Kapitlu Tmienja
‘Il-Ġlieda Kontra l-Ispirti Ħżiena’
1. Għala l-attività taʼ l-ispirti ħżiena hija taʼ interess partikulari għalina?
ĦAFNA nies iwaqqgħu għaċ-ċajt l-idea li jeżistu spirti ħżiena. Imma din m’hijiex ċajta. Kemm jekk in-nies jemmnu u kemm jekk ma jemmnux, l-ispirti ħżiena veru jeżistu, u jipprovaw jagħmlu pressjoni fuq kulħadd. L-aduraturi taʼ Jehovah m’humiex eċċezzjoni. Fil-fatt, huma l-mira ewlenija. L-appostlu Pawlu jiftħilna għajnejna dwar dan il-fatt, meta jgħid: “Il-ġlieda tagħna m’hijiex kontra d-demm u l-laħam, imma kontra s-Setgħat [inviżibbli], kontra l-Qawwiet, kontra l-Prinċpijiet taʼ din id-dinja taʼ dlamijiet, kontra l-ispirti ħżiena li jgħammru fil-wisaʼ tas-smewwiet.” (Efesin 6:12) Fi żmienna, il-pressjoni li jagħmlu l-ispirti ħżiena laħqet l-aqwa tagħha għax Satana ġie mixħut ’il barra mis-sema u huwa inkorlat, minħabba li jaf li żmien ftit baqagħlu.—Apokalissi 12:12.
2. Kif inhu possibbli għalina li nirbħu fil-ġlieda kontra l-ispirti sovrumani?
2 Nistgħu aħna nirbħu ġlieda kontra l-qawwiet taʼ spirti sovrumani? Iva, imma biss jekk nistrieħu kompletament fuq Jehovah. Irridu nisimgħu minnu u nobdu l-Kelma tiegħu. Jekk nagħmlu dan, nistgħu nevitaw ħafna mill-ħsara fiżika, morali, u emozzjonali li jesperjenzaw dawk li jinsabu taħt il-kontroll sataniku.—Ġakbu 4:7.
Prinċpijiet tad-Dinja fil-Wisaʼ tas-Smewwiet
3. Satana lil min jopponi b’mod vjolenti, u kif?
3 B’mod ċar, Jehovah jiddeskrivilna s-sitwazzjoni tad-dinja minn kif jaraha hu stess mis-smewwiet. Hu ta viżjoni lill-appostlu Ġwanni li fiha Satana deher bħala “Dragun kbir minn lewn in-nar,” li kien lest biex jiblaʼ, jekk ikun possibbli, lis-Saltna Messjanika t’Alla hekk kif twieldet fis-sema fl-1914. Meta ra li ma rnexxilux, Satana waddab dilluvju taʼ oppożizzjoni vjolenti kontra r-rappreżentanti li din is-Saltna għandha fuq l-art. (Apokalissi 12:3, 4, 13, 17) Satana kif qajjem din il-gwerra? Permezz tar-rappreżentanti umani tiegħu.
4. Mingħand min ġejja l-qawwa tal-gvernijiet umani, u kif nafuh dan?
4 Imbagħad, Ġwanni ntwera bhima salvaġġa b’sebat irjus u għaxart iqrun, bhima b’setgħa “fuq kull tribù u kull poplu, kull ilsien u kull ġens.” Din il-bhima tirrappreżenta lis-sistema politika globali kollha. Ġwanni ġie informat li “d-Dragun [Satana x-Xitan] taha l-qawwa tiegħu u t-tron tiegħu u setgħa kbira.” (Apokalissi 13:1, 2, 7) Iva, Satana huwa s-sors tal-qawwa u l-awtorità tal-gvernijiet umani. B’hekk, bħalma kiteb l-appostlu Pawlu, il-vera “Prinċpijiet taʼ din id-dinja” huma “l-ispirti ħżiena li jgħammru fil-wisaʼ tas-smewwiet,” li jikkontrollaw lill-gvernijiet umani. Kulmin jixtieq iqim lil Jehovah għandu bżonn jifhem is-sinifikat sħiħ taʼ dan.—Luqa 4:5, 6.
5. Lejn xiex qed jinġabru l-ħakkiema politiċi?
5 Għalkemm ħafna ħakkiema politiċi jistqarru li huma reliġjużi, ħadd mill-ġnus ma jissottometti ruħu għall-ħakma taʼ Jehovah jew għal dik tas-Sultan maħtur tiegħu, Ġesù Kristu. Kollha jissieltu bl-aħrax biex iżommu f’idejhom il-qawwa tagħhom. Illum, bħalma juri r-rakkont taʼ l-Apokalissi, “spirti taʼ demonji” qed jiġbru lill-ħakkiema dinjin lejn il-“gwerra taʼ nhar il-Jum il-kbir taʼ Alla li jistaʼ kollox” f’Armageddon.—Apokalissi 16:13, 14, 16; 19:17-19.
6. Għala hemm bżonn noqogħdu attenti sabiex nevitaw li niġu mġagħlin nappoġġaw lis-sistema satanika?
6 Kuljum, il-ħajjiet tan-nies huma effettwati minn konflitti politiċi, soċjali, ekonomiċi, u reliġjużi li jifirdu lill-familja umana. F’dawn il-konflitti, hija xi ħaġa komuni li n-nies juru bil-kliem jew bl-azzjoni li jżommu maʼ xi ġens, tribù, grupp taʼ lingwa, jew klassi soċjali li jagħmlu parti minnha. Anki meta n-nies ma jkunux involuti direttament f’xi konflitt, huma taʼ spiss iżommu maʼ xi naħa jew oħra. Imma minkejja liema persuna jew prinċipju japprovaw, lil min tassew ikunu qed jappoġġaw? Il-Bibbja tispjega b’mod ċar: “Id-dinja kollha qiegħda taħt idejn il-Ħażin.” (1 Ġwann 5:19) Mela wieħed kif jistaʼ jevita li jiġi mqarraq mal-bqija tal-bnedmin? Huwa biss billi jagħti l-appoġġ kollu tiegħu lis-Saltna t’Alla u jżomm newtralità sħiħa lejn il-konflitti dinjin.—Ġwann 17:15, 16.
Makakkeriji tal-Wieħed mill-Agħar
7. Il-makakkerija taʼ Satana kif inhi murija mill-mod kif juża r-reliġjon falza?
7 Matul il-perijodi kollha taʼ l-istorja, Satana uża persekuzzjoni verbali u fiżika sabiex ibiegħed lin-nies mill-qima vera. Hu kellu wkoll mezzi iktar sottili—atti makakki u qarrieqa. B’makakkerija żamm numru kbir taʼ bnedmin fl-injoranza permezz tar-reliġjon falza, billi ġagħalhom jaħsbu li qed jaqdu lil Alla. Neqsin minn għarfien eżatt dwar Alla u minn imħabba għall-verità, huma forsi jinġibdu lejn servizzi reliġjużi mistiċi u emozzjonali jew jibqgħu impressjonati minn għemejjel taʼ qawwa. (2 Tessalonikin 2:9, 10) Imma aħna mwissijin li saħansitra minn fost dawk li xi darba kienu jieħdu sehem fil-qima vera, “xi wħud jitbiegħdu . . . u jagħtu widen għal spirti qarrieqa u għal tagħlim tax-xjaten.” (1 Timotju 4:1) Kif jistaʼ jiġri dan?
8. Satana kif jistaʼ jħajjarna għar-reliġjon falza saħansitra jekk qed inqimu lil Jehovah?
8 B’makakkerija, ix-Xitan jieħu vantaġġ mid-dgħjufijiet tagħna. Għad għandna biżaʼ mill-bniedem? Jekk iva, nistgħu nċedu għall-pressjoni mill-qraba jew il-ġirien biex nieħdu sehem fi prattiċi li oriġinaw mir-reliġjon falza. Aħna suppervi? Jekk iva, forsi noffendu ruħna meta ningħataw xi parir jew meta oħrajn ma jaċċettawx l-ideat li nappoġġaw. (Proverbji 15:10; 29:25; 1 Timotju 6:3, 4) Minflok ma nirranġaw il-ħarsa tagħna biex naqblu maʼ l-eżempju taʼ Kristu, għandna mnejn nisimgħu minn dawk li jgħidu affarijiet li jdoqqu għal widnejna bħal, per eżempju, li l-qari tal-Bibbja u li wieħed jgħix ħajja tajba huma biżżejjed. (2 Timotju 4:3) Kemm jekk ningħaqdu maʼ grupp reliġjuż ieħor u kemm jekk sempliċement noħolqu reliġjon għalina persunali m’huwiex importanti għal Satana, sakemm ma nqimux lil Jehovah fi qbil mad-direzzjoni li jagħtina permezz tal-Kelma u l-organizzazzjoni tiegħu.
9. Satana kif juża s-sess b’qerq sabiex iwettaq il-miri tiegħu?
9 Satana b’qerq iħajjar ukoll lin-nies biex jissodisfaw b’mod ħażin xewqat li huma normali. Hekk għamel bix-xewqa għall-intimità sesswali. Waqt li jiċħdu l-moralità tal-Bibbja, ħafna fid-dinja jqisu r-relazzjonijiet sesswali bejn tnejn mhux miżżewġin bħala pjaċir leġittimu jew bħala mod li bih jagħtu prova li huma adulti. U xi ngħidu għall-miżżewġin? Ħafna jikkommettu l-adulterju. U anki meta ma jkunx hemm infedeltà fiż-żwieġ, diversi individwi jfittxu d-divorzju jew is-separazzjoni sabiex imorru jgħixu maʼ ħaddieħor. B’mod sottili, Satana jimmira biex jinfluwenza lin-nies ħalli jgħixu għall-pjaċiri issa, waqt li jġagħalhom jinjoraw il-konsegwenzi li jiġu maż-żmien. Dawn jiġu mhux biss fuqhom infushom u fuq oħrajn, imma speċjalment fuq ir-relazzjoni tagħhom maʼ Jehovah u Ibnu.—1 Korintin 6:9, 10; Galatin 6:7, 8.
10. B’liema modi Satana jipprova jbiddel l-attitudni tagħna lejn l-immoralità u l-vjolenza?
10 Xewqa naturali oħra hija dik tar-rikreazzjoni. Meta tkun bnina, din tistaʼ tkun taʼ serħan fiżiku, mentali, u emozzjonali. Imma kif se nirreaġixxu meta Satana juża b’qerq okkażjonijiet taʼ rilassament biex jipprova jbiegħed il-ħsieb tagħna minn dak t’Alla? Per eżempju, nafu li Jehovah jobgħod l-immoralità sesswali u l-vjolenza. Meta xi films, programmi televiżivi, jew drammi teatrali juru dawn l-affarijiet, x’se nagħmlu? Noqogħdu aħna bil-qiegħda mingħajr ma nagħtu kas u nibqgħu narawhom? Żomm f’moħħok ukoll li Satana qed jieħu ħsieb li dawn l-affarijiet jaqgħu iktar fil-baxx hekk kif riesaq iż-żmien għalih biex jiġi maqful fl-abbiss, ladarba “n-nies il-ħżiena u l-uċuħ b’oħra jmorru mill-ħażin għall-agħar, iqarrqu u jitqarrqu.” (2 Timotju 3:13; Apokalissi 20:1-3) Għalhekk, għandna bżonn ngħassu l-ħin kollu kontra t-tnassis taʼ Satana.—Ġenesi 6:13; Salm 11:5; Rumani 1:24-32.
11. B’liema modi forsi saħansitra wieħed li jaf il-verità dwar l-ispiritiżmu jistaʼ jinqabad f’nassa jekk ma joqgħodx attent?
11 Aħna konxji wkoll li dawk li jieħdu sehem fi kwalunkwe forma taʼ spiritiżmu—ibassru dwar il-ġejjieni, jagħtuha għas-seħer, jew jipprovaw jikkomunikaw mal-mejtin—huma mistmerra minn Jehovah. (Dewteronomju 18:10-12) Jekk inżommu dan f’moħħna, mhux se naħsbu li nikkonsultaw lil xi medji taʼ l-ispirti, u żgur li mhux se nilqgħuhom f’darna biex jipprattikaw l-arti demonika tagħhom. Imma nisimgħuhom jekk jidhru fuq it-televixin tagħna jew fuq l-Internet? Għalkemm qatt ma naċċettaw kura mingħand xi saħħâr, se llibbsu xi lucky charms lit-tarbija tagħna, bil-ħsieb li forsi se jipproteġuha b’xi mod jew ieħor mill-ħsara? Peress li nafu li l-Bibbja tikkundanna li nagħmlu magħmul fuq oħrajn, se nħallu lil xi ipnotista jikkontrollalna ’l moħħna?—Galatin 5:19-21.
12. (a) Kif tiġi użata l-mużika biex iġġagħalna naħsbu dwar ideat li nafu li huma ħżiena? (b) L-ilbies, l-istil tax-xagħar, jew il-mod kif jitkellem kif jindikaw li dak li jkun jammira lil dawk li l-mod taʼ ħajja tagħhom m’huwiex approvat minn Jehovah? (ċ) X’inhu meħtieġ min-naħa tagħna jekk irridu nevitaw li naqgħu vittmi tal-makakkeriji taʼ Satana?
12 Il-Bibbja tgħid li l-fornikazzjoni u n-nuqqas taʼ ndafa taʼ kull xorta m’għandhom lanqas biss jissemmew fostna (b’motivi mhux nodfa). (Efesin 5:3-5) Imma xi ngħidu jekk suġġetti bħal dawn ikunu akkumpanjati minn mużika li jkollha melodija pjaċevoli, ritmu li jħajrek, jew li jkun persistenti? Nibdew aħna nirrepetu kliem li jigglorifika s-sess barra ż-żwieġ, l-użu tad-drogi għall-pjaċir, u xi atti midinba oħra? Jew għalkemm nafu li m’għandniex nimitaw il-mod kif jgħixu n-nies li jieħdu sehem f’affarijiet bħal dawn, għandna aħna t-tendenza li nidentifikaw lilna nfusna magħhom billi nimitawhom fl-ilbies, l-istil taʼ xagħarhom, jew il-mod kif jitkellmu? Kemm huma qarrieqa l-metodi li juża Satana biex iħajjar lill-bnedmin jaqblu mal-mod taʼ ħsieb korrott tiegħu! (2 Korintin 4:3, 4) Biex nibqgħu sodi u ma naqgħux vittmi tal-makakkeriji tiegħu, irridu nevitaw li nintelqu mad-dinja. Irridu nżommu f’moħħna min huma l-“Prinċpijiet taʼ din id-dinja taʼ dlamijiet” u niġġieldu bil-qawwa kontra l-influwenzi tagħhom.—1 Pietru 5:8.
Mgħammrin biex Inkunu Rebbieħa
13. Kif inhu possibbli għal kull wieħed minna, bl-imperfezzjonijiet tagħna, li jirbaħ id-dinja maħkuma minn Satana?
13 Qabel mewtu, Ġesù qal lill-appostli: “Agħmlu l-qalb: jiena rbaħt id-dinja!” (Ġwann 16:33) Huma wkoll setgħu jirbħu d-dinja. Xi 60 sena wara, l-appostlu Ġwanni kiteb: “Għax min hu dak li jegħleb lid-dinja, jekk mhux min jemmen li Ġesù hu l-Iben taʼ Alla?” (1 Ġwann 5:5) Fidi bħal din hi murija mill-fatt li nobdu l-kmandi taʼ Ġesù u nistrieħu fuq il-Kelma t’Alla, sewwa sew bħalma għamel Ġesù. X’jeħtieġ iktar? Li nibqgħu qrib tal-kongregazzjoni li tagħha hu l-Kap. Meta niżbaljaw, irridu nindmu bil-ħerqa u nfittxu l-maħfra t’Alla fuq il-bażi tas-sagrifiċċju taʼ Ġesù. B’dan il-mod, minkejja l-imperfezzjonijiet u n-nuqqasijiet tagħna, aħna wkoll nistgħu nkunu rebbieħa.—Salm 130:3, 4.
14. Aqra Efesin 6:13-17, u uża l-mistoqsijiet u l-iskritturi provduti f’dan il-paragrafu bħala bażi għal diskussjoni dwar il-benefiċċji taʼ kull biċċa mill-armatura spiritwali.
14 Biex ikollna suċċess, irridu nilbsu “l-armatura [kollha] taʼ Alla,” u ma nittraskuraw l-ebda parti minnha. Jekk jogħġbok iftaħ il-Bibbja tiegħek f’Efesin 6:13-17, u aqra d-deskrizzjoni li tagħti dwar din l-armatura. Imbagħad, billi twieġeb il-mistoqsijiet li hawn taħt, ikkunsidra kif tistaʼ tibbenefika mill-protezzjoni li tagħti kull biċċa mill-armatura.
“Ħażżmu ġenbejkom bil-verità”
Anki jekk inkunu nafu l-verità, l-istudju regulari, il-meditazzjoni fuq il-verità tal-Bibbja, u l-attendenza għal-laqgħat kif se jipproteġuna? (1 Korintin 10:12, 13; 2 Korintin 13:5; Filippin 4:8, 9)
“Il-kurazza tal-ġustizzja”
Liema livell taʼ ġustizzja u sewwa huwa dan? (Apokalissi 15:3)
Uri kif wieħed ikun qed jissogra ħsara spiritwali meta jonqos li jsegwi l-livelli ġusti u sewwa taʼ Jehovah. (Dewteronomju 7:3, 4; 1 Samwel 15:22, 23)
“Xiddu riġlejkom bil-ħeġġa taʼ l-Evanġelju tas-sliem”
Kif se jissalvagwardjana l-fatt li nużaw saqajna biex taʼ sikwit immorru u nitkellmu man-nies dwar il-provvedimenti t’Alla għall-paċi? (Salm 73:2, 3; Rumani 10:15; 1 Timotju 5:13)
“It-tarka tal-fidi”
Jekk ikollna l-fidi stabbilita fis-sod, kif se nirreaġixxu meta niffaċċjaw sitwazzjonijiet li jistgħu jġagħluna niddubitaw jew nibżgħu? (2 Slaten 6:15-17; 2 Timotju 1:12)
“L-elmu tas-salvazzjoni”
It-tama tas-salvazzjoni kif tistaʼ tgħin lil dak li jkun biex jevita li jinqabad f’nassa minħabba interess żejjed fil-ġid materjali? (1 Timotju 6:7-10, 19)
“Ix-xabla taʼ l-Ispirtu”
Fuq xiex għandna dejjem nistrieħu meta niġġieldu l-attakki kontra l-ispiritwalità tagħna jew dik t’oħrajn? (Salm 119:98; Proverbji 3:5, 6; Mattew 4:3, 4)
X’inhu wkoll vitali biex ikollna suċċess fil-gwerra spiritwali? Kemm spiss għandna nagħmlu dan? Għan-nom taʼ min? (Efesin 6:18, 19)
15. Kif nistgħu nieħdu sehem fl-attakk fil-ġlieda spiritwali?
15 Bħala suldati taʼ Kristu, aħna parti minn armata kbira li qed tieħu sehem fi gwerra spiritwali. Jekk nibqgħu għassa u nagħmlu użu tajjeb mill-armatura sħiħa t’Alla, ma nsofrux ħsara f’din il-gwerra. Minflok, se nkunu t’għajnuna kbira għall-qaddejja t’Alla. Se nkunu lesti u ħerqanin li nieħdu sehem fl-attakk, billi nxerrdu l-aħbar tajba tas-Saltna Messjanika t’Alla, il-gvern tas-sema li Satana jopponi b’daqstant vjolenza.
Diskussjoni Bħala Reviżjoni
• L-aduraturi taʼ Jehovah għala jżommu newtralità sħiħa fejn jidħlu konflitti dinjin?
• X’inhuma xi ftit mill-makakkeriji li juża Satana biex jirrovina l-ispiritwalità tal-Kristjani?
• L-armatura spiritwali li pprovdielna Alla kif tistaʼ tissalvagwardjana fil-gwerra spiritwali tagħna?
[Stampi f’paġna 76]
Il-ġnus qed jiġu miġburin lejn Armageddon