Ibqgħu Ħabirku għas-​Salvazzjoni Tagħkom!

“Għeżież tiegħi, . . . [“ibqgħu,” “NW”] ħabirku għas-​salvazzjoni tagħkom bil-​biżaʼ u t-​tregħid.”—FILIPPIN 2:12.

1, 2. Liema ideat popolari wasslu biex ħafna nies iħossu li m’għandhom ebda kontroll fuq kif se tiżvolġi ħajjithom?

“INT hekk twelidt?” Dan l-​aħħar, din il-​mistoqsija dehret b’ittri kbar fuq il-​qoxra taʼ rivista popolari. Taħt it-​titlu deher il-​kliem: “Personalità, temperament, u saħansitra għażliet fil-​ħajja. Studji ġodda juru li dawn fil-​biċċa l-​kbira huma ereditarji.” Stqarrijiet bħal dawn jistgħu jġagħlu lil xi wħud iħossuhom li ftit li xejn għandhom kontroll fuq ħajjithom stess.

² Oħrajn għandhom il-​biżaʼ li t-​trobbija fqira li tawhom il-​ġenituri, jew it-​tagħlim fqir li kisbu mingħand l-​għalliema tagħhom, b’xi mod ikkundannawhom għal ħajja mimlija niket. Għandhom mnejn iħossuhom iddestinati li jirrepetu l-​iżbalji li għamlu l-​ġenituri tagħhom, li jwettqu l-​agħar azzjonijiet li jiġuhom f’moħħhom, li ma jibqgħux leali lejn Jehovah​—fi ftit kliem, li jagħmlu għażliet ħżiena. Il-​Bibbja hekk tgħallem? Ngħiduha kif inhi, hemm xi reliġjonisti li jinsistu li ħaġa bħal din hija mgħallma fil-​Bibbja, id-​duttrina tal-​predestinazzjoni. Skond din id-​duttrina, Alla żmien twil ilu kien għażillek bil-​quddiem kull ġrajja taʼ ħajtek.

3. Il-​Bibbja liema messaġġ inkuraġġanti għandha dwar l-​abbiltà tagħna li nieħdu r-​responsabbiltà għall-​futur tagħna?

³ Dawn l-​ideat differenti kollha għandhom element wieħed komuni: Int ftit li xejn għandek għażla u kontroll fuq kif ħajtek se tiżvolġi. Dak huwa messaġġ skuraġġanti, hux tassew, u l-​iskuraġġiment iżid mal-​problema. Proverbji 24:10 (NW) jgħid: “Urejt li int skuraġġit f’jum l-​hemm? Il-​qawwa tiegħek se tkun skarsa.” Iżda kemm jinkuraġġina meta nsiru nafu, li skond il-​Bibbja, aħna nistgħu ‘nħabirku għas-​salvazzjoni tagħna.’ (Filippin 2:12) Kif nistgħu nsaħħu l-​fiduċja tagħna f’dan it-​tagħlim Skritturali pożittiv?

Ix-​Xogħol taʼ “Bini” li Nagħmlu Fina Nfusna

4. Għalkemm l-​1 Korintin 3:10-15 jitkellem dwar bini b’materjal li jirreżisti n-​nar, dan x’ma jimplikax?

⁴ Ikkunsidra t-​tixbieha taʼ l-​appostlu Pawlu li tinsab fl-​1 Korintin 3:10-15. Hawnhekk, hu jitkellem dwar xogħol taʼ bini Kristjan, u l-​prinċipju tat-​tixbieha tiegħu jistaʼ japplika għall-​ministeru intern jew estern. Qiegħed hu jimplika li fl-​aħħar mill-​aħħar jekk dixxiplu jagħżilx li jaqdi lil Jehovah u jibqaʼ jżomm maʼ dik l-​għażla jew le, dan se jkun għalkollox ir-​responsabbiltà taʼ dawk li għallmuh u ħarrġuh? Le. Pawlu kien qed jenfasizza l-​importanza li l-​għalliem għandu jagħmel l-​almu tiegħu fix-​xogħol taʼ bini. Imma bħalma rajna fl-​artiklu taʼ qabel, hu ma kienx qed jgħid li l-​istudent jew dixxiplu m’għandux għażla f’din il-​kwistjoni. Veru, it-​tixbieha taʼ Pawlu tiffoka fuq ix-​xogħol li nagħmlu fuq oħrajn, u mhux li nibnu lilna nfusna. Dan hu evidenti għaliex Pawlu jitkellem dwar xogħol taʼ bini taʼ kafkaf li jinqered waqt li l-​bennej innifsu jsalva. Minkejja dan, il-​Bibbja xi kultant tapplika dik l-​espressjoni għax-​xogħol li aħna nagħmlu fina nfusna.

5. Liema Skritturi juru li l-​Kristjani jridu jagħmlu xogħol taʼ “bini” fihom infushom?

⁵ Per eżempju, ikkunsidra Ġuda 20, 21: “Intom, għeżież, ibnu lilkom infuskom fuq il-​fidi l-​aktar qaddisa tagħkom; itolbu fl-​Ispirtu s-​Santu, żommu rwieħkom fl-​imħabba taʼ Alla.” Ġuda, hawnhekk juża l-​istess kelma Griega għal “bini” li Pawlu juża fl-​1 Korintin kapitlu 3, imma l-​punt taʼ Ġuda jidher li huwa dwar li nibnu lilna nfusna fuq il-​pedament tal-​fidi tagħna. Meta Luqa ddokumenta t-​tixbieha taʼ Ġesù dwar dak ir-​raġel li bena daru fuq il-​blat, hu uża l-​istess kelma Griega għal “pedament” li juża Pawlu fit-​tixbieha tiegħu tal-​bini Kristjan. (Luqa 6:48, 49) Barra minn hekk, Pawlu juża l-​lingwaġġ figurattiv taʼ li nkunu stabbiliti fuq “pedament” meta jħeġġeġ lill-​Kristjani sħabu biex jagħmlu progress spiritwali. Iva, il-​Kelma t’Alla tgħallem li aħna nagħmlu xogħol taʼ “bini” fina nfusna.—Efesin 3:15-19; Kolossin 1:23; 2:7.

6. (a) Uri kif kull dixxiplu Kristjan huwa riżultat taʼ proġett taʼ bini bi sħab. (b) Liema responsabbiltà għandu kull dixxiplu individwali?

⁶ Huwa l-​bini taʼ Kristjan xogħol taʼ bniedem wieħed? Sewwa, immaġina li tiddeċiedi li tibni dar. Trid tmur għand il-​perit għall-​pjanti. Waqt li bi ħsiebek tagħmel ħafna mix-​xogħol int stess, tqabbad kuntrattur biex jaħdem miegħek u jagħtik pariri dwar l-​aħjar metodi li tistaʼ tuża. Jekk ipoġġi pedament sod, jgħinek tifhem il-​pjanti, jissuġġerilek liema jkun l-​aħjar materjal li tixtri, u saħansitra jgħallmek ħafna dwar ix-​xogħol tal-​bini, x’aktarx li se taqbel li dan ikun għamel biċċa xogħol tajba. Imma xi ngħidu li kieku kellek tinjora l-​pariri tiegħu, taqbad u tixtri materjal irħis jew inferjuri, u saħansitra ma żżommx mal-​pjanti tal-​perit? Żgur li ma tkunx tistaʼ twaħħal fil-​kuntrattur jew fil-​perit jekk id-​dar tiġġarraf! Bl-​istess mod, kull dixxiplu Kristjan huwa riżultat taʼ proġett taʼ bini bi sħab. Jehovah hu l-​perit il-​kbir. Hu jappoġġa lil dak il-​Kristjan leali li, bħala wieħed mill-​“ħaddiema [“sħab,” NW] maʼ Alla,” jgħallem u jibni lill-​istudent. (1 Korintin 3:9) Iżda l-​istudent hu involut ukoll. Fl-​analisi finali, hu jkun responsabbli għall-​korsa taʼ ħajja li jkun ħa. (Rumani 14:12) Jekk irid li jkollu kwalitajiet Kristjani mill-​aħjar, irid jaħdem iebes biex jiksibhom, biex jibnihom fih innifsu.—2 Pietru 1:5-8.

7. Xi Kristjani liema sfidi jiffaċċjaw, u x’jistaʼ jkun taʼ faraġ għalihom?

⁷ Allura, ifisser dan li l-​ġenetika, l-​ambjent, u l-​kwalità taʼ l-​għalliema tagħna ma jfissru xejn? Dażgur li le! Il-​Kelma t’Alla tirrikonoxxi li kull waħda minn dawn hija importanti u tinfluwenzana. Bosta tendenzi midinbin u negattivi twelidna bihom u jistgħu jkunu ibsin ferm biex niġġildulhom. (Salm 51:7 [Salm 51:5, NW]; Rumani 5:12; 7:21-23) It-​taħriġ li jagħtu l-​ġenituri u l-​ambjent tad-​dar jistaʼ jkollhom impatt tremend fuq iż-​żgħar​—kemm għat-​tajjeb u kemm għall-​ħażin. (Proverbji 22:6; Kolossin 3:21) Ġesù kkundanna lill-​mexxejja reliġjużi Lhud għall-​effett ħażin li t-​tagħlim tagħhom kellu fuq oħrajn. (Mattew 23:13, 15) Illum, fatturi bħal dawn qed jeffettwaw lilna lkoll. Per eżempju, xi wħud mill-​qaddejja t’Alla jiffaċċjaw ċerti sfidi bħala riżultat taʼ tfulija diffiċli. Dawn jeħtieġu l-​qalb tajba u l-​empatija tagħna. U jistgħu jisiltu l-​faraġ mill-​messaġġ tal-​Bibbja li huma m’humiex iddestinati li jirrepetu l-​istess żbalji tal-​ġenituri tagħhom, jew li ma jibqgħux leali. Ikkunsidra kif xi wħud mis-​slaten taʼ Ġuda tal-​qedem jiċċarawh dan il-​punt.

Is-​Slaten taʼ Ġuda​—Dawn Għamlu l-​Għażliet Tagħhom

8. Ġotam x’eżempju ħażin kellu minn missieru, iżda liema għażla għamel?

⁸ Għużżija sar sultan taʼ Ġuda fl-​età tenera taʼ 16-il sena u saltan għal 52 sena. Matul il-​biċċa l-​kbira taʼ dan iż-​żmien, hu “għamel is-​sewwa f’għajnejn il-​Mulej, bħalma kien għamel Amasija missieru.” (2 Slaten 15:3) Jehovah bierku b’sensiela taʼ rebħiet militari impressjonanti. B’sogħba, iżda, is-​suċċess telagħlu għal rasu lil Għużżija. Tkabbar u rribella kontra Jehovah billi qabad u offra l-​inċens fuq l-​artal fit-​tempju, dmir li kien irriżervat għall-​qassisin. Għużżija ġie mċanfar imma aġixxa b’dagħdigħa kbira. Wara dan ġie umiljat​—intlaqat mill-​ġdiem u ġie sforzat jgħix il-​bqija taʼ ħajtu ’l bogħod minn daru iżolat minn kulħadd. (2 Kronaki 26:16-23) Ibnu Ġotam kif irreaġixxa għal dan kollu? Dan iż-​żagħżugħ setaʼ faċilment ġie influwenzat minn missieru u setaʼ ma ħax pjaċir bil-​korrezzjoni mingħand Jehovah. In-​nies in ġenerali għandhom mnejn kellhom influwenza negattiva fuqu ladarba kienu jieħdu sehem fi prattiċi reliġjużi ħżiena. (2 Slaten 15:4) Imma Ġotam għamel l-​għażla tiegħu. “Għamel is-​sewwa f’għajnejn il-​Mulej.”—2 Kronaki 27:2.

9. Liema kienu xi influwenzi tajbin li kellu Aħaż, imma ħajtu kif żvolġiet?

⁹ Ġotam saltan għal 16-il sena u baqaʼ leali lejn Jehovah l-​ħin kollu. Għalhekk, ibnu Aħaż kellu l-​eżempju eċċellenti taʼ missier leali. U Aħaż kellu oħrajn li jinfluwenzawh għat-​tajjeb. Kellu l-​privileġġ li jgħix fi żmien meta l-​profeti leali Isaija, Hosegħa, u Mikea kienu attivi jipprofetizzaw fil-​pajjiż. Madankollu, għamel għażla ħażina. “Ma għamilx is-​sewwa f’għajnejn il-​Mulej, bħalma kien għamel David missieru.” Għamel xbihat taʼ Bagħal u qiemhom u saħansitra ħaraq xi wħud minn uliedu fin-​nar tas-​sagrifiċċju lil allat pagani. Minkejja li kellu l-​aqwa nies jinfluwenzawh, hu falla u għamel fjask bħala sultan u bħala qaddej taʼ Jehovah.—2 Kronaki 28:1-4.

10. X’tip taʼ missier kien Aħaż, imma ibnu Ħeżekija liema għażla għamel?

¹⁰ Mil-​lat taʼ qima pura huwa diffiċli li timmaġina xi missier agħar minn Aħaż. Madankollu, ibnu Ħeżekija ma setax jagħżlu hu lil missieru! L-​ulied żgħar li Aħaż kien biċċer bħala sagrifiċċju lil Bagħal x’aktarx li kienu ħut Ħeżekija. Kien Ħeżekija kkundannat għal ħajja taʼ nuqqas taʼ fedeltà lejn Jehovah minħabba dan l-​ambjent terribbli li trabba fih? Għall-​kuntrarju, Ħeżekija sar wieħed mill-​ftit slaten taʼ Ġuda li kienu verament kbar​—raġel leali, għaref, u maħbub minn kulħadd. “[I]l-Mulej kien miegħu.” (2 Slaten 18:3-7) Fil-​fatt, hemm raġuni għala għandna nemmnu li Ħeżekija, waqt li kien għadu prinċep żagħżugħ, kien il-​kittieb imnebbaħ taʼ Salm 119. Jekk inhu hekk, faċli nindunaw għala kiteb dan il-​kliem: “Jiena nf[n]ejt bin-​niket.” (Salm 119:28) Minkejja l-​inkwiet li fnieh, Ħeżekija ħalla l-​Kelma taʼ Jehovah tiggwidah matul ħajtu. Salm 119:105 jgħid: “Fanal għal riġlejja l-​kelma tiegħek, u dawl fil-​mogħdija tiegħi.” Iva, Ħeżekija għamel l-​għażla tiegħu​—l-​għażla t-​tajba.

11. (a) Minkejja l-​influwenza tajba li kellu mingħand missieru, Manassi sa liema punt estrem wasal fl-​irvell tiegħu kontra Jehovah? (b) Manassi liema għażla għamel fi xjuħitu, u x’nistgħu nitgħallmu minn dan?

¹¹ Iżda x’paradoss! Minn wieħed mill-​aħjar slaten li kien hemm f’Ġuda, ħareġ wieħed mill-​agħar slaten. Manassi, bin Ħeżekija, ippromwova l-​idolatrija, l-​ispiritiżmu, u l-​vjolenza fuq skala kbira li qatt ma kien hemm bħalha. Ir-​rakkont jgħid li “l-​Mulej kellem lil Manassi, u lill-​poplu, imma dawn ma tawhx widen.” (2 Kronaki 33:10) Skond it-​tradizzjoni Lhudija, Manassi wieġeb billi ġagħal li Isaija jiġi mħanxar min-​nofs. (Qabbel Lhud 11:37.) Kemm jekk dan huwa minnu jew le, Manassi naqas li jagħti widen għal kwalunkwe twissija divina. Fil-​fatt, ġiegħel li xi wħud minn uliedu stess jiġu maħruqin ħajjin bħala sagrifiċċji, preċiż bħalma kien għamel nannuh Aħaż. Madankollu, dan ir-​raġel mill-​agħar, meta ġie ffaċċjat minn provi ħorox fi xjuħitu, nidem u biddel ħajtu. (2 Kronaki 33:1-6, 11-20) L-​eżempju tiegħu jgħallimna li bniedem li jkun għamel għażliet terribbli ma jkunx neċessarjament fi stat li ma jistax jiġi mifdi. Jistaʼ jinbidel.

12. Liema għażliet opposti għamlu Amon u ibnu Ġosija rigward is-​servizz lejn Jehovah?

¹² Amon, bin Manassi, setaʼ tgħallem ferm mill-​indiema taʼ missieru. Imma dan għamel għażliet ħżiena. Amon fil-​fatt “kompla jidneb kemm kien jiflaħ” sakemm sa fl-​aħħar ġie assassinat. Ibnu Ġosija kien kuntrast rifreskanti. Ġosija evidentement għażel li jieħu t-​tagħlima minn dak li ġara lil nannuh. Beda jaħkem meta kellu biss tmien snin. Meta kellu biss 16-il sena, beda jfittex lil Jehovah u minn dakinhar ’il quddiem wera kemm kien sultan leali u eżemplari. (2 Kronaki 33:20–34:5) Għamel għażla​—l-​għażla t-​tajba.

13. (a) X’nitgħallmu mis-​slaten taʼ Ġuda li għadna kif ikkunsidrajna? (b) Kemm huwa importanti t-​taħriġ mill-​ġenituri?

¹³ Hekk kif eżaminajna fil-​qosor sebgħa mis-​slaten taʼ Ġuda nisiltu tagħlima qawwija. F’xi każi, l-​agħar slaten kellhom l-​aqwa wlied, u bil-​maqlub, l-​aqwa slaten kellhom l-​agħar ulied. (Qabbel Koħèlet 2:18-21.) Dan ma jnaqqasx l-​importanza tat-​taħriġ mill-​ġenituri. Ġenituri li jħarrġu lil uliedhom skond kif irid Jehovah, ċertament ikunu qed jagħtu lil uliedhom l-​aqwa opportunità li teżisti biex huma jsiru qaddejja leali taʼ Jehovah. (Dewteronomju 6:6, 7) Xorta waħda, minkejja l-​aħjar sforzi li jkunu għamlu l-​ġenituri leali tagħhom, xi tfal jagħżlu li jaqbdu triq ħażina. Tfal oħrajn, minkejja li l-​ġenituri tagħhom ikollhom l-​agħar influwenza fuqhom, jagħżlu li jħobbu u jaqdu lil Jehovah. Bil-​barka tiegħu, huma jkollhom suċċess fil-​ħajja tagħhom. Toqgħod int tberren x’jistaʼ jiġri fil-​każ tiegħek? Allura, ikkunsidra xi ftit mill-​iskritturi fejn Jehovah jagħti assiguranza persunali li int tistaʼ tagħmel l-​għażla t-​tajba!

Jehovah Għandu Fiduċja fik!

14. Kif nafu li Jehovah jifhem il-​limitazzjonijiet tagħna?

¹⁴ Jehovah jara kollox. Proverbji 15:3 jgħid: “Kullimkien iħarsu għajnejn il-​Mulej, jgħassu fuq il-​ħżiena u fuq it-​tajbin.” Is-​sultan David qal dan dwar Jehovah: “Raw għajnejk l-​għemejjel [“l-​ewwel tiswir,” NW] tiegħi: kollha nkitbu fil-​ktieb tiegħek; u jiemi kienu ġa magħduda meta ebda wieħed ma kien għad hemm.” (Salm 139:16) Mela Jehovah jaf liema tendenzi negattivi qed tħabbat wiċċek magħhom​—kemm jekk writthom u kemm jekk ksibthom bħala riżultat taʼ influwenzi oħrajn li ma kellekx kontroll fuqhom. Hu jifhem eżattament kif dawn effettwawk. Jifhem il-​limitazzjonijiet tiegħek saħansitra aħjar milli tifhimhom int stess. U hu ħanin. Qatt ma jistenna minna iktar milli nifilħu nagħtu.—Salm 103:13, 14.

15. (a) Liema hu sors wieħed taʼ faraġ għal dawk li sofrew minħabba l-​ħsara li oħrajn għamlulhom deliberatament? (b) Jehovah liema responsabbiltà jagħtina li permezz tagħha jkun qed jagħti dinjità lil kull wieħed u waħda minna?

¹⁵ Mill-​banda l-​oħra, Jehovah ma jaraniex bħala vittmi taċ-​ċirkustanzi, li m’għandna l-​ebda tama. Jekk fil-​passat konna għaddejna minn xi esperjenzi koroh, nistgħu nsibu faraġ fiċ-​ċertezza li Jehovah jobgħod il-​kondotta taʼ dawk li jagħmlu l-​ħsara deliberatament. (Salm 11:5; Rumani 12:19) Imma se jeżentana mill-​konsegwenzi jekk induru lura u nagħmlu għażliet żbaljati minn jeddna? Dażgur li le! Il-​Kelma tiegħu tgħid: “Kull wieħed għandu t-​tagħbija tiegħu x’jerfaʼ.” (Galatin 6:5) Jehovah jagħti d-​dinjità lill-​ħlejjaq intelliġenti tiegħu kollha billi jagħtihom ir-​responsabbiltà li jagħmlu s-​sewwa u jaqdu lilu. Huwa preċiż bħalma Mosè qal lill-​ġens taʼ Iżrael: “Nsejjaħ illum is-​sema u l-​art b’xhieda kontrikom: il-​ħajja u l-​mewt, li jien illum qegħedt quddiemek, il-​barka u s-​saħta. Agħżel il-​ħajja biex tgħix int u nislek.” (Dewteronomju 30:19) Jehovah jinsab fiduċjuż li aħna wkoll nistgħu nagħmlu l-​għażla t-​tajba. Dan kif nafuh?

16. Kif jistaʼ jkollna suċċess f’li ‘nħabirku għas-​salvazzjoni tagħna’?

¹⁶ Innota x’kiteb l-​appostlu Pawlu: “Għalhekk, għeżież tiegħi, . . . [“ibqgħu,” NW] ħabirku għas-​salvazzjoni tagħkom bil-​biżaʼ u t-​tregħid. Alla hu li jaħdem fikom u jġegħelkom tridu u tħabirku biex tagħmlu dak li jogħġob lilu.” (Filippin 2:12, 13) Il-​kelma oriġinali bil-​Grieg li tingħata “ħabirku” hawnhekk tissinjifika li xi ħaġa titlesta. Għalhekk, ħadd minna m’hu ddestinat li jfalli jew jaqtaʼ qalbu. Bilfors li Alla Jehovah għandu fiduċja fina li nistgħu nlestu x-​xogħol li tana biex nagħmlu​—ix-​xogħol li jwassal għas-​salvazzjoni tagħna—​għax kieku ma kienx se jnebbaħ stqarrija bħal din. Imma aħna kif jistaʼ jkollna suċċess? Mhux bil-​ħila tagħna stess. Kieku konna b’saħħitna biżżejjed fina nfusna u minna nfusna, ma kienx ikun hemm bżonn għall-​“biżaʼ u t-​tregħid.” Minflok Jehovah ‘jaħdem fina,’ billi l-​ispirtu qaddis tiegħu jaħdem f’moħħna u f’qalbna, waqt li jgħinna nkunu ‘rridu u nħabirku biex nagħmlu [“naġixxu,” NW].’ B’dik l-​għajnuna kollha mħabba, taħsbu li hemm xi raġuni għala m’għandniex nagħmlu l-​għażliet xierqa fil-​ħajja u ngħixu fi qbil magħhom? Le!—Luqa 11:13.

17. Liema bidliet nistgħu nagħmlu fina nfusna, u Jehovah kif jgħinna nagħmluhom?

¹⁷ Se jkollna ostakli x’negħlbu​—forsi konna ilna għomorna b’vizzji ħżiena u influwenzi taʼ ħsara li jistgħu jħassrulna l-​ħsieb tagħna. Minkejja dan, bil-​għajnuna taʼ l-​ispirtu taʼ Jehovah, dawn nistgħu negħlbuhom! Bħalma kiteb l-​appostlu Pawlu lill-​Kristjani f’Korintu, il-​Kelma t’Alla hija qawwija biżżejjed biex tegħleb saħansitra “affarijiet li jkunu daħlu fil-​fond ħafna.” (2 Korintin 10:4, NW) Fil-​fatt, Jehovah jistaʼ jgħinna nagħmlu bidliet estensivi fina nfusna. Il-​Kelma tiegħu tħeġġiġna biex ‘ninżgħu l-​bniedem il-​qadim’ u ‘nilbsu l-​bniedem il-​ġdid, maħluq skond Alla, fil-​ġustizzja u l-​qdusija tassew.’ (Efesin 4:22-24) Jistaʼ l-​ispirtu taʼ Jehovah tassew jgħinna nagħmlu bidliet bħal dawn? Dażgur! L-​ispirtu t’Alla jipproduċi frott ġewwa fina​—kwalitajiet sbieħ u prezzjużi li lkoll kemm aħna nixtiequ nikkultivaw. L-​ewwel minn dawn hija l-​imħabba.—Galatin 5:22, 23.

18. Kull bniedem li jirraġuna, liema għażla jistaʼ jagħmel kompletament, u dan x’għandu jgħinna niddeterminaw?

¹⁸ F’dan hemm verità li teħilsek verament. Alla Jehovah għandu kapaċità bla limitu għall-​imħabba, u aħna magħmulin fix-​xbieha tiegħu. (Ġenesi 1:26; 1 Ġwann 4:8) Għalhekk nistgħu nagħżlu li nħobbu lil Jehovah. U dik l-​imħabba​—mhux il-​ħajja tagħna tal-​passat, mhux id-​difetti li ksibna, mhux it-​tendenzi li writna biex nagħmlu l-​ħażin—​hija l-​qofol tal-​futur tagħna. Adam u Eva kellhom bżonn l-​imħabba lejn Alla sabiex jibqgħu leali f’Għeden. Din l-​imħabba hija dik li kull wieħed u waħda minna jeħtieġ sabiex jibqaʼ ħaj wara Armageddon u jgħaddi mill-​prova finali fi tmiem ir-​Renju t’Elf Sena taʼ Kristu. (Apokalissi 7:14; 20:5, 7-10) Kull wieħed minna, huma x’inhuma ċ-​ċirkustanzi tiegħu, jistaʼ jikkultiva mħabba bħal din. (Mattew 22:37; 1 Korintin 13:13) Ejjew inkunu ddeterminati li nħobbu lil Jehovah u nibnu fuq dik l-​imħabba għall-​eternità kollha.

Int x’Taħseb?

◻ Liema ideat popolari jikkontradixxu t-​tagħlim pożittiv tal-​Bibbja rigward responsabbiltà individwali?

◻ Kull Kristjan liema xogħol taʼ bini jrid jagħmel fih innifsu?

◻ L-​eżempji tas-​slaten taʼ Ġuda kif juru li kull individwu jagħmel l-​għażla tiegħu?

◻ Jehovah kif jiżgurana li nistgħu nagħmlu l-​għażliet tajbin fil-​ħajja, minkejja l-​influwenzi negattivi taʼ madwarna?

[Stampa f’paġna 15]

Huwa l-​futur tiegħek iddeterminat mill-​ġenetika?

[Stampa f’paġna 17]

Minkejja l-​eżempju ħażin taʼ missieru, is-​Sultan Ġosija għażel li jaqdi lil Alla