsa biex naraw ġenna mimlija b’nies f’saħħithom, henjin, u li jimpurtahom? Għala ma nfittxux lil hinn mit-​tbajjaʼ tagħna, kemm fiżiċi u kemm spiritwali, u naraw lilna nfusna meħlusin minnhom għal dejjem bil-​mertu tas-​sagrifiċċju bħala rahan taʼ Kristu? Għala ma nfittxux lil hinn mit-​tbiċċir imħolli mill-​gwerer, mill-​kriminalità, u mill-​vjolenza u naraw l-​uħud li għadhom kif ġew irxoxtati u li qegħdin jiġu struwiti fil-​paċi u fit-​tjieba taʼ Jehovah?

Iktar minn hekk, biex “inżommu għajnejna merfugħa” lejn Ġesù jkun jinkludi wkoll li niffokaw il-​vista spiritwali tagħna fuq dak li s-​Saltna, għalkemm inviżibbli, diġà wettqet fost in-​nies t’Alla fuq l-​art: l-​unità, il-​paċi, l-​imħabba, l-​affezzjoni fraterna, u l-​prosperità spiritwali. Waħda mara Kristjana fil-​Ġermanja, wara li rat il-​vidjo United by Divine Teaching, kitbet: “Il-​vidjo tgħidx kemm se jgħinni biex inżomm f’moħħi li tant aħwa nisa u rġiel Kristjani madwar id-​dinja qegħdin f’dan l-​istess mument jaqdu lealment lil Jehovah​—u dan minkejja l-​oppożizzjoni pubblika. Kemm hija prezzjuża l-​unità fraterna tagħna f’dinja mimlija vjolenza u mibgħeda!”

“Tarahom” int ukoll lil Jehovah, lil Ġesù, lill-​anġli leali, u lil miljuni taʼ Kristjani sħabek bil-​wieqfa maġenbek? Jekk inhu hekk, m’intix se ssir ikkonċernat iżżejjed bl-​“inkwiet żejjed għall-​ħwejjeġ tad-​dinja” li jistaʼ jimpedik minħabba skuraġġiment u jġiegħlek “ma tagħmilx frott” fis-​servizz Kristjan. (Mattew 13:22) Mela ‘żomm għajnejk merfugħa’ lejn Ġesù billi tiffoka l-​għajnejn spiritwali tiegħek fuq is-​Saltna stabbilita t’Alla u l-​barkiet tagħha, kemm tal-​preżent u kemm tal-​futur.

Għix Biex Tara Dak Li Huwa Inviżibbli!

Meta naraw il-​kuntrast kbir li hemm bejn id-​dinja l-​ġdida eterna t’Alla u d-​dinja qadima tal-​lum li qiegħda tisfaxxa, għandna niġu mqanqlin biex inġibu rwieħna b’tali mod li se niġu meqjusin illi jistħoqqilna li ngħixu biex naraw litteralment l-​affarijiet li llum nistgħu biss naraw bil-​għajnejn tal-​fidi. Kotriet taʼ wħud irxoxtati bil-​kemm se jemmnu lil għajnejhom meta jistenbħu biex jaraw art magħmula ġenna taʼ tjieba tant differenti mid-​dinja li raw qabel ma mietu. Immaġina l-​ferħ tagħna f’li nkunu ħajjin biex nilqgħuhom u biex nispjegawlhom dak li għamel Alla!—Qabbel Ġoel 2:21-27.

Iva, kemm hija prezzjuża l-​vista spiritwali, u kemm huwa vitali li nżommuha akuta! Dan nistgħu nagħmluh billi regolarment nagħmlu studju persunali tal-​Bibbja, billi nattendu l-​laqgħat Kristjani, billi nkellmu lil oħrajn dwar it-​tama tagħna bbażata fuq il-​Bibbja, u fuq kollox, billi nitolbu għall-​gwida divina. Dan se jżomm il-​vista spiritwali tagħna akuta u ċara, billi jagħmilna kapaċi nfittxu lil hinn mill-​affarijiet li naraw! (w96 2/15)