Niffaċċjaw l-​Isfidi fl-​2001

¹ Kemm fraħna meta rċivejna l-​Yearbook taʼ l-​2001 u l-​ħarġa taʼ It-​Torri taʼ l-​Għassa taʼ l-​1 taʼ Jannar, 2001 fejn stajna naqraw ir-​rapport taʼ madwar id-​dinja għas-​sena taʼ servizz 2000. Avolja “s-​sura taʼ din id-​dinja” qed tinbidel, u b’hekk iġġib sfidi akbar għal ħutna, xorta waħda l-​parti l-​kbira jkomplu jissieltu għall-​fidi.—1 Kor. 7:31; Ġuda 3.

² Hekk kif “it-​tmiem taʼ kollox” qed joqrob iktar, il-​korla tax-​Xitan kontra n-​nies t’Alla se tiżdied. Hu jaf li “żmien ftit baqagħlu” biex juri jekk kellux raġun meta sfida s-​sovranità t’Alla u l-​integrità tal-​qaddejja taʼ Jehovah. (1 Pt. 4:7; Apk. 12:12, 17) Minbarra l-​oppożizzjoni għall-​ippridkar taʼ l-​aħbar tajba tas-​Saltna minn xi mexxejja reliġjużi tal-​Kristjaneżmu, xi pajjiżi rrapportaw ukoll ammont kbir taʼ pressjoni mill-​politikanti li jridu jpoġġu limiti jew jipprojbixxu x-​xogħol taʼ l-​ippridkar. Mhux biss kellhom ħutna jirreżistu dawn l-​isfidi iżda eluf kellhom jiffaċċjaw diżastri naturali, vjolenza etnika, kif ukoll nuqqas tal-​bżonnijiet tal-​ħajja. Kemm kienu grati għall-​passi li ħadet l-​organizzazzjoni taʼ Jehovah biex tipprovdi għajnuna u tieħu ħsieb il-​bżonnijiet fiżiċi u spiritwali tagħhom.

³ Ħafna pajjiżi fid-​Dinja tal-​Punent ma ġewx effettwati b’dawn l-​affarijiet. Madankollu, aħna nitnikktu meta naraw li xi wħud aljenaw ruħhom bil-​materjaliżmu taʼ din id-​dinja u l-​morali li dejjem jitbaxxew. Oħrajn għajjew wisq jagħmlu s-​sewwa. Bħala riżultat, ħafna saru inattivi u għalkemm numru sabiħ jitgħammdu kull sena, l-​istess ammont, jekk mhux iktar qed isiru inattivi. Għalkemm ipprovaw u raw li l-​Mulej hu tajjeb, ħallew lilhom infushom jinġibdu lura għal ġod-​dinja taʼ Satana u jitilfu r-​relazzjoni prezzjuża tagħhom maʼ Jehovah.

⁴ X’jistaʼ jsir biex tissolva din il-​problema? L-​ewwelnett irridu nirrealizzaw li jekk biss nibqgħu leali lejn Jehovah u l-​organizzazzjoni tiegħu nkunu nistgħu nkampaw. (Flp. 4:13) Ix-​Xitan juża ħafna makakkeriji biex jipprova jdawwarna jew iwaqqagħna milli nibqgħu sodi. (1 Kor. 15:58; 2 Pt. 3:17) Iktar minn qatt qabel, irridu niffaċċjaw dan il-​fatt u nsaħħu lilna nfusna biex nieħdu waqfa kontrih, sħaħ fil-​fidi, flimkien maʼ l-​aħwa kollha taʼ madwar id-​dinja.—1 Pt. 5:8, 9.

⁵ Il-​Konvenzjoni Distrettwali tas-​sena l-​oħra “Nagħmlu Dak li Tgħid il-​Kelma t’Alla,” ġibdet l-​attenzjoni tagħna lejn li noqogħdu attenti mix-​xnigħat u s-​seksik. Ejja ‘ma noqogħdux inħawdu rasna malajr’ minħabba xi rapporti bbażati fuq ix-​xejn u mgħawġin minn fuq il-​mezzi tax-​xandir, dak li jgħidu l-​apostati, u l-​opinjonijiet tan-​nies taʼ barra li jipprovaw juru l-​attivitajiet tan-​nies taʼ Jehovah bħala xi ħaġa taʼ barra minn hawn. (2 Tess. 2:2) Minflok, ejja nibqgħu nagħmlu r-​rieda t’Alla fi qbil mad-​dedikazzjoni bla limiti tagħna lil ­Jehovah.

⁶ X’inhi r-​rieda taʼ Jehovah? L-​ewwel u qabel kollox għandha tkun l-​attività tagħna taʼ l-​ippridkar u t-​tagħlim. Ma nistgħux naqtgħu qalbna minn dan l-​inkarigu sempliċement minħabba l-​problema li dejjem tikber taʼ dawk li ma nsibux id-​dar, l-​apatija tan-​nies li moħħhom biss fl-​affarijiet materjali, jew għax il-​maġġuranza tan-​nies ma jinteressawx ruħhom. Jekk aħna napprezzaw l-​affarijiet sagri, allura żgur li hi kemm hi mimlija l-​iskeda tagħna, nistgħu nsibu ammont taʼ ħin kull xahar biex naqsmu l-​fidi tagħna m’oħrajn. Matul is-​sena taʼ servizz 2000, 53 kienu irregolari fis-​servizz taʼ l-​għalqa. Dan wassal biex 15 minnhom saru inattivi. Jorganizzaw l-​anzjani żjajjar pastorali regulari għall-​membri kollha tal-​kongregazzjoni Kristjana? Xi drabi dawn iż-​żjajjar jistgħu jsiru qabel jew wara l-​laqgħat fis-​Sala tas-​Saltna, jew waqt li jaħdmu mal-​pubblikaturi fis-​servizz taʼ l-​għalqa. Drabi oħra, jistaʼ jkun t’għajnuna li jżuru lill-​pubblikaturi (jew lill-​familji) fi djarhom. B’dan il-​mod, l-​għajnuna tingħata skond il-​bżonn taʼ l-​aħwa. Il-​kongregazzjoni għandha fiduċja f’dawn l-​għotjiet fi rġiel bħala li huma lqugħ għar-​riħ, kenn fi staġun taʼ taħbit, u sors taʼ serħan u inkuraġġiment. (Is. 32:2; Efes. 4:11, 12, 14) Huwa ħafna aħjar li wieħed jilqaʼ minn qabel milli jkun hemm bżonn għajnuna minħabba problemi spiritwali li jkunu daħlu fil-​fond!

⁷ X’inhuma xi suġġerimenti li ngħataw tul is-​snin biex jinkuraġġixxu ministeru taʼ l-​għalqa bilanċjat? Jekk il-​pijunieri jingħataw l-​inkarigu biex jgħinu lil xi pubblikaturi oħrajn, dan se jkun verament taʼ barka kemm għall-​pijunieri u kemm għall-​pubblikaturi. B’hekk nistgħu tassew inqawwu lil xulxin b’mod reċiproku bħala riżultat taʼ dan l-​arranġament mimli mħabba. (Jekk jogħġbok ara l-​Laqgħa tas-​Servizz għal ġimgħa li tibda 22 taʼ Ġunju, 1998.) Hemm xi numru akbar minn tas-​soltu taʼ wħud li ma jkunux id-​dar fit-​territorju tagħkom? Tistgħux forsi tagħtu xiehda fil-​għaxija, filwaqt li toqogħdu attenti liema tip taʼ territorju tagħżlu? (km-MT 7/96, paġna 1) Xi ngħidu għal għoti taʼ xiehda differenti minn tas-​soltu? (km-MT 11/99, paġna 8) Qatt ipprovajtu tagħtu xiehda fit-​toroq jew f’territorju tan-​negozju? (km-MT 6/99, paġna 4) Nillimitaw is-​servizz taʼ l-​għalqa tagħna għal madwar siegħa fix-​xogħol minn dar għal dar, fejn ħafna ma jkunux hemm? Jekk dan hu l-​każ ma tantx hemm ċans li niksbu l-​ferħ mis-​servizz sagru tagħna u mhux se jkollna ministeru b’riżultati tajbin. Jistgħu l-​anzjani jaħsbu bis-​serjetà dwar il-​gwida li l-​aħwa għandhom bżonn fit-​territorju partikulari tagħkom sabiex tingħata xiehda bir-​reqqa u b’mod effettiv? Liema suġġerimenti ­jistgħu joffru?

⁸ Aspett ieħor taʼ li nagħmlu r-​rieda t’Alla huwa t-​tkabbir spiritwali u l-​iżvilupp tal-​familji Kristjani. Huwa taʼ min ifaħħar lill-​ġenituri li minn jeddhom iqattgħu l-​ħin mal-​familja tagħhom, billi jikkonduċu studju tal-​familja fuq bażi regulari u dan jagħmluh b’tali mod li jilħqu l-​bżonnijiet differenti taʼ kull tifel jew tifla. Is-​Soċjetà qed tagħmel dak kollu li tistaʼ sabiex tipprovdi gwida b’imħabba għal dawk taʼ kwalunkwe età. Aħseb ftit dwar il-​pubblikazzjonijiet li għandna issa: Listening to the Great Teacher, L-​Aqwa Bniedem Li Qatt Għex, il-​vidjo li ħareġ fl-​1999 Young People Ask—How Can I Make Real Friends? (Iż-Żgħażagħ Jistaqsu—Kif Jistaʼ Jkolli Ħbieb Veri?), flimkien maʼ l-​għadd t’artikli taʼ It-​Torri taʼ l-​Għassa u Stenbaħ! li ħarġu f’dawn l-​aħħar snin. Taċċerta ruħek li l-​istudju tal-​familja tagħkom hu bħal vjaġġ eċċitanti li jiħodkom ġol-​Kelma t’Alla, u xi ħaġa li jħarsu ’l quddiem għaliha kemm iż-​żgħar u kemm il-​kbar? M’huwiex taʼ dispjaċir meta naraw li għadd taʼ żgħażagħ, meta jidħlu fiż-​żmien diffiċli f’ħajjithom taʼ l-​adolexxenza, qed jinġibdu mid-​dinja taʼ Satana? Id-​deċiżjoni aħħarija hija tagħhom, iżda l-​ġenituri, l-​anzjani, u ċertament, il-​membri kollha tal-​kongregazzjoni jridu jagħtu sehemhom f’li jgħinu liż-​żgħażagħ iħossuhom milqugħin u bżonnjużi. B’hekk huma jaqdu lil Jehovah bil-​ferħ u mhux taʼ bilfors. Il-​kongregazzjoni tagħkom x’inhi tagħmel biex tgħin liż-​żgħażagħ? Intom qed tinkuraġġixxu bil-​ħerqa s-​servizz taʼ Betel u/jew ix-​xogħol taʼ pijunier? Qed tħeġġu liż-​żgħażagħ biex ifittxu l-​ewwel is-​Saltna meta jkunu qed jaħsbuha dwar li jkomplu l-​edukazzjoni tagħhom, jew dwar x’impjieg se jagħżlu, eċċ.? Qed tkomplu tagħtuhom gwida għaqlija minn fuq il-​Bibbja fuq affarijiet bħalma huma rikreazzjoni u divertiment xierqa? Intom stess qed tagħtu eżempju tajjeb f’dawn l-​affarijiet?

⁹ Parti mill-​qima tagħna lejn Jehovah qegħda f’li nattendu u nipparteċipaw b’mod regulari fil-​laqgħat. Aħna nfaħħrukom ilkoll bil-​ħerqa taʼ l-​appoġġ mill-​aħjar li tagħtu għal dawn il-​provvedimenti. Minkejja li intom involuti f’ħafna ­affarijiet li għandhom x’jaqsmu mal-​familja u affarijiet sekulari, l-​attendenza medja għat-​taħditiet pubbliċi matul is-​sena taʼ servizz 2000 kienet taʼ 116 fil-​mija—115 fil-​mija għall-​istudju tat-​Torri taʼ l-​Għassa, 96 fil-​mija għall-​Istudju tal-​Ktieb tal-​Kongregazzjoni u 101 fil-​mija għal-​laqgħa taʼ nofs il-​ġimgħa. Meta l-​aħwa jkunu daqshekk determinati li jagħmlu l-​isforz tagħhom sabiex jattendu għal-​laqgħat tal-​kongregazzjoni, bix-​xieraq li l-​anzjani jaraw li jkun qed jingħata l-​ogħla livell taʼ tagħlim possibbli minn anzjani u qaddejja ministerjali kwalifikati. Il-​partijiet fil-​laqgħat m’għandhomx biss jgħallmu iżda għandhom iqanqlu. Għala? Ġakbu ħeġġeġ lill-​Kristjani ‘biex ikunu dawk li jagħmlu l-​kelma, u mhux jisimgħuha biss għax wieħed li jagħmilha jkun hieni fl-​għemil tiegħu.’ (Ġak. 1:22, 25) Żgur li ngawdu ferħ ġenwin meta nagħmlu x-​xogħol t’Alla minflok milli sempliċement nisimgħu dwaru biss. X’taħseb li hija l-​kwalità b’mod ġenerali tal-​laqgħat tal-​kongregazzjoni tagħkom? L-​aħwa rġiel għandhom bżonn xi għajnuna sabiex itejbu u jippreżentaw il-​partijiet fil-​Laqgħa tas-​Servizz? Tistaʼ tara aspetti fejn jistaʼ jsir xi titjib? Liema huma?

¹⁰ M’hemmx dubju li kulħadd għandu ħajja mgħaġġla. Tant hemm x’tagħmel u tant għandna affarijiet x’nieħdu ħsieb. L-​appostlu Pawlu bilfors li ħassu hekk għax hu kiteb,“U, biex ma nsemmix ħwejjeġ oħra, dak il-​ħafna ġej u sejjer tan-​nies taʼ kuljum għandi, u l-​ħsieb tal-​knejjes kollha!” (2 Kor. 11:28) Forsi, jekk aħna nifhmu r-​responsabbiltajiet li l-​anzjani għandhom fuq spallejhom, nistgħu nitqanqlu biex nikkooperaw bis-​sħiħ magħhom, u b’hekk innaqqsulhom ftit mill-​ansjetajiet jew stress. (Lhud 13:17) Kif nistgħu ngħinuhom? Nistgħu llestu r-​rapport tas-​servizz taʼ l-​għalqa kull xahar fil-​ħin, u b’hekk niffrankaw lill-​anzjani milli jkollhom joqogħdu jfakkruna jew iċemplulna minħabba li qegħdin tard? Jekk ma nkunux nistgħu nagħmlu xi taħdita nistgħu navżaw mill-​iktar fis possibbli lill-​indokratur li jippresiedi jew lill-​indokratur taʼ l-​Iskola tal-​Ministeru Teokratiku ħalli jgħidu lil xi ħadd ieħor jagħmilha minflokna? Li nkunu leali f’affarijiet żgħar jistaʼ jgħin ferm f’li jneħħi ftit pressjoni minn fuq l-​anzjani li huma tant biżlin u impenjati, u b’hekk ikunu jistgħu jikkonċentraw iktar fuq il-​bżonnijiet spiritwali tal-​kongregazzjoni.

¹¹ L-​appostlu Pawlu ħeġġiġna lkoll: “Ħabirku dejjem fil-​ħidma tal-​Mulej. Kunu afu li l-​ħidma tagħkom fil-​Mulej m’hijiex għalxejn.” (1 Kor. 15:58) Hija attività siewja, u ġġibilna ferħ u sodisfazzjon hekk kif aħna nagħtu sehemna f’din ix-​xiehda taʼ l-​aħħar li qatt iktar m’hi se terġaʼ ssir. Qalb Jehovah tifraħ meta jara lill-​qaddejja leali tiegħu jistinkaw fix-​xogħol taʼ l-​ippridkar minkejja li jinsabu bħalissa “fi staġun taʼ inkwiet.” (2 Tim. 4:2, New World Translation) Jalla lkoll kemm aħna nkomplu nkabbru l-​għajta kbira taʼ tifħir għal Missierna tas-​Sema, u b’hekk nieħdu sehem f’li nigglorifikaw l-​isem imqaddes tiegħu.