Żgħażagħ, Qegħdin Tippreparaw għall-​Futur Tagħkom?

“Għax jien naf il-​ħsibijiet li naħseb fuqkom ... ħsibijiet taʼ sliem, u mhux taʼ ħsara, biex nagħtikom futur u tama.”—Ġeremija 29:11, KŻ.

1, 2. Iż-​żmien taż-​żgħożija, b’liema modi differenti jistaʼ jitqies?

KWAŻI l-​adulti kollha jqisu ż-​żgħożija bħala żmien mill-​isbaħ tal-​ħajja. Huma jiftakru fl-​enerġija u l-​entużjażmu li kellhom meta kienu għadhom żgħar. Huma jiftakru b’għożża fiż-​żmien meta kellhom bil-​wisq inqas responsabbiltajiet, żmien meta kienu jieħdu ħafna pjaċir u meta kellhom ħajja mimlija opportunitajiet quddiemhom.

² Dawk minnkom li għadkom żgħar x’aktarx taraw l-​affarijiet differenti. Forsi qed issib xi diffikultà biex tkampa mal-​problemi minħabba l-​bidliet fiżiċi u emozzjonali li ġġib magħha ż-​żgħożija. L-​iskola għandek mnejn tiffaċċja pressjoni qawwija minn dawk taʼ mparek. Għandek mnejn tagħmel sforz kbir biex tirreżisti l-​abbuż tad-​drogi, l-​alkoħol, u l-​immoralità. Ħafna minnkom tiffaċċjaw il-​kwistjoni tan-​newtralità jew kwistjonijiet oħrajn li għandhom x’jaqsmu mal-​fidi tagħkom. Iva, iż-​żgħożija tistaʼ tkun żmien diffiċli. Minkejja dan, hija żmien t’opportunità. Il-​mistoqsija hi, Kif se tuża dawn l-​opportunitajiet?

Gawdi ż-​Żgħożija Tiegħek

3. Salamun liema parir u twissija ta liż-​żgħażagħ?

³ Bir-​raġun kollu, il-​kbar jgħidulek li ż-​żgħożija ma tantx iddum. Fi ftit snin, iż-​żgħożija ssir xi ħaġa tal-​passat. Għalhekk, gawdiha sakemm għadek fiha! Dan kien il-​parir tas-​Sultan Salamun, li kiteb: “Thenna, o żagħżugħ, fir-​rebbiegħa taʼ ħajtek, u ħa tkun ferħana qalbek f’jiem żgħożitek. Imxi wara t-​taħbit taʼ qalbek, u wara l-​għaxqa taʼ għajnejk.” Madankollu, Salamun wissa liż-​żgħażagħ: “Ħarrab ukoll minn moħħok it-​tħassib, u żomm il-​ħsara ’l bogħod minn ġismek.” Iżjed minn hekk, hu qal: “It-​tfulija u ż-​żgħożija [“huma frugħa,” NW].”—Koħèlet 11:9, 10.

4, 5. Għala huwa għaqli li ż-​żgħażagħ jippreparaw għall-​futur tagħhom? Agħti eżempju.

⁴ Fhimtu dak li ried ifisser Salamun? Sabiex nagħtu eżempju, immaġina żagħżugħ li rċieva somma kbira taʼ flus jew bħala rigal jew bħala wirt. X’se jagħmel bih? Jistaʼ jberbaq kollox fix-​xalar—l-​istess bħalma għamel l-​iben il-​ħali fil-​parabbola taʼ Ġesù. (Luqa 15:11-23) Imma x’se jagħmel meta l-​flus jispiċċaw? Żgur li se jiddispjaċih talli jkun aġixxa b’mod daqshekk irresponsabbli! Min-​naħa l-​oħra, immaġina li uża r-​rigal li qalaʼ sabiex jipprepara għall-​futur tiegħu, forsi billi b’mod għaqli jinvesti ammont sew mill-​flus. Eventwalment, meta jkun qed jibbenefika minn dak l-​investiment, taħseb li kien se jiddispjaċih talli ma berbaqx flusu kollha fix-​xalar waqt li kien għadu żagħżugħ? Dażgur li le!

⁵ Aħseb ftit dwar is-​snin taʼ żgħożitek bħala rigal mingħand Alla, għax fil-​fatt hekk huma. Kif se tużahom? Tistaʼ taħli l-​enerġija u l-​entużjażmu tiegħek fuq li togħġob lilek innifsek, billi tixxala u tiddeverti mingħajr ma toqgħod taħseb dwar il-​futur tiegħek. Però, jekk tagħmel hekk, “it-​tfulija u ż-​żgħożija” tiegħek se jkunu tabilħaqq “frugħa.” Kemm ikun aħjar li tieħu vantaġġ miż-​żgħożija sabiex tipprepara għall-​futur tiegħek.

6. (a) Liema parir taʼ Salamun jagħti gwida liż-​żgħażagħ? (b) Jehovah x’jixtieq jagħmel għaż-​żgħażagħ, u żagħżugħ kif jistaʼ jibbenefika minn dan?

⁶ Salamun semma prinċipju li jistaʼ jgħinek tuża ż-​żgħożija tiegħek bil-​għaqal. Hu qal: “Ftakar f’min ħalqek f’jiem żgħożitek.” (Koħèlet 12:1) Dan il-​prinċipju hu ċ-​ċavetta għas-​suċċess—ismaʼ lil Jehovah u agħmel ir-​rieda tiegħu. Jehovah qal lill-​Iżraelin tal-​qedem dak li ried jagħmel għalihom: “Għax jien naf il-​ħsibijiet li naħseb fuqkom . . . ħsibijiet taʼ sliem, u mhux taʼ ħsara, biex nagħtikom futur u tama.” (Ġeremija 29:​11, KŻ) Jehovah jixtieq jagħti “futur u tama” lilek ukoll. Jekk tiftakar fih f’dak li tagħmel, taħseb, u tiddeċiedi, dak il-​futur u dik it-​tama se jkunu tajbin.—Apokalissi 7:16, 17; 21:3, 4.

‘Ersaq Lejn Alla’

7, 8. Żagħżugħ kif jistaʼ jersaq qrib lejn Jehovah?

⁷ Ġakbu inkuraġġiena biex niftakru f’Jehovah meta ħeġġiġna: “Ersqu lejn Alla, u hu jersaq lejkom.” (Ġakbu 4:8) Jehovah hu l-​Ħallieq, is-​Sovran tas-​sema, li jistħoqqlu kull qima u tifħir. (Apokalissi 4:11) Madankollu, jekk nersqu qrib lejh, hu se jersaq qrib lejna. Ma jmisslikx qalbek dan l-​interess kollu mħabba?—Mattew 22:37.

⁸ Hemm diversi modi kif nistgħu nersqu qrib lejn Jehovah. Per eżempju, l-​appostlu Pawlu jgħid: “Żommu sħiħ fit-​talb, ishru fih b’radd taʼ ħajr lil Alla.” (Kolossin 4:2) Fi kliem ieħor, ikkultiva d-​drawwa tat-​talb. Tkunx kuntent biss għax tgħid amen wara li missierek jew xi Kristjan sieħbek fil-​kongregazzjoni jirrappreżentak bit-​talb. Qatt ftaħt qalbek maʼ Jehovah u għedtlu x’taħseb, xi jbeżżgħek, liema sfidi tiffaċċja? Qatt għedtlu affarijiet li stħajt titkellimhom maʼ kwalunkwe persuna oħra? Talb onest u mill-​qalb inissel il-​paċi fina. (Filippin 4:6, 7) Jgħinna nersqu qrib lejn Jehovah kif ukoll jgħinna nħossu li hu qed jersaq qrib lejna.

9. Żagħżugħ kif jistaʼ jismaʼ minn Jehovah?

⁹ Mod ieħor kif nistgħu nersqu qrib lejn Jehovah jinsab f’dan il-​kliem: “Agħti widen għall-​pariri u aċċetta d-​dixxiplina, sabiex int tistaʼ ssir għaref fil-​futur tiegħek.” (Proverbji 19:20, NW) Iva, jekk tismaʼ lil Jehovah u tobdih, int tkun qed tipprepara għall-​futur tiegħek. Kif tistaʼ turi li int tismaʼ lil Jehovah? Mingħajr ebda dubju, int tattendi regolarment il-​laqgħat Kristjani u tismaʼ dak li jkun hemm fil-​programm. Ukoll, ‘tweġġaħ ’il missierek u ’l ommok’ billi tkun preżenti għall-​istudju tal-​Bibbja tal-​familja tiegħek. (Efesin 6:1, 2; Lhud 10:24, 25) Għal dan ħaqqek prosit. Madankollu, flimkien maʼ dan ‘tuża l-​ħin bl-​aħjar mod’ sabiex tipprepara għal-​laqgħat, biex taqra l-​Bibbja regolarment, u biex tagħmel ir-​riċerka? Tipprova tapplika dak li taqra, sabiex tkun tistaʼ timxi bħal “nies għorrief”? (Efesin 5:15-17, NW; Salm 1:1-3) Jekk tagħmel dan, int qed tersaq qrib lejn Jehovah.

10, 11. Liema benefiċċji mill-​aqwa jirċievu żżgħażagħ meta jisimgħu minn Jehovah?

¹⁰ Fil-​kliem tal-​bidu fil-​ktieb tal-​Proverbji, il-​kittieb ispirat jispjega l-​iskop taʼ dan il-​ktieb tal-​Bibbja. Hu jgħid li l-​iskop hu “biex jagħrfu l-​bnedmin l-​għerf u t-​tagħlim, biex jifhmu kliem l-​għaqal, biex jieħdu tagħlim tajjeb, skond il-​ġustizzja, id-​dritt u s-​sewwa; biex jingħata d-​dehen liċ-​ċkejknin, l-​għerf u l-​għaqal liż-​żgħażagħ.” (Proverbji 1:1-4) Għalhekk, hekk kif taqra u tapplika l-​kliem li hemm fil-​ktieb tal-​Proverbji—kif ukoll dak tal-​Bibbja kollha—int se tikkultiva l-​ġustizzja kif ukoll is-​sewwa, u Jehovah se jkun ferħan li int tkun qed tersaq qrib lejh. (Salm 15:1-5) Iktar ma tikkultiva l-​għaqal, l-​għarfien, l-​abbiltà tal-​ħsieb, u s-​sens taʼ ġudizzju, id-​deċiżjonijiet li tieħu se jkunu dejjem aħjar.

¹¹ Huwa raġunevoli li tistenna li xi żagħżugħ se jaġixxi b’mod tant għaqli bħal dan? Iva, għax ħafna Kristjani żgħażagħ hekk jagħmlu. Bħala riżultat, oħrajn jirrispettawhom u ‘ma jmaqdruhomx għax huma żgħażagħ.’ (1 Timotju 4:12) U m’hux taʼ b’xejn li l-​ġenituri tagħhom ikunu kburin bihom, u Jehovah jgħid li huma jferrħulu qalbu. (Proverbji 27:11) Għalkemm għadhom żgħar, huma jistgħu jkunu żguri li dan il-​kliem ispirat japplika għalihom: “Osserva lil dak li hu bla ħtija u żomm lir-​rett fejn tarah, għax il-​futur taʼ dak ir-​raġel se jkun paċifiku.”—Salm 37:37, NW.

Agħmel Għażliet Għaqlin

12. X’inhi waħda mill-​iktar għażliet importanti li ż-​żgħażagħ iridu jagħmlu, u għażla bħal din għala għandha konsegwenzi li jdumu ħafna?

¹² Iż-​żgħożija hija żmien li fiha tagħmel ħafna għażliet, u xi ftit minnhom għandhom konsegwenzi fit-​tul. Xi għażliet li tagħmel issa jistgħu jeffetwawlek il-​futur tiegħek. Ir-​riżultat t’għażliet għaqlin se jkun ħajja ferħana u taʼ suċċess. Jekk ma tagħżilx bil-​għaqal, tistaʼ tħassar għomrok kollu. Ikkunsidra kif dan hu minnu f’dawn iż-​żewġ għażliet li trid tagħmel. L-​ewwel: Maʼ min tagħżel li tagħmilha? Dan għala hu importanti? Dwar dan, il-​proverbju ispirat jgħid: “Min jagħmilha maʼ l-​għaref, isir għaref, min imur mal-​boloh, jaqaʼ fl-​hemm.” (Proverbji 13:20) Fi kliem ieħor, iktar ma jgħaddi ż-​żmien iktar nibdew insiru bħal dawk li nassoċjaw magħhom—għaqlin jew boloh. Int x’tippreferi li ssir?

13, 14. (a) Minbarra l-​kuntatti li jistaʼ jkollna man-​nies, is-​sħubija x’tinkludi? (b) Liema żball għandhom jevitaw iż-​żgħażagħ?

¹³ Meta taħseb fil-​kelma sħubija, int għandek mnejn tassoċjaha maʼ li tkun man-​nies. Dan hu korrett, imma hemm iktar involut. Meta tara xi programm fuq it-​televixin, tismaʼ l-​mużika, taqra xi ktieb, tmur iċ-​ċinema, jew tuża xi riżorsi taʼ l-​Internet, int tkun qed tissieħeb. Jekk l-​iskop taʼ dik is-​sħubija huwa biex tissodisfa inklinazzjonijiet vjolenti u immorali jew tinkuraġġixxi l-​abbuż tad-​drogi, is-​sokor, jew kwalunkwe ħaġa oħra li tmur kontra l-​prinċipji Bibliċi, int tkun qed tissieħeb maʼ “l-​iblah,” li jaġixxi b’tali mod daqslikieku Jehovah ma jeżistix.—Salm 14:1.

¹⁴ Forsi tħoss li ladarba tattendi l-​laqgħat Kristjani u int attiv fil-​kongregazzjoni, int b’saħħtek biżżejjed biex ma tħallix lilek innifsek tiġi effettwat minn film vjolenti jew minn album b’diski tal-​widna imma li l-​kliem tagħhom hu dubjuż. Forsi tħoss li m’hu se jkun hemm l-​ebda riżultat ħażin jekk tagħti daqqa t’għajn lejn xi Web site pornografika fuq l-​Internet. L-​appostlu Pawlu juri li int sejjer żball! Hu jgħid: “La titqarrqux: il-​ħbiberija ħażina tħassar id-​drawwiet tajba.” (1 Korintin 15:33) B’sogħba, ħafna Kristjani żgħażagħ li wrew li kellhom potenzjal li jimxu ’l quddiem spiċċaw biex ħallew sħubija mhix għaqlija tħassar id-​drawwiet tajbin tagħhom. Kun determinat, mela, li twarrab sħubija bħal din. Jekk tagħmel dan, int tkun qed issegwi l-​parir taʼ l-​appostlu Pawlu: “Timxux max-​xejra taʼ din id-​dinja, iżda nbidlu skond it-​tiġdid taʼ fehmietkom, biex iseħħilkom tagħrfu x’inhi r-​rieda taʼ Alla, x’inhu t-​tajjeb li jogħġbu, x’inhu perfett.”—Rumani 12:2.

15. X’inhi t-​tieni għażla li ż-​żgħażagħ iridu jagħmlu, u liema pressjonijiet jistaʼ kultant ikollhom minħabba dan?

¹⁵ Issa se niddiskutu għażla oħra li trid tiffaċċja. Se jasal il-​waqt meta trid tiddeċiedi x’se tagħmel la tispiċċa mill-​iskola. Jekk tgħix f’pajjiż fejn hemm nuqqas t’opportunitajiet għal xogħol, forsi tħossok li għandek taħtaf l-​aħjar opportunità li hemm. Jekk tgħix f’pajjiż sinjur, għandu mnejn ikun hemm ħafna opportunitajiet differenti minfejn tagħżel, u xi wħud minnhom jistgħu verament iħajruk. Peress li l-​ġenituri jew l-​għalliema tiegħek sinċerament ikunu jridulek l-​aħjar, għandhom mnejn iħeġġuk biex taqbad karriera li toffri sigurtà finanzjarja, forsi anki li permezz tagħha ssir sinjur. Madankollu, it-​taħriġ li trid biex taqbad karriera bħal din jistaʼ jillimitalek il-​ħin li tistaʼ tqattgħu taqdi lil Jehovah.

16, 17. Spjega kif skritturi differenti jistgħu jgħinu lil żagħżugħ ikollu ħarsa bilanċjata dwar ix-​xogħol.

¹⁶ Ftakar li qabel ma tieħu deċiżjoni trid tara l-​Bibbja x’għandha x’tgħid. Il-​Bibbja tinkuraġġina sabiex naħdmu ħalli naqilgħu l-​għajxien tagħna, billi turi li aħna għandna r-​responsabbiltà li mmantnu lilna nfusna. (2 Tessalonikin 3:10-12) Barra minn hekk, hemm iktar involut. Inħeġġuk taqra l-​iskritturi li ġejjin u taħseb dwar kif jistgħu jgħinu lil żagħżugħ isib bilanċ meta jiġi biex jagħżel karriera: Proverbji 30:8, 9; Koħèlet 7:11, 12; Mattew 6:33; 1 Korintin 7:31; 1 Timotju 6:9, 10. Wara li qrajt dawn il-​versi, tistaʼ tara x’inhi l-​ħarsa taʼ Jehovah dwar dan l-​aspett?

¹⁷ Ix-​xogħol sekulari m’għandu qatt ikun tant importanti li jingħata iktar prijorità mis-​servizz tagħna lil Jehovah. Ikun tajjeb jekk permezz taʼ l-​edukazzjoni li tkun ħadt mill-​iskola tikkwalifika biex ikollok xogħol raġunevoli. Imma jekk għandek bżonn iktar taħriġ wara li tkun spiċċajt mill-​iskola, trid tiddiskuti dan mal-​ġenituri tiegħek. Madankollu, qatt tinsa x’inhu “l-​aħjar”—il-​miri spiritwali. (Filippin 1:9, 10) Tagħmilx l-​istess żball li għamel Bàruk, l-​iskriba taʼ Ġeremija. Hu tilef l-​apprezzament tiegħu għall-​privileġġ speċjali li kellu u beda ‘jfittex ħwejjeġ kbar.’ (Ġeremija 45:5) Għal xi żmien hu nesa li m’hemm l-​ebda ‘ħaġa kbira’ f’din id-​dinja li setgħet tressqu eqreb lejn Jehovah jew tgħinu jsalva mill-​qerda taʼ Ġerusalemm. L-​istess ħaġa jistaʼ jingħad dwarna llum.

Apprezza l-​Affarijiet Spiritwali

18, 19. (a) Minn xiex qed ibatu ħafna min-​nies taʼ madwarek, u kif għandek tħossok dwarhom? (b) Ħafna għala ma jħossuhomx bil-​ġuħ spiritwalment?

¹⁸ Qatt rajt ritratti fuq il-​mezzi tax-​xandir taʼ tfal li jgħixu f’pajjiżi milqutin mill-​ġuħ? Jekk iva, żgur li tħassarthom. Titħassarhom bl-​istess mod lin-​nies taʼ madwarek? Għala għandek tħossok hekk? Għax ħafna minnhom ukoll huma bil-​ġuħ. Dawn qegħdin ibatu mill-​ġuħ li Għamos ipprofetizza dwaru: “Ara, għad jiġi żmien, oraklu taʼ Sidi l-​Mulej, meta nibgħat il-​ġuħ fl-​art; mhux il-​ġuħ tal-​ħobż, lanqas l-​għatx għall-​ilma, iżda għas-​smigħ tal-​kelma tal-​Mulej.”—Għamos 8:11.

¹⁹ Veru, ħafna minn dawk li qed ibatu minn ġuħ spiritwali m’humiex “konxji tal-​bżonn spiritwali tagħhom.” (Mattew 5:3, NW) Ħafna ma jħossuhomx bil-​ġuħ spiritwalment. Ħafna forsi jħossu li huma mitmugħin sew. Imma jħossuhom hekk minħabba li huma jieklu mill-​“għerf tad-​dinja” li ma jiswa xejn u li jinkludi l-​materjaliżmu, l-​ispekulazzjoni xjentifika, l-​opinjonijiet dwar il-​moralità, u affarijiet oħra bħal dawn. Xi wħud iħossu li “l-​għerf” modern jagħmel it-​tagħlim tal-​Bibbja antikwat. Madankollu, “id-​dinja b’għerfha ma għarfitx lil Alla.” L-​għerf tad-​dinja m’huwiex se jgħinek tersaq qrib lejn Alla. M’hu xejn ħlief “bluha quddiem Alla.”—1 Korintin 1:20, 21; 3:19.

20. Għala m’huwiex raġunevoli li tkun tixtieq timita lil dawk li ma jqimux lil Jehovah?

²⁰ Meta tara dawk ir-​ritratti taʼ tfal bil-​ġuħ, qatt tixtieq tkun bħalhom? U żgur li le! Madankollu, xi żgħażagħ f’xi familji Kristjani juru li jixtiequ jkunu bħall-​uħud taʼ madwarhom li qed ibatu minn ġuħ spiritwali. X’aktarx li żgħażagħ bħal dawn jaħsbu li ż-​żgħażagħ fid-​dinja huma bla problemi taʼ xejn, sempliċement qed igawdu l-​ħajja. Jinsew li dawn l-​individwi jinsabu ’l bogħod minn Jehovah. (Efesin 4:17, 18) Huma jinsew ukoll l-​effetti ħżiena tal-​ġuħ spiritwali. Xi wħud minn dawn huma tqala mhix mixtieqa fiż-​żgħożija u l-​effetti emozzjonali u fiżiċi taʼ l-​immoralità, it-​tipjip, ix-​xorb, u l-​abbuż tad-​drogi. Il-​ġuħ spiritwali jikkaġuna spirtu ribelluż kif ukoll nuqqas taʼ tama u direzzjoni fil-​ħajja.

21. Kif nistgħu nipproteġu lilna nfusna milli nadottaw l-​attitudnijiet mhux xierqa taʼ dawk li ma jqimux lil Jehovah?

²¹ Għalhekk, meta tkun l-​iskola fost uħud li m’humiex sħabek li jqimu lil Jehovah, tħallihomx jinfluwenzawk bl-​attitudnijiet tagħhom. (2 Korintin 4:18) Xi wħud se jitkellmu fuq affarijiet spiritwali bi stmerrija. Barra minn hekk, il-​mezzi tax-​xandir se jipproduċu propaganda sottili, billi jimplikaw li huwa normali li tikkommetti l-​immoralità, li tisker, u li tuża lingwaġġ mhux xieraq. Irreżisti din l-​influwenza. Kompli issieħeb regolarment maʼ wħud li għandhom “fidi u kuxjenza tajba.” ‘Ħabrek dejjem fil-​ħidma tal-​Mulej.’ (1 Timotju 1:19; 1 Korintin 15:58) Ibqaʼ bieżel fis-​Sala tas-​Saltna u fis-​servizz taʼ l-​għalqa. Matul is-​snin li tqattaʼ l-​iskola, minn żmien għal żmien, ħu sehem fis-​servizz bħala pijunier awżiljarju. Saħħaħ il-​ħarsa spiritwali tiegħek b’dan il-​mod, u ma titlifx il-​bilanċ.—2 Timotju 4:5.

22, 23. (a) Żagħżugħ Kristjan għala jieħu deċiżjonijiet li ħafna drabi xi wħud ma jifhmux? (b) Iż-​żgħażagħ x’inhuma inkuraġġiti li jagħmlu?

²² Meta tqis l-​affarijiet b’mod spiritwali x’aktarx li se tieħu deċiżjonijiet li oħrajn ma jifhmuhomx. Per eżempju, żagħżugħ Kristjan kien mużiċist b’talent kbir u fl-​iskola kien student li jġib marki għoljin ħafna f’kull suġġett. Meta ggradwa, ix-​xogħol li għażel kien dak taʼ li jnaddaf it-​twieqi flimkien maʼ missieru biex b’hekk ikun jistaʼ jwettaq il-​vokazzjoni tiegħu bħala evanġelizzatur full-time, jew pijunier. L-​għalliema tiegħu qatt ma fehmu r-​raġunijiet għad-​deċiżjoni tiegħu, imma jekk int ersaqt qrib lejn Jehovah, aħna ċerti li int fhimt.

²³ Hekk kif tikkunsidra kif tistaʼ tuża ż-​żgħożija tiegħek bl-​aħjar mod, ‘aħżen għalik innifsek teżor sabiħ għal li ġej, biex bih tikseb il-​ħajja, il-​ħajja vera.’ (1 Timotju 6:19) Kun determinat li ‘tiftakar f’min ħalqek’ fiż-​żgħożija tiegħek—u tul ħajtek kollha. Dan hu l-​uniku mod kif tistaʼ tipprepara għall-​futur mimli suċċess, futur li qatt m’hu se jispiċċa.

Int X’Tikkonkludi?

• Liema parir ispirat jgħin liż-​żgħażagħ jippjanaw għall-​futur?

• X’inhuma xi modi li bihom żagħżugħ jistaʼ ‘jersaq lejn Alla’?

• X’inhuma xi deċiżjonijiet li żagħżugħ jieħu u li se jeffettwawlu l-​futur tiegħu?

[Stampi f’paġna 15]

Se tħalli int il-​miri persunali jisirqulek l-​enerġija u l-​entużjażmu taʼ żgħożitek?

[Stampa f’paġna 16, 17]

Żgħażagħ Kristjani għaqlin iżommu l-​viżjoni spiritwali tagħhom ċara