Kristu bħala prezz tal-​fidwa.a (Mattew 20:28; Ġwanni 3:16; 1 Ġwanni 2:1, 2) Il-​Kristjani meta jinħelsu mil-​liġi tad-​dnub? Waqt li kien qed ikellem lill-​Kristjani midlukin, l-​appostlu Pawlu qal: “Il-​liġi taʼ l-​Ispirtu li jagħti l-​ħajja fi Kristu Ġesù ħelsitni mil-​liġi tad-​dnub u tal-​mewt.” (Rumani 8:2) Dawk bit-​tama taʼ ħajja fis-​sema jingħataw dan il-​ħelsien meta jiġu midlukin bl-​ispirtu qaddis. Għalkemm ġisimhom hu tal-​laħam u imperfett, Alla jiddikjarahom ġusti u jadottahom bħala wliedu spiritwali. (Rumani 3:24; 8:16, 17) Għall-​midlukin bħala grupp, il-​Ġublew beda f’Pentekoste tas-​sena 33 E.K.

Xi ngħidu għan-​“nagħaġ oħra,” li għandhom il-​prospett taʼ ħajja taʼ dejjem fuq l-​art? (Ġwanni 10:16) Għan-​nagħaġ oħra, ir-​Renju t’Elf Sena taʼ Kristu se jkun żmien taʼ restawrazzjoni u ħelsien. Matul dan il-​Ġublew Millennjali, Ġesù se japplika l-​benefiċċji tas-​sagrifiċċju bħala prezz tal-​fidwa għall-​umanità li temmen, u se jreġġaʼ lura l-​effetti tad-​dnub. (Apokalissi 21:3, 4) Sat-​tmiem tar-​Renju t’Elf Sena taʼ Kristu, il-​bnedmin se jsiru perfetti u se jeħilsu għalkollox mid-​dnub u l-​mewt li wirtu. (Rumani 8:21) Ladarba dan jitwettaq, il-​Ġublew Kristjan jintemm.

“L-​Għaqli Jagħmel Kollox bi Ħsieb”

IL-​GWIDA mill-​Kelma t’Alla, il-​Bibbja, hija “egħżeż mid-​deheb, mid-​deheb l-​aktar fin.” (Salm 19:7-10 [19:8-11, NW]) Għala? Għax “tagħlim l-​għaref [Jehovah] hu għajn il-​ħajja għal min irid jeħles mix-​xibka tal-​mewt.” (Proverbji 13:14) Meta jiġu applikati, il-​pariri mill-​Iskrittura mhux biss itejbu l-​kwalità taʼ ħajjitna imma jgħinuna nevitaw in-​nases li jpoġġuha fil-​periklu. Kemm huwa vitali li nfittxu l-​għarfien taʼ l-​Iskrittura u nżommu maʼ dak li nitgħallmu!

Kif imniżżel fi Proverbji 13:15-25, is-​Sultan Salamun taʼ Iżrael tal-​qedem ta pariri li jgħinuna naġixxu skond l-​għarfien ħalli nkunu nistgħu ngawdu ħajja aħjar u itwal.a Permezz taʼ proverbji qosra, hu jurina kif il-​Kelma t’Alla tistaʼ tgħinna nintgħoġbu minn oħrajn, nibqgħu leali fil-​ministeru tagħna, ikollna attitudni xierqa lejn id-​dixxiplina, u nagħżlu bil-​għaqal maʼ min nagħmluha. Hu jikkunsidra wkoll kemm hu għaqli li nħallu wirt għal uliedna kif ukoll li niddixxiplinawhom bl-​imħabba.

“Min Hu bil-​Għaqal Jirbaħ l-​Imħabba”

“Min hu bil-​għaqal jirbaħ l-​imħabba,” jgħid Salamun, “min jimxi bil-​qerq jiġġarraf.” (Proverbji 13:15) L-​espressjoni li ntużat fil-​lingwa oriġinali għal “bil-​għaqal,” jew b’“dehen tajjeb” (NW), “tiddeskrivi l-​abbiltà li wieħed ikun prudenti, jieħu deċiżjonijiet tajbin, u jifforma opinjonijiet bi ħsieb,” jgħid xogħol wieħed taʼ referenza. Persuna li jkollha kwalitajiet bħal dawn ma ssibhiex diffiċli biex tirbaħ l-​imħabba t’oħrajn u tingħoġob minnhom.

Ikkunsidra kif l-​appostlu Pawlu ttratta bl-​għaqal u bid-​dehen maʼ Filemon, sieħbu Kristjan, meta bagħatlu lura lill-​qaddej tiegħu Oneżimu, li kien ħarab u li issa kien sar Kristjan. Pawlu talab bil-​ħerqa lil Filemon biex jerġaʼ jilqaʼ lura lil Oneżimu b’qalb tajba, saħansitra daqslikieku kien se jilqaʼ lill-​appostlu nnifsu. Fil-​fatt, Pawlu offra li jħallas hu jekk Oneżimu kellu jagħti xi ħaġa lil Filemon. Iva, Pawlu setaʼ uża l-​awtorità tiegħu u ordna lil Filemon biex jagħmel dak li kien xieraq. Imma l-​appostlu għażel li jittratta s-​sitwazzjoni bit-​tattika u bl-​imħabba. Billi għamel hekk, Pawlu ħassu kunfidenti li kien se jikseb il-​kooperazzjoni taʼ Filemon u kien se jqanqlu jagħmel saħansitra iktar milli kien mitlub. M’għandniex aħna nittrattaw maʼ sħabna fit-​twemmin bl-​istess mod?—Filemon 8-21.

Min jimxi bil-​qerq, min-​naħa l-​oħra, jiġġarraf, jew inkella triqtu tkun “ħarxa.” (KŻ) F’liema sens? Skond wieħed studjuż, il-​kelma użata hawn tfisser “saħħa jew sodizza, u tirreferi għall-​imġiba bla mogħdrija tan-​nies il-​ħżiena. . . . Min jibqaʼ għall-​modi ħżiena tiegħu, b’qalb iebsa u indifferenti għat-​tagħlim għaqli taʼ ħaddieħor, qiegħed fi triqtu biex jiġġarraf.”

Salamun ikompli: “L-​għaqli jagħmel kollox bi ħsieb, imma l-​iblah juri fil-​beraħ bluhitu.” (Proverbji 13:16) L-​għaqal hawnhekk għandu x’jaqsam maʼ l-​għarfien u huwa assoċjat maʼ persuna prudenti, li taħseb l-​affarijiet qabel tagħmilhom. Meta xi ħadd għaqli jiġi kritikat inġustament jew saħansitra insultat, dan jikkontrolla kliemu. Hu jitlob lil Alla biex jgħinu juri l-​frott taʼ l-​ispirtu qaddis ħalli ma jirritax ruħu żżejjed. (Galatin 5:22, 23) Min ikun prudenti ma jħallix lill-​persuna l-​oħra jew is-​sitwazzjoni tikkontrollah. Minflok, jibqaʼ jżomm il-​kontroll u jevita l-​ġlied li ħafna drabi jinqalaʼ meta persuna tiġi mweġġgħa u jitlgħalha malajr.

L-​għaqli jaġixxi wkoll skond l-​għarfien meta jieħu deċiżjonijiet. Hu jaf li azzjonijiet għaqlin ma jsirux skond dak li wieħed ifettillu, skond azzjonijiet ibbażati fuq l-​emozzjonijiet, jew sempliċement billi jagħmel bħalma jagħmel ħaddieħor. Għalhekk, jieħu l-​ħin biex jgħarbel is-​sitwazzjoni li tinqalaʼ. Hu jiġbor il-​fatti kollha u jara x’għażliet għandu. Imbagħad ifittex fl-​Iskrittura u jiddeċiedi liema liġijiet jew prinċipji Bibliċi japplikaw. It-​triqat taʼ persuna bħal din jibqgħu dritti.—Proverbji 3:5, 6.

‘Messaġġier Leali Jġib il-​Kwiet’

Bħala Xhieda taʼ Jehovah, ġejna fdati bix-​xandir taʼ messaġġ mogħti minn Alla. Il-​kliem tal-​proverbju li jmiss jgħinna nibqgħu leali fit-​twettiq taʼ l-​inkarigu li għandna. Dan jgħid: “Ambaxxatur ħażin jaqlaʼ