“L-​Ewwel Irxoxt”—Qed Isir fi Żmienna!

“Il-​mejtin f’unjoni maʼ Kristu jqumu l-​ewwel.”—1 TESSALONIKIN 4:​16.

1, 2.(a) Liema tama hemm għal dawk li diġà mietu? (b) Fuq liema bażi temmen int fl-​irxoxt? (Ara n-​nota taʼ taħt.)

‘IL-​ĦAJJIN jafu li għad imutu.’ Sa minn mindu dineb Adam, dan kien tassew minnu. Matul l-​istorja, kulmin twieled kien jaf li eventwalment kien se jmut, u ħafna ħasbu: ‘X’jiġri wara? Il-​mejtin f’liema kundizzjoni jinsabu?’ Il-​Bibbja twieġeb: “Il-​mejtin ma jafu xejn.”—Koħèlet 9:5.

² Għalhekk, teżisti xi tama għal dawk li mietu? Iva. Fil-​fatt, bilfors irid ikun hemm waħda jekk l-​iskop t’Alla għall-​umanità jrid jitwettaq. Matul is-​sekli, il-​qaddejja leali t’Alla eżerċitaw fidi fil-​wegħda taʼ Ġeħova dwar Nisel li kellu jeqred lil Satana u jreġġaʼ lura l-​ħsara li għamel. (Ġenesi 3:​15) Ħafna minnhom mietu. Sabiex jaraw it-​twettiq taʼ dik il-​wegħda u wegħdi oħrajn li għamel Ġeħova, hemm bżonn li dawn iqumu mill-​mewt. (Ebrej 11:13) Hija xi ħaġa bħal din possibbli? Iva, hi possibbli. L-​appostlu Pawlu qal: “Se jkun hemm irxoxt kemm tan-​nies sewwa u kemm taʼ dawk li m’humiex sewwa.” (Atti 24:15) Pawlu darba rxoxta lil wieħed żagħżugħ jismu Ewtiku, li kien waqaʼ minn tieqa f’għoli taʼ tliet sulari u “refgħuh mejjet.” Dan huwa l-​aħħar minn disaʼ rxoxtijiet imniżżlin fil-​Bibbja.​—Atti 20:​7-​12.a

3. Liema faraġ ksibt b’mod persunali mill-​kliem taʼ Ġesù mniżżel fi Ġwanni 5:​28, 29, u għala?

³ Dawk id-​disaʼ rxoxtijiet jipprovdu bażi għal fidi fl-​istqarrija taʼ Pawlu. Dawn isaħħulna l-​fiduċja fl-​assiguranza taʼ Ġesù: “Ġejja s-​siegħa li fiha dawk kollha li qegħdin fl-​oqbra tat-​tifkira jisimgħu leħnu [leħen Ġesù] u joħorġu.” (Ġwanni 5:​28, 29) Kemm huwa kliem li jqawwilna qalbna! U kemm huwa kliem taʼ faraġ għall-​miljuni li l-​maħbubin tagħhom raqdu fil-​mewt!

4, 5. Il-​Bibbja liema rxoxtijiet differenti ssemmi, u liema minnhom se jiġu diskussi f’dan l-​artiklu?

⁴ Il-​maġġuranza minn dawk li se jiġu rxoxtati se jiġu lura f’art paċifika taħt is-​Saltna t’Alla. (Salm 37:​10, 11, 29; Isaija 11:​6-9; 35:​5, 6; 65:​21-​23) Madankollu, kellhom iseħħu rxoxtijiet oħrajn qabel jiġri dan. L-​ewwel, Ġesù Kristu kellu jiġi mqajjem mill-​mewt sabiex jippreżenta l-​valur tas-​sagrifiċċju tiegħu lil Alla għan-​nom tagħna. Ġesù miet u ġie rxoxtat fis-​sena 33 E.K.

⁵ Imbagħad, membri midlukin taʼ “l-​Iżrael t’Alla” jridu jingħaqdu mal-​Mulej Ġesù Kristu fil-​glorja tas-​sema, fejn ‘ikunu dejjem mal-​Mulej.’ (Galatin 6:​16; 1 Tessalonikin 4:​17) Dan l-​avveniment jissejjaħ ‘l-​irxoxt taʼ l-​ewwel’ jew “l-​ewwel irxoxt.” (Filippin 3:​10, 11; Rivelazzjoni 20:6) Meta dan l-​irxoxt ikun tlesta, ikun wasal iż-​żmien għal miljuni taʼ nies biex jiġu rxoxtati lura fuq l-​art bil-​prospett li jiksbu l-​ħajja taʼ dejjem fil-​Ġenna taʼ l-​art. Għaldaqstant, kemm jekk it-​tama tagħna hija waħda għas-​sema u kemm jekk għall-​art, aħna jinteressana ħafna mill-​“ewwel irxoxt.” X’tip taʼ rxoxt huwa dan? Meta jseħħ?

“B’Liema Xorta taʼ Ġisem?”

6, 7. (a) X’għandu jiġri qabel ma l-​midlukin ikunu jistgħu jmorru fis-​sema? (b) B’liema tip taʼ ġisem se jiġu rxoxtati?

⁶ Fl-​ewwel ittra tiegħu lill-​Korintin, Pawlu qajjem mistoqsija dwar l-​ewwel irxoxt: “Kif se jiġu mqajmin il-​mejtin? Iva, b’liema xorta taʼ ġisem ġejjin?” Imbagħad hu jwieġeb il-​mistoqsija: “Dak li tiżraʼ ma jingħatax il-​ħajja jekk l-​ewwel ma jmutx . . . imma Alla jagħtiha [liż-żerriegħa] ġisem skond kif jogħġbu . . . Il-​glorja taʼ l-​iġsma tas-​sema hi ħaġa, u dik taʼ l-​iġsma taʼ l-​art hi oħra.”​—1 Korintin 15:​35-​40.

⁷ Il-​kliem taʼ Pawlu juri li l-​Kristjani midlukin bl-​ispirtu qaddis iridu jmutu qabel ma jkunu jistgħu jirċievu l-​premju tagħhom fis-​sema. F’mewthom, il-​ġisem fiżiku tagħhom imur lura lejn it-​trab. (Ġenesi 3:​19) Fiż-​żmien stabbilit t’Alla, huma jiġu rxoxtati b’tip taʼ ġisem li huwa xieraq għall-​ħajja fis-​smewwiet. (1 Ġwanni 3:​2) Alla jagħtihom ukoll l-​immortalità. Din m’hijiex xi ħaġa li jitwieldu biha, bħallikieku tidħol fihom l-​hekk imsejħa ruħ immortali. “Dan il-​ġisem li jmut jilbes l-​immortalità,” jgħid Pawlu. L-​immortalità hija għotja minn Alla, li ‘jilbsu’ dawk li jkollhom sehem mill-​ewwel irxoxt.​—1 Korintin 15:​50, 53; Ġenesi 2:7; 2 Korintin 5:​1, 2, 8.

8. Kif nafu li Alla ma jagħżilx lill-​144,000 minn fost membri taʼ reliġjonijiet differenti?

⁸ Il-​144,000 biss għandhom sehem mill-​ewwel irxoxt. Ġeħova beda jagħżilhom f’Pentekoste tas-​sena 33 E.K., ftit wara li rxoxta lil Ġesù. Ilkoll għandhom “[isem Ġesù] u isem Missieru miktubin fuq ġbinhom.” (Rivelazzjoni 14:​1, 3) Għaldaqstant, dawn m’humiex magħżulin minn fost ħafna reliġjonijiet differenti. Ilkoll huma Kristjani, u lkoll kburin li jġorru isem il-​Missier​—Ġeħova. Meta jiġu rxoxtati, huma jirċievu inkarigu taʼ xogħol fis-​smewwiet. Il-​prospett li jaqdu lil Alla b’mod daqstant dirett huwa xi ħaġa verament eċċitanti għalihom.

Qed Isir fi Żmienna?

9. Rivelazzjoni 12:7 u 17:14 kif jgħinuna naraw iż-​żmien meta bejn wieħed u ieħor jibda l-​ewwel irxoxt?

⁹ L-​ewwel irxoxt meta jseħħ? Teżisti evidenza ċara li dan qed iseħħ fi żmienna. Per eżempju, qabbel żewġ kapitli mir-​Rivelazzjoni. L-​ewwel, ara Rivelazzjoni kapitlu 12. Hemmhekk naqraw li Ġesù Kristu li għadu kif ġie maħtur sultan, flimkien maʼ l-​anġli qaddisa tiegħu, jagħmel gwerra kontra Satana u d-​demonji tiegħu. (Rivelazzjoni 12:​7-9) Bħalma wriet spiss din ir-​rivista, din il-​battalja bdiet fl-​1914.b Innota, però, li ħadd mis-​segwaċi midlukin taʼ Kristu ma jintqal li qiegħed maʼ Ġesù f’dik il-​gwerra fis-​sema. Issa ara kapitlu 17 tar-​Rivelazzjoni. Hemm naqraw li wara l-​qerda taʼ “Babilonja l-​Kbira,” il-​Ħaruf se jirbaħ lill-​ġnus. Imbagħad ikompli jingħad: “Anki dawk li huma msejħin u magħżulin u leali miegħu jirbħulhom.” (Rivelazzjoni 17:​5, 14) Dawk l-​“imsejħin u magħżulin u leali” jridu jkunu diġà ġew irxoxtati jekk iridu jkunu maʼ Ġesù biex iġibu l-​qerda finali tad-​dinja taʼ Satana. Għaldaqstant, b’mod raġunevoli, l-​uħud midlukin li jmutu qabel Armageddon jiġu rxoxtati bejn l-​1914 u Armageddon.

10, 11. (a) Min huma l-​24 anzjan, u wieħed minnhom x’jurih lil Ġwanni? (b) X’nistgħu nikkonkludu minn dan?

¹⁰ Nistgħu ngħidu iktar bl-​eżatt meta jibda l-​ewwel irxoxt? F’Rivelazzjoni 7:​9-​15 insibu ħjiel interessanti fejn l-​appostlu Ġwanni jiddeskrivi l-​viżjoni tiegħu taʼ “folla kbira, li ebda bniedem ma setaʼ jgħoddha.” L-​identità taʼ din il-​folla l-​kbira tiġi rivelata lil Ġwanni minn wieħed mill-​24 anzjan, u dawn l-​anzjani jirrappreżentaw lill-​144,000 werriet bi sħab maʼ Kristu fil-​glorja tagħhom tas-​sema.c (Luqa 22:​28-​30; Rivelazzjoni 4:4) Ġwanni nnifsu kellu tama għas-​sema; imma ladarba kien għadu fuq l-​art bħala bniedem meta kellmu wieħed mill-​anzjani, fil-​viżjoni Ġwanni bilfors jirrappreżenta lil uħud midlukin fuq l-​art li għadhom ma rċivewx il-​premju tagħhom fis-​sema.

¹¹ Għalhekk, x’nistgħu nikkonkludu mill-​fatt li wieħed mill-​24 anzjan juri lil Ġwanni min hi l-​folla l-​kbira? Jidher li dawk l-​uħud irxoxtati li jagħmlu parti mill-​grupp taʼ l-​24 anzjan jistgħu jkunu involuti f’li jikkomunikaw veritajiet divini llum. Dan għala hu importanti? Għaliex l-​identità korretta tal-​folla l-​kbira ġiet rivelata lill-​qaddejja midlukin t’Alla fuq l-​art fl-​1935. Jekk wieħed mill-​24 anzjan intuża biex iwassal dik il-​verità importanti, hu kellu jkun irxoxtat fis-​sema sa mhux iktar tard mill-​1935. Dan jindika li l-​ewwel irxoxt beda f’xi żmien bejn l-​1914 u l-​1935. Nistgħu nkunu iktar preċiżi?

12. Spjega għala r-​rebbiegħa taʼ l-​1918 tistaʼ titqies bħala żmien li fih jistaʼ jkun li beda l-​ewwel irxoxt.

¹² Issa jkun t’għajnuna li nikkunsidraw dak li jistaʼ jitqies bħala parallel fil-​Bibbja. Ġesù Kristu kien midluk bħala s-​Sultan futur tas-​Saltna t’Alla fil-​ħarifa tas-​sena 29 E.K. Tliet snin u nofs wara, fir-​rebbiegħa tas-​sena 33 E.K., hu ġie rxoxtat bħala spirtu setgħan. Nistgħu allura naslu għall-​konklużjoni li ladarba Ġesù sar sultan fil-​ħarifa taʼ l-​1914, l-​irxoxt tas-​segwaċi leali tiegħu beda tliet snin u nofs wara, fir-​rebbiegħa taʼ l-​1918? Din hija possibbiltà interessanti. Għalkemm ma jistax jiġi konfermat direttament fil-​Bibbja, dan m’huwiex f’konflitt maʼ skritturi oħrajn li jindikaw li l-​ewwel irxoxt beda ftit wara li bdiet il-​preżenza taʼ Kristu.

13. L-​1 Tessalonikin 4:​15-​17 b’liema mod jissuġġerixxi li l-​ewwel irxoxt beda kmieni fil-​preżenza taʼ Kristu?

¹³ Per eżempju, Pawlu kiteb: “Aħna l-​ħajjin li nibqgħu sal-​preżenza tal-​Mulej [mhux, sa l-​aħħar tal-​preżenza tiegħu] żgur li m’aħniex se niġu qabel dawk li raqdu fil-​mewt; għax il-​Mulej stess jinżel mis-​sema b’sejħa taʼ kmand, b’leħen t’arkanġlu u bit-​trumbetta t’Alla, u l-​mejtin f’unjoni maʼ Kristu jqumu l-​ewwel. Wara dan, aħna l-​ħajjin li nkunu għadna hawnhekk nittieħdu fis-​sħab magħhom biex niltaqgħu mal-​Mulej fl-​ajru; u b’hekk inkunu dejjem mal-​Mulej.” (1 Tessalonikin 4:​15-​17) Għalhekk, il-​Kristjani midlukin li mietu qabel il-​preżenza taʼ Kristu rxoxtaw għall-​ħajja fis-​sema qabel dawk li kienu għadhom ħajjin matul il-​preżenza taʼ Kristu. Dan ifisser li l-​ewwel irxoxt kellu jibda kmieni fil-​preżenza taʼ Kristu, u jkompli “matul il-​preżenza tiegħu.” (1 Korintin 15:23) Minflok ma jsir kollu f’daqqa, l-​ewwel irxoxt isir f’perijodu taʼ żmien.

“Ngħatat Libsa Bajda lil Kull Wieħed Minnhom”

14. (a) Il-​viżjonijiet imniżżlin f’Rivelazzjoni kapitlu 6 meta twettqu? (b) Xi stampa tingħata f’Rivelazzjoni 6:​9?

¹⁴ Ikkunsidra wkoll l-​evidenza misjuba f’Rivelazzjoni kapitlu 6. Hemmhekk Ġesù jidher riekeb bħala Sultan rebbieħ. (Rivelazzjoni 6:2) Il-​ġnus jinsabu f’battalja kbira immens. (Rivelazzjoni 6:4) Hemm ġuħ maʼ kullimkien. (Rivelazzjoni 6:​5, 6) Mard qattiel ħarbat lill-​umanità kollha. (Rivelazzjoni 6:8) Dawn il-​ġrajjiet profetizzati kollha jaqblu mal-​kundizzjonijiet tad-​dinja sa mill-​1914. Imma tiġri xi ħaġa oħra. L-​attenzjoni tagħna tinġibed lejn artal tas-​sagrifiċċji. Taħt l-​artal kien hemm “l-​erwieħ taʼ dawk li nqatlu minħabba l-​kelma t’Alla u minħabba x-​xogħol taʼ xiehda li kellhom.” (Rivelazzjoni 6:9) Ladarba “ħajjet [jew, ruħ] il-​laħam hi fid-​demm,” dak li huwa rappreżentat li qiegħed taħt l-​artal huwa d-​demm tal-​qaddejja leali taʼ Ġesù li nqatlu minħabba l-​ippridkar kuraġġuż u żeluż tagħhom.​—Levitiku 17:11.

15, 16. Spjega għala l-​kliem f’Rivelazzjoni 6:​10, 11 jirreferi għall-​ewwel irxoxt.

¹⁵ Bħad-​demm tar-​raġel sewwa Abel, id-​demm taʼ dawn il-​Kristjani martri qed jgħajjat għall-​ġustizzja. (Ġenesi 4:​10) “Għajtu b’leħen għoli u qalu: ‘Mulej Sovran qaddis u veru, kemm se ddum ma tiġġudika lil dawk li jgħammru fuq l-​art u titħallas taʼ demmna?’” X’jiġri wara? “Ngħatat libsa bajda lil kull wieħed minnhom; u ntqalilhom biex jistrieħu għal ftit ieħor, sakemm ikun imtela wkoll l-​għadd taʼ l-​ilsiera sħabhom u ħuthom li kienu se jinqatlu dalwaqt bħalma kienu nqatlu huma wkoll.”​—Rivelazzjoni 6:​10, 11.

¹⁶ Allura dawn l-​ilbiesi bojod ngħataw lill-​għadajjar tad-​demm li kienu taħt l-​artal? Dażgur li le! L-​ilbiesi ngħataw lill-​individwi li kellhom demmhom imxerred, b’mod figurattiv, fuq l-​artal. Huma ssagrifikaw ħajjithom f’isem Ġesù u issa ġew irxoxtati bħala spirti. Kif nafuh dan? Iktar kmieni fil-​ktieb tar-​Rivelazzjoni, naqraw: “Min jirbaħ ikun imżejjen bi ħwejjeġ bojod; u żgur ma nħassarlux ismu mill-​ktieb tal-​ħajja.” Ftakar ukoll li l-​24 anzjan kienu “lebsin ħwejjeġ bojod, u fuq rashom kellhom kuruni tad-​deheb.” (Rivelazzjoni 3:5; 4:4) Għalhekk, wara li l-​gwerra, il-​ġuħ, u l-​mard bdew iħarbtu d-​dinja, il-​membri tal-​144,000 li kienu mejtin, rappreżentati mid-​demm taħt l-​artal, ġew imqajmin għall-​ħajja fis-​sema, imlibbsin bi lbiesi bojod simboliċi.

17. Dawk li jirċievu l-​ilbiesi bojod f’liema sens se “jistrieħu”?

¹⁷ Dawk li jkunu għadhom kemm irxoxtaw iridu “jistrieħu.” Huma jridu jistennew bil-​paċenzja għall-​jum tal-​vendetta t’Alla. L-​“ilsiera sħabhom,” il-​Kristjani midlukin li għadhom fuq l-​art, għad iridu jagħtu prova taʼ l-​integrità tagħhom meta jiġu mġarrbin. Meta jasal iż-​żmien għall-​ġudizzju minn Alla, il-​‘mistrieħ’ ikun spiċċa. (Rivelazzjoni 7:3) Dak iż-​żmien, dawk l-​uħud irxoxtati se jieħdu sehem mal-​Mulej Ġesù Kristu biex iġibu qerda fuq in-​nies mill-​agħar, fosthom dawk li xerrdu d-​demm taʼ Kristjani innoċenti.​—2 Tessalonikin 1:​7-​10.

Xi Jfisser Għalina

18, 19. (a) Għal liema raġunijiet tistaʼ tikkonkludi li l-​ewwel irxoxt qed iseħħ fi żmienna? (b) Kif tħossok minħabba l-​fehma tiegħek dwar l-​ewwel irxoxt?

¹⁸ Il-​Kelma t’Alla ma tagħtix data preċiża għall-​ewwel irxoxt, imma din tirrivela li dan jiġri f’perijodu taʼ żmien, matul il-​preżenza taʼ Kristu. L-​ewwel li jiġu rxoxtati huma l-​Kristjani midlukin li mietu qabel ma bdiet il-​preżenza taʼ Kristu. Hekk kif il-​preżenza taʼ Kristu tkompli għaddejja, il-​Kristjani midlukin li jtemmu l-​ħajja tagħhom fuq l-​art lealment jinbidlu “f’ħakka t’għajn” fi ħlejjaq spirti setgħanin. (1 Korintin 15:52) Il-​midlukin kollha kemm huma se jirċievu l-​premju tagħhom tas-​sema qabel il-​gwerra t’Armageddon? Ma nafux. Madankollu, li nafu huwa li fi żmien magħżul minn Alla, il-​144,000 kollha se jkunu bil-​wieqfa fuq il-​Muntanja Sijon tas-​sema.

¹⁹ Nafu wkoll li l-​maġġuranza mill-​144,000 diġà jinsabu magħqudin maʼ Kristu. Relattivament ftit fadal hawn fuq l-​art. Kemm hi indikazzjoni qawwija li ż-​żmien għall-​esekuzzjoni tal-​ġudizzju t’Alla qed joqrob bil-​ħeffa! Dalwaqt, is-​sistema dinjija taʼ Satana kollha kemm hi se tkun meqruda. Satana nnifsu se jintefaʼ f’abbiss. Imbagħad ikun jistaʼ jinbeda l-​irxoxt ġenerali, u l-​bnedmin leali, fuq il-​bażi tas-​sagrifiċċju bħala fidwa taʼ Ġesù, ikunu jistgħu jilħqu l-​perfezzjoni bħal dik li tilef Adam. Il-​profezija taʼ Ġeħova mniżżla f’Ġenesi 3:​15 qed titwettaq b’mod taʼ l-​għaġeb. Xi privileġġ mill-​aqwa huwa li qed ngħixu f’dawn iż-​żminijiet!

[Noti taʼ taħt]

Tistaʼ Tispjega?

L-​iskritturi li ġejjin kif jgħinuna nagħrfu ż-​żmien taʼ “l-​ewwel irxoxt”?

• Rivelazzjoni 12:7; 17:14

• Rivelazzjoni 7:​13, 14

• 1 Korintin 15:23; 1 Tessalonikin 4:​15-​17

• Rivelazzjoni 6:​2, 9-11

[Stampi f’paġna 26]

Liema tipi taʼ rxoxtijiet iseħħu qabel l-​umanità in ġenerali tqum mill-​mewt?

[Stampa f’paġna 29]

B’liema mod tingħata libsa bajda lil xi wħud li kienu reqdin fil-​mewt?