Iż-​Żgħażagħ Jistaqsu . . .

Kif Nistaʼ Nagħmilha Parti Minni l-​Verità?

“Trabbejt bħala Xhud taʼ Jehovah, u dejjem ħassejt li jekk titrabba b’dan il-​mod, attwalment tkun taf lil Jehovah. Kemm kont sejra żmerċ!”​—Antoinette.

‘IL-​VERITÀ x’inhi?’ Ponzju Pilatu, ir-​raġel li ta lil Ġesù għall-​esekuzzjoni, qajjem din il-​mistoqsija famuża. (Ġwann 18:38) Madankollu, b’mod evidenti l-​intenzjoni taʼ Pilatu kienet li b’din il-​mistoqsija ċinika, jagħlaq​—mhux jiftaħ—​djalogu onest. Hu ma kienx interessat tassew fil-​“verità.” Imma xi ngħidu għalik? Interessat int fil-​verità?

Għal sekli sħaħ il-​filosfi qagħdu jħabblu rashom dwar x’inhi l-​verità, imma l-​ħaġa taʼ mistħija hi, li l-​isforzi tagħhom ma tantx ġabu riżultati. Madankollu, int tistaʼ ssibha t-​tweġiba għall-​mistoqsija taʼ Pilatu. Ġesù Kristu għallem li l-​Kelma t’Alla hi verità. Tkellem ukoll dwaru nnifsu bħala “l-​Verità.” U l-​appostlu Ġwanni kiteb: ‘Il-​verità seħħet permezz taʼ Ġesù.’ (Ġwann 1:17; 14:6; 17:17) Għalhekk, il-​ġabra kollha kemm hi tat-​tagħlim Kristjan, li iktar tard saret parti mill-​Bibbja, hija msejħa wkoll “il-​verità” jew “il-​verità taʼ l-​Evanġelju.” (Titu 1:14; Galatin 2:14; 2 Ġwann 1, 2) Dan it-​tagħlim Kristjan jinkludi affarijiet bħalma huma l-​isem persunali t’Alla, il-​fatt li s-​Saltna t’Alla ġiet stabbilita, l-​irxoxt, u r-​rahan taʼ Ġesù.​—Salm 83:19 [Salm 83:​18, NW]; Mattew 6:​9, 10; 20:28; Ġwann 5:​28, 29.

Eluf taʼ żgħażagħ ġew mgħallmin il-​verità tal-​Bibbja minn ġenituri Kristjani. Imma jfisser dan li wħud bħal dawn huma “mexjin fil-​verità”? (3 Ġwann 3, 4) Mhux bilfors. Per eżempju Jennifer, li għandha 20 sena, trabbiet bħala waħda mix-​Xhieda taʼ Jehovah. Hi tiftakar: “Ommi kienet tiħodni għall-​konvenzjonijiet tax-​Xhieda u kienet tissuġġerili li suppost qed naħseb dwar il-​magħmudija. Imma kont naħseb bejni u bejn ruħi, ‘Jien qatt ma rrid insir Xhud. Irrid biss niddeverti!’”

Xi żgħażagħ jemmnuh dak li ġew mgħallmin, imma jkunu naqsu li jiżviluppaw fehma profonda taʼ dak li l-​Bibbja tgħallem tassew. X’periklu hemm? Ġesù wissa li xi individwi ‘m’għandhomx għeruq.’ Uħud bħal dawn “ftit idumu; meta mbagħad jiġi fuqhom l-​għawġ, jew isibu min iħabbathom minħabba l-​kelma, malajr jitfixklu.” (Mark 4:17) Oħrajn jistgħu jispjegawh it-​twemmin tagħhom ibbażat fuq il-​Bibbja sa ċertu punt, imma ma sarux jafu lil Alla fuq bażi persunali. Waħda żagħżugħa jisimha Aneesa tgħid: “Ma naħsibx li kelli relazzjoni vera maʼ Jehovah meta kont iżgħar . . . Naħseb kienet iktar tiddependi fuq ir-​relazzjoni tal-​ġenituri tiegħi miegħu.”

X’inhi s-​sitwazzjoni tiegħek f’dan ir-​rigward? Huwa Jehovah sempliċement dak Alla tal-​ġenituri tiegħek? Jew, tistaʼ tgħid bħalma jgħid is-​salmista tal-​Bibbja: “Jien fik nittama, Mulej; jien ngħidlek: ‘Alla tiegħi int!’”? (Salm 31:15 [31:​14, NW]) Jistaʼ jirrikjedi l-​kuraġġ biex tiffaċċja r-​realtà. Wieħed żagħżugħ jismu Alexander jgħid: “Għalija, l-​ewwel pass kien li neżamina lili nnifsi bl-​onestà kollha.” Wara li tkun eżaminajt lilek innifsek, tistaʼ tasal biex tirrealizza li qatt ma tajt verament prova għalik innifsek li din hi l-​verità (il-ġabra kollha kemm hi tat-​tagħlim Kristjan). Jistaʼ jkun li int nieqes mill-​konvinzjoni soda, u allura l-​ħajja tiegħek tistaʼ tidher bla skop, mingħajr direzzjoni vera.

Fil-laqgħat Kristjani tagħhom, ix-​Xhieda taʼ Jehovah spiss ikantaw għanja li jisimha “Għożż il-​Verità.”a Dan il-​parir jistaʼ jgħodd għalik. Imma kif tistaʼ tagħmel dan? Minfejn se tibda?

Agħti Prova Lilek Innifsek

F’Rumani 12:​2, insibu l-​parir taʼ l-​appostlu Pawlu: ‘Agħrfu x’inhi r-​rieda t’Alla, x’inhu t-​tajjeb li jogħġbu, x’inhu perfett.’ Kif tistaʼ tagħmlu dan? Billi tikseb it-​“tagħrif tal-​verità.” (Titu 1:1) Dawk li fil-​qedem kienu jgħixu fil-​belt taʼ Berija m’aċċettawx l-​affarijiet li semgħu qabel ma staqsew xi mistoqsijiet. Għall-​kuntrarju, kienu “kuljum . . . iqallbu l-​Iskrittura biex jaraw jekk dak li semgħu kienx minnu.”​—Atti 17:11.

Żagħżugħa Kristjana jisimha Erin ħasset il-​ħtieġa li tagħmel l-​istess. Hi tiftakar: “Kont nagħmel ir-​riċerki. Kont nistaqsi lili nnifsi, ‘Kif naf li din hija r-​reliġjon vera? Kif naf li hemm Alla li jismu Jehovah?’” Għala ma tibdiex il-​programm tiegħek stess taʼ studju persunali? Tistaʼ tibda bil-​ktieb ibbażat fuq il-​Bibbja Għarfien Li Jwassal Għall-​Ħajja Taʼ Dejjem.b Aqrah bir-​reqqa. Fittex l-​iskritturi ċċitati kollha u innota kif dawn huma marbutin maʼ dak li jkun hemm miktub. Għandek mnejn tibqaʼ skantat li tiskopri kemm se tħossok differenti dwar il-​verità meta ssir “ħaddiem li m’għandux mniex jistħi, li jxandar bir-​reqqa l-​kelma tal-​verità.”​—2 Timotju 2:15.

L-​appostlu Pietru qal li xi affarijiet fil-​Bibbja huma “tqal biex wieħed jifhimhom,” u se ssib li dan huwa minnu. (2 Pietru 3:16) Imma l-​ispirtu t’Alla jistaʼ jgħinek tifhem is-​suġġetti tqal ukoll. (1 Korintin 2:​11, 12) Meta ssibha diffiċli biex tifhem xi ħaġa, itlob għall-​għajnuna t’Alla. (Salm 119:​10, 11, 27) Ipprova agħmel iżjed riċerka fil-​pubblikazzjonijiet tas-​Soċjetà (Watch Tower). Jekk m’intix ċert kif tagħmlu dan, itlob l-​għajnuna. Il-​ġenituri tiegħek jew forsi xi membri maturi oħrajn tal-​kongregazzjoni Kristjana jistgħu jgħinuk.

Tinsiex, m’intix qed tistudja biex timpressjona lil ħaddieħor bil-​għarfien tiegħek. Żagħżugħ jismu Collin jispjega: “Tibda ssir taf il-​kwalitajiet taʼ Jehovah.” Ħu l-​ħin biex timmedita fuq dak li taqra sabiex tħallih jinżel fil-​fond taʼ qalbek.​—Salm 1:​2, 3.

Is-sħubija mal-​kongregazzjoni fil-​laqgħat Kristjani tistaʼ tgħinek ukoll. Wara kollox, bħalma kiteb l-​appostlu Pawlu, il-​kongregazzjoni hija “kolonna u pedament tal-​verità.” (1 Timotju 3:15) Xi żgħażagħ igergru li l-​laqgħat Kristjani jraqqduk. “Imma jekk m’intix tipprepara għal-​laqgħat,” ifakkarna ż-​żagħżugħ Collin, “allura mhux se tibbenefika wisq minnhom.” Mela ipprepara l-​lezzjonijiet tiegħek minn qabel. Il-​laqgħat ikunu bil-​wisq iktar interessanti meta int tkun parteċipant​—mhux sempliċement spettatur.

Imħabbat Wisq biex Tistudja?

Ngħiduha kif inhi, bix-​xogħol kollu tiegħek taʼ l-​iskola u bil-​faċendi tad-​dar, tistaʼ tkun taʼ sfida biex issib ħin għall-​istudju. Persuna żagħżugħa jisimha Susan tikteb: “Għal snin sħaħ issarajt mal-​fatt li kont naf li kien hemm bżonn li nipprepara għal-​laqgħat u nagħmel studju persunali, imma qatt ma rnexxieli.”

Susan tgħallmet ‘tixtri l-​ħin’ minn attivitajiet inqas importanti. (Efesin 5:​15, 16, NW) L-​ewwel, għamlet lista taʼ l-​affarijiet kollha li kellha bżonn tistudja. Imbagħad, għamlet skeda tal-​ħin biex tistudjahom. Imma fl-​iskeda tagħha inkludiet ukoll ftit ħin għar-​rikreazzjoni. Hi tagħti l-​parir: “Tagħmilx skeda għal kull ħin liberu li jkollok. Ilkoll neħtieġu ftit mistrieħ.” Skeda x’aktarx li se tkun effettiva għalik ukoll.

Aqsam maʼ Ħaddieħor Dak li Titgħallem

L-​iktar li se jgħinek biex dak li titgħallem tagħmlu parti minnek huwa li tużah. Ipprova għallem lil ħaddieħor. Is-​salmista qal: “Fommi jitkellem l-​għerf, u nxandar il-​fehmiet taʼ qalbi.”​—Salm 49:4 [49:​3, NW].

Jekk l-​aħbar tajba ma ġġagħlekx tistħi, mhux se taħsibha darbtejn biex taqsamha maʼ sħabek taʼ l-​iskola u m’oħrajn li tistaʼ tħabbat wiċċek magħhom. (Rumani 1:16) Billi tieħu vantaġġ minn opportunitajiet bħal dawn biex titkellem dwar il-​verità m’oħrajn, se tkun qed tuża dak li titgħallem; u b’dan il-​mod tkun qed tnaqqax il-​verità f’moħħok u f’qalbek stess.

Oqgħod Attent maʼ Min Tagħmilha

Xi Kristjani fl-​ewwel seklu għamlu progress spiritwali tajjeb. Imma l-​appostlu Pawlu malajr kellu jiktbilhom, u saqsiehom: “Min fixkilkom li ma toqogħdux għas-​sewwa?” (Galatin 5:7) Ġuvnott jismu Alex ġratlu xi ħaġa simili. Hu jammetti li l-​isforzi tiegħu biex jistudja l-​Kelma t’Alla ddgħajfu minħabba li kien “iqattaʼ l-​ħin maʼ sħubijiet ħżiena.” Biex timxi ’l quddiem spiritwalment, għandu mnejn ikollok bżonn ukoll tagħmel xi bidliet f’dan ir-​rigward.

Mill-banda l-​oħra, sħubijiet tajbin jistgħu tassew jgħinuk timxi ’l quddiem. Proverbji 27:17 jgħid: “Kif il-​ħadid isinn il-​ħadid, hekk bniedem jirfina lil sieħbu.” Sib eżempji tajbin​—nies li japplikaw il-​verità f’ħajjithom stess. Forsi m’għandekx għalfejn tħares lil hinn mill-​familja tiegħek. Iż-​żagħżugħa Jennifer tiftakar: “In-​nannu kien l-​aqwa eżempju għalija. Dejjem kien iqattaʼ tliet sigħat jipprepara għall-​istudju tagħna tal-​Bibbja tal-​kongregazzjoni nhar taʼ Ħadd. Kien ifittex kull skrittura fil-​lezzjoni f’diversi traduzzjonijiet tal-​Bibbja u kien jiċċekkja l-​kliem fid-​dizzjunarju tiegħu. Kien espert fuq fatti mill-​Bibbja li ftit li xejn kienu magħrufin. Stajt issaqsih kulma ridt, u kien jagħtik it-​tweġiba.”

Meta l-​verità tagħmilha parti minnek, tkun qed tikseb xi ħaġa prezzjuża​—xi ħaġa li m’inti se ċċediha għall-​ebda prezz. Mela, qatt tqis il-​verità sempliċement bħala “r-​reliġjon tal-​ġenituri tiegħi.” Il-​konvinzjoni tiegħek għandha tkun bħal dik tas-​salmista li qal: “Għalkemm telquni missieri u ommi, il-​Mulej jilqagħni għandu.” (Salm 27:10) Billi tkun taf eżatt dak li tgħallem il-​Bibbja, temmnu, taqsam it-​twemmin tiegħek m’oħrajn u, fuq kollox, timxi fi qbil maʼ dan it-​twemmin, se turi li int għamilt il-​verità parti minnek innifsek.

[Noti taʼ taħt]

[Stampa f’paġna 13]

Agħti prova lilek innifsek li din hi l-​verità billi tagħmel ir-​riċerka u l-​istudju persunali tiegħek stess