Ngħinu lir-​Romol fid-​Diffikultajiet Tagħhom

WAĦDA mill-​iktar stejjer magħrufin dwar ir-​romol tinsab fil-​Bibbja fir-​rakkont dwar Rut u l-​kunjata tagħha, Nagħomi. Dawn iż-​żewġ nisa kienu t-​tnejn romol. Iżda Nagħomi ma tilfitx biss lil żewġha imma tilfet ukoll liż-​żewġ uliedha subien, li wieħed minnhom kien ir-​raġel taʼ Rut. Is-​sitwazzjoni tagħhom kienet verament tal-​biki għaliex huma kienu jgħixu f’soċjetà li fiha l-​biedja kienet il-​mezz ewlieni t’għajxien, u kważi kollox kien jiddependi mill-​irġiel.—Rut 1:​1-5, 20, 21.

Madankollu, Nagħomi kellha ħabiba speċjali ferm li kienet ukoll taʼ faraġ kbir għaliha. Din kienet Rut, il-​mara taʼ binha, li b’xejn ma riedet tabbandunaha. Maż-​żmien, Rut uriet li kienet “aħjar minn sebaʼ wlied,” għal Nagħomi, mhux biss minħabba l-​imħabba profonda li kellha lejn Nagħomi, imma wkoll minħabba l-​imħabba li kellha lejn Alla. (Rut 4:15) Meta Nagħomi ssuġġeriet li Rut tmur lura Mowab għand il-​familja u l-​ħbieb tagħha, ir-​risposta li tatha Rut kienet waħda mill-​iktar espressjonijiet taʼ lealtà li qatt inkitbu u li verament tmisslek qalbek: “Fejn tmur int, immur jien; fejn toqgħod int, noqgħod jien; niesek, niesi; Alla tiegħek, Alla tiegħi; fejn tmut int, immut jien; u hemm nindifen. Dan jagħmilli, u aktar, il-​Mulej, jekk ma tkunx il-​mewt li tifridna.”—Rut 1:​16, 17.

Alla Jehovah nnotaha l-​attitudni taʼ Rut. Hu bierek lill-​familja ċkejkna taʼ Nagħomi u Rut, u maż-​żmien Rut iżżewġet lil Bogħaż l-​Iżraeli. Lil binhom, li sar wieħed mill-​antenati taʼ Ġesù Kristu, kienet tieħu ħsiebu Nagħomi, u dan għamlitu bħallikieku kien binha stess. Dan ir-​rakkont storiku huwa eżempju taʼ kemm Jehovah għandu għal qalbu lir-​romol li jersqu qrib lejh u jafdaw fih. Iżjed minn hekk, il-​Bibbja tgħidilna li hu jgħożżhom ħafna lil dawk li bl-​imħabba kollha jgħinu lir-​romol fid-​diffikultajiet tagħhom. Għalhekk, kif nistgħu aħna llum nappoġġaw lir-​romol li hemm fostna?—Rut 4:​13, 16-22; Salm 68:6 [68:​5, NW].

Għajnuna Speċifika bla Ma Nimponu

Meta toffri biex tgħin lil xi armla, l-​aħjar li tispjega ruħek b’mod ċar u turi x’għajnuna trid tagħti bla ma timponi. Evita kummenti bħal, “Ara jekk ikollok bżonn xi ħaġa, għidli.” Dan ikun bħallikieku qed tgħid lil xi ħadd li qed imut bil-​bard u bil-​ġuħ, ‘żomm sħun u mitmugħ tajjeb’ bla ma tagħmel xejn biex tgħinu. (Ġakbu 2:16) Ħafna ma jitolbukx biex tgħinhom meta jkollhom bżonn xi ħaġa, u jippreferu jibqgħu jbatu biex ma jdejqu lil ħadd. Jeħtieġ id-​dehen biex tkun tistaʼ tinduna xi jkollhom bżonn u tgħinhom. Mill-​banda l-​oħra, meta wieħed ikun irid jindaħal f’kollox, billi kważi ma jħallix lill-​armla tgħix ħajjitha kif trid hi, dan jistaʼ jwassal għal uġigħ taʼ qalb jew konflitt. Għalhekk, il-​Bibbja tisħaq fuq il-​ħtieġa li jkun hemm il-​bilanċ fil-​mod kif naġixxu maʼ xulxin. Filwaqt li tinkuraġġina biex bla egoiżmu nieħdu interess persunali fin-​nies, tfakkarna biex ma nindaħlux fejn ma jesagħniex.—Filippin 2:4; 1 Pietru 4:15.

Rut użat il-​bilanċ fil-​mod kif aġixxiet maʼ Nagħomi. Waqt li bil-​lealtà kollha Rut baqgħet qrib il-​kunjata tagħha, hi ma sforzathiex jew iddominatha. Ħadet il-​passi meħtieġa, bħal li takkwista l-​ikel għal Nagħomi u għaliha stess, imma fl-​istess ħin kienet toqgħod fuq dak li kienet tgħidilha Nagħomi.—Rut 2:​2, 22, 23; 3:​1-6.

M’għandniex xi ngħidu, mhux kulħadd hu l-​istess. Hemm min għandu bżonn ħaġa u min oħra. Sandra, li ssemmiet fl-​artiklu taʼ qabel, tgħid: “Sibt dak li kelli bżonn meta kont imnikkta​—kont imdawra minn ħbieb tal-​qalb li jħobbuni.” Elaine, li wkoll issemmiet qabel, mill-​banda l-​oħra, kellha bżonn toqgħod waħedha għal xi żmien. Għalhekk, li tkun t’għajnuna jfisser li tuża d-​dehen u turi l-​bilanċ billi tirrispetta l-​privatezza taʼ dak li jkun u tkun disponibbli biex tagħti l-​għajnuna meta din tkun meħtieġa.

Appoġġ mill-​Familja

Meta l-​membri tal-​familja, jekk din għandha familja, juru mħabba u għożża lejn l-​armla, hi se tħossha iktar kapaċi biex tkampa man-​niket tagħha. Għalkemm xi membri tal-​familja jistgħu jkunu f’pożizzjoni li jgħinu iktar minn membri oħra, ilkoll jistgħu jagħtu sehemhom. “Jekk mara armla għandha l-​ulied jew ulied uliedha, dawn għandhom jitgħallmu l-​ewwel jagħmlu dmirhom billi jġibu rispett lill-​familja tagħhom u jroddu lill-​ġenituri tagħhom dak li ħaqqhom; għax dan jogħġob lil Alla.”—1 Timotju 5:4.

Ħafna drabi, ma jkunx hemm bżonn t’appoġġ finanzjarju. Xi romol ikollhom biżżejjed flus imfaddlin biex ikunu jistgħu jlaħħqu mal-​bżonnijiet tagħhom. Oħrajn jieħdu l-​benefiċċji soċjali li jistgħu jinkisbu f’ċerti pajjiżi. Imma fil-​każ li jkun hemm romol li għandhom bżonn l-​għajnuna, il-​membri tal-​familja huma fid-​dmir li jgħinuhom. Jekk armla m’għandhiex min jiġi minnha biex ikun jistaʼ joffrilha l-​għajnuna meħtieġa, jew jekk il-​qraba tagħha ma jistgħux jgħinuha, l-​Iskrittura tinkuraġġixxi lil sħabha fit-​twemmin biex jgħinuha: “Quddiem Alla u Missierna t-​tjieba safja u bla tebgħa hija din: iżżur l-​iltiema u r-​romol fl-​hemm tagħhom.”—Ġakbu 1:27.

Dawk li jaġixxu fi qbil maʼ dawn il-​prinċipji tal-​Bibbja verament ‘iweġġħu lir-​romol.’ (1 Timotju 5:3) Meta tweġġaħ lil xi ħadd, fil-​fatt, tkun qed turi rispett lejh. Nies li jintwerew ġieħ iħossuhom stmati, maħbubin, u mogħtijin id-​dinjità. M’humiex se jħossu li l-​oħrajn qed jgħinuhom sempliċement għaliex iħossu li hu d-​dmir tagħhom li jagħmlu hekk. Għalkemm Rut infisha kienet armla għal xi żmien, verament stmat lil Nagħomi bil-​ġieħ billi minn jeddha u bl-​imħabba kollha kienet tieħu ħsieb il-​bżonnijiet fiżiċi u emozzjonali taʼ Nagħomi. Fil-​fatt, Rut ma damitx ma kisbet fama bħala mara mill-​aħjar, tant li r-​raġel li kienet se tiżżewweġ qalilha: “Il-​belt kollha tal-​poplu tiegħi taf li inti mara sewwa.” (Rut 3:​11, Karm Żammit) Fl-​istess ħin, l-​imħabba li Nagħomi kellha lejn Alla, il-​karattru ħelu tagħha, u l-​apprezzament li kienet turi għal dak kollu li Rut kienet tagħmel magħha bla ebda dubju għenu lil Rut biex dak li tagħmel tagħmlu minn qalbha. X’eżempju mill-​aħjar hi Nagħomi għar-​romol kollha llum!

Ersaq Qrib Lejn Alla

M’għandniex xi ngħidu, il-​membri tal-​familja u l-​ħbieb ma jistgħux jimlew il-​vojt li jkun tħalla minħabba l-​mewt tas-​sieħeb jew sieħba. Minħabba f’hekk, huwa importanti li l-​persuna li tkun romlot tersaq qrib ferm lejn “Missier il-​ħniena u Alla taʼ kull faraġ. Hu jfarraġna fl-​hemm kollu tagħna.” (2 Korintin 1:​3, 4) Ikkunsidra l-​eżempju taʼ Anna, armla devota li kellha 84 sena fiż-​żmien meta twieled Ġesù.

Meta Anna tilfet lil żewġha wara li kienu ilhom biss sebaʼ snin miżżewġin, hi strieħet fuq Jehovah għall-​faraġ. “[Hi] ma kienet titwarrab qatt mit-​tempju, lejl u nhar taqdi lil Alla fis-​sawm u t-​talb.” (Luqa 2:​36, 37) Għoġbitu lil Jehovah d-​devozzjoni taʼ Anna lejh? Iva! Hu wera l-​imħabba tiegħu lejha b’mod verament speċjali billi ħallieha tara b’għajnejha lit-​tarbija tifel li meta jikber kien se jkun is-​Salvatur tad-​dinja. Kemm ħadet gost u ħassitha mfarrġa Anna! B’mod ċar hi rat kemm huwa minnu l-​kliem taʼ Salm 37:4: “Qiegħed fil-​Mulej l-​għaxqa tiegħek, u jagħtik dak li tixtieq qalbek.”

Alla Juża lill-​Kristjani Sħabna

Elaine tistqarr: “Għal ħafna żmien wara li miet David, kont inħoss uġigħ fiżiku, bħallikieku xi ħadd qed jgħawwar b’xi sikkina fuq il-​qafas taʼ sidri. Kont naħseb li kien ġej mill-​istonku. Darba tant kien kbir dan l-​uġigħ li ħsibt li kien se jkolli mmur għand it-​tabib. Oħt spiritwali, ħabiba kbira tiegħi, li indunat b’dan qaltli li x’aktarx kollox kien kaġun tan-​niket li kont qed inħoss u inkuraġġietni biex nitlob lil Jehovah għall-​għajnuna u l-​faraġ. Ħadt il-​parir tagħha dak il-​ħin stess u minn taħt l-​ilsien tlabt b’qalbi kollha lil Jehovah biex jieqaf miegħi fin-​niket tiegħi. U hekk għamel!” Elaine bdiet tħossha aħjar, u ftit taż-​żmien wara anki l-​uġigħ fiżiku li kellha marilha.

Speċjalment l-​anzjani tal-​kongregazzjoni jistgħu b’qalb tajba joffru l-​ħbiberija tagħhom lil romol imnikktin. Billi jipprovdu regolarment appoġġ spiritwali u faraġ bit-​tattika u bid-​dehen, l-​anzjani jistgħu jgħinuhom iżommu relazzjoni intima maʼ Jehovah minkejja dak li jkunu għaddejjin minnu. Fejn ikun hemm bżonn, l-​anzjani jistgħu wkoll jagħmlu l-​arranġamenti meħtieġa biex tingħata għajnuna materjali. Dawn l-​anzjani mimlijin dehen u mogħdrija verament isiru “lqugħ għar-​riħ.”—Isaija 32:2; Atti 6:​1-3.

Faraġ Permanenti mis-​Sultan il-​Ġdid taʼ l-​Art

Dak li lilu x-​xwejħa Anna tant ħadet gost tara madwar elfejn sena ilu issa sar is-​Sultan Messjaniku tas-​Saltna t’Alla fis-​sema. Dan il-​gvern dalwaqt se jneħħi min-​nofs kull kaġun taʼ niket, inkluż il-​mewt. Fi qbil maʼ dan, Apokalissi 21:​3, 4 jgħid: “Din hi l-​għamara taʼ Alla mal-​bnedmin . . . Hu jixxuttalhom kull demgħa minn għajnejhom: ma jkunx hemm iżjed mewt, anqas biki jew għajat jew tbatija ma jkun hemm iżjed, għax għabu l-​ħwejjeġ taʼ qabel.” Innotajt int li din l-​iskrittura tirreferi għall-​“bnedmin”? Iva, il-​bnedmin se jinħelsu mill-​mewt, mill-​biki, u mill-​għajat kollu li jiġu minħabba fiha.

Imma hemm saħansitra iktar aħbarijiet sbieħ! Il-​Bibbja twiegħed ukoll irxoxt tal-​mejtin. “Tiġi siegħa meta dawk kollha li jkunu fl-​oqbra jisimgħu leħnu [leħen Ġesù] u joħorġu.” (Ġwann 5:​28, 29) Preċiż bħalma ġralu Lazzru, li Ġesù kien qajmu mill-​mewt, huma se joħorġu bħala bnedmin, u mhux bħala spirti. (Ġwann 11:​43, 44) Dawk li minn dakinhar ’il quddiem ‘jagħmlu t-​tajjeb’ se jiksbu l-​perfezzjoni umana u Jehovah, bħala missierhom, se jieħu ħsiebhom personalment hekk kif ‘jiftaħ idu u jaqtaʼ x-​xewqa taʼ kull maħluq.’—Salm 145:​15, 16, KŻ.

Dawk li tilfu lil xi ħadd maħbub fil-​mewt u li jpoġġu l-​fidi tagħhom f’din it-​tama ċerta jsibu li din tant tfarraġhom. (1 Tessalonikin 4:13) Għalhekk, jekk int armla, kun ċerta li ‘titlob bla heda’ għall-​faraġ u għall-​għajnuna li teħtieġ kuljum biex tkun tistaʼ tiflaħ id-​diversi tagħbijiet li jistaʼ jkollok. (1 Tessalonikin 5:17; 1 Pietru 5:7) Sib ħin kuljum biex taqra l-​Kelma t’Alla sabiex il-​ħsibijiet t’Alla jistgħu jkunu taʼ faraġ għalik. Jekk tagħmel dawn l-​affarijiet, tara kemm, minkejja d-​diffikultajiet u l-​isfidi kollha li tiffaċċja bħala armla, Jehovah verament jistaʼ jgħinek issib il-​paċi.

[Kumment f’paġna 5]

Li tkun t’għajnuna jfisser li turi bilanċ bejn li tirrispetta l-​privatezza taʼ dak li jkun u li tkun disponibbli meta tkun meħtieġa l-​għajnuna

[Stampa f’paġna 7]

Anna, l-​armla xwejħa, ġiet imbierka minn Alla