Kapitlu 1

Int Jistaʼ Jkollok Futur Hieni!

1, 2. Il-​Ħallieq tiegħek x’irid għalik?

TGĦANNIQA kordjali minn xi ħadd li tħobb. Daħk mill-​qalb waqt ikla tajba maʼ ħbieb intimi. Il-​gost li tara lit-​tfal tiegħek jieħdu pjaċir jilagħbu flimkien. Mumenti bħal dawn huma okkażjonijiet henjin fil-​ħajja. Għal ħafna, madankollu, il-​ħajja donnha li tippreżenta problema serja wara l-​oħra. Jekk dik kienet l-​esperjenza tiegħek, qawwi qalbek.

² Hija r-​rieda t’Alla li int tgawdi hena dejjiem taħt l-​aqwa kundizzjonijiet f’ambjent taʼ l-​għaġeb. Din m’hijiex xi sempliċi ħolma, għax Alla attwalment joffrilek iċ-​ċavetta għal futur hieni bħal dan. Dik iċ-​ċavetta hija l-​għarfien.

3. Liema għarfien huwa ċ-​ċavetta għall-​hena, u għala nistgħu nkunu ċerti li Alla jistaʼ jipprovdi dak l-​għarfien?

³ Qegħdin nitkellmu dwar tip speċjali t’għarfien li huwa bil-​wisq akbar minn għerf uman. Dan huwa “t-​tagħrif taʼ Alla.” (Proverbji 2:5) Kważi 2,000 sena ilu, kittieb tal-​Bibbja qal: “Kull dar jibniha xi ħadd, imma Alla jibni kollox hu.” (Lhud 3:4) Aħseb ftit dwar l-​għarfien li Dak li għamel l-​affarijiet kollha bil-​fors li jippossiedi! Il-​Bibbja tgħid li Alla jgħodd u jsemmi b’isimhom il-​kwiekeb kollha. Xi ħsieb li jħallik mgħaġġeb, ladarba hemm mijiet taʼ biljuni taʼ kwiekeb fil-​galassja tagħna stess, u l-​astronomi jgħidu li hemm madwar mitt biljun galassja oħra! (Salm 147:4) Alla jaf ukoll kollox dwarna, u għalhekk min iktar jistaʼ jipprovdi tweġibiet aħjar għall-​mistoqsijiet importanti tal-​ħajja?—Mattew 10:30.

4. Għala għandna nistennew li Alla jipprovdi struzzjonijiet biex jiggwidawna, u liema ktieb jissodisfa din il-​ħtieġa?

⁴ Ġib quddiem għajnejk lil żewġt irġiel qegħdin jipprovaw isewwu l-​karozzi tagħhom. Frustrat, raġel wieħed jitfaʼ l-​għodda tiegħu fil-​ġenb. L-​ieħor bil-​kalma jirranġa l-​problema, idawwar iċ-​ċavetta biex jistartja, u jitbissem hekk kif il-​magna tistartja u taħdem tajjeb. Ma kontx issibha diffiċli biex taqtaʼ min miż-​żewġt irġiel kellu l-​manwâl taʼ struzzjonijiet mingħand il-​manifattur. Ma jagħmilx sens li Alla kellu jipprovdi struzzjonijiet biex jiggwidawna fil-​ħajja? Bħalma forsi taf, il-​Bibbja ssostni li hija preċiż hekk—ktieb taʼ struzzjoni u gwida mingħand il-​Ħallieq tagħna, iddisinnjat biex jagħti l-​għarfien dwar Alla.—2 Timotju 3:16.

5. Kemm huwa taʼ valur l-​għarfien li jinstab fil-​Bibbja?

⁵ Jekk dak li ssostni l-​Bibbja huwa veru, aħseb ftit dwar liema teżori t’għarfien jinstabu f’dak il-​ktieb! Fi Proverbji 2:1-5, din tħeġġiġna biex infittxu l-​għerf, biex inħaffru għalih bħalma kieku nagħmlu għal xi teżor moħbi—mhux fil-​ħamrija tal-​ħsieb tal-​bniedem, imma fil-​Kelma t’Alla stess. Jekk infittxu hemmhekk, se ‘nsibu t-​tagħrif t’Alla.’ Ladarba Alla jifhem il-​limitazzjonijiet u l-​ħtiġijiet tagħna, hu jagħtina struzzjoni li se tgħinna biex ngħaddu ħajjiet paċifiċi u henjin. (Salm 103:14; Isaija 48:17) Barra minn hekk, l-​għarfien dwar Alla joffrilna aħbar tajba eċċitanti.

ĦAJJA TAʼ DEJJEM!

6. Ġesù Kristu ta liema assiguranza rigward l-​għarfien dwar Alla?

⁶ Il-​persunaġġ storiku magħruf sew Ġesù Kristu ddeskriva dan il-​fattur taʼ l-​għarfien dwar Alla f’termini ċari. Hu qal: “Din hi l-​ħajja taʼ dejjem: li jagħarfu lilek, Alla waħdek veru, u lil Ġesù Kristu, li inti bgħatt.” (Ġwann 17:3) Immaġina—għarfien li jwassal għall-​ħajja taʼ dejjem!

7. Liema evidenza hemm li ma kenitx l-​intenzjoni t’Alla li aħna mmutu?

⁷ Tgħaġġilx biex twarrab il-​ħajja taʼ dejjem bħala sempliċi ħolma. Minflok, ħares lejn il-​mod kif inhu magħmul il-​ġisem uman. Dan huwa ddisinnjat b’mod splendidu biex itiegħem, jismaʼ, ixomm, jara, u jħoss. Hemm tant affarijiet fuq l-​art li jgħaxxqu lis-​sensi tagħna—ikel delizzjuż, għana pjaċevoli taʼ l-​għasafar, fjuri jfuħu, xenarji sbieħ, sħubija li tgħaxxqek! U l-​moħħ taʼ l-​għaġeb tagħna huwa bil-​wisq iktar mill-​aqwa kompjuter, għax dan jgħinna napprezzaw u ngawdu dawn l-​affarijiet kollha. Taħseb int li l-​Ħallieq tagħna jridna mmutu u nitilfu dan kollu? Ma jkunx iktar raġonevoli li nikkonkludu li hu jridna ngħixu henjin u ngawdu l-​ħajja għal dejjem? Sewwa, dak huwa li l-​għarfien dwar Alla jistaʼ jfisser għalik.

IL-​ĦAJJA FIL-​ĠENNA

8. Il-​Bibbja x’tgħid dwar il-​futur taʼ l-​umanità?

⁸ Dak li l-​Bibbja tgħid dwar il-​futur taʼ l-​art u taʼ l-​umanità jistaʼ jinġabar f’kelma waħda—Ġenna! Ġesù Kristu tkellem dwar din meta qal lil raġel moribond: “Tkun fil-​Ġenna miegħi.” (Luqa 23:43) Mal-​kelma Ġenna bla dubju dak ir-​raġel ftakar fl-​istat hieni taʼ l-​ewwel ġenituri tagħna, Adam u Eva. Meta Alla ħalaqhom, kienu perfetti u għexu f’park qisu ġnien li l-​Ħallieq kien iddisinnja u ħawwel. Kien bix-​xieraq imsejjaħ il-​ġnien t’Għeden, u dan l-​isem jindika pjaċir.

9. Kif kienet il-​ħajja fil-​Ġenna oriġinali?

⁹ X’għaxqa kien fih dak il-​ġnien! Kien ġenna reali. Fost is-​siġar sbieħ tiegħu kien hemm dawk li jagħtu frott delizzjuż. Hekk kif Adam u Eva esploraw id-​dominju tagħhom, xorbu mill-​ilma bnin tiegħu, u qatgħu l-​frott mis-​siġar tiegħu, ma kellhom ebda raġuni biex ikunu anzjużi jew beżgħanin. Saħansitra l-​annimali ma kienu t’ebda theddida, għax Alla kien poġġa lir-​raġel u lil martu f’dominanza taʼ mħabba fuqhom kollha. Barra minn dan, l-​ewwel koppja umana kienu jbiegħu s-​saħħa. Sakemm baqgħu ubbidjenti lejn Alla, futur etern u hieni kien hemm quddiemhom. Ġew mogħtijin ix-​xogħol sodisfaċenti li jieħdu ħsieb id-​dar taʼ l-​għaġeb tagħhom li kienet Ġenna. Jerġaʼ, Alla ta lil Adam u Eva l-​mandat biex ‘jimlew l-​art, u jaħkmuha.’ Huma u n-​nisel tagħhom kellhom jestendu l-​fruntieri tal-​Ġenna sakemm il-​pjaneta tagħna kollha kemm hi saret post taʼ ġmiel u għaxqa.—Ġenesi 1:28.

10. Meta Ġesù tkellem dwar il-​Ġenna, x’kellu f’moħħu?

¹⁰ Meta Ġesù semma l-​Ġenna, madankollu, ma kienx qiegħed jitlob lil raġel moribond biex jaħseb dwar il-​passat imbiegħed. Le, Ġesù kien qiegħed jitkellem dwar il-​futur! Hu kien jaf li l-​art darna kollha kemm hi kellha ssir ġenna. Alla kellu b’hekk iwettaq l-​iskop oriġinali tiegħu għall-​umanità u għall-​art tagħna. (Isaija 55:10, 11) Iva, il-​Ġenna se tiġi rrestawrata! U kif se tkun? Ħalli l-​Kelma t’Alla, il-​Bibbja Mqaddsa, twieġeb.

IL-​ĦAJJA FIL-​ĠENNA RRESTAWRATA

11. Fil-​Ġenna rrestawrata, x’se jiġrilhom il-​mard, ix-​xjuħija, u l-​mewt?

¹¹ Il-​mard, ix-​xjuħija, u l-​mewt m’humiex se jeżistu iktar. “Imbagħad jinfetħu għajnejn il-​għomja, u jinfetħu widnejn it-​torox. Imbagħad iz-​zopp jaqbeż bħal għażżiela u lsien l-​imbikkma jinħall bil-​ferħ.” (Isaija 35:5, 6) “Alla nnifsu jkun [mal-bnedmin]. . . . Hu jixxottalhom kull demgħa minn għajnejhom: ma jkunx hemm iżjed mewt, anqas biki jew agħjat jew tbatija ma jkun hemm iżjed, għax għabu l-​ħwejjeġ taʼ qabel.”—Apokalissi 21:3, 4

12. Għala nistgħu nkunu ċerti li ma se jkun hemm ebda kriminalità, vjolenza, u ħażen fil-​Ġenna futura?

¹² Il-​kriminalità, il-​vjolenza, u l-​ħażen se jkunu telqu għal dejjem. “Għax il-​ħżiena jitqaċċtu ’l barra . . . Ftit ieħor, u l-​ħażin ma jkunx aktar . . . ma ssibux. Imma l-​ġwejdin għad jirtu l-​art.” (Salm 37:9-11) “Imma l-​ħżiena mill-​art jitqaċċtu, u l-​qarrieqa jinqalgħu minnha.”—Proverbji 2:22.

13. Alla kif se jġib il-​paċi?

¹³ Il-​paċi se tkun prevalenti mad-​dinja kollha. “[Alla] iwaqqaf il-​gwerer sa tarf l-​art; l-​ark jaqsam u l-​lanza jkisser.” (Salm 46:10 [46:9, New World Translation]) “Tħaddar f’jiemu l-​ġustizzja, u sliem kotran sa ma jintemm il-​qamar.”—Salm 72:7.

14, 15. Il-​Bibbja x’tgħid dwar djar, xogħol, u ikel fil-​Ġenna rrestawrata?

¹⁴ Id-​djar se jkunu fis-​sigurtà u x-​xogħol sodisfaċenti. “Huma għad jibnu djarhom u jgħammru fihom . . . Ma jibnux biex jgħammar ħadd ieħor, u ma jħawlux biex jiekol ħaddieħor; għax il-​poplu tiegħi jgħix daqskemm jgħixu s-​siġar, u l-​magħżulin tiegħi jistgħallu xogħol idejhom. Ma jitħabtux għal xejn u ma jwildux tfal biex jinqerdu ħesrem.”—Isaija 65:21-23.

¹⁵ Ikel li jagħti s-​saħħa se jkun disponibbli bl-​abbundanza. “Ikun kotran il-​qamħ fuq l-​art, jogħla sal-​qċaċet taʼ l-​għoljiet.” (Salm 72:16) “L-​art tat il-​frott tagħha; iberikna Alla, Alla tagħna!”—Salm 67:7 [67:6, NW].

16. Il-​ħajja fil-​Ġenna għala se tkun mimlija għaxqa?

¹⁶ Ħajja taʼ dejjem fuq art magħmula ġenna se tkun mimlija għaxqa. “Il-​ġusti jirtu l-​art, u jgħammru fiha għal dejjem.” (Salm 37:29) “Ħa jifirħu d-​deżert u l-​art maħruqa; ħa jifraħ ix-​xagħri u jwarrad, ħa jwarrad bħar-​ranġis.”—Isaija 35:1.

L-​GĦARFIEN U L-​FUTUR TIEGĦEK

17. (a) X’għandek tagħmel jekk il-​ħajja fil-​Ġenna tappella għalik? (b) Kif nafu li Alla se jġib tibdiliet kbar ferm fuq l-​art?

¹⁷ Jekk il-​ħajja fil-​Ġenna tappella għalik, tħalli xejn iżommok lura milli tikseb l-​għarfien dwar Alla. Hu jħobb lill-​umanità u se jġib il-​bidliet meħtiġin biex l-​art jagħmilha ġenna. Wara kollox, kieku int kellek il-​poter biex ittemm il-​miżerja u l-​inġustizzja li huma tant prevalenti fid-​dinja, ma kontx tagħmel hekk? Se nistennew aħna li Alla jagħmel inqas minn hekk? Attwalment, il-​Bibbja titkellem b’termini vivaċi dwar iż-​żmien meta Alla se jneħħi lil din is-​sistema tad-​dinja mifnija bil-​ġlied u flokha jdaħħal ħakma perfetta taʼ tjieba. (Danjel 2:44) Imma l-​Bibbja tagħmel ferm iktar milli tgħidilna dwar dan kollu. Din turina kif nistgħu nsalvaw għal ġod-​dinja ġdida mwiegħda minn Alla.—2 Pietru 3:13; 1 Ġwann 2:17.

18. L-​għarfien dwar Alla x’jistaʼ jagħmel għalik issa?

¹⁸ L-​għarfien dwar Alla jistaʼ wkoll ikun ferm taʼ ġid għalik issa stess. Il-​mistoqsijiet l-​iktar profondi u ferm inkwetanti tal-​ħajja huma mweġbin fil-​Bibbja. Li taċċetta l-​gwida tagħha se jgħinek tiżviluppa ħbiberija m’Alla. Xi privileġġ grandjuż! U dan se jgħinek tgawdi l-​paċi li Alla biss jistaʼ jagħti. (Rumani 15:13, 33) Hekk kif tibda tieħu dan l-​għarfien vitali, int qiegħed timbarka fuq l-​iktar biċċa xogħol importanti u premjanti taʼ ħajtek. Qatt ma se jiddispjaċik li takkwista l-​għarfien dwar Alla li jwassal għall-​ħajja taʼ dejjem.

19. Liema mistoqsija se nikkunsidraw fil-​kapitlu li jmiss?

¹⁹ Aħna rreferejna għall-​Bibbja bħala l-​ktieb li fih jinstab l-​għarfien dwar Alla. Madankollu, kif nafu li din hija, mhux xi ktieb t’għerf uman, imma xi ħaġa bil-​wisq akbar? Se nikkunsidraw din il-​mistoqsija fil-​kapitlu li jmiss.

ITTESTJA L-​GĦARFIEN TIEGĦEK

L-​għarfien dwar Alla għala jistaʼ jwasslek għal hena etern?

Kif se tkun il-​ħajja fil-​Ġenna taʼ l-​art li ġejja?

Int għala se tibbenefika milli tieħu l-​għarfien dwar Alla issa?