Kapitlu 63

Iktar Pariri taʼ Korrezzjoni

WAQT li Ġesù u l-​appostli tiegħu għadhom fid-​dar f’Kapernahum, ġiet diskussa xi ħaġa oħra barra l-​argument tal-​appostli dwar min hu l-​akbar. Dan hu inċident li setaʼ wkoll ġara huma u ġejjin lura lejn Kapernahum, meta Ġesù ma kienx preżenti personalment. L-​appostlu Ġwanni jirrapporta: “Rajna lil ċertu raġel ikeċċi d-​demonji billi juża’ lil ismek u aħna ppruvajna nżommuh, għaliex hu ma kienx qed jakkumpanjana.”

B’mod evidenti Ġwanni jħares lejn l-​appostli bħala li huma biss għandhom is-​setgħa li jfejqu. Mela hu jħoss li r-​raġel kien qed iwettaq xogħlijiet taʼ setgħa b’mod li mhux xieraq għaliex hu ma kienx jagħmel parti mill-​grupp tagħhom.

Madankollu, Ġesù jagħti parir: “Tippruvawx iżżommuh, għax m’hemm ħadd li se jagħmel xogħol taʼ qawwa fuq il-​bażi taʼ ismi li malajr se jkollu l-​ħila jkasbarni; għax dak li mhux kontra tagħna huwa favur tagħna. Għax kulmin jagħtikom tazza ilma x’tixorbu minħabba li tappartjenu lil Kristu, verament ingħidilkom, hu bl-​ebda mod ma se jitlef il-​premju tiegħu.”

Ma kienx hemm għalfejn dan ir-​raġel isegwi lil Ġesù fiżikament biex ikun fuq in-​naħa tiegħu. Il-​kongregazzjoni Kristjana kienet għadha ma ġietx imwaqqfa, u għalhekk il-​fatt li ma kienx parti mill-​grupp tagħhom ma kienx ifisser li hu kien taʼ kongregazzjoni oħra. Ir-​raġel verament kellu fidi f’isem Ġesù u b’hekk irnexxielu jkeċċi d-​demonji. Hu kien qed jagħmel xi ħaġa li kienet taqbel b’mod favorevoli maʼ dak li Ġesù qal li jkun jixraqlu premju. Ġesù juri li, talli għamel dan, hu mhux se jitlef il-​premju tiegħu.

Imma x’jiġri jekk ir-​raġel ġie mfixkel bil-​kliem u bl-​aġir tal-​appostli? Dan kien ikun serju ħafna! Ġesù josserva: “Kulmin jagħti gambetta lil wieħed minn dawn iż-​żgħar li jemmnu, ikun aħjar għalih kieku ġebla tat-​tħin bħal dik li hi mdawra minn ħmar titpoġġa madwar għonqu u attwalment jiġi mitfugħ fil-​baħar.”

Ġesù jgħid li s-​segwaċi tiegħu għandhom iwarrbu mill-​ħajjiet tagħhom kull ħaġa li hija għażiża għalihom bħal xi id, xi sieq, jew xi għajn li tistaʼ ġġegħilhom jieħdu gambetta. Aħjar tkun mingħajr din il-​ħaġa għażiża u tidħol fis-​Saltna t’Alla milli tkun biha u tiġi mitfugħ f’Geħenna (gozz żibel jaħraq qrib Ġerusalemm), li tissimbolizza l-​qerda eterna.

Ġesù jwissi wkoll: “Araw li ma tistmerrux lil xi wieħed minn dawn iż-​żgħar; għax ingħidilkom li l-​anġli tagħhom fis-​sema dejjem jilmħu wiċċ Missieri li hu fis-​sema.” Huwa mbagħad juri kemm huma prezzjużi ż-​“żgħar” billi jirrakkonta dwar raġel li għandu mitt nagħġa imma jitlef waħda. Ir-​raġel se jitlaq id-​99 biex imur ifittex lill-​waħda mitlufa, jispjega Ġesù, u malli jsibha se jifraħ iktar biha milli bid-​99. “Bl-​istess mod,” Ġesù mbagħad jikkonkludi, “mhix ħaġa mixtieqa minn Missieri li hu fis-​sema għal wieħed minn dawn iż-​żgħar li jgħib.”

Possibilment billi għandu f’moħħu l-​argument li l-​appostli kellhom bejniethom, Ġesù jħeġġeġ: “Ħa jkollkom il-​melħ fikom infuskom, u żommu l-​paċi bejnietkom.” Ikel bla togħma jsir bnin bil-​melħ. B’hekk, il-​melħ figurattiv jagħmel lil dak li wieħed igħid iktar faċli biex jiġi aċċettat. Li wieħed ikollu melħ bħal dan se jgħin f’li tinżamm il-​paċi.

Imma minħabba l-​imperfezzjoni umana, minn żmien għal żmien se jqumu kwistjonijiet serji. Ġesù jipprovdi wkoll direzzjonijiet taʼ kif wieħed għandu jaġixxi dwarhom. “Jekk ħuk jikkommetti dnub,” igħid Ġesù, “mur ikxef in-​nuqqas tiegħu bejnek u bejnu waħedkom. Jekk jismaʼ minnek, int tkun ksibt lil ħuk.” Jekk ma jismax, Ġesù jagħti l-​parir, “ħu miegħek wieħed jew tnejn oħra, sabiex bil-​fomm taʼ tnejn jew tliet xhieda kull kwistjoni tistaʼ tkun stabbilita.”

Biss bħala l-​aħħar rimedju, igħid Ġesù, ħu l-​kwistjoni “lill-​kongregazzjoni,” jiġifieri, lil indokraturi responsabbli tal-​kongregazzjoni li jistgħu jagħtu deċiżjoni taʼ ġudizzju. Jekk il-​midneb ma joqgħodx għad-​deċiżjoni tagħhom, Ġesù jikkonkludi, “ħa jkun għalik sewwa sew bħal bniedem tal-​ġnus u bħal kollettur tat-​taxxi.”

F’li jieħdu deċiżjoni bħal din, l-​indokraturi jridu jżommu mill-​qrib mal-​istruzzjonijiet fil-​Kelma taʼ Jehovah. B’hekk, meta huma jsibu individwu ħati u li jistħoqqlu kastig, il-​ġudizzju ‘se jkun diġà ġie marbut fis-​sema.’ U meta huma ‘jħollu fuq l-​art,’ jiġifieri, isibu lil xi ħadd innoċenti, se jkun diġà ġie ‘maħlul fis-​sema.’ F’deċiżjonijiet ġudizzjarji bħal dawn, igħid Ġesù, “fejn hemm tnejn jew tlieta miġburin flimkien f’ismi, hemm jien qiegħed f’nofshom.” Mattew 18:​6-20; Mark 9:​38-50; Luqa 9:​49, 50.

▪ Fi żmien Ġesù għala ma kienx hemm għalfejn wieħed jakkumpanjah?

▪ Kemm hi serja l-​kwistjoni taʼ li wieħed jagħti gambetta lil wieħed żgħir, u Ġesù kif juri l-​importanza taʼ wħud żgħar bħal dawn?

▪ X’inhu li x’aktarx iqanqal lil Ġesù jinkuraġġixxi lill-​appostli biex ikollhom il-​melħ bejniethom?

▪ X’sinjifikat hemm għal li wieħed ‘jorbot’ u li wieħed ‘iħoll’?