Tintrabtux Taħt Madmad maʼ Dawk li Ma Jemmnux

“Tintrabtux taħt madmad li mhux indaqs maʼ dawk li ma jemmnux. Għax . . . x’seħem għandu wieħed fidil maʼ wieħed li ma jemminx?”—2 KORINTIN 6:14, 15.

1. Waħda oħt kif waslet li żżewġet wieħed li ma jemminx?

WAĦDA mix-​Xhieda taʼ Jehovah mill-​punent nofsani tal-​Istati Uniti tilfet lil żewġha f’inċident tal-​karozza xi snin ilu. “Għall-​ewwel ħassejtni mitlufa,” tiftakar hi, iżda kont determinata biex dan ma nħallihx jinterrompi s-​servizz tiegħi lejn Jehovah. Wara xi ftit tas-​snin, iżda, bdejt inħossni bħal waħda żejda ħdejn koppji fil-​kongregazzjoni. Binti u jien ma konniex niġu mistednin dejjem għal xi ħarġa tal-​familja. Meta kont ninnota koppji Kristjani juru affezzjoni lejn xulxin, kont inħossni iktar imwarrba. Ħadd qisu ma nduna li kont qed niddgħajjef spiritwalment. Għalhekk meta raġel tad-​dinja li kont naf fuq ix-​xogħol talabni biex noħroġ għal ikla miegħu, jiena mort. Qabel ma rrealizzajt x’qed jiġri, sirt inħobbu. Fl-​aħħar, tant kont dgħajfa u mikduda bis-​solitudni tiegħi li aċċettajt li niżżewġu.”

2. Ix-​xewqa li tiżżewweġ għala hija naturali, u ż-​żwieġ x’kien imfassal biex jifforma?

² Iva, ix-​xewqa li taqsam il-​ħajja maʼ sieħeb jew sieħba tistaʼ tkun qawwija ħafna, u hija wkoll naturali. Kif poġġieha Jehovah innifsu: “Mhux tajjeb għar-​raġel li jibqaʼ waħdu. Jien se nagħmel għajnuna għalih, bħala kompliment [“il-​parti l-​oħra,” xi ħaġa li tixraqlu] tiegħu.” (Ġenesi 2:18, New World Translation Reference Bible, nota taʼ taħt) Iż-​żwieġ kien imfassal biex jifforma rabtaʼ taʼ għaqda mill-​qrib u permanenti bejn raġel u mara. Ma kienx Adam, iżda kien Jehovah, li qal: “Raġel se jħalli lil missieru u ’l ommu u jrid jingħaqad maʼ martu u jridu jsiru laħam wieħed.” (Ġenesi 2:22-24; qabbel Mattew 19:4-6.) Forsi qalbek tixxennaq għal din il-​parti l-​oħra.

3, 4. (a) Il-​Bibbja kif twissi kontra li tifforma rabtiet mill-​qrib maʼ dawk li ma jemmnux? (b) B’liema mod jistaʼ l-​parir taʼ Pawlu dwar irbit mhux indaqs japplika għaż-​żwieġ? (ċ) Il-​Kristjani Korintin kif kienu se jifhmu t-​termini “dawk li ma jemmnux”? (Ara nota taʼ taħt.)

³ Il-​Bibbja, madankollu, twissi kontra li tifforma rabtiet mill-​qrib maʼ dawk li ma jemmnux. Kif poġġieha l-​appostlu Pawlu: “Tintrabtux taħt madmad li mhux indaqs [“Tintrabtux f’għaqda li mhix indaqs,” The Jerusalem Bible] maʼ dawk li ma jemmnux.a Għax . . . x’sehem għandu wieħed fidil maʼ wieħed li ma jemminx?”b (2 Korintin 6:14, 15) Pawlu setaʼ kellu f’moħħu l-​projbizzjoni tal-​Liġi taʼ Mosè kontra l-​irbit fil-​madmad flimkien taʼ barri u ħmar għall-​ħrit. (Dewteronomju 22:10) Il-​ħmar hu iżgħar fid-​daqs u mhux daqshekk b’saħħtu u kien se jbati minħabba dan l-​irbit mhux indaqs. Ladarba ż-​żwieġ huwa bħal madmad li jorbot lir-​raġel u lill-​mara flimkien, għal Kristjan li jiżżewweġ lil min ma jemminx se jirriżulta fi rbit mhux indaqs. (Mattew 19:6) Madmad bħal dan taʼ spiss iġib pressjoni u nkwiet miżjudin liż-​żwieġ.—Qabbel 1 Korintin 7:28.

⁴ Madankollu, kif turi l-​esperjenza tal-​ftuħ, xi Kristjani għażlu li jiżżewġu lil dawk li ma jemmnux. Xi wħud għala jsibuha diffiċli li jiżżewġu “biss fil-​Mulej”?—1 Korintin 7:39.

Għala Xi Wħud Ifittxu Band’oħra

5. Agħti eżempju għala xi whud jinvolvu ruħhom b’mod romantiku maʼ min ma jemminx.

⁵ Mhux neċessarjament għax ikollhom l-​intenzjoni li jinjoraw il-​parir t’Alla. Ikkunsidra s-​sitwazzjoni taʼ oħt Kristjana li forsi tixtieq tiżżewweġ. Hi forsi tixxennaq għal raġel Kristjan, iżda ma jidhirx li hemm aħwa rġiel eliġibbli fiċ-​ċirku tagħha taʼ ħbieb li jemmnu. Hija konxja dwar l-​età tagħha. Forsi tixtieq li jkollha familja. Il-​biżaʼ li tikber u tibqaʼ waħidha u l-​bżonn li tħossha maħbuba jistgħu jagħmluha vulnerabbli. Jekk, imbagħad, raġel tad-​dinja juri interess fiha, jistaʼ jkun diffiċli li tirreżisti. Hu jistaʼ jidher qalbu tajba, ġentili. Forsi ma jpejjipx jew jitkellem ħażin. Imbagħad jiġu l-​ġustifikazzjonijiet: ‘Ara, hu aħjar minn ħafna aħwa rġiel li naf!’ ‘Interessat f’li jistudja.’ ‘Naf każi fejn oħt iżżewġet wieħed li ma jemminx u maż-​żmien sar imsieħeb fit-​twemmin.’ ‘Hemm żwiġijiet Kristjani li ma jirnexxux!’—Ara Ġeremija 17:9.

6, 7. (a) Oħt mhix miżżewġa kif iddeskriviet id-​dwejjaq tagħha? (b) Liema mistoqsija jixirqilha li nikkunsidrawha?

⁶ Iva, jistaʼ jkun ħafna taʼ dwejjaq għal Kristjan għażeb li jrid jiżżewweġ. Xi wħud iħossuhom saħansitra mnikktin ħafna. “Il-​għadd taʼ aħwa rġiel eliġibbli hu estremament żgħir,” qalet waħda oħt mhix miżżewġa meta ddeskriviet is-​sitwazzjoni fil-​post fejn toqgħod. “Iżda l-​għadd taʼ aħwa nisa mhux miżżewġin huwa estremament kbir. Hekk kif oħt tara ż-​żgħożija tagħha għaddejja tiġri, il-​għażliet tagħha jitnaqqsu f’li jew ma tiżżewweġ xejn jew tiżżewweġ maʼ l-​ewwel ċans li jkollha.”

⁷ Madankollu, il-​parir tal-​Bibbja hu ċar: ‘Tintrabtux taħt madmad maʼ dawk li ma jemmnux.’ (2 Korintin 6:14) Hija din it-​twissija divina ħarxa jew bla raġuni?

Espressjoni tal-​Ħsieb taʼ Mħabba t’Alla

8. Jehovah kif wera li għandu l-​aħjar interessi tagħna f’qalbu?

⁸ Jehovah huwa kkonċernat bil-​kbir dwar il-​ġid dejjiemi tagħna. Ma taniex, bi spiża kbira għalih innifsu, lil Ibnu bħala “rahan bi bdil maʼ ħafna”? (Mattew 20:28) Hu m’huwiex ‘Dak li jgħallimna biex nibbenefikaw lilna nfusna’? (Isaija 48:17) Hu ma jwigħedx li ‘mhux se jħallina niġu ttantati iktar milli nistgħu nifilħu’? (1 Korintin 1O:13) B’mod raġonevoli, mela, meta jgħidilna biex ma nintrabtux maʼ dawk li ma jemmnux, hu żgur li għandu l-​aħjar interessi tagħna f’qalbu! Ikkunsidra kif din it-​twissija hija espressjoni tal-​ħsieb taʼ mħabba tiegħu għalina.

9. (a) Liema twissija jagħti Pawlu kontra li Kristjan jifforma rabta mill-​qrib maʼ min ma jemminx? (b) X’inhu t-​tifsir tal-​kelma Griega tradotta “armonija,” u din kif turi d-​diffikultà li tqum meta Kristjan jintrabat b’madmad maʼ min ma jemminx?

⁹ Iż-​żwieġ kien maħsub mill-​Ħallieq biex jifforma l-​eqreb rabta bejn il-​bnedmin, bir-​raġel u l-​mara jsiru “laħam wieħed.” (Ġenesi 2:24) Huwa għaqli għal xi Kristjan li jifforma din ir-​rabta mill-​qrib maʼ xi ħadd li ma jemminx? Pawlu jwieġeb billi jqajjem serje taʼ mistoqsijiet penetranti, li kull waħda titlob tweġiba negattiva. “Għax xi sħubija hemm bejn it-​tjieba u l-​ksur tal-​Ligi? Jew x’għandu x’jaqsam id-​dawl mad-​dlam? Iktar minn hekk, x’armonija [Grieg, sym·pho’nesis] hemm bejn Kristu u Beljal [Satana]? Jew x’sehem għandu wieħed fidil maʼ wieħed li ma jemminx?” (2 Korintin 6:14, 15) Il-​kelma Griega sym·pho’ne·sis litteralment tfisser “jinstemgħu flimkien” (minn syn, “ma’,” u pho·ne’, “ħoss”). Tirreferi għall-​armonija provduta minn strumenti mużikali. M’hemm, naturalment, l-​ebda armonija bejn Kristu u Satana. B’mod simili, f’madmad mhux indaqs, huwa diffiċli ħafna għar-​raġel u l-​mara biex ‘jikkordaw.’ Huma bħal żewġ strumenti mużikali li m’humiex f’armonija bejniethom, li jipproduċu ħsejjes skurdati minflok mużika.

10. Liema huma elementi essenzjali għal żwieġ hieni, u x’vantaġġi jeżistu meta jkun hemm madmad indaqs?

¹⁰ Kif, mela, tistaʼ persuna spiritwali tgawdi armonija sħiħa maʼ persuna fiżika? (1 Korintin 2:14) Twemmin komuni, prinċipji, u miri huma elementi essenzjali fi żwieġ hieni. L-​ebda ħaġa ma tagħti akbar saħħa liż-​żwieġ minn devozzjoni miż-​żewġ naħat lejn il-​Ħallieq. Meta jkun hemm madmad indaqs, ir-​raġel u l-​mara jistgħu jinkuraġġixxu lil xulxin fil-​qima. It-​tnejn jistgħu jħarsu lejn l-​Iskrittura biex jissetiljaw id-​differenzi taʼ bejniethom. Mhux evidenti, mela, li Jehovah igħidilna biex ma nintrabtux f’madmad maʼ dawk li ma jemmnux għaliex hu jridna li ngawdu l-​eqreb rabta possibbli mas-​sieħeb jew sieħba tagħna fiż-​żwieġ?

11. Għaqdiet taż-​żwieġ maʼ nies li ma kinux jaduraw lil Jehovah għala kienu projbiti f’Iżrael, u x’mistoqsija li ġġagħlek taħseb tiġi mqajma?

¹¹ Jekk nagħtu kas tat-​twissija tal-​Bibbja jeħlisna wkoll mill-​konsegwenzi taʼ wġigħ li taʼ spiss jirriżultaw meta Kristjan jintrabat b’madmad maʼ min ma jemminx. Hemm, per eżempju, il-​possibiltà li dak li ma jemminx ibiegħed lis-​sieħeb jew sieħba Kristjana milli taqdi lil Jehovah. Ikkunsidra t-​twissija taʼ Jehovah lil Iżrael tal-​qedem. Għaqdiet taż-​żwieġ maʼ nies li ma kinux jaduraw lil Jehovah kienu projbiti. Għala? “Għax se jdawwar lil ibnek milli jsegwini,” iwissi Jehovah, “u huma ċertament li se jaqdu allat oħra.” (Dewteronomju 7:3, 4) Iffaċċjat minn oppożizzjoni minn sieħeb jew sieħba li ma temminx, jistaʼ jkun hemm tendenza li tiżżerżaq lejn it-​triq tal-​inqas reżistenza. Huwa faċli li taħseb, ‘Mhux se jiġri hekk lili!’ Iżda ġara lil raġel b’għerf bħal Salamun. Ma jistax jiġri l-​istess lilek?—1 Slaten 11:1-6; qabbel 1 Slaten 4:29, 30.

12. Il-​liġi t’Alla li tipprojbixxi żwiġijiet maʼ barranin kif serviet taʼ protezzjoni għall-​Iżraelit? Agħti eżempju.

¹² Anki jekk dak li jemmen ma jiġix imdawwar ’il bogħod mill-​qima vera, xorta waħda hemm problemi u pressjonijiet taʼ spiss assoċjati maʼ dar maqsuma reliġjożament. Ikkunsidra, għal darb’oħra l-​liġi t’Alla lil Iżrael. Nassumu li xebba Iżraelita aċċettat li tiżżewweġ raġel Kangħanit. Imdorri bid-​drawwiet sesswali li kienu prevalenti fl-​art taʼ Kangħan, x’rispett kien se jkollu għal-​liġi taʼ Alla tagħha? Kien se jkun hu, per eżempju, lest li jżomm lura minn atti sesswali matul il-​menstruazzjoni, kif mitlub mil-​Liġi taʼ Mosè?c (Levitiku 18:19; 20:18; qabbel Levitiku 18:27.) Fil-​każ taʼ raġel Iżraelit li żżewweġ tfajla Kangħanita, kemm kienet se tappoġġah meta hu kien jivvjaġġa għal Ġerusalemm tliet darbiet kull sena biex jattendi l-​festi tal-​istaġuni? (Dewteronomju 16:16) Ovvjament, il-​liġi t’Alla kontra żwiġijiet bħal dawn serviet taʼ protezzjoni għall-​Iżraeliti.

13.(a) Għala persuna tad-​dinja m’għandhiex kuxjenza Kristjana, imħarrġa fuq il-​Bibbja? (b) Liema pressjonijiet u problemi jiġu ffaċċjati minn xi whud fi djar mifrudin reliġjożament?

¹³ Xi ngħid għal-​lum? Il-​livelli morali tan-​nies tad-​dinja huma bil-​wisq imbegħdin minn dawk tal-​Bibbja. Minkejja kemm jistgħu jkunu jidhru diċenti xi nies tad-​dinja huma xorta m’għandhomx kuxjenza Kristjana mħarrġa fuq il-​Bibbja. Huma ma qattgħux snin twal jistudjaw il-​Kelma t’Alla ‘iġeddu lil moħħhom’ u ‘jinżgħu l-​personalità l-​qadima.’ (Rumani 12:2; Kolossin 3:9) Għaldaqstant il-​Kristjan li jintrabat f’madmad maʼ min ma jemminx taʼ spiss jesponi lilu nnifsu għal ħafna wġigħ il-​qalb u niket. Xi whud jiffaċċjaw pressjoni ripetuta biex jieħdu sehem fi prattiċi sesswali perverti jew biex jiċċelebraw festi tad-​dinja. U xi wħud saħansitra jilmentaw minn solitudni. Kif kitbet waħda oħt: “Is-​solitudni li tħoss meta tkun miżżewġa lil xi ħadd li ma jħobbx lil Jehovah hija l-​agħar solitudni li tistaʼ timmaġina. Ifhem, ma għandek lil ħadd maʼ min taqsam il-​verità, li hi l-​iktar ħaġa mportanti f’ħajtek.”

14. (a) F’dar maqsuma, għala huwa diffiċli li trabbi t-​tfal ”fid-dixxiplina u r-​regular mentali taʼ Jehovah”? (b) X’jistaʼ jkun l-​effett fuq it-​tfal f’dar maqsuma?

¹⁴ F’dar maqsuma, jistaʼ jkun diffiċli ħafna li trabbi t-​tfal “fid-​dixxiplina u r-​regular mentali taʼ Jehovah.” (Efesin 6:4) Dak li ma jemminx, per eżempju, se jkun lest li jħalli lit-​tfal jattendu għal-​laqgħat jew jieħdu sehem fil-​ministeru tal-​għalqa? Taʼ spiss it-​tfal jispiċċaw maqsumin fl-​affezzjonijiet tagħhom—huma jħobbu lill-​ġenituri tagħhom it-​tnejn, iżda wieħed biss mill-​ġenituri jħobb lil Jehovah. Qalet waħda oħt li żżewġet lil wieħed li ma jemminx: “Jien għaddejt minn ħafna wġigħ il-​qalb matul il-​20 sena taʼ żwieġ tiegħi. Is-​subien tiegħi kibru qalb ħafna nkwiet u taqlib emozzjonali u issa huma parti mid-​dinja. Binti taʼ spiss tkun imdejqa għax ikollha tkun ’il bogħod minni taʼ spiss minħabba li missierha għandu d-​dritt li jaraha. Dawn il-​problemi kollha jeżistu għax meta kelli 18-il sena, jien għażilt li ninjora wieħed mill-​prinċipji taʼ Jehovah.” Liema prinċipju? Tintrabtux f’madmad maʼ dawk li ma jemmnux!

15. Jehovah għala jagħtina l-​parir biex ma nintrabtux b’madmad maʼ dawk li ma jemmnux?

¹⁵ Jidher ċar li Jehovah iridna ngawdu l-​aqwa mill-​ħajja. Dak li jitlob minna, inkluż il-​parir tiegħu biex ma nintrabtux f’madmad maʼ dawk li ma jemmnux, hu għall-​ġid tagħna. (Dewteronomju 1O:12, 13) Li tiżżewweġ lil xi ħadd li ma jemminx tkun qed tinjora parir Skritturali, għerf prattiku, u l-​esperjenza taʼ spiss taʼ wġigħ taʼ oħrajn.

Mistoqsijiet li Jsiru Spiss

16, 17. (a) Jekk ma noqogħdux attenti, kif tistaʼ l-​emozzjoni tfixkel ir-​raġunar sod? (b) Għandu l-​parir t’Alla jiġi njorat minħabba sitwazzjonijiet eċċezzjonali fejn Kristjan iżżewweġ lil xi ħadd li ma jemminx u issa t-​tnejn li huma qed jaqdu lil Jehovah? Spjega.

¹⁶ Madankollu, jekk ma noqogħdux attenti, l-​emozzjoni tistaʼ tfixkel ir-​raġunar sod. Nistgħu nibdew inħossu li eċċezzjoni tistaʼ ssir fil-​każ tagħna. Ikkunsidra xi ftit mill-​iktar mistoqsijiet li jsiru taʼ spiss.

¹⁷ Xi ngħidu dwar sitwazzjonijiet fejn ħu jew oħt iżżewġu lil xi ħadd ma jemminx, u issa t-​tnejn li huma qed jaqdu lil Jehovah? Xorta waħda, il-​prinċipji taʼ Jehovah ġew miksurin. Jistaʼ t-​tmiem jiġġustifika l-​mod li bih inkiseb? Bħala tixbieha tal-​ħarsa t’Alla dwar dawk li jinjoraw il-​parir tiegħu hemm il-​każ tal-​Lhud li rritornaw mill-​jasar fil-​Babilonja. Meta xi wħud minnhom ħadu nisa pagani, il-​kittieba tal-​Bibbja Eżra u Neħemija ma żammewx lura milli jikkundannaw l-​azzjonijiet tagħħom. Dawk il-​Lhud “aġixxew b’mod infidil,” ikkommettew “ħażen kbir,” u ġabu fuqhom “ħtija.” (Eżra 10:10-14; Neħemija 13:27) Xi ħaġa oħra x’tikkunsidra: Meta ninjoraw il-​parir t’Alla, aħna nistgħu inferu lilna nfusna spiritwalment, billi ntebbgħu l-​kuxjenza tagħna. Waħda oħt li żewġha li ma kienx jemmen maż-​żmien sar wieħed li jemmen qalet: ‘Għadni niġġieled mat-​tebgħat emozzjonali. Ma nistax ingħidlek kemm inħossni skomda meta oħrajn jippuntaw lejna u jgħidu, “Iżda kollox mar sewwa għal dawk.”’

18. X’inhi l-​korsa għaqlija jekk tħossok miġbud lejn xi ħadd li għadu mhux imgħammed, u b’hekk x’se turi?

¹⁸ Xi ngħidu jekk int miġbud lejn xi ħadd li qed jistudja l-​Bibbja u jattendi l-​laqgħat, għalkemm hu jew hi għadhom m’humiex imgħammdin? Aħna nifirħu meta xi ħadd juri nteress fil-​verità tal-​Bibbja. Il-​mistoqsija, iżda, hi: Għandek issegwi l-​inklinazzjoni tiegħek? Sinċerament, il-​korsa għaqlija hi li tistenna sa ftit żmien wara li l-​ħabib (jew ħabiba) tiegħek ikun imgħammed u qed jagħmel progress f’li juri l-​frott tal-​ispirtu t’Alla qabel tibdew toħorġu flimkien. (Galatin 5:22, 23) Forsi ma jkunx faċli li tapplika dan il-​parir, iżda billi tagħmel hekk int se turi devozzjoni lejn il-​prinċipji tal-​Bibbja; dan se jpoġġi pedament mill-​aħjar għal kuntentizza vera fiż-​żwieġ. Jekk il-​ħabib (jew ħabiba) tiegħek ġenwinament interessat fik u verament qed isir iħobb lil Jehovah, bla dubju hu (jew hi) se jkun lest li jistenna sakemm it-​tnejn li intom tkunu “fil-​Mulej”—iddedikati u mgħammdin—qabel tibdew toħorġu flimkien. Ftakar, ukoll, li l-​imħabba vera ma jiġrilha l-​ebda ħsara bil-​mogħdija taż-​żmien.—1 Korintin 7:39; Ġenesi 29:20.

19. X’għandek iżżomm f’moħħok jekk qed ikollok diffikultà biex issib sieħeb (jew sieħba) għaż-​żwieġ minn fost adoraturi sħabek?

¹⁹ Xi ngħidu jekk qed ikollok diffikultà f’li ssib sieħeb (jew sieħba) xieraq għaż-​żwieġ minn fost adoraturi sħabek? “Jien għandi 26 sena, mhix miżżewġa, u verament inħossni waħdi,” qalet waħda oħt. Veru, li tkun waħdek jistaʼ jkun diffiċli għalik, iżda l-​problemi li jirriżultaw milli tkun marbut f’madmad mhux indaqs fiż-​żwieġ jistgħu jkunu saħansitra iktar diffiċli! Li tobdi l-​parir t’Alla jistaʼ jirrikjedi fidi, rażna, u paċenzja, iżda kun żgur li Jehovah jaf u jixtieq dak li hu l-​aħjar għalik. (1 Pietru 5:6, 7) Għamilha suġġett fit-​talb, u mbagħad stenna fuq Jehovah. (Salm 55:22) F’din is-​sistema taʼ affarijiet, ħadd ma jgawdi ħajja taʼ sodisfazzjon perfett. Qalbek tistaʼ tixxennaq għal sieħeb (jew sieħba). Oħrajn, iżda, għandhom is-​sehem tagħhom taʼ problemi, li biċċiet minnhom m’għandhomx fejqan f’din is-​sistema. Fid-​dinja ġdida li ġejja biss se tiġi mwettqa kompletament “ix-​xewqa taʼ kull ħaġa ħajja.”−Salm 145:16.

20. Oħt li mhix miżżewġa kif esprimiet id-​determinazzjoni tagħha, u billi tkun determinat b’mod simili, x’sodisfazzjon jistaʼ jkollok?

²⁰ Sadattant, kun determinat li ma tintrabatx f’madmad maʼ xi ħadd li ma jemminx. Oħt mhix miżżewġa li għandha 36 sena esprimiet id-​determinazzjoni tagħha b’dan il-​mod: “Jien nitlob lil Jehovah kuljum għal sieħeb. M’għandi l-​ebda xewqa li nħares barra mill-​organizzazzjoni taʼ Jehovah, iżda t-​tentazzjonijiet għadhom hemm. Sadattant, bi ħsiebni naħdem fuq kwalitajiet li se jtejbuni bħala persuna sabiex inkun it-​tip taʼ mara spiritwali li raġel spiritwali jkun irid.” Int determinat bl-​istess mod? Jekk iva, jistaʼ jkollok is-​sodisfazzjon li jiġi meta tagħti prova tal-​lejaltà tiegħek lejn Dak Alla taʼ ġustizzja Divina.—Salm 37:27, 28.

[Noti taʼ taħt]

Tistaʼ Tispjega?

Il-​Bibbja kif twissi kontra l-​iffurmar taʼ rabtiet mill-​qrib maʼ dawk li ma jemmnux?

Xi Kristjani ddedikati għala jħarsu barra l-​kongregazzjoni għal sieħeb (jew sieħba) għaż-​żwieġ?

It-​twissija taʼ Jehovah dwar irbit f’madmad mhux indaqs kif inhi verament espressjoni tal-​ħsieb taʼ mħabba tiegħu għalina?

X’mistoqsijiet dwar li ssib sieħeb (jew sieħba) taʼ spiss isiru, u kieku int kif tweġibhom?