Ħu Gost bl-​Istudju Persunali tal-​Kelma t’Alla

“Naħseb f’kull ma int għamilt; nixtarr l-​għemejjel kbar tiegħek.”—SALM 77:13 (77:​12, NW).

1, 2. (a) Għala rridu nwarrbu l-​ħin biex nimmeditaw? (b) X’jiġifieri li timmedita?

BĦALA dixxipli taʼ Ġesù Kristu, ir-​relazzjoni tagħna m’Alla u rraġunijiet għala naqdu Lilu huma żewġ affarijiet li għandhom jinteressawna profondament. Madankollu, illum il-​biċċa l-​kbira min-​nies tant jgħixu ħajja mgħaġġla li ma jħallux ħin għall-​meditazzjoni. Jinsabu mitlufin fil-​geġwiġija taʼ materjaliżmu, konsumiżmu, u ġiri bla sens wara l-​pjaċiri. Kif nistgħu nevitaw li nagħmlu ħaġa bla siwi bħal din? Bħalma nwarrbu ħin kuljum speċifikament għal attivitajiet essenzjali, bħal li nieklu u norqdu, hekk ukoll irridu nħallu ħin kuljum biex nimmeditaw fuq l-​attivitajiet u l-​għemejjel taʼ Jehovah.—Dewteronomju 8:3; Mattew 4:4.

² Ġieli tieqaf u timmedita? X’jiġifieri li timmedita? Din il-​kelma tfisser li wieħed jiffoka ħsibijietu fuq: jirrifletti jew jaħseb fil-​fond dwar xi ħaġa; li jikkunsidra speċjalment bil-​kwiet, bis-​serjetà, u fil-​fond. Dan xi jfisser għalina?

3. Maʼ xiex huwa konness direttament il-​progress spiritwali?

³ Qabel xejn, dan għandu jfakkarna f’dak li kiteb l-​appostlu Pawlu lill-​qaddej sieħbu Timotju: “Sa ma niġi, ħu ħsieb il-​qari tal-​Kotba Mqaddsa, it-​twissijiet u t-​tagħlim. . . . Dawn il-​ħwejjeġ ħu ħsiebhom [‘immedita fuqhom,’ NW], agħti ruħek għalihom [jew, “kun medhi fihom,” NW], biex kulħadd jara li int miexi ’l quddiem.” Iva, il-​mixi ’l quddiem u l-​progress kienu mistennijin, u kliem Pawlu wera li kien hemm relazzjoni diretta bejn li wieħed jimmedita fuq affarijiet spiritwali u li jimxi ’l quddiem. Dan għadu jgħodd għalina llum. Sabiex ingawdu s-​sodisfazzjon li jiġi meta nagħmlu progress spiritwali, għadna rridu ‘nimmeditaw’ u ‘nkunu medhijin’ f’affarijiet li għandhom x’jaqsmu mal-​Kelma t’Alla.—1 Timotju 4:​13-15.

4. Liema provvedimenti tistaʼ tuża biex jgħinuk timmedita regolarment fuq il-​Kelma taʼ Jehovah?

⁴ L-​aqwa ħin għalik biex timmedita jiddependi minnek u s-​sehem tiegħek fir-​rutina tal-​familja. Ħafna jimmeditaw fuq vers mill-​Bibbja kmieni fil-​għodu meta jaqraw mill-​ktejjeb Neżaminaw l-​Iskrittura Kuljum. Fil-​fatt, xi 20,000 volontier fid-​djar Betel madwar id-​dinja jibdew il-​ġurnata tagħhom billi jagħmlu kwarta jikkunsidraw il-​vers Bibliku għal dak in-​nhar. Għalkemm kull fil-​għodu jkun hemm biss ftit uħud mill-​familja taʼ Betel li jikkummentaw b’mod verbali, il-​bqija jimmeditaw fuq dak li jkun qed jintqal u jinqara. Xhieda oħra jimmeditaw fuq il-​Kelma t’Alla waqt li jkunu sejrin ix-​xogħol. Huma jisimgħu l-​awdjokasetts tal-​Bibbja u tar-​rivisti It-​Torri taʼ l-​Għassa u Stenbaħ! li huma disponibbli b’xi lingwi. Ħafna nisa tad-​dar jagħmlu dan waqt li jkunu qed jagħmlu l-​faċendi. Fil-​fatt, ikunu qed jimitaw lis-​salmista Asaf, li kiteb: “Niftakar f’għemilek, Mulej; naħseb fl-​għeġubijiet li għamilt fl-​imgħoddi. Naħseb f’kull ma int għamilt; nixtarr l-​għemejjel kbar tiegħek.”—Salm 77:​12, 13 (77:​11, 12, NW).

Attitudni Xierqa Ġġib Riżultati Pożittivi

5. L-​istudju persunali għala għandu jkun importanti għalina?

⁵ Fiż-​żminijiet moderni tagħna tat-​TV, vidjos, u kompjuters, il-​qari ħa daqqa taʼ ħarta kbira. Dan żgur li m’għandux ikun minnu fost ix-​Xhieda taʼ Jehovah. Wara kollox, il-​qari tal-​Bibbja huwa bħal ħabel tas-​salvataġġ li jqabbadna maʼ Jehovah. Eluf taʼ snin ilu, Ġożwè sar il-​mexxej taʼ Iżrael wara Mosè. Biex jikseb il-​barka taʼ Jehovah, Ġożwè kellu jaqra l-​Kelma t’Alla għalih innifsu. (Ġożwè 1:8; Salm 1:​1, 2) Din għadha ħtieġa llum. Madankollu, minħabba edukazzjoni limitata xi wħud forsi jsibuha diffiċli biex jaqraw jew il-​qari jdejjaqhom. Mela, x’jistaʼ jgħinna biex inkunu rridu naqraw u nistudjaw il-​Kelma t’Alla? It-​tweġiba nistgħu nsibuha fil-​kliem tas-​Sultan Salamun imniżżel fi Proverbji 2:​1-6. Jekk jogħġbok iftaħ il-​Bibbja tiegħek u aqra dawn il-​versi. Imbagħad se niddiskutuhom flimkien.

6. Liema attitudni għandna nuru lejn l-​għarfien t’Alla?

⁶ L-​ewwelnett insibu dan it-​tħeġġiġ: “Ibni, jekk int tilqaʼ kliemi, u taħżen ġo fik il-​kmandamenti tiegħi billi tagħti widen għall-​għerf, u tħalli lil moħħok jifhem sewwa [jikseb “id-​dixxerniment,” NW]; . . . ” (Proverbji 2:​1, 2) X’nitgħallmu minn dan il-​kliem? Li r-​responsabbiltà taqaʼ fuqna individwalment. Innota l-​kundizzjoni “jekk tilqaʼ kliemi.” Din il-​“jekk” hija importanti għax il-​biċċa l-​kbira min-​nies ma jagħtux kas il-​Kelma t’Alla. Sabiex nieħdu gost nistudjaw il-​Kelma t’Alla, irridu nkunu lesti li nilqgħu kliem Jehovah u nqisuh bħal teżor li ma nixtiqux nitilfuh. Qatt m’għandna nħallu r-​rutina tagħna taʼ kuljum iġġagħalna nkunu tant imħabbtin jew aljenati li nibdew nittrattaw il-​Kelma t’Alla b’indifferenza, saħansitra b’dubji.—Rumani 3:​3, 4.

7. Kulmeta jkun possibbli, għala għandna nkunu preżenti u nagħtu widen fil-​laqgħat Kristjani?

⁷ Noqogħdu attenti verament u ‘nagħtu widen’ bir-​reqqa meta l-​Kelma t’Alla tkun qiegħda tiġi spjegata fil-​laqgħat Kristjani tagħna? (Efesin 4:​20, 21) ‘Inħallu lil moħħna jifhem sewwa’ biex b’hekk niksbu d-​dixxerniment? Jistaʼ jkun li l-​kelliemi ma jkunx l-​iktar wieħed t’esperjenza, imma waqt li jkun qed juża l-​Kelma t’Alla, dan jixraqlu l-​attenzjoni sħiħa tagħna. M’għandniex xi ngħidu, sabiex nagħtu widen għall-​għerf taʼ Jehovah, irridu, kulmeta jkun possibbli, inkunu preżenti għal-​laqgħat Kristjani. (Proverbji 18:1) Immaġina kemm iddiżappuntaw ruħhom dawk li forsi tilfu l-​laqgħa fil-​kamra taʼ fuq f’Ġerusalemm f’Pentekoste tat-​33 E.K.! Għalkemm il-​laqgħat tagħna m’humiex spettakolari daqs dik il-​waħda, fihom tiġi diskussa l-​Bibbja, il-​ktieb ewlieni għall-​istudju tagħna. B’hekk, kull laqgħa tistaʼ tkun barka għalina jekk nagħtu widen u nsegwu fil-​Bibbji tagħna.—Atti 2:​1-4; Lhud 10:​24, 25.

8, 9. (a) X’jirrikjedi minna l-​istudju persunali? (b) Kif tqabbel il-​valur tad-​deheb mal-​fehma taʼ l-​għarfien t’Alla?

⁸ Il-​kliem li jmiss tas-​sultan għaref jgħid: “Jekk issejjaħ l-​għerf [“il-​fehma,” NW], u tgħolli leħnek għall-​fehma t-​tajba [“għad-​dixxerniment,” NW]; . . . ” (Proverbji 2:3) Liema attitudni jew spirtu jesprimilna dan il-​kliem? Bla dubju, xewqa kbira li nifhmu l-​Kelma taʼ Jehovah! Dan il-​kliem jimplika li rridu nkunu lesti li nistudjaw bl-​għan li niksbu d-​dixxerniment, li nifhmu x’inhi r-​rieda taʼ Jehovah. M’għandniex xi ngħidu, biex nagħmlu hekk hemm bżonn sforz, u dan iġibna għall-​kliem u t-​tixbiha li jmiss taʼ Salamun.—Efesin 5:​15-17.

⁹ Hu jkompli: “Jekk tfittex l-​għerf [il-fehma] bħall-​fidda, u tħaffer għalih bħal teżor moħbi; . . . ” (Proverbji 2:4) Dan iġagħalna naħsbu f’dak li rnexxielhom iwettqu fil-​minjieri l-​irġiel li matul is-​sekli fittxew id-​deheb u l-​fidda, metalli hekk imsejħin prezzjużi. Kien hemm min qatel għad-​deheb. Oħrajn qattgħu ħajjithom kollha jipprovaw isibuh. Iżda, kemm jiswa verament id-​deheb? Jekk tintilef f’deżert u tkun qed tmut bl-​għatx, x’kont tippreferi: ingott tad-​deheb jew tazza ilma? Madankollu, kemm fittxewh b’żelu dan id-​deheb in-​nies, bil-​valur artifiċjali tiegħu li dejjem jinbidel!a Kemm iktar għandna nfittxu b’żelu l-​għerf, id-​dixxerniment, u l-​fehma t’Alla u tar-​rieda tiegħu! Imma x’inhuma l-​benefiċċji taʼ tfittxija bħal din?—Salm 19:​8-11 (19:​7-10, NW); Proverbji 3:​13-18.

10. X’nistgħu nsibu jekk nistudjaw il-​Kelma t’Alla?

¹⁰ Il-​kliem taʼ Salamun ikompli: “Mbagħad tifhem il-​biżaʼ tal-​Mulej, u ssib it-​tagħrif [“l-​għarfien,” NW] taʼ Alla.” (Proverbji 2:5) Kemm hu ħsieb taʼ l-​għaġeb—li aħna bħala bnedmin imperfetti nistgħu nsibu l-​għarfien t’Alla, Jehovah, il-​Mulej Sovran taʼ l-​univers! (Salm 73:28; Atti 4:24) Il-​filosfi u l-​hekk imsejħa għorrief tad-​dinja ilhom sekli sħaħ jipprovaw jifhmu l-​misteri tal-​ħajja u l-​univers. Madankollu, ma rnexxilhomx isibu l-​għarfien t’Alla. Għala? Għalkemm dan ilu disponibbli għal eluf taʼ snin fil-​Kelma t’Alla, il-​Bibbja, huma jwarrbuh bħala xi ħaġa sempliċi żżejjed, u b’hekk ma jaċċettawhx u ma jifhmuhx.—1 Korintin 1:​18-21.

11. X’inhuma xi benefiċċji taʼ l-​istudju persunali?

¹¹ Inċentiv ieħor li Salamun jenfasizza hu: “Il-​Mulej jagħti l-​għerf, minn fommu ġej it-​tagħrif u d-​dehen [“dixxerniment,” NW].” (Proverbji 2:6) Jehovah minn qalbu u b’mod ġeneruż jagħti għerf, għarfien, u dixxerniment lil kulmin lest li jfittex għalihom. Żgur li għandna kull raġuni biex napprezzaw l-​istudju persunali tal-​Kelma t’Alla, avolja jeħtieġ sforz, dixxiplina, u sagrifiċċju. Għallinqas għandna kopji stampati tal-​Bibbja u ma rridux noqogħdu nagħmlu kopji bil-​miktub, bħalma kellhom jagħmlu xi wħud fl-​imgħoddi!—Dewteronomju 17:​18, 19.

Biex Ngħixu Sewwa Kif Jixraq lil Jehovah

12. X’għandu jkun il-​motiv tagħna meta nfittxu l-​għarfien t’Alla?

¹² X’għandu jkun il-​motiv għall-​istudju persunali tagħna? Biex nidhru aħjar minn ħaddieħor? Biex nuru li għandna iktar għarfien? Biex attwalment insiru nafu dak kollu li hemm fil-​Bibbja? Le. Il-​mira tagħna hi li nkunu Kristjani f’dak kollu li ngħidu u nagħmlu, dejjem lesti li ngħinu lil oħrajn, fl-​ispirtu rifreskanti taʼ Kristu. (Mattew 11:​28-30) L-​appostlu Pawlu wissa: “L-​għerf [“għarfien,” NW] jonfoħna; l-​imħabba tibnina.” (1 Korintin 8:1) Għalhekk, għandu jkollna l-​attitudni umli li wera Mosè meta qal lil Jehovah: “Għallimni triqatek, biex nagħrfek u nsib ħniena quddiemek.” (Eżodu 33:13) Iva, għandna nixtiequ li jkollna l-​għarfien sabiex nogħġbu lil Alla, mhux biex nimpressjonaw lin-​nies. Irridu nkunu qaddejja t’Alla li huma umlin u li jgħixu kif jixraq lilu. Kif nistgħu nilħqu din il-​mira?

13. X’hemm bżonn biex wieħed ikun qaddej t’Alla kif jixraq Lilu?

¹³ Pawlu ta parir lil Timotju dwar kif jogħġob lil Alla billi qal: “Agħmel mill-​aħjar biex iġġib ruħek quddiem Alla, bħala bniedem li għadda mill-​prova, bħala ħaddiem li m’għandux mniex jistħi, li jxandar bir-​reqqa [‘jimmaniġġa sewwa,’ NW] l-​kelma tal-​verità.” (2 Timotju 2:15) L-​espressjoni ‘timmaniġġa sewwa’ ġejja minn verb Grieg li huwa msawwar b’żewġ kelmiet jew iktar li oriġinalment kien ifisser “taqtaʼ dritt.” (Kingdom Interlinear) Skond xi wħud, dan jissuġġerixxi l-​idea taʼ ħajjât li jaqtaʼ d-​drapp skond mudell, taʼ bidwi li jagħmel ir-​raddi fl-​għalqa, eċċetra. Hu x’inhu li jissuġġerixxi, ir-​riżultat finali jrid ikun preċiż, jew dritt. Il-​punt hu li biex ikun qaddej approvat t’Alla kif jixraq Lilu, Timotju kellu ‘jagħmel mill-​aħjar’ biex ikun ċert li t-​tagħlim u l-​kondotta tiegħu jkunu fi qbil mal-​kelma tal-​verità.—1 Timotju 4:16.

14. L-​istudju persunali tagħna kif għandu jeffettwana f’dak li nagħmlu u ngħidu?

¹⁴ Pawlu ħareġ l-​istess punt meta ħeġġeġ lil sħabu l-​Kristjani f’Kolossi biex ‘jgħixu sewwa kif jixraq lill-​Mulej u jogħġbuh f’kollox’ billi jagħmlu l-​frott f’kull opra tajba u jikbru fl-​għarfien t’Alla. (Kolossin 1:10) Pawlu hawn jagħmel konnessjoni bejn li wieħed jgħix kif jixraq lil Jehovah u li jagħmel il-​frott f’kull opra tajba kif ukoll li jikber fl-​għarfien t’Alla. Fi kliem ieħor, dak li jgħodd għal Jehovah m’huwiex biss kemm napprezzaw l-​għarfien imma wkoll kemm inżommu mill-​qrib mal-​Kelma t’Alla f’dak li nagħmlu u ngħidu. (Rumani 2:​21, 22) Dan ifisser li l-​istudju persunali tagħna għandu jeffettwa l-​mod kif naħsbu u naġixxu jekk irridu nogħġbu lil Alla.

15. Kif nistgħu nipproteġu u nikkontrollaw lil moħħna u ħsibijietna?

¹⁵ Illum, Satana huwa determinat li jkisser l-​ispiritwalità tagħna billi jmexxi ’l quddiem battalja li tinvolvi l-​moħħ. (Rumani 7:​14-25) Għalhekk, għandna nipproteġu u nikkontrollaw lil moħħna u ħsibijietna sabiex inkunu wħud li jgħixu kif jixraq lil Alla tagħna, Jehovah. L-​arma li għandna hija “l-​għarfien taʼ Alla,” li kapaċi ‘ijassar kull ħsieb għall-​ubbidjenza lil Kristu.’ Din hija raġuni akbar għala għandna noqogħdu attenti li nistudjaw il-​Bibbja kuljum, għax irridu nqaċċtu ’l barra minn moħħna ħsibijiet egoistiċi u karnali.—2 Korintin 10:5.

Għajnuniet biex Nifhmu

16. Kif nistgħu nibbenefikaw hekk kif Jehovah jgħallimna?

¹⁶ It-​tagħlim taʼ Jehovah iġib benefiċċji spiritwali u fiżiċi. M’huwiex teoloġija bla gost u akkademika. B’hekk naqraw: “Jien hu l-​Mulej, Alla tiegħek; jien ngħallmek għall-​ġid tiegħek, u nqabbdek it-​triq fejn għandek timxi.” (Isaija 48:17) Jehovah kif iqabbadna t-​triq li hija taʼ ġid għalina? L-​ewwelnett, għandna l-​Kelma mnebbħa tiegħu, il-​Bibbja Mqaddsa. Din hija l-​ktieb ewlieni għall-​istudju tagħna li nirreferu għalih spiss. Għalhekk huwa tajjeb li nsegwu dak li jintqal fil-​laqgħat Kristjani billi niftħu l-​Bibbji tagħna. Il-​benefiċċji li jiġu jekk nagħmlu dan jistgħu jidhru mir-​rakkont dwar l-​ewnuku Etjopjan, imniżżel f’Atti kapitlu 8.

17. X’ġara fil-​każ taʼ l-​ewnuku Etjopjan, u dan x’juri?

¹⁷ L-​ewnuku Etjopjan kien ikkonverta għall-​Ġudaiżmu. Hu kien jemmen sinċerament f’Alla, u kien jistudja l-​Iskrittura. Waqt li kien qed jivvjaġġa fil-​karru tiegħu, l-​ewnuku kien qed jaqra silta minn Isaija meta Filippu ġera għal ħdejh u staqsieh: “Dan li qed taqra qiegħed tifhmu?” X’wieġbu l-​ewnuku? “‘Kif nistaʼ nifhem jekk xi ħadd ma jurinix?’ Mbagħad stieden lil Filippu biex jitlaʼ bilqiegħda ħdejh.” Imbagħad Filippu, bid-​direzzjoni taʼ l-​ispirtu, għen lill-​ewnuku jifhem il-​profezija taʼ Isaija. (Atti 8:​27-35) Dan x’juri? Li l-​qari tagħna tal-​Bibbja fil-​privat m’huwiex biżżejjed. Jehovah, bl-​ispirtu tiegħu, juża l-​klassi taʼ l-​ilsir leali u diskret biex tgħinna nifhmu l-​Kelma tiegħu fil-​ħin u fil-​waqt. Dan kif isir?—Mattew 24:​45-​47; Luqa 12:42.

18. Il-​klassi taʼ l-​ilsir leali u diskret kif tgħinna?

¹⁸ Għalkemm il-​klassi taʼ l-​ilsir hija deskritta bħala leali u diskreta, Ġesù ma qalx li kienet se tkun infallibbli. Dan il-​grupp t’aħwa midlukin leali għadu magħmul minn Kristjani imperfetti. Avolja bl-​aħjar intenzjonijiet, dawn jistgħu jieħdu żball, bħalma kultant ħadu xi wħud fl-​ewwel seklu. (Atti 10:​9-15; Galatin 2:​8, 11-14) Madankollu, il-​motiv tagħhom huwa pur, u Jehovah qed jużahom biex jipprovdulna l-​għajnuniet għall-​istudju tal-​Bibbja biex nibnu l-​fidi tagħna fil-​Kelma t’Alla u l-​wegħdi tiegħu. Il-​provvediment bażiku li tana l-​ilsir għall-​istudju persunali huwa n-​New World Translation of the Holy Scriptures. Din issa hi disponibbli, jew sħiħa jew partijiet minnha, bi 42 lingwa, u ġew stampati 114-il kopja tagħha f’diversi edizzjonijiet. Kif nistgħu nużawha b’mod effettiv fl-​istudju persunali tagħna?—2 Timotju 3:​14-17.

19. Liema huma xi karatteristiċi tan-​New World Translation—With References li jistgħu jkunu t’għajnuna fl-​istudju persunali?

¹⁹ Ħu per eżempju n-​New World Translation of the Holy Scriptures—With References. Din għandha kolonni taʼ referenzi marġinali, noti taʼ taħt, indiċi żgħir tal-​kliem f’għamla taʼ “Bible Words Indexed” u “Footnote Words Indexed,” u Appendiċi estensiva li tkopri 43 suġġett, inkluż mapep u tabelli. Hemm ukoll l-​“Introduction,” li tagħti spjegazzjoni dwar il-​ħafna sorsi użati għal din it-​traduzzjoni unika tal-​Bibbja. Jekk inhi disponibbli b’lingwa li tistaʼ tifhem, agħmel li tistaʼ biex issir midħla taʼ dawn il-​karatteristiċi u użahom. Fi kwalunkwe każ, il-​Bibbja hija l-​pedament għall-​programm taʼ studju tagħna, u permezz tan-​New World Translation, għandna verżjoni li b’mod xieraq tenfasizza l-​isem divin hekk kif tiġbed l-​attenzjoni lejn il-​ħakma tas-​Saltna t’Alla.—Salm 149:​1-9; Danjel 2:44; Mattew 6:​9, 10.

20. Issa liema mistoqsijiet dwar l-​istudju persunali jeħtieġu tweġiba?

²⁰ Issa, għandna mnejn nistaqsu: ‘Liema għajnuna oħra għandna bżonn biex nifhmu l-​Bibbja? Kif nistgħu nippjanaw il-​ħin għall-​istudju persunali? Kif nistgħu nagħmlu l-​istudju tagħna iktar effettiv? L-​istudju tagħna kif għandu jeffettwa lil oħrajn?’ L-​artiklu li jmiss se jikkunsidra dawn l-​aspetti vitali tal-​progress Kristjan tagħna.

Studju Persunali li Jħejjina biex Inkunu Għalliema Effettivi

“Dawn il-​ħwejjeġ ħu ħsiebhom, agħti ruħek għalihom, biex kulħadd jara li int miexi ’l quddiem. Għasses fuqek innifsek u fuq it-​tagħlim tiegħek.” —1 TIMOTJU 4:​15, 16.

1. X’inhi l-​verità dwar il-​ħin u l-​istudju persunali?

“KOLLOX għandu żmienu,” tgħid il-​Bibbja f’Koħèlet 3:1. Dan żgur li japplika għall-​istudju persunali. Ħafna jsibuha iebsa li jimmeditaw fuq affarijiet spiritwali jekk ma jkunx f’ħin tajjeb jew ma jkunux f’post addattat. Per eżempju, wara ġurnata mimlija xogħol u ikla kbira fil-​għaxija, se jkollok aptit tistudja, speċjalment jekk tkun intfajt fuq il-​pultruna favorita tiegħek quddiem it-​TV? Ma tantx. Mela, x’inhi s-​soluzzjoni? B’mod ċar, għandna nagħżlu meta u fejn nistudjaw bl-​għan li nibbenefikaw kemm nistgħu mill-​isforzi tagħna.

2. Taʼ spiss liema jkun l-​aħjar ħin għall-​istudju persunali?

² Ħafna jsibu li l-​aħjar ħin għalihom biex jistudjaw huwa l-​ewwel ħaġa fil-​għodu meta normalment ikunu l-​iktar imqajmin. Oħrajn jużaw il-​waqfa taʼ nofsinhar biex jagħmlu ftit ħin jistudjaw. Fl-​eżempji li ġejjin, innota r-​referenza għall-​ħin meta jsiru attivitajiet spiritwali importanti. Is-​Sultan David taʼ Iżrael tal-​qedem kiteb: “Fakkarni mas-​sebħ fi tjubitek, għax fik jien nittama. Għarrafni t-​triq li minnha għandi ngħaddi, għax lejk jien nerfaʼ ruħi.” (Salm 143:8) Il-​profeta Isaija wera apprezzament simili meta qal: “Sidi l-​Mulej tani lsien taʼ wieħed jitgħallem, biex nagħraf ngħin lill-​għajjien b’xi kelma. Taʼ kull filgħodu jqajjimli ’l widinti, biex nismaʼ bħal wieħed jitgħallem.” Il-​punt hu li għandna bżonn nistudjaw u nikkomunikaw intimament maʼ Jehovah meta nkunu fl-​aqwa tagħna mentalment, ikun xi jkun il-​ħin tal-​ġurnata.—Isaija 50:​4, 5; Salm 5:4 (5:​3, NW); 88:14 (88:​13, NW).

3. Liema huma l-​aħjar kundizzjonijiet għal studju effettiv?

³ Fattur ieħor għal studju effettiv hu li m’għandniex nagħżlu li npoġġu fuq l-​iktar pultruna jew sufan komdu. Dan m’huwiex se jżommna mqajmin. Meta nkunu qed nistudjaw, moħħna jrid jiġi inkuraġġit jaħdem, u wisq kumdità fiżika donnha tagħmel l-​oppost. Għall-​istudju u l-​meditazzjoni jkun aħjar ukoll li jkun hemm il-​kwiet u ma jkunx hemm affarijiet xi jtellfu. Mhux se jkollok l-​aħjar riżultati jekk tipprova tistudja meta r-​radju, it-​TV, jew it-​tfal ikunu qed jikkompetu għall-​attenzjoni tiegħek. Meta Ġesù ried jimmedita, hu telaq lejn post fil-​kwiet. Hu tkellem ukoll dwar il-​valur taʼ li ssib post privat biex titlob.—Mattew 6:6; 14:13; Mark 6:​30-​32.

Studju Persunali li Jħejjina biex Inwieġbu

4, 5. Il-browxer X’Jirrikjedi b’liema modi huwa t’għajnuna prattika?

⁴ L-​istudju persunali jkun sodisfaċenti meta nużaw id-​diversi għajnuniet għall-​fehma tal-​Bibbja biex inħaffru iżjed fil-​fond f’xi suġġett, speċjalment meta nagħmlu dan biex inwieġbu l-​mistoqsijiet taʼ xi ħadd sinċier. (1 Timotju 1:4; 2 Timotju 2:23) Ħafna wħud ġodda bdew billi jistudjaw il-​browxer Alla X’Jirrikjedi Minna?,a li issa huwa disponibbli b’261 lingwa. Dan huwa pubblikazzjoni sempliċi ħafna imma preċiża, ibbażata għalkollox fuq il-​Bibbja. Jgħin lill-​qarrejja tiegħu biex fi żmien qasir jifhmu x’jirrikjedi Alla għall-​qima vera. Madankollu, il-​mod kif inhu mqassam ma jippermettix studju dettaljat taʼ kull suġġett. Jekk l-​istudent tiegħek tal-​Bibbja jqajjem mistoqsijiet serji dwar ċerti suġġetti Bibliċi li tkunu qed tiddiskutu, kif tistaʼ ssib iktar informazzjoni Biblika li se tgħinu jwieġeb dawk il-​mistoqsijiet?

⁵ Għal dawk li għandhom il-​Watchtower Library fuq is-​CD-ROM bil-​lingwa tagħhom, huwa faċli li jilħqu għadd kbir taʼ sorsi taʼ informazzjoni fuq xi kompjuter. Imma xi ngħidu għal dawk li m’għandhomx din l-​għodda? Ejja neżaminaw żewġ suġġetti li huma kunsidrati fil-​browxer X’Jirrikjedi sabiex naraw kif nistgħu nżidu l-​fehma tagħna u nkunu nistgħu nwieġbu iktar fid-​dettall—speċjalment jekk xi ħadd jistaqsi mistoqsijiet bħal, Min hu Alla, u kif kien tassew Ġesù?—Eżodu 5:2; Luqa 9:​18-20; 1 Pietru 3:15.

Min Hu Alla?

6, 7. (a) Liema mistoqsija tqum rigward Alla? (b) Ċertu qassis liema ħaġa importanti ħalla barra meta kien qed jagħti taħdita?

⁶ Lezzjoni numru 2 fil-​browxer X’Jirrikjedi twieġeb il-​mistoqsija vitali, Min hu Alla? Dan huwa punt fundamentali għaliex persuna ma tistax tqim lil dak Alla veru jekk ma tkunx tafu jew forsi tiddubita li jeżisti. (Rumani 1:​19, 20; Lhud 11:6) Madankollu, in-​nies mad-​dinja kollha għandhom mijiet taʼ ideat dwar min hu Alla. (1 Korintin 8:​4-6) Kull filosofija reliġjuża għandha tweġiba differenti għall-​mistoqsija dwar l-​identità t’Alla. Fil-​Kristjaneżmu, il-​biċċa l-​kbira mir-​reliġjonijiet iqisu lil Alla bħala Trinità. Qassis famuż fl-​Istati Uniti ta taħdita li kien jisimha “Tafu lil Alla?” imma lanqas darba fid-​diskors tiegħu ma semma l-​isem divin, avolja kkwota kemm-il darba mill-​Iskrittura Ebrajka. M’għandniex xi ngħidu, hu qara minn traduzzjoni tal-​Bibbja li tuża l-​kelma ambigwa u anonima “Mulej” minflok Jehovah jew Jaħweh.

⁷ X’punt vitali qabiżlu lil dan il-​qassis meta kkwota Ġeremija 31:​33, 34: “Ma jgħallmux iżjed lil xulxin, u ħadd ma jgħid lil ħuh: ‘Agħraf il-​Mulej’ [Ebrajk, ‘Agħraf lil Jehovah’], għaliex ilkoll kemm huma jkunu jafuni, miż-​żgħir sal-​kbir, oraklu tal-​Mulej [Ebrajk, Jehovah].” It-​traduzzjoni li uża neħħiet l-​isem divin distint, Jehovah.—Salm 83:19 (83:​18, NW).

8. X’juri kemm huwa importanti li jintuża l-​isem t’Alla?

⁸ Salm 8:9 fin-​New World Translation juri għala l-​użu taʼ l-​isem Jehovah huwa daqshekk sinifikanti: “O Jehovah Mulej tagħna, kemm hu maestuż ismek fl-​art kollha!” Qabbel dan maʼ: “Mulej, Sid tagħna, kemm hu kbir ismek fl-​art kollha!” (Għaqda Biblika Maltija [vers 10]; ara wkoll Saydon [vers 10], Karm Żammit [vers 9], King James Version [vers 9]) Madankollu, kif semmejna fl-​artiklu taʼ qabel, nistgħu niksbu l-​għarfien t’Alla jekk inħallu lill-​Kelma tiegħu tilluminana. Imma liema għajnuna għall-​istudju tal-​Bibbja se twiġbilna faċilment il-​mistoqsijiet tagħna dwar l-​importanza taʼ l-​isem divin?—Proverbji 2:​1-6.

9. (a) Liema pubblikazzjoni tistaʼ tgħinna nispjegaw l-​importanza taʼ li nużaw l-​isem divin? (b) Ħafna tradutturi kif naqsu li juru rispett lejn l-​isem t’Alla?

⁹ Nistgħu mmorru fil-​browxer The Divine Name That Will Endure Forever (L-Isem Divin li Se Jibqaʼ għal Dejjem), li ġie tradott b’69 lingwa.b Is-​sezzjoni intitolata “God’s Name—Its Meaning and Pronunciation” (L-Isem t’Alla—It-​Tifsir u l-​Pronunzja Tiegħu) (paġni 6-11) turi b’mod ċar li t-​Tetragrammaton Ebrajk (mill-Grieg, li jfisser “erbaʼ ittri”) jidher kważi 7,000 darba fil-​kitbiet oriġinali Ebrajċi antiki. Madankollu, il-​kleru u t-​tradutturi tal-​Ġudaiżmu u l-​Kristjaneżmu neħħewh apposta mill-​maġġuranza tat-​traduzzjonijiet tagħhom tal-​Bibbja.c Kif jistgħu jistqarru li jafu lil Alla u kif jistaʼ hu jaċċetta r-​relazzjoni tagħhom miegħu jekk ma jridux isejħulu b’ismu? L-​isem veru tiegħu jiftaħ it-​triq biex wieħed jifhem x’inhuma l-​iskopijiet tiegħu u min hu. Iktar minn hekk, x’tiswa l-​parti fit-​talba mudell taʼ Ġesù “Missierna, li inti fis-​smewwiet, jitqaddes ismek” jekk l-​isem t’Alla lanqas biss jintuża?—Mattew 6:9; Ġwann 5:43; 17:6.

Min Hu Ġesù Kristu?

10. B’liema modi nistgħu niksbu stampa kompluta tal-​ħajja u l-​ministeru taʼ Ġesù?

¹⁰ Lezzjoni numru 3 fil-​browxer X’Jirrikjedi hija intitolata “Min hu Ġesù Kristu?” F’sitt paragrafi biss, din tagħti deskrizzjoni qasira ħafna taʼ Ġesù, l-​oriġini tiegħu, u l-​iskop għala ġie fuq l-​art. Madankollu, jekk trid rakkont komplet taʼ ħajtu m’hemmx aħjar—apparti r-​rakkonti taʼ l-​Evanġelji stess—mill-​ktieb L-​Aqwa Bniedem Li Qatt Għex, li huwa disponibbli b’111-il lingwa.* Dan il-​ktieb jippreżenta rakkont kronoloġiku komplut tal-​ħajja u t-​tagħlim taʼ Kristu, ibbażat fuq l-​erbaʼ Evanġelji. Fih 133 kapitlu, u dawn ikopru l-​ġrajjiet fil-​ħajja u l-​ministeru taʼ Ġesù. Għal metodu differenti u analitiku, tistaʼ tirreferi għall-​Insight, it-​2 Volum, taħt it-​titlu “Jesus Christ” (Ġesù Kristu).

11. (a) Ix-Xhieda taʼ Jehovah kif inhuma differenti fit-​twemmin tagħhom dwar Ġesù? (b) X’inhuma xi versi Bibliċi li b’mod ċar juru li d-​duttrina tat-​Trinità hija żbaljata, u liema pubblikazzjoni hija t’għajnuna f’dan ir-​rigward?

¹¹ Fil-​Kristjaneżmu, il-​kontroversja rigward Ġesù tiċċentra fuq jekk huwiex “l-​Iben t’Alla” kif ukoll “Alla l-​Iben”—fi kliem ieħor id-​dibattitu fuq it-​Trinità, li Il-​Katekiżmu tal-​Knisja Kattolika jsejħilha “l-​misteru ewlieni tal-​fidi . . . nisranija.” Ix-​Xhieda taʼ Jehovah, b’differenza għar-​reliġjonijiet tal-​Kristjaneżmu, jemmnu li Ġesù huwa t’oriġini divina imma m’huwiex Alla. Diskussjoni eċċellenti dwar dan is-​suġġett tinsab fil-​browxer Għandek Int Temmen fit-​Trinità?, tradott b’95 lingwa.d Fost l-​għadd taʼ skritturi li juża biex juri li d-​duttrina tat-​Trinità hija żbaljata hemm Mark 13:32 u l-​1 Korintin 15:​24, 28.

12. Liema mistoqsija oħra jixirqilha l-​attenzjoni tagħna?

¹² Id-​diskussjonijiet li għadna kemm semmejna rigward Alla u Ġesù Kristu qegħdin biex juru kif nistgħu nagħmlu studju persunali bl-​għan li ngħinu lil dawk li m’humiex midħla tal-​verità Biblika ħalli jiksbu għarfien eżatt. (Ġwann 17:3) Iżda, xi ngħidu għal dawk li ilhom jissieħbu mal-​kongregazzjoni Kristjana għal bosta snin? Bl-​għarfien Bibliku kollu li ġabru tul iż-​żmien, għandhom huma xorta l-​bżonn li jgħassu, jew joqogħdu attenti, għall-​istudju persunali tal-​Kelma taʼ Jehovah?

Għala ‘Ngħassu’?

13. Xi wħud liema ħarsa żbaljata jistaʼ jkollhom dwar l-​istudju persunali?

¹³ Xi wħud li ilhom membri tal-​kongregazzjoni għal bosta snin jistgħu jieħdu l-​vizzju li jistrieħu biss fuq l-​għarfien Bibliku li jkunu ħadu fl-​ewwel ftit snin bħala Xhieda taʼ Jehovah. Faċli li wieħed jirraġuna: “M’għandix għalfejn nistudja bis-​serjetà daqs dawk li huma iktar ġodda. Wara kollox, ara kemm-il darba għaddejt il-​Bibbja u l-​pubblikazzjonijiet Bibliċi tul is-​snin.” Dan ikun daqslikieku qed jgħid: “M’hemmx għalfejn noqgħod attent dwar kemm niekol issa, għax ara kemm-il ikla kilt fil-​passat.” Nafu li l-​ġisem jeħtieġ kontinwament in-​nutriment minn ikel tajjeb u preparat sew sabiex inżommuh f’saħħtu u attiv. Kemm iktar japplika dan biex inżommu s-​saħħa u l-​qawwa spiritwali tagħna!—Lhud 5:​12-14.

14. Għala għandna bżonn ngħassu fuqna nfusna kontinwament?

¹⁴ Mela, ilkoll kemm aħna, sew jekk ilna ħafna nistudjaw il-​Bibbja u sew jekk le, għandna bżonn nisimgħu mill-​parir taʼ Pawlu lil Timotju, li sa dakinhar kien indokratur matur u responsabbli: “Għasses fuqek innifsek u fuq it-​tagħlim tiegħek; żomm sħiħ f’dawn il-​ħwejjeġ, għax, jekk tagħmel hekk, issalva lilek innifsek u lil dawk li jisimgħuk.” (1 Timotju 4:​15, 16) Għala għandna noqogħdu attenti ħafna għall-​parir taʼ Pawlu? Ftakar, Pawlu wkoll ġibed l-​attenzjoni li aħna għandna ġlieda kontra “t-​tnassis [atti makakki] tax-​Xitan” u “kontra l-​ispirti ħżiena li jgħammru fil-​wisaʼ tas-​smewwiet.” U l-​appostlu Pietru wissa li x-​Xitan qiegħed “ifittex ’il min sa jiblaʼ,” u dan jistaʼ jkun kwalunkwe wieħed minna. Jekk inħossuna sodisfatti bina nfusna mingħajr ma nindunaw bil-​periklu nistgħu nkunu qed nagħtuh l-​opportunità li jkun qed ifittex.—Efesin 6:​11, 12; 1 Pietru 5:8.

15. Liema difiża spiritwali għandna, u kif nistgħu nżommuha f’qagħda tajba?

¹⁵ Allura, x’difiża għandna? L-​appostlu Pawlu jfakkarna: “Ħudu fuqkom l-​armatura taʼ Alla, ħalli tkunu tistgħu tieqfu fi żmien il-​ħażen, u, wara li tkunu għamiltu ħilitkom kollha, żżommu weqfin.” (Efesin 6:13) L-​effettività taʼ din l-​armatura spiritwali ma tiddependix biss mill-​kwalità tagħha fil-​bidu imma wkoll mill-​manutenzjoni regulari. Għalhekk, din l-​armatura kompluta li jipprovdi Alla għandha tinkludi għarfien aġġornat tal-​Kelma t’Alla. Dan jenfasizza l-​importanza taʼ li nżommu ruħna aġġornati mal-​fehma tagħna tal-​verità kif rivelata minn Jehovah permezz tal-​Kelma tiegħu u permezz tal-​klassi taʼ l-​ilsir leali u diskret. L-​istudju persunali tal-​Bibbja u tal-​pubblikazzjonijiet Bibliċi b’mod regulari huwa vitali għall-​manutenzjoni taʼ l-​armatura spiritwali tagħna.—Mattew 24:​45-47; Efesin 6:​14, 15.

16. X’nistgħu nagħmlu biex inkunu ċerti li “t-​tarka tal-​fidi” tagħna tinsab f’qagħda tajba?

¹⁶ Bħala parti essenzjali mill-​armatura tagħna li tipprovdilna difiża, Pawlu jenfasizza “t-​tarka tal-​fidi,” li biha nistgħu nbiegħdu u nitfu l-​vleġeġ tan-​nar t’akkużi foloz u tagħlim apostat li jitfaʼ Satana. (Efesin 6:16) Għalhekk, huwa essenzjali li niċċekkjaw kemm hija b’saħħitha t-​tarka tal-​fidi tagħna u liema passi rridu nieħdu biex inżommuha f’qagħda tajba u nsaħħuha. Per eżempju, tistaʼ tistaqsi: ‘Kif nipprepara għall-​istudju tal-​Bibbja taʼ kull ġimgħa bl-​użu taʼ It-​Torri taʼ l-​Għassa? Studjajt biżżejjed sabiex inkun nistaʼ ‘nħajjar lil ħaddieħor għall-​imħabba u għall-​għemil tajjeb’ billi nagħti kummenti maħsubin tajjeb waqt il-​laqgħa? Niftaħha l-​Bibbja biex naqra l-​iskritturi li jkun hemm referenza għalihom imma li ma jkunux kwotati? Ninkuraġġixxi lill-​oħrajn billi nieħu sehem fil-​laqgħat b’entużjażmu?’ L-​ikel spiritwali tagħna huwa solidu, u hemm bżonn li nomogħduh sew biex nibbenefikaw bis-​sħiħ.—Lhud 5:14; 10:24.

17. (a) Liema velenu qed juża Satana biex jipprova jkissrilna l-​ispiritwalità tagħna? (b) X’inhu r-​rimedju għall-​velenu taʼ Satana?

¹⁷ Satana jaf id-​dgħjufijiet tal-​ġisem imperfett, u t-​tnassis tiegħu huwa sottili. Mod wieħed kif ixerred l-​influwenza ħażina tiegħu hu billi jagħmilha faċli ħafna li wieħed isib il-​pornografija fuq it-​TV, l-​Internet, il-​vidjos, u l-​pubblikazzjonijiet stampati. Xi Kristjani ppermettew lil dan il-​velenu jippenetra fid-​difiżi tagħhom li jkunu ddgħajfu, u dan wassalhom biex jitilfu l-​privileġġi fil-​kongregazzjoni jew saħansitra għal konsegwenzi iktar serji. (Efesin 4:​17-19) X’inhu r-​rimedju għall-​velenu spiritwali taʼ Satana? M’għandna qatt nittraskuraw l-​istudju persunali u regulari tal-​Bibbja, il-​laqgħat Kristjani tagħna, u l-​armatura sħiħa mogħtija minn Alla. Flimkien, dawn jagħtuna l-​abbiltà li nagħrfu bejn it-​tajjeb u l-​ħażin u li nobogħdu dak li Alla jobgħod.—Salm 97:10; Rumani 12:9.

18. “Ix-​xabla taʼ l-​Ispirtu” kif tistaʼ tgħinna fil-​ġlieda spiritwali tagħna?

¹⁸ Jekk inżommu d-​drawwiet regulari tagħna taʼ studju tal-​Bibbja, mhux biss se jkollna d-​difiża b’saħħitha li tiġi mill-​għarfien eżatt tal-​Kelma t’Alla imma wkoll il-​mezz biex nattakkaw b’mod effettiv permezz tax-​“xabla taʼ l-​Ispirtu li hi l-​kelma taʼ Alla.” Il-​kelma t’Alla “taqtaʼ aktar minn xabla b’żewġt ixfar; hija tinfed sa tifred minn xulxin ir-​ruħ u l-​ispirtu u l-​ġogi u l-​mudullun; u tgħarbel il-​ħsibijiet u l-​fehmiet tal-​qalb.” (Efesin 6:17; Lhud 4:12) Jekk nitgħallmu nużaw dik “ix-​xabla” bis-​sengħa, imbagħad meta niffaċċjaw it-​tentazzjonijiet, m’aħniex se nitqarrqu minn dak li jidher li ma jagħmilx ħsara, jew saħansitra jidher attraenti, imma nikxfuh bħala nassa qattiela tal-​wieħed ħażin. Il-​ħażna tagħna t’għarfien u fehma tal-​Bibbja se tgħinna nirrifjutaw dak li hu ħażin u nagħmlu dak li hu tajjeb. Għalhekk, kull wieħed minna għandu bżonn jistaqsi lilu nnifsu: ‘Ix-​xabla tiegħi msinna, jew imsadda? Insibha iebsa biex niftakar versi mill-​Bibbja li jistgħu jsaħħu l-​attakk tagħna?’ Ejja nżommu d-​drawwiet tajbin tagħna taʼ studju persunali tal-​Bibbja, u b’hekk nirreżistu lix-​Xitan.—Efesin 4:​22-​24.