Il-​Kelma taʼ Ġeħova Hi Ħajja

Punti Prinċipali mill-​Ittri taʼ Ġakbu u taʼ Pietru

KWAŻI 30 sena wara Pentekoste tas-​sena 33 E.K., id-​dixxiplu Ġakbu—ħu Ġesù mill-​omm—jikteb ittra “lit-​tnax-il tribù” taʼ Israel spiritwali. (Ġak. 1:1) Il-​mira tiegħu: biex iħeġġiġhom ħalli jkunu b’saħħithom fil-​fidi u juru s-​sabar meta jiffaċċjaw il-​provi. Hu jipprovdi wkoll pariri biex jikkoreġi kundizzjonijiet inkwetanti li żviluppaw fil-​kongregazzjonijiet.

Fis-sena 64 E.K., eżatt qabel il-​kampanja taʼ persekuzzjoni mill-​Imperatur Ruman Neruni, l-​appostlu Pietru jikteb l-​ewwel ittra tiegħu indirizzata lill-​Kristjani, biex jinkuraġġihom ħalli jibqgħu sodi fil-​fidi. Fit-​tieni ittra tiegħu, miktuba ftit wara l-​ewwel waħda, Pietru jinkuraġġixxi lil sħabu fit-​twemmin biex joqogħdu attenti għall-​kelma t’Alla u jwissihom dwar il-​miġja taʼ jum Ġeħova. Tabilħaqq, aħna nistgħu nibbenefikaw jekk noqogħdu attenti għall-​messaġġi taʼ l-​ittri taʼ Ġakbu u taʼ Pietru.—Ebr. 4:12.

ALLA JAGĦTI L-​GĦERF LIL DAWK LI ‘JITOLBU BIL-​FIDI’

(Ġak. 1:1–5:20)

“Hieni l-​bniedem li jibqaʼ jissaporti l-​provi,” jikteb Ġakbu, “għaliex meta jiġi approvat jirċievi l-​kuruna tal-​ħajja.” Lil dawk li ‘jibqgħu jitolbu bil-​fidi,’ Ġeħova jagħtihom l-​għerf meħtieġ biex jissaportu l-​provi.—Ġak. 1:5-8, 12.

Il-fidi u l-​għerf huma meħtiġin ukoll minn dawk li “jsiru għalliema” fil-​kongregazzjoni. Wara li jidentifika l-​ilsien bħala “membru ċkejken” li kapaċi “jtebbaʼ l-​ġisem kollu,” Ġakbu jwissi dwar tendenzi dinjin li jistgħu jħassru r-​relazzjoni li dak li jkun jistaʼ jkollu m’Alla. Hu jindika wkoll il-​passi li għandu jieħu kulmin hu marid spiritwalment sabiex ifiq.—Ġak. 3:1, 5, 6; 5:14, 15.

Mistoqsijiet Skritturali Mweġbin:

2:13—“Il-​ħniena” b’liema mod “tifraħ bir-​rebħa fuq il-​ġudizzju”? Meta niġu biex nagħtu kont tagħna nfusna lil Alla, hu jqis il-​ħniena li nkunu wrejna lil oħrajn u jaħfrilna fuq il-​bażi tas-​sagrifiċċju tal-​fidwa taʼ Ibnu. (Rum. 14:12) M’hijiex din raġuni waħda biex il-​ħniena nagħmluha kwalità dominanti f’ħajjitna?

4:5—Ġakbu liema skrittura qed jikkwota hawnhekk? Ġakbu mhux qed jikkwota xi vers speċifiku. Madankollu, dan il-​kliem ispirat b’mod divin jistaʼ jkun li hu bbażat fuq il-​ħsieb ġenerali li hemm wara skritturi bħalma huma Ġenesi 6:5; 8:21; Proverbji 21:10; u Galatin 5:17.

5:20—“Dak li jreġġaʼ midneb lura mill-​iżball li kien miexi fih” ir-​ruħ taʼ min isalva mill-​mewt? Kristjan li jreġġaʼ midneb lura minn triq midinba jsalva r-​ruħ taʼ l-​individwu niedem mill-​mewt spiritwali u forsi mill-​qerda taʼ dejjem. L-​individwu li jgħin lill-​midneb b’dan il-​mod se ‘jgħattilu [ukoll] kotra taʼ dnubiet.’

Lezzjonijiet Għalina:

1:14, 15. Id-​dnub jibda b’xewqa mhix xierqa. Għalhekk, m’għandniex niżviluppaw xewqat ħżiena billi noqogħdu naħsbu fuqhom. Minflok, għandna bżonn ‘inkomplu naħsbu’ fuq affarijiet li jibnu u nimlew imħuħna u qlubna bihom.—Flp. 4:8.

2:8, 9. Il-​fatt li ‘nħarsu lejn l-​uċuħ’ hu kuntrarju għal-​“liġi nobbli” taʼ l-​imħabba. Għaldaqstant, il-​Kristjani veri ma jħarsux lejn l-​uċuħ.

2:14-26. Aħna niġu “salvati permezz tal-​fidi,” mhux “bis-​saħħa taʼ l-​għemejjel” tal-​Liġi Mosajka jew taʼ l-​għemejjel li nwettqu bħala Kristjani. Il-​fidi tagħna għandha tkun iktar milli sempliċement ngħidu li nemmnu f’Alla. (Efes. 2:8, 9; Ġw. 3:16) Għandha tqanqalna biex naġixxu kif jogħġob lil Alla.

3:13-17. “L-​għerf li ġej minn fuq” żgur li hu superjuri għall-​għerf “taʼ l-​art, taʼ l-​annimali, tad-​demonji”! Għandna ‘nibqgħu nfittxu għall-​għerf divin bħal teżori moħbijin.’—Prov. 2:1-5.

3:18. Iż-​żerriegħa taʼ l-​aħbar tajba tas-​Saltna għandha tinżeraʼ bil-​paċi minn “dawk li qegħdin iġibu l-​paċi.” Huwa importanti li aħna nkunu wħud li jġibu l-​paċi u mhux inkunu arroganti, argumentattivi, jew naqilgħu l-​inkwiet.

‘IEQFU SODI FIL-​FIDI’

(1 Pt. 1:1–5:14)

Pietru jfakkar lil sħabu fit-​twemmin dwar it-​“tama ħajja” tagħhom taʼ wirt fis-​sema. “Intom ‘razza magħżula, saċerdozju rjali, ġens qaddis,’” jgħidilhom Pietru. Wara li jagħtihom pariri speċifiċi dwar is-​sottomissjoni, hu jħeġġiġhom biex ilkoll ikunu ‘fehma waħda, billi jħossu għal xulxin, juru affezzjoni lejn l-​aħwa, jagħdru b’tenerezza, ikunu umli.’—1 Pt. 1:3, 4; 2:9; 3:8.

Ladarba “qorob it-​tmiem” tas-​sistema Lhudija, Pietru jagħti parir lil ħutu biex ‘ikunu moħħhom f’loku, u joqogħdu attenti u ma jittraskurawx it-​talb.’ Hu jgħidilhom: “Ibqgħu f’sensikom, oqogħdu għassa. . . . Iqfulu [lil Satana], sodi fil-​fidi.”—1 Pt. 4:7; 5:8, 9.

Mistoqsijiet Skritturali Mweġbin:

3:20-22—Il-​magħmudija kif issalvana? Il-​magħmudija hija ħtieġa għal dawk li qed ifittxu s-​salvazzjoni. Madankollu, il-​magħmudija nfisha ma ssalvaniex. Is-​salvazzjoni hi attwalment “permezz taʼ l-​irxoxt taʼ Ġesù Kristu.” Il-​kandidat għall-​magħmudija jrid ikollu l-​fidi li s-​salvazzjoni hi possibbli biss għaliex Ġesù miet mewta taʼ sagrifiċċju, ġie rxoxtat, u “qiegħed fuq il-​leminija t’Alla,” u għandu l-​awtorità fuq il-​ħajjin u l-​mejtin. Il-​magħmudija msejsa fuq fidi bħal din tikkorrispondi maʼ ‘tmien erwieħ li nġarrew mill-​ilma u ġew salvati.’

4:6—Min kienu l-​“mejtin” li lilhom ‘ixxandret l-​aħbar tajba’? Dawn kienu wħud li kienu ‘mejtin minħabba n-​nuqqasijiet u d-​dnubiet tagħhom,’ jew li kienu mejtin spiritwalment, qabel ma semgħu l-​aħbar tajba. (Efes. 2:1) Iżda, wara li poġġew il-​fidi tagħhom fl-​aħbar tajba, huma bdew “jgħixu” spiritwalment.

Lezzjonijiet Għalina:

1:7. Biex il-​fidi tagħna jkollha valur kbir, trid tkun taʼ kwalità provata, jew testjata. Fidi b’saħħitha bħal din tabilħaqq li ‘żżomm ir-​ruħ ħajja.’ (Ebr. 10:39) M’għandniex nerġgħu lura meta l-​fidi tagħna tiġi testjata.

1:10-12. L-​anġli xtaqu jkunu jafu u jifhmu l-​veritajiet spiritwali u profondi li l-​profeti li kellu Alla fil-​qedem kitbu dwar il-​kongregazzjoni Kristjana midluka. Madankollu, dawn l-​affarijiet iċċaraw biss meta Ġeħova beda jittratta mal-​kongregazzjoni. (Efes. 3:10) M’għandniex aħna nsegwu l-​eżempju taʼ l-​anġli u nistinkaw biex ngħarblu l-​“affarijiet profondi t’Alla”?—1 Kor. 2:10.

2:21. Biex nimitaw lix-​Xempju tagħna, Ġesù Kristu, għandna nkunu lesti li nsofru saħansitra sal-​punt li mmutu sabiex nappoġġaw is-​sovranità taʼ Ġeħova.

5:6, 7. Meta nixħtu l-​ansjetà tagħna fuq Ġeħova, hu jgħinna biex f’ħajjitna nibqgħu nagħtu l-​prijorità lill-​qima vera minflok ma nkunu konċernati żżejjed dwar x’se jġib l-​għada.—Mt. 6:33, 34.

“IL-​JUM TAʼ ĠEĦOVA SE JIĠI”

(2 Pt. 1:1–3:18)

“Il-​profezija qatt ma ġiet bir-​rieda tal-​bniedem,” jikteb Pietru, “imma xi bnedmin tkellmu minn Alla skond kif tmexxew mill-​ispirtu qaddis.” Il-​fatt li noqogħdu attenti għall-​kelma profetika jistaʼ jipproteġina minn “għalliema foloz” u minn individwi korrotti oħrajn.—2 Pt. 1:21; 2:1-3.

“Fl-​aħħar jiem jiġu nies li jwaqqgħu kollox għaċ-​ċajt u jieħdu kollox biż-​żuffjett,” iwissi Pietru. Imma “l-​jum taʼ Ġeħova se jiġi bħal ħalliel.” Pietru jagħlaq l-​ittra tiegħu b’parir sod għal dawk ‘li qed jistennew u jżommu dejjem f’moħħhom il-​preżenza taʼ dan il-​jum.’—2 Pt. 3:3, 10-12.

Mistoqsijiet Skritturali Mweġbin:

1:19—Min hu “l-​kewkba taʼ fil-​għodu,” meta jitlaʼ, u kif inkunu nafu li dan ikun ġara? Il-​“kewkba taʼ fil-​għodu” hi Ġesù Kristu fil-​qawwa tas-​Saltna. (Riv. 22:16) Fl-​1914, Ġesù telaʼ quddiem il-​ħolqien kollu bħala s-​Sultan Messjaniku, billi ħabbar iż-​żerniq taʼ jum ġdid. It-​trasfigurazzjoni pprovdiet viżjoni bħala ħarsa bil-​quddiem tal-​glorja u l-​qawwa tas-​Saltna taʼ Ġesù, billi enfasizzat iċ-​ċertezza tal-​kelma profetika t’Alla. Jekk noqogħdu attenti għal din il-​kelma, qlubna jiddawlu, u b’hekk insiru konxji li l-​Kewkba taʼ fil-​għodu telgħet.

2:4—X’inhu “Tartaru,” u l-​anġli ribellużi meta ġew mitfugħin fih? Tartaru hu kundizzjoni bħal ħabs li fih jiġu mitfugħin ħlejjaq spirti biss—mhux bnedmin. Huwa stat taʼ dlam ċappa mentali rigward l-​iskopijiet brillanti t’Alla. Dawk f’Tartaru m’għandhom l-​ebda tama għall-​futur. Alla tefaʼ lill-​anġli diżubbidjenti f’Tartaru fi żmien Noè, u se jibqgħu f’dik il-​kundizzjoni degradanti sakemm jiġu meqrudin.

3:17—Pietru x’ried ifisser b’“għarfien bil-​quddiem”? Pietru kien qed jirreferi għall-​għarfien bil-​quddiem, jew l-​għarfien minn qabel, dwar ġrajjiet futuri li ngħata b’ispirazzjoni lilu u lil kittieba Bibliċi oħrajn. Ladarba dan ma kienx għarfien infinit, il-​Kristjani tal-​bidu li kellhom dan l-​għarfien ma kinux jafu d-​dettalji kollha dwar il-​ġrajjiet futuri. Huma saru jafu biss l-​aspett ġenerali taʼ dak li setgħu jistennew.

Lezzjonijiet Għalina:

1:2, 5-7. Minbarra li jgħinna niżdiedu fl-​“għarfien eżatt dwar Alla u dwar Ġesù,” l-​isforz ħerqan li nagħmlu biex nikkultivaw kwalitajiet bħalma huma l-​fidi, is-​sabar, u d-​devozzjoni lejn Alla jistaʼ ma jħalliniex inkunu “inattivi jew bla frott” rigward dan l-​għarfien.—2 Pt. 1:8.

1:12-15. Biex nibqgħu “stabbiliti sew fil-​verità” neħtieġu tfakkiriet il-​ħin kollu, bħal dawk li nirċievu permezz tal-​laqgħat tal-​kongregazzjoni, l-​istudju persunali, u l-​qari tal-​Bibbja.

2:2. Għandna noqogħdu attenti biex il-​kondotta tagħna ma ġġibx tmaqdir fuq Ġeħova u l-​organizzazzjoni tiegħu.—Rum. 2:24.

2:4-9. Meta nqisu dak li għamel fil-​passat, nistgħu nkunu ċerti li “Ġeħova jaf kif jeħles mill-​provi lil dawk li huma devoti lejh, imma jżomm lil dawk li huma inġusti għall-​qtugħ f’jum il-​ġudizzju.”

2:10-13. Waqt li l-​“glorjużi,” jiġifieri, l-​anzjani Kristjani, għandhom in-​nuqqasijiet u kultant jistgħu jiżbaljaw, aħna m’għandniex immaqdruhom.—Ebr. 13:7, 17.

3:2-4, 12. Jekk noqogħdu attenti ferm għal “dak li ngħad qabel mill-​profeti mqaddsa u l-​kmandament li ta l-​Mulej u s-​Salvatur” niġu megħjunin biex nibqgħu ffokati fuq kemm hu qrib jum Ġeħova.

3:11-14. Bħala dawk li qed ‘nistennew u nżommu dejjem f’moħħna l-​preżenza tal-​jum taʼ Ġeħova,’ għandna (1) ‘inkunu qaddisin fil-​kondotta,’ billi nżommu l-​indafa fiżika, mentali, morali, u spiritwali; (2) noktru b’għemejjel li jirriflettu d-​“devozzjoni lejn Alla,” bħal dawk li huma konnessi maʼ l-​ippridkar tas-​Saltna u x-​xogħol taʼ li nagħmlu dixxipli; (3) inżommu l-​kondotta u l-​personalità tagħna “bla tebgħa,” bla tiċpis mid-​dinja; (4) inkunu “bla difett,” billi nagħmlu kollox b’motiv pur; u (5) inkunu “fil-​paċi”—fil-​paċi m’Alla, maʼ ħutna l-​Kristjani, u maʼ sħabna l-​bnedmin.