Oqgħod fil-​“Belt tar-​Refuġju” u Għix!

“[Hu] għandu jibqaʼ fil-​belt tal-​kenn [“tar-​refuġju,” KŻ] sal-​mewt tal-​qassis il-​kbir.”—NUMRI 35:28.

1. Min hu l-​Vendikatur tad-​demm, u liema azzjoni se jieħu dalwaqt?

IL-​VENDIKATUR tad-​demm taʼ Jehovah, Ġesù Kristu, wasal biex jaġixxi. Mal-​forzi anġeliċi tiegħu, dan il-​Vendikatur dalwaqt se jieħu azzjoni kontra dawk kollha li m’humiex niedma minn ħtija taʼ demm. Iva, Ġesù se jaqdi bħala l-​Esekutur t’Alla matul id-​“diqa kbira” li riesqa bil-​għaġla. (Mattew 24:21, 22; Isaija 26:21) L-​umanità mbagħad se tinġieb wiċċ imb’wiċċ mal-​ħtija taʼ demm tagħhom.

2. Liema huwa l-​uniku veru post taʼ refuġju, u liema mistoqsijiet jirrikjedu tweġibiet?

² Il-​mogħdija lejn is-​salvezza hija li taqbad it-​triq li tagħti għall-​belt taʼ refuġju antitipika u tiġri għal ħajtek! Jekk jiddaħħal fil-​belt, refuġjat ikollu jibqaʼ hemmhekk, għaliex huwa l-​uniku veru post taʼ refuġju. Imma forsi tistaqsi, ‘Ladarba l-​biċċa l-​kbira minna qatt ma qtilna lil ħadd, aħna tassew ħatjin taʼ demm? Ġesù għala hu l-​Vendikatur tad-​demm? X’inhi l-​belt taʼ refuġju taż-​żmien modern? Jistaʼ xi ħadd qatt jitlaq minnha mingħajr periklu?’

Tassew Ħatjin Aħna Taʼ Demm?

3. Liema fattur tal-​Liġi Mosajka se jgħinna naraw li l-​biljuni taʼ l-​art għandhom sehem fi ħtija taʼ demm?

³ Aspett tal-​Liġi Mosajka se jgħinna naraw li l-​biljuni taʼ l-​art għandhom sehem fi ħtija taʼ demm. Alla poġġa fuq l-​Iżraeliti responsabbiltà msieħba għal tixrid taʼ demm. Jekk xi ħadd kien jinstab maqtul u l-​qattiel tiegħu ma kienx magħruf, imħallfin kellhom ikejlu d-​distanza lejn l-​ibliet taʼ madwar biex jiddeterminaw l-​eqreb belt. Biex ineħħu l-​ħtija, l-​anzjani taʼ dik il-​belt li kienet apparentement ħatja taʼ demm kellhom jiksru l-​għonq taʼ baqra żgħira, mhix imħaddma f’wied mhux ikkultivat taʼ ilma ġieri. Dan kien isir quddiem qassisin Leviti ‘għax lilhom għażel il-​Mulej biex fuq kelmthom tinqataʼ kull tilwima u kull ħabta.’ L-​anzjani tal-​belt kienu jaħslu jdejhom fuq il-​baqra u jgħidu: “Idejna ma xerrdux dan id-​demm, u għajnejna ma raw xejn. Aħfer Mulej lill-​poplu tiegħek Israel, li int fdejt, u tħallix il-​ħtija taʼ demm innoċenti f’nofs il-​poplu tiegħek Israel.” (Dewteronomju 21:1-9) Alla Jehovah ma riedx li l-​pajjiż taʼ Iżrael ikun imniġġes bid-​demm jew li l-​poplu tiegħu jġorru ħtija taʼ demm imsieħba.

4. Babilonja l-​Kbira għandha liema rekord taʼ ħtija taʼ demm?

⁴ Iva, hemm dik li tissejjaħ ħtija taʼ demm imsieħba, jew tal-​komunità. Ikkunsidra l-​ħtija taʼ demm immensa li għandha fuqha Babilonja l-​Kbira, l-​imperu dinji taʼ reliġjon falza. Iva, hija fis-​sakra bid-​demm tal-​qaddejja taʼ Jehovah! (Apokalissi 17:5, 6; 18:24) Ir-​reliġjonijiet tal-​Kristjaneżmu jsostnu li qegħdin isegwu lill-​Prinċep tal-​Paċi, imma gwerer, inkwiżizzjonijiet reliġjużi, u kruċjati qattelin għamluha ħatja taʼ demm quddiem Alla. (Isaija 9:5 [Isaija 9:6, NW]; Ġeremija 2:34) Fil-​fatt, din trid iġġorr ħtija ewlenija għall-​imwiet taʼ miljuni fiż-​żewġ gwerer dinjin taʼ dan is-​seklu. Għalhekk, dawk li jħaddnu r-​reliġjon falza kif ukoll dawk li jappoġġjaw u jipparteċipaw fi gwerer umani huma ħatjin taʼ demm quddiem Alla.

5. Xi nies kif kienu bħall-​qattiel involontarju f’Iżrael?

⁵ Xi nies ikkaġunaw mewt umana volontarjament jew minħabba traskuraġni. Oħrajn ħadu sehem fi qtil kollettiv, forsi pperswaduti minn mexxejja reliġjużi li din kienet ir-​rieda t’Alla. Jerġaʼ oħrajn ippersegwitaw u qatlu lil qaddejja t’Alla. Saħansitra jekk aħna m’għamilniex affarijiet bħal dawn, iżda, għandna sehem f’responsabbiltà tal-​komunità għat-​telfa taʼ ħajja umana għaliex ma konniex nafu l-​liġi u r-​rieda t’Alla. Aħna bħall-​qattiel involontarju ‘li qatel lil għajru bla ma kien jaf u bla ma kien jobogħdu qabel.’ (Dewteronomju 19:4) Individwi bħal dawn imisshom jissupplikaw lil Alla għall-​ħniena u għandhom jiġru għal ġol-​belt taʼ refuġju antitipika. Altrimenti se jkollhom laqgħa fatali mal-​Vendikatur tad-​demm.

L-​Irwoli Vitali Taʼ Ġesù

6. Għala jistaʼ jingħad li Ġesù hu l-​qarib l-​iktar viċin taʼ l-​umanità?

⁶ F’Iżrael il-​vendikatur tad-​demm kien il-​qarib l-​iktar viċin tal-​vittma. Biex jivvendika lil dawk kollha maqtulin fuq l-​art u speċjalment il-​qaddejja maqtulin taʼ Jehovah, il-​Vendikatur tad-​demm taż-​żmien preżenti jrid ikun qarib taʼ l-​umanità kollha. Dak l-​irwol ġie mwettaq minn Ġesù Kristu. Hu twieled raġel perfett. Ġesù ċeda l-​ħajja tiegħu taʼ bla dnub fil-​mewt bħala sagrifiċċju taʼ rahan, u wara l-​irxoxt tiegħu lejn is-​sema, ippreżenta l-​valur tiegħu lil Alla għan-​nom tad-​dixxendenti moribondi tal-​midneb Adam. Kristu b’hekk sar ir-​Redentur taʼ l-​umanità, il-​qarib l-​iktar viċin tagħna​—il-​Vendikatur tad-​demm bi dritt. (Rumani 5:12; 6:23; Lhud 10:12) Ġesù hu identifikat bħala ħu s-​segwaċi midlukin tal-​passi tiegħu. (Mattew 25:40, 45; Lhud 2:11-17) Bħala Sultan tas-​sema hu jsir il-​“Missier għal dejjem” taʼ dawk li se jibbenefikaw mis-​sagrifiċċju tiegħu bħala s-​sudditi tiegħu fuq l-​art. Dawn se jgħixu għal dejjem. (Isaija 9:5, 6 [Isaija 9:6, 7, NW]) Mela Jehovah b’mod xieraq ħatar lil dan il-​Qarib taʼ l-​umanità bħala l-​Vendikatur tad-​demm.

7. Bħala l-​aqwa Qassis il-​Kbir, Ġesù x’jagħmel għall-​bnedmin?

⁷ Ġesù hu wkoll Qassis il-​Kbir bla dnub, ittestjat, u simpatetiku. (Lhud 4:15) F’dik il-​pożizzjoni hu japplika l-​mertu tas-​sagrifiċċju tiegħu li jpatti għad-​dnubiet għall-​umanità. Il-​bliet taʼ refuġju kienu mibnijin ‘għal ulied Israel u għall-​barrani li kien jgħix f’nofshom.’ (Numri 35:15) Mela l-​aqwa Qassis il-​Kbir l-​ewwel applika l-​mertu tas-​sagrifiċċju tiegħu għas-​segwaċi midlukin tiegħu, “ulied Israel.” Issa dan qiegħed jiġi applikat għar-​‘residenti barranin’ u ‘immigranti’ fil-​belt taʼ refuġju antitipika. Dawn in-​“ngħaġ oħra” tal-​Mulej Ġesù Kristu jittamaw li jgħixu għal dejjem fuq l-​art.—Ġwann 10:16; Salm 37:29, 34.

Il-​Belt Taʼ Refuġju Tal-​Lum

8. Liema hija l-​belt taʼ refuġju antitipika?

⁸ X’inhi l-​belt taʼ refuġju antitipika? M’hijiex xi post ġeografiku bħal Ħebron, waħda mis-​sitt ibliet taʼ refuġju Levitiċi u d-​dar tal-​qassis il-​kbir taʼ Iżrael. Il-​belt taʼ refuġju tal-​lum hija l-​provvediment t’Alla biex jipproteġina mill-​mewt talli ksirna l-​kmandament tiegħu dwar is-​santità tad-​demm. (Ġenesi 9:6) Kemm jekk volontarjament u kemm jekk involontarjament, kulmin jikser dak il-​kmand irid ifittex il-​maħfra t’Alla u l-​ikkanċellar taʼ dnubu permezz taʼ fidi fid-​demm tal-​Qassis il-​Kbir, Ġesù Kristu. Kristjani midlukin b’tamiet għas-​sema u l-​“kotra kbira” bi prospetti għall-​art approfittaw erwieħhom mill-​benefiċċji tas-​sagrifiċċju taʼ Ġesù li jpatti għad-​dnubiet u qegħdin fil-​belt taʼ refuġju antitipika.—Apokalissi 7:​9, 14; 1 Ġwann 1:7; 2:1, 2.

9. Sawlu taʼ Tarsu kif kiser il-​kmandament t’Alla dwar id-​demm, u kif wera bidla t’attitudni?

⁹ Qabel sar Kristjan, l-​appostlu Pawlu kien kiser il-​kmandament dwar id-​demm. Bħala Sawlu taʼ Tarsu, ppersegwita lis-​segwaċi taʼ Ġesù u saħansitra approva l-​qtil tagħhom. “Iżda,” qal Pawlu, “sibt il-​ħniena, għax dak li għamilt għamiltu bla ma kont naf, billi kont għadni bla fidi.” (1 Timotju 1:13; Atti 9:1-19) Sawlu kellu attitudni niedma, li iktar tard ta prova tagħha b’ħafna xogħlijiet taʼ fidi. Imma iżjed minn fidi fir-​rahan hija meħtieġa sabiex nidħlu fil-​belt taʼ refuġju antitipika.

10. Kif inhu possibbli li tikseb kuxjenza tajba, u x’irid isir biex iżżommha?

¹⁰ Qattiel involontarju setaʼ joqgħod f’waħda mill-​ibliet taʼ refuġju taʼ Iżrael biss jekk hu setaʼ jagħti prova li kellu kuxjenza tajba lejn Alla rigward tixrid taʼ demm. Biex niksbu kuxjenza tajba, irridu neżerċitaw fidi fis-​sagrifiċċju taʼ Ġesù, nindmu minn dnubietna, u nbiddlu l-​korsa tagħna. Għandna bżonn nitolbu għal kuxjenza tajba f’dedikazzjoni bit-​talb lil Alla permezz taʼ Kristu, billi nissimbolizzaw din bil-​magħmudija taʼ l-​ilma. (1 Pietru 3:20, 21) Din il-​kuxjenza tajba tippermettilna li niksbu relazzjoni nadifa maʼ Jehovah. L-​uniku mod biex inżommu kuxjenza tajba huwa billi nissodisfaw il-​ħtiġijiet t’Alla u nwettqu x-​xogħol assenjat lilna fil-​belt taʼ refuġju antitipika, saħansitra bħalma refuġjati fl-​ibliet taʼ refuġju tal-​qedem kellhom jobdu l-​Liġi u jwettqu x-​xogħol assenjat lilhom. Ix-​xogħol prinċipali għan-​nies taʼ Jehovah illum huwa dak li jiddikjaraw il-​messaġġ tas-​Saltna. (Mattew 24:14; 28:19, 20) Li nagħmlu dak ix-​xogħol se jgħinna biex inkunu residenti utli tal-​belt taʼ refuġju taż-​żmien preżenti.

11. X’irid jiġi evitat jekk irridu nibqgħu salvi ġol-​belt taʼ refuġju tal-​lum?

¹¹ Li nitilqu mill-​belt taʼ refuġju jfisser li nkunu qegħdin nesponu lilna nfusna għall-​qerda, għax il-​Vendikatur tad-​demm dalwaqt se jieħu azzjoni kontra dawk kollha li huma ħatjin taʼ demm. Dan m’huwiex żmien li tinqabad barra minn din il-​belt protettiva jew f’xi naħa perikoluża ħdejn ix-​xifer taʼ barra tal-​mergħat tagħha. Nispiċċaw ’il barra mill-​belt taʼ refuġju antitipika li kieku kellna nitilfu l-​fidi fis-​sagrifiċċju tal-​Qassis il-​Kbir li jpatti għad-​dnub. (Lhud 2:1; 6:4-6) Aħna wkoll ma nkunux fiż-​żgur li kieku kellna nadottaw mogħdijiet dinjin, noqogħdu fit-​truf taʼ l-​organizzazzjoni taʼ Jehovah, jew niżvijaw mil-​livelli taʼ tjieba taʼ Missierna tas-​sema.—1 Korintin 4:4.

Meħlusin Mill-​Belt Taʼ Refuġju

12. Uħud li qabel kienu ħatjin taʼ demm kemm iridu jdumu joqogħdu fil-​belt taʼ refuġju antitipika?

¹² Qattiel involontarju f’Iżrael kellu jibqaʼ f’belt taʼ refuġju “sal-​mewt tal-​qassis il-​kbir.” (Numri 35:28) Mela wħud li qabel kienu ħatjin taʼ demm kemm iridu jdumu joqogħdu fil-​belt taʼ refuġju antitipika? Sakemm ma jkollhomx bżonn iżjed tas-​servizzi tal-​Qassis il-​Kbir, Ġesù Kristu. “Huwa jistaʼ jsalva għal kollox ’il dawk li bih jersqu lejn Alla,” qal Pawlu. (Lhud 7:25) Dment li jibqaʼ jkun hemm xi tbajja taʼ dnub u ħtija taʼ demm taʼ qabel, is-​servizzi tal-​Qassis il-​Kbir huma meħtiġin sabiex bnedmin imperfetti jistgħu jkollhom waqfa xierqa m’Alla.

13. Min huma “ulied Israel” taż-​żmien preżenti, u kemm iridu jdumu joqogħdu fil-​“belt tal-​kenn”?

¹³ Ftakar li l-​ibliet taʼ refuġju tal-​qedem kienu ġew stabbiliti għal “ulied Israel,” ir-​residenti barranin, u l-​immigranti. “Ulied Israel” huma Iżraeliti spiritwali. (Galatin 6:16) Huma jridu joqogħdu fil-​belt taʼ refuġju antitipika sakemm idumu jgħixu fuq l-​art. Għala? Għaliex għadhom fil-​laħam imperfett u għalhekk għandhom bżonn il-​mertu taʼ tpattija tal-​Qassis il-​Kbir tagħhom tas-​sema. Imma meta dawn il-​Kristjani midlukin imutu u jiġu rxoxtati għal ħajja spirtu fis-​sema, ma jkollhomx bżonn iżjed is-​servizzi taʼ tpattija tal-​Qassis il-​Kbir; ikunu ħallew għal dejjem il-​laħam u l-​ħtija taʼ demm marbuta miegħu. Għal uħud midlukin irxoxtati bħal dawn, il-​Qassis il-​Kbir se jkun miet f’pożizzjoni protettiva, taʼ tpattija.

14. X’iktar jirrikjedi li dawk bi prospetti għas-​sema joqogħdu fil-​belt taʼ refuġju tal-​lum?

¹⁴ L-​istess pussess tan-​natura umana jirrikjedi li dawk li se jkunu “werrieta [sħab] maʼ Kristu” fis-​sema joqogħdu fil-​belt taʼ refuġju antitipika sakemm jispiċċaw fedelment il-​korsa tagħhom fuq l-​art fil-​mewt. Meta jmutu, huma se jissagrifikaw in-​natura umana għal dejjem. (Rumani 8:17; Apokalissi 2:10) Is-​sagrifiċċju taʼ Ġesù japplika biss għal dawk li għandhom natura umana. Għaldaqstant, il-​Qassis il-​Kbir imut għal dawk taʼ Iżrael spiritwali meta jiġu rxoxtati bħala ħlejjaq spirti li se jgħammru għall-​eternità fis-​sema bħala ‘wħud li jissieħbu fin-​natura t’Alla.’—2 Pietru 1:4.

15. Min huma r-​‘residenti barranin’ u l-​‘immigranti’ taż-​żmien modern, u l-​aqwa Qassis il-​Kbir x’se jagħmel għalihom?

¹⁵ Il-​Qassis il-​Kbir meta se “jmut” rigward ir-​‘residenti barranin’ u l-​‘immigranti’ taż-​żmien modern, billi b’hekk jippermettilhom li jitilqu mill-​belt taʼ refuġju antitipika? Dawn il-​membri tal-​folla l-​kbira ma jistgħux joħorġu minn dil-belt taʼ refuġju immedjatament wara t-​tribulazzjoni l-​kbira. Għala le? Għaliex huma se jkunu għadhom fil-​laħam imperfett, midneb tagħhom u se jkollhom bżonn jibqgħu taħt il-​protezzjoni tal-​Qassis il-​Kbir. Billi japprofittaw erwieħhom mis-​servizzi taʼ tpattija tiegħu matul is-​saltna u s-​saċerdozju tiegħu t’elf sena, huma se jaslu għal perfezzjoni umana. Ġesù imbagħad se jippreżentahom lil Alla għal prova finali u deċiżiva eternament taʼ l-​integrità tagħhom, billi jiġu maħlulin Satana u d-​demonji tiegħu għal ftit żmien. Minħabba li jgħaddu minn din il-​prova b’approvazzjoni divina, Jehovah se jiddikjarahom twajbin. B’hekk huma se jilħqu l-​istess milja taʼ perfezzjoni umana.—1 Korintin 15:28; Apokalissi 20:7-10.a

16. Dawk li jibqgħu ħajjin wara t-​tribulazzjoni l-​kbira meta m’humiex se jkollhom bżonn iżjed tas-​servizzi taʼ tpattija tal-​Qassis il-​Kbir?

¹⁶ Mela, allura, dawk li jibqgħu ħajjin wara t-​tribulazzjoni l-​kbira se jkollhom iżommu kuxjenza tajba billi joqogħdu fil-​belt taʼ refuġju antitipika sat-​tmiem tar-​Renju t’Elf Sena taʼ Kristu. Bħala bnedmin ipperfezzjonati, m’humiex se jkollhom bżonn iżjed tas-​servizzi taʼ tpattija tal-​Qassis il-​Kbir u se joħorġu minn taħt il-​protezzjoni tiegħu. Ġesù mbagħad se jmut għalihom bħala Qassis il-​Kbir, għaliex ma jkollux bżonn jaġixxi iżjed għan-​nom tagħhom bid-​demm li jnaddaf tas-​sagrifiċċju tiegħu. F’dak iż-​żmien huma se jitilqu mill-​belt taʼ refuġju antitipika.

17. Għala m’huwiex se jkun neċessarju għal dawk irxoxtati matul ir-​Renju t’Elf Sena taʼ Kristu li jidħlu fil-​belt taʼ refuġju antitipika u joqogħdu hemmhekk?

¹⁷ Iridu dawk li jiġu rxoxtati matul ir-​Renju t’Elf Sena taʼ Ġesù jidħlu fil-​belt taʼ refuġju antitipika u jibqgħu hemmhekk sal-​mewt tal-​qassis il-​kbir? Le, għaliex billi mietu huma ħallsu l-​piena talli kienu midinbin. (Rumani 6:7; Lhud 9:27) Minkejja dan, il-​Qassis il-​Kbir se jgħinhom jilħqu l-​perfezzjoni. Jekk huma jgħaddu b’suċċess il-​prova finali wara l-​Millennju, Alla se jiddikjarahom ukoll twajbin b’garanzija taʼ ħajja eterna fuq l-​art. M’għandniex xi ngħidu, nuqqas li jiġu segwiti l-​ħtiġijiet t’Alla se jġib ġudizzju taʼ kundanna u qerda fuq kwalunkwe bnedmin li ma jgħaddux il-​prova finali bħala wħud li jżommu l-​integrità.

18. Rigward is-​saltna u s-​saċerdozju taʼ Ġesù, x’se jibqaʼ maʼ l-​umanità għal dejjem?

¹⁸ Qassisin il-​kbar Iżraeliti eventwalment mietu. Imma Ġesù “sar għal dejjem il-​qassis il-​kbir skond l-​ordni taʼ Melkisedek.” (Lhud 6:19, 20; 7:3) Mela l-​waqfien tal-​ħatra taʼ Ġesù bħala Qassis il-​Kbir li jintervjeni għall-​umanità ma jtemmlux ħajtu. L-​effetti tajbin tas-​servizz tiegħu bħala Sultan u Qassis il-​Kbir se jibqgħu maʼ l-​umanità għal dejjem, u l-​bnedmin se jkunu midjunin lejh eternament talli jkun qeda f’dawn il-​pożizzjonijiet. Iktar minn hekk, għall-​eternità kollha Ġesù se jkun fuq quddiem fil-​qima pura taʼ Jehovah.—Filippin 2:5-11.

Lezzjonijiet Taʼ Valur Għalina

19. Liema lezzjoni rigward mibgħeda u mħabba nistgħu nitgħallmu mill-​provvediment taʼ bliet taʼ refuġju?

¹⁹ Aħna nistgħu nitgħallmu diversi lezzjonijiet mill-​provvediment taʼ bliet taʼ refuġju. Per eżempju, l-​ebda qattiel b’mibgħeda qattiela għall-​vittma tiegħu ma kien jitħalla jgħammar f’belt taʼ refuġju. (Numri 35:20, 21) Mela kif jistaʼ xi ħadd fil-​belt taʼ refuġju antitipika jħalli mibgħeda għal ħu tiżviluppa f’qalbu? “Kull min jobgħod lil ħuh hu qattiel,” kiteb l-​appostlu Ġwanni, “u intom tafu li ebda qattiel ma għandu fih il-​ħajja taʼ dejjem.” Ejjew għalhekk “[nibqgħu] nħobbu lil xulxin, għax l-​imħabba ġejja minn Alla.”—1 Ġwann 3:15; 4:7.

20. Għal protezzjoni mill-​Vendikatur tad-​demm, dawk fil-​belt taʼ refuġju antitipika x’iridu jagħmlu?

²⁰ Għal protezzjoni mill-​vendikatur tad-​demm, qattelin involontarji kellhom joqogħdu f’belt taʼ refuġju u ma jitbiegħdux lil hinn mill-​mergħat tagħha. Xi ngħidu għal dawk fil-​belt taʼ refuġju antitipika? Għal salvezza mill-​Vendikatur il-​kbir tad-​demm, huma m’għandhomx jitilqu mill-​belt. Tabilħaqq, għandhom bżonn jgħassu kontra li jiġu mħajrin li jmorru lejn ix-​xifer tal-​mergħat, biex ngħidu hekk. Iridu joqogħdu attenti li ma jħallux imħabba għad-​dinja taʼ Satana tiżviluppa fi qlubhom. Dan għandu mnejn jirrikjedi talb u sforz, imma ħajjiethom jiddependu minn dan.—1 Ġwann 2:15-17; 5:19.

21. Liema xogħol premjanti qiegħed isir minn dawk fil-​belt taʼ refuġju tal-​lum?

²¹ Qattelin involontarji fl-​ibliet taʼ refuġju tal-​qedem kellhom ikunu ħaddiema produttivi. B’mod simili, “ulied Israel” midlukin taw eżempju mill-​aħjar bħala ħaddiema tal-​ħsad u proklamaturi tas-​Saltna. (Mattew 9:37, 38; Mark 13:10) Bħala ‘residenti barranin’ u ‘immigranti’ fl-​ibliet taʼ refuġju tal-​lum, Kristjani bi prospetti għall-​art huma pprivileġġjati li jagħmlu dan ix-​xogħol li jsalva l-​ħajjiet spalla maʼ spalla mal-​midlukin li għadhom fuq l-​art. U kemm huwa xogħol premjanti dan! Dawk li jaħdmu fedelment fil-​belt taʼ refuġju antitipika se jiskappaw mewta eterna minn idejn il-​Vendikatur tad-​demm. Minflok, huma se jiksbu benefiċċji eterni mis-​servizz tiegħu bħala l-​aqwa Qassis il-​Kbir t’Alla. Se toqgħod int fil-​belt taʼ refuġju u tgħix għal dejjem? (w95 11/15)

[Nota taʼ taħt]

Kif Twieġeb Int?

◻ Għala jistaʼ jingħad li l-​biljuni taʼ l-​art huma ħatjin taʼ demm?

◻ Ġesù Kristu liema rwoli jimla rigward l-​umanità?

◻ X’inhi l-​belt taʼ refuġju antitipika, u wieħed kif jidħol fiha?

◻ In-​nies meta se jinħelsu mill-​belt taʼ refuġju antitipika?

◻ Liema lezzjonijiet taʼ valur nistgħu nitgħallmu mill-​provvediment taʼ bliet taʼ refuġju?

[Stampa f’paġna 14]

Taf int liema rwoli vitali qegħdin jimtlew minn Ġesù Kristu?