16, 17. (a) Pawlu kif għamel il-​qalb għall-​ministeru? (b) Liema passi għandna nieħdu jekk insibu ruħna intimidati b’xi aspett tal-​ministeru Kristjan tagħna?

¹⁶ Lill-​Kristjani f’Tessalonika, Pawlu kitbilhom: “Għalkemm aħna, bħalma tafu, batejna u żebilħuna f’Filippi qabel ma ġejna għandkom, imma għamilna l-​qalb f’Alla tagħna, u fost ħafna taħbit xandarnielkom l-​Evanġelju taʼ Alla.” (1 Tessalonikin 2:2) Pawlu u sħabu kif ġew ‘imżebilħin’ ġo Filippi? Skond xi studjużi, il-​kelma Griega wżata minn Pawlu tesprimi trattament insolenti, t’għajb, jew vjolenti. L-​awtoritajiet Filippini kienu sawtuhom bil-​bsaten, tefgħuhom il-​ħabs, u qaflulhom saqajhom f’ċipp taʼ l-​injam. (Atti 16:16-24) Dik l-​esperjenza qarsa kif effettwatu lil Pawlu? Kien hemm uħud f’Tessalonika, il-​belt li kien imiss fuq il-​vjaġġ missjunarju tiegħu, li sabuh imriegħex bil-​biżaʼ lil Pawlu? Le, hu ‘għamel il-​qalb,’ billi kkonkwista l-​biżaʼ u kompla jippriedka bil-​qlubija.

¹⁷ Il-​qlubija taʼ Pawlu minfejn ġiet? Minn ġo fih? Le, hu qal li għamel il-​qalb permezz taʼ “Alla tagħna.” Xogħol taʼ referenza għal dawk li jittraduċu l-​Bibbja jgħid li din l-​istqarrija tistaʼ tiġi tradotta “Alla neħħa l-​biżaʼ minn ġo qalbna.” Mela jekk tħoss li m’intix partikolarment qalbieni dwar il-​ministeru tiegħek, jew jekk taħseb li xi aspett minnu jintimidak b’mod partikulari, għala ma tistaqsix lil Jehovah biex jagħmel l-​istess ħaġa għalik? Itolbu jneħħi l-​biżaʼ minn ġo qalbek. Itolbu jgħinek tagħmel il-​qalb għax-​xogħol. Iżjed minn hekk, ħu xi passi prattiċi oħrajn. Per eżempju, irranġa biex taħdem maʼ xi ħadd li jinqalaʼ fl-​aspett taʼ għoti taʼ xiehda li jikkonċernak. Dan għandu mnejn jinvolvi territorju taʼ negozju, għoti taʼ xiehda fit-​toroq, xandir informali, jew għoti taʼ xiehda bit-​telefon. Forsi min jgħinek ikun lest li għall-​ewwel jieħu t-​tmexxija hu. Jekk inhu hekk, osserva u tgħallem. Imma mbagħad agħmel il-​qalb biex tipprova int.

18. Liema barkiet nistgħu nesperjenzaw jekk nagħmlu l-​qalb fil-​ministeru tagħna?

¹⁸ Jekk jirnexxilek tagħmel il-​qalb, aħseb dwar x’jistaʼ jirriżulta. Meta tippersisti u ma tħallix li tiġi skuraġġit, x’aktarx li se jkollok esperjenzi tajbin meta taqsam il-​verità m’oħrajn, esperjenzi li kont titlifhom li kieku m’għamiltx hekk. (Ara paġna 25.) Se jkollok is-​sodisfazzjon li tkun taf li għoġobt lil Jehovah billi għamilt xi ħaġa li tħossha diffiċli għalik. Se tesperjenza l-​barka u l-​għajnuna tiegħu talli tkun għelibt il-​biżaʼ. Il-​fidi tiegħek se tkun iktar b’saħħitha. Ngħiduha kif inhi, ma tistax taħdem biex tibni l-​fidi f’oħrajn jekk fl-​istess waqt ma tibnix il-​fidi tiegħek stess.—Ġuda 20, 21.

Dawn Għamlu l-​Qalb

M’HUWIEX dejjem faċli li tagħmel il-​qalb sabiex tippriedka. Fil-​fatt, l-​appostlu Pawlu qal li darba minnhom, dan għamlu “fost ħafna taħbit.” (1 Tessalonikin 2:2) Jiswa l-​isforz li ‘titħabat’ biex tippriedka? M’hemm ebda garanzija taʼ xi esperjenzi spettakolari, imma n-​nies t’Alla spiss ikunu henjin li jkunu għamlu l-​qalb. Ikkunsidra xi eżempji.

Tifla taʼ tmien snin jisimha Tara qagħdet attenta tismaʼ hekk kif l-​għalliema tagħha qalet lill-​klassi li matul it-​Tieni Gwerra Dinjija, il-​priġunieri Lhud fil-​kampijiet taʼ konċentrament kellhom jilbsu Stilla taʼ David safra biex jiġu identifikati. Tara bdiet ittellaʼ u tniżżel jekk għandhiex tiftaħ fommha. “Tlabt b’għajnejja miftuħin,” tiftakar hi. Imbagħad għolliet idha u qalet li f’dawk il-​kampijiet kien hemm ukoll ix-​Xhieda taʼ Jehovah, u dawn kellhom jilbsu trijanglu vjola. L-​għalliema wriet interess u rringrazzjatha. ll-​kumment taʼ Tara fetaħ it-​triq għal iktar diskussjonijiet maʼ l-​għalliema, li iktar tard saħansitra wriet lill-​klassi kollha tagħha l-​vidjo Jehovahʼs Witnesses Stand Firm Against Nazi Assault (Ix-​Xhieda ta’ Jehovah Jieqfu Sod Kontra l-​Attakki tan-​Nazi).

Fil-​Ginea, fl-​Afrika tal-​Punent, Irène, pubblikatriċi żagħżugħa mhix mgħammda, riedet tipprogressa fil-​ministeru tagħha. ll-​missjunarja li studjat il-​Bibbja magħha inkuraġġietha biex tipprova tħalli r-​rivisti Torri taʼ l-​Għassa u Stenbaħ! maʼ sħabha l-​istudenti fl-​iskola. Irène qagħdet taħsibha għaliex sħabha tal-​klassi ma kinux tawha widen qabel. Madankollu, billi tqanqlet mill-​inkuraġġiment tal-​ missjunarja, Irène ddeċidiet li l-​ewwel tavviċina lill-​istudenta li kienet tidher li kienet l-​iktar waħda li topponi. Irène tgħidx kif issorprendiet ruħha meta t-​tfajla tatha widen u bil-​ħerqa aċċettat ir-​rivisti. Studenti oħrajn għamlu bħalha. Irène ħalliet iktar rivisti dak ix-​xahar milli kienet ħalliet fil-​ħames xhur taʼ qabel magħdudin flimkien.

Anzjan fi Trinidad qagħad jaħsibha jekk għandux javviċina lill-​madam taʼ skola biex juriha l-​valur edukattiv tar-​rivista Stenbaħ! Minkejja dan, għamel il-​qalb. Hu jgħid: “Bdejt nitlob jien u dieħel fil-​kumpless. Ma stajtx nemmen lili nnifsi kemm kienet dħulija l-​madam.” Hi aċċettat ir-​rivista Stenbaħ! fuq “X’Tama Għandhom iż-​Żgħażagħ lllum?” u saħansitra qablet li għandha tużaha meta tkun qed tgħallem fil-​klassi. Minn dakinhar ʼl hawn, hi aċċettat 40 rivista li jkopru diversi ħarġiet.

Bħala żagħżugħ, Vaughn dejjem sabha diffiċli biex jippriedka. “Kont neċċita ruħi, il-​pali taʼ idejja kienu jimtlew bl-​għaraq, u kont nitkellem ngħaġġel—ma kontx inkun nistaʼ nnaqqas il-​pass.” B’danakollu, hu sar ministru full-​time, imma xorta waħda ma kienx dejjem faċli għalih li jiftaħ fommu. Darba minnhom, wara jum skuraġġanti jfittex ix-​xogħol, ried jagħti xiehda lil xi ħadd li kien fuq il-​ferrovija, “sabiex għallinqas joħroġ xi ġid minn jum ikrah.” Imma ħassu intimidat minħabba n-​negozjanti li kienu fuq il-​ferrovija taħt l-​art u li kienu jidhru kollhom arja. Finalment, hu għamel il-​qalb biex ikellem lil raġel anzjan li kien bilqegħda ħdejh. Irriżultat konversazzjoni fit-​tul. “Għandek mistoqsijiet tajbin ferm għal żagħżugħ bħalek,” qal innegozjant. Imbagħad, staqsieh: “Int xi teologu?” Wieġeb Vaughn, “Le, jien wieħed mix-​Xhieda taʼ Jehovah.” “Ah,” tbissem ir-​raġel. “Issa qed nifhem.”

Dawn ix-​Xhieda kollha—u oħrajn bla għadd—huma henjin li għamlu l-​qalb biex jippridkaw. Int se tagħmel l-​istess?