Xi Tfisser Għalina l-​Umiltà taʼ Ġeħova

DAVID għadda minn ħafna għawġ. Hu ġie maltrattat mis-​Sultan Sawl, il-​kunjatu għajjur tiegħu. Sawl tliet darbiet ipprova joqtol lil David b’lanza u għal snin sħaħ hu kkaċċjah bla heda, u b’hekk sforzah biex isir refuġjat. (1 Samwel 18:11; 19:10; 26:20) Però, Ġeħova wera li kien maʼ David. Ġeħova mhux biss salvah minn Sawl, iżda wkoll minn taħt idejn għedewwa oħra. Għalhekk, nistgħu nifhmu kif ħassu David meta kanta: “Il-​Mulej il-​blata tiegħi, il-​fortizza u l-​ħellies tiegħi. Inti [Ġeħova] tajtni t-​tarka tas-​salvazzjoni tiegħek; [“l-​umiltà,” NW] tiegħek kabbritni.” (2 Samwel 22:2, 36) David kiseb ċerta importanza f’Iżrael. Allura, fiex kienet involuta l-​umiltà taʼ Ġeħova?

Meta l-​Iskrittura titkellem dwar Ġeħova bħala li hu umli, ma tkunx qed tfisser li hu limitat b’xi mod jew li hu sottomess lejn oħrajn. Minflok, din il-​kwalità mill-​isbaħ tindika li hu jagħder ħafna lill-​bnedmin li jistinkaw ġenwinament biex jiksbu l-​approvazzjoni tiegħu, u jurihom ħniena. F’Salm 113:6, 7 naqraw: “[Ġeħova] jħares ’l isfel, lejn is-​smewwiet u lejn l-​art. Hu li jqajjem mit-​trab l-​imsejken.” Il-​fatt li hu “jħares ’l isfel” ifisser li hu “jitbaxxa ’l isfel biex jara” jew li “hu jumilja Ruħu biex jara.” (Today’s English Version; Young’s Literal Translation of the Holy Bible) Allura, Ġeħova nnifsu ‘tbaxxa’ mis-​smewwiet, jew ‘umilja ruħu,’ sabiex jagħti kas taʼ David, individwu imperfett imma umli li xtaq jaqdi lil Alla. Għalhekk, David jiżgurana: “Fil-​għoli l-​Mulej, iżda jara l-​umli.” (Salm 138:6, Saydon) Il-​mod kollu ħniena, paċenzja, u mogħdrija li bih Ġeħova ttratta lil David għandu jkun taʼ inkuraġġiment għal dawk kollha li jfittxu li jagħmlu r-​rieda t’Alla.

Għalkemm Ġeħova bħala s-​Sovran għandu l-​ogħla pożizzjoni fl-​univers, hu jrid jikkomunika maʼ kull wieħed u waħda minna. Dan jagħtina l-​fiduċja li nistgħu nistrieħu fuq l-​għajnuna tiegħu li ma taqtaʼ qatt, anki fl-​iktar ċirkustanzi diffiċli. M’għandniex għalfejn nibżgħu li se jinsiena. Dwar il-​poplu tiegħu taʼ Iżrael tal-​qedem, b’mod xieraq Ġeħova jissemma bħala l-​wieħed li “meta [kienu] magħkusin ftakar [fihom], għax għal dejjem it-​tjieba tiegħu.”—Salm 136:23.

Bħala qaddejja taʼ Ġeħova llum, aħna wkoll nistgħu ngħaddu minn xi għawġ l-​istess bħalma għadda David. Jistaʼ jkun li niffaċċjaw it-​twaqqigħ għaċ-​ċajt minn dawk li ma jafux lil Alla, jew forsi qed nissieltu maʼ saħħa batuta jew ninsabu mnikktin minħabba l-​mewt taʼ xi ħadd maħbub. Hi x’inhi s-​sitwazzjoni tagħna, jekk qalbna hi sinċiera, nistgħu nersqu lejn Ġeħova bit-​talb u nitolbu għall-​ħniena tiegħu. Ġeħova se ‘jitbaxxa’ biex jinnotana u jismaʼ talbna. Is-​salmista ispirat kiteb: “Għajnejn il-​Mulej lejn il-​ġusti, u widnejh miftuħa għall-​għajta tagħhom.” (Salm 34:16 [34:15, NW]) Ma titqanqalx qalbek meta timmedita fuq il-​kwalità taʼ l-​umiltà taʼ Ġeħova li ġġagħlek tħobbu?

[Stampi f’paġna 30]

L-​istess bħalma semaʼ t-​talb taʼ David, illum Ġeħova hu lest li jismaʼ t-​talb tagħna

Mistoqsijiet mill-​Qarrejja

Il-​kongregazzjoni Kristjana kif tqis il-​gula, jew il-​kilba għall-​ikel?

Il-​Kelma t’Alla tikkundanna kemm is-​sokor u kemm il-​gula bħala mġiba li m’hijiex aċċettabbli għal min jaqdi ’l Alla. Għalhekk, il-​kongregazzjoni Kristjana tħares lejn xi ħadd magħruf li jiffanga fl-​ikel bħalma tħares lejn xi ħadd li għandu l-​vizzju tas-​sokor. La s-​sakranazz u lanqas min jagħmel għal żaqqu ma jistaʼ jkun parti mill-​kongregazzjoni Kristjana.

Proverbji 23:20, 21 jgħid: “Tagħmilhiex maʼ dawk li jlegilgu l-​inbid, u maʼ dawk li għandhom kilba għal-​laħam; għax l-​ikel u x-​xorb żejjed iwasslu għall-​faqar, u min iħobb l-​irqad iċ-​ċraret jilbes.” F’Dewteronomju 21:20 naqraw dwar individwu “ma jobdix u stinat,” li taħt il-​Liġi Mosajka kien jixraqlu l-​mewt. Skond dan il-​vers, żewġ karatteristiċi taʼ dan l-​individwu ribelluż u nieqes mill-​indiema kienu li hu kien “żaqqieq u sakranazz” (Karm Żammit). Jidher ċar li f’Iżrael tal-​qedem, il-​gula kienet titqies bħala prattika li m’hijiex aċċettabbli għal dawk li xtaqu jaqdu lil Alla.

Madankollu, kif ikun xi ħadd li għandu l-​gula, u x’tgħid l-​Iskrittura Griega Kristjana dwar dan is-​suġġett? Xi ħadd li għandu l-​gula hu deskritt bħala “wieħed li għandu d-​drawwa jiekol u jixrob bir-​regħba u ma jixbaʼ qatt.” Għalhekk, fattur wieħed hu li l-​gula